Çirkli su. Arxiv şəkli

Turizm cənnətində krandan palçıq gəlir

6117
(Yenilənib 18:36 09.08.2016)
Şəkililər su idarəsindən onların suyu içib xəstələndikləri üçün kompensasiya istəyə bilərlər.

Şahpəri Abbasova, Sputnik Azərbaycan

BAKI, 9 avq-Sputnik. Şəki sakinləri illərdir, inci saflığı olan su üzünə həsrət qalıblar. Xüsusilə də yaz aylarında, yağışlar dövründə bulaqlardan su əvəzinə sözün əsl mənasında palçıq gəlir. Su nə təmizlənir, nə də ki, sterilizə olunur. Ümumiyyətlə, şəhərin su kanalizasiya sisteminin köklü surətdə dəyişdirilməsinə ehtiyac var.

Bu problem Şəkinin bütün sakinlərinin illərdir həllini gözlədiyi məsələdir. İlin əksər vaxtlarında suyun lilli gəlməsi artıq adi hal alıb. Şəhərin su təmizləyici qurğularının işlək vəziyyətdə olmaması, mövcud sistemin əhalinin tələbatını ödəyə bilməməsi, su təmizləyici aqreqatların yoxluğu vəziyyətin acınacaqlı hal almasına gətirib çıxarıb. Əsasən də yağmurlu havalarda Şəkidəki sularda "inci saflığı"ndan əsər-əlamət qalmır.

Şəki sakini Gülnaz Qaziyeva Sputnik-ə bildirib ki, krandan gələn palçığa görə, gəlib hər ay onlardan su pulu yığırlar. Artıq şəkililər bu qənaətə gəliblər ki, su idarəsindən onların suyu içib xəstələndikləri üçün kompensasiya istəsinlər:  

"Deyirəm, siz bizə su verin, biz də pulunu verək. Bu vəziyyətdə, əksinə, siz bizə pul ödəyin ki, biz bu suyu içdikdən sonra gedib müalicə olunaq."

O qeyd edib ki, Şəki Azərbaycanın dilbər guşələrindən biridir. Hər il bura minlərlə xarici və yerli turist gəlir. Sözügedən bölgədə turizmi inkişaf etdirmək, turistlərin istirahətinin yaxşı təmin olunması üçün təmiz su vacib şərtlərdən biridir.

Su problemi ilə qarşılaşan turistlərdən biri də Nurlan Kərimovdur: "Şəkinin təbiəti, qədimiliyi məni cəlb etsə də, su problemi burada uzun müddət qalmağımıza mane oldu. Şəkiyə gedəndə fikirləşdim ki, orada doyunca bulaq suyu içərəm. Ağlıma da gəlməzdi ki, Şəkinin suyu paytaxtın suyundan da çirkli ola bilər. Ona görə də istirahət etmək üçün başqa bölgələrə üz tutmağa məcbur olduq."

Taxtakörpü su anbarı. Arxiv şəkli
© Azərsu ASC-nin mətbuat xidməti
Əlbəttə, həyat mənbəyi olan suyun bu cür çirkli olması böyükdən tutmuş uşağadək hər kəsin sağlamlığına ciddi təhlükədir. Bu sudan istifadə isə insanlarda müxtəlif xəstəliklərin yaranmasına rəvac verə bilər. 

Ancaq Şəki Su Kanal TSC-dən Sputnik-ə bildiriblər ki, məsələdən xəbərdardırlar və hazırki vəziyyətdə bu problemin həlli qeyri-mümkündür. Lakin şəhərin içməli su ilə təminatının yaxşılaşdırılması istiqamətində mərhələli şəkildə işlər həyata keçirilir. Artıq ilk iki mərhələ yekunlaşıb.

İllərdir şəkililərin ən ağrılı yeri olan su problemi iki il sonra, yenə bir əmma çıxmazsa, sona yetəcək. Şəkililər hələ 2 il də palçıqlı sudan istifadə etmək məcburiyyətindədilər.

6117
Teqlər:
palçıq, su, turizm, Şəki, Azərbaycan
Əlaqədar
Azərbaycanda su ehtiyatları tükənir
Diqqət: bu gün Bakının bəzi yerlərində içməli su olmayacaq
Bakının 7 rayonunda 1 sutka su problemi yaşanacaq
Əhaliyə verilən su ilə bağlı təhlükəli xəbərdarlıq
Bakının bu ərazisində 2 gün su olmayacaq
 Nizami Gəncəvinin heykəli

Bizə Nizami gərək: "Hər kəs qonşusuna azərbaycanlı kimi baxsaydı, dünyada problem olmazdı"

8
(Yenilənib 17:38 28.01.2021)
"Bəzən xaricdən gələn nizamişünaslar Gəncəvi haqqında elə maraqlı məqamlara toxunurlar ki, heç biz bunu bilmirik. Gəncəvini "böyük Şeyx", "böyük alim" adlandırmaları bizi qürurlandırır"

Şahpəri Abbasova, Sputnik Azərbaycan

BAKI, 28 yanvar — Sputnik. "Bir sloqanımız var: "Hər bir millətin Nizami Gəncəvisi olsaydı, bu dünya sülh və əmin-amanlıq yeri olardı. Yəni, hər kəs öz qonşusuna azərbaycanlılar kimi baxsaydı, dünyada problem olmazdı". Biz də istəyirik ki, dünyaya çatdıraq ki, biz Nizaminin varisləriyik, biz yalnız sülh istəyirik".

Nizami Gəncəvi Beynəlxalq Mərkəzinin Himayəçilər Şurasının sədri Elnur Əliyev "Nizami Gəncəvi İli" çərçivəsində hansı addımların atılacağı ilə bağlı Sputnik Azərbaycan-la söhbətində vurğulayır ki, şəxsən tanıdığı xarici ölkələrdən olan insanların Nizaminin əsərlərini maraqla oxuması, onu oxuyaraq tanıması faktına çox sevinir.

"Hazırda "Nizami İli" çərçivəsində müxtəlif mövzuda seminarlar təşkil olunur. Onlayn formatda keçirilən həmin seminarlara xarici ölkələrdən ekspertlər, Nobel mükafatçıları, siyasi rəhbərlər cəlb olunurlar. Bundan başqa, Nizami irsinin təbliği və təşviqi ilə məşğuluq", - deyən Əliyev əlavə edir ki, ölkəmizdə 7-dən 77-yə qədər hər kəs Nizamini tanıyır, yaradıcılığı ilə tanışdır.

İlham Əliyevdən 2021-ci illə bağlı qərar>>

Müsahibimiz bildirib ki, mərkəzin məqsədi dahi şairi dünyaya Azərbaycan şairi kimi təqdim etməkdir: "Biz bu təbliğata ABŞ, Hindistan, Pakistan, Avstraliya, Böyük Britaniya və qonşu ölkələrdən nüfuzlu alimləri də cəlb edirik. Demək olar ki, dünyanın dörd bir yanından olan nizamişünaslar və şərqşünaslarla sıx əməkdaşlıq edirik. Mərkəz olaraq Azərbaycanda yerləşirik. Amma dünyada Nizami ətrafında aparılan təhlilləri, elmi-akademik təhlilləri bir araya toplayırıq".

"Biz Nizamini təbliğ etməklə eyni zamanda da öz mədəniyyətimizi təbliğ etmiş oluruq", - həmsöhbətimiz deyib.

Mərkəzin sözçüsü qeyd edib: "Məqsədimiz budur ki, insanlıq Nizami Gəncəvidən bəhrələnsin. Onun adının tanınması ilə bağlı bir sıra addımlar atılacaq. Adına küçələr salınmaqla, heykəllər qurmaqla, eyni zamanda, elm aləmində Nizaminin əsərlərinin təşviq edilməsi onu dünyaya bir daha tanıdacaq. Başqa bir layihəmiz də var. İstəyirik ki, Azərbaycan universitetlərində öz tələbələrimizə və xarici tələbələrimizə xaricdən dəvət olunmuş nizamişünasların mühazirələrini təşkil edək. Bəzən xaricdən gələn nizamişünaslar Gəncəvi haqqında elə maraqlı məqamlara toxunurlar ki, heç biz bunu bilmirik. Gəncəvini "böyük Şeyx", "böyük alim" adlandırmaları bizi qürurlandırır".

XIX əsrin əvvəllərinə qədər Yaxın Şərqdə hakimiyyətə gələn insanlar, varlı şəxslər özlərinə borc biliblər ki, şəxsi kitabxanalarında Nizaminin "Xəmsə"si olsun. Həmin dövrün hökmdarları, zəngin insanları miniatür "Xəmsə" hazırladıblar. 

Gəncədə inşa olunan Nizami Gəncəvi Muzeyi
© Official website of President of Azerbaijan Republic
Bu "Xəmsə"lər dünyanın bir çox ölkələrinə yayılıb – muzeylərdə, kitabxanalarda və şəxsi kolleksiyalarda saxlanılır. 100-150 civarında miniatür "Xəmsə" var. Əliyevin sözlərinə görə, həmin "Xəmsə"lərdən ibarət kitab dərc ediləcək: "Müxtəlif ölkələrin muzeylərindən, şəxsi kolleksiyalarından toplanmış miniatürlərin nüsxəsini toplayıb, həmin kitabda dərc edəcəyik. Bu, beynəlxalq bir kitab, kolleksiya kitabı olacaq. Kitabda Nizami haqqında məlumatlar da olacaq. Böyük bir layihədir. İlin ortasına yaxın hazır olacaq. Öncə iki dildə - ingilis və Azərbaycan dillərində dərc olunacaq".

"Ola bilər ki, hər kəsin "Xəmsə"ni oxumağa vaxtı olmasın. Məqsədimiz odur ki, dahi şairin bədii və fəlsəfi irsini daha əlçatan edək. Ona görə də biz Nizaminin gənclərdə gördüyü dəyər haqqında platforma yaratmaq istəyirik. Başqa bir layihə də var. Biz Koreya ilə işləmək istəyirik. Orada Azərbaycan çox az tanınır. Nizami də az tanınır. Biz istəyirik, ilkin mərhələ olaraq orada Gəncəvi haqqında müzakirə aparaq. Artıq tərəfdaşlarımızı müəyyənləşdirmişik", - deyə mərkəzin sözçüsü fikrini tamamlayıb.

8
Teqlər:
dünya, Koreya, kitab, təbliğat, seminar, Nizami Gəncəvi Beynəlxalq Mərkəzi, Nizami Gəncəvi
İnəklər, arxiv şəkli

Beyləqanda mütəşəkkil dəstə ələ keçib

5
(Yenilənib 19:59 28.01.2021)
Onların digər cinayət əməllərində iştirakının olub-olmamasının müəyyən edilməsi istiqamətində tədbirlər davam etdirilir.

BAKI, 28 yanvar — Sputnik. Beyləqan Rayon Polis Şöbəsinin əməkdaşları tərəfindən ötən ilin noyabr-dekabr və cari ilin yanvar aylarında rayon ərazisində yerləşən otlaq sahələrindən və tövlələrdən silsilə şəkildə mal-heyvan oğurlayaraq vətəndaşlara zərər vuran şəxslər aşkar olunaraq saxlanılıb.

Daxili İşlər Nazirliyinin (DİN) Mətbuat Xidmətinin Bərdə regional qrupundan Sputnik Azərbaycan-a verilən məlumata görə, bir qrup rayon sakini Beyləqan RPŞ-yə ərizə ilə müraciət edərək onlara məxsus iribuynuzlu heyvanların oğurlandığı barədə məlumat veriblər. Məlumatla əlqədar polis əməkdaşları tərəfindən həyata keçirilmiş əməliyyat-axtarış tədbirləri nəticəsində oğurluqları törətməkdə şübhəli bilinən İmişli rayon sakini, əvvəllər məhkum edilmiş Raci Cəfərov, Beyləqan rayon sakini Əhliman Abbasov və Şamaxı rayon sakini Etibar Nuriyev saxlanılıb. Araşdırmalarla onların 8 baş iribuynuzlu heyvanı oğurlayaraq rayon sakinlərinə 8750 manat dəyərində ziyan vurduğu müəyyən edilib. Hər 3 şəxs dindirilmə zamanı törətdikləri cinayət əməllərini etiraf edib.

Faktla bağlı Beyləqan Rayon Polis Şöbəsində cinayət işi başlanılıb. Onların digər cinayət əməllərində iştirakının olub-olmamasının müəyyən edilməsi istiqamətində tədbirlər davam etdirilir.

5
Türkiyə Prezidenti Rəcəb Tayyib Ərdoğan koronavirusdan peyvənd vurdurur, arxiv şəkli

Ərdoğandan müjdə: Türkiyə üçüncü yerdədir

0
(Yenilənib 20:03 28.01.2021)
Türkiyə prezidenti: "Dünyanın koronavirusla mübarizə apardığı dövrdə elm adamlarımızın əldə etdiyi nailiyyətləri də izləyirik. 436 alim peyvənd və dərman hazırlamaqla bağlı 17 layihə həyata keçirir".

BAKI, 28 yanvar — Sputnik. Koronavirusla mübarizə üçün Türkiyənin yerli istehsalı olan üç yeni növ peyvəndin sınağına başlanılır. Sputnik Azərbaycan "Milliyet"-ə istinadən xəbər verir ki, bunu Türkiyənin Prezidenti Rəcəb Tayyib Ərdoğan bildirib.

"Dünyanın koronavirusla mübarizə apardığı dövrdə elm adamlarımızın əldə etdiyi nailiyyətləri də izləyirik. 436 alim peyvənd və dərman hazırlamaqla bağlı 17 layihə həyata keçirir. Alimlərimizin iş və təcrübələri dünyaya örnək olaraq göstərilir. Üç yeni növ peyvəndin sınağına başlanılır. Yeni növ peyvəndin yerli və milli istehsalı məsələsində özəl sektoru da səfərbər etdik. Ümumdünya Səhiyyə Təşkilatının məlumatına görə, ABŞ və Çindən sonra ən çox peyvənd layihəsini həyata keçirən ölkəyik".

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 100,8 milyonu keçib, 2,17 milyondan çox adam isə virus səbəbilə ölüb.

Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.

0
Teqlər:
Türkiyə Prezidenti Rəcəb Tayyib Ərdoğan, Rəcəb Tayyib Ərdoğan, Ərdoğan, Koronavirus, epidemiya, COVID-19