Növbə

Mühüm dəyişiklik qərarı: məmur maneçiliyi aradan qalxacaq

1847
(Yenilənib 19:14 24.10.2017)
"Müraciət edən şəxslər mənfi hallardan, vaxt itkisindən, məsrəfdən söz açırlar"

BAKI, 24 oktyabr — Sputnik. Əcnəbilərə və vətəndaşlığı olmayan şəxslərə Azərbaycan ərazisində daimi yaşamaq üçün icazənin (müddətin uzadılması) və iş icazəsinin verilməsi üçün tələb olunan sənədlərin sayı azaldılıb. Sputnik Azərbaycan xəbər verir ki, bununla bağlı Miqrasiya Məcəlləsinə dəyişikliklər edilib.

Dəyişikliklər bürokratik əngəllərin qarşısını almaq məqsədilə həyata keçirilib. Məcəlləyə edilən dəyişikliklərə görə, əcnəbilərə və vətəndaşlığı olmayan şəxslərə Azərbaycan ərazisində daimi yaşamaq üçün icazənin verilməsi (müddətinin uzadılması) üçün ailə tərkibi haqqında arayışa, nikah haqqında şəhadətnamənin notariat qaydasında təsdiq olunmuş surətinə, peşə ixtisası olduğu təqdirdə bununla bağlı sənədlərin notariat qaydasında təsdiq olunmuş surətlərinin təqdim olunmasına ehtiyac olmayacaq.

İş icazəsinin verilməsi üçün də işəgötürənin müvafiq icra hakimiyyəti orqanına təqdim etdiyi sənədlərin sayı azaldılıb. Dəyişikliyə əsasən, iş icazəsinin verilməsi üçün tələb olunan sənədlərdən birinə — Azərbaycanda başqa əsaslarla olan əcnəbinin və vətəndaşlığı olmayan şəxsin ölkə ərazisində qalmasına hüquq verən müvafiq sənədin surətinin verilməsinə ehtiyac olmayacaq. Layihə Milli Məclisin oktyabrın 20-də keçirilən plenar iclasında qəbul edilib.

Dövlət Miqrasiya Xidməti (DMX) yanında İctimai Şuranın sədri Azər Allahverənov Sputnik Azərbaycan-a açıqlamasında, dəyişiklikləri müsbət qiymətləndirib: "Zaman-zaman bizə də müraciət edən miqrantlar bəzi mənfi hallardan, vaxt itkisindən, məsrəfdən söz açıblar. Məsələn, miqrantlar həmin sənədlərin notarial qaydada təsdiq olunması üçün hansısa qurumlara müraciət edirdilər. Qurumlar onları ləngidir, hətta müəyyən olunmuş məbləğdən bir qədər artıq vəsait istəyirdilər. Yəni, miqrantlar müəyyən inzibati çətinliklərlə üzləşirdilər və onlar zaman-zaman bununla bağlı narazılıqlarını bildirirdilər. Biz də İctimai Şura olaraq bu məsələni gündəmdə saxlayırdıq".

Nəqliyyat məsələləri üzrə ekspert Azər Allahverənov
© Sputnik / Murad Orujov
Nəqliyyat məsələləri üzrə ekspert Azər Allahverənov

Onun sözlərinə görə, bir çox sənədlərin Dövlət Miqrasiya Xidmətinin bazasında orijinal nüsxələri var: "Elə sənədlər var ki, təsdiq olunduqdan sonra Dövlət Miqrasiya Xidmətinin əməkdaşları onları orijinal sənədlə tutuşdururdular. Bundan sonra notarial qaydada təsdiq olunmuş sənədləri özlərində saxlayır, orijinal sənədi qaytarırdılar. Burada söhbət yalnız notarial qaydada təsdiqdən gedir. Xidmətin əməkdaşları kifayət qədər peşəkardırlar. Onlar hər hansı bir sənədin saxta olub-olmaması barədə daha dəqiq informasiyaya malikdirlər. Sənədin saxta olub-olmamasını peşəkarcasına müəyyənləşdirə bilirlər. Burada notarial qaydada təsdiqə, əlavə məsrəfə ehtiyac qalmır".

"Miqrasiya qanunvericiliyi daim təkmilləşir. Bu dəyişikliklər əcnəbilərin bilavasitə maraqlarına cavab verir" – deyə Allahverənov qeyd edib.

“Vətəndaşların Əmək Hüquqlarını Müdafiə Liqası”nın rəhbəri Sahib Məmmədov
“Vətəndaşların Əmək Hüquqlarını Müdafiə Liqası”nın rəhbəri Sahib Məmmədov

Vətəndaşların Əmək Hüquqlarının Müdafiəsi Liqasının (VƏHML) rəhbəri, miqrasiya məsələləri üzrə ekspert Sahib Məmmədov isə, Sputnik Azərbaycan-a açıqlamasında, bu dəyişikliklərin daha çox texniki xarakterli olduğunu deyib: "Elə sənədlər var ki, artıq Dövlət Miqrasiya Xidmətinin elektron bazasında var. Məsələn, miqrant nikaha girib daimi yaşamaq hüququ əldə edibsə, bu barədə artıq müvafiq icra hakimiyyəti orqanının bazasında da məlumat var. Düşünürəm ki, elektron sistemə keçməklə, tələb olunan sənədləri daha da azaltmaq olar. Bir növ, Azərbaycanda uzunmüddətli yaşamaq hüququ əldə edən şəxslər üçün prosedur asanlaşdırılır. Onsuz da, sənəd lazım olsa, notarial qaydada təsdiq edib gətirəcəklər. İndi buna bir çox hallarda ehtiyac yoxdur".

Onun sözlərinə görə, hazırda əmək miqrantlarından peşə ixtisasına dair sənəd tələb olunur: "Amma daimi yaşamaq hüququ olanlar artıq iş icazəsi almadan işləyə bilirlər: "Ona görə də, peşəyə dair bir sənədin olmasına da ehtiyac yoxdur. Burada əmək miqrantları ilə bağlı da bir neçə dəyişiklik var. Bunlar Azərbaycana işçi axınını sürətləndirməsə də, zəruri dəyişikliklərdir. Bu dəyişikliklər bürokratiyanı bir qədər azaldacaq. O sənədlər ki, dövlətə bəllidir, dövlətin bazasında var, onları niyə almalıdır".

"İkincisi, daimi yaşayış hüququ əldə edən əcnəbi şəxsin iş icazəsi almaq kimi bir öhdəliyi yoxdursa, yəni, işəgötürənin belə bir öhdəliyi yoxdursa, onda onun peşəsinə dair məlumat da əldə etməyə heç bir ehtiyac yoxdur" — S. Məmmədov vurğulayıb.

Ekspert bildirib ki, əcnəbilərə və vətəndaşlığı olmayan şəxslərə Azərbaycan ərazisində daimi yaşamaq üçün icazənin verilməsi (müddətinin uzadılması) üçün ailə tərkibi haqqında arayışa ehtiyac olmayacaq: "Əcnəbi şəxsin Azərbaycanda daimi yaşamaq hüququ əldə etmək üçün digər əsaslar varsa, onda buna bir ehtiyac qalmır. Yəni, bu məlumat da elektron bazada olmalıdır. Hökumətin vahid informasiya sistemində bu məlumat olur. Məsələn, Ədliyyə Nazirliyinin Qeydiyyat İdarəsinin bazasında bu məlumatlar olmalıdır".

1847
Teqlər:
DMX, qanunvericilik, Sputnik Azərbaycan, Miqrasiya Məcəlləsi, Dövlət Miqrasiya Xidməti, əcnəbi, Azər Allahverənov, vətəndaş, Sahib Məmmədov, ekspert, miqrant, Azərbaycan, qanun
Əlaqədar
İl ərzində dünyada həlak olan miqrantların sayı bilindi
İki min miqrant xilas edilib
Azər Allahverənov: Azərbaycan miqrantlarının 85 faizi Rusiyaya gedir
Miqrant böhranı avropalıları cana doydurub
Liviya sahillərində yüzlərlə miqrant batıb
Körpə

Hərbi əməliyyatlar gedən müddətdə doğulan oğlanlara qoyulan adlar açıqlandı

5
(Yenilənib 18:55 28.10.2020)
Bir ay ərzində 41 oğlana Yusif, 41 oğlana Əli, 36 oğlana Uğur adı verilib, qız adlarında isə ilk yerlərdə Zəhra, Aylin, Məryəm yer alıb.

BAKI, 28 oktyabr — Sputnik. Son bir ayda, yəni Ermənistan-Azərbaycan arasında Dağlıq Qarabağ münaqişəsinin daha da gərginləşdiyi bir dövrdə dünyaya gələn körpələrə qoyulan adlar açıqlanıb. Ədliyyə Nazirliyindən Sputnik Azərbqaycan-a bildirilib ki, 27 sentyabrdan 27 oktyabradək Azərbaycanda 2353 uşaq dünyaya gəlib ki, onlardan 1282 nəfəri oğlan, 1071 nəfəri qız olub. Bu müddət ərzində doğulan əkiz uşaqların sayı 28 olub.

Nazirliyin məlumatına görə, bir ay ərzində 41 oğlana Yusif, 41 oğlana Əli, 36 oğlana Uğur adı verilib.

Qız adlarında isə ilk yerlərdə Zəhra, Aylin, Məryəm adları yer alıb.

5

Bakı Metropolitenində sərnişindaşıma fəaliyyəti daha bir ay dayandırıldı

10
(Yenilənib 18:23 28.10.2020)
Nazirlər Kabinetinin "Xüsusi karantin rejimi ilə bağlı əlavə tədbirlər barədə" qərarına edilən müvafiq dəyişikliklərə əsasən Bakı Metropolitenində sərnişindaşıma fəaliyyəti 2020-ci il 1 dekabr saat 06:00-dək dayandırılıb.

BAKI, 28 oktyabr - Sputnik. Bakı Metropolitenində sərnişindaşıma fəaliyyəti 2020-ci il 1 dekabr saat 06:00-dək dayandırılıb.

Sputnik Azərbaycan-ın məlumatına görə, bu, Nazirlər Kabinetinin "Xüsusi karantin rejimi ilə bağlı əlavə tədbirlər barədə" qərarına edilən müvafiq dəyişiklikdə əksini tapıb.

Qeyd edək ki, qüvvədə olan qərara əsasən, bu il oktyabrın 19-dan 2 noyabr saat 06:00-dək Bakı Metropolitenində sərnişindaşıma fəaliyyəti dayandırılmışdı.

Azərbaycanın bir sıra şəhər və rayonlarında ictimai nəqliyyatın hərəkətinə qoyulan məhdudiyyət də noyabr ayının 28-dək uzadılıb. Nazirlər Kabineti yanında Operativ Qərargahdan daxil olan məlumata görə, Bakı, Sumqayıt, Gəncə, Yevlax, Mingəçevir, Şəki, Şirvan, Lənkəran şəhərlərində və Abşeron, Göygöl, Samux, Sabirabad, Quba, Ağstafa, Biləsuvar, Xaçmaz, İsmayıllı, Qax, Zaqatala, Cəlilabad, Masallı rayonlarda aşağıda qeyd olunan tarixlərdə həftəsonları ictimai nəqliyyatın hərəkəti dayandırılır:

31 oktyabr saat 00:00-dan 2 noyabr saat 06.00-dək;

7 noyabr saat 00:00-dan 9 noyabr saat 06:00-dək;

14 noyabr saat 00:00-dan 16 noyabr saat 06:00-dək;

21 noyabr saat 00:00-dan 23 noyabr saat 06:00-dək;

28 noyabr saat 00:00-dan 30 noyabr saat 06:00-dək.

Həmçinin 29 oktyabr saat 00:00-dan etibarən Lənkəran şəhəri, Cəlilabad və Masallı rayonlarına operativ və xüsusi təyinatlı nəqliyyat vasitələrinin, eləcə də yükdaşıyan avtomobillərin hərəkəti istisna olmaqla giriş-çıxış dayandırılır.

10
Xarici İşlər naziri Ceyhun Bayramov, arxiv şəkli

Ceyhun Bayramov həmsədrlərlə telefofonla danışıb

0
(Yenilənib 19:25 28.10.2020)
ATƏT-in Minsk Qrupu həmsədrləri mülki şəxslərin həyatını itirməsi ilə bağlı narahatlıqlarını dilə gətiriblər. Bölgədəki gərginliyin azaldılması və münaqişənin sülh yolu ilə həllinin vacibliyini vurğulayıblar.

BAKI, 28 oktyabr - Sputnik. Bu gün Azərbaycanın Xarici İşlər naziri Ceyhun Bayramovun ATƏT-in Minsk Qrupunun həmsədrləri Rusiyadan İqor Popov, ABŞ-dan Andrew Schofer və Fransadan Stefan Viskonti ilə telefon danışıqları baş tutub.

Bu barədə Sputnik Azərbaycan-a XİN-in Mətbuat Xidmətindən bildirilib.

Nazir Ceyhun Bayramov həmsədrlərə Ermənistan silahlı qüvvələri tərəfindən humanitar atəşkəsin bir daha kobud şəkildə pozulması barədə məlumat verib. O, 27-28 oktyabr 2020-ci il tarixlərində Bərdə şəhərində dinc Azərbaycan əhalisinin məqsədyönlü şəkildə hədəf alındığını vurğulayıb. Nazir Ermənistan silahlı qüvvələrinin münaqişə bölgəsindən uzaqda yerləşən şəhərlərdəki günahsız mülki şəxslərə, o cümlədən uşaqlara və qadınlara xaincəsinə hücum etdiyini bildirib. Nazir Ceyhun Bayramov, həmçinin həmsədrlərə Ermənistan tərəfindən növbəti dəfə törədilən hərbi cinayət nəticəsində mülki əhali arasında ağır tələfat barədə məlumat verib.

Nazir Ceyhun Bayramov həmsədrləri Azərbaycan mülki vətəndaşlarına qarşı bu qeyri-insani hərəkətləri pisləməyə çağırıb.

ATƏT-in Minsk Qrupu həmsədrləri mülki şəxslərin həyatını itirməsi ilə bağlı narahatlıqlarını dilə gətiriblər. Bölgədəki gərginliyin azaldılması və münaqişənin sülh yolu ilə həllinin vacibliyini vurğulayıblar.

Bu gün həmçinin Xarici İşlər naziri Ceyhun Bayramov və ABŞ Dövlət katibinin müavini Stiven Biqan arasında telefon danışığı baş tutub.

Telefon danışığı zamanı C.Bayramov Ermənistan tərəfinin beynəlxalq humanitar hüquq qarşısındakı öhdəliklərini kobud şəkildə pozaraq razılaşdırılmış humanitar atəşkəs rejiminə üçüncü dəfə riayət etmədiyini, eyni zamanda Bərdə şəhərində dinc Azərbaycan əhalisini qəsdən hədəfə aldığını vurğulayıb. O, münaqişə zonasından çox uzaqda yerləşən şəhərlərin uşaqlar və qadınlar da daxil olmaqla, günahsız mülki əhalinin Vaşinqton görüşündən sonra və nəzərdə tutulan Cenevrə danışıqları ərəfəsində Ermənistan silahlı qüvvələri tərəfindən dəfələrlə hücumlara məruz qaldığını qeyd edib.

Nazir həmçinin həmkarına Ermənistan tərəfindən xaincəsinə edilən raket hücumu nəticəsində mülki şəxslər arasında olan itkilər barədə məlumat verib.

S.Biqan mülki itkilərdən ciddi narahatlığını dilə gətirib və mülki şəxslərə qarşı hücumların yolverilməz olduğunu bildirib. O, gərginliyin azaldılmasının və münaqişənin siyasi həllinə nail olmaq üçün tərəflərin müvafiq addımlar atmasının vacibliyini vurğulayıb.

0