Dövlət İmtahan Mərkəzi

Aztəminatlı təbəqənin dövlət qulluğuna yolu asan olmayacaq

6373
(Yenilənib 16:20 09.06.2017)
Ekspert: "Yüksək imtahan qiymətləri imkansız, lakin savadlı-perspektivli şəxslərin kənarda qalması ilə nəticələnəcək"

BAKI, 9 iyun — Sputnik. Azərbaycan Respublikası Tarif (qiymət) Şurası 2017-ci il 23 may tarixində keçirilən növbəti iclası zamanı, Dövlət İmtahan Mərkəzinin müraciətini nəzərə alaraq, dövlət qulluğu ilə bağlı ödənişli xidmətlərin tariflərini təsdiq edib. Tarif (qiymət) Şurasının qərarına əsasən, dövlət qulluğu ilə bağlı ödənişli xidmətlərin tarifləri aşağıdakı cədvələ uyğun müəyyən edilib:

AA vəzifə qrupu üzrə test imtahanı bir iştirakçı üçün 110 manat, AB vəzifə qrupu üzrə test imtahanı bir iştirakçı üçün 100 manat, AC vəzifə qrupu üzrə test imtahanı bir iştirakçı üçün 90 manat, BA vəzifə qrupu üzrə test imtahanı bir iştirakçı üçün 80 manat, BB vəzifə qrupu üzrə test imtahanı bir iştirakçı üçün 70 manat, CA vəzifə qrupu üzrə test imtahanı bir iştirakçı üçün 10 manat, DA vəzifə qrupu üzrə test imtahanı bir iştirakçı üçün 10 manat.

Bəs heç birdə işləməyən, imtahanı işə qəbul olmaq üçün verən şəxslər üçün yüksək məbləğin tətbiq edilməsi nə dərəcədə düzgündür? Vətəndaşlar arasında bu imtahanlara marağı necə dəyişəcək və hansı nəticələrə səbəb olacaq?

Sputnik Azərbaycan-a açıqlama verən dövlət qulluğuna hazırlıq üzrə ekspert İlyas Hüseynov bildirib ki, Tarif Şurasının elan etdiyi qiymətlər çox bahadır: "Bundan əvvəl elan olunan bakalavr və magistr səviyyəsində verilən imtahan qiymətlərinin baha olması, dövlət qulluğunda keçiriləcək imtahan qiymətlərinin də baha olacağından xəbər verirdi".

"Hal-hazırda Azərbaycanda yaşayış minimumunu, əhalinin ortaq əmək haqqının aşağı olmasını nəzərə alsaq, imtahanların bu qədər baha olması düzgün deyil. Nəzərə alaq ki, imtahan verən şəxslər hələ imtahanlara qədər hazırlıq mərkəzlərində hazırlaşır və ona da pul ayırmalı olurlar. Daha bir məsələ ondadır ki, insanlar birinci turda pul ödədikdən sonra ikinci mərhələyə keçib-keçməyəcəklərini bilmirlər" — mütəxəssis bildirib.

Onun fikrincə, məhz bu faktlar insanların dövlət imtahanlarına marağını azaldacaq və bu da özlüyündə dövlət yerlərində kadr çatışmazlığına və peşəkarların azalmasına səbəb olacaq: "Bir növ bunun nəticəsində dövlət orqanlarında ciddi peşəkar kadr çatışmazlığı yaranacaq. Uduzan isə dövlət orqanları olacaq".

Hüquqşünas Elyar Həsənov da Sputnik Azərbaycan-a açıqlamasında, sözügedən qiymətlərdən narazı olduğunu qeyd edib: "Bir hüquqşünas olaraq deyə bilərəm ki, tamamilə ədalətsiz qərardır. Çünki əhalinin minimum əmək haqqı 116 manatdırsa, onda necə ola bilər ki, imtahana 110 manat ödənilsin? Parta arxasından duran və qazancı olmayan insan bu pulu haradan versin?"

"Eyni zamanda, qanunvericilikdə deyilir ki, hər bir vətəndaşın dövlət qulluğuna iddia etmək hüququ var. Amma bu tariflər bəzi vətəndaşların yolunu bağlamaq deməkdir. Bir hüquqşünas kimi subyektiv fikrim budur ki, bu ədalətli deyil" — E. Həsənov bildirib.

Hüquqşünas hesab edir ki bu qiymətlər imtahan verənlərin sayını azaldacaq: "Eyni zamanda, savadlı kadrların karyera qurmasına da əngəl ola bilər. Belə ki, pulu olmayan kadrlar imtahan verməkdən imtina edəcək".

Təhsil eksperti Kamran Əsədovun Sputnik Azərbaycan-a verdiyi məlumata görə, 2005-ci ildən etibarən Azərbaycanda dövlət qulluğuna iddialı şəxslər müəyyən baryerlər aşmaqla müvafiq vəzifələrdə çalışa bilərlər: "Lakin illər üzrə həyata keçirilmiş imtahanların nəticələri göstərir ki, dövlət qulluğuna qəbul üçün qanunvericiliyin tələblərindən irəli gələn ikimərhələli baryer sistemi iddialı şəxslərin dövlət orqanlarına işə qəbulunda müəyyən problemlər yaradır. Belə ki, "Dövlət qulluğu haqqında" Qanuna görə, dövlət qulluğuna qəbulun birinci mərhələsi test üsulu ilə həyata keçirilir".

"İkinci tur isə əvvəllər Dövlət Qulluğu Komissiyası tərəfindən, indi isə Dövlət İmtahan Mərkəzi tərəfindən vətəndaşın işə düzəlmək istədiyi müvafiq qurumun mütəxəssisi və müstəqil ekspertin iştirakı ilə video çəkilişlə keçirilən sual-cavab mərhələsidir. Bu hüquqi mexanizmlərdən yararlanmayan vətəndaşların sayı isə az deyil. Bir neçə dövlət qulluğuna yiyələnmək istəyib arzusuna çata bilməyən şəxs mənə müraciət edib ki, müsahibə mərhələsində lazımi bal vermək üçün, "yuxarıların" tapşırığı olmalıdır" — K. Əsədov əlavə edib.

Onun fikrincə, həqiqətən də imtahan verən və sonda uğurla işə qəbul olunanlar arasındakı ciddi say fərqi insanda şübhə yaradır: "Hesab edirəm ki, "Dövlət Qulluğu Haqqında" Qanunda test üsulundan sonrakı mərhələ sovet dönəmindən qalma ənənədir. Amma istər orta ixtisas, istər bakalavr, magistr, istərsə də dövlət qulluğuna qəbul imtahanları üçün müəyyən olunmuş xidmət haqqı qiymətləri hədsiz dərəcədə yüksəkdir və reallığı əks etdirmir".

Ekspert diqqətə çatdırıb ki, bu qiymətə dövlət qulluğuna qəbul imtahanı olmaz: "110 manat verib ikinci mərhələdə kiminsə qurbanına çevrilmək olmaz. 2005-ci ildən 2016-cı ilə qədər bu imtahanlar pulsuz olaraq həyata keçirilib. Məhz bu imtahanın digərlərindən fərqi odur ki, birbaşa dövlətin kadr ehtiyaclarının həllinə yönəlib. Yüksək imtahan qiymətləri imkansız, lakin savadlı-perspektivli şəxslərin kənarda qalması ilə nəticələnəcək".

6373
Teqlər:
dövlət qulluğu, İlyas Hüseynov, Tarif (qiymət) Şurası, hüquqşünas, Elyar Həsənov, Sputnik Azərbaycan, Kamran Əsədov, imtahan, Azərbaycan Respublikası, qrup, qiymət
Əlaqədar
Dövlət qulluqçularına böyük müjdə
Deputat köməkçilərə dövlət qulluqçusu statusu verilməsini təklif edib
Dövlət qulluğunda işləmək istəyənlərin nəzərinə
Dövlət qulluğuna girmək istəyənlər üçün müsabiqə elan edilib
KT, arxiv şəkli

"Tibbi ölçü cihazları dövlət yoxlamasından keçməlidir"

6
(Yenilənib 16:38 22.01.2021)
Məqsəd diaqnostikada istifadə olunan klinik-laborator, rentgen aparatları və s.  kimi diaqnostik tibbi cihazların qeyri-dəqiq ölçmələrinin vətəndaşların həyatı və sağlamlığına mənfi təsirinin qarşısını almaqdır.

BAKI, 22 yanvar — Sputnik. Mülkiyyət formasından asılı olmayaraq, səhiyyə sahəsində istifadə olunan tibbi ölçü cihazları istismara verilənədək və təmirdən sonra ilkin yoxlamadan, istismar prosesində isə dövrü yoxlamadan keçirilməlidir. Bunu Sputnik Azərbaycan-a Antiinhisar və İstehlak Bazarına Nəzarət Dövlət Xidmətinin sektor müdiri Elməddin Quliyev deyib.

Məqsəd göstərilən səhiyyə xidmətləri zamanı xəstəliklərin diaqnostikasında istifadə olunan klinik-laborator, rentgen aparatları və s. kimi diaqnostik tibbi cihazların qeyri-dəqiq ölçmələrinin vətəndaşların həyatı və sağlamlığına mənfi təsirinin qarşısını almaqdır. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti səhiyyə sahəsində xidmət göstərən subyektlərin nəzərinə çatdırır ki, "Ölçmələrin vəhdətinin təmin edilməsi haqqında" Azərbaycan Respublikası Qanununa əsasən, səhiyyə sahəsində yalnız üzərində yararlılığına dair yoxlama nişanı və ya yoxlama haqqında şəhadətnaməyə malik tibbi ölçü cihazlarından istifadəyə icazə verilir.

İnzibati Xətalar Məcəlləsinə əsasən, səhiyyə sahəsində ölçmələrin tipi təsdiq edilməmiş və ya yoxlamadan keçirilməmiş ölçmə vasitələrindən istifadəyə görə vəzifəli şəxslər üçün 1500 manatdan 2000 manatadək, hüquqi şəxslər üçün 3000 manatdan 4000 manatadək məbləğdə cərimə olunur. Mülkiyyət formasından asılı olmayaraq, səhiyyə sahəsində xidmət göstərən subyektlər tibbi ölçü cihazlarını ilkin yoxlamadan və ya dövrü yoxlamadan keçirmək üçün "Azərbaycan Metrologiya İnstitutu" publik hüquqi şəxsə və ya ölçmələrin vəhdətinin təmin edilməsi sahəsində akkreditasiya olunmuş digər qurumlara müraciət edə bilərlər.

İstehlakçılara tövsiyə olunur ki, səhiyyə xidmətlərindən istifadə edərkən ölçmələrin qeyri-dəqiq nəticələri ilə qarşılaşmamaq üçün tibbi ölçü cihazlarının yararlılığına dair təsdiqedici sənədi tələb etsinlər, yoxlamadan keçməmiş tibbi cihazlarla göstərilən xidmətləri almaqdan çəkinsinlər. Bu kimi hallarla qarşılaşdıqları təqdirdə istehlakçılara İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət etmələri tövsiyə olunur (tel: 498-15-01 və 498-15-04).

6
Qida festivalı, arxiv şəkli

Azərbaycanda qastronomiya turizmi çiçəklənəcək: Konsepsiyada nələr var?

4
(Yenilənib 16:37 22.01.2021)
Bir il davam etməsi nəzərdə tutulan layihənin yekununda "Milli dadlar" konsepsiyası ictimaiyyətə təqdim ediləcək.

BAKI, 22 yanvar — Sputnik. Dövlət Turizm Agentliyinin dəstəyi ilə Azərbaycan Turizm Bürosu tərəfindən ölkəmizdə qastronomiya turizminin inkişafı üçün "Milli dadlar" konsepsiyasının hazırlanması işinə start verilib. Sputnik Azərbaycan-a Agentlikdən verilən məlumata görə, layihənin əsas məqsədi qastronomiya turizminin inkişafına nail olmaq, tarixi milli mətbəx nümunələrinə, onların hazırlanma və təqdim edilmə ənənələrinə yenidən həyat verib, yerli və əcnəbi turistlərə çatdırılmasına dəstək verməkdir.

Azərbaycan Turizm Bürosu unudulmuş və ya unudulmaq təhlükəsi olan milli mətbəximizə məxsus nümunələrin vahid mənbədə toplanması işinə dəstək verilməsi üçün "millidadlar.az" onlayn portalını təqdim edir.

Azərbaycan Turizm Bürosu bu sahədə məlumatlı olan hər kəsi portalda qeyd edilən qısa suallara cavab verməklə ölkəmizin milli mətbəx nümunələrinin, qastronomiya ənənələrimizin qorunub saxlanılması və beynəlxalq tanıdılması işinə dəstək olmağa çağırır.

Bir il davam etməsi nəzərdə tutulan layihənin yekununda "Milli dadlar" konsepsiyası ictimaiyyətə təqdim ediləcək.

Layihə çərçivəsində ölkəmizin zəngin kulinariya potensialının dərin etnoqrafik köklərə malik olması nəzərə alınaraq Bakı-Abşeron, Quba-Qusar, Şəki-Zaqatala, Cənub regionu, Naxçıvan Muxtar Respublikası, Gəncə-Qazax, Qarabağ, Dağlıq Şirvan, Kəlbəcər-Laçın və Aran bölgələrindən olan milli mətbəxə məxsus müxtəlif nümunələr haqqında məlumatlar toplanılıb. Elmi materiallardan və birbaşa yerli əhalidən əldə olunan informasiyalar əsasında Azərbaycan üzrə 900 ədəd nümunə pasportun işlənib hazırlanması nəzərdə tutulur.

Nümunə pasportda qida və inqrediyentin tərkib hissələri və görünüşü kimi məlumatlarla yanaşı, onun mədəni, tarixi, müalicəvi əhəmiyyəti və turizm marketinqi istiqamətində uyğunluğunun qeyd edilməsi nəzərdə tutulub.

4
Müdafiə naziri general-polkovnik Zakir Həsənov və Böyük Britaniya və Şimali İrlandiya Birləşmiş Krallığının Azərbaycandakı fövqəladə və səlahiyyətli səfiri Ceyms Şarp arasında görüş

Azərbaycan Britaniya hərbi sahədə əməkdaşlıq edəcəklər?

0
(Yenilənib 16:41 22.01.2021)
Səfir Ceyms Şarp deyib ki, Azərbaycan-Böyük Britaniya əlaqələrinin, xüsusilə hərbi sahədə əməkdaşlığın inkişafı üçün səylərini bundan sonra da əsirgəməyəcək.

BAKI, 22 yanvar — Sputnik. Müdafiə naziri general-polkovnik Zakir Həsənov yanvarın 22-də Böyük Britaniya və Şimali İrlandiya Birləşmiş Krallığının Azərbaycandakı fövqəladə və səlahiyyətli səfiri Ceyms Şarp ilə görüşüb. Bu barədə Sputnik Azərbaycan-a Müdafiə Nazirliyindən məlumat verilib.

Müdafiə naziri azad edilmiş ərazilərdə ordumuz tərəfindən həyata keçirilən tədbirlər, həmçinin Azərbaycan Ordusunda aparılan islahatlar və digər məsələlər barədə səfirə məlumat verib.

Görüş zamanı iki ölkə arasında müdafiə sahəsində, o cümlədən hərbi-texniki sahədə əməkdaşlıq üçün böyük potensialın olduğu və bu imkanların genişləndirilməsinin vacibliyi vurğulanıb.

Tərəflər ölkələrimiz arasında hərbi təhsil sahəsində əldə olunan razılaşmaların həyata keçirilməsinin, hərbi ingilis dili kurslarında dinləyicilərin sayının artırılmasının zəruriliyini xüsusi qeyd edib.

Öz növbəsində diplomat Vətən müharibəsində qazanılan qələbə münasibətilə Azərbaycan xalqını təbrik edib.

Azərbaycan-Böyük Britaniya əlaqələrinin, xüsusilə hərbi sahədə əməkdaşlığın inkişafı üçün səylərini bundan sonra da əsirgəməyəcəyini qeyd edən C.Şarp ikitərəfli əməkdaşlıq çərçivəsində Böyük Britaniyanın azad edilmiş ərazilərin minalardan və partlamamış döyüş sursatlarından təmizlənməsi işlərində Azərbaycana köməklik göstərə biləcəyini bildirib.

Görüşdə regional və ikitərəfli əməkdaşlıq, həmçinin qarşılıqlı maraq doğuran bir sıra digər məsələlər müzakirə edilib.

0
Teqlər:
Böyük Britaniyanın Azərbaycandakı səfiri, Böyük Britaniya