Mehriban Əliyeva

Mehriban Əliyeva: "Qəzalı binalarda yaşayanlar tezliklə yeni mənzillərə köçürülməlidir"

2862
(Yenilənib 22:52 30.05.2017)
Mehriban Əliyeva Qaradağda məcburi köçkün ailələri üçün yaşayış kompleksinin təməlqoyma mərasimində iştirak edib

BAKI, 30 may — Sputnik. Bu gün Bakı şəhərinin Qaradağ rayonunda məcburi köçkünlər üçün yaşayış kompleksinin təməlqoyma mərasimi keçirilib. Sputnik Azərbaycan xəbər verir ki, Azərbaycanın Birinci vitse-prezidenti xanım Mehriban Əliyeva mərasimdə iştirak edib.

Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov yaşayış kompleksinin baş planı, burada inşa olunacaq məktəb və uşaq bağçasının planı ilə tanış olan Azərbaycanın birinci vitse-prezidenti Mehriban Əliyevaya məlumat verib ki, yaşayış kompleksinin tikinti layihəsi üzrə hər biri 2 bloklu, 9 mərtəbəli 11 yaşayış binasının inşası nəzərdə tutulub. Yaşayış binalarında ümumilikdə 1026 mənzil olacaq. Binalardakı mənzillərin ümumu sahəsi 73 min kvadratmetrdir. Mənzillər 1, 2, 3 və 4 otaqdan ibarət olacaq. Bütün mənzillər təmir edilərək və mətbəx mebeli ilə təchiz olunaraq istifadəyə veriləcək. Yeni yaşayış kompleksində hazırda qəzalı binalarda məskunlaşmış 1026 məcburi köçkün ailəsi mənzillə təmin olunacaq. Yaşayış kompleksinə, həmçinin 624 şagird yerlik üçmərtəbəli məktəb binası və 220 yerlik uşaq bağçası, tibb məntəqəsi daxildir.

Ərazidə istirahət parkı salınacaq, uşaq meydançaları yaradılacaq. Prezident İlham Əliyevin Azərbaycanın ərazi bütövlüyünün təmin olunması istiqamətində həyata keçirdiyi tədbirlər, qaçqın və məcburi köçkünlərin həyat şəraitinin yaxşılaşdırılması üçün görülən işlər bu kateqoriyadan olan soydaşlarımızın hər zaman diqqət və qayğısı ilə əhatə olunduğunu göstərir. Qaçqın və məcburi köçkünlərin müvəqqəti yaşayış yerləri və çadırlardan müasir tələblər səviyyəsində inşa edilən qəsəbələrə köçürülməsi dövlətin bu insanlara göstərdiyi diqqətin təzahürüdür. Qaçqın və məcburi köçkünlərin maddi rifahının yaxşılaşdırılması üçün dövlət proqramları qəbul edilib, sosial müavinətlərin artırılması istiqamətində mühüm tədbirlər görülüb.

Bu istiqamətdə atılan mühüm addımlardan biri də martın 9-da Birinci vitse-prezident Mehriban Əliyevanın sədrliyi ilə Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin köçürülməsinə həsr edilən müşavirənin keçirilməsi oldu. Mehriban Əliyeva müşavirədəki çıxışında vurğuladı ki, görülən işlərlə yanaşı, hələ də ağır vəziyyətdə, qəzalı və yararsız binalarda kifayət qədər çox məcburi köçkün ailəsi yaşayır və bu istiqamətdə işlərin sürətləndirilməsi üçün təxirəsalınmaz addımlar atılmalıdır. Birinci vitse-prezident bildirdi ki, Bakı və Sumqayıt şəhərlərində yararsız, qəzalı binalarda yaşayan bütün köçkün ailələri tezliklə yeni mənzillərə köçürülməlidir.

Mehriban Əliyeva Qaradağ rayonunda məcburi köçkünlər üçün yaşayış kompleksinin təməlini qoyub. Yaşayış kompleksinin 2018-ci ilin aprel ayında təhvil verilməsi nəzərdə tutulub. Kompleksin yerləşdiyi əraziyə yeni yol da salınacaq. Azərbaycanın Birinci vitse-prezidenti məcburi köçkünlər üçün yaşayış kompleksinin təməlqoyma mərasimində çıxış edib.

Artıq 20 ildən çoxdur ki, 1 milyon artıq azərbaycanlının Ermənistanın hərbi təcavüzü və işğalından əziyyət çəkdiyini deyən xanım Mehriban Əliyeva soydaşlarımızın üzləşdiyi problemlərin Azərbaycan dövlətinin diqqət mərkəzində olduğunu, müstəqilliyimizin ilk illərindən bu istiqamətdə həyata keçirilən tədbirlərin dövlət siyasətinin əsas istiqamətlərindən birini təşkil etdiyini, doğma torpaqlarından didərgin düşmüş soydaşlarımızın yaşayış şəraitinin yaxşılaşdırılması üçün 2004-cü ildə Dövlət Proqramının qəbul edildiyini, 2007-ci və 2011-ci illərdə bu Proqrama əlavələrin təsdiqləndiyini, ümumiyyətlə bu istiqamətdə həyata keçirilən tədbirlərin icrasına 6 milyard manatdan çox vəsait ayrıldığını diqqətə çatdırıb. Xatırlatdıb ki, çadır şəhərciyi şəraitində yaşayan insanlar, qaçqın və məcburi köçkün ailələri onlar üçün inşa olunan 100-dək müasir yaşayış qəsəbəsinə köçürülüblər. Ümumilikdə bu, 50 min ailənin, 250 mindən çox insanın yaşayış şəraitinin yaxşılaşdırılması, yeni mənzillə təmin olunması deməkdir. “Son 13 ildə 400 mindən çox qaçqın və məcburi köçkün yeni iş yeri ilə təmin olunub. Hər bir qəsəbədə məktəblər, uşaq bağçaları salınır. Ali və orta ixtisas təhsil ocaqlarında ödənişli formada təhsil alan qaçqınlar və məcburi köçkünlər təhsil haqqını ödəməkdən azad olunublar”,- deyən Azərbaycanın birinci vitse-prezidenti vurğulayıb ki, həm çadır şəhərciklərinin ləğvində, həm humanitar faciənin qarşısının alınmasında Azərbaycan dövlətinin təcrübəsi, nadir bir təcrübədir və beynəlxalq təşkilatlar tərəfindən çox yüksək qiymətləndirilir. Görülən bütün tədbirlərə baxmayaraq, bu sahədə öz həllini tapmayan problemlərin mövcud olduğunu təəssüflə qeyd edən Mehriban Əliyeva bildirib ki, Bakı və Sumqayıt şəhərlərində yararsız, qəzalı vəziyyətdə olan binalarda hələ də minlərlə insan yaşayır. Mart ayında bu problemə həsr olunan müşavirədə birinci mərhələdə ən qəzalı binalarda yaşayan 4 min ailənin köçürülməsi üçün tədbirlər planının hazırlanması tapşırığının verildiyini xatırladan Birinci vitse-prezident hazırda bu plana uyğun olaraq Abşeron rayonunun Masazır qəsəbəsində 3 binanın, Sabunçu rayonunun Ramanı qəsəbəsində 1 binanın, Sumqayıt şəhərində 5 binanın inşa edildiyini, digər 5 binanın inşası üçün isə yerin ayrıldığını söyləyib.

“Bu gün təməli qoyulan müasir yaşayış kompleksi ölkəmizin özəl sektorunun həmin bu nəcib işə töhfəsidir. Hesab edirəm çox gözəl bir haldır ki, dövlətlə yanaşı, iş adamları, sahibkarlar da bu məsələyə dəstəyini verməyə hazırdırlar”,- deyən Mehriban Əliyeva bu təşəbbüsü yüksək qiymətləndirib, Azərbaycanda fəaliyyət göstərən digər şirkətləri, sahibkarları da təşəbbüsü dəstəkləməyə dəvət edib.

Birinci vitse-prezident bildirib ki, bu, Azərbaycan xalqına xas olan xeyriyyəçilik ənənələrinin davamıdır, eyni zamanda, xalqımızın həmrəyliyinin, dövlətin gücünün və inkişafının təzahürüdür. Mehriban Əliyeva Ermənistan-Azərbaycan, Dağlıq Qarabağ münaqişəsinin tezliklə öz ədalətli həllini tapacağına və soydaşlarımızın doğma torpaqlarına qayıdacağına əminliyini ifadə edərək, işğaldan azad olan torpaqlarda Azərbaycan dövlətinin bütün lazımi infrastrukturu quracağını, şəhərlərimizi bərpa edəcəyini bildirib. Birinci vitse-prezident Mehriban Əliyeva mübarək Ramazan ayının başlanması münasibətilə təbriklərini çatdırıb. Azərbaycan xalqına sülh və əmin-amanlıq arzulayıb.

2862
Teqlər:
qəzalı bina, Birinci vitse-prezident, məcburi köçkün, Mehriban Əliyeva, Əli Həsənov, Azərbaycan
Əlaqədar
Məcburi köçkünlərə ödəniləcək müavinətin məbləği dəyişdi - Prezident fərmanı
Məcburi köçkünlərin problemləri ilə bağlı göstəriş verildi
Bu kateqoriyadan olan məcburi köçkünlər aylıq müavinət ala bilməyəcəklər
Məcburi köçkünlər üçün güzəştlər ləğv olundu
Bu xəbər məcburi köçkünləri məyus edəcək
Koronavirus testi, arxiv şəkli

Azərbaycanda koronavirusa yoluxmada azalma qeydə alındı

27
(Yenilənib 17:00 26.10.2020)
Azərbaycanda bu gün koronavirus infeksiyasına 527 yeni yoluxma faktı qeydə alınıb, 131 nəfər müalicə olunaraq sağalıb, 8 nəfər isə vəfat edib.

BAKI, 26 oktyabr — Sputnik. Azərbaycanda bu gün koronavirus infeksiyasına 527 yeni yoluxma faktı qeydə alınıb, 131 nəfər müalicə olunaraq sağalıb və evə buraxılıb. Sputnik Azərbaycan-ın məlumatına görə, bu barədə Nazirlər Kabineti yanında Operativ Qərargah məlumat yayıb.

Son sutkada 8 nəfər COVID-19-dan vəfat edib. Hazırkı dövrədək ölkəmizdə 50 min 486 nəfərin koronavirus infeksiyasına yoluxması faktı müəyyən edilib. Onlardan 41 min 410 nəfər müalicə olunaraq sağalıb, 679 nəfər vəfat edib. Aktiv xəstə sayı 8397 nəfərdir. Ötən müddət ərzində 1 milyon 298 min 348 test aparılıb. Bugünkü test sayı isə 6814-dir.

27
Əlaqədar
Daha 9 şagirddə koronavirus aşkarlandı
Azərbaycanda koronavirus: son sutkada 128 yoluxma
Koronavirus daha tez öldürməyə başlayıb
Daha 20 şagirddə koronavirus aşkarlandı
Avtomobil tıxacı, arxiv şəkli

Pilləli saatı olarsa, yollardakı sıxlıq aradan qalxa bilərmi? - ZİDDİYYƏT

47
(Yenilənib 16:07 26.10.2020)
"Restoranlar, kafelər əvvəllər axşam saat 11-12-dək işləyirdisə, indi işlərini daha tez yekunlaşdırmalı olur. İndi elə bir situasiyadır ki, hamı eyni vaxtda işdən çıxmalı olur. Vaxt məhdudiyyəti 21:00 yox, 23:00 olsaydı, bu sıxıntı bu qədər olmayacaqdı" - Fazil Mustafa

Nigar İsgəndərova, Sputnik Azərbaycan

BAKI, 26 oktyabr — Sputnik. Sentyabrın 28-dən etibarən komendant saatının elan olunması xüsusən Bakıda yollarda sıxlığa səbəb olub. Yollarda yaranan sıxlıqla əlaqədar olaraq avtobusların da intervallarında gecikmələrin yaranması dayanacaqlarda böyük sərnişin sıxlığı ilə nəticələnir. Artıq bir neçə gündür ki, metronun da fəaliyyətinin dayandırılması və bununla əlaqədar olaraq avtobus sərnişinlərinin sayının çoxalması da bu sıxlığı artırır.

Belə olan vəziyyətdə nə etməli? Digər ölkələrin təcrübələrindən yararlanaraq iş saatlarının müxtəlif vaxtlarda başlanıb, müxtəlif vaxtlarda bitmə təcrübəsini necə, tətbiq etmək olarmı?

Millət vəkili Fazil Mustafa Sputnik Azərbaycan-a açıqlamasında komendant saatında bunun elə bir effekt verməyəcəyini deyir:

"Komendant saatı var. Cərimə olunmamaq üçün hər kəs çalışır ki, 9-dək evdə olsun. Bu səbəbdən vəziyyəti tənzimləmək çox çətindir. Belə bir ərəfədə hərəkət etmək ümumiyyətlə mümkün olmur. Hesab edirəm ki, iş saatlarının pilləli olması ilə nəsə həll olunmur. Komendant saatı, hərbi vəziyyət bitdikdən sonra bu barədə danışmaq daha doğru olar".

"Restoranlar, kafelər əvvəllər axşam saat 11-12-dək işləyirdisə, indi işlərini daha tez yekunlaşdırmalı olur. İndi elə bir situasiyadır ki, hamı eyni vaxtda işdən çıxmalı olur. Vaxt məhdudiyyəti 21:00 yox, 23:00 olsaydı, bu sıxıntı bu qədər olmayacaqdı", - deyə millət vəkili əlavə edib.

Bakı Nəqliyyat Agentliyinin mətbuat katibi Mais Ağayev isə Sputnik Azərbaycan-a açıqlamasında pilləli iş saatlarının olmasının səmərəsindən danışıb: "Operativ Qərargahın dövlət qurumlarında çalışan işçilərin sayının 30 faiz azaldılması ilə bağlı qərarı var. Biz də bildiririk ki, pilləli iş saatlarının olması çox yaxşıdır. Bu həm yollarda nəqliyyat vasitələrinin intensivliyi, həm də sərnişin axınının idarə olunması baxımından səmərəlidir".

Nəqliyyat üzrə ekspert Azər Allahverənov Sputnik Azərbaycan-a açıqlamasında sıxlığın aradan qaldırılması üçün təkliflər irəli sürüb: "Faktiki olaraq sıxlıq metronun fəaliyyətinin dayandırılması ilə bağlıdır. Reallıq ondan ibarətdir ki, metro pandemiyanın müxtəlif dövrlərində də işləmədiyindən ictimai nəqliyyat sırf avtobusların üzərində köklənmişdi. Buna görə də bu sıxlıq nəzarətdə olan bir prosesə çevrilmişdi. Yəni intervallar, daha çox avtobusların xətlərə buraxılması, dövlət müəssisələrində, özəl sektorlarda mərhələli, pilləli iş qrafikinin tətbiqi, işçilərin məhdud sayda işə cəlb olunmasını görə bildik. Yəni yay aylarında bütün bunların olması ictimai nəqliyyatda sıxlığın yüksəliş həddinə çatmamasına səbəb oldu".

"Dərhal metronun bağlanması ictimai nəqliyyatın, avtobus seqmentinin iflasına gətirib çıxartdı. Bu haradasa başa düşüləndir. Çünki insanlar işləyir, avtobusdan istifadə edirlər. Nazirlər Kabinetinin dövlət qurumları ilə bağlı qərarına görə, işçilərin say həddi 30 faizədək azaldılır. Bununla bağlı NK-nın özəl sektora tövsiyələri olsa da, görünən budur ki, özəl sektor bununla bağlı hələ ki qərar qəbul etməyib", - deyə ekspert əlavə edib.

A.Allahverənov deyir ki, pilləli iş rejimi ilə yanaşı, dövlət qurumlarına şamil olunan 30 faizin özəl sektora da şamil edilməsi, daha çox avtobusların xəttə buraxılması, intervalların azaldılması vacibdir ki, sıxlıq aradan qaldırılsın. Ekspert bildirir ki, bu məsələ kompleks şəkildə həll olunarsa, müəyyən nəticələr əldə edilə bilər.

Xatırladaq ki, pilləli iş saatı təcrübəsi 2016-cı ildə olmuşdu. Belə ki, I Avropa Oyunlarının keçirildiyi vaxtda, Nazirlər Kabineti bununla əlaqədar nəqliyyat vasitələrinin maneəsiz və təhlükəsiz hərəkətini təmin etmək, işçi qüvvəsinin və tamaşaçıların ictimai nəqliyyat sisteminin mövcud imkanlarından tam şəkildə istifadə etmələrinə şərait yaratmaq üçün sərəncam vermişdi. Sərəncama görə, bir aylıq müddətdə, yəni, mayın 1-dən iyulun 1-dək Bakıda fəaliyyət göstərən dövlət orqanlarında, dövlət müəssisə və təşkilatlarında çalışan işçilərin əmək funksiyalarını nəzərə almaqla, iş vaxtı rejimi pilləli şəkildə müəyyənləşib. Sərəncama əsasən, işçilərin 25 faizi üçün saat 8:00-dan saat 17:00-dək, işçilərin 25 faizi üçün saat 8:30-dan saat 17:30-dək, işçilərin 25 faizi üçün saat 9:00-dan saat 18:00-dək, 25 faizi üçünsə saat 9:30-dan saat 18:30-dək pilləli iş rejimi müəyyən edilmişdi. Bakı şəhərində fəaliyyət göstərən qeyri-dövlət müəssisə və təşkilatlarında çalışan işçilərin isə əmək funksiyalarını nəzərə almaqla, iş vaxtı rejiminin işçilərin 50 faizi üçün saat 8:00-dan saat 17:00-dək, işçilərin 50 faizi üçün saat 8:30-dan saat 17:30-dək pilləli şəkildə təşkili tövsiyə edilmişdi.

Qeyd edək ki, bir neçə gün öncə Azərbaycan Respublikası Nazirlər Kabinetinin müvafiq tapşırığına əsasən, dövlət qurumlarında çalışan işçilərin say həddi 30 faizədək azaldılaraq digər əməkdaşlar məsafədən iş rejiminə keçirilib. Özəl sektorda və digər sahələrdə fəaliyyət göstərən qurum və təşkilatlara eyni qaydanın tətbiq edilməsi tövsiyə olunur. Lakin indiki şəraitdə yollardakı sıxlığa nəzər yetirərək özəl sektorun bu tövsiyələrə nə dərəcədə əməl etdiyini demək çətindir.

47
Teqlər:
saat, , sıxlıq, yollardakı tıxac
Ermənistan ordusuna məxsus PUA

Azərbaycan Ermənistanın kəşfiyyat qurğusunu məhv etdi

0
(Yenilənib 17:58 26.10.2020)
Bu gün günorta saatlarında Ermənistan-Azərbaycan dövlət sərhədinin Daşkəsən rayonu sahəsində bölmələrimizin mövqeləri üzərində uçuş keçirməyə cəhd göstərən düşmən kvadrokopteri atıcı silahlardan açılan atəşlə məhv edilib.

BAKI, 26 oktyabr — Sputnik. Ermənistan silahlı qüvvələrinə məxsus kəşfiyyat kvadrokopteri məhv edilib. Sputnik Azərbaycan xəbər verir ki, bu barədə məlumatı Müdafiə Nazirliyi yayıb. 

"Azərbaycan Ordusuna məxsus zərbə PUA-nın cəbhə xəttində guya məhv edilməsi barədə Ermənistanın yaydığı məlumatın heç bir əsası yoxdur və yalandır.

Tam əksinə, bu gün günorta saatlarında Ermənistan-Azərbaycan dövlət sərhədinin Daşkəsən rayonu sahəsində bölmələrimizin mövqeləri üzərində uçuş keçirməyə cəhd göstərən düşmən kvadrokopteri atıcı silahlardan açılan atəşlə məhv edilib", - MN-in məlumatında deyilir. 

0