Sosial şəbəkə

"Onun-bunun adından dövlət başçısını təhqir edirlər"

93
Deputat sosial şəbəkədə təhqir və böhtana görə cəzalandırmanın tərəfdarıdır, hüquqşünas isə...

BAKI, 18 noy — Sputnik. Milli Məclisin Hüquq siyasəti və dövlət quruculuğu komitəsi plenar iclasa, Cinayət Məcəlləsinə dəyişiklik edilməsi ilə bağlı təkliflər göndərib. Sözügedən layihə qəbul olunarsa, Azərbaycanda sosial şəbəkələrdə saxta profillərlə, başqa şəxslərin adları və saxta adlarla yalan xəbər, məlumat yayanlar, təhqiramiz fikirlər, təhlükəli çağırışlar edənlər cinayət məsuliyyətinə cəlb ediləcəklər.

Millət vəkili Fəzail Ağamalı həmin layihəni Sputnik-ə şərh edərkən, qanunvericiliyə belə bir dəyişiklik etməyin vacib olduğunu deyib: "Bəlli olduğu kimi, son vaxtlar sosial şəbəkələrdə saxta profillər yaradaraq, eyni zamanda ayrı-ayrı şəxslərin adlarını öz ad və soyadları kimi göstərməklə, Azərbaycan vətəndaşlarının, habelə ölkə Prezidentinin şərəf və ləyaqətinə hörmətsizlik edirlər, böhtanlar yağdırırlar. Belə olan halda qanunvericilikdə müəyyən dəyişiklik edilməli idi".

"Mövcud qanunvericiliyə edilməsi təklif olunan dəyişikliyə əsasən, internet resurslarından istifadə edərək, sosial şəbəkələr vasitəsilə ölkə Prezidentinin şərəf və ləyaqətinə təhqirlər yağdırılan, eyni zamanda ölkə vətəndaşlarının şəxsiyyətini təhqir edən, şərəf və ləyaqətlərinə toxunan sözlər deyən vətəndaşlar cinayət məsuliyyətinə cəlb olunacaq. Bu, xüsusi olaraq irəli sürülmüş təşəbbüsdür", — deputat qeyd edib.

Deputat bu məsələnin komitədə müzakirə edildiyini və qəbul edilərək plenar iclasa təqdim edildiyini bildirib: "Ümid edirik ki, plenar iclasda da qanuna yeni dəyişiklik qəbul ediləcək. Cəzaya gəlincə, burada həm pulla cərimə, həm də cinayət məsuliyyəti nəzərdə tutulub".

Hüquqşünas Fuad Ağayev isə sözügedən dəyişikliyi sərt hesab edir. O, Sputnik-ə açıqlamasında məsələyə belə münasibət bildirib: "Bu halı qanunvericiliyi daha da ağırlaşdırmaq hesab edirəm. Bu, Cinayət Məcəlləsinə əlavə yük olacaq".

93
Teqlər:
Fuad Ağayev, Fəzail Ağamalı, böhtan, təhqir, sosial şəbəkə, Cinayət Məcəlləsi, qanun layihəsi, Komitə, plenar iclas
Əlaqədar
Ərdoğanı təhqir edən ingilis nazir Türkiyəyə gəlib
Şairlə müğənninin təhqiri arasındakı fərq
Məşhur jurnal bu dəfə Rusiya və Ukraynanı təhqir etdi
"Ermənistanın bu hərəkəti beynəlxalq ictimaiyyətə qarşı təhqirdir"
YAP-dan Rəsulzadəni təhqir edən deputata sərt reaksiya
Ağlayan qız

Dövlət məişət zorakılığının səbəblərini araşdırmağa başlayıb

4
(Yenilənib 16:42 13.04.2021)
Sorğuda iştirak edənlərin, cins, yaş kateqoriyası, təhsil səviyyəsi öyrənilməklə məişətdə zorakılığa məruz qalıb-qalmadıqları, zorakılıq şahidi olub-olmadıqları öyrənilir

BAKI, 13 aprel — Sputnik. Ailə, Qadın və Uşaq Problemləri üzrə Dövlət Komitəsi məişət zorakılığının səbəblərini araşdırmaq üçün onlayn sorğuya start verib. Bu barədə komitədən Sputnik Azərbaycan-a verilən məlumatda bildirilib.

Sorğuda iştirak edənlərin, cins, yaş kateqoriyası, təhsil səviyyəsi öyrənilməklə məişətdə zorakılığa məruz qalıb-qalmadıqları, zorakılıq şahidi olub-olmadıqları öyrənilir. Eyni zamanda zorakılığa məruz qalarkən hansı quruma üz tutduqları, bu kimi arzuolunmaz halların aradan qaldırılması üçün təkliflər öyrənilir.

Məişət zoraklığı ilə bağlı xəbərlərin KİV-də işıqlanmasına ehtiyac olub-olmadığı da öyrənilir.

Qeyd edək ki, sorğuda iştirak edərək şərh vermək istəyənlər bu linkə keçid edə bilərlər: https://tr.surveymonkey.com/r/CT57RNB

4

Cənubi Qafqazda bir ilk Azərbaycanda gerçəkləşir - VİDEO

14
(Yenilənib 15:35 13.04.2021)
Azərbaycan paytaxtını turistlər üçün maraqlı olan bölgələrlə birləşdirən yolda yeraltı tunel və ən uzun asma körpü tikilir. İşlərin gedişatını Sputnik Azərbaycan-ın videosunda izləyin.

Əhalinin rahat gediş-gəlişində xüsusi əhəmiyyətə malik Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsinin yenidən qurulması istiqamətində işlər davam edir. Ölkəmizdə ilk dəfə olaraq məhz bu yolda asma körpü və yeraltı tunel çəkilir. Sözügedən avtomobil yolu paytaxtımızı İsmayıllı, Qəbələ, Oğuz, Şəki, Qax, Zaqatala və Balakən rayonları ilə birləşdirən ən qısa yol olacaq.

Sürücü Cəlal Eyyubov Sputnik Azərbaycan-a deyir ki, qışda həmin yolda sürüşmə çox olur: "Yollar buz bağlayır, sürücülər üçün, yolu yaxşı bilməyən insanlar üçün narahatlıq yaradır. Yayda da çox sıxlıq olur. Yay aylarında gəlib-gedən insanlar çox olur, yol isə dardır, ona görə də çox sıxlıq yaranır".

Digər sürücü Zabit Əzizov da bu qənaətdədir ki, əgər bu yol yenidən təmir olunarsa, inkişafımıza böyük təsiri olar: "Azərbaycanda ilk dəfə asma körpünün olması həm turist cəlb edəcək, həm də ölkənin prespektivli inkişafına böyük təsir edəcək. Asma körpünün qurulması tezliklə başa çatdırılsa, daha yaxşı olar. Tunel də bizdə birinci dəfə olacaq. Bizim bölgə turist bölgəsi olduğu üçün bunların olması daha çox turist cəlb edəcək".

Lahiyə rəhbəri Zahir Həsənovun sözlərinə görə, Muğanlı-İsmayıllı-Qəbələ avtomobil yolunun 4.5-ci kilometrliyində, Ağsu çayı üzərində tikilən asma körpünün ümumi uzunluğu 1135 metr, hündürlüyü çay səviyyəsindən 76.5 metr, asma qüllələrin hündürlüyü isə 142 metr olacaq:

"Eyni zamanda yol 4 hərəkət zolağından ibarətdir. Körpünün bu parametrlərdə layihəndirilməsində əsas məqsəd mövcud Muğanlı-İsmayıllı avtomobil yolunda olan dolamacların sayının minimuma endirmək və bu yolda baş verə biləcək sürüşmələrin qarşını mümkün qədər almaqdır".

Yol ilk 2 km-lik ərazidə Muğanlı qəsəbəsinə çatmamış mövcud lokal sürüşmə sahəsindən əvvəl başlanıb, sözügedən qəsəbədən və qəsəbədən sonrakı enişdə aktiv sürüşmə sahəsindən yan keçməklə layihələndirilib. Nəticədə yolun Ağsu çayınadək olan hissəsində trassa 1.1 km, Ağsuçaydan sonrakı hissədə yeni Ağsuçay körpüsü və tunel hesabına 1.4 km qısalır. Qeyd edilən körpünün tikintisi və Muğanlı-İsmayıllı-Qəbələ avtomobil yolunun yenidən qurulması işləri tamamlandıqdan sonra bu region üzrə insanların rahat gediş-gəlişinin təmin edilməsi ilə yanaşı, turizm və kənd təsərrüfatının da inkişafına böyük töhfə verəcək.

Qeyd edək ki, respublikanın mühüm turizm bölgələrinə gedən və ilk dəfə ötən əsrin 70-ci illərində salınmış bu yolun yenidən qurulması Prezident İlham Əliyevin verdiyi tapşırığa əsasən layihələndirilib.

14
Ermənilərin Gəncəni raket atəşinə tutmasının nəticəsi, arxiv şəkli

Palata müharibə cinayətləri barədə xarici ölkələrin audit orqanlarını məlumatlandırıb

0
(Yenilənib 16:44 13.04.2021)
Vüqar Gülməmmədov: "44 günlük Vətən müharibəsi dövründə Hesablama Palatası da müsəlləh əsgər kimi işinin öhdəsindən layiqincə gəlməyə çalışıb".

Xalid Məmmədov, Sputnik Azərbaycan

BAKI, 13 aprel — Sputnik. "2020-ci il Prezident, Müzəffər Ali Baş Komandan İlham Əliyevin tam dəqiqliklə həyata keçirdiyi strategiyanın rəşadətli Ordumuz tərəfindən reallaşdırılan Zəfər ilidir. Ötən il 44 günlük Vətən müharibəsinin nəticəsində insanlarımızın yurd həsrətinə son qoyulmaqla, yaddaşlara şanlı səhifə kimi həkk olundu".

Sputnik Azərbaycan xəbər verir ki, bunu Hesablama Palatasının sədri Vüqar Gülməmmədov Milli Məclisin bu gün keçirilən iclasında "Hesablama Palatasının 2020-ci ildə fəaliyyəti haqqında hesabat" məruzəsi ilə çıxış edərkən deyib.

"Bu müharibə həm də dünya hərb elminə Azərbaycan Ordusunun rəşadət səhifəsi kimi daxil oldu. Biz müharibə dövründə dövlət-vətəndaş birliyinin şahidi olduq", - deyə o qeyd edib.

V.Gülmməmmədov bildirib ki, 44 günlük Vətən müharibəsi dövründə Hesablama Palatası da müsəlləh əsgər kimi işinin öhdəsindən layiqincə gəlməyə çalışıb: "Hesablama Palatası Azərbaycan xalqının öz torpaqlarını geri qaytarmaq uğrunda nümayiş etdirdiyi əzmi, düşmənin işğalçılıq siyasəti nəticəsində zəbt olunan torpaqlarda törətdiyi vandallıq aktları barədə ətraflı məlumatlar təqdim edilib. Hesablama Palatası müharibə zamanı qarşı tərəfin həyata keçirdiyi müharibə cinayətləri, münaqişə zonasından tamamilə kənarda yerləşən şəhərlərdə dinc əhaliyə qarşı törədilmiş terror aktları barədə digər ölkələrin ali audit orqanlarını məlumatlandırıb".

0