Vüsalın atası Yavər Abbasov, anası Xuraman xanım və özü

Öz gələcəyindən kəsib valideynlərinin bu gününə "calayan" uşaq

318
(Yenilənib 11:32 26.08.2016)
O, həm revmatizm xəstəliyindən əziyyət çəkir, həm də onurğa sütununda əyrilik var. Buna baxmayaraq, özündən daha ağır xəstə olan ata-atasını yaşatmaq məcburiyyətindədir.

İradə Cəlil, Sputnik Azərbaycan

BAKI, 26 avq — Sputnik. Danışanda hər birimiz ağız dolusu "Uşaqlar bizim gələcəyimizdir" deyirik. Və çox zaman da bu ifadəni işlədənlər uşaq hüquqlarının pozulmasına göz yumurlar. Bu gün bir uşaq küçələrə düşürsə, bir uşağın əməyi istismar edilirsə, bir uşaq təhsildən yayınırsa, burada cəmiyyət olaraq hamımız günahkarıq.

Bir müddət əvvəl sosial şəbəkələrdə Vüsal adlı bir uşağın iş axtarmasına dair elanla qarşılaşmışdım. Vüsal işləməyi çox sevdiyini, ata-anasına baxmaq üçün, yalnız onun çalışa biləcəyini qeyd etmişdi.

Axtarıb Vüsalı tapdım. Evinə getdim. Ata-anası ilə söhbətləşdim. Və Vüsalın işə olan ehtiyacının əsl səbəbini öyrəndim.

Vüsalın atası — Abbasov Yavər Qaçay oğlu 1960-cı ildə Ağdamda dünyaya gəlib. Gəncliyi müharibə dövrünə təsadüf edən edən Yavərin həyatı elə əvvəldən gətirməyib.

"1994-cü ildə Ağdamın Mahrızlı kəndində döyüş gedərkən, evimizin yanına QRAD mərmisi düşmüşdü. Ondan sonra mən özümü çox pis hiss etməyə başladım. Qulaqlarım batmış və başımda kəskin ağrılar yaranmışdı. Valideynlərimlə birlikdə Mingəçevir şəhərinə köçdük. Ailəni saxlamaq üçün mən Bakıya işləməyə gəldim. Çünki valideynlərim təqaüdə möhtac idilər", — Y. Abbasov.

Onun Bakıda işləri pis getmir: "Amma səhhətim imkan vermirdi. Tez-tez baş ağrılarından əziyyət çəkirdim. Cavan idim, düşünürdüm ki, yəqin keçib gedər. Həmin vaxtlarda bazarda gözətçi idim. Bir gün gecə məni başımdan vurdular. O hadisədən sonra ağrılarım daha da artırdı. Xəstəlik irəliləyirdi. Mən isə yenə də düşünürdüm ki, keçib gedər".

Dediyinə görə, əvvəldən ailə qurmaq istəyi olmayıb, lakin atasının təkidi ilə ailə həyatı qurub. Anası dünyasını dəyişəndən sonra Yavər ailə həyatı qurur və həyat yoldaşı ilə birlikdə Bakıya köçür: "Anam rəhmətə gedəndən sonra atam dedi ki, "mən də öləcəyəm, tək qalacaqsan, evlən". Mən də evləndim. Uşaqlarm dünyaya gəldi. Keşlə qəsəbəsində bir həyət evində qalırdıq. Bir gün gəldim ki, 5 yaşlı qızım hovuza düşüb, boğularaq ölüb. Həmin vaxt mən işdə idim, yoldaşımın da xəbəri olmayıb".

Yavər Abbasov
© Sputnik / İrade CELIL
Yavər Abbasov

"Qızımdan sonra mən bir də xəstələndim. Onu itirmək mənə ağır təsir etmişdi. Amma hər dəfə birtəhər ayağa qalxıb işləyir, evimi saxlamağa çalışırdım. Ta ki, 3 il bundan əvvəl xəstəxanaya gedənə kimi", — Yavər danışır.

Xəstəxanada onun başını tomoqrafiya edirlər. Məlum olur ki, başında işemik xəstəlik var. Bir müddət müalicə alır, sonra ona 3-cü qrup əlillik dərəcəsi verilir. Və Y. Abbasov əmək qabiliyyətini tamamilə itirir.

Vüsal anası Xuraman xanımla
© Sputnik / Irade CELIL
Vüsal anası Xuraman xanımla

"Son zamanlar özümü çox pis hiss edirdim. Halsızlıq, yuxusuzluq, boğulmalar olurdu. Saat 3-4-dür, mən oyağam, yata bilmirəm. İşləyə də bilmirəm. Həkimlər deyirlər ki, 5 kq-dan artıq ağır yük qaldırmaq olmaz. Yol gedərkən təngnəfəslik yaşayıram. 150 manat təqaüd alıram. Həddən artıq borcum var. İndi 6 ildir ki, bu otaqda kirayə alıram. Mənim Bakıda qeydiyyatım da yoxdur. Oğlum Vüsal da xəstəliyə görə 70 manat alır. Biz dolana bilmirik", — müsahibimiz nəql edir.

Abbasovlar ailəsi hazırda Əhmədli qəsəbəsində kirayədə yaşayır. Evin kirayə haqqı 90 manatdır və kommunal xərclə bərabər 110 manata başa gəlir.

2015-ci ilin oktyabrında Yavərin həyat yoldaşını avtomobil vurur. Xuraman kəllə-beyin travması aldığı üçün uzun müddət yataq xəstəsi olur. Ancaq ayağa qalxdıqdan sonra da onun psixoloji problemləri yaranır.

Xatirə İsmayılova
© Sputnik / Irade CELIL

Xuraman avtomobil qəzasından sonra müxtəlif fobiyalarının əmələ gəldiyini deyir: "Son günlər mənə elə gəlir ki, üzərimə həşərat gəlir. Suyu qan kimi görürəm. Gecələr qorxudan yuxudan ayılıram. Yoldaşımı, Vüsalı tanımıram. Bir müddət keçdikdən sonra özümə gəlirəm ki, evdəyəm, ailəmləyəm. Bir də güclü yaddaşsızlıq yaranıb məndə, avtobusa əyləşirəm, bir də o zaman yadıma düşür ki, düşəcəyim yeri keçmişəm".

Qadın, uşaqlığı müahribə dövrünə təsüdf etdiyi üçün 5-ci sinifə qədər təhsil ala bilib. Ona görə də, əlindən heç bir iş gəlmir. Avtomobil qəzasına düşməmişdən öncə evlərdə və ofislərdə xadimə işləyirmiş. Qəzadan sonra isə bu işi də bacarmır.

Vüsal ailənin yeganə övladıdır. 14 yaşı var, bu il 9-cu sinifə gedəcək. Ancaq valideynlərinin imkanı olmadığı üçün, ailəsini saxlamaq məcburiyyətindədir. Ən ağırı da odur ki, o, həm revmatizm xəstəliyindən əziyyət çəkir, həm də onurğa sütununda əyrilik var. Buna görə aylıq 70 manat təqaüd alır.

Vüsalın xəstəliyi ilə bağlı Tibbi Sosial Ekspert Komissiyasının rəyi
© Sputnik / Irade CELIL
Vüsalın xəstəliyi ilə bağlı Tibbi Sosial Ekspert Komissiyasının rəyi

Bir müddət əvvəl ona iş təklif edilib və Vüsal da sevinə-sevinə o işə gedib, amma: "Günümə 4 manat verirdilər. Çox yorulurdum. Mən istəyirəm ki, atam-anam yaxşı yaşasın. İkisi də xəstədir. İmkanlı insanlardan xahiş edirəm ki, bizim ailəyə kömək etsinlər. Mənim atamın borcları da var. Mən işləsəm, oxuya bilməyəcəyəm, amma mən oxumaq da istəyirəm".

Vüsal özünü "sındırmır", gülümsünür, danışır. Ayağa qalxıb sağollaşarkən onu otaqda görmürəm. Bayırdan evin şəklini çəkəndə isə onun bir küncə qısılıb ağladığının şahidi oluram.

14 yaşlı bu insanın taleyi, hansı həyatı seçəcəyi bizdən — səndən, məndən asılıdır. Gəlin, onun gələcəyinin yaxşı olması üçün əlimizdən gələni əsirgəməyək. Bu ailəyə kömək etmək istəyənlər əlaqə telefonunu redaksiyamızdan əldə edə bilərlər.

318
Teqlər:
Xuraman Abbasova, Vüsal Abbasov, Yavər Abbasov, maddi sıxıntı, həyat hekayəsi, ailə, həyat, xəstəlik, yeniyetmələr, uşaq
Əlaqədar
Keçmiş məhbusun dözülməz həyat hekayəsi
"Azadlıq parkı"nda yaşanan ailə dramı
Bu yükü kimsə daşıya bilməzdi...
Bu eşq hekayəsini sonadək dinləmək ürək tələb edir
Roman kimi həyat, yaxud bir təbəssümün arxasındakı sirr
Televizora baxan adam, arxiv şəkli

Serial mövsümü başlayır - telekanallar nəyi göstərəcək?

0
(Yenilənib 19:26 21.09.2020)
Azərbaycan teleməkanında maraqla izlənən, "Youtube" kanalında daim trenddə olan, ən uzunömürlü seriallardan biri – qalmaqallı "Uçurum" serialı artıq 3-cü mövsümünə yeni ailələr, yeni hadisələr, yeni ab-havayla başlayacaq

BAKI, 21 sentyabr — Sputnik. Bu gün Azərbaycan kanallarında yeni serial mövsümü başlayır. "Oscar" Film Production da bu gün tamaşaçıların görüşünə iki layihəylə gəlir.

Azərbaycan teleməkanında maraqla izlənən, "Youtube" kanalında daim trenddə olan, ən uzunömürlü seriallardan biri – qalmaqallı "Uçurum" serialı artıq 3-cü mövsümünə yeni ailələr, yeni hadisələr, yeni ab-havayla başlayacaq. Baş prodüseri Yaşar Əhmədov, quruluşçu rejissoru Vüsal Məmmədov, ssenari müəllifləri Xanım Aydın və Yeganə Cansail olan serial ARB kanalında sentyabrın 21-dən etibarən həftəiçi dörd gün saat 21.00-da ekranlara çıxacaq.

Bu gün cəmiyyətdəki bir çox problemləri özündə əks etdirən, ötən mövsümdə sevilən, ən çox baxılan seriallardan olan "Bir qadın" serialı 2-ci mövsümünə sentyabrın 21-də saat 21.40-da ATV kanalında başlayır. Baş prodüseri Yaşar Əhmədov, quruluşçu rejissoru Şahin Qəhrəman, ssenari müəllifi Çinarə Nüsrətli olan serial həftəiçi dörd gün yayımlanacaq.

0
Teqlər:
telekanallar, milli teleseriallar, serial
Əlaqədar
Əfsanəvi məhəbbət: Azərbaycanın dahisi haqda serial necə ərsəyə gəldi
"Serial" davam edir: Dövlət pullarını necə "yedikləri"nin sxemini açıqladılar - VİDEO
Serial çəkilişlərinə başlamaq onlara baha başa gəldi
Cazibədar rəqqasə serial çəkir
Məşhur aktyor serial çəkilişləri zamanı vəfat edib
Yaşlı insanlar, arxiv şəkli

Pensiya yaşı artırılacaq? Rəsmi açıqlama

6
(Yenilənib 19:22 21.09.2020)
"Kişilər üçün 65 yaş artıq pensiyaya çıxmaq üçün müəyyən edilən sonuncu yaş həddidir. Bundan sonra kişilərin pensiya yaşı ilə bağlı artım olmayacaq".

BAKI, 21 sentyabr — Sputnik. Azərbaycanda bundan sonra kişilərin pensiya yaşının artırılması nəzərdə tutulmur".

Sputnik Azərbaycan-ın məlumatına görə, bunu Əmək və Əhalinin Sosial Müdafiəsi Nazirliyi nəzdində Dövlət Sosial Müdafiə Fondunun (DSMF) əməkdaşı Ayxan Məcidov "Pensiya təyinatı və hesablanma qaydaları"na həsr olunan canlı bağlantıda deyib.

A.Məcidov qeyd edib ki, hazırda yaşa görə əmək pensiyasının təyin edilməsi üçün kişilər üçün yaş həddi 65, qadınlar üçün 62 yaşdır: "Kişilər üçün 65 yaş artıq pensiyaya çıxmaq üçün müəyyən edilən sonuncu yaş həddidir. Bundan sonra kişilərin pensiya yaşı ilə bağlı artım olmayacaq. Artıq 65 yaşı olan kişilər davamlı olaraq pensiyaya çıxma imkanı əldə edə biləcəklər. Qadınlar üçün isə 62 yaş 30 iyun 2021-ci il tarixinə kimi qüvvədə qalacaq. Ondan sonra isə pensiya üçün yaş həddi 6 ay artırılacaq".

O deyib ki, son 2 ildə pensiya sahəsində ciddi islahatlar aparılıb, pensiyaçıların pensiyaya çıxma imkanlarının mülayimləşdirilməsi prosesi baş verib.

Fond rəsmisi deyib ki, 2019-cu il 1 yanvar tarixindən pensiya yaşına çatan şəxslərin 25 illik stajının tanınması əksər insanların pensiyaya çıxma imkanlarını artırdı:

"1 yanvar 2006-cı il tarixdən 1 iyul 2018-ci il tarixədək şəxsin minimum staja malik olması əsas şərtlərdən idi. Şəxsin 1 ay belə stajı var idisə, onun 2006-cı il tarixədək stajı tanındı. 25 il də pensiyaya çıxmaq üçün tələb olunan norma olduğu üçün minlərlə vətəndaş pensiyaya çıxmaq imkanı əldə etdi".

6
Teqlər:
Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu, Azərbaycan Respublikasının Əmək və Əhalinin Sosial Müdafiəsi Nazirliyi, Əmək və Əhalinin Sosial Müdafiəsi Nazirliyi, "Əmək pensiyaları haqqında" qanun, pensiya təminatı, əmək pensiyaları, əmək pensiyası, pensiya yaşı, pensiya
Əlaqədar
Pensiya almaq istəyənlərə şad xəbər - stajları bir neçə il artacaq
Yaşa görə orta aylıq pensiya artıb
Pensiya və yardım kartı itənlərə xəbərdarlıq
Kişilər və qadınlar üçün yeni pensiya yaşı müəyyənləşdi