Sığınacaq

Hər kəsə təmənnasız gecələmə, qidalanma, hətta maddi yardım - Azərbaycanda

7089
(Yenilənib 10:02 29.01.2018)
Bilirlər ki, soyuq qışı keçirmək üçün isti yatacaq yerləri, isti yeməkləri, qayğılarına təmənnasız qalan, onlara təmənnasız qucaq açan insanlar var...

İradə Cəlil, Sputnik Azərbaycan

BAKI, 26 yanvar — Sputnik. Əvvəllər soyuq havalarda, şaxtalı günlərdə metroların yaxınlığında vətəndaşlar üçün sığınma çadırları qurulurdu. Bu çadırlarda evsiz, yaşayış yeri olmayan insanlarla yanaşı, soyuq havalarda mənzil başına çata bilməyən insanlar da gecələyir, isti yemək və çayla təmin edilirdilər. Amma həmin çadırlar müvəqqəti xarakter daşıyırdı, havalar bir qədər isinən kimi sökülürdü.

Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi
© Sputnik / Irade JELIL
Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi

İndi isə artıq daimi yaşayış yeri olmayan, parklarda, xarabalıqlarda gecələyən insanların bir sığınma yeri var. Belə ki, bir müddət əvvəl Zabrat qəsəbəsində daimi yaşayış yeri olmayan şəxslər üçün sığınacaq fəaliyyətə başlayıb. Sputnik Azərbaycan-ın əməkdaşı bu günlərdə sözügedən sığınacağa baş çəkib, sakinlərin vəziyyəti, yaşayış şəraiti ilə maraqlanıb.

18 yaşdan yuxarı şəxslər üçün Sosial Sığınacaq Mərkəzinin direktoru Çingiz Əhmədov
© Sputnik / Irade JELIL
18 yaşdan yuxarı şəxslər üçün Sosial Sığınacaq Mərkəzinin direktoru Çingiz Əhmədov

Əvvəlcə sığınacağın — Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzinin direktoru Çingiz Əhmədov mərkəz haqqında məlumat verib. Çingiz Əhmədovun sözlərinə görə, mərkəz daimi yaşayış yeri olmayan 18 yaşdan yuxarı Azərbaycan vətəndaşlarının 180 gün müddətində sosial sığınacaq müəssisəsinə yerləşdirilməsini, onların sosial, məişət və hüquqi problemlərini həll edir. Hazırda mərkəzin 26 sakini var ki, onlardan 8-i qadındır.

Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi
© Sputnik / Irade JELIL
Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi

Mərkəzə qəbul edilmək üçün müəyyən sənədlər tələb olunur. Direktor deyib ki, vətəndaşlar mərkəzə müraciət edən zaman onlardan müvafiq hüquq mühafizə orqanlarının, bələdiyyələrin məktubu, rayon icra hakimiyyəti orqanlarının və inzibati ərazi idarəetmə orqanlarının məktubları, vətəndaşın psixoloji durumu və yoluxucu xəstəlikləri barədə arayışla qəbul edilir. Psixoloji durumunda problemlər və yoluxucu xəstəlikləri olan vətəndaşlar mərkəzə qəbul edilmir.

"Vətəndaşın müraciəti və sənədlər toplusunun təqdimatından sonra vətəndaş qeydiyyat otağında qeydə alınır. Daha sonra qeydiyyat otağı ilə üzbəüz yerləşən hamamxanada təmizlənir, bərbər xidməti göstərilir, təmiz geyimlə təmin olunur. Həkim yoxlamasından keçdikdən sonra isə vətəndaşa yataq verilir. Yerləşdikləri otaqlarda onlar özlərinə məxsus dəsmallar, diş fırçası, sabun, şampun və s.-lə təmin edilirlər" — deyə müsahibimiz bildirib.

Qeyd edək ki, mərkəzin sakinləri gündə 3 dəfə xüsusi isti yeməklə təmin edilirlər, çay və su isə fasiləsizdir. Yəni istəyən şəxs istədiyi zaman çay və ya su içə bilər. Sakinlər, həmçinin mərkəzdə fəaliyyət göstərən kitabxana, oyun salonu, televiziya izləmə otaqları, hovuz və idman zalının xidmətlərindən də istifadə edirlər.

Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi
© Sputnik / Irade JELIL
Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi

Vətəndaşlar mərkəzdə qaldıqları müddətdə ev şəraitində ehtiyacları olan hər şeylə təmin edilirlər. Xəstələndikləri zaman Sosial Müdafiə Fondunun göndərişi əsasında Sabunçu Rayon Poliklinikasına və Sabunçu Rayon Xəstəxanasına göndərilirlər. Əgər müalicəyə ehtiyac olarsa, dərmanla da təmin edilirlər.

Ç.Əhmədov onu da qeyd edib ki, sakinlərin mərkəzə giriş-çıxışlarına məhdudiyyət var. Yəni istədikləri zaman mərkəzdən çıxa və ya qayıda bilməzlər. Əgər vətəndaş Mərkəzi tərk edirsə, yenidən qəbul edilmir. Ancaq daxili nizam-intizam qaydalarına riayət edən və özünü məntiqli idarə edə bilən şəxslərə istisna hallarda saat 16.00-ya qədər gedib, geri qayıtmaq üçün icazə verilir.

"Xüsusilə qeyd edim ki, bu hüquqdan istifadə etmək istəyən sakin bu etibarı qazanmalıdır. Amma yerdə qalanlara daimi yaşayış yerləri olmadığı üçün bu məsələdə həssaslıqla yanaşırıq" — həmsöhbətimiz vurğulayıb.

Müsahibimiz onu da bildirib ki, mərkəzə sadəcə yemək üçün müraciət edənlər də olur: "İndiyə qədər müəssisəyə günorta və ya axşam yeməyi ilə təmin olunmaq üçün 30-a yaxın vətəndaş müraciət edib. Sadəcə olaraq gəlib, 1-2 saat istirahət edib, qidalanıb gediblər. 22 nəfər isə 2-3 gün müddətində qalıb və gedib".

Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi
© Sputnik / Irade JELIL
Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi

Mərkəzin direktorunun dediyinə görə, bu ayın sonuna qədər mərkəzdə sakinlərin məşğuliyyəti üçün müxtəlif — dülgərlik, xarratlıq, plastik qapı-pəncərə hazırlanması və onun lazım olan detallarının işlənməsi və s. sexlər açılacaq. Mərkəzin sakinləri həmin sexlərdə əmək fəaliyyəti ilə yanaşı müxtəlif peşələrə də yiyələnə biləcəklər.

Ç.Əhmədov qarşıdakı digər planlardan da danışıb: "Mərkəzə yaxın ərazilərdə hasarlanmış və istifadə edilməyən torpaq sahələri var. Zabrat qəsəbə nümayəndəliyi ilə danışmışıq, düşünürük ki, həmin torpaqları icarəyə götürək və bizə lazım olan kənd təsərrüfatı məhsullarının yetişdirilməsi ilə də məşğul olaq. Burada kartof, soğan və s. məhsullar yetişdirilsin. Artıq iki nəfərlə biz bu barədə razılığa gəlmişik. Torpaq sahibləri ilə müqavilə bağlamaq ərəfəsindəyik".

Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi
© Sputnik / Irade JELIL
Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi

Mərkəzdə sakinlərin hüquqi problemləri də həll edilir. Onların şəxsiyyət vəsiqələrinin bərpası, pensiya yaşına çatan şəxslərə pensiya verilməsi üçün müvafiq işlərin görülməsi və s. kimi problemlərin həllində yardımlar göstərilir.

"Biz bu insanların təkcə burada qalmalarını, qidalanmalarını, yaşamalarını deyil, buradakı müddət bitdikdən sonra həyata adaptasiya olmalarını da düşünürük. Yaşlı insanların pensiya təminatı olduğu üçün onlar 180 gün burada qalmaqla 6 aylıq pensiyalarını yığa bilərlər. Və sonradan həmin pulla özləri üçün nə isə edərlər. Ən azından, kommunal xərclərdən, qida və geyim problemindən azaddırlar" — deyə Əhmədov bildirib.

Direktor sığınacaqda məskunlaşmış şəxslər haqqında danışarkən deyib ki, onlar yaxınları, qohumları, övladları tərəfindən atılmış insanlardır: "Bunların arasında illərlə parklarda, xarabalıqlarda, söküntülər arasında, küçələrdə yaşamış insanlar var. Sakinlərdən biri illərlə gecələri "20 Yanvar" metrostansiyası yaxınlığında, abidənin məşəlində qızınaraq yatırmış. Burada o isti, rahat yataqla və yeməklə təmin edilir".

Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi
© Sputnik / Kemale Aliyeva
Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi

Həmsöhbətimiz qarşılaşdıqları problemlərdən də danışıb: "Bu insanların hərəsi bir yerdən, rayondandır. Müxtəlif düşüncəli insanların bir yerdə yaşaması təbii ki, müəyyən çətinliklər yaradır. Onların burada bir-birinə adaptasiya olmaları, haradasa 10 gün çəkir. Burada elə şəxs var ki, BDU-nun tarix fakültəsini bitirib, 35 yaşı var. Ailə münaqişəsi nəticəsində evsiz qaldığı üçün gəlib dövlətin müəssisəsinə sığınıb. Biz ona iş də tapmışıq. Hazırda işləyir və 250 manat maaş alır. Bu adam səhər 9-da yeməyini yeyib işə gedir, axşam saat 8-də gəlib yeməyini yeyib otağına gedir. Biz belə insanlara mane ola bilmərik. Amma 65-70 yaşında insanın buradan harasa getməsi müəmma doğurur. İnsanlar burada qaldıqca onları tanıyır və xarakterlərinə uyğun davranırıq".

Ç.Əhmədov qeyd edib ki, bəzən vətəndaşlar lazımi sənədləri toplaya bilmədikləri üçün sığınacağa gəlməkdə çətinlik çəkirdilər. Artıq Mərkəz rəhbərliyi bu insanların vəziyyətini də nəzərə alıb. Belə vətəndaşlar şəxsiyyət vəsiqəsi ilə də qəbul edilir: "Elə insanlar var ki, bölgələrdən gəldikləri üçün Bakını, dövlət qurumlarını yaxşı tanımırlar. Buna görə də belə insanları əvvəlcə qəbul edir, sonra sənədlərin toplanması ilə məşğul oluruq".

Əhmədovun sözlərinə görə, artıq hüquq mühafizə orqanları, PPX-i soyuq, qarlı havalarda mənzil başına çata bilməyən insanları da bu sığınacaqlara gətirəcək.

Mərkəzin direktoru ilə söhbətimizi bitirdikdən sonra sakinlərin yaşadıqları otaqlara baş çəkdik. Mərkəzi gəzərkən qarşımıza çıxan Asəf dayı əslən Lənkəran rayonundandır. 71 yaşında olduğunu deyən Asəf dayı mərkəzin ən yaşlı sakinidir. Ömrünün 48 ilini feldşer həkim kimi fəaliyyət göstərən kişini sonradan həyat öz budağından qoparıb. İndi bu sığınacağa pənah gətirib və buradakı sakinlərə tibbi xidmət göstərir. Elə bizimlə qarşılaşanda da xəstə üstünə tələsirdi.

Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi
© Sputnik / Irade JELIL
Dövlət Sosial Müdafiə Fondunun nəzdində yaşayış yeri olmayan 18 yaşdan yuxarı şəxslər üçün Sosial Sığınacaq Mərkəzi

Mərkəzin ən gənc sakinin isə 19 yaşı var. Fiziki qüsurlu olan bu şəxs valideynlərinin himayəsindən kənarda, uşaq evində böyüyüb. İndi də bu sığınacağa pənah gətirib, oranın işçilərinin himayəsindədir.

Sığınacağın ikinci mərtəbəsi kişilər, 3-cü mərtəbəsi isə qadınlar üçün nəzərdə tutulub. Sakinlərin əksəriyyəti kişilərdir. Qadınlar arasında isə gənc qızlar da var, yaşlı xəstə qadınlar da.

Hamının Tünzalə dediyi Tükəzaban xanım yataq xəstəsidir. O, ailəsini — həyat yoldaşı və 3 oğlunu müxtəlif zamanlarda itirəndən sonra qardaşı ilə yaşamağa başlayıb. Lakin dediyinə görə, qardaşının nəvəsi ilə tez-tez mabahisələri olduğu üçün evdən çıxıb. Əvvəlcə başqa sığınacağa pənah aparıb, indi də bir aya yaxındır ki, bu sığınacaqdadır.

Qadın deyir ki, bura onun üçün qardaşının evindən dəfələrlə yaxşıdır: "Orda çox hirslənirdim, qorxurdum ki, beynimə qan sızar. Burada isə sakitlikdir. Bura evdən yaxşıdır".

Mərkəzdə illərlə həbs həyatı yaşamış, həmçinin yaxınları tərəfindən evindən çıxarılmış insanlar da var. Onlar yaş, cins, təhsil, düşüncə baxımından bir-birindən fərqlənsələr də, hamısını bir ümid birləşdirir. Bilirlər ki, soyuq qışı keçirmək üçün isti yatacaq yerləri, isti yeməkləri, qayğılarına təmənnasız qalan, onlara təmənnasız qucaq açan insanlar var…

7089
Teqlər:
sənəd, Azərbaycan, gecə, çay, Əmək və Əhalinin Sosial Müdafiəsi Nazirliyi, sakin, Dövlət Sosial Müdafiə Fondu, yemək, direktor, soyuq hava, Sosial Sığınacaq Mərkəzi, Çingiz Əhmədov
Əlaqədar
Onlar daha soyuqdan donmayacaqlar – sığınacaq yaradılıb
Kimsəsiz oğlan uşaqları təlimə cəlb olunub
İnternat məktəbinin direktoru kimsəsiz uşaqlara olmazın işgəncələr verib
Kimsəsiz uşaqlar üçün böyük fürsət
Sputnik peyvəndi, arxiv şəkli

"AstraZeneca" "Sputnik Light" kombinasiyası üzrə tədqiqat haqda ilkin məlumat açıqlandı

3
(Yenilənib 22:41 27.09.2021)
Aralıq təhlillərin nəticələrinə görə, 57-ci müşahidə günündə könüllülərin 85%-də "SARS-CoV-2" virusunun "tikanvari" zülalına (S-zülalına) qarşı neytrallaşdırıcı antitellərin dörd və ya daha çox dərəcədə artması müşahidə olunub.

BAKI, 27 sentyabr — Sputnik. Azərbaycanda birgə tədqiqat çərçivəsində koronavirusa qarşı "AstraZeneca" və "Sputnik Light" peyvəndlərinin  kombinasiyası S-zülalına qarşı antitellərin yüksək artımını göstərib. Bu barədə Rusiya Birbaşa İnvestisiya Fondu (RBİF) məlumat verib.

"Rusiya Birbaşa İnvestisiya Fondu... "AstraZeneca" və "R-Farm" şirkətləri Azərbaycan Respublikasında klinik tədqiqat çərçivəsində "AstraZeneca" şirkətinin peyvəndi ilə (Oksford Universiteti ilə birlikdə hazırlanıb) koronavirusa qarşı "Sputnik V" vaksinin ilk komponentinin birgə istifadəsinin virusneytrallaşdırıcı aktivliyi ilə bağlı ilkin məlumatları açıqlayıb", - deyə məlumatda bildirilib.

"Aralıq təhlillərin nəticələrinə görə, 57-ci müşahidə günündə könüllülərin 85%-də "SARS-CoV-2" virusunun "tikanvari" zülalına (S-zülalına) qarşı neytrallaşdırıcı antitellərin dörd və ya daha çox dərəcədə artması müşahidə olunub", - deyə fond əlavə edib.

Məlumatlar tədqiqatın kombinasiyanın hər iki komponentinin vurulduğu ilk 20 iştirakçısının müşahidələrinin nəticələrinə əsaslanır. Birinci komponent kimi "AstraZeneca" peyvəndi, ikincisi kimi isə "Sputnik Light" istifadə olunub. Dozalar arasındakı interval 29 gün təşkil edib.

Azərbaycanda tədqiqatlar 2021-ci ilin fevral ayında başlanıb. Bu günə qədər tədqiqatlarda 100 könüllü iştirak edir.

Azərbaycandan əlavə, Birləşmiş Ərəb Əmirlikləri və Rusiyada da qlobal proqram çərçivəsində vaksinlərin kombinasiyasının klinik tədqiqatı həyata keçirilib. Belarusda tədqiqat aparmaq üçün tənzimləyicilərdən icazə alınıb.

İlk dəfə olaraq koronavirusa qarşı "Sputnik V" peyvəndi əsasında heterogen busterləşdirmə yanaşması (birinci komponent olaraq insanın 26-cı, ikinci komponent olaraq 5-ci serotip adenovirusunun istifadə olunduğu "peyvənd kokteyli") tətbiq edilib. RBİF "Sputnik V"nin ilk komponentinin xarici dərmanlarla kombinasiyasının birgə araşdırılması təşəbbüsü ilə dünyada ilk olub.

2020-ci ilin dekabrında Rusiya Prezidenti Vladimir Putinin iştirakı ilə RBİF, N.F.Qamaleya adına Milli Epidemiologiya və Mikrobiologiya Tədqiqat Mərkəzi, "R-Pharm" şirkətlər qrupu və "AstraZeneca" şirkəti "AstraZeneca"vaksini və "Sputnik V" peyvəndinin birinci komponentinin immunogen kombinasiyası və təhlükəsizliyi ilə bağlı birgə klinik tədqiqatlar aparmaq üçün əməkdaşlıq memorandumu imzalayıblar.

 

3
Qazi

Bizə Qələbə sevinci yaşadanlara postmüharibə dövründə hansı sosial dəstək göstərilib?

224
(Yenilənib 19:56 27.09.2021)
Prezidentin aylıq təqaüdləri - şəhid ailəsi üçün - 300 manatdan 500 manata çatdırılıb.Prezidentin aylıq təqaüdləri - şəhid ailəsi üçün - 300 manatdan 500 manata çatdırılıb.

BAKI, 27 sentyabr — Sputnik. Bu gün ölkəmizdə Vətən müharibəsinin Anım Günü qeyd olunur. İkinci Qarabağ müharibəsində şəhid olmuş, yaralanmış, eləcə də erməni terrorundan əziyyət çəkənlər ölkəmizdə həssas qrup hesab olunduğundan post müharibə dövründə onların sosial müdafiəsi ölkə başçısı səviyyəsində diqqətdə saxlanılır. Bəs görəsən, postmüharibə dövründə onlar hansı sosial dəstək tədbirlərinə cəlb olunublar?

Sputnik Azərbaycan-ın sorğusuna Əmək və Əhalinin Sosial Müdafiəsi Nazirliyindən verilən cavabda bildirilir ki, əsas hədəf qrupları - Vətən müharibəsi şəhidlərinin ailə üzvləri, müharibədə yaralanmış hərbçilər, müharibə əlilləri, Vətən Müharibəsi Qəhrəmanları, erməni terrorundan zərər çəkənlər, müharibə iştirakçıları, qeyd olunan şəxslərin yaxınları hesab olunur. Postmüharibə dövründə bu kateqoriyaya aid olan 30000 şəxs 37000 xidmətlə əhatə olunub:

"Hədəf qrupları ilə görüşülür, hüquqlarına dair məlumat verilir. Şəhid ailəsi üzvləri və müharibə iştirakçılarının hüquqları, sosial dəstək tədbirləri ilə bağlı məlumatlılığın artırılması üçün Nazirliyin saytında (sosial.gov.az) bölmə yaradılıb. Hədəf qruplarının sosial hüquqları, güzəştləri, göstərilən dəstək (ödəniş təyinatları, sosial-psixoloji xidmətlər, məşğulluq və s.) barədə KİV-də məlumatlar yayımlanır, müsahibələr verilir, sorğular (o cümlədən sosial şəbəkələrdə) cavablandırılır (gündəlik). Sosial mediada çətin maddi durumu barədə məlumat paylaşılan hədəf qrupları ilə ünvanlarında görüşlər keçirilir, onlara dəstək tədbirləri barədə ictimaiyyət məlumatlandırılır. Postmüharibə dövründə yaralanmış qazilərlə görüşlər və monitorinqlər də aparılıb.

Dövlət Sosial Müdafiə Fondu tərəfindən Vətən müharibəsində yaralanan hərbçilərlə evlərində görüşlər keçirilir. Bu görüşlərdə eyni zamanda, onların və ailələrinin sosial təminat hüquqlarının reallaşdırılması üçün monitorinqlər aparılır. Yaralanmış qazilərin 90%-i ilə görüşülərək aşağıdakı istiqamətlər üzrə məlumatlar toplanır. Yataq xəstələrinin, amputasiya olunmuşların, sərbəst hərəkət edə bilməyən və kənar şəxslərin köməyinə ehtiyacı olanların sayı, psixoloji yardıma və reabilitasiya vasitələrinə ehtiyacı olanların sayı, sosial vəziyyəti yaxşı, orta və ya pis olanların sayı.

Sosial ödəniş təyinatlarına gəlincə, şəhidlərin ailə üzvlərindən ibarət 7900 nəfərə 15700 sosial ödəniş təyinatı aparılıb. Müharibə ilə əlaqədar 2000 qaziyə (Vətən müharibəsi qaziləri) əlillik və bununla əlaqədar sosial ödənişlərin təyinatı aparılıb. Mənzil və avtomobillə təminata gəldikdə Prezident İlham Əliyevin göstərişinə əsasən məcburi köçkünlər üçün inşa olunmuş mənzillərin şəhid ailələrinə və müharibə əlillərinə verilməsinə başlanıb. 25 fevral 2021-ci ildə Ramana, 14 iyul 2021-ci ildə Bakının Xocasən qəsəbəsində, 26 avqust 2021-ci ildə Abşeron rayonu, Stansiya Sumqayıt deyilən ərazidə şəhid ailələri və müharibə əlillərinə Prezident İlham Əliyevin iştirakı ilə mənzillərin və avtomobillərin təqdim olunması tədbiri keçirilib.

Prezident İlham Əliyevin 25 yanvar 2021-ci il tarixli Sərəncamı ilə 2014-2019-cu illərdə uçota alınmış şəxslər, həmçinin 2020-ci ildə hərbi əməliyyatlar, o cümlədən Vətən müharibəsi zamanı şəhid olanların ailələri və bu müharibə əlilləri 5 il ərzində mərhələli şəkildə mənzil və ya fərdi evlərlə təmin olunacaqlar (11 min mənzil və fərdi ev, o cümlədən 2021-ci ildə 3 minədək mənzil və fərdi ev).  Prezidentin eyni sərəncamı ilə Vətən Müharibəsi Qəhrəmanları və onların ailə üzvlərinin mənzillə təmin edilməsinə başlanılıb. 2021-ci ilin planı üzrə artıq 1600 mənzil şəhid ailələri və müharibə əlillərinə verilib. Ümumilikdə isə ötən dövrdə 11 minə yaxın (10 800) mənzil və fərdi ev şəhid ailələrinə və müharibə əlillərinə verilib. Müharibə əlilləri və onlara bərabər tutulan şəxslərin dövlət tərəfindən avtomobillə təminatı tədbirlərinin davamı kimi, Nazirlik tərəfindən onlara 2018-ci ildə 265 avtomobil, 2019-cu ildə 600 avtomobil, 2020-ci ildə 400 avtomobil verilib. 2021-ci ildə 150-dək avtomobil verilib. Ümumən indiyədək onlara 7350-dək avtomobil təqdim edilib.

3000 ailəyə (10 min ailə üzvü) sosial-psixoloji dəstək göstərilib, konsultasiyalar keçirilib. “Onlayn psixoloji xidmət” (050 406 75 85) göstərilir. Zənglərə 5 psixoloq cavab verir. 1590 zəng cavablandırılıb, o cümlədən psixoloji xidmətlə bağlı 1067 zəng qəbul edilib (zənglər əsasında 70 şəxs psixiatra yönləndirilib, 43 şəxsin evində əyani psixoloji dəstək göstərilib). Reabilitasiya müəssisələrində 1500 qaziyə reabilitasiya xidmətləri göstərilib. 142 hərbçi yüksək texnologiyalı müasir protezlə, əlavə olaraq 1200 müharibə əlili (I və II QMƏ) 8830 reabilitasiya vasitəsi ilə təmin edilib. O cümlədən, 770 əlilliyi olan şəxs mühərrikli  təkərli oturacaqla təmin olunub, onlardan əksər qismi qazilərdir. Son illərdə qurulan müasir reabilitasiya infrastrukturu Vətən müharibəsi qazilərimizin keyfiyyətli reabilitasiya xidmətləri ilə təminatı üçün mühüm potensial, baza rolunu oynayır. 2019-2020-ci illərdə 11 reabilitasiya və sosial xidmət müəssisəsi əsaslı təmir və yenidənqurmadan sonra istifadəyə verilib. 2021-ci ildə də 4 reabilitasiya və sosial xidmət müəssisəsinin (Şağan Reabilitasiya Pansionatı (25.02.21-ci ildə istifadəyə verilib), Şamaxı Psixonevroloji Sosial Xidmət Müəssisəsi, Qəbələ Uşaq Reabilitasiya Mərkəzi, Şəmkir Uşaq Reabilitasiya Mərkəzi) açılması nəzərdə tutulub. 2021-ci ildə reabilitasiya xidmətləri göstərilən şəxslərin illik sayı 3 dəfə artaraq 30 minə çatacaq (2018-ci ildə 10 min nəfər olub).

Ailə üzvlərindən əlilliyi olan və sağlamlıq imkanları məhdud 300-dən çox şəxsə birdəfəlik maddi yardım ayrılıb. Sosial tərəfdaşlar tərəfindən 110 mindən çox ərzaq payı həssas qruplara verilib (H.Əliyev Fondu 100 min, “Bravo” 10 min, UNICEF 2 min ailəyə ərzaq payı çatdırıb). Özünüməşğulluq proqramına 5320 nəfər cəlb edilib. Əməkhaqlarının bir hissəsinin birgə maliyyələşdirilməsi Proqramı da daxil olmaqla hədəf qruplarına aid 1310 nəfərə (işədüzəltmə) göndəriş verilib. Haqqı ödənilən ictimai işlərə 530 nəfər cəlb edilib. 10 iyun tarixindən başlayan “Məşğulluq marafonu” çərçivəsində 518 işəgötürən 2641 vakansiya təqdim edib. Proses davam edir. Həmin vakansiyalar şəhid ailəsi üzvləri və yaralanmış qazilərin işlə təmin olunmasına yönəldiləcək. Artıq 765 şəhid ailəsi üzvü və qazi işlə təmin olunub.

Bu müddətdə yaralanmış hərbçilərin əlilliyinin qiymətləndirilməsi istiqamətində də iş aparılıb. NK-nın 13.01.21 tarixli Qərarı ilə hərbçilərin tibbi-sosial ekspertizasının operativ, vaxtında, keyfiyyətlə və mərkəzləşmiş şəkildə aparılması məqsədilə ƏƏSM nazirinin sədrliyi ilə komissiya yaradılıb. Komissiya hərbi əməliyyatlar zamanı xəsarət almış hərbi qulluqçuları birgə əyani müayinədən keçirilməsi, aldıqları xəsarətlərin, xəstəliklərin hərbi xidmətlə əlaqəsinin müəyyənləşdirilməsi, sənədlərin sürətlə rəsmiləşdirilməsi, tibbi-sosial ekspertiza müayinəsinə göndərişlərin e-sistemə daxil edilməsi və nəticə olaraq əyani müayinə keçirməklə əlilliyin qiymətləndirilməsi funksiyasını yerinə yetirir.

Eyni zamanda  dövlət başçısının 25 iyun 2021-ci il tarixli Fərmanı ilə yaradılan  Vahid Əlaqələndirmə Mərkəzləri (VƏM) VƏM-də “bir pəncərə” prinsipi ilə 7 qurum üzrə 26 xidmət göstərilir. VƏM-lər 23 avqust tarixindən DOST mərkəzlərində fəaliyyətə başlayıb. VƏM-lər vasitəsilə 900 şəxsə xidmətlər göstərilib.

01.01.2021-ci il tarixdən Prezidentin aylıq təqaüdləri - şəhid ailəsi üçün  -  300 manatdan 500 manata çatdırılıb. (o cümlədən 20 Yanvar şəhidlərinin və Əfqanıstanda sovet qoşunları tərkibində beynəlmiləl borcu yerinə yetirərkən həlak olanların ailələri üçün).  Müharibə, 1990-cı ilin 20 Yanvar hadisələri, hərbi xidmət vəzifələrini yerinə yetirməklə, Çernobıl AES-də hərbi xidmətlə ilə əlaqədar əlilliyi olan şəxslər üçün

• I dərəcə üçün  -  250 manatdan 400 manata çatdırılıb;

• II dərəcə üçün  -  230 manatdan 350 manata çatdırılıb;

• III dərəcə üçün  -  210 manatdan 300 manata çatdırılıb;

✓ Milli Qəhrəmanlar üçün  - 1500 manatdan 1800 manata çatdırılıb;

✓ Böyük Vətən müharibəsi iştirakçıları üçün 150 manatdan 300 manata çatdırılıb;

✓ “Vətən Müharibəsi Qəhrəmanı” adı verilmiş şəxslər üçün Prezidentin aylıq təqaüdü təsis olunub - 2000 manat.

  Bir sıra kateqoriyadan olan şəxslərə ödənilən sosial müavinət, təqaüd və pensiya əlavələri optimallaşdırılıb və artımlar müəyyən edilib. "“Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında” AR Prezidentinin 2021-ci il 25 yanvar tarixli Sərəncamı imzalanıb. “Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları”na 20 noyabr 2020-ci il tarixdə dəyişiklik edilməklə, şəhid statusu Gəncə və Naftalan şəhərlərində, Bərdə rayonunda erməni təxribatı nəticəsində həlak olmuş mülki şəxslərə də aid edilib.

Hərbi qulluqçuların əlilliyinin operativ qiymətləndirilməsi məqsədi ilə Komissiyanın yaradılması üçün “Azərbaycan Respublikasının ərazi bütövlüyü uğrunda aparılan hərbi əməliyyatlar zamanı xəsarət (yaralanma, travma, kontuziya) almış hərbi qulluqçuların tibbi-sosial ekspertizası ilə bağlı bəzi məsələlər barədə” Azərbaycan Respublikası Nazirlər Kabinetinin 2021-ci il 13 yanvar tarixli 7 nömrəli Qərarı qəbul edilib.

Hərbi qulluqçulara və şəhid ailələrinə psixoloji yardımın göstərilməsi ilə bağlı Komissiyanın yaradılması üçün “Azərbaycan Respublikasının ərazi bütövlüyü uğrunda aparılan hərbi əməliyyatlarda iştirak etmiş hərbi qulluqçulara və şəhid ailələrinə psixoloji yardımla bağlı bəzi məsələlər barədə Azərbaycan Respublikası Nazirlər Kabinetinin 2021-ci il 13 yanvar tarixli 8 nömrəli Qərarı qəbul edilib. “Vətən müharibəsi iştirakçılarına “Müharibə veteranı” adının verilməsi işinin təşkili üzrə Komissiyanın yaradılması barədə” AR NK 2021-ci il 30 yanvar tarixli 24 nömrəli Qərarı təsdiq edilib. “Veteranlar haqqında” və “Şəhid adının əbədiləşdirilməsi və şəhid ailələrinə edilən güzəştlər haqqında” qanunlarda dəyişiklik edilməsi barədə qanunlar təsdiq edilib və hər iki Qanunun tətbiqi haqqında 17 iyun 2021-ci il tarixli Fərmanlar imzalanıb. Yeni qanunlara əsasən, Əmək və Əhalinin Sosial Müdafiəsi Nazirliyi tərəfindən vahid informasiya bazasının yaradılması məqsədilə Nazirliyin elektron informasiya sistemində müharibə veteranlarının, şəhid və şəhid ailəsi statusu almış şəxslərin reyestrləri elektron formada aparılacaq. 

25 iyun 2021-ci ildə “Şəhid ailələri üzvlərinin, müharibə ilə əlaqədar xəsarət almış hərbi qulluqçuların və əlilliyi müəyyən edilmiş şəxslərin müraciətləri üzrə vahid əlaqələndirmə mərkəzlərinin yaradılması və fəaliyyətinin təşkili haqqında” Azərbaycan Respublikası Prezidentinin Fərmanı imzalanıb (7 qurum üzrə 26 xidmət). 25 avqust 2021-ci il tarixdə Prezident İlham Əliyevin imzaladığı “Azərbaycan Respublikasının Vətən Müharibəsi Qəhrəmanlarının və onların ailə üzvlərinin sosial-məişət şəraitinin yaxşılaşdırılması haqqında” Sərəncama əsasən, Əmək və Əhalinin Sosial Müdafiəsi Nazirliyi “Vətən Müharibəsi Qəhrəmanı” adı verilmiş  şəxsləri və ölümündən sonra həmin ad verilmiş şəxslərin ailə üzvlərini mənzillə təmin edəcək.

224

Bakıda şəhidlərinin xatirəsinə səmaya işıq fənərləri buraxılıb

0
"Şəhidlərimiz qürurumuzdur" adlı aksiyası zamanı "Regional İnkişaf" İctimai Birliyinin könüllüləri səmaya 3000-dək işıq fənəri uçurdublar.

Bu gün vətən müharibəsi zamanı şəhid olan soydaşlarımızın xatirəsinə həsr edilən anım tədbiri keçirilib.

Heydər Əliyev Fondunun "Regional İnkişaf" İctimai Birliyinin "Şəhidlərimiz qürurumuzdur" adlı aksiyası zamanı bu gün təməli qoyulan Vətən müharibəsi memorial kompleksi və Zəfər muzeyinin ərazisində quraşdırılmış xüsusi projektorlardan səmaya yönələn şüalar Zəfər tağını simvolizə edib. Aksiyada "Regional İnkişaf" İctimai Birliyinin könüllüləri səmaya 3000-dək işıq fənəri uçurdublar.

Qeyd edək ki, sentyabrın 27-si Vətən Müharibəsinin başlamasının bir ili tamam olur. 44 günlük Vətən Müharibəsində torpaqlarımızın azadlığı uğrunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq hər il sentyabrın 27-si Azərbaycanda Anım Günü kimi qeyd edilib. Artıq bir necə gündür ölkədə Anım Gününə hazırlıqlar gedir.

Eyni zamanda Bakının bəzi küçə və prospektlərində eyvanlardan bayraqlar asılıb. Bu gün saat 12:00-da ölkə ərazisində şəhidlərimizin əziz xatirəsi bir dəqiqəlik sükutla yad edilib. Şəhər sakinləri, hərbçilər və rəsmilər İkinci Fəxri Xiyabanda uyuyan şəhidlərimizin məzarlarına baş çəkərək şəhidlərin xatirələrini yad ediblər.

Paytaxtda Müzəffər Ali Baş Komandan İlham Əliyev və birinci xanım Mehriban Əliyevanın iştirakı ilə yürüş keçirilib. Yürüş iştirakçıları əllərində Vətən müharibəsində qəhrəmancasına şəhid olanların şəkilləri əks olunan plakatlar daşıyıblar.

0
  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.

  • © Sputnik / Murad Orujov

    Bakıda şəhidlərin xatirəsinə səmaya işıq fənərləri buraxılıb.