Mavi ekranın işığı

Telekanallarımızla bağlı arzuolunmaz gedişat

535
(Yenilənib 17:49 06.03.2018)
Ekspert: "Bir televiziya nə vaxt bazardan pul qazana bilər? İnsanlar onun faydasını hiss edəndə"

Xalid Məmmədov, Sputnik Azərbaycan

BAKI, 6 mart — Sputnik. "Televiziya kanallarında yetərincə maarifləndirici verilişlərin olması üçün iqtisadi baza olmalıdır. Özəl telekanallarda maarifləndirici verilişlər, demək olar ki, yox dərəcəsindədir. Özəl telekanalların iqtisadi vəziyyəti həddindən artıq pisdir".

Mətbuata açıqlamasında Milli Televiziya və Radio Şurasının (MTRŞ) sədri Nuşirəvan Məhərrəmli belə deyib. "Bir müddət əvvəl, hətta Azərbaycan prezidenti bəzi özəl telekanallara həm "Azərkosmos"a, həm də "Teleradio" İstehsalat Birliyinə borclarının ödənməsi üçün xüsusi yardım ayırdı. O baxımdan özəl telekanallarda maarifçilik verilişlərinə yer ayrılmaması ciddi problemdir. Bu, həm də reklamın azlığı ilə bağlı olan məsələdir", — deyə o bildirib.

Sputnik Azərbaycan məsələ ilə bağlı media məsələləri üzrə ekspertlərin fikirlərini öyrənib. Azər Həsrət deyib ki, burada məsələnin hər iki tərəfinə baxmaq lazımdır: "Yəni biz birtərəfli şəkildə telekanalları qınayıb, küncə sıxa bilmərik. Çünki onların doğrudan da bir yaşam mücadiləsi verdiyini anlamalıyıq. Çoxsaylı işçi kollektivini, texniki təchizatı ayaqda tutmaq, eyni zamanda yeni texnologiyaların tətbiq olunması üçün addımların atılması külli miqdarda vəsait tələb edir".

"Ona görə də televiziya kanalları mümkün yollardan istifadə edərək çalışırlar ki, özləri üçün əlavə gəlirlər əldə etsinlər. Bu gəlirlərin əldə edilməsi bəzən bir qədər auditoriya seçiminin keyfiyyətinə təsir edir. Ona görə də intellektual səviyyəsi aşağı olan, nisbətən ucuz şou dediyimiz verilişlərə üstünlük verməklə daha geniş kütləyə xitab edə bilirlər", — deyə A.Həsrət bildirib.

Ekspertin fikrincə, bu, bir keçid mərhələsidir: "Çünki 1990-cı illərin sonlarında Azərbaycanda qəzetçilikdə belə bir şey var idi. Yəni qəzetlər öz mövcudluqlarını qorumaq, pul qazanmaq və ümumiyyətlə, ciddi oxucu auditoriyasını toplaya bilmək üçün bir müddət nisbətən ucuz şoular arxasınca qaçmağa başladı. Hətta ən ciddi qəzetlərin belə, "sarı mətbuat" dediyimiz əlavələri çıxırdı, yaxud da krossvord ilə birlikdə dərc olunurdu və bu yol ilə əlavə vəsait qazanaraq ciddi mətbuatı yaşadırdılar".

"Amma zaman keçdikcə "sarı mətbuat" faktiki olaraq sıxışdırılıb çıxarıldı. Hazırda ortada olan ən təsirli mətbuat ciddi mətbuatdır. Yəni intellekti yüksək olan, həqiqi mənada normal, doğru xəbərçiliyə qiymət verən insanların oxuduğu mətbuatdır. Televiziya kanallarımızda da belə bir mərhələnin keçirilməsi qaçılmazdır", — o deyib.

A.Həsrət düşünür ki, bu sahədə dövlətin dəstəyinə, eyni zamanda intellektual auditoriyanın toplanması üçün peşəkarların cəlb olunmasına ehtiyac var: "Yəni faktiki olaraq televiziya kanallarımızın əksəriyyəti peşəkarların qıtlığından əziyyət çəkir. Bəzən jurnalistika, ümumilikdə, auditoriyaya işləmək bacarıqları, yaxud da oxumaq mədəniyyəti, səviyyəsi yüksək olmayanlar efirə çıxıb verilişlər aparırlar, təqdimatlar edirlər. Bu da ucuz verilişlərin əmələ gəlməsinə səbəb olur. Bu məsələləri həll etmək üçün dövlətin dəstəyi ilə yanaşı, cəmiyyət olaraq özümüz də yardımçı olmalıyıq".

Həmsöhbətimizin qənaətincə, maarifləndirici verilişlər də cansıxıcı olmamalıdır: "Ona heç kim baxmayacaq. Ümumiyyətlə, geniş kütlə o cür verilişlərə baxmır. Yəni bunun görüntü, vizual, eyni zamanda əyləncə tərəfi də nəzərə alınmalıdır. Elə format seçilməlidir ki, tamaşaçını ekrana bağlasın, tamaşaçı yorulmasın. İndiki texnologiyalar şəraitində bunu etmək çox asandır. Sadəcə olaraq bir qədər düşünmək, yaradıcı yanaşmaq, tamaşaçını duymağı bacarmaq lazımdır".

Media eksperti Zeynal Məmmədli isə deyib ki, MTRŞ televiziyaların maddi durumu, büdcəsi ilə maraqlanırsa və proqram zənginliyinin, o cümlədən maarifləndirici verilişlərin olmamasını reklam azlığı ilə izah edirsə, bu, ona bir qədər qeyri-ciddi təsir bağışlayır. Səbəb iqtisadi azadlığın yetərincə, lazımi səviyyədə olmamasıdır.

"Yəni bir televiziya nə vaxt bazardan pul qazana bilər? İnsanlar onun faydasını hiss edəndə. Məsələn, televiziyada işsizliklə bağlı bir veriliş hazırlayanda, ardıcıl iş elanları veriləndə o televiziya nə qədər auditoriya toplayacaq? O auditoriyanın sayı, istər-istəməz reklam verəni maraqlandırır. Amma reklam verəni, ümumiyyətlə auditoriyanın sayı maraqlandırmırsa, demək monopoliya var. Ucuz və keyfiyyətli əyləncəli verilişlərə həmişə ehtiyac var. Amma ucuz əyləncə verilişlərini hazırlamaq heç nə tələb etmir və ona çox az da vəsait qoyulur", — Z.Məmmədli bildirib.

Ekspertin fikrincə, bütün problemlər MTRŞ-nin durumu normal analiz edə bilməməsindədir: "Bu analizi etməyə gücü çatmırsa, qoy, bunu universitetlər araşdırsın. Onların da gücü çatmırsa, uyğun mütəxəssislərə müraciət etsinlər. İkinci yolu budur ki, MTRŞ müəyyən verilişlərin hazırlanması ilə bağlı tender elan etsin. Dövlətin yardımı məhz o verilişlərə ayrılmalıdır. Amma mənasız seriallara ayrıldı. Hesabat versinlər ki, seriallara ayrılan pullar nəyə xərcləndi və nəticədə nə hazırlandı. Ona görə də biz nə əkəcəyik, onu da biçəcəyik".

Qeyd edək ki, MTRŞ sədri Nuşirəvan Məhərrəmli açıqlamasında onu da bildirib ki, telekanallarda şou-proqramlarda bağlı narahatlıq tək bizdə deyil, bütün dünyada mövcuddur. Çox təəssüf ki, dünyada hər şey şoulaşır: "Bu, tək televiziyalara aid məsələ deyil. Hüquqşünaslar, iqtisadçılar, din xadimləri öz işlərini şoulaşdırırlar. Ümumiyyətlə, cəmiyyətdə elə sahə yoxdur ki, şou ilə bağlı olmasın. Bu, çox təəssüfedici haldır və televiziyada özünü daha çox göstərir".

"Azərbaycanda özəl telekanallarının əsas gəlir yeri reklamla, sponsorla bağlıdır. Ona görə də telekanallar gəlir əldə etmək, cəmiyyəti verilişlərinə cəlb etmək üçün müxtəlif yollar, orijinallıq axtarırlar. Çox təəssüf ki, bu yollar bəzən çox da uğurlu alınmır" — sədr vurğulayıb.

MTRŞ sədri hesab edir ki, büdcədən maliyyələşən Azərbaycan Dövlət Televiziyası, Mədəniyyət Televiziyası, İdman Televiziyası, İctimai Televiziya bu işdə əsas yükü öz üzərilərinə götürməlidir: "Bu televiziya kanalları gərək cəmiyyətin tələbatını ödəsin. Əgər insanlar həmin televiziya kanallarında olan verilişlərə baxacaqlarsa, özəl telekanallardakı şou verilişlərinə ehtiyac qalmayacaq. Təəssüf ki, cəmiyyətdə dəyərsizləşdirmə çox sürətlə gedir və bu özünü bütün sahələrdə göstərir. Bu, qorxulu tendensiyadır və biz bundan çox əziyyət çəkirik".

535
Teqlər:
sədr, Azərbaycan, televiziya, ekspert, proqram, telekanal, Milli Televiziya və Radio Şurası, MTRŞ, efir, Azər Həsrət, iqtisadi vəziyyət, veriliş, Nuşirəvan Məhərrəmli, Zeynal Məmmədli
Əlaqədar
Azərbaycanda telekanal rəhbərini öldürmək istəyənlərin məhkəməsi başlayıb
Telekanalda qadınlara məsləhət: Ərinizin ayaqlarından öpün...
Əcnəbi cütlük telekanalda Bakıdakı bal ayından danışıblar
ANS-i hansı telekanal əvəz edəcək?
“Çobanların rəqsi” Rusiya telekanalında
Bağlanmış telekanal yenidən fəaliyyətə başlayacaq
UNESCO

Azərbaycanlılar Venesiyada: UNESCO-nun tədbirində "Sarı gəlin" səsləndi

29
(Yenilənib 20:59 24.09.2021)
Qala gecəsinin ən mühüm məqamı isə azərbaycanlı tanınmış caz ifaçısı Etibar Əsədlinin Azərbaycanın xalq mahnısı “Sarı gəlin”i ifa etməsi olub.

BAKI, 24 sentyabr — Sputnik. İtaliyanın Venesiya şəhərinin San Klemente adasında UNESCO-nun iştirakı, Beynəlxalq Memarlar İttifaqının dəstəyi ilə "Rise from the ashes" (“Küllərdən qalx”) adlı humanitar xarakterli multikultural forum keçirilib.

Sputnik Azərbaycan xəbər verir ki, 17-ci Venesiya Memarlıq Biennalesi çərçivəsində “Vasconi Architectes by Thomas Schinko” memarlıq şirkətinin təşəbbüsü ilə təşkil olunan beynəlxalq forumda dünyanın tanınmış şəxsləri ilə yanaşı, azərbaycanlı memarlar, sənətçilər, incəsənət nümayəndələri və tələbələr iştirak ediblər.

Tədbirin əsas məqsədi Beyrut şəhərinin rekonstruksiyası, həmçinin şəhərin Baş memarlıq planı üçün həll yollarının tapılması olub. Forumda, eyni zamanda, təcrübəli beynəlxalq təlimçilər müxtəlif mövzularda çıxışlar ediblər.

UNESCO-nun Baş Konfransının prezidenti Altay Cengizer çıxış edərək UNESCO-nun Baş direktoru xanım Odre Azulenin bu foruma dəstək olduğunu iştirakçıların diqqətinə çatdırıb. Tədbirdə tanınmış memar Renzo Piano, UNESCO-nun xoşməramlı səfiri Hedva Ser, UNESCO-nun Venesiya bölgəsi üzrə rəsmi nümayəndəsi Ana Luiza Thompson-Flores, Livan Mühəndislər və Memarlar Federasiyasının prezidenti Cad Tabet, ALBA Universitetinin prezidenti Andre Bexazi, Beynəlxalq təhlükəsizlik, enerji və ətraf mühit üzrə direktorlar şurası və Pentaqonun baş məsləhətçisi Çarlz Sills və digər nüfuzlu şəxslər iştirak etdilər.

Forumda, həmçinin peşəkar təlimçilər tərəfindən müxtəlif aktual mövzularda çıxışlar olub. “Millionaire Concept Network”un dəstəyi ilə konfransda iştirak edən Afrika Sağlamlıq Federasiyasının idarə heyətinin sədri Mohamed El Sahilinin məruzəsi dinlənilib.

Tədbirdə “Eurasia Analytics”in direktoru Gülmira Rzayeva, “Millionaire Concept Network”un İtaliya üzrə direktoru Turan Sadigi, elm, cəmiyyət və rəssamlıq sahəsində 20 illik təcrübəyə malik rəssam Koen Vanmexelen, “SnarkArt” şirkətinin icraçı direktoru Nadia Taiga və digər şəxslər iştirak ediblər. Forumda NFT rəssamı kimi məşhurluq qazanan Krista Kim şəhərlərin yenidən qurulması üçün UNESCO-ya sənət, memarlıq sahəsində, cəmiyyətdə inqilab edəcək fikirlər təqdim edərək bu işdə qlobal miqyasda fəaliyyət göstərən təşkilatların, institutların və yaradıcı şəxslərin önəmli rol oynadığını qeyd edib. "TheSuperWorld" virtual daşınmaz əmlak platformasının baş icraçı direktoru və həmtəsisçisi Hrish Lotlikar isə daha yaxşı bir dünya yaratmaq üçün AR/VR/Blockchain və AL texnologiyalarından istifadə etməyin vacibliyini bildirib.

Livanın məşhur sənətçisi Rudy Rahme qala gecədə canlı performans nümayiş etdirib. Türk sənətçisi Özge Günaydın isə “Küllərdən qalx” simvolunu yaradıb. Qala gecəsinin ən mühüm məqamı isə azərbaycanlı tanınmış caz ifaçısı Etibar Əsədlinin Azərbaycanın xalq mahnısı “Sarı gəlin”i ifa etməsi olub.

Tədbirin təşkilatçısı, “Vasconi Architectes by Thomas Schinko” memarlıq şirkətinin vitse-prezidenti, həmyerlimiz Aytən Mirzoyeva gələcəkdə belə bir formatda forumun Gəncə şəhərinin və Qarabağın yenidən qurulması üçün Mədəniyyətlərarası Dialoqa dair Sülh Yaradıcılıq Mərkəzinin iştirakı ilə Azərbaycanda keçirilməsinin nəzərdə tutulduğunu deyib.

 

29
Azərbaycan hərbçiləri, arxiv şəkli

Bir "dəmir yumruq" olub düşmənin başına zərbə endirməyə gedənlər xatirələrini bölüşdülər

309
(Yenilənib 18:24 24.09.2021)
Təəssüf ki, 44 gün davam edən döyüşlərdə yüzlərlə döyüşçü cəbhə xəttindən geri dönməyib. Ölkənin gələcəyi uğrunda onlarla dinc sakin həyatını qurban verib. Azərbaycan vətəndaşları onların qəhrəmanlıqlarını heç vaxt unutmayacaqlar.

BAKI, 24 sentyabr — Sputnik. Otuz ilə yaxın müddətdə işğal altında qalan torpaqlarımız ölkənin qeyrətli oğul və qızlarının qəhrəmanlığı və cəsarəti sayəsində Azərbaycana qaytarılıb. Təəssüf ki, 44 gün davam edən döyüşlərdə yüzlərlə döyüşçü cəbhə xəttindən geri dönməyib. Ölkənin gələcəyi uğrunda onlarla dinc sakin həyatını qurban verib. Azərbaycan vətəndaşları onların qəhrəmanlıqlarını heç vaxt unutmayacaqlar.

Bu gün Sputnik Azərbaycan multimedia mətbuat mərkəzində keçirilən dəyirmi masada müharibənin başlanmasının şahidi olanlar həmin anları, müharibə günlərini necə xatırladıqları barədə söhbət açıblar.

Polad Həşimov şəhid olan gün qərarlarını verdilər: Döyüşə gedirik! 

Sputnik Azərbaycan-ın redaktoru, müharibə iştirakçısı Vüsal Azayev qardaşı Eldost Azayevlə birlikdə general-mayor Polad Həşimov şəhid olanda hər kəs kimi orduya yazılıblar. Vüsal Azayev o günləri belə xatırlayır: "Mən cəbhə bölgəsinə yaxın olduğuma görə bizə xəbərlər gəlirdi ki, müharibə başlayır. 27-si səhər rayondan 500-ə yaxın təcili yardım maşını keçdi. Artıq başa düşdük ki, bu, irimiqyaslıdır. 28-i bizə mesaj gəldi, 29-u səhər biz yol düşdük. Hər ikimiz ehtiyatda olan zabit idik".

Müharibə iştirakçısı bildirir ki, müharibəyə yola düşəndə insan izdihamını görəndə heyrətlənib. Həm də qürurlanıb ki, tək deyillər, onların arxasında böyük bir xalq dayanıb: "Ağcəbədidən gedəndə ikinci şoku yaşadım. Hər kəs çalışırdı ki, əlindən gələni etsin. Hər kəs çalışırdı ki, cəbhəyə nəsə yollasın".

Növbəti şok isə xoş olmayıb. Hərbçi yoldaşları ilə birlikdə Cəbrayılda mühasirəyə salınan Azayev orada minomyot yağışına düşüblər. Həmin gün cəbhə yoldaşlarının böyük bir qismi şəhid olub: "Mən bölük komandirinin müavini idim. Pərən-pərən düşdük, xeyli şəhid verdik. Mən gördüm ki, mənim bölük komandirlərim hamısı mənim yanımdadır. Halbuki onlar arxada olmalı idilər. Bunun özü adama stimul verirdi. On üç əsgər, iki zabit, tabor komandiri və tabor komandirinin müavini şəhid oldular. Qərargah rəisimiz də yaralandı".

© Sputnik / Murad Orujov
Vətən müharibəsi iştirakçısı Vüsal Azayev

Həmkarımız müharibənin bitdiyi günü belə xatırlayır: "Noyabrın 10-da gecə saat 2-də bizə məlumat verildi ki, atəşkəs elan olunub. Təxminən 2 saat keçdi, ermənilər atəşkəsi yenidən pozmuşdular. Artıq səhər saat 6 radələrində Müdafiə Nazirliyinin məlumatı gəldi ki, bütün şəxsi heyətə çatdırılsın ki, qarşıda artıq sülhməramlılar da var. Həmişə zarafatla deyirdilər: "Lazım" nə vaxt gələcək?" "Lazım" gəldi də, tarixi, hərbi şərait yarandı, düşmən təxribata əl atdı və biz də ondan istifadə etdik. Və tarixi qələbəmizi qazandıq".

"Yaşca məndən kiçiklər şəhid və qazi olanda, özümü lənətləyirdim"

Tanınmış müğənni Vüqar Muradov könüllü yazılmazdan öncə öz rayonunun hərbi komissarlığından bildiriş gözləsə də, o sənəd heç cür gəlməyib. Ona görə də İkinci Qarabağ müharibəsi başlayandan bir neçə gün sonra müğənni özü hərbi komissarlığa gedib. Uzun mübahisələrdən sonra cəbhəyə yollanıb. Muradov etiraf edir ki, hərbi hissədəki əsgərlər onu görəndə xeyli təəccübləniblər.

Onlar hesab ediblər ki, Muradov onlara mahnı oxuyub əhval-ruhiyyələrini yüksəltməyə gəlib: "Mən partizan idim. Müharibəyə qeyri-qanuni getdim. Mənim yaşım da düşmürdü. Deyirdilər, əşi, o müğənni gedib orada nə edəcək? Amma dedim ki, nə olur-olsun, mən gedəcəyəm. Tanışlarım var idi, onlar məndən balaca idilər, ailəli idilər. Onlar şəhid və ya qazı olanda mən özümü lənətləyirdim ki, onlar məndən yaşca kiçikdirlər və ailələri var. Arxalarında övladlarını qoyub gedirlər. Amma mən getmirəm".

© Sputnik / Murad Orujov
Vətən müharibəsi iştirakçısı müğənni Vüqar Muradov

Mügənni deyir ki, müğənni olsa da texnikadan anlayışı var. Atası mühəndis olduğuna görə ondan texnikanın sirlərini öyrənib. Muradov müharibənin ən qızğın vaxtlarında ön cəbhəyə silah-sürsat, yemək daşıyıb. "Hadrutda xüsusi təyinatlı qüvvələrin hərbçiləri ilə tanış oldum. Xahiş etdim ki, mən sizin yanınızda olmaq istəyirəm. Mənə pikap maşını verdilər. Mən Cəbrayıl, Qubadlı, Füzuli, Xocavəndin bütün kəndləri və Şuşaya qədər olan ərazilərdə oldum. Bəzən şayiələr gəzirdi ki, Azərbaycan əsgəri acdır. Amma tam yalandır.

Azərbaycan əsgəri müharibədə hər şeylə təmin olunmuşdu. Təkcə dövlət yox, xalqımız da həmin vaxt bir olub, əsgərə pay göndərirdi. 7-dən 77-dək hər kəs ordu üçün çalışırdı. Mən xarici ölkələrdə də ölkəmizi təmsil etmişəm. Həmişə başqa ölkələr, xüsusən də Fransa bizə rişxəndlə baxırdı. Artıq bütün ölkələrin yanında başımız dikdir".

Kimi erməni hərbçilərlə döyüşürdü, kimi də saxta profillərlə 

Vətən Müharibəsi Əlillərinə Yardım İctimai Birliyinin icraçı direktoru Zamin Zeynalov bildirir ki, bu müharibədə hər kəs birləşdi. Bütün sahələrin adamları, o cümlədən bütün siyasi partiyalar ölkə rəhbərinin ətrafında birləşdilər. Ermənilər anladılar ki, artıq Azərbaycanda siyasi mühiti də ələ almaq imkanları olmayacaq:

"Bütün bunlar dünya siyasi müstəvisinə mesaj xarakteri daşıyırdı. Biz də müharibə zamanı ön cəbhədə olan mövcud problemləri aradan qaldırmaq üçün töhfələr verməyə çalışırdıq. Təbii ki, dövlətimiz ön cəbhədə olan döyüşçülərimizi hərtərəfli təmin edirdi. Amma biz də qeyri-hökumət təşkilatı olaraq dəstək olmağa çalışırdıq".

© Sputnik / Murad Orujov
Vətən Müharibəsi Əlillərinə Yardım İctimai Birliyinin icraçı direktoru Zamin Zeynalov

Zeynalov vurğuladı ki, həmin vaxtlar sosial şəbəkələrdə yaranan müəyyən problemlərə rəğmən, insanlarımız müxtəlif yollarla həm də informasiya cəbhəsində vuruşurdular. Saxta erməni profilləri ilə mübarizə aparırdılar: "Müharibə zamanı Ali Baş Komandanın xarici kütləvi informasiya vasitələrinə verdiyi müsahibələr dünya ictimaiyyətinin diqqətini cəlb etdi. Ümid edirəm ki, yaxın zamanlarda biz digər işğal altında olan torpaqlarımızı da azad edəcəyik".

İş yeri səngər oldu

CBC telekanalının aparıcısı Elmira Musazadə müharibə zamanı ön cəbhədə öz vəzifəsini yerinə yetirib. Aparıcı bundan əvvəl də hərbi verilişin aparıcısı olub. İlk dəfə 2017-ci ildə balaca Zəhranın və nənəsinin ölümündən sonra müharibənin başlanğıcını hiss edib:

"Tərtər şəhərinə hücum edildiyini öyrənən kimi dərhal yola düşdüm. Dörd ildir, hərbi verilişin aparıcısı idim. Buna görə də ərazi ilə tanış idim. Həmin 44 gün ərzində erməni tərəfinin Tərtər, Ağdam, Goranboy rayonlarında dinc əhaliyə necə hücum etdiyini gördük. Tərtər müharibə zamanı 16 mindən çox mərminin atıldığı qəhrəman şəhərdir. Ermənilər yaşayış binalarını, insanları və hökumət binalarını hədəf aldılar. Bu şəhərdə heç bir hərbi qurğu yox idi".

309
SOCAR-ın baş ofisi, arxiv şəkli

İraq SOCAR-la əməkdaşlıq etmək niyyətini açıqladı

0
(Yenilənib 19:58 24.09.2021)
Rövnəq Abdullayev qonaqların diqqətinə çatdırıb ki, hasilatın pay bölgüsü sazişləri üzrə görülmüş işlərin 95 %-i ölkə daxilində yerli mütəxəssislər tərəfindən icra edilir.

BAKI, 24 sentyabr — Sputnik. Bu gün Azərbaycan Dövlət Neft Şirkətinin (SOCAR) prezidenti Rövnəq Abdullayev İraqın ölkəmizdə səfərdə olan neft naziri İhsan Əbdül Cabbar İsmailin rəhbərlik etdiyi nümayəndə heyəti ilə görüş keçirib.

SOCAR-dan Sputnik Azərbaycan-a verilən məlumata görə, SOCAR-ın prezidenti qonaqlara Azərbaycanın qədim tarixə, zəngin ənənələrə malik neft sənayesinin inkişafı barədə məlumat verib, müstəqillik dövründə əldə edilmiş uğurlardan, həyata keçirilmiş möhtəşəm layihələrdən, yaradılmış texnoloji və iqtisadi potensialdan bəhs edib.

Rövnəq Abdullayev qonaqların diqqətinə çatdırıb ki, hasilatın pay bölgüsü sazişləri üzrə görülmüş işlərin 95 %-i ölkə daxilində yerli mütəxəssislər tərəfindən icra edilir.

O, "Əsrin müqaviləsi"nin imzalanmasından ötən müddətdə kadr hazırlığına xüsusi diqqət yetirildiyini vurğulayıb.

Qonaqlar SOCAR-ın tərkibində fəaliyyət göstərən Bakı Ali Neft Məktəbinin, müxtəlif peşə təhsili məktəblərinin fəaliyyəti barədə ətraflı məlumatlandırılıblar.

İraqın neft-qaz sənayesində mövcud vəziyyət haqqında danışan nazir İhsan Əbdül Cabbar İsmail hazırda qarşılarında duran əsas vəzifələrdən bəhs edib, böyük təcrübəyə malik və özünü artıq dünya neft-qaz sənayesində ciddi bir şirkət kimi təsdiq etmiş SOCAR-la əməkdaşlıq etməkdə maraqlı olduqlarını nəzərə çatdırıb.

SOCAR-ın prezidenti əməkdaşlıq üçün geniş imkanlarının mövcud olduğunu, şirkətin istehsalat sahələri və həyata keçirdiyi layihələrlə tanışlıq üçün qonaqlara şərait yaradılacağını bildirib.

0