Aleksey Miroşniçenko

Həyat bir uşağa qarşı bundan artıq amansız ola bilməzdi...

977
"Döyülürdüm, incidilirdim. Uşaq idim, qaranlıqdan qorxurdum. Gecələr yuxudan oyadıb həyətə çıxarırdılar..."

İradə Cəlil, Sputnik Azərbaycan

BAKI, 7 fev — Sputnik. Deyirlər, insan Allahın yaratdığı ən mükəmməl varlıqdır. Və insan nəyisə əldə etmək istəyirsə, bunu azacıq qüvvə sərf edərək əldə edə bilər. Bu, həqiqətən də belədir. Ən azından buna, körpəlikdən tərk edilmiş, uşaq evlərində, müxtəlif ailələrdə böyümüş İlqara baxanda əmin olmaq olur.

İlqarın 24 yaşı var, ailəsini xatırlamır. Bircə onu bilir ki, "ana" bildiyi qadın xərçəng xəstəliyindən dünyasını dəyişib. İlqar adı da o qadının yadigarıdır. Sənədlərində əsl adı Miroşniçenko Alekseydir.

Aleksey — İlqar Məzun Evinin sakinlərindəndir. Sakit təbiəti, davranışları ilə digərlərindən fərqlənir. Bu yazının ortaya çıxması üçün günlərlə İlqarla danışdım. Həyatının hər anını öyrənmək istədim. Tərk edilməsini, müxtəlif ailələrdə yaşamasını, döyülməsini, incidilməsini, ailə deyib sahiblənmək istədiyi insanların laqeydliyini öyrənmək istədim. İlqar da bütün həyatını paylaşdı mənimlə. Küçədə yatdığı günlərdən, tək qaldığı zamanlardan danışdı. Sizə İlqarın həyatından müəyyən hissələri təqdim edirəm. Bu dünyada hər şeydən çox ümidi olan İlqarın…

Uşaqlığını belə xatırlayır: "4-5 yaşım olardı. Xudatda sadə bir ailədə yaşayırdım. Ailədə iki nəfər də qız uşağı vardı. İsti, mehriban ailə idi. Arada qonşular deyirdilər ki, "bunlar sənin öz ailən deyil". Anamın adını da çəkirdilər. Mən uşaq idim, heç nə başa düşmürdüm. Mənə orada "İlqar" deyirdilər. Bir müddət sonra anam xəstələndi. Dedilər, xərçəng xəstəliyinə tutulub. Həyətdəki mal-qaranı da satdılar onu sağaltmaq üçün. Amma olmadı. Bir gün onu itirdik. Mədinə anamı itirəndən sonra başladı mənim əsl hekayəm…"

Aradan 6-7 ay keçəndən sonra qapıya bir maşın gəlir. İlqara gələn adamların onun ailəsi olduğunu deyirlər. İlqar evi bildiyi, ailəsi bildiyi insanlardan ayrılmaq istəməsə də, onu məcbur bu ailəyə verirlər. Bir müddət Qusarda o ailədə yaşayandan sonra İlqarı əvvəlki ailəsinə qaytarırlar.

"Ata bildiyim adamın adı Azay idi. Azay gəlib məni götürdü, "sənədlərini yığmalıyam" dedi. Sonra məni tanımadığım bir evə gətirdi. Yaşlı adamlar idi. Bütün günü mənimlə mehriban davrandılar. Axşam Azay gəlib məni ordan götürdü, evinə apardı. Azay evlənmişdi" — deyə İlqar xatırlayır.

O, bu evdə bir həftə qaldıqdan sonra Azay onu Bakıya gətirərək, Günəşlidəki 2 saylı Uşaq Evinə qoyur. İlqar ikinci sinifə qədər təhsil alsa da, sənədləri qaydasında olmadığı üçün birinci sinifi təkrar oxumağa başlayır. Həmin vaxt icra hakimiyyətində işləyən bir qadının diqqətini cəlb edir. Qadın bütün həyatı boyu İlqarla maraqlanmağa başlayır.

Dediyinə görə, o vaxtlar uşaqları himayəyə verirmişlər: "Himayəyə götürülən uşaqlar həmişə gəlib yaxşı ailəyə düşdüklərini deyirdilər. Danışırdılar ki, onlara yaxşı baxırlar. Bir gün müdiriyyət mənə dedi ki, "səni də övladlığa götürmək istəyilər, getmək istəyirsənsə, gəl ərizə yaz". Yazdım. Gələn ailə deyirdi ki, guya məni uşaqlıqda gətirib bura qoyublar, əsl ailəm budur. Bilirdim, yalan deyirlər, amma özümü inanmış kimi göstərirdim. Bizə internatda qayğı göstərirdilər. Amma heç bir qayğı ata-ana qayğısının yerini vermir".

İki məhkəmə prosesindən sonra İlqar yeni ailəyə verilir. İlk 3 ayı bu ailədə xoşbəxt olduğunu deyən İlqar danışır ki, əsl problemləri də elə bu ailədə başlayır: "Ailə "Vosmoy bazarı"nda alver edirdi. Məni oxumağa qoymadılar, yanlarında aparıb-gətiridilər, işlədirdilər. 12 yaşım vardı. Bəzən qadın əsəbiləşir, məni qovurdu. Bir il sonra məni səhər tezdən bazara tək göndərirdilər ki, "get, vitrini aç". Qadın tez-tez əsəbləşirdi. Hər əsəbləşəndə də hirsini məndən çıxırdı, qovurdu. Yemək də vermirdilər. Gedirdim meyvə bazarında yeşikləri satır, özümü doyururdum. Gəlib görürdüm ki, özləri yemək alıb yeyirlər, mənə vermirlər".

"Döyülürdüm, incidilirdim. Uşaq idim, qaranlıqdan qorxurdum. Elə vaxt olurdu ki, gecə durğuzub deyirdi ki, "get həyətdə yat". Gecələrimin çoxu həyətdə yatmaqla keçirdi. Qadın qarlı günlərdə çıxarırdı məni həyətə, özü dayanıb pəncərədən baxırdı. Elə əzab çəkə-çəkə həyətdə yatmağı da öyrəndim" — müsahibimiz danışır.

İlqar bildirir ki, bu ailədə əvvəl gündən yatağı olmayıb. Qadın ona bir yorğan veribmiş ki, mətbəxə sal, yat. İlqar elə düşünürmüş ki, ailə belə də olmalıdır. Dözürmüş. İcra hakimiyyətindəki qadın tez-tez gəlib İlqarın vəziyyəti ilə maraqlanırmış: "Evdən pul itdi — mən döyülürdüm, əsəbləşirdilər — mən döyülürdüm. Qısası, nə olsaydı, İlqar günahkar idi. Mənə verdikləri yemək bir parça çörək, bir az da şor idi".

Uşaq o ailədə su şlanqı ilə döyülür, başına sarımsaq əzənlə vururlar, belində oxlov sındırırlar. Amma dözür. Evdə ara-sıra telefon söhbətləri zamanı İlqar geri qaytarılacağını eşidir, amma inanmaq istəmir. Bir gün ailə rayona gedəndə İlqarı da özləri ilə aparırlar. İlqara deyirlər ki, qal burada, bir az istirahət elə. İlqar 15 gün orada qaldıqdan sonra ailənin istəyi ilə geri qayıdır. Ancaq vəziyyət yenə əvvəlki kimi davam edir.

Bir müddət sonra İlqar məhkəmə yolu ilə yenidən geri qaytarılır. İcra hakimiyyətində işləyən qadın onu məhkəmə prosesi getdiyi müddətdə Suraxanı rayon əqli cəhətdən zəif olan uşaqlar üçün müəssisəyə qoyur. İlqar bir neçə ay orada qalır və məhkəmə qərarı ilə Maştağa internat evinə göndərilir. Nə qədər qəribə olsa da, İlqar həyatının gözəl günlərinin burada keçdiyini deyir. İdmanla məşğul olmağa başlayır, yarışlarda iştirak edir.

"Həyatdan bezmişdim. Mənim də ailəmin olmasını istəyirdim. Belə anlarda İcra Hakimiyyətində çalışan qadın "hər şey yaxşı olacaq" deyirdi. Məktəbin direktoru Vüqar müəllim dövlət tədbirlərinə məni göndərirdi. 2011-ci ildə Ümümrespublika Forumunda iştirak etdim, sonra moderator oldum. Bir neçə tədbirlərdə iştirak etdim, "Azərbaycanın Gələcəyi" mükafatını aldım. Bir məqsədim vardı — oxumaq, irəli getmək, qazanmaq" — o danışır.

O, sonralar hərbi xidmətini başa vurur, serjant rütbəsi qazanır. Bir müddət onu övladlığa götürən məshəti türklərinin də yanında yaşayır. Amma yenidən Bakıya qayıdır. Özünü burada tapır, "Məzun evi"ndə çalışır. Gələcəyə ümidləri böyükdür. Bir ailəsi olmasını arzulayır. Təmiz duyğuları, düşüncələri var. Bəlkə İlqar valideyn qayğısı görməyib, amma dövlət qayğısını hər zaman hiss edib. Və söhbət zamanı, ona ana kimi dəstək olan qadını dönə-dönə xatırlayır. Adını deməsə də…

Bu da bir insan həyatıdır — qürurlu, gələcəyə ümidli bir gəncin həyatı. Bəlkə də bu, övladından imtina edən valideynlərə bir mesajdır: "Siz olmasanız da, biz ayaq üstəyik, varıq, yaşayırıq və sizdən daha yaxşı valideyn olacağıq" mesajı…

977
Teqlər:
Qusar, İlqar, ailə, həyat, ana, ata, uşaq
Əlaqədar
Əməkdar artist: “Bu gün həyatda özümə yer tapa bilmirəm"
Onun ən böyük arzusu həyata keçdi
Qızının ölümü onun həyatını alt-üst etdi
Bakıda kafe işlədən qadın: "Haram pulun bərəkəti olmaz"
Qardaşı da onu axtarır, həyat yoldaşı da: biri öldürmək üçün, digəri...
Öz gələcəyindən kəsib valideynlərinin bu gününə "calayan" uşaq
Həblər, arxiv şəkli

Hər birimizin köməyinə çatan dərmanlarla bağlı qorxunc xəbərdarlıq - öldürə bilər

9
(Yenilənib 16:21 26.11.2020)
"Hər xəstəliyə antibiotik istifadə edilə bilməz. Bəzən insanlar özləri özlərini antibiotiklərlə müalicə edirlər. Ona görə də antibiotiklər reseptsiz buraxılmamalıdır"

Zülfiyyə Quluyeva, Sputnik Azərbaycan

BAKI, 26 noyabr — Sputnik. Azərbaycanda antimikrob dərmanların apteklərdə əhaliyə sərbəst satışı qadağan olunmalıdır. Bununla bağlı dövlət qurumları lazımi dəstək verməlidir. Bunu Ümumdünya Səhiyyə Təşkilatının (ÜST) Azərbaycandakı nümayəndəliyinin rəhbəri Hande Harmancı deyib. Onun sözlərinə görə, bu preparatlara əlçatanlığını azaltmaq lazımdır. "İnsanların antibiotiklərə qarşı davamlılığı ölçülməlidir. Bunun üçün Azərbaycanın lazımi laboratoriyaları var. Həmçinin, maarifləndirmə də olmalıdır. Bu gün apteklərdə hər kəs istənilən antibiotiki ala bilər. Bu cür dərmanlar açıq satışda var və buna heç bir nəzarət yoxdur. Bu, bizim problemimiz idi".

Qeyd edək ki, antibiotiklər yüngün soyuqlama zamanı hər birimizin köməyinə çatır. Ona görə də antibiotiklərin reseptlə satılması əhali tərəfindən birmənalı qarşılanmır. Sputnik Azərbaycan antibiotiklərin reseptsiz satışının fəsadlarını araşdırıb.

Professor Adil Qeybulla Sputnik Azərbaycan-a açıqlamasında antibiotiklərin reseptsiz satışının məhdudlaşdırılması ilə bağlı təklifləri dəstəklədiyini bildirib. A.Qeybulla deyir ki, apteklərdə antibiotiklərin reseptsiz satışı qanunda olan boşluqdan irəli gəlir. Onun sözlərinə görə, xarici ölkələrdə antibiotiklər reseptlə satılır:

"Antibiotiklərin həkim təyini olmadan istifadəsi çox risklidir. Bu, hətta ölümə belə gətirib çıxardır. Koronavirusun müalicəsində antibiotiklərdən istifadə məsləhət görülmür. Çox təəssüf ki, insanlar evdə müalicə zamanı kortəbii antibiotiklərdən istifadə edirlər. Bu isə anafilaktik şok, allergik təsirlər göstərə bilər. Antibiotiklərdən həkim təyinatı olmadan istifadə qulağı kar edə, böyrək problemlərinə səbəb ola bilər. Sovet dövründə antibiotiklərdən istifadə geniş yayılmışdı. İndi də bəzi insanlar həkim təyinatı olmadan antibiotikləri alaraq istifadə edirlər. Təbii ki, buna son qoyulmalıdır".

Səhiyyə Nazirliyinin İctimai Səhiyyə və Sanitariya-Epidemioloji Nəzarət Şöbəsinin müdiri Nəzifə Mürsəlova Ümumdünya Antimikrob Preparatlardan Düzgün İstifadəyə dair Maarifləndirmə Həftəsinə həsr olunmuş virtual mətbuat konfransında bildirib ki, hazırda antibiotiklər reseptlə buraxılan dərmanlar sırasındadır: "Bu gün apteklərdə hər kəs istənilən antibiotiki ala bilər. Bu cür dərmanlar açıq satışda var və buna heç bir nəzarət yoxdur. Bu, bizim problemimiz idi. Bu məsələ qanunvericilikdə tənzimlənir, təəssüf ki, bu tənzimlənmə kağız üzərində qalır. COVID-19 dövründə problem daha da artdı. Bu qanunvericiliyin yerlərdə işləməsi istiqamətində işlər gücləndirilməli, ona nəzarət artırılmalıdır. Dövlət səviyyəsində bu məsələyə sərt nəzarət olmalıdır".

Koronavirusdan ölüm artır - Səbəblər virusun özü qədər qorxuludur>>

Milli Məclisin Səhiyyə komitəsinin üzvü, deputat Müşfiq Məmmədli Sputnik Azərbaycan-a açıqlamasında bildirib ki, antibiotiklərin satışı "Əhalinin sağlamlığının qorunması haqqında" qanunla müvafiq qaydada tənzimlənir:

"Bu, qanunvericilikdə olan hər hansı boşluq yox, qanunun icrası ilə bağlı problemdir. Qanunların icra müxanizmi NK-nın müvafiq qərarları ilə tənzimlənir. Ola bilər ki, bu məsələ də icra mexanizmində yaranan anlaşılmazlıqla bağlı ola bilər. Qanun antibiotiklərin satışını kifayət qədər tənzimləyir. İşçi qaydada təlimatlarla bu məsələyə baxılmalıdır", - deyə deputat bildirib.

M.Məmmədli bildirir ki, antibiotiklərin kortəbii təyini mənfi təsirə səbəb ola bilər. Koronavirusla mübarizədə isə bu, daha təhlükəlidir: "Çünki koronavirusa yüngül yoluxmada müalicə əsasən orqanizmin gücləndirilməsi, immun sisteminin möhkəmləndirilməsi ilə bağlı aparılır. Antibiotiklərdən istifadə isə orqanizmi, immun sistemini zəiflədir. Bu, o demək deyil ki, xəstələrə antibiotik ümumiyyətlə təyin olunmamalıdır. Sadəcə olaraq bunun üçün tibbi göstəriş olmalıdır. Hər xəstəliyə antibiotik istifadə edilə bilməz. Bəzən insanlar özləri özlərini antibiotiklərlə müalicə edirlər. Ona görə də antibiotiklər reseptsiz buraxılmamalıdır. Bu, beynəlxalq təcrübəyə əsaslanır. Antibiotiklər həkimlərin təyinatı ilə resept əsasında satılmalıdır".

9
Teqlər:
Müşfiq Məmmədli, Nəzifə Mürsəlova, Adil Qeybulla, antibiotik, Koronavirus, epidemiya, COVID-19
Koronavirus testi, arxiv şəkli

TƏBİB Azərbaycanda koronavirus testlərinin bitməsi barədə məlumatlara aydınlıq gətirdi

10
(Yenilənib 19:41 26.11.2020)
Bu problemin aradan qaldırılması məqsədilə, simptomsuz təmaslılardan testlərin götürülməsinə müvəqqəti məhdudiyyət qoyulması qərara alınıb.

BAKI, 26 noyabr - Sputnik. Azərbaycanda koronavirus (COVID-19) ilə əlaqədar aparılan testlərin bitməsi barədə yayılan məlumatlar həqiqəti əks etdirmir.

Bu barədə Sputnik Azərbaycan-a TƏBİB-dən məlumat verilib. 

"Bildiririk ki, ölkəmizdə koronavirusun diaqnozu üçün kifayət qədər test ehtiyatı mövcuddur. Sadəcə olaraq, gün ərzində götürülən testlərin sayı çox olduğundan bu, laboratoriyaların iş gücünə təsir göstərir. Nəticədə, təbii olaraq testin nəticələri bir qədər gecikmiş olur", - TƏBİB bildirib.

Məlumatda o da qeyd olunub ki, bu problemin aradan qaldırılması məqsədilə, simptomsuz təmaslılardan testlərin götürülməsinə müvəqqəti məhdudiyyət qoyulması qərara alınıb.

"Hazırda ölkədə 37 laboratoriya mövcuddur. Bu laborotoriyalarda gündəlik 10 000 testin aparılması nəzərdə tutulurdu, artıq müraciətlərin sayı çox olduğundan gün ərzində laboratoriyalara daxil olan test nümunələri nəzərdə tutulduğundan 2 dəfə (19178 test) artıb", - deyə məlumatda bildirilir. 

10
Teqlər:
test, korona virusu, Koronavirus, epidemiya, COVID-19, Tibbi Ərazi Bölmələrini İdarəetmə Birliyi, TƏBİB

Rusiyalı sülhməramlılar Laçın dəhlizində təhlükəsizliyə necə nəzarət edirlər video

0
(Yenilənib 15:04 26.11.2020)
Rusiyalı sülhməramlıların Laçın dəhlizi ilə nəqliyyat hərəkətinin təhlükəsizliyini necə təmin etdiyini videoda izləyin.

Dağlıq Qarabağda Rusiya sülhməramlıları üçtərəfli sülh razılığı və atəşkəs rejiminin təmin edilməsinə nəzarət edir. 

Hərbçilər təmas xəttində yerləşən 23 müşahidə məntəqəsindən vəziyyəti gecə-gündüz müşahidə edir. Sülhməramlılar həm də Laçın dəhlizi boyunca hərəkətin təhlükəsizliyini təmin edirlər.

Kəlbəcərə ilk daxil olan Azərbaycan hərbçiləri - FOTOLAR>>

İstehkamçılar hərbi əməliyyatlardan zərər çəkən əraziləri minalardan təmizləyirlər. Mühəndis bölmələri yolları təmizləyir, bölgədə nəqliyyat hərəkətinin tənzimlənməsinə yardım edir, habelə yaşayış məntəqələrinin su, enerji və istilik tədarükünü bərpa edir.

0