Üç Tac yaşayış kompleksi

Bakının ilk "göydələnləri" ilə bağlı ağılasığmaz faktın üstü açıldı

4691
(Yenilənib 17:54 18.11.2016)
"Tri Korona"ya 16 ildə nə qaz verilib, nə də çıxarış. Səbəb isə ilgincdir.

BAKI, 18 noy — Sputnik. Paytaxtın Həsən bəy Zərdabi küçəsində yerləşən "Üç Tac" yaşayış kompleksinin sakinləri artıq uzun illərdir ki, dözülməz şəraitdə yaşamağa öyrəşiblər. Bunun bir neçə səbəbi var.

"İlin dörd fəsli" şirkətinin inşa etdiyi bu binalar Bakı şəhərində ilk yenitikili binalardan hesab olunur və tikiliş tarixi 2000-ci illərin lap əvvəllərinə təsadüf edir. Lakin o vaxtdan bu günə kimi həmin yaşayış kompleksinə nə qaz verilib, nə də mülkiyyət haqqında çıxarış (kupça).

Sakinlərin üzləşdiyi əsas problem də, məhz burdan qaynaqlanır. Binalarda qaz və çıxarış olmadığı üçün, demək olar ki, heç kim evini sata bilmir. Aydın məsələdir ki, qazı və çıxarışı olmayan mənzilə alıcılar yaxın durmaq istəmirlər.

Rieltor Samir Əliyev Sputnik-in əməkdaşı ilə söhbət zamanı deyib ki, çox nadir hallarda kimsə gəlib bu binalardan ev alır: "Satan çoxdur, açığı deyim, əlacları olsa, burdakıların hamısı evini satar. Problem ondadır ki, bura yaxın gələn yoxdur. Mən də olsam, qazsız, "kupça"sız evə yaxın durmaram. Bəzi alıcılar da olur ki, "kupça"nı problem hesab etmir, qazlı ev axtarır. Axı, burda heç o da yoxdur!".

Bəzi sakinlərlə də söhbət aparmaq imkanımız oldu. Fəridə adlı yaşlı xanım, 10 ilə yaxındır ki, evini satışa çıxardığını, ancaq qaz olmadığı üçün sata bilmədiyini deyir: "Cəmi bir dəfə real müştəri çıxmışdı, o da binanın təhlükəli yerdə tikildiyini deyib, almaqdan imtina elədi".

Həqiqətən də, "Üç tac" (el arasında "Tri korona" kimi tanınır — red.) yaşayış kompleksinin tikildiyi ərazi bir az narahatlıq yaradır. Kompleksin həyət tərəfinin qarşısı məşhur "qanlı göl"dür. Və həyətdəki meydançadan 5 metr irəlidə uçurum var. İnsanlar təbii fəlakət zamanı bu binaların davam gətirib-gətirməyəcəyi barədə tərəddüd edirlər.

Binalarda qaz və çıxarış olmadığı üçün, demək olar ki, heç kim evini sata bilmir
© Sputnik / Fuad Hasanov
Binalarda qaz və çıxarış olmadığı üçün, demək olar ki, heç kim evini sata bilmir

Yəqin ki, elə bu səbəbdən də bina Fövqəladə Hallar Nazirliyi (FHN) tərəfindən təhvil alınmayıb. Əks halda kompleksə həm qaz verilərdi, həm də mülkiyyət haqda çıxarış.

FHN-in Tikintidə Təhlükəsizliyə Nəzarət Dövlət Agentliyindən Sputnik-ə bildirildi ki, sözügedən kompleksə qaz verilməməsinin səbəbini "İlin Dörd Fəsli" şirkətində axtarmağı məsləhət gördü. Nazirliyin, soyadını vermək istəməyən Kərim adlı əməkdaşı "Üç Tac" kompleksinin hələ də FHN-ə təhvil verilmədiyini də deyib.

"Həmin bina FHN-in Tikintidə Təhlükəsizliyə Nəzarət Dövlət Agentliyinin müayinəsindən keçib. Orada çatışmayan cəhətlər ekspertizaya verilib. Müvəqqəti qaz almaq üçün onlar bizə yaxınlaşıb arayışı götürə bilərlər. Qaldı ki, binanın təhvilinə, o bina təhvilə getməyib. Çünki müayinə vaxtı iradlar olub. Onlar aradan qalxmalıdır ki, kompleks təhvilə getsin. Ancaq, yenə deyirəm, qaz almaq üçün həmin binanın rəhbəri gəlib sənəd ala bilər", — FHN əməkdaşı qeyd etdi.

Nazirlik rəsmisi "Üç Tac" kompleksinin tikintisində hansı iradların olduğu barədə isə açıqlama vermək istəmədi: "Mən sizə iradların nə olduğunu deyə bilmərəm, nə varsa, hamısını sifarişçiyə göndərmişik. Zəng edib ondan öyrənə bilərsiniz".

"Binanın sədri özü bu işlərlə məşğul olmalıdır, lakin olmur. Camaatı başlı-başına buraxıb, amma gəlib öz işini yerinə yetirmir. O adama iradlar da verilib, hər fikrimizi də çatdırmışıq. Bununla belə, biz qaz vermək üçün müəyyən güzəştlərə gedib o binanın rəhbərliyinə arayış verə bilərik", — Kərim adlı əməkdaş vurğulayıb.

Mövzu ilə bağlı "İlin Dörd Fəsli" şirkəti ilə əlaqə yaratmağa çalışsaq da, telefona cavab verən olmadı. Qeyd edək ki, sözügedən yaşayış kompleksi 2000-2001-ci illərdə istifadəyə verilib.

4691
Teqlər:
"Tri korona", "göydələn", "Üç Tac", Həsən bəy Zərdabi küçəsi, çıxarış, kupça, "İlin dörd fəsli", "novostroyka", yaşayış kompleksi, bina, mənzil, qaz, Fövqəladə Hallar Nazirliyi, Samir Əliyev, paytaxt
Əlaqədar
Prezident jurnalistlərin binası üçün 3 milyon manat ayırdı
"Jurnalistlər üçün tikilən yeni bina yaxın vaxtlarda istifadəyə veriləcək"
Bakının mərkəzində yaşayış binasında yanğın olub
Binanın bloku çökdü, ölən və yaralanan var
Yaşadığınız binaların fundamentindən xəbəriniz var?
"Lazımsız binalar tikib, adını "regionların inkişafı" qoydular"
İmtahan, arxiv şəkli

Nazirlikdən imtahanlarla bağlı açıqlama

10
(Yenilənib 22:45 15.01.2021)
Nicat Məmmədlinin sözlərinə görə, pandemiya şəraitində yazılı imtahanlar olsa da, imtahanlar əsasən şifahi formaya keçib.

BAKI, 15 yanvar — Sputnik. "Pandemiyadan sonra – ola bilər ki, yaz, yaxud da daha sonrakı semestrdə ənənəvi imtahan sessiyasına keçəcəyik". Sputnik Azərbaycan-ın məlumatına görə, bunu Təhsil Nazirliyinin Elm, ali və orta ixtisas təhsili şöbəsininn müdiri Nicat Məmmədli deyib. Onun sözlərinə görə, pandemiya şəraitində yazılı imtahanlar olsa da, imtahanlar əsasən şifahi formaya keçib. "İmtahanların təşkilində güzəştlərin olması ilə bağlı təkliflər edilir. Amma hazırkı pandemiya dövrü bizdən təhsilə daha məsuliyyətli yanaşmağı tələb edir".

Şöbə müdiri bildirib ki, ötən ilin dekabrında imtahan sessiyasının keçirilməsi haqqında əmr imzalanıb: "Sessiya imtahanları onlayn qaydada 4 həftə ərzində keçiriləcək. Əslində keçən ilin son semestrindən dərslər onlayn keçirilir. Bu, bütün təhsil sistemi üçün bir çağırışdır. Əsas vacib məsələ bir çox hallarda imtahanların formalarının keçirilməsi idi. Bundan əvvəl imtahanlar daha çox yazılı şəkildə keçirilirdi".

10
Bakıda avtomobil tıxacı, arxiv şəkli

Dünyada yollar, məsafələr qısaldılsa da, Azərbaycanda əksinədir

35
(Yenilənib 22:25 15.01.2021)
Hazırda orta hesabla 6 saatı yola sərf etdiyimizi nəzərə alsaq, aylıq olaraq bu rəqəmin azı 120 saat olduğunu deyə bilərik. Bu isə o deməkdir ki, gündəlik olaraq ictimai nəqliyyatdan istifadə edən şəxslər təkcə son 5 ayda 600 saatını yola sərf edib.

Nigar İsgəndərova, Sputnik Azərbaycan

BAKI, 15 yanvar — Sputnik. Bu gün dünyanın bir çox ölkələri məhz yolları, məsafələri qısaltmaq, xüsusən də işçi qrupun rahatlığı üçün müəyyən planlar üzərində çalışırlar. Lakin Azərbaycanda bu müddət azalmaq əvəzinə daha da artırılır. Pandemiyadan öncə getdiyimiz yarım saatlıq yol bu gün 2 saatlıq yola çevrilib. Ümumiyyətlə, pandemiyadan əvvəl də Azərbaycanda bənzər mənzərə müşahidə edilirdi. Bu isə xüsusən gündəlik olaraq işə gedən şəxslər üçün böyük problemə səbəb olur. Yəni, qısa məsafəni hər iki istiqamət üçün qət edən şəxs gününün 4-5, indiki halda isə hətta 6-7 saaatını da yolda keçirmiş olur. Bəs nə etməli?

Öncə dünya ölkələrinin təcrübəsinə nəzər yetirək. Bu gün əksər ölkələrdə artıq şəhərin mərkəzində avtobusların hərəkəti məhdudlaşdırılır. Belə ki, müəyyən məsafədən gələn şəxslər şəhərin mərkəzində avtomobilini park edərək mərkəzdən lazım olan ünvana ya velosiped, ya da ki, ictimai nəqliyyatdan istifadə etməklə çatmış olur. Belə olan halda həm əlavə yanacağa qənaət edilmiş olur, həm havanın çirklənməsinin qarşısı alınır, həm şəhər mrəkəzi sərnişin və piyadalar üçün daha uyğun bir vəziyyətə gəlir, həm də avtomobillərin olmaması səbəbi ilə əlaqədar olaraq tıxaclar yaranmır və beləcə məsafə daha da qısaldılmış olur. 

Sputnik Azərbaycan bu problemlərin həlli barədə nəqliyyat üzrə ekspert Hüseyn Abdullayevlə söhbətləşib. "Azərbaycanda avtobus marşrut xətlərinin planlaşdırılmasında böyük problemlər var. Ümumiyyətlə, heab edirəm ki, Bakının avtobus-marşrut şəbəkəsi yenidən müasir prinsiplərlə qurulmalıdır. Vaxt itkisinə səbəb olan nüanslar aradan qaldırılmalıdır. Avtobuların yollarda gecikməsinin qarşısını almaq üçün müəyyən addımlar atılmalı, ayrıca zolaqlar salınmalı, dəhlizlərdə avtobuslara üstünlük verilməlidir. Bir sözlə ümumilikdə nəqliyyat infrastrukturu ilə bağlı islahatlar aparılmalıdır" - ekspert deyib.

"Magistral avtobus xətlərinin də köməkçi avtobus xətləri olmalıdır. İyerarxiyalı sistemdə mütləqdir ki, bir nəqliyyatdan digər nəqliyyat xəttinə keçid mümkün qədər tez baş versin. Bunun üçün bu marşrutlar hamısı qısa intervalla işləməlidir. Bundan başqa, insanlar böyük məsafələr qət etməməli və hər mübadilə üçün əlavə gediş haqqı ödəməməlidirlər. Lakin qeyd edim ki, Azərbaycanda nəqliyyat sistemində bir pərakəndəlik var, avtobus, metro və dəmiryolu xətti ilə ayrılıqda müəyyən qurumlar məşğul olurlar. Əsas dəhlizlərdə isə avtobuslara üstünlük verilmir", - deyə eskpert bildirir.

Xarici təcrübədən danışdıqda isə, o qeyd edir ki, avtobus marşrutları, həm də digər nəqliyyat növəri arasında konkret iyerarxiya olmalıdır: "Yəni, müəyyənləşir ki, bu xətlərdən hansılar magistral, hansılar köməkçi nəqliyyat yollarıdır. Əsas magistral marşrut xətlərinə sərnişinlərin çıxışını təmin etməkdir", - deyə ekspert əlavə edib.

Millət vəkili Fazil Mustafa isə fərqli fikirdədir. Bu barədə Sputnik Azərbaycan-a danışan millət vəkili belə bir infrastrukturun qurulmasının mümkünsüzlüyündən bəhs edir: "Hazırda yollarda yaranan sıxlıq ilk növbədə metro ilə bağlıdır. Bu səbəbdən əksəriyyət minik avtomobilindən istifadə etmək məcburiyyətində qalır. Məktəblər açılmasa da, şəhərdə fəlakətli səviyyədə tıxaclar var. Pandemiya şəraitində yaranan vəziyyət təbiidir. Çünki avtobuslar da riskli olduğundna insanlar şəxsi avtomobillərə üstünlük verirlər. Bu səbəbdən hələlik çıxış yolu haqda danışmaqda çətinlik çəkirəm. Amma düşünürəm ki, tədricən metronun açılmasını görməliyik. Çünki nəqliyyatda hədsiz yüklənmə var".

Millət vəkili heab edir ki, şəhərin mərkəzinə çatmamış avtomobillərin park edilməsi təcrübəsini Azərbaycanda tətbiq etmək çətin olar: "Düşünürəm ki, bunun heç faydası da olmayacaq. Çünki bizdə normal elektrik qatarı yoxdur. Bu təcrübə yalnız düzgün infrastrukturun qurulduğu şəhərlər üçün keçərlidir. Bizdə isə düzgün infrastruktur qurulmayıb, şəhərsalmanın prinsipləri pozulub. Xaricdə belədir ki, məktəbəqədər yaşda olan uşaqlar üçün xüsusi avtobuslar var. Bizdə məktəbəqədərlər 25 faiz təşkil etsə də, heç bunu da təmin edə bilmirik".

Bir sözlə, hazırda gündəlik hesabla 6 saatı yola sərf etdiyimizi nəzərə alsaq, aylıq olaraq bu rəqəmin azı 120 saat olduğunu deyə bilərik. Bu isə o deməkdir ki, gündəlik olaraq ictimai nəqliyyatdan istifadə edən şəxslər təkcə son 5 ayda 600 saatını yola sərf edib. 

Qeyd edək ki, pandemiyadan öncə isə gündəlik olaraq işə gedib-gələn və bir qədər şəhərin mərkəzindən kənarda qalan şəxslər 4 saatını yola sərf edirlər. Yəni, aylıq olaraq bu 80 saat, illik olaraq isə 960 saatdır.

Hələlik isə ümid təkcə metronun açılmasına qalır...

35
Türkiyə Prezidenti Rəcəb Tayyib Ərdoğan koronavirusdan peyvənd vurdurur

Ərdoğan koronavirus peyvəndindən sonra: "Sapsağlamam"

0
(Yenilənib 00:05 16.01.2021)
Türkiyə Prezidentinə yanvarın 14-də Çinin "Sinovac" şirkətinin istehsalı olan "CoronaVac" vaksini vurulub.

BAKI, 16 yanvar — Sputnik. Bu ana qədər hər hansı bir yan təsiri olmayıb. Sputnik Azərbaycan "Hurriyet" nəşrinə istinadən xəbər verir ki, bunu Türkiyə Prezidenti Rəcəb Tayyib Ərdoğan jurnalistlərə açıqlamasında bildirib.

"Bu ana qədər hər hansı bir yan təsiri olmayıb. Sapsağlamam. 28 gün sonra ikinci iynəmizi vurduracağıq", - deyə Ərdoğan qeyd edib.

Qeyd edək ki, Türkiyə Prezidenti Rəcəb Tayyib Ərdoğan canlı yayımda koronavirusa qarşı peyvənd edilib.

Türkiyə Prezidentinə Çinin "Sinovac" şirkətinin istehsalı olan "CoronaVac" vaksini vurulub.

0