Məmur

Yeni nazir gəlir, həm yeniliklərlə

70699
(Yenilənib 10:15 25.12.2017)
On milyon vətəndaşın əli ürəyinin üstündə qalıb

BAKI, 18 dekabr — Sputnik. Yeri gəldi-gəlmədi istifadə olunmasına baxmayaraq, "sistemli siyasət" anlayışı o qədər də vahiməli deyil. Əslində, mövcud olmalı olan və üstəlik əşhədü-ehtiyacdan doğan bir idarəetmə formasıdır. Təbii ki, o sistem və onu yönəldən siyasətin məqsədi uğurlu perspektivləri təmin etdiyi halda.

Azərbaycan Respublikasının Prezidenti İlham Əliyev
© Official website of President of Azerbaijan Republic

Məsələn, sistemli siyasət olmayanda Oğuz rayonuna vəlvələ düşür ki, vay aman, yeni icra başçısı təyin olunub. Rayonda hamı pıçıldaşır: "Görəsən, necə adamdır? Xasiyyəti tünddürmü, yumşaqdırmı? Azmı alacaq-çoxmu yığacaq? Özündən əvvəlkinin aldıqlarının-verdiklərinin üzərindən xətt çəkəcəkmi? Dükan-bazarı növbəti dəfə sökəcəkmi? Üzü aqlaylanmış obyektləri yenidən bəzəyəcəkmi?" Və sair…

Sistemli siyasət yoxdursa, yeni polis rəisinin gəlişi Masallı camaatının yuxusunu ərşə çəkəcək. Taksi sürücüsündən bazar müdirinə, divar dibində siqaret tüstülədən yeniyetmədən İrandan çərəz daşıyan iş adamına, kəndçisindən şəhərlisinə qədər hamı təşviş içində düşünəcək: "O biri filan cür davranardı camaatla, bəs bunun iş metodu necə olacaq? Qabağına çıxan hər kəsi asıb-kəsəcəkmi, tutub-buraxacaqmı? Rəhmlidirmi, qəddardırmı?" Filan…

Ya da, hansısa gömrük postunun rəisi dəyişir. Əgər bu sahədə davamlı bir sistem olmazsa, sərhədin o tərəfindəki əcnəbi də, bu tərəfindəki yerli də başlayacaq maraqlanmağa ki: "Bu yeni gələn adam əvvəl haralarda çalışıb, əvvəlki iş yerlərində necə biri kimi tanınıb? Buradakı keçmiş rəislə anlaşdığımız kimi bununla da anlaşmaq mümkün olacaqmı? O yan-bu yana keçə biləcəyikmi, keçirə biləcəyikmi? Dolanıb-dolandıra biləcəyikmi? Yoxsa tutduğunu qoparandırmı?"

Bu cür misalların siyahısını dartıb istədiyiniz qədər uzada bilərik. Bunları qeyd etməkdə məqsəd odur ki, hər hansı ərazi vahidində, yaxud idarədə, müəssisədə qeyri-sistematik yanaşma, fərdlərin şəxsi keyfiyyətlərinə bağlı olan idarəçilik metodu yuxarıdakı problemlərin meydana çıxması ilə nəticələnir.

Baxın, Vergilər Nazirliyinin başında duran şəxs dəyişdi. Artıq nəinki həmin qurumun tabeçiliyində çalışan məsul şəxslərin, eləcə də vergi verən və alan bütün ölkə vətəndaşlarının əli ürəyinin üstündə qalıb. "Pis-yaxşı, o birinin iş metoduna alışmışdıq, alacağımızı-verəcəyimizi bilirdik, indi özümüzü nələrə hazırlayaq?" deyə. "O biri qurduğunu qurdu, yıxdığını yıxdı, ağlına gələn bütün ideyaları tətbiq etdi, bəs təzəsi hansı ideyalarla gəlir?" deyə. "Kimləri və nələri dəyişəcək, hansı sürprizlərlə rastlaşacağıq?" deyə…

İlham Əliyevin sədrliyi ilə Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclası keçirilib
© Official website of President of Azerbaijan Republic

Ya da, öz struktur genişliyi və əhatə etdiyi kontingentə görə vergilərdən heç də geri qalmayan, üstəlik millət və dövlət üçün vergilərdən daha önəmli olan bir sahəyə — təhsil sahəsinə diqqət yetirək.

On milyon vətəndaş intizarla yeni nazirin kim olacağını gözləyir: Kim olacaq? Necə biri olacaq? (Həm də haralı olacaq?) Bu dəfə 12 illik təhsildən 15 illiyə keçməyəcəyik ki? İndi müəllimlər hansı imtahanlara, şagirdlər hansı əlavə dərs yükünə, valideynlər hansı "əlavələrə" hazır olsunlar? Maaşların hesablanması, ödənilməsi qaydası yenəmi dəyişəcək, dəyişəcəksə, necə? Postda oturanlar onu qorumaq, oturmayanlar onların yerində oturmaq üçün kimlərə elçi düşsünlər, kimləri araya salsınlar…?

Bax belə. İndi əmin olduqmu ki, sistemli siyasət, haqqında danışılanlardan daha yaxşı bir şey imiş?

70699
Teqlər:
fərd, sistemli siyasət, sahə, icra başçısı, vətəndaş, rəis, təhsil, rayon, vergi, yenilik, nazir
Əlaqədar
Azərbaycan Mərkəzi Bankında mühüm təyinat
Ədliyyə Nazirliyində yeni təyinat olub
Yeni təyinat var
Azərbaycanda yeni icra başçısı təyin olundu
Məktəbi kim təmir etdirməlidir: valideyn yoxsa nazirlik?
"Bir dəfə riyaziyatçı müdafiə naziri oldu, nəticəsini gördük"
Təhsil Nazirliyi: Valideynlərin etirazı haqlı çıxarsa...

Cəbhəyanı ərazilərdə onlarla tank piyada əleyhinə mina, bombacıqlar aşkarlandı

16
Mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

BAKI, 26 noyabr - Sputnik. Azərbaycan Respublikası Ərazilərinin Minalardan Təmizlənməsi üzrə Milli Agentliyə (ANAMA) Ağcabədi, Ağdam, Beyləqan, Füzuli, Goranboy, Göygöl, Tərtər rayonları ərazisində mərmilərin aşkar olunması barədə Daxili İşlər Nazirliyinin ″102″ Xidməti-Zəng mərkəzi sistemindən 38 və Fövqəladə Hallar Nazirliyinin Böhran Vəziyyətlərində İdarəetmə mərkəzindən 7 müraciət daxil olub.

ANAMA-dan Sputnik Azərbaycan-a verilən məlumata görə, daxil olmuş 45 çağırış əsasında agentliyin xüsusi mobil çevik əməliyyat qrupları tərəfindən Daxili İşlər Nazirliyinin əməkdaşları ilə birlikdə 28 operativ və təxirəsalınmaz əməliyyat çıxışı həyata keçirilib.

Aparılmış əməliyyat-axtarış tədbirləri zamanı 71 ədəd partlamamış hərbi sursat (PHS), 2 ədəd tank əleyhinə mina, 42 ədəd piyada əleyhinə mina, 4 ədəd bombacıq və 40 ədəd partlamış mərmi qalıqları aşkar olunub.

Agentliyin partlayış qrupu tərəfindən 26 ədəd mina və partlamamış hərbi sursat (PHS), 4 ədəd bombacıq zərərsizləşdirilib, mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

16
Məktəbdə dərs prosesi, arxiv şəkli

Ümumi təhsil pilləsi nələri əhatə edəcək?

8
(Yenilənib 23:41 25.11.2020)
Ümumi təhsil pilləsi məktəbəhazırlıq mərhələsini, ibtidai, ümumi orta və tam orta təhsil səviyyələrini əhatə edəcək.

BAKI, 25 noyabr — Sputnik. Azərbaycan Respublikasında ümumi təhsil pilləsi məktəbəhazırlıq mərhələsini, ibtidai, ümumi orta və tam orta təhsil səviyyələrini əhatə edəcək.

Sputnik Azərbaycan-ın məlumatına görə, bu, Prezident İlham Əliyev tərəfindən bu gün təsdiqlənən "Təhsil haqqında" qanuna dəyişiklik edilməsi barədə qanunda əksini tapıb.

Qanuna əsasən, Ümumtəhsil məktəbi ibtidai, ümumi orta və tam orta məktəb formasında ayrı-ayrılıqda da təşkil oluna bilər.

Həmçinin, qanunda göstərilib ki, İbtidai təhsilin məqsədi təhsilalanlara oxu, yazı və hesablama bacarıqları, vətənpərvərlik və Azərbaycan xalqının dəyərlərinə, dövlət rəmzlərinə hörmət hissi aşılamaq, onlarda insan, cəmiyyət və təbiət haqqında ilkin biliklər, şəxsiyyətin formalaşdırılmasına yönəlmiş həyati bacarıqlar, sadə əmək vərdişləri, məntiqi təfəkkür elementləri, bədii-estetik keyfiyyətlər və digər xüsusiyyətlər formalaşdırmaqdan ibarətdir.

Eyni zamanda ümumi orta təhsilin məqsədi təhsilalanlarda nitq, yazı və ünsiyyət mədəniyyətinin, sağlam həyat tərzinin formalaşdırılmasını, onların dövlətə və dövlətçiliyə, Azərbaycan xalqının dəyərlərinə və ümumbəşəri dəyərlərə sədaqət ruhunda tərbiyə olunmasını, insan hüquq və azadlıqlarına hörmətlə yanaşmasını, idrak fəallığının və məntiqi təfəkkürünün inkişafını, müvafiq təhsil proqramı üzrə əldə etdiyi bilikləri tətbiq etmək, müasir informasiya-kommunikasiya texnologiyalarından istifadə etmək, cəmiyyətdə baş verən hadisələri dəyərləndirmək, öz gələcək həyat yolunu və fəaliyyət istiqamətlərini müəyyənləşdirmək, müstəqil öyrənmə və qərar qəbuletmə bacarığını, peşə seçiminə və əmək fəaliyyətinə hazırlığını təmin etməkdən ibarətdir.

8