Yol polisi

Yol polisi xırda xətanı nazir səviyyəsinə necə qaldırdı?

1340
(Yenilənib 13:05 21.06.2017)
Sanki qəsdən qadağanedici nişanlarla insanlarda narazılıq yaratmaq istəyirlər

BAKI, 20 iyun — Sputnik. Tanınmış ictimai-siyasi xadim, Xalq Hərəkatının fəallarından olmuş, Aydınlar Partiyası sədrinin birinci müavini Qorxmaz İbrahimli, Dövlət Yol Polisi (DYP) əməkdaşı tərəfindən üzləşdiyi haqsızlığı qələmə alıb. Sputnik Azərbaycan həmin yazını olduğu kimi təqdim edir:

Yenə də daxili işlər naziri cənab Ramil Usubova müraciət etmək zorunda qoydular… Heç də aciz insan deyiləm. Ancaq ictimai və dövlət əhəmiyyətli məsələlərə biganə olmamağı tələb edir. Ramil müəllim isə digər nazirlərdən fərqli olaraq belə hallarda çox diqqətli davranaraq lazımi ölçü götürülməsini tapşırır. Kimsə şübhə ilə yanaşa bilər. Ancaq media nümayəndələri cənab nazirin bu kimi hallarda necə qətiyyət göstərdiyini yaxşı bilirlər.

Aydınlar Partiyası sədrinin birinci müavini Qorxmaz İbrahimli
© Photo : PUBLIC DOMAIN
Aydınlar Partiyası sədrinin birinci müavini Qorxmaz İbrahimli

Polis sıralarında yetərincə qəhrəman oğul və qızlarımız çalışdığı kimi, yarıtmazlığını, orqanlara xələl gətirməyini gizlətməyi "bacaranlar" da az deyil… Ümid edirəm, Ramil müəllim vətəndaşla kobud rəftar edən polisləri lazımi qaydada tənbeh edəcək.

Mənim aldığım ailə tərbiyəm və təhsilim sayəsində hər zaman ədalətli və ədəbli olmağa çalışmışam. İstər dövləti vəzifəmdə çalışdığım, istərsə də ictimai – siyasi fəaliyyətim zamanı ədəb və qanun normalarından kənara çıxmamaq kimi bir prinsipim olub. Heç zaman insanlara yuxarıdan aşağı baxmamışam. Tanıyanlar şəxsi keyfiyyətlərimi daha yaxşı bilərlər.

Bunları deməklə özümü tərifləmiş olmayım. Ancaq oxucuların bilməsi üçün demək istəyirəm ki, alçaqkönüllü olmaq üçün özümü yetəri qədər tərbiyələndirə bilmişəm. (Hətta, Qarabağ savaşının başlanğıcında universitetdə dərslərimi dayandırıb döyüşə gedərkən də düşməni belə öldürəcəyim və ya əsir alacağım halda meyitini, eyni zamanda əsiri təhqir etməyəcəyimə dair özümə söz vermişdim. Bir dəfə də belə bir hərəkətə görə döyüşçü dostlarımdan biri ilə mübahisəmizi xatırlayanlar var).

Yuxarıda mövzuya giriş kimi yazdıqlarımın bir "mustafası" da var. Bir neçə gün əvvəl – 15 iyun tarixində evimdən çıxıb, yenicə ailə qurmuş qızım Banuçıçəkgili ziyarətə gedərkən, yolüstü bir tort almaq qərarı verdik. Digər qızım Selcanla bərabər yolumuzun üzərində olduğundan, Yusif Səfərov küçəsindəki şirniyyat dükanına girib, cibimizdəki pula və keyfiyyətinə uyğun bir tort aldıq. Dükana girməmişdən heç beş dəqiqə keçməmiş satıcı xanım çöldə DYP əməkdaşının mənim maşınımın yanında dayandığını işarə edərək üzüntüsünü bildirdi.

İnzibati xəta haqqında protokol
© Photo : Qorxmaz İbrahimli
İnzibati xəta haqqında protokol

Heç gecikmədən qızım Selcandan ödəmələri etməsini istəyərək, həmən çölə çıxdım. Maşınımın arxasında dayanmış yol patrul avtomobilində sükan arxasında zabit (ali təhsilli olduğu paqonundan bilinirdi, oturuş tərzi və saymazyana baxışları isə şübhə yaradırdı…) və arxa oturacaqda bir serjant oturmuş, üçüncüsü isə məndən sənədlərimi verməyimi tələb etdi.

Qayda pozuntusunun nədən ibarət olduğunu soruşduğumda, avtobusların hərəkət etdiyi zolağa girdiyimi söylədi. Birincisi, mən günahkar olduğumu anlayıram. Ancaq sanki trolleybus yolunda durmuşam (bizim yaşda olanlar trolleybusu xatırlayırlar) və trolleybusun "buynuz"unun elektrik xəttindən çıxmasına səbəb olmuşam… "Avtobus xətti" dediyi yer isə Yusif Səfərov küçəsinin çox qısa bir hissəsindədir. Heç uzunluğu 500 metr belə deyil. O məsafə bitdikdən sonra bildiyiniz avtobuslar digər adi maşınların hərəkət etdiyi zolaqlarla (heç bu zolağa girdikləri üçün avtobus sürücülərini cəzalandırmırlar) davam etməkdədirlər…

Eyni zamanda, orada Əmlak Məsələləri Dövlət Komitəsinin əsas binası yerləşir. Bu, o demək olur ki, zaman – zaman orada maşınlar park edirlər. Hətta axşamlar məlum yerdə çoxlu bahalı maşınların dayandığını da müşahidə etmək olar (şəxsən sonradan həmən ərazidə çəkdiyim fotolar yazıya əlavə olunur). Buna heç mənim də etirazım yoxdur. Çünki geniş küçənin bir tərəfində hərəkətə mane olmadıqca müvəqqəti dayanmaq olar, deyə düşünürəm.

Bildiyim qədərilə, eyni zolaqdan biri də Füzuli küçəsinin "Qış Bulvarı" deyilən hissəsindədir və eynən qısa məsafədə bitir. Bu gün şəhərimizin yol infrastrukturunun doğru qurulması üçün dövlətimiz hansı tədbirlərə əl atır, göz önündədir. Bəlkə bizlər bilməyə bilərik. Ancaq xaricə gedərkən buradan yenicə dönmüş turistlərin və ya illər əvvəli dəfələrlə ölkəmizə gəlib – getmiş insanların paytaxtımız haqda necə ağızdolusu danışdıqlarını dinləyib, çox qürurlanırıq.

Gecə saatlarında həmin ərazidə park edilmiş avtomobillər
© Photo : Qorxmaz İbrahimli
Gecə saatlarında həmin ərazidə park edilmiş avtomobillər

Xüsusən, Yusif Səfərov küçəsindəki son genişləndirmə işləri həm yolu genişləndirərək, yaranan tıxacların qarşısını aldı, həm də yol genişlənərək ətrafa xüsusi gözəllik verdi. Ancaq "işbaz" məmurlar burada öz fəaliyyətsizlikləri ilə sadəcə vətəndaşları və vergi ödəyicisi olan ticarət obyektlərinin sahiblərini sıxıntıya soxmaqla məşğul olurlar. Məsələn, Nəcəfqulu Rəfiyev küçəsində piyada keçidi nişanı işıqlandırılmır və zolaq silinib getməkdədir. Piyadaların həyatı çox ciddi təhlükə qarşısındadır. Yol nişanlarını tənzimləyən idarənin isə bu hala baxışı işindən bəllidir.

Belə misal çəkəcəyimiz çoxlu yollar göstərə bilərik. Yol nişanlarını istədikləri kimi dəyişdirən bəzi məmurlar isə öz ağıllarındadırlar. Sanki qəsdən bəzi yerlərdə qadağanedici nişanlarla insanlarda narazılıq yaratmaq istəyirlər. Yol polisində "ilişib qalmış" bəzi zabit və serjantlar isə dövlətin hesabına oturduqları maşınlarda şütüyərək, belə yerlərdə qısa müddətə dayanmış sürücüləri cəzalandırmaqla məşğuldurlar. Necə deyərlər, dəyirman bildiyini eləyir, çax–çax baş ağrıdır.

Bu çax–çax məmurlar anlamırlar ki, hər xırda xətadan ötrü milləti incitmək olmaz. Belələrinin üzündən bəzən ölkə Prezidenti və ya daxili işlər naziri yol polisinin işinə müdaxilə etməli olur.

Əlqərəz, mən isə gözəlim sevimli Ana dilimizdə ifadə edə bildiyim xoş sözlərlə özümü təqdim etdim. Yenicə ağır əməliyyatdan döndüyümü və yenicə toyunu etdiyim qızımgilə ziyarətə getmək üçün tort almağa girdiyimi həvəslə söylədim. İctimai – siyasi kimliyimi, dövlətimizi nə qədər sevdiyimi yenicə demişdim ki, yaşca məndən xeyli gənc olan serjant "Bu, o demək deyil ki, siz qaydaları kobud şəkildə pozmalısınız… Bir də əslində ədəbinizdən danışmaq yerinə nümunə olmalısınız. Siz qaydaları pozandan sonra başqalarından nə gözləyək? Qayda pozuntunuzu MMK çəkib. Mənlik bir şey yoxdur. 40 manat cərimə olunacaqsınız. Vaxtında ödəsəniz, 36 manata düşəcəkdir" – deyib nöqtəsini qoydu.

Tərtib olunmuş elektron protokoldan da göründüyü kimi, mən inzibati xəta törətmişəm. Xəta isə düzəldilməsi mümkün olandır, deyə vətəndaşa ən azından görmədən daxil olduğu üçün heç olmazsa, güzəşt belə etmək olardı. Mənim bilmədən daxil olduğum zolağa saymazyana girdiyimi mənə isbatlamaq istəyən, ədəbimə və tərbiyəmə şübhə edən polis serjantı əcəba nədən fotoşəkillərdə görünən avtomobillərə yaxınlaşaraq, MMK cihazı vasitəsilə inzibati xəta protokolu tərtib etmir?

Mənim beş dəqiqə ərzində bir dükana xeyir verdiyim halda, məni cəzalandırmaqla, bu cür ticarət obyektlərini müflis etməkdə bu serjant və onun kimilərin məqsədi nədir, görəsən? Bu serjant və paqonundan ali təhsilli olduğu görünən komandiri bizləri və ticarət obyektlərini cəzalandırarkən heçmi vicdanları ağrımır? Bilmirlərmi ki, onların aldığı maaş vətəndaşların və ticarətçilərin verdiyi vergi hesabına əziz dövlətimizin büdcəsindən ödənir?

Bəlkə də Əli Nəsirov və paqonundan ali təhsilli olduğu görünən saymaz komandirinin bu maaşa ehtiyacları olmadığı üçün belə davranırlar… Kim bilir?

Mən ümid edirəm, cənab nazirimiz Ramil Usubov belə halların aradan qaldırılması və bu tip məmurların cəzalandırılaraq, işdən kənarlaşdırılması üçün qətiyyətini bir daha göstərəcək. O şirniyyat mağazasında çalışan həmin gənc qızın məlum serjantdan fərqli olaraq, müştərilərə satılacaq maldan gələn gəlirdən alacağı maaşa ciddi ehtiyacı var. Mən çörəyə bais olanların elə bu dünyada cəzalarını rəhbərlərindən alacaqlarına inanıram.

1340
Teqlər:
inzibati xəta, Ramil Usubov, DYP, yol polisi, Qorxmaz İbrahimli, ictimai-siyasi xadim, daxili işlər naziri
Əlaqədar
Yol polisi-sürücü dartışmasının yeni mövsümü başladı: ayağınıza diqqət edin
Yol polisinə gizli fəaliyyət qadağan edildi
Baş Dövlət Yol Polisindən vacib açıqlama
Yol polisi də adi sürücülər kimi cərimələnəcək - bir şərtlə ki...
İmişlidə yol polisi ilə möhkəm "zarafat" ediblər
Yol polisi sizi təqib edə bilməz - bir haldan başqa
Xəbərdarlıq: yol polisi taksi sürücülərinə qarşı reydlərə başlayır
Səmra Hüseynova, arxiv şəkli

Azərbaycan gözəlinə atasından dəstək: Sənə artıq söz deyənin başını kəsərəm

1931
(Yenilənib 19:56 20.06.2021)
Səmranın fikrincə, insanlarımızda inkişaf etmək, dünyaya inteqrasiya olunmaq, stereotipləri aşa bilməmək qorxusu var.

Səmra Hüseynova - "Miss Azərbaycan-2019"-un qalibidi. On ildən çoxdur ki, model biznesindədir, bir çox beynəlxalq və yerli dəb layihələrində, məşhur dizaynerlərin defilelərində iştirak edib. Hər zaman azərbaycanlı həmkarlarından açıq-saçıq layihələrdə iştiraka hazır olmasıyla seçilən modeli gəlin yaxından tanıyaq. Səmra özü və sənəti ilə bağlı heç yerdə demədiklərini Sputnik Azərbaycan-la bölüşüb:

"8-9-cu sinifdə oxuyanda artıq qərara almışdım ki, mən model olacam. Həmin vaxtlarda Rəssamlıq Akademiyasında dizaynerlər modellər axtarırdılar, onlarla çalışırdım. Bir sıra tədbirlərdə model kimi çıxış edirdim".

Gələcəyin məşhur modeli yolunu Azərbaycan Dövlət Mədəniyyət və İncəsənət Universitetindən salır: "Buna görə də İncəsənət Universitetini seçdim. Bildiyiniz kimi modellik sənəti üçün ayrıca bir sahə yoxdur. Mən rejissorluq fakültəsinə daxil oldum. Universitetdə həm də aktyor sənətindən də dərs keçirdilər. Bu da mənə model kimi fəaliyyət göstərməyimə kömək edir".

"Modellik sənəti sizdən nələri aldı?" sualına belə cavab verdi: "Kameralar məni çəksin, saytlar məndən yazsın, mən danışılım. Deməzdim məndən nəyisə aldı. Aldısa, demək belə lazım imiş. Modelliyi seçdiyimə görə, çox şeyi itirdim. Yaxşı ki, itirdim. Modellik peşəsində yalançı dostlarımı, yalançı qohumlarımı itirdim. Hətta sevdiyim insanı itirdim. Deməli, məni sevmirmiş. Sevsəydi, seçimimə hörmətlə yanaşardı. Amma qazandıqlarım daha çoxdur".

Həmişə göz önündə olmaq istəyən Azərbaycan gözəli onun qarşısına qoyulan sədlərdən danışıb: "Əvvəllər atam qətiyyən razı deyildi. Mən podiuma çıxmağa hazırlaşırdım, anam işdən çıxıb, gəlib məni götürüb aparırdı evə. Bütün günü ağlayırdım ki, anam məni qoymur. Atama dedim ki, "sən mənim atamsan, mənim arxamda olmalısan, mənə güvənməlisən". Atam mənə dedi ki, "nədə özünü xoşbəxt hiss edirsən?"Atama dedim ki, mən çox böyük uğur qazanacam. Amma buna görə məni tənqid də, təhqir də gözləyir. Atam dedi ki, "sən özünü lüt bədəndə bağlı görürsənsə, mənə sənin tərbiyəndən başqa, heç kimin fikri önəmli deyil. Bundan sonra mənə icazə verdi. Bu gün də deyəndə ki, "ata, filankəs məni təhqir edir". Deyir sənə artıq söz deyənin başını kəsərəm".

Səmra insanların modellərə olan münasibətini dəyişəcəyini düşünür: "Bizdə elə düşünürlər ki, modellik soyunmaqdır. Modellik soyunmaq deyil, modellik zəriflikdir, nümayişdir. Sənə verilən əl işini sən soyunsan belə, onu lüt göstərmədən təqdim edirsən. Məsələn, mənə alt paltarı geyimi gətirirlər. Mən onu təqdim edirəm. Mən onu 2 formada təqdim edə bilərəm: Mən onu vulqar da təqdim edə bilərəm. Modellik isə odur ki, sən onu vulqar yox, sənə onu incəsənət nümunəsi kimi təqdim etməlisən. Ümid edirəm ki, bir gün insanlar buna incəsənətin bir növü kimi qarşılayacaq".

Anoreksiya xəstəliyindən müalicə alan model xəstəliyə yol açan səbəblərdən danışıb: "Mən yeməyə həmişə nifrət etmişəm. Genetikam arıqdır. Haradasa 10 il əvvəl, sinəmdə xoşxassəli şiş aşkarlanmışdı. Ona görə də həddindən artıq arıqlamışdım. Ondan sonra hormonal dərmanlar qəbul etdiyimdən birdən-birə kökəldim". İndi isə əziyyət çəkdiyim problem haradasa 1 il əvvəl başladı. Onda üstünə düşmədim. Son bir ayda boğazım şişməyə başladı və dərhal çəkim düşdü aşağı – 38 kilo oldum".

"Boğazım ona görə şişdi ki, soyuq havada çəkiliş oldu. Yaz geyimlərini çəkirdik. Orada soyuqladım, ağırlaşdım.Onda anladım ki, vəziyyət heç də yaxşı deyil. Çox güclü ağrılar başladı məndə, ayağa qalxmağa belə, halım yox idi. Adi stəkanı qaldırıb suyu içə bilmirdim. Düşündüm ki, onkoloji xəstəliyə tutulmuşam. Çox şükür, indi yaxşıyam", - deyə S.Hüseynova bildirdi.

- Bildiyiniz kimi, Neslihan Atagül də bu xəstəlikdən əziyyət çəkir...

- Fikir verirsinizsə, bu problem bu il daha çox yayılıb. Düşünürəm ki, bu problem koronavirusun fəsadlarıdır. İnsanlar qapalı məkanlarda qaldılar. D vitaminindən məhrum oldular, karantinə görə keçirilən əsəb, stress və s".

Xarici ölkələrdə modellər bədənlərini sığortalayırlar. Bizdə bu tendensiya hələ gəlib çıxmayıb. Amma ən öz üzümü sığortalamağı düşünürəm.

Səmra "Miss Azərbaycan-2019"dan da danışdı. Məşhur model müsabiqəyə getmə səbəbinə zarafatla "gördüm ki, hər şeyim var, başımın tacı çatmır. Qərar verdim ki, başın tacı da olsa, tam olacam" deyə cavab verdi: "Müsabiqəyə qatıldım. Müsabiqə məni çox yordu. Gedib-gəlmələr, seçimlər, stress, həyəcan, qalib gəlib-gəlməmək qorxusu və s. Final gecəsi ağlaya-ağlaya çıxdım. Çox xoşbəxtəm ki, qalib gəldim. Ürəyim yaralı idi, çünki birinci dəfə qatılanda layiq görməmişdilər".

Səmra deyir ki, insanlarımızda inkişaf etmək qorxusu var. O, fikirlərini belə izah etdi: "Dünyaya inteqrasiya olunmaq qorxusu, stereotipləri aşa bilməmək qorxusu var. Mənim valideynlərim niyə mənə mane olurdular? Çünki onlar da o psixologiyada böyüyüblər. Psixologiyasında problemi olan insana nə qədər başa salmağa çalışsan ki, bu ağdır, o yenə qara görəcək. Ona görə də mən kimisə başa salmağa cəhd eləmirəm. İstədiyimi yaşadım, ona görə də mən Azərbaycanda səs-küy yarada bildim. Düşündüm ki, məni qınayan insanlar – qohumlarım, dostlarım sabah mənim istədiyimi verə biləcəklərmi? Mən dara düşəndə mənə əl uzadacaqlarmı? - Xeyr! Niyə mən onlara əhəmiyyət verməliyəm?

- Sizcə, Azərbaycanda modellərə qarşı münasibət niyə birmənalı deyil?

- Qınamıram insanları. Çünki modellik, aktyorluq, müğənnilik adı altında digər fake təbəqə yaranır. Problem özümüzdədir. Baxın televiziyalara, normal aparıcı, normal aktrisa seçimi var? Televiziyaya dodaq dolğulu, sifəti dolğulu, botoks olmamalıdır. Ümumiyyətlə, televiziya üçün təbii olan insanı seçmək lazımdır. Kinoda da bu önəmlidir. Aktyor emosiyaları çatdırmalıdır. Üzündə süni dolğular olan aktrisa hissləri necə çatdıra bilər?

Sənət adamlarının əksəriyyəti gələcəkdə övladının özünün davamçısı olmasını istəmir. Səmranın bu fikrə münasibəti fərqlidir: "Mənim qızım da model olmaq istəsə, görsəm ki, Allah ona model olmaq üçün bütün standartları verib, mən niyə ona mane olmalıyam? O demək deyil ki, mən əziyyət çəkmişəm, o da əziyyət çəkəcək. Yox, mən ona arxa-dayaq olaram. Mənim qızımın boyu 175 sm olsa, standartlara cavab versə, onun prodüseri olaram".

"Anam deyir, ərə get, gələcəkdə bir övladın olsun. Niyə özümə? Övladımla özümü qarantiya edirəm? İstifadə etmək üçün dünyaya gətirirəm? Mən övladı dünyaya gətirirəm ki, cəmiyyət onun savadından, qabliyyətindən yararlana bilsin. Mən valideynlərimə dedim, ya mənə güvənin, ya da vurun, öldürün. Mən sizin standartlarınıza uyğun adama ərə gedib özümü bədbəxt edə bilmərəm"- deyə Azərbaycan gözəli əlavə etdi.

Qəhrəmanımızın dünyaca məşhur həmkarları ana olmaqdan boyun qaçırırlar. Səmra isə düşünür ki, qadının ən böyük xoşbəxtliyi ona "ana" deyən övladın, "səni sevirəm" deyən həyat yoldaşın olmasıdır: "Bəli, işim məni xoşbəxt edir. Amma səhər telefonu əlimə alıram, baxıram ki, mənə kimsə "səni sevirəm" yazan varmı? Özümə uyğun bəylə qarşılaşsam, sözsüz ki, evlənərəm. Olub ki, bir insan üçün 3 il öz işimə fasilə verdim. Amma o bunu dəyərləndirmədi".

"Unudulmaqdan qorxmuram, inanmıram ki, unudulum" deyən gənc model gələcəkdə özü haqqında film çəkməyi düşünür. "Gələcəkdə özüm haqqında avtobioqrafik film çəkmək istəyərəm. Amma indi yox, gələcəkdə. Çünki, indi etsəm uğurlu alınmayacaq. Bunun üçün illər lazımdır. Hər işdə mükəmməliyə can atıram. O filmdə mənim imzam olacaq, o film sıradan bir film olmamalıdır".

1931
Tovuzda kartofun yığımı

Fermerlərin harayı: Kartof əkdim alan yox

1282
(Yenilənib 21:18 20.06.2021)
Fermerlər deyirlər ki, kartofun çıxarılmasına sayılı günlər qalıb, amma hələ heç bir alıcı gəlib kartofla maraqlanmayıb.

BAKI, 20 iyun — Sputnik. Tovuz rayonunun aran hissəsində kartofçuluqla məşğul olan fermerlər bu il bol məhsul götürməyi planlayırlar. Onlar bir neçə ildir suvarmada çətinliklərlə qarşılaşdıqlarından, bunun məhsuldarlığa mənfi təsiri ilə üzləşiblər. Bu il isə hava yağmurlu keçdiyindən suyun bol olduğunu deyirlər. Hazırda son suvarmaları həyata keçirilən bu bitkinin bir neçə gündən sonra yığımına kütləvi şəkildə start veriləcək. Lakin son suvarma bitməmiş fermerlərin məhsulu sata bilməmək narahatlığı artıb. Sputnik Azərbaycan-ın bölgə müxbiri kartof əkini ilə məşğul olan fermerlərin sahələrində olaraq kartofun vəziyyəti ilə maraqlanıb.

40 ildir kartofçuluqla məşğul olan fermer Atakişi İmaməliyev ilkin suvarmada su qıtlığı ilə üzləşsələr də, hazırda bu sahədə çətinlik olmadığın dilə gətirib:

© Sputnik / Ilham Mustafa
Mayın 15-dən etibarən ilk suvarma həyata keçirilir

"Suvarmada ilk dövrlər suyun qıtlığından çətinlik çəkdik. Kartof elədir ki, gərək həftədə bir dəfə suvarıla. Belə olduqda, həm məhsuldarlıq yüksək olur, həm də məhsul keyfiyyətli. Gecikdirildikdə isə ikinci böyümə əmələ gəlir və kartof formasını itirir. Nəticədə satışa ziyan verir, alıcılar yöndəmsiz məhsulu almaq istəmirlər. Bu səbəbdən kartof sahələri çox olduğundan, suya da böyük tələbat yaranır. Şükürlər olsun ki, bu il yağıntı normadan da artıq oldu və bu vəziyyətdən fermerlər çıxa bildi".

Fermerin bildirdiyinə görə səpinin aparılma vaxtından asılı olaraq, mayın 15-dən etibarən ilk suvarma həyata keçirilir. Məhsul yığılana qədər isə vəziyyətdən asılı olaraq 6, bəzən 8 dəfə ümumilikdə su verilməli olur. Hazırda son suvarma işini aparan fermer ehtiyac olsa bir neçə gündən sonra bir dəfə də kartofu suvarmağı düşünür.

© Sputnik / Ilham Mustafa
Fermer Atakişi İmaməliyev

Fermer aran kartofçuluğunda ən böyük çatışmamazlığın toxumçuluqla bağlı olduğunu söyləyib:

"Çalışırıq bu toxumları özümüz istehsal edək. Bu, bizim üçün ucuz başa gələr və mənfəətimizə xeyli təsir göstərə bilər. Lakin əlimizdə toxumçuluq üçün lazımi imkanlar olmadığından öz məhsulumuzdan lazımı qədər toxum götürə bilmirik. Öz toxumumuzu əkdiyimiz sahələr isə o qədər də məhsuldar olmur. Dövlətin dəstəyi ilə öz məhsulumuzdan toxum götürmə işini təkmilləşdirsək, gələcəkdə daha az xərclə daha çox məhsul götürə bilərik".

© Sputnik / Ilham Mustafa
Təsərrüfatçı Vüqar Abdullayev

Böyük kartof sahələri olan fermerlər suvarma işini təcrübəli suçulara gördürürlər. Bir hektarı suvarmaq üçün fermer 40 manatından keçməli olur. Bir çox təsərrüfatçı isə əlavə xərcdən qaçmaq üçün öz sahələrini özü suvarır.

Təsərrüfatçı Vüqar Abdullayev sonuncu suvarmasını aparır. Suvarmada çətinlikdən çox onu alıcı tapa bilməməsi narahat edir:

© Sputnik / Ilham Mustafa
Son suvarma bitməmiş fermerlərin məhsulu sata bilməmək narahatlığı artıb

"İki hektar 20 sot sahədə kartof əkmişəm, hazırda 7-ci dəfə suvarıram. Bu il suvarma yaxşı olub. Yeganə problemimiz kartofun satışı ilə bağlıdı. Kartof istidə çox qalmadığından, yığımdan öncə alıcı gəlib məhsulun behini verir, hazır məhsulu götürməyə boyun olur. Sahədən çıxarıldıqca, kisələrə götürürlər. Lakin bu il kartofun çıxarılmasına sayılı günlər qalıb, amma hələ heç bir alıcı gəlib kartofla maraqlanmayıb".

V.Abdullayev məhsulun sahədə satılmamasının əlavə xərclərə səbəb olduğunu deyib:

© Sputnik / Ilham Mustafa
Bir hektarı suvarmaq üçün fermer 40 manatından keçməli olur

"Məhsulu sahədə sata bilməsək, əlavə xərcimiz çox olur. Soyuducuya qoymalıyıq, setka almalıyıq, yerləşdirmək üçün fəhlə tutmalıyıq. Ona görə də sahədə satmaq ən gözəl alverdir. O da ki, alıcımız yoxdur".

Bu il Tovuzda təxminən 6 min hektara qədər sahədə kartof əkilib. Kütləvi məhsul yığımına isə çox az vaxt qalıb.

1282

İsveçrə -Türkiyə matçından göz oxşayan görüntülər

0
(Yenilənib 23:54 20.06.2021)
İsveçrə və Türkiyə yığmaları arasında Avropa çempionatının A qrupunun II tur matçında.İsveçrə və Türkiyə yığmaları arasında Avropa çempionatının A qrupunun II tur matçında.

Futbol üzrə Türkiyə millisi AVRO-2020-də üçüncü oyunda da məğlub olaraq mübarizəni dayandırdı. Qrup mərhələsinin üçüncü turunda Şenol Günəçin yetirmələri Bakı Olimpiya stadionunda İsveçrə millisinə məğlub olublar.

Birinci hissədə isveçrəlilər artıq 6-cı dəqiqədə Türkiyə millisini oyuna mərkəzdən başlamağa məcbur edib. Xaris Seferoviç rəqib komandanın qapısına yol tapıb. İyirmi dəqiqə sonra Cerdan Şakiri hesabı 2:0-a çatdırıb. Oyunun 62-ci dəqiqəsində Türkiyə millisi İrfan Can Kahvecinin sayəsində oyunda və birincilikdə yeganə qolunu vurmağa mevəffəq olub. Bundan dörd dəqiqə sonra isə Şakiri ikinci qolunu vuraraq hesabı 3:1-ə çatdırıb.

Sputnik Azərbaycan-ın fotomüxbiri bu matçın unudulmaz anlarını fotokamerasının yaddaşına köçürüb. Həmin fotoların bir hissəsi bizim fotolentdə.

0
  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.

  • © Sputnik / Murad Orujov

    İsveçrə və Türkiyə yığmaları arasında Avropa çempionatının A qrupunun II tur matçında.