Hotel

Əcnəbilər deyil, məhz azərbaycanlılar qarşısında absurd tələb

414
(Yenilənib 17:49 13.12.2017)
Azərbaycan hotelləri vətəndaşların cinsi əlaqədə olma hüququnu pozmağa məcburdur

Ramella İbrahimxəlilova, Sputnik Azərbaycan

BAKI, 13 dekabr — Sputnik. Əxlaqsızlıq yuvalarının təşkilinə qarşı mübarizədə hüquq-mühafizə orqanları əməkdaşlarının ifrat səyləri demokratik və dünyəvi Azərbaycanda ciddi bir problemin ortaya çıxmasına səbəb olub — vətəndaşların şəxsi intim həyatına müdaxilə.

Polis hər yerdə fahişə axtarır. Sən demə, elə hotellərin özləri "əxlaqsızlıq yuvası" imiş. Hüquq-mühafizə orqanları əxlaqsızlıq yuvalarını təşkil edən şəxsləri tapıb cəzalandırmaq istəyərkən vətəndaşların istirahət etmək hüququnu, daha da konkretləşdirsək, cinsi əlaqədə olmaq haqqını unudur.

Azərbaycanda hələ də ölkədəki bir neçə hoteldə qoyulan axmaq qaydalardan bəhs edirlər. Sputnik Azərbaycan-ın məlumatına görə, hotellərdə istirahət etmək istəyən şəxslər yenə də onlardan nikah şəhadətnaməsinin tələb edilməsindən şikayətçidirlər.

Bu barədə Lider TV-də efirə gedən "Status" verlişində Bakıdakı hotellərdən birinin rəhbəri Ramin Zamanov bildirib. O, qeyd edib ki, daxili işlər orqanlarının daimi yoxlamaları Azərbaycan hotellərinin rəhbərliyini məcbur edir ki, xoşagəlməz hallarla üzləşməmək üçün qonaqlardan nikah haqqında şəhadətnamə tələb etsinlər. Amma hotel sahiblərinin əksəriyyəti üçün müştərinin evli, yaxud subay olması heç bir əhəmiyyət daşımır.

"Əvvəla onu qeyd edim ki, adətən hotellərin heç birində əcnəbi müştəridən nikah haqqında sənəd tələb olunmur. Bu problemlər yerli əhali ilə işləyərkən ortaya çıxır. Hotel müştəriləri qeydiyyatdan keçirməlidir. Bunun üçün onun sənədinin — şəxsiyyət vəsiqəsinin surətini götürüb onun adına nömrəni qeyd etməliyik. Təəssüf ki, bir sıra vətəndaşlar qeydiyyatdan boyun qaçırır və hətta əlavə pul verməyə hazırdırlar ki, təki onları qeydiyyata almasınlar" — deyə Zamanov bildirib.

Hotel rəhbərliyinin sözlərinə görə, misal üçün iki il əvvəl Azərbaycana gələn turistlərin sayı indiki ilə müqayisədə çox az idi. Hotel sahibləri öz bizneslərini qorumaq üçün vətəndaşların xahişini nəzərə alaraq onların qaldıqları nömrələri qeydiyyatdan keçirmirdilər. Daxili İşlər Nazirliyinin və digər dövlət qurumlarının əməkdaşları yoxlamaya gələrkən məlum oldu ki, nömrələrdəki müştərilərin 70%-i rəsmən qeydiyyatdan keçirilməyib. Hüquq mühafizəçiləri dərhal tələb etdilər ki, nömrələri bir-bir açıb yoxlasınlar.

Zamanov qeyd edib ki, müştəridən şəxsiyyət vəsiqəsindən savayı başqa sənəd tələb etmək qanunsuzdur. Amma tez-tez baş verən yoxlamalar və qeydiyyatdan keçməmiş müştərilərin aşkarlanması səbəbindən mehmanxanalar nikah haqqında şəhadətnaməni tələb etmək kimi əsassız və qeyri-qanuni üsula əl atmağa məcbur olurlar.

Bununla yanaşı, hüquq müdafiəçisi Sahib Məmmədov Sputnik Azərbaycan-a bildirib ki, hotelin bütün qonaqları mütləq qeydiyyatdan keçməlidir: "Bu, qəbul olunmuş ümumi normadır. Digər tərəfdən, fahişəlik faktının olub-olmadığını yoxlamaq üçün nömrələrə girmək və müştərilərdən nikah haqqında sənədi tələb etmək olmaz".

Sahib Məmmədov bildirib ki, nikah haqqında şəhadətnamənin tələb edilməsi qanuna ziddir: "DİN əməkdaşlarının hərəkətləri başadüşüləndir. Çünki onlar insan alveri ilə mübarizə aparmağa cəhd edirlər. Amma ola bilsin ki, hoteldə qeydiyyatdan keçməyən şəxslər sevgilidirlər, onlar sadəcə bir müddət bir yerdə olmaq üçün hotelə gəliblər. Və onların bu hərəkəti hər hansı cinayət və ya inzibati məsuliyyət yaratmır".

Onun fikrincə, heç kəs vətəndaşa sekslə məşğul olmağı qadağan edə bilməz, əlbəttə əgər azyaşlılarla bağlı cinayət qanunvericiliyinin tələbləri pozulmayıbsa.

Məmmədov, eyni zamanda bir sıra ölkələrin təcrübəsinə də istinad edib: "Bəzi ölkələrdə hotel işçiləri əsas müştərini qeydiyyatdan keçirərkən müəssisənin nüfuzuna xələl gətirməmək üçün onu müşayiət edən şəxsin də kimliyi ilə maraqlanırlar. Çünki "arzuolunmaz müştəri" anlayışı var. Bir sözlə, bu məsələləri hotel özü tənzimləməlidir".

Hüquqşünas qeyd edib ki, hətta müştəri hotelə "seks sənayesinin" nümayəndəsi ilə gəlibsə belə, hotel işçisinin əxlaqsızlıq yuvasının təşkilində iştirak etdiyini sübuta yetirmək çətindir: "Çünki hotelə gələn qonağın alnına "fahişədir" sözü yazılmayıb ki…"

S.Məmmədovin qənaətincə, hüquq mühafizəçilərinin əxlaqsızlıqla mübarizə üsulları az effektlidir: "Hüquq mühafizəçiləri öz qüvvələrini daha çox insan alveri və əxlaqsızlıq yuvalarının təşkili ilə bağlı mübarizəyə sərf etməlidirlər, hotellərdə əks cinsin nümayəndələri ilə istirahət edən şəxsləri axtarmamalıdırlar".

Sputnik Azərbaycan-ın əməkdaşı bu məsələni şərh etmək üçün AR DİN-in mətbuat xidmətinə də müraciət edib. DİN-dən bildiriblər ki, artıq onlar bir dəfə bu məsələ ilə bağlı mövqelərini ifadə ediblər: "Daxili işlər orqanları insan alveri və əxlaqsızlıq yuvalarının təşkili ilə əlaqədar şikayətləri araşdırır. Onların hotellərdə istirahət edən müştərilərlə işi yoxdur".

414
Teqlər:
əxlaqsızlıq yuvaları, hüquq mühafizə orqanları, Ramin Zamanov, fahişə, tələb, Sputnik Azərbaycan, hotel, polis, Azərbaycan, qonaq, turist
Əlaqədar
Hoteldə baş verən yanğın nəticəsində 4 nəfər öldü
“Ora hotel deyil, kurort deyil, sığınma yeridir”
Orta əsrlərin lüks hotelləri belə idi
Telman İsmayılovun məşhur hotelində "bunt" qalxıb
Hotellərdə yoxlama aparılacaq
"Dövlət hotellərin qiymət siyasətinə təsir edə bilməz"
İsraildə epdimioloji vəziyyət

İsraildə “Pfizer” vaksini vurulan 13 nəfər üz iflici olub

2
Ötən ilin 20 dekabr tarixində İsraildə yeni növ koronavirus (COVID-19) infeksiyasına qarşı kütləvi vaksinasiya prosesinə başlanılıb.

BAKI, 17 yanvar - Sputnik. İsraildə yeni növ koronavirus infeksiyasına qarşı “Pfizer” vaksini ilə peyvənd olunan 13 nəfər üz iflici olub.

“Report”un məlumatına görə, bu barədə “The Jerusalem Post” İsrail Səhiyyə Nazirliyinin hesabatına istinadən xəbər verib.

Nazirlik bildirib ki, üz iflici olanların sayı daha çox ola bilər.

Qeyd edək ki, ötən ilin 20 dekabr tarixində İsraildə yeni növ koronavirus (COVID-19) infeksiyasına qarşı kütləvi vaksinasiya prosesinə başlanılıb. İlk olaraq İsrailin Baş naziri Binyamin Netanyahu peyvənd olunub.

2
Kürdəxanında çirkab sular

Kürdəxanıda çirkab suları dənizə axıdılır, nazirlik öz işini görür, nəticə isə yoxdur

7
(Yenilənib 20:12 17.01.2021)
Xəzər sahili ərazilərdə quraşdırılan bu qurğular sayəsində bu ərazilərdə dənizə çirkab su axıdılmır.

İradə Cəlilova, Sputnik Azərbaycan

BAKI, 17 yanvar — Sputnik. Bakının Sabunçu rayonu Kürdəxanı qəsəbəsində uzun illərdir ki, dənizə kanalizasiya suları axıdılır. Qəsəbə sakinlərinin sözlərinə görə, qəsəbədə kanalizasiya sistemi olmadığı üçün vətəndaşlar kanalizasiya sularının axıdılması üçün xüsusi qazılmış "şambo"lardan istifadə edir.

Adətən çirkab sular dənizə axıdılır. Bununla yanaşı Kürdəxanı və Pirşağı qəsəbələrində kanalizasiya sularının axıdılığı göllər də var. Bu problemin qarşısını almaq üçün qəsəbələrə kanalizasiya sistemi çəkilməlidir. Ötən il Bakı qəsəbələrinə kanalizasiya sisteminin çəkilməsi üçün qərar verilsə də, görünən odur ki, qeyd olunan qəsəbələrdə hələ heç bir iş görülməyib.

© Sputnik / Irade JELIL
Kürdəxanında çirkab sular

Memarlıq və İnşaat Universitetinin (AzMİU) dosenti Fərzəli Həsənov Sputnik Azərbaycan-a açıqlamasında bildirib ki, Bakı qəsəbələrinə kanalizasiya sisteminin çəkilməsi planda olsa da, yəqin ki, bundan sonra məsələyə birbaşa məsul olan qurum "Azərsu" ASC işğaldan azad edilmiş ərazilərdə müvafiq işlər görəcək. Bakı qəsəbələrinə kanalizasiya sisteminin çəkilməsi məsələsi hələ bir müddət qalacaq. Çünki bu gün əsas prioritet məsələ işğaldan azad edilmiş torpaqların bərpasıdır.

Onun sözlərinə görə, Pirşağıda Cənubi Koreya şirkəti tərəfindən kanalizasiya sularının təmizlənməsi ilə bağlı stansiya tikilir. Stansiya istifadə verildikdən sonra Mehdiabad, Ceyranbatan və s. yaxın qəsəbələrin kanalizasiya boruları həmin stansiyaya qoşulacaq.

© Sputnik / Irade JELIL
Kürdəxanında çirkab sular

F.Həsənov qeyd edib ki, kanalizasiya suları təmizləndikdən sonra dənizə axıdılmalıdır: "Qonşu Türkiyədə kanalizasiya suları təmizləndikdən sonra dənizə axıdılır. Kanalizasiya suyu o qədər təmizlənir ki, Azərbaycanda olsa, içməli sudan fərqləndirmək mümkün olmaz. Bu qədər təmizlənməsinə baxmayaraq, həmin sular xüsusi borularla dənizin daxilində 5 kilometr məsafəyə buraxılır".

Professor bildirib ki, içməli suyun bir litrində 1 qram, Xəzər dənizinin suyunun 1 litrində 13-15 qram duz var. Kanalizasiya suları təmizlənib dənizə axıdıldığı təqdirdə, dənizin suyunun tərkibinə təsir etmir. Təmizlənmədiyi halda isə kanalizasiya suyunun tərkibində olan zərərli maddələr dəniz suyuna qarışır. Belə olan təqdirdə həmin ərazilərin çimərlik kimi istifadə edilməsi sağlamlıq üçün təhlükəlidir.

© Sputnik / Irade JELIL
Xəzər dənizinin suyunun 1 litrində 13-15 qram duz var

"Çirkab sularının birbaşa təmizlənmədən dənizə axıdılması müxtəlif dəri, mədə-bağırsaq və s. xəstəliklərə səbəb olur. Vətəndaşlar sağlamlıqları üçün bu ərazilərdən çimərlik kimi istifadə etməməlidirlər", - deyə F.Həsənov bildirib.

Dövlət Ekoloji Təhlükəsizlik xidmətinin rəis müavini Ramal Bağırovun sözlərinə görə, Ekologiya və Təbii Sərvətlər Nazirliyi 2007-ci ildən bu günə qədər 17 ədəd su təmizləyici qurğu quraşdırıb.

Bu problemin qalmasının səbəbi isə müvafiq ərazilərdə kanalizasiya sisteminin olmamasıdır. Dənizə açılan axar 2000-ci ildə çəkilib və keçən dövr ərzində mütəmadi olaraq monitorinqlər aparılıb, analizlər götürülüb. Nəticələr barədə "Azərsu" ASC-yə məlumat verilib.

© Sputnik / Irade JELIL
Kürdəxanında çirkab sular

Ekoloq Telman Zeynalovun fikrincə, çirkab və kanalizasiya sularının dənizə axıdılması insan sağlamlığı ilə yanaşı, Xəzərin biomüxtəlifliyi üçün də təhlükəlidir. Onun sözlərinə görə, Kürdəxanı ərazisində dənizə çirkab sularının axıdılmasına nəzarət yerli icra orqanları və Ekologiya və Təbii Sərvətlər Nazirliyindədir. Belə ki, qurumlar həmin ərazilərdə mütəmadi olaraq monitorinqlər aparmalı, bu kimi vəziyyətləri açıqlamalı və müvafiq tədbirlər görməlidir.

Məsələ ilə bağlı "Azərsu" ASC ilə əlaqə saxlamaq mümkün olmadı. Ancaq qurumun rəsmisi Şöhrət Süleymanov yerli mətbuata açıqlamasında bildirib ki, bu ərazilərdə mərkəzləşdirilmiş kanalizasiya sistemi mövcud deyil: "Abşeron yarımadası üzrə Master Plana uyğun olaraq Pirşağı hövzəsi üzrə müasir standartlara uyğun bioloji tullantı su təmizləyici qurğusunun inşası aparılıb. Hazırda tamamlanma işləri aparılır".

© Sputnik / Irade JELIL
Dənizə açılan axar 2000-ci ildə çəkilib və keçən dövr ərzində mütəmadi olaraq monitorinqlər aparılıb, analizlər götürülüb

Qeyd edək ki, Xəzər dənizinə antropogen təsir göstərən axarların qarşısının alınması və çirkab suların təmizlənərək Xəzər dənizinə axıdılması məqsədilə Bilgəh, Mərdəkan, Novxanı, Buzovna, Sumqayıtın Xəzər sahili ərazilərində ETSN tərəfindən onlarla modul tipli lokal təmizləyici qurğu quraşdırılıb.

Xəzər sahili ərazilərdə quraşdırılan bu qurğular sayəsində bu ərazilərdə dənizə çirkab su axıdılmır.

7