Sima Məmmədova

Azərbaycanda ikinci belə qadına rast gəlməzsiniz

469
(Yenilənib 11:33 15.12.2017)
Meşələri qorumaqda ona ən yaxın sirdaşı, eləcə də vəfalı dostu olan atı da kömək edir

İlham Əhmədov, Sputnik Azərbaycan

BAKI, 15 dekabr — Sputnik. Sima Məmmədovanın 63 yaşı var. O, İsmayıllı rayonunun Yeniyol kənd sakinidir. Ömrünün böyük hissəsini balaları ilə birgə rayonunun, doğma kəndinin təbiətinin qorunmasına həsr edib.

Bu gün də təbiətimizin qorunması üçün əzmlə çalışır, təbiətin keşiyində durur. Tanıyanlar kişi qeyrətli bu qadının kişilərin belə, çətinliklə öhdəsindən gəldiyi bir peşənin sahibi olduğunu yaxşı bilirlər. İlk dəfə görənlər və haqqında eşidənlər isə heyrətlərini gizlədə bilmirlər.

Sima Məmmədova
© Sputnik / Ilham Ahmadov
Sima Məmmədova

Sima Məmmədova İsmayıllının Yeniyol, Qərsələ, Aşağı Qaraqaya, Yuxarı Qaraqaya, Sədiyan, Yuxarı Diyallı kəndlərinin meşələrində meşəbəyilik edir. Bu peşədə çalışan yeganə qadın olmasına baxmayaraq, işinin öhdəsindən layiqincə gəlməyi bacarır. Meşələri qorumaqda ona ən yaxın sirdaşı, eləcə də vəfalı dostu olan atı da kömək edir.

Sputnik Azərbaycan-ın bölgə müxbirinə danışan Sima nənə deyir ki, maraqlı, fərqli, çətin olduğu qədər də riskli peşənin sahibidir. Artıq o, özünü dağlarsız ucu-bucağı görünməyən meşələrsiz təsəvvür edə bilmir. Əsrarəngiz və həyat dolu meşələrdə dəfələrlə yırtıcı heyvanlarla qarşılaşsa da, əsla qorxmadığını deyir.

Sima Məmmədova
© Sputnik / Ilham Ahmadov
Sima Məmmədova

Artıq 12 ildir meşələri mühafizə edən Sima Məmmədova müxtəlif maraqlı hadisələrlə də qarşılaşıb. Ona bu işdə ailəsi də böyük dəstək verir. Kənd sakinləri də Sima Məmmədovanın qadın olmasına baxmayaraq, meşəbəyi vəzifəsinin öhdəsindən layiqincə gəldiyini bildirirlər.

Gününü, zamanını dağlar qoynunda keçirən Sima nənə ömrü yetdikcə bu işi davam etdirmək arzusundadır. Ağacların qırılmasından gileylənən meşəbəyi insanların ekologiyaya nə dərəcədə ziyan vurduqlarından xəbərsiz olduqlarını deyir, var gücü ilə meşələri qoruyacağını söyləyir.

Sima nənə ömrü yetdikcə bu işi davam etdirmək arzusundadır
© Sputnik / Ilham Ahmadov
Sima nənə ömrü yetdikcə bu işi davam etdirmək arzusundadır

Müsahibimiz bildirir ki, onu ilk at belində görənlər heyrətlənir, çox maraqla baxırlar: "Ümumilikdə 893 hektar əraziyə nəzarət edirəm. İlk vaxtlar çox çətinliklər yaşamışam. Kənd sakinləri və tanımadığım insanlarla müəyyən problemlər olub".

Dediyinə görə, bunun da ən başlıca səbəbi insanların meşələrə ziyan vurması və ağacların səbəbsiz yerə, qeyri-qanuni şəkildə qırılması olub. Zaman-zaman məcburən gecələr belə meşələrə baş çəkdiyini və ərazini gəzdiyini deyir.

Sima nənə Allahın bəxş etdiyi ömrün sonuna kimi layiqincə bu vəzifəsini yerinə yetirəcəyini də əminliklə vurğulayır.

469
Teqlər:
meşəbəyi, Yeniyol kəndi, Sima Məmmədova, İsmayıllı rayonu, nənə, meşə, təbiət, peşə, qadın
Əlaqədar
Məbəddə yaşayan qadın: "Allahşükür Paşazadə gələndə düşündüm ki..."
Bakıda qadınlar avtobusda yer üstündə dava etdilər
Bu dəfə qadın kişiyə balta yox, bıçaq zərbəsi endirdi
Deputat: İraq həbsxanasında 200 azərbaycanlı qadın saxlanır
Qax rayonu kişilər üçün cənnətdir, qadınlar üçünsə...
Müğənni Fədayə Laçınla bağlı ilginc xəbər: daha bir qadın tutuldu

Üç nəfər qəbul imtahanından xaric olundu

1
(Yenilənib 15:20 13.08.2020)
İmtahanlarda istifadə olunan qapalı və cavabları kodlaşdırıla bilən açıq tipli tapşırıqların düzgün cavabları isə (Azərbaycan və rus bölmələri) yaxın saatlarda DİM-in saytında yerləşdiriləcək.

BAKI, 13 avqust — Sputnik. Bugünkü qəbul imtahanında 3 nəfərdə mobil telefon aşkarlandığı üçün imtahandan xaric olunub.

Dövlət İmtahan Mərkəzindən verilən məlumata görə, imtahan prosesinin idarə olunması üçün operativ qərargah fəaliyyət göstərib, müntəzəm olaraq imtahanın keçirildiyi binalarla əlaqə saxlanılıb və imtahanın gedişi nəzarətdə olub.

Bütün binalarda imtahan təlimata uyğun şəkildə keçirilib, iştirakçılara öz bilik səviyyələrini nümayiş etdirmələri üçün zəruri şərait yaradılıb.

Avqustun 14-dən etibarən DİM-də imtahan protokollarının, cavab vərəqləri və kartlarının emalı aparılacaq.

İmtahanlarda istifadə olunan açıq tipli tapşırıqların yoxlanılması uzun müddət tələb etdiyindən nəticələrin yaxın 2 həftə ərzində elan olunması nəzərdə tutulur.

İmtahanlarda istifadə olunan qapalı və cavabları kodlaşdırıla bilən açıq tipli tapşırıqların düzgün cavabları isə (Azərbaycan və rus bölmələri) yaxın saatlarda DİM-in saytında yerləşdiriləcək.

1
Buludlu hava, arxiv şəkli

Rayonlarda yağış, paytaxtda isə külək olacaq

1
(Yenilənib 14:51 13.08.2020)
Tibbi-meteoroloji proqnoza gəldikdə isə, avqustun 14-15-də Abşeron yarımadasında güclənən xəzri küləyi fonunda iqlim normasına yaxın temperatur şəraiti gözlənilir ki, bu da meteohəssas insanlar üçün əsasən əlverişlidir.

BAKI, 13 avqust — Sputnik. Sabah Bakıda və Abşeron yarımadasında havanın dəyişkən buludlu olacağı, əsasən yağmursuz keçəcəyi, lakin səhər yarımadanın bəzi yerlərində qısamüddətli az yağış yağacağı gözlənilir.

Sputnik Azərbaycan Milli Hidrometeorologiya Xidmətinin verdiyi məlumata istinadla xəbər verir ki, arabir güclənən şimal-qərb küləyi əsəcək.

Havanın temperaturu Abşeron yarımadasında gecə 21-24, gündüz 28-31, Bakıda gecə 21-23, gündüz 29-31 dərəcə isti olacaq. Atmosfer təzyiqi normadan aşağı 755 mm civə sütunu, nisbi rütubət gecə 60-70 , gündüz 35-40 faiz təşkil edəcək.

Abşeron çimərliklərində arabir güclənən şimal-qərb küləyi əsəcək. Dəniz suyunun temperaturu Sumqayıt, Novxanı, Pirşağı, Nardaran, Bilgəh, Zaqulbada 24-25, Türkan, Hövsan, Sahil, Şıxda isə 25-26 dərəcə isti olacaq.

14 avqustda Azərbaycanın rayonlarında bəzi yerlərdə şimşək çaxacağı, arabir yağış yağacağı, şimal və qərb rayonlarında intensiv olacağı, dolu düşəcəyi gözlənilir. Səhər dağlarda duman olacaq. Qərb küləyi ayrı-ayrı yerlərdə arabir güclənəcək.

Havanın temperaturu gecə 19-23, gündüz 30-35, dağlarda gecə 11-15, gündüz 16-20 dərəcə isti olacaq.

Tibbi-meteoroloji proqnoza gəldikdə isə, avqustun 14-15-də Abşeron yarımadasında güclənən xəzri küləyi fonunda iqlim normasına yaxın temperatur şəraiti gözlənilir ki, bu da meteohəssas insanlar üçün əsasən əlverişlidir.

1