İlqar Səbzəliyev

İşıqlı dünyadan qaranlıq dünyaya düşən adam: möcüzə belə olar

656
(Yenilənib 15:25 20.06.2017)
Bu həmyerlimizin bacarığı hər kəsi heyran edir

İlham Mustafa, Sputnik Azərbaycan

BAKI, 20 iyun — Sputnik. O, gözlərinin nurunu 32 yaşında itirib. Ehtiyatsızlıqdan gözlərinə tökülən sirkə göz damarlarını yandıraraq, zamanla tamamilə tutulmasına səbəb olub.

Həmin vaxtadək bir gün belə, boş dayanmayan, təbiət aşiqi, kitab həvəskarı olan Mingəçevir sakini İlqar Səbzəliyevin "işıqlı dünyadan qaranlıq dünyaya düşmək" kimi dəyərləndirdiyi məşəqqətli həyatı 1997-ci ildən başlayıb. İlk vaxtlarda gözlərinin tutulması ilə heç cür barışmaq istəməyən qəhrəmanımız, hətta özünə qəsd etməyi də düşünüb.

Lakin tədricən taleyi ilə barışıb, həyata gözləri ilə deyil, hissi ilə, qəlbi ilə baxmağı öyrənib və bəlkə də dünyada bənzəri olmayan bir qabiliyyəti özündə aşkar edib. O, sağlam vaxtlarında işlətdiyi sənəti, yenidən, gözləri görmədən davam etdirib.

© Sputnik / Ilham Mustafa
Gözünü nurunu itirsə də, qabiliyyəti ilə hər kəsi heyran edir

İlqar Səbzəliyev hazırda, gözünün sağ vaxtlarında heç vaxt görmədiyi yeni model tozsoran, ətçəkən maşınlar, fen, paltaryuyan və digər elektrikli məişət avadanlıqlarını məharətlə təmir edir. Eyni zamanda, evlərin işıq sistemlərinin çəkilməsi, işıqlandırılması ilə məşğul olur.

Sputnik Azərbaycan-a danışan İlqar, bu qabiliyyətinin Allah vergisi olduğunu deyir: "Mən işləyən vaxt gözlərimin görmədiyini hiss eləmirəm. Özümdən asılı olmur, sanki əllərimlə onları duyuram, hiss edirəm, barmaqlarımla canlandırıram. Bunun bir Allah vergisi olduğunu fikirləşirəm. Bir qapını bağlayan Allah, bir qapını açar".

Bu işlərdə icad etdiyi qurğu da onun köməyinə çatır. Batareya ilə işləyən ampermetr cihazının işləmə formasını dəyişərək, ondan çıxan səslərlə elektrik avadanlıqlarının hansı hissəsinin sıradan çıxdığını müəyyənləşdirir. Hətta tapılmayan, dolağı yanan elektrik avadanlıqlarının dolağını yenidən sarıyır və əvvəlkindən də daha effektli işləyəcəyinə zəmanət verir.

İlqar Səbzəliyev
© Sputnik / Ilham Mustafa
İlqar Səbzəliyev

Öz evinə isə yalnız rəngsazlıq işləri üçün usta çağırdığını deyir. Hamamın, mətbəxin santexnika işlərindən tutmuş, xarab olan mebelə kimi hər bir işi özü görür. Bu işlərdə, hətta qonşularına da yardım edir.

Bir dəfə iş vaxtı başına gələn hadisəni nəql edir İlqar: "Bir evdə elektrik xətləri çəkirdim. Məndən başqa digər ustalar da işləyirdilər. Çəkic və zubillə beton divarda naqillər üçün yer açırdım. Birdən orda işləyən ustalardan biri məni saxladı ki, "bayaqdan dayanıb sənə baxıram, çəkicin nazik tərəfi düşüb əlinə, buna baxmayaraq çəkici zubilə çox dəqiqliklə vurursan, dəqiqliklə yer açırsan". Özünün çəkicin yastı tərəfi ilə bu incəliklə iş görə bilmədiyini dedi".

İlqar gözlərinin görəcəyinə, yenə "işıqlı dünyaya" qayıda biləcəyinə ümidini itirməyib: "Bir təsəllim odur ki, gün işığını sol gözümlə hiss edirəm. Bunun da müalicəsi Türkiyədə mümkündür. Buna da imkanım çatmır. Amma dünyanı gözlə görməyi çox arzulayıram. Eşidirəm ki, şəhərimiz gözəlləşir, hər gün bir yenilik çıxır. Mən də istəyirəm o yenilikləri o gözəllikləri görəm".

"Özüm təbiət vurğunu olmuşam. Ən çətin vaxtlarımda Bozdağın üstə çıxıb dənizə (Mingəçevir su anbarı — red.) baxıb dincələrdim. İndi təbiətdən yalnız qovaq ağaclarının yarpaqlarının pıçıltısına qulaq asıb rahatlıq tapıram. Ən çox darıxdıran isə kitab oxuya bilməməyimdir. Kitabı əlimə alıram, qoxuyub yenidən rəfə qoyuram. Bir az rahatlanıram" — deyir həmsöhbətimiz.

O, müalicəsinə kömək etmələri üçün rəsmi qurumlara müraciət ünvanladığını da qeyd edir: "Bir müddət əvvəl hesab nömrəsi də açmışdılar adıma. Lakin bir nəticə vermədi. Amma yenə də ümidliyəm, xeyirxah insanların yardım edəcəklərinə inanıram".

656
Teqlər:
Allah vergisi, nur, İlqar Səbzəliyev, göz, kömək, dünya, təmir, , sənət, Mingəçevir
Əlaqədar
Azərbaycanlı gənc yırtıcıları təbiətdən qoruyur
Azərbaycanda qeyri-adi qoca: bir dəfə çağırmağınız yetər
Azərbaycanda fenomen böyüyür
Bu sənətkarın həyatda bir prinsipi var
Arzularını kişi sənətinə qurban vermiş Arzu
Elektrik yarımstansiyası, arxiv şəkli

Azərbaycanda yeni istilik elektrik stansiyalarının tikilməsinə ehtiyac yaranıb

29
(Yenilənib 00:22 21.10.2020)
"Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

BAKI, 21 oktyabr — Sputnik. "Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

Sputnik Azərbaycan xəbər verir ki, bunu Energetika naziri Pərviz Şahbazov 20 oktyabr - Azərbaycan energetiklərinin peşə bayramı günü münasibətilə rəsmi mətbuatda dərc etdirdiyi məqalədə bildirib.

Onun sözlərinə görə, bu ilin 9 ayı ərzində elektrik enerjisinin istehsalı ötən ilin müvafiq dövrü ilə müqayisədə 0,8% azalaraq, 19,4 milyard kVt·st təşkil edib.

P.Şahbazov bildirib ki, qarşıdakı illərdə isə elektrik enerjisinə tələbat və istehsal həcmləri ilə bağlı dinamikada əhəmiyyətli dərəcədə artım gözlənilir:

"2025-ci ilə qədər ölkəmizdə elektrik enerjisinə tələbatın 25,5 milyard kVt·st-a qədər artacağı, ixrac da nəzərə alınmaqla elektrik enerjisi istehsalının isə ötən ilə nisbətən 15% artımla 30 milyard kVt·st-a çatacağı proqnozlaşdırılır. Bu istehsal həcmlərinin bir qismi ötən il istismara verilmiş, qoyuluş gücü 409 МVt olan "Şimal-2" elektrik stansiyası, bu il təməli qoyulmuş və 2022-ci ildə istifadəyə verilməsi planlaşdırılan 385 МVt gücündə "Qobu" elektrik stansiyası hesabına əldə ediləcək".

Nazirin fikrincə, həmçinin bu prosesdə "Azərenerji" ASC-nin istehsal güclərinin optimallaşdırılması və bərpası nəticəsində yenidən istismara cəlb edilən 1300 MVt imkan gücündən istifadə ediləcək: "Eyni zamanda, təhlillər göstərir ki, tələbatın tam qarşılanması üçün yeni istilik elektrik stansiyalarının tikilməsinə də ehtiyac var".

29
Su təhcizatı işləri, arxiv şəkli

Həm Azərbaycanın, həm İranın arzusu reallaşır - "Xudafərin" hidroqovşağından şad xəbər

56
(Yenilənib 23:50 20.10.2020)
Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir.

BAKI, 20 oktyabr — Sputnik. "Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir.

Sputnik Azərbaycan xəbər verir ki, bunu Energetika naziri Pərviz Şahbazov deyib.

O vurğulayıb ki, Azərbaycan, İran və Rusiyanın enerji sistemlərinin əlaqələndirilməsi üzrə proses davam edir: "Hər üç ölkənin müvafiq enerji şirkətlərinin razılığı ilə müəyyən edilmiş məsləhətçi şirkət tərəfindən layihənin texniki-iqtisadi əsaslandırılmasının hazırlanmasına başlanılıb. Eyni zamanda, "Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində "Xudafərin" və "Qız Qalası" hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında Saziş"dən irəli gələn vəzifələr də yerinə yetirilməkdədir.

"Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir. "Xudafərin" hidroqovşağı üzrə tikinti xərclərinin və dəymiş ziyanın hesablanması, habelə su elektrik stansiyalarının qurğu və avadanlıqlarının alınması və quraşdırılması məsələlərinə baxılır. 1,6 milyard kubmetrdən çox sututumuna malik bu hidroqovşaqlar və ümumi qoyuluş gücü 280 meqavat gücündə olan bu stansiyalar Araz çayının su və enerji ehtiyatlarından hər iki tərəfin birgə istifadəsinə imkanlar yaradır".

O bildirib ki, bu layihələr iqtisadi və strateji aspektdən ölkəmiz üçün çox əhəmiyyətlidir:

"Bu layihələrin reallaşması Azərbaycana illik 368 milyon kilovat/saat elektrik enerjisi istehsalı, mövcud 252 min hektar torpaq sahəsi üzrə suvarmanın yaxşılaşdırılması və 8 min hektar yeni əkin sahələrinin suvarılması imkanı yaradacaq. Azərbaycanın suverenliyi, ərazi bütövlüyü əsas götürülməklə 2016-cı ildə bu layihələr üzrə sazişin imzalanması işğal olunmuş ərazilərimizin geri qaytarılacağına böyük inamın ifadəsi idi".

"Bu günlərdə müzəffər Ordumuzun Cəbrayıl şəhəri və rayonunun bıra sıra kəndlərini azad etməsi də Azərbaycan Prezidentinin uzaqgörən siyasətini, həmin ərazilərin bərpası zamanı bu hidroqovşaqlar və stansiyaların istifadəsinə əvvəlcədən hazırlıqla bağlı strateji baxışlarını bir daha nümayiş etdirdi. Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir", - deyə nazir bildirib.

56
Əlaqədar
İranla Azərbaycan arasında tarixi "Xudafərin Sazişi" imzalandı
İlham Əliyev: Xudafərin körpüsünün üzərində Azərbaycan bayrağı qaldırıldı
Nazirlikdən sərhədlərimizi qoruyanlara Xudafərin naminə zirehli hədiyyə - FOTO
Xudafərin körpüsünün üzərində Azərbaycan bayrağı - VİDEO
Ermənistan Xudafərin istiqamətində əməliyyat keçirməyə qadir deyil - MN