Məhkəmə çəkici, arxiv şəkli

Klinika işçisinin "Oksigen"ini kəsir

4988
(Yenilənib 19:02 02.11.2016)
İki uşaq böyüdən tənha ana 160 manat maaşa işlədiyi klinika tərəfindən 20 min manatlıq tibbi cihazı sıradan çıxarmaqda günahlandırılır.

BAKI, 2 noy-Sputnik. Oksigen özəl klinikasının rəhbərliyi öz sabiq əməkdaşını 20 min manat dəyəri olan tibbi avadanlıqları yararsız vəziyyətə salmaqda günahlandırıb.

Hazırda Bakı Apellyasiya Məhkəməsi iki azyaşlı uşaq böyüdən tənha ana Aynurə Ağayevanın şikayətini araşdırır. Ağayeva əmindir ki, onun tibbi ləvazımatların sıradan çıxarılmasına heç bir aidiyyatı yoxdur. O, məhkəmənin ədalətinə inandığını bildirib. 

Birinci instansiya məhkəməsi Oksigen klinikasının rəhbərliyinin xeyrinə qərar çıxararaq, Ağayevanı qırmadığı aparata görə 10,7 min manat məbləğində cərimələyib. 

Sputnik-ə bu barədə açıqlama verən Aynurə İntiqam qızı Ağayeva bildirib ki, onunla Oksigen klinikasının rəhbərliyi arasında münaqişə 2016-cı ilin qışından – o, işdən getdiyini bəyan edəndən sonra başlayıb. 

"Mən endoskopiya kabinetində 160 manat maaşa tibb bacısı işləyirdim. Klinikada 1 ilə yaxın idi ki, işləyirdim və bu müddətdə bir dəfə də olsun rəhbərlik tərəfindən hər hansı tənbeh almamışdım. Hamı mənim işimdən razı idi. Mən iki uşaq tərbiyə edirəm və bu maaş onların yeməyinə güclə çatırdı. Buna görə də, mən təbii olaraq daha yüksək maaşlı iş axtarırdım və tapdım da. Mənə “Stimul” klinikasında 500 manatlıq iş təklif etdilər. Mən bu barədə rəhbərliyə məlumat verdim və düşündüm ki, onlar da mənimlə birlikdə buna sevinəcəklər. Bu zaman aydın oldu ki, mən klinikanın avadanlığını sıradan çıxarmışam və ona görə pul ödəməliyəm.“ – deyə Ağayeva bildirib. 

Bu ilin yayında Yasamal rayon məhkəməsi klinikanın xeyrinə qətnamə çıxarıb və Ağayevanın dəymiş ziyanı kompensasiya etməsinə qərar verib.  Ağayeva isə məhkəmənin bu qərarı ilə razılaşmayıb. Oktyabrın 31-də Apellyasiya Məhkəməsi Ağayevanın şikayətinə baxıb. Tibb bacısı bildirib ki, sözügedən avadanlıq sıradan çıxanda o heç Oksigen klinikasında işləməyib. Onun sözlərinə görə, 5 yanvar 2015-ci ildə Türkiyə şirkətindən sıradan çıxmış endoskopik avadanlıqla bağlı göndərilmiş sorğuya cavab gəlib. Ağayeva isə klinikada 6 fevral 2015-ci ildə işə başlayıb. 

"Klinika rəhbərliyi yalan-gerçək, var gücü ilə həmin vəsaiti məndən çıxarmağa çalışır. Amma mən ədalət naminə sonadək mübarizə aparacağam” – deyə Ağayeva bildirib. 

Bununla belə, Oksigen klinikasının sahibi Munir Vəliyev (“Odlar Yurdu” universitetinin rektoru, sabiq deputat Əhməd Vəliyevin oğlu-red.) Sputnik-ə bildirib ki, bununla bağlı məhkəmənin qərarını gözləyir. 

"Məhkəmə nə qərar versə, o da olacaq. Biz özümüzü haqlı hesab edirik, Ağayeva isə özünü. Amma bizim əlimizdə ekspertiza rəyi var ki, endoskopiya kabinetindəki avadanlıq yerə düşmə nəticəsində qırılıb. O vaxt Ağayeva klinikada işləyirdi. Ağayeva ekspertiza rəyini biləndən sonra işdən gedib. O, iş kabinetini özbaşına qoyub gedib və bir daha işdə görünməyib. Ona görə də biz onu işdən qovmuşuq.” – deyə Vəliyev bildirib. 

Bununla yanaşı Vəliyev bildirib ki, sözügedən avadanlıq klinikaya 2015-ci ilin mayında daxil olub. Həmin vaxt Ağayeva artıq orada işləyirdi: "Avadanlığın bir illik zəmanət müddəti var idi.” 

Ağayevanın sözlərinə görə, ondan ucuz işçi qüvvəsi kimi istifadə ediblər. İşdən getmək istədikdə isə, onunla haqq-hesabı çürütmək istəyiblər.

4988
Teqlər:
endoskopiya kabineti, klinika, Oksigen klinikası, Odlar Yurdu” universiteti, Stimul” klinikası, Bakı Apellyasiya Məhkəməsi, Əhməd Vəliyev, Munir Vəliyev, Aynurə İntiqam qızı Ağayeva, Türkiyə
Mərkəzi Neftçilər Xəstəxanasının əməkdaşı İlhamə Şirinova

Ön cəbhədə vuruşan həkim: “Sona qədər buradayam, mübarizə aparacağam” - MÜSAHİBƏ

64
(Yenilənib 21:59 02.07.2020)
İlhamə Şirinova deyir ki, həkim kimi yoluxub həyatını itirə bilər. Amma ən azı nə qədər insanı sevdiklərinə qovuşdurduğuna görə rahatdır.

Nigar İsgəndərova, Sputnik Azərbaycan

BAKI, 2 iyul — Sputnik. Onlara həmişə ehtiyacımız var. Hər gün müraciət etməsək də, vaxtaşırı onlara işimiz düşür. Bu gün – dünyada koronavirus pandemiyasının yayıldığı bir dövrdə isə onlara xüsusi ehtiyacımız yaranıb.

Özümüz olmasaq da, yaxınlarımızın bu gün həkimlərə daha çox ehtiyacının olduğunu duyuruq. Hələ də virusa inanmayanlar, yaşananların böyük bir oyunun tərkib hissəsi olduğunu hesab edənlər olsa da, onlar ağır vəziyyətdə xəstəxanalara gətiriləndə, burada reallığı aydın şəkildə dərk edirlər. Reallıq isə sağ qalmaq üçün həkimlərə daha çox ehtiyacımızın olduğunu deyir.

Son vaxtlar həkimlər barədə o qədər də xoş olmayan fikir formalaşsa da, bu işdə canla-başla çalışan, hətta lazım olarsa, peşəsinə görə hər şeyi qurban verməyə hazır olan həkimlərimiz də var. Döyüş meydanına atılan və hər an ölümü gözə alan belə həkimlərdən biri də bu gün Mərkəzi Neftçilər Xəstəxanasında xəstələrin sevimlisinə, əzizinə çevrilən İlhamə Şirinovadır. O, qadın, ana, iki övladı, ailəsi, yaşlı valideynləri olmasına baxmayaraq döyüş meydanına atılan bu günün qəhrəmanlarındandır.

© Photo : Courtesy of İlhama Shirinova
Mərkəzi Neftçilər Xəstəxanasının əməkdaşı İlhamə Şirinova

Sputnik Azərbaycan həkimlə portret müsahibəni təqdim edir:

-  Hər gün MNX-da COVID-19-dan müalicə alan xəstələrlə təmasdasınız. Demək olar ki, hər gün həyatınız riskdədir. Sizi tanımaq olarmı? 

- 1984-cü ildə Göyçə mahalında anadan olmuşam. Azərbaycan Tibb Universitetini bitirdikdən sonra artıq 7 ildir ki, infeksionist olaraq çalışıram. Ailəliyəm, 10 və 12 yaşlarında iki qız övladım var.

- Nə zamandan COVID-19 xəstələrinin müalicəsi prosesinə qoşulmusunuz?

- Bildiyiniz kimi, martın 24-dən etibarən çalışdığım Mərkəzi Neftçilər Xəstəxanası da COVID-19 xəstələrinin müalicəsi üçün ayrılıb. Martın 27-dən artıq bu komandada çalışmağa başladım. Bu xəstələrin müalicəsində ilk dəfə olaraq gecə növbəsində işə çıxdım. Xəstələrin ümumi durumunu, narahatlıqlarını gördüm, ağır idilər. Həmin gün MNX-nın digər infeksionisti Natiq Əliyevlə birgə gecə növbəsində idik. İlk günlər həkim çatışmazlığı var idi və mən də bu komandaya könüllü olaraq qoşuldum.

- Çətinlikləriniz yəqin ki, çox olar. Burada məsuliyyət yükü də var...

- Burada insanların taleləri bizdən asılıdır. Burada söhbət insan həyatından gedir. Çətinlik dedikdə, çalışırıq ki, xəstənin səhhəti ilə bağlı bütün şikayətləri dinləyək, tədbir görək və elə edək ki, xəstə həm yaxşı olsun, müalicəsi düzgün getsin, onu itirməyək, həm də bizdən məmnun qalsın. Çünki bir insanın müalicəsi, onun sağalması ətrafında nə qədər insanın sevinc xəbəri alması, üzlərinin gülməsi, qəlblərinin fərəhlənməsi deməkdir. Onlar bir canı, əzizlərini bizə etibar edirlər. Yəni ən böyük çətinlik budur.

- Sırf bu pandemiya dövründə əsas çətinlikləriniz nə oldu?

- Sırf pandemiya dövründə isə bir ana olaraq əsas çətinliklərim övladlarımla bağlı olur. Onlardan uzaq olmağım həm övladlarıma, həm də mənə çətindir. Dörd aydır onlardan uzaq düşmüşəm. İki ay ərzində övladlarımı demək olar ki, heç görməmişəm. İki aydan sonra isə övladlarımı ancaq uzaqdan görmüşəm. Övladlarımı qucaqlaya, onlarla təmas qura, onları doya-doya öpə bilmirəm. Onlar da mənim sevgimə həsrət qalıblar. Bilirsiniz, xüsusən də qız övladları anaya daha çox bağlı olur. Məni hər gün nə qədər öpüb-qucaqlayırdılar. Amma indi o hissləri yaşa bilməməyimiz məni çox üzür. Böyük qızım Məryəm vəziyyəti başa düşür. Deyir ki, ana eybi yoxdur, biz hər şeyə dözərik, səninlə fəxr edirik ki, bu cür xəstələri müalicə edirsən. Deyir ki, orada sənə ehtiyac var. Amma həqiqətən də vəziyyət çox çətindir. Həyat yoldaşım, övladlarım, anam-atamdan artıq aylardır ki, uzağam. Bir ana kimi övladlarım üçün darıxdığım kimi, mənim üçün də darıxan ana var. Anam-atam mənim üçün darıxır. Yəni, ailə, həsrət mənasında çox çətindir. Amma yenə də bu işdə, bu komandada olmaqdan məmnunam. Nə vaxta kimi burada olduğumuzu bilməsək də, COVID-19-la mübarizə sona çatanacan mən burada, xəstələrin yanında olacam. 7 illik fəaliyyətim dövründə ilk dəfədir ki, belə bir vəziyyətlə qarşılaşırıq. Arzu edirəm ki, xalqımızın bu əzablı günləri tezliklə geridə qalsın. Bu günlərin geridə qalması üçün hər kəsdən bu virusa inanmağı xahiş edirik. Pandemiyanın qısa zamanda bitməsini hər birimiz arzulayırıq. Çünki bu virus bizə hərtərəfli zərər vurdu. İtkilər, stresslər... COVID-19-a tutulan şəxslərin yanaşı xəsətlikləri də artdı. Bu itkilər sırasında tanınmış həkimlərimiz, ziyalılarımız da var.

© Photo : Courtesy of İlhama Shirinova
Mərkəzi Neftçilər Xəstəxanasının əməkdaşı İlhamə Şirinova

- Həqiqətən də çətindir. Və bu durumun hələ uzun müddət davam edəcəyi görünməkdədir. Nə zamansa bezə bilərsinizmi?

- Mövcud vəziyyət bir daha göstərdi ki, həkimlik sənəti peşələrin ən ağırı və ən şərəflisidir. Sənətim üçün həyatda demək olar ki, hər şeyi qurban verə bilərəm. Düşünürəm ki, mən heç vaxt bu sənətdən bezmərəm. Hətta COVID-19 virusu arzulamadığımız halda belə, illərlə davam etsə, mən yenə də bu xəstələrin müalicəsində indiki kimi yaxından iştirak edərəm. Düşünürəm ki, hər bir işdə əsas olan amil peşəyə olan sevgidir. Bu gün elə həkimlər var ki, yaşı, səhhəti ilə əlaqədar olaraq COVID-19 xəstələrinin müalicəsi prosedurundan kənarda qalıblar. Amma mənim üçün yaş, səhhət, heç bir önəm daşımır. Bu sənət üçün demək olar ki, hər şeyi qurban verərəm.

- Gündəlik iş saatınız nə qədərdir?

- Biz hər gün 12 saat fasiləsiz işləyirik. Hətta olur ki, işdən sonra da xəstələrə baxırıq.  İşdən sonra telefonla belə xəstələrlə danışırıq, onların şikayətlərini, narahatlıqlarını cavablayırıq.

- İstənilən peşə, sənət kişilərlə müqayisədə qadınlar üçün daha çətindir...

- Düzdür, bir qadın və bir ana üçün belə bir vəziyyət həqiqətən də çox çətindir. Belə bir vəziyyətdə təbii ki, hər bir qadının ailədə onu başa düşən həyat yoldaşı olmalıdır. Ailəmin mənə dəstəyi bu işdə çox köməyimə çatır. Amma deyim ki, həkimlik sənətində qadın-kişi olmağın fərqi yoxdur. Öncədən, bu sənəti seçərkən artıq məsuliyyətini dərk etmiş olursan. Hər hansı xəstənin sağalaraq evə getməsi bizim üçün qəhrəmanlıqdır. Saturasiyası 78-85 olan xəstələr balonla, aparat vasitəsi ilə nəfəs alır. Bu xəstələrin sağalması, saturasiyalarının yenidən 95+ olması özü böyük qəhrəmanlıqdır. Mən sənətimin vurğunuyam. Xəstələr sağalıb evə gedəndə içimizi böyük bir fərəh hissi bürüyür. Bizim gördüyümüz iş, yəni bir insanın həyatını xilas etmək, onu əzizlərinə yenidən qovuşdurmaq böyük bir qəhrəmanlıqdır. Mən bu komandaya qoşulanda hər şeyi, hətta həyatımı itirə biləcəyimi də gözə almışam. Mən də bir həkim kimi yoluxub həyatımı itirə bilərəm. Amma ən azı rahatam ki, nə qədər insanı sevdiklərinə qovuşdurmuşam. Sənətimin vurğunuyam, bu mənim üçün böyük fəxrdir. Bu gün biz sanki cəbhə bölgəsindəyik. Mən sonuna qədər burada döyüşəcəm. İnanın, müharibə olsa belə, ön cəbhədə vuruşaram. Biz həkimlər ölümdən qorxmuruq. Bəzən valideynlərim deyir ki, 4 aydır işləmisən, çıx bir ay dincəl. Deyirəm, belə bir vəziyyətdə bunu edə bilmərəm. Çünki pandemiya şəraitində bu gün sırf infeksionistə böyük tələbat var.

- Xəstələr yəqin ki, həm qorxu, həm də stress içindədirlər. Onların bəziləri psixoloji olaraq gərgin olduqlarını müxtəlif sosial şəbəkələrdən bəyan edirlər. Onlarla necə dil tapırsınız?

- Ümumiyyətlə, müxtəlif xəstəliklər zamanı xəstələrdə psixoloji durumu, sinir sistemi pozulur. Belə xəstələrlə gərək ki, dil tapaq. Bu isə təbii ki, təkcə biz həkimlərin işi deyil, ümumilikdə bütün tibb personalının işidir. Xadiməsindən həkiminədək, hər birimiz xəstə ilə dil tapmalıyıq. Bizim üçün xəstə hər zaman haqlıdır. Hətta haqsız olduğu halda belə, xəstə bizim üçün hər zaman haqlı sayılır. Biz xəstə ilə xəstənin dilində danışırıq. Ən azından özünü, doğmalarını xəstənin yerinə qoymalısan. Biz başa düşürük ki, xəstənin yerində öz əzizlərimiz də ola bilər. Ona görə hər bir xəstəmə əzizim kimi yanaşıram. Çalışıram ki, xəstəni başa düşüm.

© Photo : Courtesy of İlhama Shirinova
Mərkəzi Neftçilər Xəstəxanasının əməkdaşı İlhamə Şirinova

- Tezliklə öncəki həyatımıza qayıtmaq üçün tövsiyəniz nədir?

- Heç kəs "bu xəstəlik mənim yaxınımda, qohumumda, qonşumda yoxdur, inanmıram", deməsin. Bu gün bu pandemiya bütün dünyada tüğyan edir. Virusdan qorunmaq üçün hər kəs şəxsi gigiyena qaydalarına əməl etməlidir. Tək olmadığı hər bir yerdə maska taxmalıdır. Sosial məsafə də gözlənilməlidir. Maska taxmadığı üçün ətrafındakı insanları da qınamalıdırlar. Artıq vəziyyət elə bir həddədir, virus elə alovlanıb ki, daha onun varlığına inanmayan qalmaycaq. Özümüzü qorumasaq, virus daha da alovlanacaq. Baxın, hazırda mart-aprel ayları ilə müqayisədə həm virusun yayılma dərəcəsi, həm də ağırlıq dərəcəsi artıb. Virus artıq mayın sonlarından etibarən mutasiya olunmuş formadadır. Bir də hər kəsi səhhəti ilə bağlı hansısa şikayət olduqda dərhal həkimə məlumat verməyə səsləyirəm.

64
Teqlər:
müalicə, Koronavirus, COVID-19, həkim
Bakubus avtobusu, arxiv şəkli

Həftəsonları bütün ictimai nəqliyyatın hərəkəti dayandırılır

11
(Yenilənib 21:04 02.07.2020)
Xüsusi karantin rejiminin sərtləşdirildiyi şəhər və rayonlarda həftəsonları bütün ictimai nəqliyyatın hərəkəti dayandırılır.

BAKI, 2 iyul - Sputnik. Xüsusi karantin rejiminin sərtləşdirildiyi şəhər və rayonlarda həftəsonları bütün ictimai nəqliyyatın hərəkəti dayandırılır. 

Bu, Nazirlər Kabineti yanında Operativ Qərargahın məlumatında əksini tapıb. 

Məlumata əsasən, Goranboy, Göygöl və Mingəçevir şəhərləri, Bərdə, Xaçmaz, Samux, Siyəzən və Şəki rayonları daxil olmaqla, Bakı, Cəlilabad, Gəncə, Lənkəran, Masallı, Sumqayıt, Yevlax şəhərlərində və Abşeron rayonlarında aşağıdakı tarixlərdə həftəsonları bütün ictimai nəqliyyatın hərəkəti dayandırılır:

 4 iyul saat 00:00-dan 6 iyul saat 06:00-dək;

11 iyul saat 00:00-dan 13 iyul saat 06:00-dək; 

18 iyul 00:00-dan 20 iyul saat 06:00-dək.

11
ABŞ bayrağı, arxiv şəkli

ABŞ-da Rusiyaya qarşı yeni sanksiyalar tələb edirlər

0
İstər Moskvada, istərsə də Donald Tramp administrasiyasında Rusiyanın "Talibanla sözləşməsi" iddialarını rədd edirlər.

BAKI, 2 iyul — Sputnik. ABŞ Konqresinin Nümayəndələr Palatasının spikeri Nensi Pelosi "Talibanla sözləşdiyinə görə" Rusiyaya qarşı sanksiyalar tətbiq etməyə çağırıb.

Sputnik Azərbaycan xəbər verir ki, Pelosi bunu MSNBC telekanalına müsahibəsində deyib. 

"Biz Rusiyaya qarşı sanksiyalar tətbiq etməliyik, özü də indi", – spiker bildirib.

İstər Moskvada, istərsə də Donald Tramp administrasiyasında Rusiyanın "Talibanla sözləşməsi" iddialarını rədd edirlər.

Əsassız iddialar

"The New York Times" dərc etdiyi məqaləsində iddia edib ki, Rusiya hərbi kəşfiyyatı Əfqanıstanda ABŞ əsgərlərinə hücumlara görə Talibanla əlaqəli olan yaraqlıları mükafatlandırır və ABŞ prezidentinə bu barədə məlumat verilib. Lakin bu iddiaya heç bir dəlil verilməyib.

Rusiyanın ABŞ-dakı səfirliyi isə ölkə rəhbərliyindən bu cür xəbərlərə görə diplomatlara edilən təhdidlərə adekvat cavab verməyi tələb edib. Xarici İşlər Nazirliyi mətbuatda yayılan xəbərləri saxta, Tramp isə sifariş adlandırıb. Ağ Ev, Pentaqon və ABŞ kəşfiyyatı bu hesabatların təsdiqlənmədiyini və Trampa "təhdidlər" barədə məlumat verilmədiyini deyib.

Rusiya prezidentinin mətbuat katibi Dmitri Peskov Rusiyanın Talibanla "sözləşməsi" barədə iddianı şərh edərkən bunun yalan olduğunu deyib.

0