Səməd və ailəsi

Bakıda yüz manat maaşa işləyib şam işığında yaşayan ailə var

4942
(Yenilənib 15:10 06.11.2017)
Divarsız birotaqlı evdə iki azyaşlı uşağı ilə yaşayan ailənin məşəqqəti - Azərbaycanda

İradə Cəlil, Sputnik Azərbaycan

BAKI, 6 noyabr — Sputnik. Onlar kəndin lap kənarında, köhnə, artıq bir neçə dəfə istifadə olunmuş daş-kəsəkdən tikilən evdə yaşayırlar. Yağış yağanda, hava soyuq olandan çöldəki soyuq evin divarlarına da hopur. Bəlkə elə buna görə də, körpə qızları hər ay xəstələnir. Dediklərinə görə, illərlə işıqsız yaşayıblar. Daha doğrusu, lampa, şam işığında… İnandırıcı görünməyə bilər. İnananlar isə onların haradasa ucqar dağ kəndində yaşadığını düşünə bilərlər. Amma bu ailə Bakıda, Hövsan qəsəbəsi, Məktəb küçəsi, 52 ünvanında yaşayır.

Səməd Musayevin 37 yaşı var. Tovuz rayonunda anadan olub. 2005-ci ildə ailə həyatı quran Səməd, 2007-ci ildə ailəsini də götürüb Bakıya köçüb. Amma Bakı heç də onun xəyallarında yaratdığı şəhər olmayıb, ona qollarını açmayıb. Səmədin həyatının bütün keşməkeşli günləri elə Bakıda keçib: "Çox çətin günlərimiz olub. Fəhləliklə ailəmi saxlamışam. Oğlum 2007, qızım isə 2010-cu ildə dünyaya gəliblər".

Səməd Musayev
© Sputnik / Murad Orujov
Səməd Musayev

Səməd danışdıqca kövrəlir. Deyir ki, uşaqlarını saxlaya bilmək üçün hər işdə işləyib. Pulunu qəpik-qəpik yığıb ki, özünə heç olmasa bir otaq alsın. Alıb da. Amma bu da ona asanlıqla başa gəlməyib.

Dediyinə görə, 2013-cü ildə yaşadığı həyəti alıb. Amma ev tikmək üçün icazə almaq ona baha başa gəlib:

"Torpağı kənd sovetindən almışam, Ağasəlim müəllimdən. Amma ev tikmək istəyəndə, icazə vermədi. Soruşdum ki, əgər ev tikməyə icazə verməyəcəkdinsə, bəs niyə bu torpağı satmısan mənə? Qayıtdı ki, ağlın olaydı, almayaydın. Amma mən dişimlə, dırnağımla balaca bir otaq tikməyi bacardım. Bir gün gəlib evimin bir divarını sökdülər. Qış günü idi, qar yağmışdı, hava çox soyuq idi. Mən həmin yerdən odeyal asdım ki, soyuğun qabağını az da olsa, alım."

Səmədin həyat yoldaşı Səltənətin sözlərinə görə, bu evdə 3 ildən çox işıqsız yaşayıblar. Bu yaxınlarda isə nəhayət ki, evə işıq çəkdirə biliblər:

"Özüm mağazada xadimə işləyirdim. Ayda 100 manat verirdilər. Mən həmin pula şam alırdım ki, uşaqlarım qaranlıqda qalmasın, təhsillərini davam etdirə bilsinlər. İnanın, hətta qardaşım belə gəlib bizdə qalmırdı ki, sizin evdə işıq yoxdur, adamın ürəyi sıxılır. Amma şükür olsun, işıq çəkdirdik. Qonşular yığılıb su çəkdirəndə, bizim evə də çəkdilər. Yoxsa suyu da qonşulardan gətirirdim".

Səməd Musayev deyir ki, qaz üçün Hövsan qaz idarəsinə dəfələrlə müraciət etsə də, ona bildiriblər ki, qazın çəkilməsi üçün boruları, sayğacı özü almalıdır və bundan əlavə 2000 manat ödəməlidir ki, qaz çəkilsin: "Neçə dəfə getdim, müraciət etdim. Dedilər ki, qazın çəkilməsini istəyirsənsə, ödənişi etməlisən. Mənim isə o ödənişi etməyə gücüm çatmır. Evimin vəziyyəti göz qabağındadır. Bir göz otağım var, qabağını da köhnə taxta-şifer parçaları ilə bağlamışam. Və mən burada iki övlad böyüdürəm. Mən bu uşaqları necə saxlamalıyam? Fəhləlik edib, birtəhər evin çörəyini qazanıram. Amma 2000 manat verib qaz çəkdirməyə gücüm yoxdur".

Balaca Əsmər 118-saylı məktəbin birinci sinfində oxuyur, əlaçıdır. Amma evləri soyuq olduğu üçün tez-tez xəstələnir. Xəstələnəndə isə nə dərsə gedə bilir, nə də həyətdə torpağa cızdığı "dama-dama" oyununu oynaya bilir. Üzünə baxıram. O qədər məsumdur ki… Valideynlərinin yaşadığı sıxıntılı vəziyyəti hələ də başa düşə bilmir.

Anası deyir ki, ev rütubətli olduğu üçün Əsmər tez-tez müalicə alır. Elə ay olmur ki, o, xəstələnməsin.

Musayevlərin ailəsinin bircə istəyi var. O da bir göz otaqlarına qazın çəkilməsi. İstəyirlər ki, qışı isti evdə qarşılasınlar. Amma Hövsan Qaz İdarəsinin 2000 manatlıq ödəniş tələbi onları bu qışı da soyuqda keçirməyə məhkum edəcək.

Sputnik Azərbaycan-a açıqlama verən "Azəriqaz"-ın mətbuat xidmətinin rəhbəri İbrahim Kərbəlayev bildirib ki, vətəndaş "Asan Xidmət" mərkəzlərinə və ya "Asan Kommunal" xidmətlərinə müraciət etməlidir: "Paytaxtda iki yerdə – Akademik Həsən Əliyev küçəsində və Dəmir Yolu Vağzalının inzibati binasında yerləşən "Asan Kommunal" mərkəzləri, regionlarda isə "Asan Xidmət" mərkəzləri yerləşir və vətəndaşların belə problemlərini bu idarələrin işçiləri həll edirlər. Vətəndaş bu sahədə ixtisaslaşmış və müqaviləsi olan podratçı şirkət ilə müqavilə bağlayır".

Səmədin ailəsi ilə bərabər yaşadığı ev
© Sputnik / Murad Orujov
Səmədin ailəsi ilə bərabər yaşadığı ev

"Qazlaşdırma işləri "Azəriqaz" yox, podratçı şirkət tərəfindən həyata keçirilir. Şirkət işçiləri tərəfindən məkana baxış keçirilir, hansı qaz mənbəyindən istifadə edilərək mənzilə xətt çəkiləcəyi dəqiqləşdirilir. Vətəndaş şərtlərlə və şirkətin tələb etdiyi vəsaitlə razılaşarsa, şirkət ilə vətəndaş arasında müqavilə imzalanır və qazlaşdırma işləri aparılır" – deyə Kərbəlayev bildirib.

O qeyd edib ki, fərdi yaşayış evlərində qazdan istifadə üçün "BK-G4T" markalı qaz sayğacları birmənalı olaraq "Azəriqaz" İstehsalat Birliyinin vəsaiti hesabına təmin olunur. Yəni vətəndaş sayğac üçün heç bir vəsait ödəməməlidir: "Bu məsələ əvvəldən belədir, yeni qayda deyil. Bunu bütün vətəndaşlar bilməlidir".

4942
Teqlər:
"ASAN Kommunal" Mərkəzi, İbrahim Kərbəlayev, Tovuz rayonu, ASAN Xidmət, "Azəriqaz" İstehsalat Birliyi, Hövsan qəsəbəsi, Bakı
Əlaqədar
Bakıda bir ailə var: başsız, möhtac, gözü yolda...
Cənub bölgəsində tükürpədici ailə qətliamı
Bakıda çadır şəhərciyi: orada 150 ailə yaşayır
Azərbaycanda ilanlarla eyni evdə yaşayan ailə
Azərbaycanda bir ailə il yarımdır şam işığında yaşayır

Şəhid general-mayorla doğulduğu Qəbələdə izdihamlı vida

887
Azərbaycan-Ermənistan dövlət sərhədinin Tovuz rayonu istiqamətində gedən döyüşlərdə şəhid olan qəhrəman hərbçimiz, general-mayor Həşimov Poladın nəşi doğulduğu Qəbələnin Vəndam kəndinə gətirilib.

General-mayor Həşimov Polad İsrayıl oğlu qəhrəmanca şəhid olub. Onun nəşi doğulduğu Qəbələnin Vəndam kəndinə gətirilib. Məmləkətinə onunla vidalaşmaq imkanı yaradılıb.

Qeyd edək ki, şəhidimiz sabah paytaxtdakı İkinci Fəxri Xiyabanda son mənzilə yola salınacaq.

İyulun 12-də Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz istiqamətində mövqelərimizi ələ keçirmək məqsədilə artilleriya atəşindən istifadə edərək hücuma keçməyə cəhd göstərib.

Düşmən hücumunun qarşısını alarkən döyüşdə Azərbaycan Ordusunun  hərbi qulluqçuları çavuş Sadıqov Vüqar Lətif oğlu, baş əsgər Məmmədov Elşad Dönməz oğlu, baş leytenant Mahmudov Rəşad Rəşid oğlu, hərbi qulluqçumuz əsgər Daşdəmirov Xəyyam Məhəmməd oğlu, bu gün isə döyüş zamanı müdafiənin ön xəttində olan general-mayor Həşimov Polad İsrayıl oğlu, polkovnik Mirzəyev İlqar Anzor oğlu, mayor Əhmədov Namiq Hajan oğlu, mayor Novruzov Anar Gülverdi oğlu, gizir Zeynallı İlqar Ayaz oğlu, gizir Babayev Yaşar Vasif oğlu və müddətdən artıq həqiqi xidmət hərbi qulluqçusu, əsgər Mustafazadə Elçin Arif oğlu şəhid olub.

887
Buzovnada çimərlik, arxiv şəkli

Bəla gələndə tək gəlmir: Payızı gözləyək, vəziyyət bir az da pisləşə bilər

456
Psixoloq bildirir ki, karantin qaydalarının davam etməsi, yeni vərdişlərin formalaşması insanlarda müəyyən narahatlıqlar yaradıb.

Nigar İsgəndərova, Sputnik Azərbaycan

BAKI, 14 iyul — Sputnik. Hər il mövsümi olaraq payız aylarında insanlar müəyyən depressiya yaşayırlar. Mütəxəssislər bunu “payız depressiyası” adlandırırlar. Kimdəsə bu depressiya özünü daha sərt, kimdəsə daha yumşaq formada biruzə verir.

Bu ilin payızında isə depressiyanın daha kəskin olacağı proqnozlaşdırılır. Bunun da əsas səbəbi məhz sərt karantin qaydaları, insanları yayda belə, dincəlmədən evdə keçirməsi, qayğılarının daha da artması ilə izah olunur.

Mövcud pandemiya şəraitinin payızda depressiyaya səbəb olmaması nə edilməlidir?

Psixoloq Elnur Rüstəmov Sputnik Azərbaycan-a açıqlamasında deyib ki, bu, daha çox payızda karantin rejiminin hansı formada davam etməsindən asılı olacaq: "Ona görə də hələlik bununla bağlı proqnoz vermək, payızda depressiya artacaq demək tələskənlik olardı. Çünki sentyabrda dərslərin açılması, bundan sonra iş yerlərinin də qismən bərpası insanların əhval-ruhiyyəsinə müsbət təsir göstərə bilər. Buna görə də, düşünürəm ki, biz hələlik payıza yox, bu günə hazırlaşsaq daha yaxşı nəticələr əldə etmiş olarıq. Yəni, karantin qaydalarına əməl etsək, qaydaları pozmasaq, maska taxıb sosial məsafəni gözləsək, gigiyenik qaydalara əməl etsək, bütün bunlar da karantin rejiminin yumşalmasına köklənə bilər".

"Biz bu il nə yazı, nə də yayı normal hiss etdik. Lakin mövcud vəziyyət payızda da davam edərsə, bu bir çox psixoloji problemlərin yaranmasına rəvac verə bilər. Psixoloji problem dedikdə, yalnız depressiya nəzərdə tutulmamalıdır. Bura təşviş, aqressiya və bir çox psixoloji problemləri də əlavə edə bilərik. Karantin qaydalarının davam etməsi, yeni vərdişlərin formalaşması onsuz da insanlarda müəyyən narahatlıqlar yaradıb. Çünki ötən ilin yayı ilə bu ilin yayını müqayisə etdikdə həyatımızda nə qədər dəyişikliklərin olduğunu görə bilərik. Ötən il insanların hamısı dincəlmək üçün harasa üz tutmasalar da,  ən azı istədikləri vaxtda evdən çıxa bilirdilər. İnsanlar rahatlıqla həyətə düşə, parka gedə bilirdilər. İnsanların bir azadlıqları var idi, bu gün isə o azadlıq məhdudlaşdırılıb", - deyə psixoloq əlavə edib.

O bildirib ki, insanlar asanlıqla yeni davranış modelinə uyğunlaşmış olsaydılar, bəlkə də karantin qaydaları bu qədər sərt olmazdı: "Bir toplum olaraq yeni davranış modelini bu rejimdə qəbul etməkdə çətinlik çəkdik. Çünki biz əl verib görüşməyə, sosial məsafə gözləməməyə öyrəşmişdik. Düşünürəm ki, bu gün hökumət payızdan daha çox bu günə köklənib yoluxanların sayının azalması, sağalanların sayının artmasına nail olmağı hədəfləyib. Yəni, bu gün hökumət payızdan daha əvvəl iyul və avqustda vəziyyəti nəzarətə almağı hədəfləyib".

456