Namiq İsayev

Daxili Qoşunların hərbçisinin 4 illik cəhənnəm əzabları

3438
(Yenilənib 10:49 23.08.2017)
Hərbçinin ailəsinə Prezidentdən yardım istəyir: "Başqa çarəmiz qalmayıb..."

İradə Cəlil, Sputnik Azərbaycan

BAKI, 23 avqust — Sputnik. 2013-cü il may ayının 18-i, səhər saat 07:45 radələri… Həmin gün çox adi gün idi Namiq üçün. Hər günkü gün idi. Həmin səhər yuxudan oyananda ağlına belə, gəlmirdi ki, 18 may onun həyatını alt-üst edəcək. Amma…

Hər şey birdən olur. Səhər tezdən Bakı-Quba avtomobil yolunun 185-ci km-də dəhşətli qəza baş verir. Göy-Göl sakini Əliyev Seymur Tələt oğlunun idarə etdiyi, hərbçiləri daşıyan "RAF" markalı, 10-EX-294 dövlət qeydiyyat nişanlı avtomobil yoldan çıxaraq ağaca çırpılır. Qəza nəticəsində 5 nəfər ölür və 6 hərbçi ağır yaralanır. Yaralananlar arasında Namiq İsayev də olur. Gəncin bütün arzuları ürəyində qalır…

Atası Qəhrəman İsayev bildirir ki, Namiq uşaqlıqdan hərbçi olmaq istəyirmiş. Elə buna görə də öz üzərində işləyirmiş: "Ata məni vətən çağırır. Mən hərbçi olmaq üçün doğulmuşam" deyirdi. Qubada hərbi hissədə hamı başına and içirdi. Namiq tufeyli həyatı sevməyən, diqqətcil, çalışqan bir oğul idi. Anası da, mən də belə bir övladımızın olduğu üçün fəxr edirdik…"

Namiq İsayev (soldan birinci) hərbi xidmət illərində
© Photo : İsayevlər ailəsinin şəxsi arxivi
Namiq İsayev (soldan birinci) hərbi xidmət illərində

Namiq İsayev 1990-cı ildə dünyaya gəlib. Valideynləri deyirlər ki, o, elə uşaqlıqdan digər həmyaşıdlarından fərqlənib, idmana maraq göstərib, boksla məşğul olub. Hərbi xidmətini başa vurduqdan sonra, 2011-ci ildə yenidən Daxili Qoşunların Quba rayonunda yerləşən hərbi hissəsində xidmət etməyə başlayıb.

Anası Məlahət xanımın sözlərinə görə, qəza zamanı Namiq ağır xəsarət alıb: "Həkimlər deyirdilər ki, ağır kəllə-beyin travması alıb. Deyirdilər ki, elə belə də qalacaq. "Onun yenidən özünə gəlməsi üçün 5-6 il lazımdır", deyirdilər. Mən isə inana bilmirdim. Elə bilirdim, tezliklə sağalıb ayağa qalxacaq".

"8 ay xəstəxanada qaldı. Mən də yanında qalırdım. Başının üstündə Allaha yalvarır, balamın tez sağalması üçün dua edirdim. Elə qorxurdum ki, onu itirərəm deyə" — dərdli ana danışır.

Sonra Namiq xəstəxanadan buraxılır. Elə Məlahət ananın da ağrılı günləri bundan sonra başlayır: "Bütün nəyimiz vardı, satıb Namiqin ayağa qalxması üçün xərclədik. Uşaq taxta kimi idi. Nə hərəkət edə bilirdi, nə də deyilənləri başa düşürdü. Nəsrəddin Tusi adına kinikada həkim Angelsin müalicəsi ilə Namiq bir qədər özünə gəldi. Bu müalicə bizə 28 min manata başa gəldi. İlk iki ayı 5 min manatdan verdik. Angels həkim deyirdi ki, müalicə davam etsə, Namiq ayağa qalxa bilər. Amma müalicəni davam etdirməyə imkanımız olmadı".

Məlahət xanım 4 ildir Namiqin başı üstündən çəkilmir: "Səhərim Namiqlə açılır, gecəm Namiqlə bitir. Mənsiz qala bilmir. Məni görməyəndə özünü çırpır. Ayağa qalxmaq istəyir, bacarmır, əsəbləşir. Məndən başqa kim bacarmır onunla".

Anası onu körpə uşaq kimi əzizləyir: "Canım oğlum, şirin oğlum". Namiq isə məsum uşaqlar kimi gülümsəyir. Anası deyir ki, hər şeyi başa düşür, sadəcə danışa bilmir, fikirlərini deyə bilmir.

Namiq atası Qəhrəman İsayevlə
© Sputnik / Irade JELIL
Namiq atası Qəhrəman İsayevlə

Namiqin atası Qəhrəman kişini qəhər boğur, gözləri dolur: "Bəzən əsəbiləşib üstünə qışqırıram. Danışa bilmir, cavab verə bilmir. Baxıram, gözlərindən yaş süzülür. Ürəyim əriyir. Peşman oluram, özümü danlayıram ki, kaş dilim tutulsun, Namiqə heç nə deyə bilməyim".

Qəhrəman İsayev bildirir ki, Namiqin müalicəsi üçün 50 min manat lazımdır: "Rusiyada həkimlər var, danışmışıq, deyirlər 50 minə onu ayağa qaldırmaq mümkündür. Mən Namiqi Tehrana da aparmışam. Dedilər müalicəsi var, amma bahadır".

"İnanın Allaha hər şeyimi satmışam. İndi qardaşımın evində yaşayıram. Bakıxanovda evimi, avtomobillərimi, mal-qaramı satmışam. Hamısını Namiqin ayağa qalxa bilməsi üçün xərcləmişəm. Bura qədər edə bilmişəm. Hərəkət edə bilir, başa düşür, gülümsünür, ağlaya bilir. Qoluna girəndə addım ata bilir, bircə gəzməyi qalıb. Heç nə istəmirəm, bircə ayağa qalxıb özünü idarə edə bilsin, yetər" — ata danışır.

Namiqə hərbçi olduğu dövrdə çəkdirdiyi şəkilləri göstərirəm, əlimdən alıb diqqətlə baxır. Gözündə yaş gilələnir, boğazı qəhərlənir…

Namiq İsayevin valideynləri deyirlər ki, onun müalicəsi üçün lazım olan pulu ödəməyə imkanları yoxdur. Buna görə də dəfələrlə aidiyyatı qurumlara müraciət etsələr də, müraciətləri cavabsız qalıb. 27 yaşlı gəncin valideynləri saytımız vasitəsilə Prezident İlham Əliyevdən, Birinci vitse-prezident Mehriban Əliyevadan yardım istəyirlər: "Başqa döyəcək qapımız qalmayıb. Namiq Daxili Qoşunlarda xidmət edib. 18 may 2013-cü ildə işə gedərkən Quba yolunda qəzaya düşüb. Yoldaşlarından 5 nəfəri ölüb, bir neçəsi ağır yaralanıb. Namiq isə 4 ildir ki, yataq xəstəsidir. Çox xahiş edirik ki, Namiqin yenidən ayağa qalxa bilməsi üçün lazım olan səhiyyə tədbirlərinin həyata keçirilıməsinə yardım etsinlər. Bizim buna çox ehtiyacımız var…"

Qeyd edək ki, Namiq İsayevin əməliyyat edilərək yenidən ayağa qalxması üçün 50 min manat lazımdır. Yadım etmək istəyən şəxslər, redaksiyamızdan əlaqə nömrəsi ala bilərlər.

3438
Teqlər:
qəza, ata, ana, Daxili Qoşunlar, hərbçi, həkim, müalicə, Bakı-Quba avtomobil yolu, Namiq İsayev, Qəhrəman İsayev
Əlaqədar
Kasıblar məhəlləsində insanlıq dramı yaşanır
Xəzərdə batan neftçinin gözyaşardıcı ailə dramı üzə çıxdı
Aralıq dənizində insanlıq dramı davam edir
"Azadlıq parkı"nda yaşanan ailə dramı
Bakıda dəhşətli dram yaşanır: iş adamı 4 yaşlı uşağı girov saxlayır
82 yaşlı kişinin dramı: "Yoldaşım dedi, kişi deyilsən, pul tap..."
UNESCO

Azərbaycanlılar Venesiyada: UNESCO-nun tədbirində "Sarı gəlin" səsləndi

29
(Yenilənib 20:59 24.09.2021)
Qala gecəsinin ən mühüm məqamı isə azərbaycanlı tanınmış caz ifaçısı Etibar Əsədlinin Azərbaycanın xalq mahnısı “Sarı gəlin”i ifa etməsi olub.

BAKI, 24 sentyabr — Sputnik. İtaliyanın Venesiya şəhərinin San Klemente adasında UNESCO-nun iştirakı, Beynəlxalq Memarlar İttifaqının dəstəyi ilə "Rise from the ashes" (“Küllərdən qalx”) adlı humanitar xarakterli multikultural forum keçirilib.

Sputnik Azərbaycan xəbər verir ki, 17-ci Venesiya Memarlıq Biennalesi çərçivəsində “Vasconi Architectes by Thomas Schinko” memarlıq şirkətinin təşəbbüsü ilə təşkil olunan beynəlxalq forumda dünyanın tanınmış şəxsləri ilə yanaşı, azərbaycanlı memarlar, sənətçilər, incəsənət nümayəndələri və tələbələr iştirak ediblər.

Tədbirin əsas məqsədi Beyrut şəhərinin rekonstruksiyası, həmçinin şəhərin Baş memarlıq planı üçün həll yollarının tapılması olub. Forumda, eyni zamanda, təcrübəli beynəlxalq təlimçilər müxtəlif mövzularda çıxışlar ediblər.

UNESCO-nun Baş Konfransının prezidenti Altay Cengizer çıxış edərək UNESCO-nun Baş direktoru xanım Odre Azulenin bu foruma dəstək olduğunu iştirakçıların diqqətinə çatdırıb. Tədbirdə tanınmış memar Renzo Piano, UNESCO-nun xoşməramlı səfiri Hedva Ser, UNESCO-nun Venesiya bölgəsi üzrə rəsmi nümayəndəsi Ana Luiza Thompson-Flores, Livan Mühəndislər və Memarlar Federasiyasının prezidenti Cad Tabet, ALBA Universitetinin prezidenti Andre Bexazi, Beynəlxalq təhlükəsizlik, enerji və ətraf mühit üzrə direktorlar şurası və Pentaqonun baş məsləhətçisi Çarlz Sills və digər nüfuzlu şəxslər iştirak etdilər.

Forumda, həmçinin peşəkar təlimçilər tərəfindən müxtəlif aktual mövzularda çıxışlar olub. “Millionaire Concept Network”un dəstəyi ilə konfransda iştirak edən Afrika Sağlamlıq Federasiyasının idarə heyətinin sədri Mohamed El Sahilinin məruzəsi dinlənilib.

Tədbirdə “Eurasia Analytics”in direktoru Gülmira Rzayeva, “Millionaire Concept Network”un İtaliya üzrə direktoru Turan Sadigi, elm, cəmiyyət və rəssamlıq sahəsində 20 illik təcrübəyə malik rəssam Koen Vanmexelen, “SnarkArt” şirkətinin icraçı direktoru Nadia Taiga və digər şəxslər iştirak ediblər. Forumda NFT rəssamı kimi məşhurluq qazanan Krista Kim şəhərlərin yenidən qurulması üçün UNESCO-ya sənət, memarlıq sahəsində, cəmiyyətdə inqilab edəcək fikirlər təqdim edərək bu işdə qlobal miqyasda fəaliyyət göstərən təşkilatların, institutların və yaradıcı şəxslərin önəmli rol oynadığını qeyd edib. "TheSuperWorld" virtual daşınmaz əmlak platformasının baş icraçı direktoru və həmtəsisçisi Hrish Lotlikar isə daha yaxşı bir dünya yaratmaq üçün AR/VR/Blockchain və AL texnologiyalarından istifadə etməyin vacibliyini bildirib.

Livanın məşhur sənətçisi Rudy Rahme qala gecədə canlı performans nümayiş etdirib. Türk sənətçisi Özge Günaydın isə “Küllərdən qalx” simvolunu yaradıb. Qala gecəsinin ən mühüm məqamı isə azərbaycanlı tanınmış caz ifaçısı Etibar Əsədlinin Azərbaycanın xalq mahnısı “Sarı gəlin”i ifa etməsi olub.

Tədbirin təşkilatçısı, “Vasconi Architectes by Thomas Schinko” memarlıq şirkətinin vitse-prezidenti, həmyerlimiz Aytən Mirzoyeva gələcəkdə belə bir formatda forumun Gəncə şəhərinin və Qarabağın yenidən qurulması üçün Mədəniyyətlərarası Dialoqa dair Sülh Yaradıcılıq Mərkəzinin iştirakı ilə Azərbaycanda keçirilməsinin nəzərdə tutulduğunu deyib.

 

29
Azərbaycan hərbçiləri, arxiv şəkli

Bir "dəmir yumruq" olub düşmənin başına zərbə endirməyə gedənlər xatirələrini bölüşdülər

384
(Yenilənib 18:24 24.09.2021)
Təəssüf ki, 44 gün davam edən döyüşlərdə yüzlərlə döyüşçü cəbhə xəttindən geri dönməyib. Ölkənin gələcəyi uğrunda onlarla dinc sakin həyatını qurban verib. Azərbaycan vətəndaşları onların qəhrəmanlıqlarını heç vaxt unutmayacaqlar.

BAKI, 24 sentyabr — Sputnik. Otuz ilə yaxın müddətdə işğal altında qalan torpaqlarımız ölkənin qeyrətli oğul və qızlarının qəhrəmanlığı və cəsarəti sayəsində Azərbaycana qaytarılıb. Təəssüf ki, 44 gün davam edən döyüşlərdə yüzlərlə döyüşçü cəbhə xəttindən geri dönməyib. Ölkənin gələcəyi uğrunda onlarla dinc sakin həyatını qurban verib. Azərbaycan vətəndaşları onların qəhrəmanlıqlarını heç vaxt unutmayacaqlar.

Bu gün Sputnik Azərbaycan multimedia mətbuat mərkəzində keçirilən dəyirmi masada müharibənin başlanmasının şahidi olanlar həmin anları, müharibə günlərini necə xatırladıqları barədə söhbət açıblar.

Polad Həşimov şəhid olan gün qərarlarını verdilər: Döyüşə gedirik! 

Sputnik Azərbaycan-ın redaktoru, müharibə iştirakçısı Vüsal Azayev qardaşı Eldost Azayevlə birlikdə general-mayor Polad Həşimov şəhid olanda hər kəs kimi orduya yazılıblar. Vüsal Azayev o günləri belə xatırlayır: "Mən cəbhə bölgəsinə yaxın olduğuma görə bizə xəbərlər gəlirdi ki, müharibə başlayır. 27-si səhər rayondan 500-ə yaxın təcili yardım maşını keçdi. Artıq başa düşdük ki, bu, irimiqyaslıdır. 28-i bizə mesaj gəldi, 29-u səhər biz yol düşdük. Hər ikimiz ehtiyatda olan zabit idik".

Müharibə iştirakçısı bildirir ki, müharibəyə yola düşəndə insan izdihamını görəndə heyrətlənib. Həm də qürurlanıb ki, tək deyillər, onların arxasında böyük bir xalq dayanıb: "Ağcəbədidən gedəndə ikinci şoku yaşadım. Hər kəs çalışırdı ki, əlindən gələni etsin. Hər kəs çalışırdı ki, cəbhəyə nəsə yollasın".

Növbəti şok isə xoş olmayıb. Hərbçi yoldaşları ilə birlikdə Cəbrayılda mühasirəyə salınan Azayev orada minomyot yağışına düşüblər. Həmin gün cəbhə yoldaşlarının böyük bir qismi şəhid olub: "Mən bölük komandirinin müavini idim. Pərən-pərən düşdük, xeyli şəhid verdik. Mən gördüm ki, mənim bölük komandirlərim hamısı mənim yanımdadır. Halbuki onlar arxada olmalı idilər. Bunun özü adama stimul verirdi. On üç əsgər, iki zabit, tabor komandiri və tabor komandirinin müavini şəhid oldular. Qərargah rəisimiz də yaralandı".

© Sputnik / Murad Orujov
Vətən müharibəsi iştirakçısı Vüsal Azayev

Həmkarımız müharibənin bitdiyi günü belə xatırlayır: "Noyabrın 10-da gecə saat 2-də bizə məlumat verildi ki, atəşkəs elan olunub. Təxminən 2 saat keçdi, ermənilər atəşkəsi yenidən pozmuşdular. Artıq səhər saat 6 radələrində Müdafiə Nazirliyinin məlumatı gəldi ki, bütün şəxsi heyətə çatdırılsın ki, qarşıda artıq sülhməramlılar da var. Həmişə zarafatla deyirdilər: "Lazım" nə vaxt gələcək?" "Lazım" gəldi də, tarixi, hərbi şərait yarandı, düşmən təxribata əl atdı və biz də ondan istifadə etdik. Və tarixi qələbəmizi qazandıq".

"Yaşca məndən kiçiklər şəhid və qazi olanda, özümü lənətləyirdim"

Tanınmış müğənni Vüqar Muradov könüllü yazılmazdan öncə öz rayonunun hərbi komissarlığından bildiriş gözləsə də, o sənəd heç cür gəlməyib. Ona görə də İkinci Qarabağ müharibəsi başlayandan bir neçə gün sonra müğənni özü hərbi komissarlığa gedib. Uzun mübahisələrdən sonra cəbhəyə yollanıb. Muradov etiraf edir ki, hərbi hissədəki əsgərlər onu görəndə xeyli təəccübləniblər.

Onlar hesab ediblər ki, Muradov onlara mahnı oxuyub əhval-ruhiyyələrini yüksəltməyə gəlib: "Mən partizan idim. Müharibəyə qeyri-qanuni getdim. Mənim yaşım da düşmürdü. Deyirdilər, əşi, o müğənni gedib orada nə edəcək? Amma dedim ki, nə olur-olsun, mən gedəcəyəm. Tanışlarım var idi, onlar məndən balaca idilər, ailəli idilər. Onlar şəhid və ya qazı olanda mən özümü lənətləyirdim ki, onlar məndən yaşca kiçikdirlər və ailələri var. Arxalarında övladlarını qoyub gedirlər. Amma mən getmirəm".

© Sputnik / Murad Orujov
Vətən müharibəsi iştirakçısı müğənni Vüqar Muradov

Mügənni deyir ki, müğənni olsa da texnikadan anlayışı var. Atası mühəndis olduğuna görə ondan texnikanın sirlərini öyrənib. Muradov müharibənin ən qızğın vaxtlarında ön cəbhəyə silah-sürsat, yemək daşıyıb. "Hadrutda xüsusi təyinatlı qüvvələrin hərbçiləri ilə tanış oldum. Xahiş etdim ki, mən sizin yanınızda olmaq istəyirəm. Mənə pikap maşını verdilər. Mən Cəbrayıl, Qubadlı, Füzuli, Xocavəndin bütün kəndləri və Şuşaya qədər olan ərazilərdə oldum. Bəzən şayiələr gəzirdi ki, Azərbaycan əsgəri acdır. Amma tam yalandır.

Azərbaycan əsgəri müharibədə hər şeylə təmin olunmuşdu. Təkcə dövlət yox, xalqımız da həmin vaxt bir olub, əsgərə pay göndərirdi. 7-dən 77-dək hər kəs ordu üçün çalışırdı. Mən xarici ölkələrdə də ölkəmizi təmsil etmişəm. Həmişə başqa ölkələr, xüsusən də Fransa bizə rişxəndlə baxırdı. Artıq bütün ölkələrin yanında başımız dikdir".

Kimi erməni hərbçilərlə döyüşürdü, kimi də saxta profillərlə 

Vətən Müharibəsi Əlillərinə Yardım İctimai Birliyinin icraçı direktoru Zamin Zeynalov bildirir ki, bu müharibədə hər kəs birləşdi. Bütün sahələrin adamları, o cümlədən bütün siyasi partiyalar ölkə rəhbərinin ətrafında birləşdilər. Ermənilər anladılar ki, artıq Azərbaycanda siyasi mühiti də ələ almaq imkanları olmayacaq:

"Bütün bunlar dünya siyasi müstəvisinə mesaj xarakteri daşıyırdı. Biz də müharibə zamanı ön cəbhədə olan mövcud problemləri aradan qaldırmaq üçün töhfələr verməyə çalışırdıq. Təbii ki, dövlətimiz ön cəbhədə olan döyüşçülərimizi hərtərəfli təmin edirdi. Amma biz də qeyri-hökumət təşkilatı olaraq dəstək olmağa çalışırdıq".

© Sputnik / Murad Orujov
Vətən Müharibəsi Əlillərinə Yardım İctimai Birliyinin icraçı direktoru Zamin Zeynalov

Zeynalov vurğuladı ki, həmin vaxtlar sosial şəbəkələrdə yaranan müəyyən problemlərə rəğmən, insanlarımız müxtəlif yollarla həm də informasiya cəbhəsində vuruşurdular. Saxta erməni profilləri ilə mübarizə aparırdılar: "Müharibə zamanı Ali Baş Komandanın xarici kütləvi informasiya vasitələrinə verdiyi müsahibələr dünya ictimaiyyətinin diqqətini cəlb etdi. Ümid edirəm ki, yaxın zamanlarda biz digər işğal altında olan torpaqlarımızı da azad edəcəyik".

İş yeri səngər oldu

CBC telekanalının aparıcısı Elmira Musazadə müharibə zamanı ön cəbhədə öz vəzifəsini yerinə yetirib. Aparıcı bundan əvvəl də hərbi verilişin aparıcısı olub. İlk dəfə 2017-ci ildə balaca Zəhranın və nənəsinin ölümündən sonra müharibənin başlanğıcını hiss edib:

"Tərtər şəhərinə hücum edildiyini öyrənən kimi dərhal yola düşdüm. Dörd ildir, hərbi verilişin aparıcısı idim. Buna görə də ərazi ilə tanış idim. Həmin 44 gün ərzində erməni tərəfinin Tərtər, Ağdam, Goranboy rayonlarında dinc əhaliyə necə hücum etdiyini gördük. Tərtər müharibə zamanı 16 mindən çox mərminin atıldığı qəhrəman şəhərdir. Ermənilər yaşayış binalarını, insanları və hökumət binalarını hədəf aldılar. Bu şəhərdə heç bir hərbi qurğu yox idi".

384

Səfir İranın təlimləri, Ermənistana daşınan yüklər Seyid Həsən Amilinin təhdidi barədə

0
(Yenilənib 21:37 24.09.2021)
İranın Azərbaycandakı səfiri Seyid Abbas Musəvi sosial şəbəkədə həqiqətə uyğun olmayan məlumatların çox yayılmasına təəssüf edir.

BAKI, 24 sentyabr - Sputnik. İranın keçirdiyi təlimlərlə bağlı məsələ yanlış formada təqdim olunub.

Sputnik Azərbaycan xəbər verir ki, bunu İranın Azərbaycandakı səfiri Seyid Abbas Musəvi İran İslam İnqilabı Keşikçiləri Korpusunun (SEPAH) bu günlərdə Culfa-Aslanduz arasında, Azərbaycanla sərhəd boyunca hərbi təlimlərinin keçirilmə səbəbini izah edərkən deyib. 

Səfir qeyd edib ki, təlimlərlə bağlı məlumatı aylar öncə Azərbaycan tərəfinə bildirib və bu, planlı təlim olub:

"Bu təlimlər davamlı həyata keçirilir, bundan əvvəl Qərbi Azərbaycanda keçirilib. Hərbi gücümüz dostlarınızın xidmətindədir, dostlarımıza qarşı təhdid sayıla bilməz".

Musəvi Ərdəbil məscidinin imamı Seyid Həsən Amilinin Azərbaycanı təhdid edən moizəsi barədə deyib ki, "dövlətlərin mövqeyini rəsmi qurumların təmsilçiləri ifadə edir, digər şəxslər yox".

İran səfiri ölkənin "altılıq" (Azərbaycan-Türkiyə-İran-Rusiya-Gürcüstan-Ermənistan) formatına dəstək verdiyini də bildirib. Qeyd edib ki, "bu, bütün region ölkələrinin xeyrinədir". 

"Azərbaycanla İran arasında mehriban qonşuluq münasibətləri var. Üçüncü tərəflər, düşmənlər var ki, bu münasibətləri istəmirlər. Son dövrlər Hikmət Hacıyevlə iki görüş keçirmişəm, ikitərəfli münasibətləri ətraflı müzakirə etmişəm", - səfir deyib.

Onun sözlərinə görə, son görüşdə Hikmət Hacıyev Azərbaycan Prezidentinin İran Prezidentinə ismarıclarını çatdırıb:

"Bunlar dostyana, qardaşyana ismarıclar idi. Təəssüf ki, sosial şəbəkədə həqiqətə uyğun olmayan məlumatlar çox yayılır. Yuk maşınları məsələsini araşdırdıq. Məlum oldu ki, özəl şirkətlər bu addımı atıblar. Biz özəl şirkətlərə xəbərdarlıq etdik ki, Azərbaycanın ərazi bütövlüyünə hörmətlə yanaşsınlar.

Ermənistan qonşularımızdan biridir. Biz hər zaman separatçılığa qarşı olmuşuq. Bizim dövlət səviyyəsində həm daxili, həm xarici siyasətimizi Ali lider təyin edir. Ali lider həm də Ali Baş Komandan, həm də siyasi liderdir. Ali liderin bəyanatında Qarabağın Azərbaycanın ayrılmaz bir hissəsi olduğu vurğulanıb. Ancaq mən arxayınlıqla deyirəm ki, üçüncü tərəflər ikitərəfli münasibətlərə xələl gətirə bilməyəcək".

Həmçinin oxuyun:

* Allahşükür Paşazadə: "Ərdəbil kimi qədim, zəngin tarixə malik Azərbaycan şəhəri..."

* Gorus-Qafan yolu yenidən gündəmdə: İran səfiri Bakıda daha bir rəsmi ilə görüşdü

* Hikmət Hacıyev son üç gündə iki dəfə İran səfiri ilə görüşüb: Mövzu Gorus-Qafan yoludur?

0