Bayram yarmarkası

Kişilərin hədiyyə qayğısı: "Artıq qadınları təkcə güllə sevindirmək mümkün deyil"

157
(Yenilənib 16:11 07.03.2018)
"Əvvəllər bayramlar daha sadə keçirilirdi, insanlar daha münasib hədiyyələrlə qane ola bilirdilər"

İradə Cəlil, Sputnik Azərbaycan

BAKI, 7 mart — Sputnik. Sabah 8 Mart Beynəlxalq Qadınlar Günüdür. Artıq şəhərin bir çox yerlərində bayram yarmarkaları açılıb. Bu yarmarkalarda müxtəlif hədiyyələrlə yanaşı, Novruz çərəzləri də satılır. Satıcılar deyir ki, belə yarmarkalar hər il təşkil olunur. Bu il də "28 May", "Nərimanov", "İnşaatçılar", "Əhmədli" metrostansiyaları yaxınlığında yarmarkalar qurulub.

Bayram yarmarkası
© Sputnik / Irade JELIL
Bayram yarmarkası

Sputnik Azərbaycan-ın əməkdaşı bayram çadırlarına baş çəkərək qiymətlərlə tanış olub. "28 May" yaxınlığında qurulmuş çadırlarda qiymətlər münasib, alıcı kütləsi çox idi. Bu çadırlarda müxtəlif güllər, həmçinin dibçək gülləri, açıqcalar, fincanlar, şüşə qablar, yumşaq oyuncaqlar, müxtəlif suvenirlər, ətirlər satılırdı.

Satıcı Vüsal Əliyevin sözlərinə görə, əvvəllər Novruz öncəsi belə yarmarkalar çox təşkil edilib. Amma həmin yarmarkalar bir qədər Novruza yaxın günlərdə təşkil olunurdu. Bu yarmarkalar isə, həm də 8 Mart bayramı üçün nəzərdə tutulub.

Bayram yarmarkası
© Sputnik / Irade JELIL
Bayram yarmarkası

V.Əliyev bildirdi ki, yarmarkada satılan məhsulların qiyməti hər büdcəyə uyğundur: "Alıcı var. Nə qədər qəribə olsa da, alıcılar arasında qadınlar çoxluq təşkil edir. Yəqin məktəb müəllimləri üçün alırlar. Valideynlər daha çox ətir almağa üstünlük verirlər. Burada hər qiymətə ətir var: 5-manatdan 40 manata qədər. Buradan 2 manatlıq fincan da almaq olar, 5 manatlıq gül də. Yəni kim nə istəsə, var".

Digər satıcı Əhliman Səfərovun sözlərinə görə isə, bu yarmarkalar müvəqqətidir. Çərşənbə axşamından etibarən həmin yarmarkada Novruz bayramına aid olan ərzaqlar satılacaq: "Bizə deyiblər ki, ərzaq və digər məişət əşyaları, hədiyyələr sata bilərik. Buna görə də kim nə istəyir, satır".

Satıcı qeyd etdi ki, bu il qiymətlər münasib olsa da, satış aşağıdır: "Keçən il bu vaxt yaxşı alver var idi. Görünür, insanlar bir qədər də kasıblaşıb".

Yarmarkadakı alıcılar satılan məhsullardan narazı olmasalar da, pulun azlığından şikayətlənirlər. Poliklinikada tibb bacısı işləyən Aytən Məlikova dedi ki, aldığı maaş az olduğu üçün heç özünə belə, hədiyyə ala bilmir.

Bayram yarmarkası
© Sputnik / Irade JELIL
Bayram yarmarkası

Müəllim Əhməd Nəcəfov isə bayramları ötən illərlə müqayisə etdi: "Əvvəllər bayramlar daha sadə keçirilirdi. İnsanlar daha münasib hədiyyələrlə qane ola bilirdi. İndi vəziyyət dəyişib. Artıq hansısa qadını təkcə güllə sevindirmək mümkün deyil. Tək gül alıb verirsən, elə baxır ki, az qala alıb, başına çırpacaq. Məcbursan ki, heç olmasa bir 20 manatlıq hədiyyə də alasan. Ana var, bacı var, həyat yoldaşı, iş yoldaşı, hamısına hədiyyə verəndə, azı 100 manat xərcin çıxır".

Qiymətlərə gəldikdə isə, alıcılar yarmarkalardakı qiymətlərdən o qədər də narazı deyillər. Düşünürlər ki, əgər insanlar azla qane ola bilsələr, bazardakı qiymətlərin də fərqi olmaz.

Bayram yarmarkası
© Sputnik / Irade JELIL
Bayram yarmarkası

Xatırladaq ki, bazarda qızıl güllərin biri 2-5 manat, yumşaq oyuncaqlar 5-30 manat, balaca dibçəklər 3-5 manat, böyüklər 40 manata qədər, açıqcalar 1-5 manat, şəkil üçün çərçivə 2-8 manat satılırdı. Satıcılar bildirdilər ki, sabahdan etibarən yarmarkada münasib qiymətlərə hazır buketlər də satılacaq.

157
Teqlər:
bayram yarmarkaları, 8 Mart Beynəlxalq Qadınlar Günü, satıcı, Novruz bayramı, kişi, hədiyyə, alıcı, qadın
Əlaqədar
Bayram günü bu qurum da işləməyəcək
Bayram günlərində avtovağzalda nə baş verib? - AÇIQLAMA
Əhalinin nəzərinə: Bayram günlərində xüsusi rejimə keçiləcək
Bayram nigarançılığında olanlar üçün: Bakının "su" və "od" qiymətli bazarları
Avtobus xüsusi zolağda

Sabah bir neçə marşrut avtobusunun hərəkət xətti dəyişdiriləcək

2
(Yenilənib 17:42 25.02.2021)
Müntəzəm xətlər üzrə avtobusların hərəkəti digər nəqliyyat vasitələrinin yönləndirildiyi alternativ küçə və prospektlərdən keçməklə təşkil ediləcək

BAKI, 25 fevral — Sputnik. 26 fevral Xocalı soyqırımının 29-cu ildönümü günü Xətai rayonu, Xocalı prospekti, "Ana fəryadı" abidəsinin qarşısında keçiriləcək anım tədbiri ilə əlaqədar həmin istiqamətdə nəqliyyat vasitələrinin hərəkətinə tətbiq edilən məhdudiyyət səbəbindən bir sıra müntəzəm marşrut xətləri üzrə avtobusların hərəkəti də müvəqqəti olaraq dəyişdiriləcək.

Bakı Nəqliyyat Agentliyindən Sputnik Azərbaycan-a verilən məlumata görə, dəyişiklik ümumilikdə 7 müntəzəm marşrut xəttini (4, 21, 30, 32, 46, 49 və 175) əhatə edir. Qeyd olunan müntəzəm xətlər üzrə avtobusların hərəkəti digər nəqliyyat vasitələrinin yönləndirildiyi alternativ küçə və prospektlərdən keçməklə təşkil ediləcək.

Dəyişiklik 26.02.2021-ci il səhər saat 08:00-dan məhdudiyyət tam aradan qaldırılanadək davam edəcək.

2
Teqlər:
Bakı, dəyişiklik, hərəkət sxemi, marşrut avtobusu, marşrut, anım günü, Xocalı faciəsi
İlham Əliyev Bakının Ramana qəsəbəsində mənzillərin təqdim olunması mərasimində

Azərbaycan Prezidenti: "Ermənistanda bizdə olan proqram mövcud deyil"

5
(Yenilənib 17:36 25.02.2021)
"Ermənistanda bizdə olan proqram mövcud deyil. Müharibədə həlak olmuş insanların yaxınlarına nəinki ev, bir daxma da verilmir. Hər şey müqayisədə ölçülür"

BAKI, 25 fevral — Sputnik. "Bu gün Şağan qəsəbəsində reabilitasiya mərkəzinin əsaslı təmirdən sonra açılışı da olub. Orada da minlərlə qazi hər il müalicə alacaq, reabilitasiyadan keçəcək, öz sağlamlığını bərpa edəcək. Eyni zamanda, müharibə dövründə əlini, qolunu itirmiş qazilərimiz üçün də ən müasir protezlər sifariş edilibdir. Mənə bu gün verilən məlumata görə, 300-dən çox qazimiz bu protezlərlə təmin ediləcək. Bizim ayaqlarını itirmiş qazilərimizin artıq bir neçəsi bu protezlərlə təmin edilib və onlar normal həyata dönə biliblər. Bu protezlər dünyanın aparıcı şirkətlərinin məhsuludur, ən müasir protezlərdir. Bu protezlər imkan verəcək ki, bizim qazilərimiz normal həyata qayıda bilsinlər".

Sputnik Azərbaycan-ın məlumatına görə, bunu Azərbaycan Prezidenti İlham Əliyev Ramana qəsəbəsində şəhid ailələri və müharibə əlillərinə mənzillərin təqdim olunması mərasimində çıxışı zamanı deyib.

İlham Əliyev Bakının Ramana qəsəbəsində şəhid ailələri və müharibə əlillərinə mənzillərin təqdim olunması mərasimində
© Official website of President of Azerbaijan Republic

Prezident bildirib ki, dövlət şəhid ailələri, müharibə əlilləri üçün əlindən gələni edir: "Mənim bu sahədəki siyasətim birmənalıdır. Son 17 il ərzində şəhid ailələri ilə müxtəlif tədbirlərdə dəfələrlə görüşmüşəm. Bu günə qədər 9200-ə yaxın şəhid ailəsi, müharibə əlili dövlət tərəfindən mənzillərlə təmin edilib. Təkcə keçən il 1572 mənzil verilibdir. Bu il isə 3 minə yaxın mənzil veriləcək. Beləliklə, həm Birinci, həm İkinci Qarabağ müharibəsində şəhid olmuş övladlarımızın Bakıda, Sumqayıtda, Abşeron rayonunda yaşayan ailələrinə bu ilin sonuna qədər mənzillər veriləcək. Yəni, bu proqramı biz Bakı, Sumqayıt və Abşeron rayonunda bu ilin sonuna qədər tam icra edəcəyik. Digər şəhər və rayonlarımızda yaşayan şəhid ailələri üçün binaların, fərdi evlərin tikintisi davam etdirilir. Əminəm ki, yaxın gələcəkdə bu proqram tam icra olunacaqdır. Onu da bildirməliyəm ki, müharibə əlillərinə 7200-ə yaxın minik avtomaşını verilib.

Mən bu rəqəmləri sadalamaqla dövlətin bu kateqoriyadan olan insanlara qayğısını bir daha dilə gətirmək istəyirəm. Bildirmək istəyirəm ki, Azərbaycan bu sahədə də dünya miqyasında ən qabaqcıl yerlərdədir.

Dünyada müharibələr çox olub, itkilər çox olub. O qədər də uzaq olmayan tarixə nəzər salsaq, görərik ki, müxtəlif ölkələrdə müharibələrdə həlak olmuş insanların yaxınlarına heç vaxt bizdəki qədər qayğı, diqqət göstərilməyib. Onu da bildirməliyəm ki, Ermənistan ordusunda da itkilər olub və İkinci Qarabağ müharibəsində müxtəlif rəqəmlər səslənir. Bizdə olan məlumata görə, təqribən 6-7 min işğalçı məhv edilibdir. Onların birinin də ailəsinə Ermənistan dövləti heç bir yardım etməyib.

Ümumiyyətlə, Ermənistanda bizdə olan proqram mövcud deyil. Müharibədə həlak olmuş insanların yaxınlarına nəinki ev, bir daxma da verilmir. Hər şey müqayisədə ölçülür. Bizim bu sahədəki siyasətimiz birmənalıdır. Bu siyasət mənəvi normalara əsaslanır və Vətən uğrunda canından keçmiş insanların yaxınları dövlət tərəfindən bundan sonra da qayğı ilə, diqqətlə əhatə olunacaqlar. Son illər müavinətlərin, pensiyaların məbləğinin artırılması göz qabağındadır. Azərbaycan dövləti bu siyasəti bundan sonra da davam etdirəcək".

5
Teqlər:
müqayisə, Ermənistan, qazi, görüş, şəhid ailələri, Ramana, Prezident İlham Əliyev