Səbirə Əbdülzəka

Bir bu hekayə var, amma hər kəs sonadək oxuya bilməz...

475
(Yenilənib 10:19 14.06.2017)
"Məzarımın yanından keçəndə ayaq saxla ki..."

İradə Cəlil, Sputnik Azərbaycan

BAKI, 14 iyun — Sputnik. "Tənhalıq… Dərdini deməyə heç kimin olmur, göz yaşlarını silənin olmur. Ağlayıb-ağlayıb sakitləşirsən və o günü gözləyirsən: itirdiklərinə qovuşacağın günü".

Bu, tənhalığa Səbirə nənənin verdiyi tərifdir. Deyir ki, sakit adamdır, heç kimlə işi yoxdur, heç kimlə saatlarla danışmağı sevmir. Yoldaşını itirəndən sonra övladı da onu tək buraxıb Qırğızıstana gedib. Elə o vaxtdan tənhadır Səbirə nənə: "Qeybət etməyi sevmərəm. Ən çox kitabları sevirəm. Burda da övlad kimi baxırlar mənə".

Səbirə nənə ilə, təxminən 5 ay əvvəl Qocalar Evində tanış olmuşdum. Deyirdi ki, 3 gündür bu evin sakinidir, alışmağa çalışır, bunun üçün əlindən gələni edir. Amma bəzən dözə bilmir, otağına çəkilib hönkür-hönkür ağlayır həyatına, itirdiyi illərə, sevdiyi həyat yoldaşına, illərlə xəbərini ala bilmədiyi oğluna. Danışdıqca gözləri dolsa da, əlləri ilə üzünü silib, gülümsəməyə çalışır və başına gələnlərdən yadında qalanları danışır.

Səbirə Əbdülzəka bakılı qızıdır. Sözlərinə görə, Hacı Ələsgər nəslindəndir: "Hacı Nəcəfqulunun nəvəsiyəm, babamın Xəzərdə 7 gəmisi olub. Atam da Maştağada rayon komitəsinin sədri olub. Anam nardaranlı, atam isə "ağşalvarlılar"dan olub".

Danışır ki, atası ailəsini heç bir zaman korluq çəkməyə qoymayıb. Ailə quranda da sevərək qurub. Səbirə nənə həyat yoldaşı haqqında danışanda gözləri dolur: "Həyat yoldaşım məni, mən də onu sevmişəm. O, ana məhəbbəti görmədiyi üçünə hər zaman mənə "maması" deyirdi. Bizi onun iş yoldaşları tanış etmişdilər. O vaxtlar 26 yaşım var idi. Yoldaşımın adı Sərdar idi — Sərdar Əbdülzəka".

Səbirə nənə
© Sputnik / Irade JELIL
Səbirə nənə

Səbirə nənənin sözlərinə görə, yoldaşı repressiya qurbanının oğlu olub. Uşaq evində böyüyüb. Bacısını da elə o vaxtlar itirib: "O vaxt Sərdarın 4, bacısının 2 yaşı olub. Sonradan mən "İzvestiya" qəzetində onu axtarmaq üçün elan da verdim. Çox axtardım. Tapılmadı. Dedilər ki, yəqin övladlığa verilib".

"Qayınatamın adı Əbdülzəka Əbdüləziz idi. "İzvestiya" qəzetindən xəbər gəldi ki, uşağın şəkli varsa, göndərin. O vaxt 2 yaşlı uşağın nə şəkli ola bilərdi ki? O vaxt valideynləri aparılandan sonra bunlar bacı-qardaş qalıbmış küçədə. Götürüb veriblər uşaq evinə. 9 yaşından sonra oğlanlarla qızları ayırıblar" — deyir müsahibimiz.

Onun sözlərinə görə, həmin vaxt Sərdarı Bakıya göndəriblər: "Gəlib Bakıda texniki peşə məktəbində oxuyub, sonra gəmidə işlə təmin ediblər. Elə gəmidə yaşayırdı. Sonra işçilərdən biri gedib öz bibisinə deyib ki, "bizdə bir oğlan var, heç kimi yoxdur". Qadın da yoldaşımı çağırıb. Deyib, səni övladlığa götürürəm. Elə Sərdar üçün toyu da o ailə elədi. Sonra bir övladımız dünyaya gəldi. Amma bir oğlum da olmuşdu. Əbdüləzizin adını qoymuşduq. O, tez doğulmuşdu, tez də öldü".

Səbirə nənənin həyat yoldaşı xərçəng xəstəliyindən dünyasını dəyişib. Dediyinə görə, həmin vaxtlar Cəmil Əliyevin qəbuluna da düşüb ki, bəlkə həyat yoldaşını qurtara bilər. Amma mümkün olmayıb: "Martın 1-də əməliyyat edildi, sentyabrın 1-də dünyasını dəyişdi. 1984-cü il idi. 50 yaşı vardı. Həkimi mənə dedi ki, "sən çox diqqətli qadınsan, mən ilk dəfədir ki, belə qadın görürəm". Eh, həyatdır da".

"Ailə həyatı qurandan sonra yoldaşım məni işləməyə qoymadı. Dedi ki, "mənim iş vaxtım bəlli deyil. Lazım deyil, işləmə. Evdə onsuz da sənin işin çox olur, otur evdə, balamıza bax". O, dünyasını dəyişəndən sonra onun əmək haqqının 4\1 hissəsini mənim üçün təqaüd kimi ayırdılar" — danışır S. Əbdülzəka.

Həmsöhbətimiz deyir ki, yoldaşı dünyasını dəyişəndən sonra həyatını oğluna həsr edib. O da Bişkekə getdikdən sonra qadın tək qalıb. Bir neçə dəfə soruşmağımıza baxmayaraq, qadın oğlunun adını çəkmir: "Bir oğlum var, Qırğızıstandadır. Nə öldü xəbərini almışam, nə də sağ olduğunu bilmirəm".

Onun Qocalar Evinə düşməsinin səbəbi tam fərqli olub. Özü deyir ki, ev şəraiti pis olduğu üçün Əmək və Əhalinin Sosial Müdafiəsi Nazirliyindən vəziyyəti dəyərləndirib və Qocalar Evinə yerləşdiriblər: "8 km qəsəbəsində yaşayırdım. Ev yox, şərait yox, sanki bomj həyatı yaşayırdım. Gəlib yoxladılar. Dedilər ki, "gəl, səni Qocalar Evinə qoyaq, bir az rahat yaşa". Razılaşdım. Məni gətirdilər bura. Burada mən özümə qarşı hörmət görürəm".

Səbirə nənə sirri tam açmaq istəməsə də, danışdıqlarından məlum olur ki, vaxtilə dələduzların qurbanı olub. Onu aldadıblar: "Dedilər, "evi bağışla, ölənə qədər baxacağıq". Sonra satıldı. Qaldım küçələrdə".

Sözünün davamını gətirmir, gözləri dolur. Deyir ki, qəbrinin üstündə yazılması üçün bir şeir hazırlayıb:

Yoldan keçən ayaq saxla,

Burda yatan bir anadır.

Qəm qüssədən xilas olmuş bir anadır.

Yoldan keçən ayaq saxla,

rəhmət dilə,

Ruhu sənə "sağ ol" desin.

Vidalaşırıq. Gileyli, həsrət dolu və nədənsə peşmançılıq çəkən bir insanla sağollaşırıq. Onun gücü təkcə göz yaşlarına çatır…

475
Teqlər:
Səbirə nənə, Səbirə Əbdülzəka, arvad, ər, oğul, övlad, kişi, ailə, həyat, qadın, qocalar evi
Əlaqədar
Məşum qəzanın qurbanı: "Dedilər, get, nə bilirsənsə, elə"
Ruhi xəstə ilə evləndirilən qadın yaşadığı müsibətləri anladır
"Kaş gözlərim açılaydı, anamın üzünü bircə dəfə görəydim..."
"Biz buraya gəlmişiksə, burada da öləcəyik"
Bu bacıların həyatı bir film ssenarisidir
Netflix şirkətinin loqosu, arxiv şəkli

Çağatay Ulusoyun "Netflix"dəki filmindən ilk treyler - VİDEO

9
(Yenilənib 23:01 02.03.2021)
Filmdə kağız və karton toplayaraq yaşayan, səhhəti vaxt ötdükcə pisləşən Mehmet tərk edilən bir uşaq tapır. Onun həyatına girən Ali Mehmetə öz uşaqlığını xatırladır.

BAKI, 2 mart — Sputnik. Türkiyəli aktyor Çağatay Ulusoyun baş rolu oynadığı növbəti "Netflix" filmi "Kağıttan hayaller"in ilk treyleri yayımlanıb.

Sputnik Azərbaycan xəbər verir ki, 12 martda yayımlanacaq ekran işi 190-dan çox ölkədə, 204 milyondan çox istifadəçiyə göstəriləcək.

Filmdə kağız və karton toplayaraq yaşayan, səhhəti vaxt ötdükcə pisləşən Mehmet tərk edilən bir uşaq tapır. Onun həyatına girən Ali Mehmetə öz uşaqlığını xatırladır.

9
Formula-1 üzrə Azərbaycan Qran-prisi, arxiv şəkli

Ciddi məhdudiyyət: Bakıda "Formula-1"də azarkeşlər yerli TV olmayacaq

3
(Yenilənib 22:58 02.03.2021)
Azərbaycan Qran-prisinin təşkilatçıları bu il paytaxtımızda "kral yarışları"nın necə keçiriləcəyindən danışıblar.

BAKI, 2 mart — Sputnik, Teymur Tuşiyev. "Formula 1"in Azərbaycan Qran-prisinin reqlamentində bir sıra dəyişikliklər baş verib. Sputnik Azərbaycan xəbər verir ki, bu barədə Baku City Circuit (BCC) əməliyyat şirkətinin brifinqində məlumat verilib.

"Formula 1" Azərbaycan Qran-prisi bu ilin 4-6 iyun tarixlərində Bakı küçələrində təşkil olunacaq. Keçən il yarış koronavirus pandemiyası səbəbindən baş tutmamışdı. Epidemiya əleyhinə tədbirlərlə əlaqədar olaraq, yarışın Bakı mərhələsi tamaşaçısız keçiriləcək, buna görə stendlərin və əyləncə zonasının inşası nəzərdə tutulmur və konsertlər də təxirə salınır. Bundan başqa, həftəsonları mükafatlandırma mərasimləri sadələşdirilmiş formada, yarış iştirakçıları üçün mətbuat konfransları isə onlayn keçiriləcək.

Azərbaycan Qran-prisinin təşkilatçıları azarkeşlər olmasa da yarışın Bakıda keçirilməsinin vacibliyini vurğulayıblar.

"Bu qədər ciddi məhdudiyyətləri nəzərə alsaq, ortaya belə bir sual çıxa bilər: bu şəraitdə yarışı keçirməyin nə mənası var? Bildiyiniz kimi, "Formula 1" yarışları ölkənin turizm potensialını nümayiş etdirir, buna görə də onun keçirilməsi böyük əhəmiyyət daşıyır ", – deyə BCC-dən bildirilib.

Yeri gəlmişkən, BCC-nin Azərbaycan Qran-prisini keçirməkdən imtina etməməsinin daha bir səbəbi əks halda təşkilatçıların cərimə ödəməli olmasıdır. Cərimənin məbləği isə açıqlanmayıb.

Məhdudiyyətlər KİV nümayəndələrindən də yan keçməyib. Sosial məsafəyə riayət olunması qaydalarına görə, mətbuat mərkəzində jurnalistlər üçün yerlərin sayının 400-dən 150-yə endirilməsi nəzərdə tutulub. Həmin yerlər xarici və yerli jurnalistlər arasında bərabər şəkildə bölünəcək. Bununla belə, yerli telekanallar və radiolar Azərbaycan Qran-prisi üçün akkreditasiya əldə edə bilməyəcəklər.

Təşkilatçılar treklərin hazırlanması ilə bağlı əsas işlərin bu ilin may ayında yerinə yetiriləcəyi, bununla əlaqədar paytaxtın bəzi küçələrində nəqliyyatın hərəkətinin məhdudlaşdırılacağını də bildiriblər.

Eyni zamanda, qeyd ediblər ki, könüllülərdən müraciətlərin qəbulu artıq başa çatıb. Bu prosesə start veriləndən sonrakı 60 saat ərzində könüllülərdən təxminən yeddi min ərizə daxil olub. Marşallardan da ərizə qəbulu yekunlaşıb.

Qeyd edək ki, bu il marşalların sayı 150 nəfər artırılacaq.

3
Teqlər:
Formula-1 yarışı, Formula 1
Erməni pasportu

Doğulduğu yer - Azərbaycan? Qarabağ ermənisinin pasportu Ermənistanda qalmaqal yaradıb

48
(Yenilənib 00:01 03.03.2021)
"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam" - Arsen Karapetyan.

BAKI, 2 mart - Sputnik. Qarabağda doğulan Ermənistan vətəndaşlarının yeni pasportlarında doğum yeri hissəsinə “Azərbaycan” yazılmağa başlanılıb.

Sputnik Ermənistan xəbər verir ki, bu barədə Yerevan Ağsaqqallar Şurasının “Mənim addımım” fraksiyasından olan keçmiş üzvü, memar Arsen Karapetyan öz Facebook hesabında yazıb. 

Karapetyan qeyd edib ki, dostu 80-ci illərin ortalarında Ağdərədə (Mardakertdə) anadan olub. Daha sonra isə Rusiyada yaşayıb və hazırda Ermənistan vətəndaşlığı almaq üçün müraciət edib. Onun pasportunda doğum yeri kimi isə Azərbaycan göstərilib.

"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam. Nədir bu?", - deyə Karapetyan sosial şəbəkədə yazıb.

Məsələ ilə bağlı Ermənistan polisinin pasport və viza şöbəsinin rəis müavini Məryəm Gevorkyan açıqlama verib.

"Bu vətəndaş Sovet İttifaqı dövründə anadan olub, Azərbaycan SSR-də anadan olub. Ermənistan Respublikasının pasportu səyahət sənədidir, beynəlxalq standartlara uyğundur, ona görə keçmiş SSRİ ölkələri üçün kodlar yoxdur. Başqa sözlə, əgər bir insan keçmiş SSRİ-nin bir ölkəsində anadan olubsa, onun doğulduğu yer pasporta ölkənin indiki adı ilə qeyd olunur, yəni Gürcüstan SSRİ deyil, Gürcüstan", - deyə Məryəm Gevorkyan bildirib.

O əlavə edib ki, "bu, köhnə təcrübədir". 

Qeyd edək ki, Arsen Karapetyan şərh bölümündə dostunun doğulduğu yerin "Azərbaycan SSR" kimi göstərildiyi Rusiya pasportunu da yerləşdirib. 

48