Xədicə və Rüqəyya

Onların bəxti rayonda gətirdi, paytaxtda...

1602
(Yenilənib 10:19 02.06.2017)
"İnsanlar elə bilirlər ki, mən yardım istəyirəm, xeyr, uşaqlarımı saxlaya bilmək üçün daimi bir iş istəyirəm"

İradə Cəlil, Sputnik Azərbaycan

BAKI, 2 iyun — Sputnik. Təhsil yox, iş yox, maddi imkan yox, amma ailə var. İki övladı var və həyat yoldaşı üçüncü övlada hamilədir. Həmsöhbətim deyir ki, iş olmadığı üçün Saatlıdan Bakıya gəlib. Bir müddət istixanalarda, tikintilərdə fəhlə kimi çalışıb. İndi o da yoxdur.

Mirvaleh Ağalarov 1988-ci ildə Saatlı rayonunda dünyaya gəlib. Dediyinə görə, uşaq yaşlarından atasını itirdiyi üçün həyatı çətinliklə keçib. Elə buna görə də ali təhsil də ala bilməyib. Ailəsi onu tez evləndirib. 20 yaşından ailə məsuliyyətinin nə olduğunu anlamağa başlayan bu gənc, indi uşaqlarını saxlamağa iş, vəsait tapa bilmir.

Mirvaleh Ağalarov
© Sputnik / Irade JELIL
Mirvaleh Ağalarov

Deyir ki, gününü rayonda mal-qara saxlamaqla keçirirmiş. Sonradan anası sağalmaz xəstəliyə düçar olur: "Anamın 49 yaşı var. 3 il olar ki, xərçəng xəstəliyinə tutulub. Bütün mal-qaranı satıb, onu müalicə etdirməyə çalışdıq. Atam da mən 6 yaşında olanda rəhmətə gedib. Bir qarnı ac, bir qarnı tox böyümüşük. Evin böyük oğlu olduğum üçün məni çox tez evləndiriblər".

"Həyat yoldaşımla bir-birimizi sevmişik. 6-7 il rayonda yaşadıq. Amma son vaxtlar ailədə problemlərimiz yaranmağa başladı. Çünki rayonda iş tapa bilmirdim. Məcbur olub Bakıya köçdüm" — Mirvaleh danışır.

Bir müddət Binə qəsəbəsində müxtəlif istixanalarda çalışan müsahibim, bu pulla həm ailəsini saxlayır, həm də anasına pul göndərir: "İstixana işi mövsümü işdir. Nə qədər iş vardı, bilirdim ki, günə 17 manat gəlirim olacaq. İndi uzun müddətdir iş yoxdur, pulum da bitib. Bilmirəm, qızlarımı necə saxlayım. İş üçün döymədiyim qapı qalmayıb. Heç yerdə uyğun iş tapa bilmirəm. 6-7 aydır ki, iş tapa bilmirəm. Ailəmə demək olar ki, başqaları baxır. Bir tərəfdə xəstə anam, digər tərəfdən uşaqlarım".

Mirvalehin özündən başqa iki qardaşı da var: "Qardaşlarımdan biri mədrəsədə təhsil alır, balacası isə mühafizəçi işləyir. O da ayda 300 manat əmək haqqı alır".

Həmsöhbətimin Xədicə və Rüqəyya adlı iki qızı var. Üçüncü övladı da bu yaxınlarda dünyaya gələcək: "Qızların birinin 5, digərinin 4 yaşı var. Uşaqlarımın yeməyini də başqaları alırlar. Ata kimi uşaqlarımın qayğısına qala bilmirəm. Çox çarəsiz vəziyyətdəyəm. Mənə iş təklif olunur, amma fəhlə işində də şərt kəsirlər ki, "3 gün işlə, xoşumuza gəlsə, səni götürəcəyik"".

"Bir müddət əvvəl belə bir iş çıxmışdı – şirniyyat anbarında fəhlə işi idi. Dedilər, 4 gün işlə, "xoşumuza gəlsə, sənə iş verəcəyik". 4 gün getdim. Yolpulunu da qonşudan alıb işə gedirdim. 4 gündən sonra mənə dedilər ki, "işini bəyənmirik". İş yerinin yaxınlığında bir oğlan əvvəldən mənə demişdi ki, burada daimi işçi yoxdur. Adamları işə götürəndə şərt qoyurlar ki, "3-4 gün işlə, işinə baxım, sonra götürərəm". Axırda da əmək haqqını da verməmiş yola salırlar ki, "işini bəyənmədik"" — o danışır.

Mirvalehin həyat yoldaşı da orta təhsillidir. Onun da bəxti elə uşaqlıqdan gətirməyib. 6-7 yaşı olanda atasını itirib. "Atasız böyümək çətindir. Bir tərəfi yoxmuş kimi böyüyürsən həyatda. Bəlkə elə ona görə də, ata olmaq istəyim çox tez oldu. Özüm görmədiyim qayğını övladlarıma göstərə bilmək üçün. Amma indi elə vəziyyətdəyəm ki, atalıq vəzifəmi yerinə yetirə bilmirəm" — Mirvaleh bildirir.

"İki gül üzlü qızım var. Biri də dünyaya gələcək. Amma mənim onları saxlamağa imkanım yoxdur. Belə danışanda insanlar elə bilirlər ki, mən yardım istəyirəm. Xeyr, mən uşaqlarımı saxlaya bilmək üçün daimi bir iş istəyirəm. Onlara yemək ala bilim, normal geyindirə bilim. İşədüzəltmə şirkətlərinə gedirəm, anket üçün pul da verirəm. Amma aradan aylar keçir, işdən heç bir xəbər çıxmır" — o, əlavə edir.

M. Ağalarov ailəsinin saxlaya bilmək üçün sosial şəbəkələrə də üz tutub. Deyir ki, "Facebook" dostları ona uşaqlarını saxlamaq üçün yardımlar edirlər. Məsciddən tanışları geyim göndərirlər. Amma iş təklif edən yoxdur.

Kiçik bir həyəti və evi var Mirvalehin, amma uşaqlarını saxlamağa imkanı yoxdur. Deyir ona uyğun iş tapılmır. Elə bizə müraciət etməsinin səbəbi də budur. Düşünür ki, kimsə bu yazını oxuyar, iş tapmaqda ona kömək edər.

P.S. Mirvaleh Ağalarovla əlaqə saxlamaq istəyənlər əlaqə telefonu üçün redaksiyamıza müraciət edə bilərlər.

1602
Teqlər:
Mirvaleh Ağalarov, yox, hamilə, fəhlə, övlad, Saatlı, , təhsil, ailə, Bakı, uşaq
Əlaqədar
Məşum qəzanın qurbanı: "Dedilər, get, nə bilirsənsə, elə"
"Kaş gözlərim açılaydı, anamın üzünü bircə dəfə görəydim..."
İnternat məktəbinin direktoru kimsəsiz uşaqlara olmazın işgəncələr verib
"Biz buraya gəlmişiksə, burada da öləcəyik"
Kasıbların ümid yeri: 3 manata ayaqqabı, 2 manata şalvar, 1 manata...
Yemək, arxiv şəkli

Azərbaycanda qida israfı: Dünyanın xeyli ölkəsini geridə qoyuruq

303
(Yenilənib 16:39 06.05.2021)
BMT-nin Qida Tullantısı İndeksi adlanan builki hesabatına görə, Azərbaycanda illik olaraq toplam 935 min ton qida tullantısı yaranıb. Qida tullantılarının həcminə görə Azərbaycan bir çox ölkələri geridə qoyub.

Nigar İsgəndərova, Sputnik Azərbaycan

BAKI, 6 may — Sputnik. Dünya əhalisinin sayının artması bəzi ölkələrdə israfçılığa, bəzi ölkələrdə isə aclığa səbəb olur. Avstraliya, ABŞ və Türkiyə qida tullantısına görə dünyada ilk üçlükdə qərarlaşıb. BMT-nin hesabatına görə, illik olaraq 1,3 milyard ton qida tullantısı əmələ gəlir.

Yəni, illik olaraq 2,6 trilyard ABŞ dolları dəyərində qida tullantısı əmələ gəlir. Hansı ki, bu vəsait, bu qədər qida tullantısı ilə 815 milyon ac insanı doyurmaq mümkündür.

Bəzi ölkələrdə restoranlarda qidaların tullantısı qadağandır. Bunun üçün müştərilər cərimə olunurlar. Artıq bununla bağlı olaraq Çin də qərar qəbul edib. Bəzi ölkələr isə qida tullantılarından gübrənin hazırlanması prosesində istifadə edirlər. Bu məqsədlə orqanik gübrələr də istehsal olunur.

Qida tullantılarının geri çevrilməsi ilə ətraf aləmin çirklənməsinin də qarşısı alınmış olur. Çünki qida tullantıları həm də gərəkli, faydalı torpaq qatının yoxa çıxması hesab edilir. Bu qida tullantılarından gübrə məqsədilə istifadə etməklə həm də torpaq qatının daha da zənginləşməsinə nail olmaq olar.

Birləşmiş Millətlər Təşkilatının hesabatına görə, tullantı qidalar bir ölkə olsaydı, istixana qazı emissiyalarına görə dünyada ABŞ və Çindən sonra üçüncü olardı. Bu problemə ən böyük töhfəni kim verir? İnkişaf etmiş ölkələrdə xüsusən qida tullantılarının həcmi daha çox olur. Bu gün xüsusən də Amerikda qida tullantılarının həcmi yüksək səviyyədə qalır.

Dünyada qida tullantılarından müxtəlif məqsədlər üçün istifadə olunur. Statistikaya görə, illik olaraq 20 milyon ton qida zibil olaraq tullanır.

Qida tullantılarının həcmini azaltmaq, tullantıları faydalı şəkildə idarə etməklə həm də yeni iş yerləri yaratmaq, enerjiyə qənaət etmək və iqlim dəyişikliyinin qarşısını almaq mümkündür.

Azərbaycandakı vəziyyətə gəlincə, ölkəmizdə illik olaraq adambaşına 93 kiloqram qida zibilliyə atılır. Bu barədə BMT-nin Qida Tullantısı İndeksi adlanan bu il açıqlanan hesabatında məlumat verilib. Hesabata görə, Azərbaycanda illik olaraq toplam 935 min ton qida tullantısı yaranıb. Qida tullantılarının həcminə görə, Azərbaycan bir çox ölkələri geridə qoyub.

Rəsmi rəqəmlərdən məlum olur ki, Azərbaycanda əhalinin əsas xərcləri məhz ərzaq məhsullarına çıxır. Dövlət Statistika Komitəsinin məlumatı da bunu təssdiqləyir. Belə ki, Dövlət Statistika Komitəsinin məlumatına görə, ötən il pərakəndə ticarət şəbəkələrində istehlakçılara 40,2 milyard manatlıq, o cümlədən 21,7 milyard manatlıq ərzaq məhsulu, içki və tütün məmulatı, 18,5 milyard manatlıq qeyri-ərzaq malları satılıb. Sırf ərzaq məhsullarının ümumi xərclərdəki payı isə 48,6 faiz olub.

BMT-nin son açıqlanan hesabatına görə, il ərzində 931 milyon ton qida məhsulu zibil kimi tullanır. Bu isə illik qida məhsullarının 17 faizinin israfı deməkdir.

Hesabatda həmçinin qeyd olunub ki, dünyada 690 milyon insan aclıqdan əziyyət çəkir.

"Azərbaycanda da poliqonların qida tullantıları ilə aşıb-daşmasının qarşısını necə almaq olar?" sualına cavab olaraq millət vəkili, Milli Məclisin Təbii ehtiyatlar, energetika və ekologiya komitəsinin üzvü Naqif Həmzəyev Sputnik Azərbaycan-a açıqlamasında qida tullantısı ilə bağlı durum və görülən işlərdən danışıb:

"Yediyimiz çörəyin bir qisminin boyat olaraq tullandığının şahidiyik. Təəssüflər olsun ki, çörək və digər qida məhsulları israfçılığın qurbanı olur. Bunun üçün maarifləndirmə işlərini daha da çoxaltmalıyıq. İnsanlar yediyi qədər ərzaq, çörək almalıdır. Restoran və kafelər də həmçinin, onlar da lazım olan qədər ərzaq almalıdırlar".

"Düşünürəm ki, biri digərinin qidasına nəzarət edə bilməz. Sadəcə olaraq maarifləndirmə işlərini gücləndirmək lazımdır. Uşaq bağçaları, məktəblərdə bu cür maarifləndirmə işlərini gücləndirmək lazımdır. Çünki bu şəxslər gələcəkdə cəmiyyəti idarə edən şəxslərə çevrilirlər", - deyə o əlavə edib.

O bildirib ki, Gəncədə tullantıların təkrar emalı ilə bağlı zavodun tikintisi planlaşdırılır: "Bu zaman çoxlu enerji, gübrələr də istehsal etmək mümkün olur. Bu layihə çox böyük vəsait tələb edir. Düşünürəm ki, əksər regionlarda belə layihə icra olunacaq".

Millət vəkili deyir ki, israfçılığın səbəbləri müxtəlifdir:

"İnsanlar yaşlandıqca anlayırlar ki, nə qədər israfçılığa yol veriblər. Təəssüflər olsun ki, yeyilən çörəyin 3 qat artığı israf olunur. Digər tərəfdən isə nə qədər ac insanlar bu çörəklə qidalana bilərdi. Hazırda Ramazan ayıdır. Ramazan ayında əsas məqsədlərdən biri də budur ki, insanlar bərabər olsunlar, toxun acdan xəbəri olsun. 13-14 saat ac qaldıqdan sonra insanlar qonşuda tanıdığı, bildiyi, köməyə ehtiyacı olan birinə yardım etməyi, az yeməyi öyrənir və israfçılığın qarşısını alır". `

Restoran və kafelərin yerləşdikləri ərazilərdəki poliqonlara nəzər salaraq, biz bu qida israfını görə bilərik. Lakin onların bir neçəsi ilə əlaqə saxlasaq da, onlar qida israfına yol vermədiklərini, sifarişlərə uyğun məhsul satdıqlarını deyirlər.

Hər kəs özündən başlasa, yəqin ki qida israfının, çörək tullantısının qarşısını almaq mümkün olar...

303
Evsiz, arxiv şəkli

Tüfeyli həyat tərzi keçirənlər dilənçilər saxlanılıblar

2
19 nəfər barəsində isə İnzibati Xətalar Məcəlləsinin müvafiq maddəsi ilə protokol tərtib edilib. Daha sonra saxlanılan şəxslər qeydiyyatda olduqları şəhər və rayonlara göndərilib.

BAKI, 6 may — Sputnik. Gəncədə tüfeyli həyat tərzi keçirənlər və dilənçilər saxlanılıblar.

Daxili İşlər Nazirliyinin Mətbuat Xidmətinin Gəncə regional qrupundan Sputnik Azərbaycan-a verilən məlumata görə, Gəncə Şəhər Baş Polis İdarəsinin Nizami Rayon Polis İdarəsinin əməkdaşları şəhər ərazisində tüfeyli həyat tərzi keçirən və dilənçiliklə məşğul olaraq vətəndaşların haqlı narazılığına səbəb olan şəxslərlə bağlı tədbir keçirib.

Tədbir zamanı ümumilikdə 31 nəfər saxlanılaraq Polis İdarəsinə gətirilib. Onlarla profilaktiki söhbətlər aparılıb, 19 nəfər barəsində isə İnzibati Xətalar Məcəlləsinin müvafiq maddəsi ilə protokol tərtib edilib. Daha sonra saxlanılan şəxslər qeydiyyatda olduqları şəhər və rayonlara göndərilib.

2
Vladimir Putin və Co Bayden arasında görüş, 2011-ci il

Politico: "Bayden Putin Bakıda görüşə bilər, ancaq…"

3
(Yenilənib 22:08 06.05.2021)
Baydenin Bakıya gəlmə şansları o qədər də yüksək deyil. Səbəblərdən biri: Azərbaycan və Ermənistan arasında ötən il Dağlıq Qarabağda baş tutan qısamüddətli müharibədir.

BAKI, 6 may — Sputnik. ABŞ və Rusiya Prezidentləri Co Bayden və Vladimir Putin Azərbaycanın paytaxtı Bakıda görüşə bilər. Sputnik Azərbaycan "Politico" nəşrinə istinadən xəbər verir ki, bu barədə ABŞ-ın sabiq rəsmi şəxsləri bildiriblər.

Bu ilin aprelində Çexiya Baş nazirinin birinci müavini (həmin vaxt Çexiya XİN-in səlahiyyətlərini icra edirdi) Yan Qamaçek bildirib ki, bu ölkənin Moskva və Vaşinqtondakı səfirlərinə Rusiya – ABŞ sammitinin Praqada keçirilməsini təklif etməyi tapşırıb. Bu bəyanat Çexiya və Rusiya arasında diplomatik böhran baş verməmişdən qabaq səsləndirilib.

ABŞ-ın sabiq rəsmi şəxsləri və analitikləri bəyan ediblər ki, hər iki prezidentin görüşü Çexiya paytaxtı Praqa, İslandiya paytaxtı Reykyavik, Sloveniya paytaxtı Lyublyana və Azərbaycan paytaxtı Bakıda da keçirilə bilər.

Nəşr qeyd edir ki, Bakının görüş yeri kimi seçilməsi də gəzinti kimi bir şey olardı, xüsusilə ABŞ tərəfi üçün. Azərbaycanın həm Vaşinqton, həm də Moskva ilə güclü əlaqələri olmasına baxmayaraq, bu, qeyri-standart seçim olardı. Baydenin Bakıya gəlmə şansları o qədər də yüksək deyil. Səbəblərdən biri: Azərbaycan və Ermənistan arasında ötən il Dağlıq Qarabağda baş tutan qısamüddətli müharibədir.

"Politico" yazır ki, Baydenin Bakıya səfəri böyük ehtimalla Ermənistanı, həmçinin erməni əsilli amerikalıları narahat edəcək: "Bayden bu yaxınlarda 20-ci əsrin əvvəllərində baş verən "erməni soyqırımı"nı rəsmi olaraq tanıyaraq bu icmanın əksəriyyətini sevindirdi".

3