Bank əməliyyatçıları, arxiv şəkli

Onların savadsızlığı sahibkarlara baha başa gəlir

176
(Yenilənib 23:21 02.05.2017)
Ekspert: "Belə hallarda müştərilərə bankı dəyişməyi tövsiyə edirik"

BAKI, 2 may — Sputnik. Azərbaycan prezidentinin 2016-cı il 23 dekabr tarixli Fərmanı ilə təsdiq olunmuş "Nağdsız hesablaşmalar haqqında" Qanunun 3.3. maddəsinə görə, ƏDV məqsədləri üçün qeydiyyata alınmış vergi ödəyiciləri və vergi tutulan əməliyyatlarının həcmi ardıcıl 12 aylıq dövrün istənilən ayında (aylarında) iki yüz min manatdan artıq olan ticarət və (və ya) ictimai iaşə fəaliyyəti ilə məşğul olan vergi ödəyiciləri tərəfindən təqvim ayı ərzində ümumi məbləği 30 min manatdan, digər vergi ödəyiciləri tərəfindən isə təqvim ayı ərzində ümumi məbləği 15 min manatdan artıq olan hesablaşmalar üzrə ödənişlər yalnız nağdsız qaydada həyata keçirilməlidir. 

Qeyd edək ki, qanun 2017-ci il yanvarın 1-dən, digər vergi ödəyicilərinə münasibətdə isə 2017-ci il aprelin 1-dən qüvvəyə minib. Qanun tətbiqi bir çox banklarda çaşqınlıq yaradıb. Belə ki, bəzi banklar müştərilərin hesablarına yatırılan əmanətləri nağd şəkildə ödəməkdən imtina edir, bu vəsaitlərin ödənilməsi üçün müxtəlif sənədlər tələb edilər. 

Hərrac,arxiv şəkli
© Sputnik / Kirill Kallinikov

Belə bir problemlə Sputnik Azərbaycan-ın əməkdaşı da qarşılaşıb. Xidmət müqaviləsi ilə xidmət haqqı AFB Bankdakı VOEN əsasında açılmış hesabına yatırılsa da, əməkdaşımıza bankdan bildirilib ki, hesabına yatırılmış vəsaiti nağd şəkildə çıxarmaq üçün pulu göndərən orqanın dövlət müəssisəsi və ya dövlət payı olan müəssisə olub-olmaması araşdırılmalıdır və buna görə də xidmət müqaviləsinin surətini, pulu göndərən orqanın dövlət reyestrindən çıxarışını gətirmək lazımdır. Əməkdaşımız bankın tələblərini həyata keçirsə də, bankdan bildiriblər ki, müqavilə gün ərzində bankın "riskli əməliyyatlar departamenti" tərəfindən araşdırılacaq və ona məlumat veriləcək. Əməkdaşımız aradan bir neçə saat sonra yenidən banka müraciət edərək, hesabına köçürülmüş vəsaiti ala bilib.

İqtisadçı Əkrəm Həsənov Sputnik Azərbaycan-a açıqlamasında deyib ki, belə məsələlərdə banklar ifrata varır: "Bildiyiniz kimi bu ilin əvvəlindən "Nağdsız hesablaşmalar haqqında" qanun qüvvəyə minib. Həmin qanunda deyilir ki, dövlət təşkilatları, dövlət orqanları və s. ödənişləri nağdsız olub. Yəni, onlardan nağd şəkildə pul çıxarmaq olmaz. Amma bunu sizin bankınız deyil, pulu göndərən tərəfin bankı araşdırmalıdır. Ola bilər ki, pulu köçürən tərəfin sənədləri sizdə heç olmasın. Bu, sizdə olmamalıdır. Sizin bankın davranışı qanunsuzdur. Çünki pulu göndərən bank artıq bütün yoxlamaları həyata keçirib". 

İqtisadçı bildirib ki, hətta vergidən yayınma, qanun pozuntusu və s. hallar olsa belə bu, bankın deyil, vergi orqanlarının işidir: "Vergi yoxlamaları zamanı sizin və ya işlədiyiniz orqanın qanun pozuntusu olarsa, məsuliyyətə cəlb olunacaqsınız. Yoxsa bank hesabıma pul köçsün, bank bunu verməsin, bu, düzgün deyil. Bank sizdən sizin haqqınızda məlumat istəyə bilər. Çünki siz onun müştərisisiniz. Amma sizə pul köçürən haqqında məlumatı sizdən tələb etməsi qanunsuzdur".

Müsahibimiz qeyd edib ki, çox zaman belə problemlər bank işçilərinin savadsızlığından, yeni prosedurları yaxşı bilməməsindən irəli gəlir: "Maliyyə Bazarlarına Nəzarət Palatası Banklara qanunda olmayan çoxsaylı göstərişlər verir. Bəzi banklarda Maliyyə Bazarlarına Nəzarət Palatasının göndərdiyi məktublar düzgün başa düşülmür. Buna görə də bankın işçiləri qorxur və müştərilərdən aidiyyatı olmayan sənədlər tələb edirlər. Bu, tamamilə qanunsuzdur. Belə hallarda müştərilərə bankını dəyişməyi tövsiyə edirik".

176
Teqlər:
Əkrəm Həsənov
Əlaqədar
Banklarla bağlı müəmmalı vəziyyət
Bankların kaprizlərinə dözməkdən qurtuluruq
Mərkəzi Bankın banklarla əlaqəsi kəsilir
Azərbaycan banklarının müalicəyə ehtiyacı var
Azərbaycan bankları dollardan imtina etdi
Beynəlxalq Muğam Mərkəzinin səhnəsində tamaşa

Nizami Gəncəvi ilə Yunus Əmrənin ruhlarını birləşdirdilər

4
(Yenilənib 23:34 22.04.2021)
Qardaş ölkələr arasında mədəni körpülərin davam etdirilməsi üçün hər iki ölkənin tanınmış şairinin ortaq əsərləri əsasında ssenari yazılaraq, fərqli kompozisiya təqdim edilib.

Şahpəri Abbadova, Sputnik Azərbaycan

BAKI, 23 aprel — Sputnik. Bu il dahi şair və mütəfəkkir Nizami Gəncəvinin 880 illiyi münasibətilə ölkəmizdə "Nizami İli" elan edilib. Qardaş Türkiyədə isə bu il böyük şair və mütəfəkkir Yunus Əmrənin vəfatının 700-cü ildönümü qeyd edilir. Qardaş ölkələr arasında mədəni körpülərin davam etdirilməsi üçün hər iki ölkənin tanınmış şairinin ortaq əsərləri əsasında ssenari yazılaraq, fərqli kompozisiya təqdim edilib. Bu kompozisiya əsasında Azərbaycan Milli Konservatoriyası nəzdində İncəsənət Gimnaziyasının şagirdləri Nizami hikmətlərindən və Yunus Əmrədən olan seçmələri səsləndiriblər. Türkiyədə tanınan rəssam, kurator Günay Zebic (Mehdizadə) və Yunus Əmrə İnstitutunun hazırladığı təqdimat-tamaşanın məşqi Beynəlxalq Muğam Mərkəzinin səhnəsində nümayiş olunub. İki hissədən ibarət tamaşanın birincisi Yunus Əmrəyə, ikincisi Nizamiyə həsr olunub.

Bu barədə Sputnik Azərbaycan-a məlumat verən layihənin rəhbəri, tamaşanın ssenari müəllifi Günay Zebic Yunus Əmrə İnstitutu ilə birgə hər iki dahinin əlamətdar ildönümlərinə töhfə olaraq belə bir layihəni hazırlamaq qərarına gəldiyini bildirib:

"İstər döyüş meydanında, istər iqtisadi sahədə, istərsə də mədəniyyət aləmində qardaş ölkə Türkiyə ilə Azərbaycan öz həmrəyliyini, möhkəm şəkildə bağlı olduqlarını dünyaya bir daha sübut etdi. Biz də mədəni əlaqələrin daha da möhkəmləndirilməsi və mədəniyyət körpüsünün daha sağlam tellərlə bağlanması üçün hər iki ölkənin dəyərli sənətkarlarını bir araya gətirdik. Fərqli kompozisiya şəklində onu nümayiş etdirməyə çalışdıq. Düşündük ki, bunu tamaşa şəklində hazırlayıb, təqdim etsək, daha çox kütləyə çatmış olar. Bunu şagirdlərlə etməkdə məqsəd isə məhz onların təqdimatında məktəblilərə, şagirdlərə və gənclərə hər iki ölkənin dahi şairini tanıtmaq, əsərləri ilə tanış etmək onların mədəni irsimizdəki rolunu göstərməkdən ibarətdir. Çünki yetişən gənclik bizim dövlətimizin gələcək qurucularıdır. İlkin təməl bu işdə əsas rol oynayır. Bunun üçün maarifləndirməyə məhz onlardan başlamağı uyğun bildik".

© Photo : Courtesy of Lala Azeri
Beynəlxalq Muğam Mərkəzinin səhnəsində tamaşa

Zebicin sözlərinə görə, tamaşalarda hər iki dahinin yaradıcılığına toxunulub: "Nizami Gəncəvinin "Xəmsə"si, Yunus Əmrənin "Divan"ı və şeirlərindən istifadə etdik. Tamaşanın aktyor heyəti İncəsənət Gimnaziyasının şagirdləridir. Bu qrupla artıq beş ildir ki, çalışıram. Kollektivlə Türkiyə və Azərbaycanın qardaşlığına həsr olunan layihələr həyata keçirmişik. Bunlardan 2017-ci ildə Bursa şəhərində "Qardaş məktəb", "Azərbaycan Cümhuriyyətinin 100 illiyi və Qafqaz İslam ordusunun Bakıya gəlişi", 2019 Türkiyənin Kayseri şəhərində "Nəsimi 650" teatrı ilə Beynəlxalq XIV teatr festivalında iştirak etmişik. Bundan başqa 2020-ci ildə Qobu 3 parkında Xarı Bülbül İncəsənət mərkəzində COVID-19 "Biz Birlikdə Güclüyük" tablomun açılışı və "Xarı Bülbül" kiçik tamaşasını uğurla nümayiş etdirdik. Bir rəssam kimi mənə tablolarda gördüyüm kompozisiyaları səhnələşdirmək, onları ssenari şəklində yazmaq və səhnə geyimlərini yaratmaq böyük əhəmiyyət kəsb edir. Azərbaycanın Nizami Gəncəvisi və Türkiyənin Yunus Əmrə kimi böyük şairlərinin şeir və poemalarını canlandırmaq mənə qürür hissi verir. İndi iş prosesimizin demək olar ki, yarısından çoxunu bitirmişik. May ayının əvvəllərində tamaşaçılara bu layihəni televiziya vasitəsi ilə təqdim edəcəyik".

Bakıdakı Yunus Əmrə İnstitutunun rəhbəri Səlçuk Karakılıç qeyd edib ki, Türkiyənin böyük şairi Yunus Əmrənin nüfuz, təsir sahəsi o qədər geniş və dərindir ki, onu Anadoluya sığdırmaq mümkün deyil: "Böyük ruhların fərqli xüsusiyyətləri, yaşadıqları dövrü və mühiti aşaraq universal bir dil yarada bilmələridir. Niyə Yunus Əmrə səkkiz yüz ildən sonra da xatırlanır və dildən dilə ötürülür? Yunus Əmrəni böyük bir sənətkar edən və onu universal bir dilə gətirən əsas səbəb, dünyanı eyni anda anlamaq və şərh etmək bacarığı idi. Böyük ruhların ən fərqli xüsusiyyətləri, yaşadıqları dövrü və mühiti aşaraq universal bir dil yarada bilmələridir. Onun Türkiyədə çox sevilməsi, ayrıca hər dövrün özündə əks etdirməsi və davamlı istinad edilməsi sənətkarın dərinliyinin, böyüklüyünün göstəricidir. Hacı Bektaşi Vəli, Mövlana, Yunus Əmrə kimi türk dərvişləri, Asiya içindən gələrək Anadoluda tarixin ən əzəmətli təşkilatın quruluşunu imzaladılar, Türkiyə də qurulan belə bir universal dövlətdir".

© Photo : Courtesy of Lala Azeri
Beynəlxalq Muğam Mərkəzinin səhnəsində tamaşa

Səlçuk Karakılıç Yunus Əmrənin Anadolunun həqiqi memarlarından biri olduğunu, böyük sənətkarların dar mühitin deyil, daha geniş bir dünyanı izah etməyə çalışanlardan olduğunu bildirib: "Yunus Əmrə Türkiyədə olduğu kimi, Azərbaycanda da diqqətlə oxunur, haqqında araşdırmalar edilir. Bu il Yunus Əmrənin vəfatının 700-cü il dönümüdür, böyük şairimizi Azərbaycanda daha geniş kütlələrə izah etmək məqsədilə bir tamaşa ərsəyə gətirdik. "Yetmiş iki millətə bir gözlə baxmaq" Ümumdünya bəşəri dəyərlər prinsipi üzərində qurulmuş fəlsəfəsi ilə bütün bəşəriyyətlə danışan Yunus Əmrənin və Azərbaycan ədəbiyyatının böyük şairi Nizami Gəncəvinin xatirəsini anmağın uyğun olduğuna qərar verdik. Günay Zebiçin hazırladığı mövzunu əhatə edən tamaşanın bu günlərdə gənc nəsil üçün daha faydalı olacağını düşünürəm. Şübhəsiz ki, həm Yunus Əmrə, həm də Nizami Gəncəvi Türk dünyasının ortaq dəyərləridir. Bizim vəzifəmiz Yunus Əmrə və Nizami Gəncəvi kimi dövrünün böyük sənətkarlarını dəqiq təsvir etmək və onları yaşatmaqdır".

Qeyd edək ki, sözügedən layihənin nəinki Azərbaycanda, eyni zamanda Türkiyədə və Xorvatiyada festivallarda iştirakı da gözlənilir.

4
Aktyor Kamran Ağabalayev

Azərbaycanlı aktyor Türkiyənin məşhur serialından təklif aldı, amma qəbul etmədi

19
Qeyd edək ki, K.Ağabalayev Festivala Elvin Adıgözəlin "Biləsuvar" filmi ilə qatılıb. Festival aprelin 20-də başlayıb, 29-na kimi davam edəcək.

BAKI, 22 aprel — Sputnik. Aktyor Kamran Ağabalayev Türkiyənin məşhur "Kırmızı oda" serialından təklif alıb. Sputnik Azərbaycan xəbər verir ki, ekran işinə çəkilmə təklifi alsa da, o, gedə bilməyib. Buna səbəb isə hazırda "GoEast 2021" film festivalında olmasıdır.

Qeyd edək ki, K.Ağabalayev Festivala Elvin Adıgözəlin "Biləsuvar" filmi ilə qatılıb. Festival aprelin 20-də başlayıb, 29-na kimi davam edəcək. Aktyorun "Kırmızı oda"da çəkilmək üçün bu həftənin cümə günü İstanbulda olması istənilib.

19