Yelləncəkdə otumuş uşaq, arxiv şəkli

İnternat məktəbinin direktoru kimsəsiz uşaqlara olmazın işgəncələr verib

490
(Yenilənib 14:45 29.03.2017)
İnternat dramı: Uşaqları avtomobillərin arxasına bağlayıb sürüyürmüşlər...

İradə Cəlil, Sputnik Azərbaycan

BAKI, 29 mart — Sputnik. Çox zaman "internat uşağı" dedikdə, göz önünə atılmış, tərk edilmiş uşaqlar gəlir. Amma heç də hər zaman belə olmur. Bəzən internat evi seçim də ola bilir. Ata-anası olmayan birinin son "ümid yeri" kimi. 

Seymur da taleyini özü seçənlərdən olub. Valideynləri dünyasını dəyişdikdən sonra o, öz istəyi ilə "Ümid yeri" uşaq evinə gəlib. Və onun "internat" dramı da buradan başlayıb.

Seymur İslamov 1994-cü ildə Sumqayıtda anadan olub. Danışır ki, anasını 6 yaşı olanda itirib. Onu Mahaçqalada öldürüblər: "Anam alverlə məşğul olurmuş. Anam öldürüləndə mənim 6 yaşım olub. Eşitdiyimə görə, aldadıblar onu orada. Hər şeyini əlindən alıb, özünü də qatardan atıblar. Anamdan sonra qardaşım öldü. 21 yaşı var idi. Epilepsiya xəstəsi idi. Bir ildən sonra isə atamı itirdim. Yatdı, durmadı. Anamdan sonra çox fikir edirdi. Özüm əslən Coratdanam".

Seymur İslamov
© Sputnik / Irade JELIL
Seymur İslamov

Ailənin 7-ci övladı olan Seymur valideynlərini itirdikdən sonra bir müddət bibisigildə yaşayır. Amma sonra öz istəyi ilə uşaq evinə verilir. Deyir ki, iki qardaşı var və onlar əmilərinin yanında yaşayırlar: "Bilirdim ki, söz-söhbət var evdə. Bibimgilə artıq yük olmaq istəmirdim. Odur ki, "Ümid yeri" uşaq evinə verilməyimi istədim. Televizorda çox görmüşdüm "Ümid yeri"ni. Dedim, məni ora versinlər. Orada 4 il oxuduqdan sonra məni 11 saylı xüsusi internat məktəbinə verdilər. 11 illik təhsilimi bitirəndən sonra mənə də "Məzun evi"ndə ev verdilər".

Seymurun dediyinə görə, Bilgəhdə yerləşən 11 saylı internat məktəbində çox acı günlər yaşayıb. Məktəbin yeməkləri, müəllimlərin uşaqlarla davranışı, şəraiti bərbad imiş: "Mən ora 2004-2005-ci illərdə gəlmişdim. Uşaqları çox pis döyür, xarab yeməklər verirdilər. 2015-ci ilə qədər orada qalmışam. Məktəbi bitirmişdim, amma özləri məni orada saxlayırdılar. Qalmağa da yerim yox idi axı. Mən də az döyülməmişəm. Bir az səs-küy olan kimi müəllimlər düşürdülər üstümüzə, bizi çox döyürdülər".

Müsahibim deyir ki, internat məktəbinin xüsusi cəza növləri var imiş. Dizi üstə gəzməyə məcbur etmə, küncə qoyma, köhnə yemək vermə…

Seymur danışdıqca kövrəlir, ancaq özünü toparlayıb davam edir: "Elə anlarda adam düşünür ki, kaş öz atam-anam sağ olaydı. Bizim orada Mehparə Cəfərova adlı müdirimiz var idi. Çox qəddar qadın idi. Amma çox da davam edə bilmədi. Korrupsiyaya Qarşı Mübarizə İdarəsi gəldi, yoxlamalar aparıldı. Onu işdən çıxartdılar. Deyilənə görə, 2 milyon manat süd pulu mənimsəmişdi. O, uşaqlara da, müəllimlərə də çox əzab verirdi. Müəllimlərin başına öz "kabluk"u ilə vururdu. Uşaqları aparıb öz bağ evində işlədirdi. Çox əzab verirdi uşaqlara. Yanında Vadim adlı bir nəfəri gəzdirirdi. O oğlan da uşaqları çox incidirdi".

"Müdirin imkan yaratdığı, müdirlə əlbir olan müəllimlər çox idi internatda. Onlar da uşaqlara əzab verirdilər. Uşaqları kəmərlə döyürdülər. İndi oradan çıxmışam, deyirəm ki, mən də acı yaşamışam. Amma bir uşaq var, o, Lənkəran məktəbini bitirib. Deyir ki, orada uşaqları zəncirlə döyürdülər. O danışır ki, uşaqları torbalara salıb döyür, qaranlıq otaqlarda saxlayırmışlar. O uşağın danışığı adamın ürəyini ağrıdır. Deyir ki, uşaqları torbaya salıb, avtomobillərin arxasına bağlayıb, sürüyürmüşlər. Bizə onlara verilən kimi əzab verilməyib" — Seymur danışır.

Dediyinə görə, internatın müəyyən sirlərini bildiyi üçün direktor ondan çəkinirmiş: "Mən onların sirlərini bilirdim. Qorxurdular məndən. Mənə ayrıca otaq ayırmışdı. Təsəvvür edin, internata nəzir pal-paltar gətirilirdi kənardan, direktor onları siyahıya yazıb, büdcədən pul silirdi. Məktəbə nəzir kimi gətirilən qidalar siyahıya yazılır, pulu dövlət büdcəsindən silinirdi. Qidaları uşaqlara paylamırdılar, məcbur edirdilər ki, torpağa basdırsınlar. Uşaqlara verilmək üçün dönər gətirilirdi, onun da ətini təmizləyib, çörəklərini səhərlər verirdilər uşaqlara. Bəzən çörəklər günlərlə qaldığı üçün iylənirdi, kif atırdı. Biz şikayət edəndə deyirdilər ki, olan budur".

2015-ci ildə internatın direktoru dəyişir, o dəyişiklikdən sonra uşaqların vəziyyəti azacıq da olsa, düzəlir. İndi internat məktəblərinə xüsusi nəzarət olduğu üçün daha nəzirlər qəbul edilmir, uşaqlara dövlətin verdiyi yeməklər verilir. İnternat məktəbində kameralar quraşdırılıb, ciddi nəzarət var.

Seymur məktəbi bitirənə yaxın, internatda çalışan qadınlardan biri onu övladlığa götürür. Artıq 3 ildir ki, yeni ailəsi ilə yaşayan Seymurun sözlərinə görə, Yeganə xanım onu övladlığa götürəndən sonra bir müddət onunla kirayədə yaşayıb. Qadının Seymurdan başqa da iki övladı var. Qadın indinin özündə də internatda xadimə işləyir. 1 il 6 aydır ki, "Məzun Evi"ndə yaşayan Seymur deyir ki, heç yerdə işləməsə də, təqaüd alır və evi olduğu üçün rahatdır.

Gənc epilepsiya xəstəsidir. Bu xəstəlik uşaq vaxtı başı daşa dəydiyi üçün yaranıb onda. Müalicə alır: "İndi mənə, məni övladlığa götürən qadın baxır. Özüm 47 manat təqaüd alıram. Səhiyyə Nazirliyinə müraciət etmişəm ki, mənim sağlamlığımda problem var. Müalicə alıram. Epilepsiya üçün dərmanlar qəbul edirəm. Bundan əlavə, həkim müayinəsi də var. Çox xahiş edirəm, nazirlik mənim vəziyyətimlə maraqlansın".

Seymurun sevdiyi qız da olub, amma alınmayıb. Deyir ki, hələ ailə həyatı haqqında düşünmür. Xəyalları isə böyükdür. İşləmək, ev-eşik, ailə, övlad sahibi olmaq, avtomobil almaq, iş sahibi olmaq…

"Xəyallarla yaşayıram, mən də istəyirəm ki, hər şeyim olsun" — arzulayır Seymur.

Bu da bir insan həyatıdır. Əzablı həyat. Valideynləri olmadan ayaq üstə durmağa çalışan, mübarizə aparan bir gəncin taleyi.

490
Teqlər:
Mehparə Cəfərova, 11 saylı internat məktəbi, Seymur İslamov, ümid yeri, uşaq evi, internat, valideyn, ana, ata, uşaq
Əlaqədar
Bu bacıların həyatı bir film ssenarisidir
Xəzər bu ailədə 10 uşağı yetim qoydu
Bakıda kafe işlədən qadın: "Haram pulun bərəkəti olmaz"
Bakı kəndində zəncirvari intihar dalğası və açılmamış sirlər...
Sənətindən imtina etmiş “Kürdəxanılı balası”: “Yoldaşım getdi..., elə bil ölmüşəm”
Peyvənd, arxiv şəkli

Azərbaycanda hansı peyvənd sınaqdan keçirilir? Açıqlama

8
(Yenilənib 18:47 28.11.2020)
"Ümumdünya Səhiyyə Təşkilatı tərəfindən təsdiqlənmiş və tələblərə cavab verən peyvənd istehsal olunduğu təqdirdə Azərbaycan da təsdiqlənmiş peyvəndlə təmin olunacaq".

Zülfiyyə Quluyeva, Sputnik Azərbaycan

BAKI, 28 noyabr — Sputnik. Son günlər sosial şəbəkələrdə Azərbaycanda koronavirusa görə peyvəndin sınaqdan keçirildiyinə dair məlumat yayılıb. Məlumatlara görə, Azərbaycanda da dünyanın bir sıra ölkələrində uğurlu sayılan peyvəndlər sınaqdan keçirilir.

Sputnik Azərbaycan məsələyə aydınlıq gətirməyə çalışıb. Tibbi Ərazi Bölmələrinin İdarəetmə Birliyinin (TƏBİB) ictimaiyyətlə əlaqələr və PR-marketinq şöbəsinin məsləhətçisi Elnarə Baxış Sputnik Azərbaycan-a açıqlamasında Azərbaycanın hələlik koronavirusa qarşı heç bir ölkədən peyvənd almadığını deyib.

O bildirib ki, Ümümdünya Səhiyyə Təşkilatı tərəfindən təsdiqlənmiş və tələblərə cavab verən peyvənd istehsal olunduğu təqdirdə Azərbaycan da təsdiqlənmiş peyvəndlə təmin olunacaq.  Qeyd edək ki, sentyabrın 18-də İcbari Tibbi Sığorta üzrə Dövlət Agentliyi və GAVI (Global Alliance for Vaccines) təşkilatı arasında saziş imzalanıb.

Bu günədək koronavirusa qarşı Rusiya istehsalı olan “Sputnik V” peyvəndinin Belarusda aparılan klinik sınaqları 95% effektiv olub. Rusiyanın Minskdəki səfiri Dmitri Mezentsev “Rossiya 24” kanalına müsahibəsində deyib ki, sınaqlar 100 Belarus vətəndaşı arasında aparılıb:

“Rusiya istehsalı olan vaksininin yüksək effektivliyi özünü göstərib - təxminən 95%. Bu, çox əhəmiyyətli nəticədir”.

Onu da qeyd edək ki, Rusiyada orduda da koronavirusa qarşı peyvəndləməyə başlanılıb.

8
Kitablar, arxiv şəkli

Əsgərlərimiz arasında ən çox sevilən kitab bəlli oldu

15
(Yenilənib 18:43 28.11.2020)
Yaralı əsgərlərin istəyini nəzərə alaraq, onları maraqlandıran kitabları toplayıb hospitallara göndəriblər.

Nigar İsgəndərova, Sputnik Azərbaycan

BAKI, 28 noyabr — Sputnik. Hazırda hospitallarda müalicə alan qazilərimizin vaxtlarını daha maraqlı keçirilməsi üçün yeni aksiyaya start verilib.

Aksiyanın rəhbəri Qəmər Babayevanın Sputnik Azərbaycan-a verdiyi məlumata görə, bu aksiyaya başlamasının səbəbi sosial şəbəkədə gördüyü paylaşım olub.

"Paylaşım yaralı əsgərimizin Den Braunun "Da Vinçi şifrəsi" kitabını istəməsi haqda idi. Kitabı alaraq əsgərə göndərdik. Ondan sonra düşündüm ki, yəqin digər yaralı əsgərlər də hər hansı kitabı əldə edib oxumaq istəyərlər. Əsgərimizin yatdığı həmin hospitalda bir tanış tapdım və beləcə, bu aksiyaya start verdik. Palatada yaralı əsgərlərin sayı çox idi. Biz onların istəklərini öyrəndik. Onlar da kitab hədiyyə olunmasını istədiklərini dedilər", - Babayeva bildirib. 

Azərbaycan Əmək və Sosial Münasibətlər Akademiyasının "Mühasibat uçotu və audit" ixtisasını bitirən və "Xaricdə çörək" layihəsinin rəhbəri olan Qəmər Babayevanın sözlərinə görə, qazilərimizin əksəriyyəti dedektiv janrda olan kitablara maraq göstərirlər.

"Əsgərlərimiz arasında Den Braunun "Da Vinçi şifrəsi" kitabına maraq daha çoxdur. Biz onlara xarici dedektivlərin kitabları ilə yanaşı, müxtəlif stolüstü oyun vasitələri də aparaq. Düşünürəm ki, bu aksiya onlara mənəvi dəstək və motivasiya vermiş oldu", - deyə Babayeva bildirib.  

Onun sözlərinə görə, bu aksiyaya dəstək verənlər arasında Azərbaycanda yaşayanlarla yanaşı, xaricdə yaşayan soydaşlarımız da dəstək verib. Onlar hesaba pul yatırmaqla öz dəstəklərini nümayiş etdiriblər.

15
Xudavəng monastırı, arxiv şəkli

Müdafiə Nazirliyi Vəng kəndindən möhtəşəm videogörüntülər paylaşıb

41
(Yenilənib 20:26 28.11.2020)
Noyabrın 28-də Müdafiə Nazirliyi Kəlbəcər rayonunun Vəng kəndindən videogörüntülər hazırlayaraq ictimaiyyətə təqdim edib.

BAKI, 28 noyabr - Sputnik. Müdafiə Nazirliyi noyabrın 28-də Kəlbəcər rayonunun Vəng kəndindən videogörüntülər hazırlayaraq ictimaiyyətə təqdim edib.

Qeyd edək ki, Azərbaycan, Rusiya və Ermənistan liderlərinin Qarabağ üzrə üçtərəfli bəyanatı 2020-ci il noyabrın 10-da imzalanıb. Azərbaycan Respublikasının Prezidenti İlham Əliyev və Rusiya Federasiyasının Prezidenti Vladimir Putin Dağlıq Qarabağ münaqişə zonasında 2020-ci il noyabrın 10-u saat 00:00-dan etibarən bütün hərbi əməliyyatların dayandırılması və tam atəşkəs barədə bəyanat veriblər.

Sənədin digər müddəalarına əsasən, 2020-ci il dekabrın 1-də Laçın rayonu Azərbaycana qaytarmalıdır. Bununla yanaşı, təmas xətti və Laçın dəhlizi boyunca Rusiya Federasiyasının sülhməramlı kontingenti yerləşdirilir. Paralel olaraq Ermənistan silahlı qüvvələri işğal olunmuş ərazilərdən çıxarılır.

Tərəflərin razılığına əsasən, yaxın üç ildə Laçın dəhlizi üzrə Xankəndi ilə Ermənistanın əlaqəsini təmin edəcək yeni hərəkət marşrutunun tikintisinin planı müəyyən olunacaq. Daxili məcburi köçkünlər və qaçqınlar BMT-nin Qaçqınların işləri üzrə Ali Komissarının nəzarəti altında Dağlıq Qarabağın və ətraf rayonların ərazisinə qayıdacaqlar. İqtisadi və nəqliyyat əlaqələrinin bərpa olunacağı gözlənilir. Ermənistan Respublikası vətəndaşların, nəqliyyat vasitələrinin və yüklərin hər iki tərəfə maneəsiz hərəkətinin təşkil olunması məqsədi ilə Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqəsini təmin edəcək.

41