Həvəskar balıqçı Elnur Əliyev

Bu peşədə qazanc önəmli deyil

418
(Yenilənib 14:13 30.09.2016)
Ona sərf etdiyin zaman boşuna itirilmiş hesab olunmur. Ruhun dincliyi və əsəblərin yerinə gəlməsi üçün əvəzsizdir...

İlham Mustafa, Sputnik Azərbaycan

BAKI, 30 sen — Sputnik. Mingəçevir Azərbaycanın ən gənc, həmçinin ən gözəl şəhərlərindən biridir. Bu şəhər faşizm üzərində qələbədən sonra təməli qoyulan eyniadlı su anbarının tikintisi ilə bağlı salınsa da, ərazisi qədim yaşayış məskəni olub.

Ötən əsrin ortalarında, 9 illik gərgin prosesdən sonra Kür çayının qabağı kəsilərək Avropanın ən böyük torpaq bəndi və su anbarı yaradılıb. Əhali sayına görə ölkənin 4-cü böyük şəhəri olan Mingəçevir sakinləri həcminə görə bu su anbarını "dəniz" adlandırırlar.

© Sputnik / / İlham Mustafa
Mingəçevir balıqçılarının peşə sirrləri

Bu "dəniz"də balıq tutmaq mingəçevirlilərin ən sevilən istirahəti və məşğuliyyətidir. Burada bəzi sakinlər balıqçılıqla peşə kimi, çoxları isə həvəskar olaraq məşğul olurlar. Onlar "həm ziyarət, həm ticarət" deyiminə əsaslanaraq vaxtlarının bir hissəsini gözəl təbiət və "dəniz" qırağında keçirirlər. Bu işdən həm mənəvi zövq alır, həm də dadlı təamlar dadmaq üçün balıq tuturlar.

Həvəskar balıqçı Elnur Əliyev də Mingəçevir sakinidir. Əsasən yay aylarında həftədə 1-2 dəfə "dəniz" sahilinə gələrək balıq tutur, istirahət edir. Qılçıqsız (sümüksüz) olduğuna görə və dadlı olduğuna görə, daha çox sudak balığına üstünlük verir.

Bu balığın tutulması incəliklərini də Elnur bizimlə bölüşdü. Həvəskar balıqçı saat 16-17 arası sahilə gələrək ovlarının yerlərini müəyənləşdirir. Sonra isə böyük balıqları ovlamaq üçün, tilova taxmağa, "bıçok" adlandırdıqları xırda balıqlar tutur.

Mingəçevir su anbarının sahilində balıqçı tilovları
© Sputnik / İlham Mustafa
Yerli sakinlər Mingəçevir su anbarını sahəsinin böyüklüyünə görə "dəniz" adlandırırlar

Hava qaralmağa başlayanda isə bu balıqları qarmağa taxaraq suya atır. Balığın qarmağa düşməsini bildirmək üçün tilov ipinə zınqırovlu "gözətçi" bənd edir. "Gözətçi"nin işi, balıq tilova düşəndə səs edərək sahibini xəbərdar etməkdir. Bundan sonra — gecə saat 1-dək kimi davam edən maraqlı və əyləncəli ov prosesi başlayır.

"Sudak balığı yırtıcı balıq olduğundan, axşam saatlarında xırda balıqları yemək üçün sahilə yaxınlaşır. Onu tutmaq üçün elə xırda balıqları tilova taxırıq. Xırda balıq qarmağa elə taxılmalıdır ki, ölməsin və hərəkət etsin. Bu zaman yırtıcı onu daha tez hiss edir və tələyə düşür. Sudakı tutmağın ən uyğun zaman isə hava qaraldıqdan sonra və səhərə yaxındır", — deyir Elnur Əliyev.

O, balıq tutmaq üçün hava şəraitinin də əsas olduğunu söyləyir. Çox küləkli, yaxud çox sakit, aydınlıq, yaxud zil qaranlıq hava balıq tutulmasında müəyyən rol oynayır. Balıqçı ovun hər zaman filmlərdə göstərilən kimi uğurlu olmadığını, bəzən 2-3 kiloqramadək balıq tuta bildiklərini, bəzənsə evə əliboş döndüklərini deyir. Elnur balıq tuta bilmək üçün insanda səbr və işindən zövq almağın önəmli olduğunu deyir.

Qismətdən, bizim də iştirak etdiyimiz ov prosesindən balıqçı həmin gün, "dəniz " sahilinə çıxan digər bütün balıqçılar kimi əliboş döndü. Təcrübəli balıqçılar bunu bir gün əvvəl bölgədə (Balakəndə) baş verən zəlzələ ilə əlaqələndirdilər. Onların sözlərinə görə, zəlzələ ən tez balıqlar tərəfindən duyulur və bu zaman suyun dərinliklərinə çəkilirlər.

Qismətinə balıq çıxmasa belə, bu əyləncəyə sərf etdiyin zaman boşuna itirilmiş hesab olunmamalıdır. Ruhun dincliyi və əsəblərin yerinə gəlməsi üçün əvəzsiz əyləncədir balıq tutmaq. Qısası, Mingəçevirə gedərkən özünüzlə tilov götürsəniz, peşman olmazsınız…

418
Teqlər:
Elnur Əliyev, tilov, su anbarı, əyləncə, Mingəçevir, dəniz, balıq, Kür çayı
Əlaqədar
İnsan sağlamlığı üçün zərərli olan 206 kilo balıq satışdan yığışdırılıb
Xəzərə həsrət qalmış Bakı balıqçıları: "Özlərini bizim yerimizə qoysunlar"
Azərbaycanda ağır çəkili balıq yetişdirilməsinə başlanıb
Qayığını xilas etmək istəyən balıqçı 100 milyonluq qənimət tapdı
Təbiət və balıq ovu həvəskarları üçün şəhərdən kənarda istirahət
Çarpayıda gənc cütlük, arxiv şəkli

Hüquqşünas: "Yataq otağından çıxandan sonra söhbət ediləcək mövzu yoxdursa..."

8
(Yenilənib 15:15 19.01.2021)
"Kişilər unutmamalıdırlar ki, qadınla ailə həyatı quran zaman o, atası evindən çıxanda əxlaqsız olmur ki?! Əxlaqsız idisə, niyə alırdın? Deyildisə, deməli, sənin əlində əxlaqsız olub"

İradə Cəlilova, Sputnik Azərbaycan

BAKI, 19 yanvar — Sputnik. Pandemiya dövründə daha əvvəl müşahidə edilməyən qaydalar tətbiq edildiyi üçün vətəndaşlar bu dönəmdə müxtəlif qayda pozuntuları ilə qarşılaşdılar. Karantin rejimi, SMS-icazə, evdə qalmaq kimi məhdudiyyətlər yenilik olduğu üçün bir çox vətəndaşlar bu vəziyyətlə barışmaqda çətinlik çəkdilər.

Bəs bu dövrdə vətəndaşlar hüquqşünaslara daha çox hansı hüquq pozuntusu ilə müraciət ediblər?

Hüquqşünas Tağı Hüseynov Sputnik Azərbaycan-ın suallarını cavablandırıb.

© Sputnik / Irade JELIL
Hüquqşünas Tağı Hüseynov

- Pandemiya dövründə vətəndaşları hüquqi istiqamətdə daha çox nə narahat edib?

- Pandemiya dövründə əsas hüquq pozuntuları iki istiqamətdə olub. Yəni şəxslərin bizə müraciətləri boşanma və inzibati orqanların tətbiq etdiyi cərimələrlə bağlı olub. Bir müddət əvvəl, sərt karantin rejimində evdə qalmaq tələbi, kafe və restoranların bağlı olması ailələri, demək olar ki, bir yerə topladı. Bu müddət ərzində mehriban olan ailələr daha da mehribanlaşdı. Problemli ailələrin problemi isə böyüyərək boşanma ilə nəticələndi.

İkinci istiqamətdə olan hüquq pozuntuları əsasən polisin yazdığı cərimələrlə bağlı olub. Belə ki, müraciət edən vətəndaşlar müxtəlif səbəblərlə polisin yazdığı cərimələrlə razılaşmadıqlarını dilə gətirirdilər. Bəziləri qeyd edirdilər ki, SMS müddətinin bitməsindən 2 dəqiqə sonra cərimə yazılıb, bəziləri evinin qapısında ona cərimə yazıldığını bildirirdilər. Bu problemlə qarşılaşan vətəndaşların 99 faizi məhkəməyə müraciət etmir. Düşünürlər ki, 100 manata görə məhkəmələrə vaxt ayırmağa dəyməz.

Ancaq bəzi prinsipial insanlar var ki, axıra qədər davam edirlər. Mən vətəndaşlara izah edirdim ki, məhkəməyə arayış yazmağa 50 manat vəkilə verməkdənsə, cəriməni tətbiq edən quruma müraciət ünvanlasınlar.

- Boşanma müraciətləri ilə bağlı vətəndaşlar səbəb kimi nəyi vurğulayırlar?

- Düzünü desək, son dövrlədə kişilər öz məsuliyyətlərini unudublar. Bir müddət əvvəl qadınlar hüquq bərabərliyi istəyirdilər. Bu da sizə hüquq bərabərliyi. Ailədə kişi və qadınların vəzifələri yazılı şəkildə müəyyən edilmədiyi üçün ailə daxilində ər və arvad ailədə öz vəzifəsini bilmir. Ərzaq, əmlak, yemək almaq və s. kimin vəzifəsidir? Heç kim bilmir. Çox qəribədir, ailədə kişi yeyib-yatanda, işləməyəndə məsuliyyətə cəlb edilmir, amma ayrılandan sonra aliment ödəməyəndə cəlb edilir.

Boşanmaların digər səbəbi isə xəyanətdir.

Sosial şəbəkələr xəyanətlərin artmasına səbəb olur. Qadın və ya kişi sosial şəbəkədə kimləsə tanış olur və düşünür ki, ərim, arvadım onsuz da bilməyəcək. Amma artıq texnologiya inkişaf edib. Bütün şəbəkələrin mesajlarını tutmaq mümkündür.

Kişilər unutmamalıdırlar ki, qadınla ailə həyatı quran zaman atası evindən çıxanda əxlaqsız olmur ki?! Əxlaqsız idisə, niyə alırdın? Deyildisə, deməli, sənin əlində əxlaqsız olub.

Qadınlar da ailə həyatına müvəqqəti baxırlar. Yəni ərə sadəcə ərə getmək, ana olmaq xatirinə gedirlər. Düşünmürlər ki, həyat yoldaşı olmaq da özü də gözəl statusdur.

Qızlar oğlanı tanımadan ailə həyatı qururlar. Bəzən olur ki, onlar yataq otağından çıxandan sonra yarım saat söhbət edə biləcək mövzu tapa bilmirlər.

Bu səbəbdən də ailələr uzun müddətli olmur.

- "Aliment Fondu"nun yaradılması müzakirə edilir.

- Fondun yaradılması bir neçə il əvvəl də müzakirə edilmişdi. Ancaq bu müzakirələr reallaşmadı. Çünki bu fondun yaradılması boşanmaların artmasına səbəb ola bilərdi. Məsələn, qadınlar onu incidən həyat yoldaşları ilə birlikdə yaşamaqdan imtina edəcəkdilər. Düşünəcəkdilər ki, əgər fond varsa, heç kişini aliment üçün məhkəməyə də verməyə ehtiyac qalmayacaq. "Aliment Fondu" uşağa aliment ödəyəcək.

Ancaq bu gün qadınlar düşünürlər ki, boşansalar, aliment də ala bilməsələr, uşağa tək baxa bilməyəcəklər. Məcburən güzəştə gedib, ailə həyatını davam etdirməli olurlar.

Bu səbəbdən də fondun müzakirəsi dayandırıldı.

Hesab edirəm ki, uşaq pulunun verilməsi müzakirə edilməlidir. Məsələn, hər uşağa 100 manat uşaq pulu ayrılsa, boşanma olsa belə, kişi öz payına düşən 75 manatı ödəməli olar.

Ölkədə hamı 2000 manat maaş almır. Normal maaş 500 manatdır. Əgər bu maaşı alan kişinin iki uşağı varsa, uşaqlara 350 manat ödənilməlidir. Bu da təbii ki, kişiyə də sərf etmir. Mən hesab edirəm ki, kişilərə güzəşt etmək lazımdır. Aliment verməyən kişi Azərbaycan üçün üz qarasıdır. Ancaq kişilərin gəlirləri də nəzərə alınmalıdır.

8
Teqlər:
müsahibə, problemlər, kişi, qadın, hüquqşünas
Təlim hərbi hissələrində gənc əsgərlərin qəbulu

MN: Təlim hərbi hissələrində gənc əsgərlərin qəbulu davam edir

4
(Yenilənib 19:44 19.01.2021)
Hərbi qulluqçular şəxsi heyətin qəbul məntəqələrində qeydiyyatdan keçdikdən sonra müvafiq bölgü aparılır.

BAKI, 19 yanvar — Sputnik. "Azərbaycan Respublikası vətəndaşlarının 2021-ci il yanvarın 1-dən 30-dək müddətli həqiqi hərbi xidmətə çağırılması haqqında" ölkə Prezidenti İlham Əliyevin müvafiq sərəncamının icrası ilə bağlı Azərbaycan Ordusunun təlim hərbi hissələrində gənc əsgərlərin qəbulu keçirilir.

Bu barədə Sputnik Azərbaycan-a Müdafiə Nazirliyindən məlumat verilib.

Müdafiə nazirinin əmri ilə gənc əsgərlərin sağlamlığının qorunub saxlanılması məqsədilə yoluxucu xəstəliklərə qarşı profilaktik və əks-epidemik tədbirlər görülür. Eyni zamanda, müxtəlif mövsümi xəstəliklərdən qorunmaqla bağlı şəxsi heyətlə müvafiq maarifləndirmə işləri aparılır və onların sağlamlığına nəzarət məqsədi ilə gündəlik termometriyası keçirilir.

Hərbi qulluqçular şəxsi heyətin qəbul məntəqələrində qeydiyyatdan keçdikdən sonra müvafiq bölgü aparılır.

  • Təlim hərbi hissələrində gənc əsgərlərin qəbulu
    © AR Ministry of Defence
  • Təlim hərbi hissələrində gənc əsgərlərin qəbulu
    © AR Ministry of Defence
  • Təlim hərbi hissələrində gənc əsgərlərin qəbulu
    © AR Ministry of Defence
1 / 3
© AR Ministry of Defence
Təlim hərbi hissələrində gənc əsgərlərin qəbulu

Tibb məntəqələrində hərbi həkim komissiyası tərəfindən müayinə olunduqdan sonra hərbi qulluqçuların hər birinə tibbi kitabça açılır və gənc əsgərlərə müvafiq qaydada məişət xidmətləri göstərilir.

Hərbi qulluqçular bütün təminat növlərinə qoyulurlar və normalara uyğun olaraq qış hərbi geyim forması ilə təmin edilirlər.

Gənc əsgərlərin hazırlığı proqramına uyğun olaraq şəxsi heyətə sıra hazırlığı məşğələləri keçirilir və onlara hərbi intizamın möhkəmləndirilməsi üzrə mühazirələr oxunur.

4