Bina

Bu binalardan əsla ev almayın!

5736
(Yenilənib 14:30 08.11.2017)
Ekspertlər hesab edir ki, bu binaların fəsadları yaxın zamanlarda özünü göstərəcək, fövqəladə hal baş verdikdə isə, bütün binalar üst-üstə gələcək

İradə Cəlil, Sputnik Azərbaycan

BAKI, 8 noyabr — Sputnik. Azərbaycan Respublikası Nazirlər Kabinetinin 2014-сü il 72 saylı qərarına görə, binalar arasındakı "Ara məsafəsi ilə bağlı müfəssəl Qaydalar" müəyyən edilib.

Üç il əvvəl qəbul edilmiş qərara görə, "Ara məsafəsi ilə bağlı müfəssəl Qaydalar" yaşayış məntəqələrinin baş və müfəssəl planlarının layihələrinin hazırlanması, həm yeni, həm də tikilib abadlaşdırılmış və bərpa olunan ərazilərdə tikintiyə icazə verilməsi zamanı binalar arasında, binalarla tikinti ərazilərinin sərhədləri arasında saxlanılmalı olan məsafələri müəyyən edir.

Qərarda qeyd edilir ki, tikinti ərazisinin sərhədləri daxilində binanın xarici divarlarından ərazinin sərhədinə qədər ara məsafəsi saxlanılmalıdır. Həmin sahələrin üzərində yerüstü tikinti obyektlərinin inşasına yol verilmir. 

Ancaq tikinti obyektinin torpaq sahəsinin sərhədində tikilməsi müfəssəl planda nəzərdə tutulduqda (mövcud tikintinin ara məsafəsinin saxlanılmasını tələb etdiyi hallar istisna olmaqla) və qonşu torpaq sahəsində də tikintinin müvafiq torpaq sahəsinin sərhədində tikilməsi şəhərsalma və tikintiyə dair normativ sənədlərin tələbləri baxımından mümkün olduqda, torpaq sahələrinin sərhədlərindəki binaların xarici divarları önündə ara məsafəsinin saxlanılması zəruri deyil.

Qərara görə, ara məsafəsi hər bir ayrılmış torpaq sahəsinin öz sərhədləri çərçivəsində olmalıdır. Şəhər və bələdiyyə avtomobil yollarının torpaq sahələri, ümumi istifadədə olan yaşıllıqlar və su sahələri ara məsafələri kimi istifadə olunur. Tikinti obyektlərinin yerləşdiyi torpaq sahələrinin sərhədindəki hər iki tərəfdən becərilə bilən torpaq zolağında isə ara məsafələri yalnız həmin torpaq sahələrinin ortasına qədər nəzərdə tutulur.

Və ara məsafələri bir-birinin üzərinə düşə bilməz. Bu hal bir-birinə 75 dərəcədən böyük bucaq altında yerləşən binaların xarici divarları qarşısındakı ara məsafələrə şamil edilmir.

Ekspertlərə görə, ara məsafə binanın xarici divarının hündürlüyünə əsasən müəyyən edilir. Divarla yerin üst səthinin kəsişmə nöqtəsindən divarın sonuna qədər olan şaquli məsafə divarın hündürlüyünü, binanın xarici divarının səthindən həmin binanın yerləşdiyi torpaq sahəsinin sərhədinə qədər olan məsafə ara məsafəsini təşkil edir. Əgər relyefə əsasən hündürlük dəyişərsə, bu zaman divarın orta hündürlüyü əsas götürülür.

Tikinti eksperti Elnur Fərzəliyevin sözlərinə görə, divarın hündürlüyü ilə yanaşı 45 dərəcədən artıq mailliyə malik olan damların və frontonların hündürlüyünün 30 faizi, 60 dərəcədən artıq mailliyə malik olan damların və frontonların hündürlüyünün 50 faizi, 70 dərəcədən artıq mailliyə malik olan damların və frontonların tam hündürlüyü nəzərə alnmalıdır: 

"Qərara görə, ara məsafəsi olaraq divar hündürlüyünün 0,6 hissəsi, kənd ərazilərində və xüsusi yaşayış ərazilərində (hərbi şəhərciklər, tələbə şəhərcikləri, müvəqqəti məskunlaşma əraziləri) divar hündürlüyünün 0,4 hissəsi, yalnız sahibkarlıq fəaliyyətinin həyata keçirilməsi üçün nəzərdə tutulmuş ərazilərdə və sənaye ərazilərində divar hündürlüyünün 0,25 hissəsi qəbul olunur".

E. Fərzəliyev deyir ki, ara məsafə hesablanan zaman divar səthindən 1,5 metrə qədər irəli çıxan karnizlər, dam çıxıntıları, dayaqsız giriş və terras örtükləri, eni 5 metrdən çox olmayan və divar səthindən 1,5 metrə qədər irəli çıxan divar hissələri, erkerlər, balkonlar, giriş həcmləri, tam işıqburaxan tikinti materialından hazırlanmış divarlar və bina hissələri nəzərə alınmır.

Ekspertin sözlərinə görə, ara məsafələri hündürlüyü 3 metrdən və divar səthinin sahəsi 25 kvadrat metrdən çox olan binalara da şamil olunur.

Fərzəliyev bildirir ki, divarlarının hündürlüyü 1 metrdən çox olmayan tikililərin və ya tikili hissələrinin xarici divarlarının önündə ara məsafəsi sahələrinin saxlanılması vacib deyil: 

"Bununla yanaşı divarlarının hündürlüyü 3 metrdən, sahəsi 25 kvadrat metrdən çox olmayan və yalnız qarajlardan və ya yanaşı otaqlardan ibarət olan, yerli təchizat məqsədlərinə xidmət edən və ya ictimai nəqliyyat ərazilərində yerləşən binaların, yaxud bina hissələrinin önündə ara məsafəsi sahəsinin saxlanılması da vacib deyil".

Ekspert qeyd edir ki, ara məsafələrin azaldılması təbii ki, əhalinin narazılığına səbəb olur. Bəzənsə əhali bu ölçülərin sovet dövründə olduğu kimi qaldığını düşünür:

"Lakin nəzərə almaq lazımdır ki, Nazirlər Kabinetinin qərarına ara-sıra dəyişikliklər edilir. Ancaq nə qədər acınacaqlı olsa da, bu qaydaların dəyişdiyini heç kim bilmir. İndiki qərara əsaslanan bəzi şirkətlər binaların həyətində uşaqlar üçün oyun meydançaları belə saxlamırlar. Yaşıllıq, evlərə günün düşməsi belə nəzərə alınmır".

Ekspert bildirir ki, bunun fəsadları yaxın gələcəkdə özünü göstərəcək.

Fərzəliyevə görə, bu vəziyyətdən çıxmağın bircə yolu var ki, o da belə binalardan ev almamaqdır: 

"Başqa cür etiraz forması düşünə bilmirəm. Əgər əhali belə binalarda ev almasa, bəlkə o zaman tikilməz. Elə binalar var ki, bir blokludur, 16 mərtəbə ucaldılıb. Və belə binalar dibdibədir. Binalar arasında çox az məsafə saxlanılır. Yerli icra hakimiyyəti orqanları bina tikintisi üçün sərəncam verəndə diqqətli olmalıdır. Həmin əraziyə baxış keçirildikdən sonra tikinti üçün qərar vermək olar. Amma şəhərdə elə binalar var, ki, çöksə yanındakı binalar da anında zədələnəcək".

Əmlak eksperti Ramil Osmanlı hesab edir ki, şəhərsalma qaydalarına görə, ara məsafəsi binanın hündürlüyünün 1,5 əmsalında olmalıdır. Yəni binanın hündürlüyü 15 metrdirsə, o, 1,5-ə vurulub, qonşu bina ilə ara məsafə qoyulmalıdır: "İndi 16-20 mərtəbəli binalar var ki, onların hündürlüyü 50-50 metrdən çoxdur. Şəhərdə bəzi ərazilər var ki, 3-4 belə binanı 7-8 metr ara ilə tikiblər. Təsəvvür edin ki, fövqəladə vəziyyətdə o binalardan 1-2-si uçur və bu, digər binalara da potensial təhlükədir".

Ekspert qeyd edir ki, əslində qaydalara görə, binalar arasında məsafə 1,5 olmasa da, ona yaxın məsafə gözlənilməlidir ki, fövqəladə hadisə zamanı digər binalar zədə görməsin.

Osmanlıya görə, məsələnin əxlaqi tərəfi də var:

"Bəzən görürsünüz ki, 16 mərtəbəli binanı 5-9 mərtəbəli binanın həyətində tikirlər. Ara məsafələr 6-10 metr olduğu halda binalarda yaşayan sakinlər bir-birinin evində baş verənləri görə bilir. Bu əxlaqi baxımdan da düzgün deyil". 

Binaların həyətyanı sahələri, əsas yola çıxışı olmalıdır. Yəni binalar bir-birinə yaxın tikilərkən bütün bu hallar nəzərə alınmalıdır.

Ekspert bildirir ki, 2006-cı ildən Bakı şəhərində şəhərsalma qaydaları kobud şəkildə pozulur. Bu, özünü həm binalar arasında olan məsafənin pozulması, həm yaşayış və qeyri-yaşayış sahələrinin bir-birinə uyğunsuz şəkildə tikilməsi, həm yol infrastrukturu, həm də mənəvi baxımdan göstərir:

"Təsəvvür edin ki, yeni tikilən binalar bəzən köhnə binaların kommunikasiya sisteminə qoşulur. Məsələn əgər bir 5 mərtəbəli 60 mənzilli binanın kommunikasiya sisteminə iki 100 mənzilli 16 mərtəbəli bina da qoşulur. Əlavə yüklənmə kommunal sistemlərin də sıradan çıxmasına səbəb olur".

Qeyd edək ki, NK-nın sözügedən qərarına görə, hər hansı bir bina ilə bağlı müəyyən edilmiş ara məsafələri sonradan həyata keçirilən sərhəd dəyişmələri və ya torpaq sahələrinin bölünməsi zamanı azaldıla və ya onların üzərində tikinti aparıla bilməz.

5736
Teqlər:
Tikinti standartları, Nazirlər Kabineti, Elnur Fərzəliyev, Ramil Osmanlı
Əlaqədar
Bağırov: “Tikintidə ekoloji standartlar nəzərə alınmalıdır”
Dələduzluq etmiş tikinti biznesmeni cəzadan kənarda qalmaq istəyir
Bakıda nəhəng söküntü-tikinti planına razılıq verildi
Yarımçıq tikintilər: istehlakçı həm pulunu itirir, həm ümidini
Ölkədə tikinti qaydalarına dəyişiklik təsdiqlənib
Bakıda karantin rejimi zamanı insanlar

Böyük dövlətlərin oyunu "əjdaha" gənclərimiz - Bakılılara çənəni sevdirən qadağa - FOTO

1
(Yenilənib 14:38 26.11.2020)
"Xəstəlikdən qorxacağam? Boş şeydir. Lap yoluxsam da ağır keçirəcəyimi düşünmürəm. Sapsağlam adamam. Heç bir xəstəliyim yoxdur. Odur ki, maskanı sadəcə cərimə edilməmək üçün çənəmin altına taxıram" - Bakı sakini

İradə Cəlilova, Sputnik Azərbaycan

BAKI, 26 noyabr — Sputnik. 2020-ci il 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.

Paytaxtda maskalardan istifadə qaydalarına nəzarət rejimi daha da sərtləşdirilib.

Müvafiq yerlərdə tibbi maskadan istifadə olunmaması və ya tələb olunan normalara uyğun taxılmaması qanunla müəyyən edilmiş qaydada məsuliyyət yaradır.

Şəhərimizin bəzi sakinləri isə belə düşünmürlər. Sputnik Azərbaycan bu gün paytaxt sakinlərinin karantin qaydalarına necə əməl etdiklərini müşahidə edib.

Əksər vətəndaşlar karantin qaydalarına əməl edərək maskalardan istifadə edirlər.

© Sputnik / Irade JELIL
Bakıda karantin rejimi zamanı insanlar

Bəziləri isə maskanı sadəcə cərimə edilməmək üçün çənələrinin altına taxırlar.

Məsələn, Bakı sakini 56 yaşlı Əsəd Əliyev deyir ki, koronavirus infeksiyasının varlığına inanmır. Bakı sakini elə hesab edir ki, bu, dünyanı idarə edən ölkələrin oyunudur.

Maska taxmaq məsələsinə gəldikdə isə, o deyib ki, maskanı sadəcə cərimə edilməmək üçün taxır: "Görürsünüz ki, çənəmin altında maska var. Yəni qanuna tabe oluram. Amma xəstəliyə inanmıram".

Qeyd edək ki, paytaxtda daha çox yaşlılar karantin qaydalarına əməl etmirlər. Yaşı 60-ı ötmüş vətəndaşlar maska taxmağı əhəmiyyətli hesab etmirlər.

Gənclər isə maskanı çənənin altına taxmağa üstünlük verirlər.

İnsanların kütləvi toplaşdığı yerlərdə, məsələn, dayanacaqlarda sosial məsafəyə əməl edilməsə də, vətəndaşlar maska taxırlar.

© Sputnik / Irade JELIL
Bakıda karantin rejimi zamanı insanlar

Nigar Eyyubova deyir ki, pandemiya başlayan gündən maska taxıb. Və o, bunu hansısa məbləğdə cərimə edilməmək üçün yox, sağlamlığın önəmli olduğunu fikirləşdiyi üçün edib:

"Mənim evimdə yaşlı anam-atam var. Mən özümü qorumalıyam ki, onları da qoruya bilim. Virusun olduğuna inanıram. Belə yalan ola bilməz. Buna görə də, özümü qoruyuram ki, yoluxmayım. Maska da taxıram, çantamda spirt və antibakterial salfet də gəzdirirəm. Bacardığım qədər insanlarla yaxın ünsiyyətdə olmuram".

28 yaşlı Ələddin Məmmədov isə hesab edir ki, virus gənclərə yoluxmur. Yoluxsa da, gənclər bu xəstəliyi ağır keçirmirlər.

"Xəstəlikdən qorxacağam? Boş şeydir. Lap yoluxsam da ağır keçirəcəyimi düşünmürəm. Sapsağlam adamam. Heç bir xəstəliyim yoxdur. Odur ki, maskanı sadəcə cərimə edilməmək üçün çənəmin altına taxıram. Cəmi 500 manat maaş alıram. Onun da 100 manatını cəriməyə versəm, nə qaldı ki..."

  • Bakıda karantin rejimi zamanı insanlar
    © Sputnik / Irade JELIL
  • Bakıda karantin rejimi zamanı insanlar
    © Sputnik / Irade JELIL
  • Bakıda karantin rejimi zamanı insanlar
    © Sputnik / Irade JELIL
1 / 3
© Sputnik / Irade JELIL
Bakıda karantin rejimi zamanı insanlar

Ə.Məmmədov siqaret aludəçisi olduğu üçün maska taxmaq ona bəzən yorucu gəlir. Amma cərimə edilməmək üçün siqaret çəkmədiyi zamanlar da olur.

Şəhərimizdə qanunlara tabe olub maska taxanlar da var, cərimə edilməkdən qorxub maska taxanlar da, özünü xəstəlikdən qorumaq üçün maska taxanlar da... Maska taxmayanlar isə bunu maska almağa pulları olmaması ilə izah edirlər. Məsələn, süpürgəçi işləyən 58 yaşlı Naibə xanımın sözlərinə görə, hər gün maska almağa pulu çatmır. Deyir, özü üçün evdə xüsusi maska tikməyə də vaxtı yoxdur. Amma söz verir ki, bu həftəsonu qanunlara tabe olmaq adına özü üçün maska tikəcək.

Belə...

Xatırladaq ki, hazırda dünyada yeni növ koronavirus (COVID-19) infeksiyasına yüksək yoluxma dinamikası müşahidə olunur. Bu səbəbdən virusun geniş yayılmasının qarşısının alınması üzrə müvafiq tədbirlər həyata keçirilir, bir çox ölkələr sərt karantin qaydaları tətbiq edir.

© Sputnik / Irade JELIL
Bakıda karantin rejimi zamanı insanlar

Pandemiya əleyhinə rejimin, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti tərəfindən müəyyən edilən tələblərin pozulmasına görə, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslərə 100 manat məbləğində, vəzifəli şəxslərə 200 manat məbləğində, hüquqi şəxslərə 400 manat məbləğində cərimə tətbiq edilir.

Eyni zamanda, bu xətanın inzibati tənbeh almış şəxs tərəfindən inzibati tənbeh vermə haqqında qanun qüvvəyə mindiyi gündən 1 il ərzində təkrar törədilməsinə görə fiziki şəxslər 200 manat məbləğində, vəzifəli şəxslər 400 manat məbləğində, hüquqi şəxslər 800 manat məbləğində cərimə edilirlər.

Epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslərə 200 manatdan 400 manatadək, vəzifəli şəxslərə 3 min manatdan 4 min manatadək, yaxud işin hallarına görə xətanı törədənin şəxsiyyəti nəzərə alınmaqla 1 ayadək müddətə inzibati həbs tətbiq edilir. Hüquqi şəxslər isə 4 min manatdan 10 min manatadək məbləğdə cərimə edilirlər.

© Sputnik / Irade JELIL
Bakıda karantin rejimi zamanı insanlar

Qüvvədə olan İnzibati Xətalar Məcəlləsinə əsasən, fiziki şəxslər 100 manatdan 200 manatadək məbləğdə, vəzifəli şəxslər 1500 manatdan 2000 manatadək məbləğdə cərimə edilir, yaxud işin hallarına görə xətanı törədənin şəxsiyyəti nəzərə alınmaqla 1 ayadək müddətə inzibati həbs tətbiq olunur, hüquqi şəxslər 2 min manatdan 5 min manatadək məbləğdə cərimə edilirdilər.

1
Teqlər:
cərimə, maska, qaydalar, Koronavirus, epidemiya, COVID-19, Bakı
Füzuli rayonunda dağıdılmış məscid, arxiv şəkli

Ermənilər daha bir məscidimizi tövləyə çeviriblər - VİDEO

4
(Yenilənib 14:31 26.11.2020)
Anar Kərimov: "Kaş ki Fransa Senatı birtərəfli və son dərəcə siyasiləşdirilmiş qərarlar qəbul etmək əvəzinə, gəlib ermənilərin Qarabağ ərazilərində nə etdiklərinə baxardılar. Füzuli rayonunda XIX əsrə aid olan Merdinli kənd məscidi tövləyə çevrilib".

BAKI, 26 noyabr — Sputnik. Mədəniyyət nazirinin birinci müavini, Mədəniyyət nazirinin vəzifələrini icra edən Anar Kərimov ermənilərin işğal zamanı daha bir məscidimizə qarşı etdiyi vandalizm hərəkətləri barədə yazıb. Sputnik Azərbaycan xəbər verir ki, o, bu barədə "Twitter" hesabında paylaşım edib.

"Kaş ki Fransa Senatı birtərəfli və son dərəcə siyasiləşdirilmiş qərarlar qəbul etmək əvəzinə, gəlib ermənilərin Qarabağ ərazilərində nə etdiklərinə baxardılar. Füzuli rayonunda XIX əsrə aid olan Merdinli kənd məscidi tövləyə çevrilib".

Kadrlardan məsciddə karikatura çəkilməsini görmək mümkündür.

4
Teqlər:
video, erməni vandalizmi, tövlə, məscid, Füzuli
Mövzu:
Azərbaycan və Ermənistan arasında müharibə