Qaz və işığın qiymətinin qaldırılması ilə bağlı yeni təklif verildi
(Yenilənib 15:00 04.12.2016)
Fəzail Ağamalı: "Heç olmasa, əhaliyə verilən təbii qaz və elektrik enerjisi ilə bağlı kvotalar artırılsın"BAKI, 2 dek — Sputnik. "Əgər biz qeyri-neft sektorunun inkişafından söhbət açırıqsa, bu, ilk növbədə kənd təsərrüfatının tərəqqisi ilə bağlıdır. Ancaq 35 milyon manat lizinq yolu ilə kənd təsərrüfatına, yəni, sahibkarlıq üçün vəsait ayrılıb. Bununla da heç nə etmək mümkün deyil".
Sputnik xəbər verir ki, bunu millət vəkili Fəzail Ağamalı, parlamentdə büdcə müzakirələri zamanı deyib. Millət vəkili bildirib ki, enerji daşıyıcılarının qiymətlərinin Tarif Şurası tərəfindən artırılması kənd təsərrüfatı məhsullarının ilkin emalına ciddi zərbələr vuracaq: "Həm süd, həm ət məhsulları istehsal edən müəssisələrin, tərəvəz hazırlayan müəssisələrin ümumi gedişinə çox ağır, ciddi zərbələr vuracaq. Əgər sahibkar ayda 25 min manat tərəvəz istehsalına görə qaz pulu ödəyirdisə, indi onun miqdarı 50 min manat olacaq".
"Bu gün ölkə xaricindən alınan bütün avadanlıqlar dollarla alınır — gübrələr də. İstixanalarda güzəşt yoxdur. Onun da qiyməti artıb. Artıq təsəvvür edin ki, 7 ay ərzində Azərbaycanda tərəvəz məhsullarının istehsalında çox ciddi problemlər yaranacaq. Təəssüf ki, bunun nəticələrini görəcəyik", — millət vəkili qeyd edib.
O, təklif edib ki, ən azından, Tarif Şurası vətəndaşlara qazın və işığın verilməsi ilə bağlı kvotaları artırsın: "250 kilovat-saat əvəzinə 500 kilovat-saat, 1500 kubmetr əvəzinə 3000 kubmetr qazın verilməsi yaxşı olardı. Çünki, kəndlərdə insanlar qışda, ancaq qaz ilə isinirlər. Kvota buna bəs etmir. Bakıda da vahid istilik sistemi olmadığına görə, yenə bu problem var. Ona görə də Tarif Şurası kvotaların artırılmasına baxsa, yaxşı olar".
Xırdalanda partlamış evin dağıntıları altından qadın meyiti çıxarılıb
(Yenilənib 00:34 26.01.2021)
Dağıntılar altından bir nəfərin cəsədi çıxarılıb. Həmin şəxsin 1988-ci il təvəllüdlü Musayeva Aytən Tacəddin qızı olduğu bildirilir.BAKI, 26 yanvar - Sputnik. Xırdalanda partlayışda həlak olan qadının nəşi dağıntılar altından çıxardılıb.
Sputnik Azərbaycan-ın məlumatına görə, Xırdalanda baş verən partlayışda 1988-ci il təvəllüdlü Aytən Tacəddin qızı Musayeva faciəli şəkildə dünyasını dəyişib. Bu barədə Sputnik Abşeron MRX-nın direktoru Mehriban Qaralova məlumat verib. O, bildirib ki, Xırdalanda baş vermiş hadisə nəticəsində 6 nəfər müxtəlif dərəcəli bədən xəsarətləri ilə xəstəxanaya yerləşdirilib, onlardan biri uşaqdır.
Partlayış zamanı xəsarət alanlardan biri Musayev Vüsal Firuddin oğlunun həyat yoldaşı Aytən Musayeva dağıntılar altından ölü tapılıb. Onun azyaşlı qızının axtarışları davam edir. Oğlu 10 yaşlı Musayev Firuddin Vüsal oğlu və həyat yoldaşı xəstəxanada müalicə alırlar.
Partlayış zamanı xəsarət alanlar 1983-cü il təvəllüdlü Musayev Vüsal Firuddin oğlu, onun 10 yaşlı oğlu, 2009-cu il təvəllüdlü Musayev Firuddin Vüsal oğlu, 8 yaşlı qızı, 2012-ci il təvəllüdlü Musayeva Fatimə Vüsal qızı, Musayeva Ziyafət Qafar qızı və Gözəl Səmədovadır.
Dağıntılar altından çıxarılan digər şəxslər 1968-ci il təvəllüdlü Ələzova Simayə Mövlud qızı, 2006-cı il təvəllüdlü Şükürzadə Xədicə Bəxtiyar qızı, 1989-cu il təvəllüdlü Əliyev Emil Arif oğlu və 1988-ci il təvəllüdlü Hüseynov Arif Əbülfəz oğludur.
Qeyd edək ki, 25 yanvar 2021-ci il tarixində Fövqəladə Hallar Nazirliyinin "112" qaynar xəttinə Abşeron rayonu, Xırdalan şəhəri, 27-ci məhəllə adlanan ərazidə uçqunla nəticələnən partlayış hadisəsinin baş verməsi barədə məlumat daxil olub.
FHN-dən Sputnik Azərbaycan-a verilən məlumata görə, dərhal əraziyə FHN-in müvafiq xilasetmə qüvvələri cəlb olunub. Əməliyyat şəraiti qiymətləndirilərkən məlum olub ki, uçqun ikimərtəbəli fərdi yaşayış evində baş verib.
Partlayış dalğasının təsirindən yaxınlıqdakı binaların şüşələri sınıb. FHN-in əməkdaşları tərəfindən operativ axtarış-xilasetmə əməliyyatı davam edir.
Xırdalanda dağıntılar altından xilas edilənlərin sayı artır
BAKI, 25 yanvar — Sputnik. Abşeron rayonu, Xırdalan şəhəri, 27-ci məhəllə adlanan ərazidə yerləşən və partlayış nəticəsində uçqun baş vermiş ikimərtəbəli fərdi yaşayış evində Fövqəladə Hallar Nazirliyinin qəza-xilasetmə qüvvələri tərəfindən axtarış-xilasetmə əməliyyatı davam etdirilir.
APA xəbər verir ki, görülmüş operativ tədbirlər nəticəsində FHN-in xilasediciləri tərəfindən dağıntı altından daha bir nəfər xilas olunaraq aidiyyəti üzrə təhvil verilib. Bununla da xilasedicilər tərəfindən xilas edilmiş vətəndaşların sayı 6-ya çatıb.
Axtarış-xilasetmə əməliyyatı davam edir. Əlavə məlumat veriləcək.