Maliyyə hesabatı, arxiv şəkli

Azərbaycanda yeni fond yaradılır: Niyyəti xoşməramlıdır, amma vəsaiti...

902
(Yenilənib 18:00 09.03.2018)
"Elə olmalıdır ki, o fond işləyən müəssisələrə yük olmasın, həm dövlətin, həm də digər vəsaitlərin hesabına bu fond formalaşsın"

Xalid Məmmədov, Sputnik Azərbaycan

BAKI, 9 mart — Sputnik. "Əmək və Əhalinin Sosial Müdafiəsi Nazirliyi ölkənin sığorta şirkətləri ilə Əməyin Mühafizəsi Fondunun yaradılması barədə danışıqları davam etdirir".

Bunu əmək və əhalinin sosial müdafiəsi naziri Səlim Müslümov deyib. Nazirin sözlərinə görə, bu Fondun yaradılması Əmək Məcəlləsi ilə nəzərdə tutulub və onun yaradılması Azərbaycanda əməyin mühafizəsi sahəsini təkmilləşdirməyə kömək edəcək.

"Bu gün Azərbaycanda "İstehsalatda bədbəxt hadisələrdən və peşə xəstəliklərindən icbari sığorta haqqında" qanun mövcuddur. Amma bu qanuna görə, sığorta dövlət tərəfindən yox, bu sahədə lisenziya sahib olan sığorta şirkətləri tərəfindən həyata keçirilir", — nazir deyib.

Vüqar Bayramov
Vüqar Bayramov

Məsələ ilə bağlı Sputnik Azərbaycan-a açıqlama verən iqtisadçı-ekspert Vüqar Bayramov deyib ki, Əməyin Mühafizəsi Fondunun (ƏMF) yaradılması Əmək Məcəlləsində nəzərdə tutulan institusional islahatlardan biridir. Həmin Məcəllə ölkədə bu fondun yaradılmasını nəzərdə tutur.

V.Bayramov əlavə edib ki, qanunvericiliyə əsasən, ƏMF Əmək və Əhalinin Sosial Müdafiəsi Nazirliyi (ƏƏSMN) tərəfindən yaradılacaq: "Fondun yaradılması vaxt tələb edir. Çünki burada bir tərəfdən Əməyin Mühafizəsi Fondunun, digər tərəfdən isə Əməyin Mühafizəsi üzrə Milli İnformasiya Mərkəzinin yaradılmasından söhbət gedir. Bu da risklərin qiymətləndirilməsi baxımından vacibdir".

Ekspertin fikrincə, Əməyin Mühafizəsi Fondunun yaradılmasında əsas məqsəd əməyin mühafizəsinə həm ictimai, həm də dövlət nəzarətinin gücləndirilməsinə nail olmaqdır: "Eləcə də burada söhbət əməyin mühafizəsi vasitələrinin istehsalı ilə məşğul olan müəssisələrin sayının artırılmasından gedir".

İqtisadçı bildirib ki, beynəlxalq təcrübədə, xüsusən də Avropa ölkələrində əməyin mühafizəsi ilə bağlı xüsusi fondlar fəaliyyət göstərir: "Hətta bir sıra hallarda belə fondlar özəl fondlar kimi də fəaliyyət göstərir. Yəni dövlət fondları deyil, həm də özəl fondlar kimi fəaliyyət göstərir".

V.Bayramov onu da xatırladıb ki, əvvəllər Azərbaycanda əməyin mühafizəsi ilə bağlı xüsusi qanun var idi: "Daha sonra isə bu, Əmək Məcəlləsinə inteqrasiya olundu. Burada həm sağlamlıq, həm də təhlükəsizlik baxımından əməyin mühafizəsindən söhbət gedir. Sığorta və eləcə də institusional şirkətlərin Əməyin Mühafizəsi Fondunun yaradılmasında iştirakı çox vacibdir. Çünki bu, həm də maliyyələşdirmə tələb edir".

İqtisadçının sözlərinə görə, burada bir tərəfdən bədbəxt hadisələrdən sığortalanma həyata keçirilir: "Deməli, sığorta şirkətləri birbaşa mühafizə ilə bağlı fəaliyyətdən gəlir əldə etmək imkanlarına malikdirlər. O baxımdan sığorta şirkətlərinin də məhz bu fondun yaradılmasında fəal iştirakına ehtiyac var".

"Digər tərəfdən isə burada çox fərqli fəaliyyətlərin həyata keçirilməsinə ehtiyac var. Burada söhbət yalnız sahibkarlıq fəaliyyətindən getmir. Eyni zamanda, digər qurumlarda, o cümlədən özəl sektora məxsus olmayıb, amma əməyin yaradıldığı qurumlarda əmək fəaliyyətinə nəzarətdən söhbət gedir", — o deyib.

İqtisadçının qənaətincə, bu baxımdan yalnız nəzarət deyil, həm də bu istiqamətdə imkan və biliklərin artırılmasına ehtiyac var: "Bu da vəsait tələb edir. Əməyin Mühafizəsi Fondunun yaradılması sadəcə standartlara əməl edilməsi deyil, həm də vəsaitin xərclənməsidir. O baxımdan, digər investorların prosesə cəlb edilməsinə ehtiyac var".

V.Bayramov düşünür ki, prosesin reallaşması və xüsusən digər investorların prosesə cəlb edilməsi yolu ilə Əməyin Mühafizəsi Fondunun yaradılması realdır: "Buna ehtiyac var. Amma burada birmənalı şəkildə özəl sektorun geniş iştirakçılığının təmin edilməsinə ehtiyac var. Yəni dövlət bu fondun yaradılmasında sadəcə institusional baxımdan iştirak etməlidir. Amma digər məsələlərdə sığorta şirkəti, digər investor təşkilatlar birbaşa iştirak etməlidir ki, özəl sektor hesabına əməyin mühafizəsi həyata keçirilə bilsin".

O bildirib ki, bununla bağlı hələlik qaydalar müəyyənləşməyib: "Amma nəzərə alaq ki, bədbəxt hadisələrdən sığorta var və özəl şirkətdə çalışanlar praktik olaraq sığorta ödəyirlər. Əgər bədbəxt hadisələrdən dolayı sığorta ödənilirsə, düşünmürəm ki, ayrıca olaraq özəl şirkətin Əməyin Mühafizəsi Fonduna vəsait ödənilməsinə ehtiyac var. Çünki bu, sahibkarların xərclərinin artmasına gətirib çıxarar".

Əli Əlirzayev
© Photo : UNEC
Əli Əlirzayev

"Bu baxımdan sahibkarların sözügedən fonda məcburi ödənişlərin həyata keçirilməsi arzuolunan deyil. Könüllü şəkildə sığorta şirkətləri və digər şirkətlər bu fondun yaradılmasında iştirak etmək istəyirsə, bunu təşviq etmək olar. Amma bütün hallarda məcburi ödənişlərin tətbiq edilməsi arzuolunan deyil", — ekspert əlavə edir.

Azərbaycan Dövlət İqtisad Universitetinin (UNEC) "Sosial sferanın iqtisadiyyatı və idarə olunması" kafedrasının müdiri, professor Əli Əlirzayev isə Sputnik Azərbaycan-a açıqlamasında deyib ki, ümumiyyətlə, sığortalama prosesi hər bir ölkədə, hə bir cəmiyyətdə vacibdir: "Əməyin də sığortalanması bir çox məqsədlər üçün istifadə olunmalıdır. Bu fond yaradılarsa, ehtiyat, müəyyən maliyyələşmə mənbəyi olar. Bədbəxt hadisələrdən qorunmaq, istehsal prosesini genişləndirmək, özünəməşğulluğu, əmək ehtiyatlarını artırmaq üçün bu fondan istifadə etmək olar".

Professor vurğulayıb ki, belə bir fondun yaradılması mühüm əhəmiyyət kəsb edir və bundan istifadə olunmalıdır. Onun verilməsində müəyyən bir mexanizm olmalıdır: "Elə olmalıdır ki, o fond işləyən müəssisələrə yük olmasın. Həm dövlətin, həm də digər vəsaitlərin hesabına bu fond formalaşsın. Burada fərdi, kollektiv, müəssisə və ölkənin maraqları olmalıdır".

Qeyd edək ki, nazir Səlim Müslümov "sığorta təşkilatları Əməyin Mühafizəsi Fondunun yaradılmasında fəal iştirak etməlidir" açıqlamasını da verib: "Bu, sığorta şirkətlərinə fondun işində iştirak etməyə və daxilolmalara nəzarət etməyə imkan verəcək. Hesab edirəm ki, həm də sığorta şirkətlərinin gəlirlərinin bir hissəsi bu fonda yönəldilməlidir".

902
Teqlər:
Əməyin Mühafizəsi Fondu, özəl, Əli Əlirzayev, qanunvericilik, istehsalat, bədbəxt hadisə, Sputnik Azərbaycan, dövlət, vəsait, Əmək Məcəlləsi, Səlim Müslümov, Əmək və Əhalinin Sosial Müdafiəsi Nazirliyi, sahibkar, professor, ekspert, Vüqar Bayramov, Azərbaycan, nazir
Əlaqədar
İlham Əliyev bu sahənin əməkdaşlarının maaşlarını artırdı
Ekspert: “Qeyri-rəsmi əmək bazarının qarşısını alınmaq hələlik mümkün deyil”
Bu təşkilat və müəssisələrdə çalışan işçilərin əməkhaqları artırılıb

Qəbul imtahanlarında pulsuz iştirak edəcək vətəndaşların siyahısı genişləndirilib

5
Yeni Sərəncamla ali və orta ixtisas təhsili müəssisələrinə qəbul imtahanlarında iştirakı dövlət büdcəsinin vəsaiti hesabına həyata keçirilən kateqoriyaya aid vətəndaşların siyahısı daha da genişləndirilib.

BAKI, 7 may - Sputnik. Ali və orta ixtisas təhsili müəssisələrinə tələbə qəbulunu stimullaşdırmaq və əhalinin sosial müdafiəsini daha da gücləndirmək məqsədi ilə “Azərbaycan Respublikasında ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər haqqında” Azərbaycan Respublikası Prezidentinin 2017-ci il 24 fevral tarixli Sərəncamında dəyişiklik edilib.

Bu barədə Dövlət İmtahan Mərkəzindən (DİM) məlumat verilib.

Dəyişikliyə əsasən “Azərbaycan Respublikasında ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər haqqında” Azərbaycan Respublikası Prezidentinin 2017-ci il 24 fevral tarixli 2694 nömrəli Sərəncamının (Azərbaycan Respublikasının Qanunvericilik Toplusu, 2017, № 2, maddə 271) 1.2-ci bəndinin sonunda nöqtə işarəsi nöqtəli vergül işarəsi ilə əvəz olunub və aşağıdakı məzmunda 1.3 – 1.7-ci bəndlər əlavə edilib:

“1.3. Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin uşaqları;

1.4. şəhid ailəsinin üzvləri;

1.5. valideynlərini itirmiş və valideyn himayəsindən məhrum olmuş uşaqlar;

1.6. məcburi köçkün statusu olan şəxslər;

1.7. I və II dərəcə əlilliyi müəyyən edilmiş şəxslər, o cümlədən sağlamlıq imkanları məhdud 18 yaşınadək uşaqlar.”.

Beləliklə, yeni Sərəncamla ali və orta ixtisas təhsili müəssisələrinə qəbul imtahanlarında iştirakı dövlət büdcəsinin vəsaiti hesabına həyata keçirilən kateqoriyaya aid vətəndaşların siyahısı daha da genişləndirilib.

Xatırladaq ki, “Azərbaycan Respublikasında ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər haqqında” Azərbaycan Respublikası Prezidentinin 2017-ci il 24 fevral tarixli Sərəncamına əsasən orta ixtisas təhsili müəssisələrinə və ali təhsil müəssisələrində ali təhsilin bakalavriat (tibb təhsili üzrə əsas təhsil) səviyyəsinə tələbə qəbulu ilə bağlı DİM-in keçirdiyi imtahanlarda iştirak etmək üçün Tarif (qiymət) Şurasının müəyyən etdiyi qiymətlərə uyğun olaraq, ümumi təhsil müəssisələrini bitirən aşağıdakı kateqoriyadan da olan Azərbaycan Respublikası vətəndaşlarının imtahanlarda iştirakı üçün tələb edilən məbləğin ödənilməsi dövlət büdcəsinin vəsaiti hesabına həyata keçirilir:

1.1. ilk dəfə orta ixtisas təhsili müəssisələrinə tələbə qəbulu ilə bağlı imtahanda iştirak üçün müraciət etmiş abituriyentlər;

1.2. ilk dəfə ali təhsilin bakalavriat (tibb təhsili üzrə əsas təhsil) səviyyəsinə tələbə qəbulu ilə bağlı imtahanda iştirak üçün müraciət etmiş abituriyentlər.

5
WhatsApp loqosu, arxiv şəkli

"Whatsapp"a tamam, yoxsa davam - sosial şəbəkəyə hansı məlumatlarımız lazımdır?

18
(Yenilənib 19:47 07.05.2021)
"Əgər bu şərtlərlə razılaşmaq istəmirsinizsə, o zaman "Telegram", "Signal" və bu kimi digər paltformalardan isitfadə etmək olar. Lakin bununla bilmək olmaz ki, həmin platformalar da gələcəkdə bu siyasətdən istifadə edəcək, ya yox" - Fərid Pərdəşünas.

Nigar İsgəndərova, Sputnik Azərbaycan

BAKI, 7 may — Sputnik. "Whatsapp"la bağlı yayılan xəbərlər əslində səhv başa düşülür. Burada məlumatların ötürülməsindən söhbət getmir. 

Lakin istifadəçilər elə bilirlər ki, bu sosial şəbəkədəki şəxsi məlumatlar, video və fotolar yayılır, xeyr".

Bu barədə Sputnik Azərbaycan-a açıqlamasında texnobloger Fərid Pərdəşünas son günlər adıçəkilən sosial şəbəkənin idarəetmə sistemindəki dəyişikliklər, mesajların, şəxsi məlumatların yayılmasına münasibət bildirərkən deyib.

O, "Whatsapp" tərəfindən "Facebook"a ötürüləcək məlumatlara isə bu cür aydınlıq gətirib:

"Burada söhbət ad, soyad, şəxsin sonuncu dəfə onlayn olma vaxtı, sosial şəbəkədəki davranış tarixçələrindən gedir. Yəni şəxs hansı müddətdə bu sosial şəbəkəyə daxil olur və s. bu tip məlumatlar "Whatsapp" tərəfindən "Facebook"a göndərilir və reklam alətlərində, "Whatsapp Biznes"də bizneslərin optimallaşdırılması, hədəf auditoriyalarının müəyyən olunmasında istifadə olunacaq. Yəni fərdi məlumatların ötürülməsi ilə bağlı heç bir təhlükə yoxdur".

Həmsöhbətimiz deyir ki, bu proses illərdir belə davam etsə də, artıq sosial şəbəkə bunu rəsmi olaraq elan etməyə başlayıb: "Sosial şəbəkə istifadəçilərə öncədən bu haqda məlumat verir. Bu, əslində, belə olmalıdır və istifadəçilər bununla razılaşmalıdırlar. Bu səbəbdən düşünürəm ki, platforma dəyişməyə, başqa sosial şəbəkə platformasına axın etməyə, söz-söhbət yaratmağa ehtiyac yoxdur. Əgər bu şərtlərlə razılaşmaq istəmirsinizsə, o zaman "Telegram", "Signal" və bu kimi digər paltformalardan isitfadə etmək olar. Lakin bununla bilmək olmaz ki, həmin platformalar da gələcəkdə bu siyasətdən istifadə edəcək, ya yox".

18
Teqlər:
istifadəçi, ekspert, siyasət, yeni, "Whatsapp"
Qanvermə, arxiv şəkli

Mütəmadi olaraq qan vermək infarkt xərçəng riskini azaldır

0
(Yenilənib 23:15 07.05.2021)
Mütəmadi qan vermək həm də vaxtaşırı mini check-up-dan keçmək deməkdir. Çünki qan verməmişdən əvvəl donordan müxtəlif analizlər götürülür.

BAKI, 7 may — Sputnik. Mütəmadi şəkildə qan vermək infarkt və xərçəng riskini azaldır, ürək-damar xəstəliklərinin qarşısını alır, xolesterolu və qandakı şəkərin səviyyəsini normallaşdırır. Bu barədə Türkiyə Səhiyyə Elmləri Universitetinin müəllimi, hematologiya üzrə mütəxəssis, professor Erdal Kurtoğlu Anadolu Agentliyinə müsahibəsində bildirib. Onun sözlərinə görə, qan vermək hüceyrələrin yenilənməsinə səbəb olur.

Donorlardan alınan qanın fərqli komponentlərə ayrıldığını bildirən professor qeyd edib ki, beləliklə, könüllü şəkildə verilən hər vahid qan eritrosit, trombosit və plazma şəklində üç nəfərin həyatını xilas edir.

Kurtoğlu onu da bildirib ki, qan vermək üçün maneə yaratmayan hər hansı bir sağlamlıq problemi olmayan 18-65 yaş arası hər kəs donor kimi qan verə bilər.

Temperaturun yüksəlməsi ilə müşayiət olunan xəstəlik keçirən insanlardan isə ən azı 2 həftə qan alınmamalıdır. Bundan başqa, cərrahiyyə əməliyyatı keçirənlərin, akupunktura, döymə, və pirsinq etdirənlərin də 12 ay ərzində donor kimi qan verməsi qadağandır.

"Kişilər 90 gündən bir, qadınlar isə 120 gündən bir donor kimi qan verə bilərlər", – deyə professor qeyd edib.

Mütəxəssis onu da bildirib ki, COVID-19-a qarşı peyvənd olunanlar da donor kimi qan verə bilərlər. Özü də bunun üçün peyvəndin üstündən müəyyən müddətin keçməsinə ehtiyac yoxdur.

Kurtoğlu qan donorluğunun insanlara mənəvi rahatlıq bəxş etdiyini də bildirib.

"Mütəmadi qan donorluğunu tövsiyə edirik. Çünki bunun infarkt və xərçəng riskini azaltması, qan-damar xəstəliklərinin qarşısını alması, xolesterolu və qan şəkərini balanslaşdırmasına dair tibbi məlumatlar mövcuddur. Bundan başqa, mütəmadi qan vermək həm də vaxtaşırı mini check-up-dan keçmək deməkdir. Çünki qan verməmişdən əvvəl donordan müxtəlif analizlər götürülür. Ən əsası isə qan vermək, beləliklə də, insanlara faydalı olduğunu bilmək adama mənəvi rahatlıq bəxş edir", – deyə o vurğulayıb.

0