Goranboy rayonunun Rəhimli kənd sakini Elnur Tağıyev

On beş manata villa inşa edir

342
(Yenilənib 17:01 28.07.2016)
Düzəltdiyi fiqurların əksəriyyətinin qiyməti 25-30, ən baha satdığı isə 70 manat olub. Son yığdığı və 30 gün üzərində işlədiyi Eyfel qülləsini isə 25 manata satıb.

İlham Mustafa, Sputnik Azərbaycan

BAKI, 26 iyul — Sputnik. Bir çox sənət növləri var ki, öz qeyri-adiliyi ilə hər kəsdə təəccüb doğurur. Bu cür yaradıcılıqla məşğul olan insanlar ən adi şeylərdən belə, zövq oxşayacaq məmulatlar yarada bilirlər. Bir qism sənətkarlar üçün bu, qazanc məqsədi daşısa da, elələri də var ki, yalnız daxildən gələn bir səslə yaradıcılığa başlayır və davam etdirirlər. Bu cür insanlardan biri də Goranboy rayonunun Rəhimli kəndində yaşayan Elnur Tağıyevdir.

O, yalnız kibrit çöplərindən istifadə edərək müxtəlif fiqurlar və suvenirlər düzəldir. Rəngli kibritlərlə onlara bəzək vurur, canlandırır. Bu iş Elnur üçün hobbi kimi başlasa da, sonradan ürəyində yaranan ağrıların sakitləşdirilməsi, əsəbdən və stressdən uzaq qalmaq üçün bir vasitəyə çevrilib.

Həmsöhbətimiz bu sənətə 12 il əvvəl başlayıb. İlk dəfə 11-ci sinifdə oxuyarkən türk kanallarından birində kibrit çöplərindən düzəldən gitara gördükdən sonra bu işə həvəs göstərib.

"Baxdım ki, bunu mən də düzəldə bilərəm. Həmin gün məni elə bil kimsə məcbur elədi ki, dur bu işi gör, sən bacaracaqsan. Bir şam, bir də kibrit götürərək işə başladım. Kibrit çöplərini düzdüm və şamı əridərək onları yapışdıraraq ürək fiquru yığdım. O, mənim ilk işim oldu. Bu sənəti kiminsə əlinə baxaraq öyrənmədim. Heç kim mənə göstərməyib ki, nəyi necə etməliyəm", — deyir Elnur Tağıyev.

Gənc usta keyfiyyətsiz kibritlər səbəbindən çox əziyyət çəkir. Hətta bu səbəbdən bir müddət işinə də ara verməli olub. Bəzən fiqurların hissələrini min bir əziyyətlə yığıb, sonradan onları yapışqanla bərkidəndə rəngi itib, kükürdləri dağılıb, zəhməti hədər gedib. İndi isə işləmək üçün tapmaq asan olmasa da, yalnız yaxşı kibrit çöpləri axtarır. Dostları da bu işdə ona kömək edir. Bakıya, Gəncəyə gedəndə yaxşı kibrit alıb gətirirlər.

"Əsərin düzəlməsinə hər bir kibrit çöpünü bir-bir seçirəm. Qılçıqlı kükürdü fərqli çöpləri ayırıb çıxardıram. Bir cərgə düzdükdən sonra üzərinə taxta yapışqanı çəkirəm ki, dağılmasın. Yapışqan 3-5 gün quruduqdan sonra, yığdığım digər hissələrlə birləşdirirəm", — deyir müsahibimiz.

Elnur suvenirlərlə bərabər, məişətdə də istifadə edilə bilən əşyalar düzəltmək fikrindədir. Artıq bu qəbildən bir qəndqabı düzəltdiyini də deyir. Lakin o, arzusunu reallaşdırmaq üçün lazım olan avadanlıqları tapmaqda çətinlik çəkir.

Kiçik həcmli mücrü-sandıqlar düzəltmək istəsə də, ona lazım olan xırda petlələri heç yerdə tapa bilmir. Onun istədiyini əldə edə bilməməsi isə həvəsdən düşməsinə səbəb olur.

Gənc sənətkarın indiyə kimi 25 əl işi olub. Əsərlərinin az olmasını arada çox fasilə verməsi ilə əlaqələndirir. Düzəltdiyi fiqurların əksəriyyətini 25-30, ən baha satdığını isə 70 manata satdığını deyir. Son yığdığı və 30 gün üzərində işlədiyi Eyfel qülləsini isə 25 manata satıb.

  • Elnur Tağıyev yalnız kibrit çöplərindən istifadə edərək müxtəlif fiqurlar və suvenirlər düzəldir
    Elnur Tağıyev yalnız kibrit çöplərindən istifadə edərək müxtəlif fiqurlar və suvenirlər düzəldir
    © Sputnik / Ilham Mustafa
  • Gənc usta üzərində 30 gün işlədiyi Eyfel qülləsinin maketini 25 manata satıb
    Gənc usta üzərində 30 gün işlədiyi Eyfel qülləsinin maketini 25 manata satıb
    © Sputnik / Ilham Mustafa
  • Elnur bu sənətə 12 il əvvəl başlayıb
    Elnur bu sənətə 12 il əvvəl başlayıb
    © Sputnik / Ilham Mustafa
  • Usta keyfiyyətsiz kibritlər səbəbindən çox əziyyət çəkir; hətta bu səbəbdən bir müddət işinə də ara verməli olub
    Usta keyfiyyətsiz kibritlər səbəbindən çox əziyyət çəkir; hətta bu səbəbdən bir müddət işinə də ara verməli olub
    © Sputnik / Ilham Mustafa
1 / 4
© Sputnik / Ilham Mustafa
Elnur Tağıyev yalnız kibrit çöplərindən istifadə edərək müxtəlif fiqurlar və suvenirlər düzəldir

"Atam əməliyyat olunurdu ürəyindən, o üzdən belə ucuz verməyə məcbur oldum. Hazır olanda çıxardım evin yanındakı çayçıya. O qədər adam yığılmışdı ki… Çayçı dedi, "bura açılandan bu qədər adam görməmişdim"", — danışır Elnur.

Xərcinə gəldikdə isə, sənətkar bu işin o qədər də xərc tələb etmədiyini bildirir: "Kibrit və taxta yapışqanı lazımdır. Bunlarla böyük bir villanın yığılması, ən uzağı 15 manat vəsait tələb edir. Amma, belə bir iş mənim 5-6 ay vaxtımı alır. Gündəlik 6-7 saat işləyirəm. Bəzən elə olub ki, səhərə kimi işləmişəm. Çox vaxt isə işin üzərində yatmışam, gecə atam qaldırıb göndərib yerimə".

Atası Vaqif kişi də Elnurun iş üstündə çox əziyət çəkdiyini deyir: "Elnurun istedadı var. Əvvəllər mən də narazıydım ki, uşaq işləri ilə məşğul olur. Ama sonra gördüm ki, hər adamın bacaracağı iş deyil. Lakin dəyər verən azdır. Çəkdiyi əziyyət dəymir satdığı qiymətə".

Elnurun həyata keçirmək istədiyi arzulardan biri də sərgi təşkil etməkdir. Lakin bu yöndə düzgün istiqamət verən olmayıb. Kömək vəd edənlər çox olsa da, həlledici məqamda heç birini tapa bilməyib. Rayon tədbirlərinə çıxardır bəzən əl işlərini.

Hazırda isə sifarişlə işləyir: "Çox sifariş verən olub, sonra götürməyib. İndi ağıllanmışam, əvvəldən beh götürürəm. Nərd sifariş elədilər, dedim, 6 aya yığaram, gündə 5-6 saat işləməklə. Qiymətdə razılaşmadıq. Dedim, sənin işləməyin lazım deyil, mən yığdığım 6 ay ərzində yanımda dayan, hazırlayıb hədiyyə edim (gülür — İ.M.)".

Elnuru azyaşlı övladı var: "Uşaq da işləməyə mane olur. Çox yarımçıq işimi dağıdıb. Əsas odur, işimdən zövq alıram. İşə başlayanda elə bir həvəs yaranır ki, Allah da bu həvəsə görə kömək edir hər şeydə. Eyni zamanda, bu iş məni rahatladır. Əsəblərimi sakitləşdirir. Mənim də ürəyimdə problem var. Həkim deyir, əsəbləşmək, stress olmaz".

Bəlkə bu səbəbdəndir ki, ilk işi olan ürək fiquru gənc sənətkarın heç kəsə verməyərək saxladığı yeganə əl işidir.

342
Teqlər:
Rəhimli, suvenir, fiqur, Elnur Tağıyev, kibrit, Goranboy, sənətkar, sənət, çöpçü
Əlaqədar
Görənləri heyrətə salan ev - bura Azərbaycandır
XIX əsrin möcüzəli hamamları
Müştərisinin geri dönəcəyini 6 il gözləyən usta
Rusları heyran edən azərbaycanlı: bu adam min illik tarixi yaşadır
Leonardo Di Kaprio, arxiv şəkli

"Apple" Di Kaprio: Hollivudda birgə filmlər çəkiləcək

88
(Yenilənib 23:28 05.08.2020)
Di Kaprio və "Apple"-in ilk layihəsi Martin Skorsezenin rejissoru olduğu "Çiçəkli ayın qatilləri" (Killers of the Flower Moon) filmi olacaq.

BAKI, 5 avqust — Sputnik. Amerikalı aktyor Leonardo Di Kaprio və onun "Appian Way" kino şirkəti "Apple" şirkəti ilə film və serialların çəkilişinə dair müqavilə imzalayıb. Sputnik Azərbaycan xəbər verir ki, bu barədə məlumatı "Hollywood Reporter" yayıb.

Di Kaprio və "Apple"-in ilk layihəsi Martin Skorsezenin rejissoru olduğu "Çiçəkli ayın qatilləri" (Killers of the Flower Moon) filmi olacaq. Film Devid Qrannanın eyni adlı romanı əsasında çəkiləcək. Filmə 200 milyon dollar maliyyə ayrılıb. Baş rolları Di Kaprio və Robert De Niro oynayacaq. Korporasiya Elizabet Mossun baş rolu oynadığı və "Appian Way Productions"ın prodüserlik etdiyi "Parlayan qızlar" (The Shining Girls) serialını da birlikdə ərsəyə gətirəcək", - deyə məlumatda bildirilir.

Di Kaprio, "Appian Way" və "Apple"-in əməkdaşlığı bununla yekunlaşmayacaq.

"Appian Way Productions" üçün bu müqavilə serial çəkilişi sahəsində ilk addım olacaq. Şirkət daha əvvəl "Paramount Pictures" və "Warner Bros" kinostudiyaları ilə filmlərin istehsalına dair sazişlər imzalamışdı.

Xatırladaq ki, bundan əvvəl Di Kaprionun şirkəti Oldos Haqslinin "Ada" adlı sonuncu romanının serial ekranlaşdırılmasına prodüserlik etməyi nəzərdə tutub.

88
Tibb işçisi Dövlət Gömrük Komitəsinin hospitalında, arxiv şəkli

Azərbaycanda koronavirusla bağlı son statistika açıqlanıb

4
(Yenilənib 23:53 05.08.2020)
Son 4 gün ərzində aktiv xəstələrin sayı 5 229-dan düşərək, hazırda müalicəsi davam etdirilən aktiv koronavirus xəstələrinin sayı 3 787-ə bərabərdir.

BAKI, 5 avqust – Sputnik. Avqustun 5-də Azərbaycanda koronavirusa yeni yoluxma hallarının müəyyənləşdirilməsi ilə əlaqədar 7 883 test aparılıb. Ötən müddət ərzində aparılan testlərin sayı 759 229-a çatıb.

Bu barədə Sputnik Azərbaycan-a Tibbi Ərazi Bölmələrini İdarəetmə Birliyindən (TƏBİB) məlumat verilib.

Hazırda müalicəsi davam etdirilən aktiv koronavirus xəstələrinin sayı 3 787-ə bərabərdir.

Avqustun 1-də isə aktiv xəstə sayı 5 229-a bərabər idi.

Xəstələrdən 255 nəfəri reanimasiyadadır ki, onlardan da 51-i süni tənəffüs cihazına qoşulub.

Xatırladaq ki, avqustun 5-də Azərbaycanda koronavirus infeksiyasına daha 193 yoluxma faktı qeydə alınıb, 492 nəfər müalicə olunaraq sağalıb və evə buraxılıb.

COVID-19 üçün götürülən analiz nümunələri müsbət çıxmış üç nəfər vəfat edib.

4
Mövzu:
Azərbaycanda koronavirus: son xəbərlər