Türkiyə istehsalı Diriliş Ərtoğrul serialından kadr

Türkiyə telekanallarına baxmaq dövrü bitdi

13352
(Yenilənib 12:57 12.03.2018)
Televiziya məkanının rəngləri qarışdı, bulandı və hamısı eyni rəngə boyandı

BAKI, 12 mart — Sputnik. Cəmiyyətlərin ən böyük gözəlliyi müxtəliflikdir, fərqli mədəniyyətlərin, düşüncə tərzlərinin, insanların bir araya gəlib rəngarəng bir sistem yaratmalarıdır. Bu sistemin içərisində, bəlli hüquq sərhədləri çərçivəsində, hər kəsin arzuladığı, zövq aldığı şəkildə yaşaması, düşüncəsini və potensialını ortaya qoyması cəmiyyətin xoşbəxtliyini və orada yaşamın marağını təmin edir.

Yeknəsəq cəmiyyətlər isə, birmənalı olaraq cansıxıcı və darıxdırıcıdır. Burada hər şey eyni rəngə bürünür, hər kəs eyni cür düşünür, eyni cür danışır, eyni tezislərdən sitatlar gətirir. Hər tərəfdə analoji proseslər, bənzər insan və düşüncə tərzləri, bir-birini yamsılamalar, təkrarçılıq və sair.

Uzun illərdir özümə televiziyaya baxmamaqla bağlı sanksiya tətbiq edirəm. Amma tam deyil, Türkiyə telekanallarını izləyirdim. Cəmiyyətin güzgüsü olan teleməkanda bir canlılıq vardı. Qızğın fikir mübadilələri, əks yanaşmaların toqquşması və bundan doğan intellektual nəticələr… Saqqız kimi ekrana yapışıb qalırdıq.

Eləcə də, bədii filmləri, serialları. İstər sevgi-məhəbbət, istər kriminal aləm, istərsə də siyasi prosesləri əks etdirən bu ekran əsərlərini elə ustalıqla təqdim edirdilər ki, hansısa bölüm bitdiyində, qarşıdakı bir həftənin intizarı canımızdan çıxmırdı. Rəngarəng ssenarili filmləri izlədikcə, virtual da olsa, bir dünyadan başqasına keçid edir, öz duyğularımızı yeniləyirdik.

Və gün gəldi, qardaş ölkənin televiziya məkanının rəngləri qarışmağa, bulanmağa, ardınca isə eyni rəngə boyanmağa başladı. Çoxtərəfli debatlar öz yerini hər kəsin dəfin eyni tərəfinə döşədəyi, eyni hədəflərə güllə atıb, eyni sağlıqlara badə qaldırdığı yığıncaqlara verdi.

Habelə, ailə-məişət mövzulu serialların qəhrəmanları belə, "Vatan mücadiləsi" aparmağa, dəli kimi sevdiyi qıza eşq elan etmək əvəzinə, "xarici qara qüvvələrin bəd əməlləri barədə" leksiya oxumağa başladı. Ard-arda ekranlaşdırılan bütün tarixi serialların əsas obrazları mütləq şəkildə eyni jarqonu, eyni nitq üslubunu təqlid etməyə və eyni şüarları hayqırmağa təhkim edildi.

Məsələn, təsəvvür edin ki, gənc aşiq-məşuq dəniz kənarında görüş təyin edir və aralarında təxminən bu mövzuda söhbət gedir: "Biz bu milləti kimsəyə yedirməriiik. Şəhidər ölməəəz, vətən bölünməəəz. Bizim davamız haqq davasıdır, sonuna qədər yolumuzdan dönmək yoxdur".

Ya da hansısa Osmanlı sultanı qəbul etdiyi əcnəbi səfirlə diplomatik nəzakət qaydasında davranmaq əvəzinə, əlindəki əsanı yerə çırparaq, "eeey soysuz, eeey kalleş, eeey şərəfsiz" deyə təhqir edir və az qalır təpiyin altına salıb döysün. Özü çırpmasa da, bəzi hallarda yavəri qapının ardında bir-iki ilişdirir həmin diplomatik toxunulmazlığı olan şəxsə.

Vətənimi də sevirəm, millətimi də. Amma bu cür boğazdan yuxarı, əndazəni aşmış şəkildə, bütün digər dəyərləri görməzdən gələrək deyil. Vətəni vətən, Milləti millət edən İNSANı bu qədər şablonlaşdıraraq deyil. Mən Vətənimi və Millətimi daha böyük sevirəm.

Və bir də zamanın nə qədər dəyərli olduğunu bilirəm. Zaman o qədər qiymətlidir ki, onu hay-həşiri seyr etməyə xərcləməyi qəbul edə bilmərəm. Ona görə də bu gündən etibarən özümə Türkiyə telekanallarını izləməyi də qadağan edirəm!

Qalanlara iyi seyirlər…

13352
Teqlər:
vətən, televiziya məkanı, ekran, fərqlilik, müxtəliflik, düşüncə, fikir, debat, millət, efir, serial, telekanal, insan, Türkiyə, cəmiyyət
Əlaqədar
Telekanalda qadınlara məsləhət: Ərinizin ayaqlarından öpün...
Əcnəbi cütlük telekanalda Bakıdakı bal ayından danışıblar
Parlamentdə telekanal rəhbərlərinə sərt ittiham: "Senzura yoxdur deyə..."
“Çobanların rəqsi” Rusiya telekanalında
Telekanal binasına hücum oldu
Bakıda yağışlı hava

Sabaha hava proqnozu açıqlandı

0
Tibbi-meteoroloji proqnoza gəldikdə isə, oktyabrın 22-23-də Abşeron yarımadasında meteoroloji amillərin mülayim tərəddüdü meteohəssas insanlar üçün əsasən əlverişlidir.

BAKI, 21 oktyabr — Sputnik. Sabah Bakıda və Abşeron yarımadasında havanın dəyişkən buludlu olacağı, arabir tutulacağı, günün birinci yarısında bəzi yerlərdə duman olacağı, çiskinli yağış yağacağı gözlənilir. Mülayim cənub küləyi əsəcək.

Sputnik Azərbaycan Milli Hidrometeorologiya Xidmətinin verdiyi məlumata istinadla xəbər verir ki, havanın temperaturu Bakıda və Abşeron yarımadasında gecə 12-14, gündüz 18-20 dərəcə isti olacaq. Atmosfer təzyiqi normadan yüksək 771 mm civə sütunundan 767 mm civə sütununa enəcək, nisbi rütubət gecə 70-80, gündüz 55-60 faiz təşkil edəcək.

Oktyabrın 22-də Azərbaycanın rayonlarında hava şəraitinin əsasən yağmursuz keçəcəyi, lakin gecə və səhər bəzi yerlərdə duman olacağı, yağış yağacağı gözlənilir. Mülayim şərq küləyi əsəcək. Havanın temperaturu gecə 10-15, gündüz 18-23, dağlarda gecə 3-7, gündüz 14-18 dərəcə isti olacaq.

Tibbi-meteoroloji proqnoza gəldikdə isə, oktyabrın 22-23-də Abşeron yarımadasında meteoroloji amillərin mülayim tərəddüdü meteohəssas insanlar üçün əsasən əlverişlidir.

0
Moskvada tibb işçiləri, arxiv şəkli

Qonşu ölkədə bir gündə 300-dən çox şəxs öldü

27
(Yenilənib 12:46 21.10.2020)
Ümumilikdə, Rusiyada bu xəstəliyə yoluxanların sayı 1447335-ə çatıb. Rusiyada pandemiya yayılandan 24952 nəfər COVID-19-dan vəfat edib.

BAKI, 21 oktyabr — Sputnik. Son bir sutka ərzində Rusiyada 15700 koronavirusa yeni yoluxma halı aşkarlanıb. Sputnik Azərbaycan Rusiya Operativ Qərargahına istinadən xəbər verir ki, bir gün ərzində qonşu ölkədə 317 nəfər ölüb.

Ümumilikdə, Rusiyada bu xəstəliyə yoluxanların sayı 1447335-ə çatıb. Rusiyada pandemiya yayılandan 24952 nəfər COVID-19-dan vəfat edib. Ölkədə bu virusdan sağalanların sayı 1096560-a çatıb.

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 40,7 milyonu keçib, 1,2 mindən çox adam isə virus səbəbilə ölüb.

Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.

27