Xanbəyim Bağırlı

"Allah həmişə gözəl qadınları başsız qoyur"

1618
(Yenilənib 11:31 11.04.2016)
Onun həyatı tam bir faciə tamaşasına bənzəyir: Həyat ona hər üzünü göstərir, sevdiklərini tək-tək itirir. İçi daim keçmişin iztirabları ilə göynəyir, amma yenə də yaşamaq üçün bir ümid işığı var...

İradə CƏLİL

BAKI, 11 apr — Sputnik. Deyirlər, Allah insanları yaradanda qoşa yaradıbmış. Sonra naşükür olduqlarını görüb onları ayırır. Və hər yarı bir tərəfə düşür, başqasının yarısı olur.

Beləliklə, insan bütün ömrünü öz yarısını axtarmaqla bitirir. Kimi tapır, kimi tapdığını düşünür, kimi tapıb tez itirir, kimi isə nakam gedir bu dünyadan…

Xanbəyim Bağırlı 3 qardaşın tək bacısı olub. Deyir ki, atası ona anasının adını qoyduğu üçün daha çox sevilirmiş ailədə. Uşaqlıqdan arzusu diktor olmaq olsa da, atası buna razılıq vermir. 8-ci sinifdə oxuyanda valideynləri onu yaxın qohumlarına nişanlayır.

"8-ci sinifdə oxuyan valideynlərim məni nişanladı. Həmin vaxt oğlan əsgərliyə gedəcəkdi. Onun yığıncağında görmüşdülər məni. Mən heç nə başa düşmürdüm, sevgi nədir, bilmirdim. Sonra oğlan hərbi xidmətə yollandı. Mənə oradan məktublar yazırdı. 1984 cü ildə ailə həyat qurdum. 19 yaşım var idi", —deyir həmsöhbətimiz.

  • Xanbəyim Bağırlı
    Xanbəyim Bağırlı
    © Sputnik / Irade Celil
  • Bəzən keçmişi fikirəşib ağlayır, bəzən gələcəyə ümidsiz yanaşır. Amma ruhdan düşmür
    Bəzən keçmişi fikirəşib ağlayır, bəzən gələcəyə ümidsiz yanaşır. Amma ruhdan düşmür
    © Sputnik / Irade Celil
  • Deyir dənizi sevir, çünki dəniz kimi onu sakitcə dinləyib, susan yoxdu
    Deyir dənizi sevir, çünki dəniz kimi onu sakitcə dinləyib, susan yoxdu
    © Sputnik / Irade Celil
  • Xanbəyim xanım nəvəsi ilə
    Xanbəyim xanım nəvəsi ilə
    © Photo : X.Bağırlının şəxsi arxivindən
1 / 4
© Sputnik / Irade Celil
Xanbəyim Bağırlı

İlk övladı 1986-cı ildə dünyaya gələn Xanbəyim xanım danışır ki, sevgi dolu, qayğısız günləri 1988-ci ilə qədər davam edib. Həmin ildən onun öz dili ilə desək, "yaralı" günləri başlayıb.

Atası dünyasını dəyişmişdi. 54 yaşında… Xanbəyim danışır ki, aradan illər keçsə də, həmin günü unuda bilmir: "Anam danışır ki, həmin gün axşam atam çox narahat imiş. Axşam anama deyib ki, "kürəyim donur". Sonra həyətə düşüb. Anam da arxasınca. Anam danışır ki, atam kürəyini balkonun sütununa sürtürmüş. Sonra bankalanmasını istəyib. Kənd yeri, anam başa düşməyib ki, onun ürəyi ağrıya bilər. Bankalayıb atamı".

Bankadan sonra ağrı kişinin qollarına yayılıb: "Atam hiss edirmiş ki, öləcək. Anama vəsiyyətini edib. Sonra deyib, "get, həkim çağır". Anam həyətə düşüb ki, gedib həkimə zəng etsin. Qayıdanda görüb ki, atam üzü qibləyə yer salaraq, yatıb. Gəlib atamı çağırıb. Atam ölübmüş"…

Xanbəyim deyir ki, atasının ölümündən 1 il iki ay sonra anası da dünyasını dəyişib: "Çox sevirdilər bir-birlərini. Anam qısqanc qadın idi. Atam özünə fikir verəndə hər zaman deyirdi ki, "Allah bilir, hara gedirsən". Bəlkə buna görə anam ondan sonra çox yaşamadı".

Sonra Xanbəyimin bir qızı və bir oğlu da dünyaya gəlir: "Yarım hiss edirdim özümü. Etibar (həyat yoldaşı —red.) çox yaxşı baxırdı ailəyə. Gecə gündüz işləyir, bizə korluq vermirdi. Bir gün onu da itirəcəyimi düşünə bilmirdim. Çünki valideyinlərimdən sonra bütün sevgimi ona bağlamışdım. Yaxşı adam idi. Amma…"

2001-ci il idi: "Qaynım gəldi ki, götür uşaqları gedək bizə. Getdik, çadır qurulmuşdu. Yoldaşımın dünyasını dəyişdiyini dedilər mənə. Başa düşə bilmirdim. Dedilər öz avtomobilində dünyasını dəyişib. Ürəyi dayanıb. Yoldaşımı da belə itirdim".

Sonradan Xanbəyimin çətin günləri başlayıb. Üç uşaqla tək başına qalan qadın ayağa durmaq, övladlarına sahib çıxmaq üçün həyat mücadiləsi aparıb: "Mən evdar qadın idim. Heç yeri tanımırdım. Çünki yoldaşım hər yerə özü aparırdı məni. Diplomumu da yandırmışdı. Yoldaşımı çox sevirdim. Nə desə, edirdim. Yaxşı adam idi".

Sonradan tək yaşamaq onun üçün çətin olur. Çətin olur, amma o, bu sınaqdan çıxa bilir: "Düşünürəm ki, Allah hər zaman gözəl qadınları başsız qoyur. Bilir ki, onlar hər vəziyyətdən çıxa biləcəklər. Mən xoşbəxt olmadım. Cavan yaşda tənha qaldım. Özümü övladlarıma həsr etdim. Amma qızım da xoşbəxt olmadı. Ayrıldı. Ana üçün ən ağır dərd övladının xoşbəxt olmamasıdır. İndi mən nənəyəm, nəvələrim var. Amma geriyə boylananda ürəyim peşmançılıqla dolur. Çox darıxıram, atam, anam, yoldaşım üçün".

İndi kirayədə yaşayır Xanbəyim xanım. Deyir bacardığı qədər çalışır ki, uşaqlarına korluq verməsin. Amma içindəki tənhalığı heç nə aradan qadıra bilmir. Bəzən keçmişi fikirəşib ağlayır, bəzən gələcəyə ümidsiz yanaşır. Amma ruhdan düşmür. Deyir, dənizi sevir. Çünki dəniz kimi onu sakitcə dinləyib, susan yoxdur.

Müsahibim danışır ki, illərin necə keçdiyini, övladlarının necə böyüdüyünü hiss etməyib. Amma hər zaman çalışıb ki, onlara atasızlığı hiss etdirməsin. Bəlkə onlar heç vaxt atasızlığı hiss etməyiblər. Amma özü bir ömür yarım qalıb.

Danışır ki, həyat yoldaşından sonra heç kimə həyatını açmayıb: "İnsanın sevdiyini itirməsi qədər ağır heç nə yoxdur. Dünya mənasızlaşır. Dayağını itirmiş kimi hiss edirsən özünü. Ondan sonra mən heç kəsi sevmədim. Həyat onunla başladı, onunla bitdi".

Bu gün yalnız, tənha olduğunu, amma övladlarına sarılanda ruhunun sakitlik tapdığını deyir. Gözlərində donub qalmışdı yaşlar. Baxışları uzaqlara, lap uzaqlara getmişdi. Özünün də xəbəri yox idi. Fikirlər darmadağın, ruh narahat…

Talelər müxtəlifdir, insanlar kimi. Bu gün də sizi bir insan taleyi ilə tanış etdik. Başınıza gələnləri bizdən oxuyun…

1618
Teqlər:
Xanbəyim Bağırlı, həyat yoldaşı, həyat hekayəsi, ana, ata, qadın
Əlaqədar
Yaşını unutmuş qoca: "Ukrayna qızları ölürdü səsim üçün"
Heyrətamiz gənc rəssam: sağlamlığına qovuşmaq istəmir
Anasına şəhid olacağını dedi və sözünü tutdu...
Xanımı Suriyaya qaçan kişinin gözyaşardıcı həyat hekayəsi
Dairəvi Alban Məbədi, arxiv şəkli

Alban tarixinə ögey yanaşma: Nazirlik abidələrə lövhə vurmaqla işini bitmiş sayır

492
(Yenilənib 21:09 18.04.2021)
"Bəzən sosial şəbəklərdə yazırlar ki, "7 manat çox bahadır". Hansı ki, o şikayət edənlər gedib bahalı restoranlarda yemək yeyib, şəklini sosial şəbəkələrdə paylaşırlar. Amma muzey üçün 7 manatı qıymırlar. Halbuki o 7 manat

Şahpəri Abbasova, Sputnik Azərbaycan

BAKI, 18 aprel — Sputnik. Hər il aprelin 18-i dünyada Beynəlxalq Abidələr və Tarixi Yerlər Günü kimi qeyd olunur. Bu əlamətdar gün Tarixi Yerlər və Abidələrin Mühafizəsi Şurasının (İCOMOS) təklifi üzrə UNESCO tərəfindən 1983-cü ildə təsis olunub. Məqsəd insanların diqqətini abidələrin və tarixi yerlərin qorunmasına yönəltməkdir. Bu əlamətdar gün Azərbaycanda da geniş qeyd olunur. Azərbaycan Milli Elmlər Akademiyası, tarix üzrə fəlsəfə doktoru Akif Məmmədli Sputnik Azərbaycan-a açıqlamasında təəssüflə bildirir ki, Azərbaycanda tarixi abidələr və muzeylərlə bağlı maarifləndirmə işləri çox zəifdir:

"Son aylar nisbətən diqqət artıb. Turizm Mədəniyyət Nazirliyindən ayrıldıqdan sonra az da olsa fərqi hiss edirəm. Mədəniyyət Nazirliyinin nümayəndələri dəfələrlə mənim yaratdığım muzeydə olublar. Amma buna baxmayaraq, tarixi abidələrin qeydə alınması ilə bağlı proses bir az da ləngiyib. Mənim yaratdığım muzeyə Amerikadan, Türkiyədən, Kanadadan, Sinqapurdan gələn xarici qonaqlar olur. Bəzən hətta yol ötən sürücülər belə yaratdığım muzeyə baş çəkir. Ən azı bəşər övladının yaratdığı dəyər olduğunu anlayırlar. Təəssüf ki, bu, Azərbaycanda bu sahəyə maraq arzulanan səviyyədə deyil".

Alim tariximizə laqeyd münasibətlə bağlı Kütləvi İnformasiya Vasitələrinə və dövlət qurumlarına səslənib:

"Çox istəyərdim ki, KİV, dövlət qrumları bu məsələyə xüsusi önəm versinlər. Tarixi abidələrimiz bizim milli pasportumuzdur. Buradakı insanların dünənki tarixidir. Sabahkı tariximiz üçün bir şahiddir. Çinlilərin bir sözü var, "keçmişini yaxşı öyrən, o, gələcəyin müəllimidir". Tarixi öyrənmək üçün kitab oxumaq kifayət deyil. Mütləq tarixi məkanları, muzeyləri də ziyarət etmək lazımdır. Məsələn, Qax rayonunun Güllük kəndində böyük təpənin üzərində çox möhtəşəm abidə var idi. Amma hazırda abidənin yalnız bünövrəsi qalmaqdadır. Bu da insanların cahilliyindən, maariflənmə işinin aparılmamasından irəli gəlir. Yaxşı olar ki, alban abidələri haqqında mediada maarifləndirmə işləri aparılsın".

Alim qeyd edir ki, o sökülən başqasının deyil, bizim - Qafqazın tarixidir.

"Azərbaycanın tarixi abidələrinin tətqiqatçısı, numizmat-alim Yevgeni Paxomov yazıb: "Misir tarixi üçün ehramların nə qədər böyük əhəmiyyəti varsa, Qafqaz tarixi üçün də Katex kəndində tikilən bu səddin bir o qədər böyük əhəmiyyəti var". Mən bu abidənin restavrasiyası üçün keçmiş Mədəniyyət naziri Əbülfəz Qarayevə dəfələrlə müraciət etdim. O söz verdi, mütəxəssislər gəldi. Həftələrlə o abidənin üzərində işlədik. Mədəniyyət Nazirliyi ora bir lövhə vurmaqla öz işini bitmiş hesab elədi", - deyə mütəxəssis bildirib.

Milli Azərbaycan Tarixi Muzeyinin Elmi-kütləvi iş və təhsil şöbəsinin mütəxəssisi Qənirə Qaforava isə deyir ki, onun çalışdığı muzeydə vəziyyət heç də pis deyil. Dediyinə görə, ziyarətçi sarıdan da əziyyət çəkmirlər:

"Bizim muzeyimizə hər zaman maraq olub. Çünki, Azərbaycanda ilk yaranan muzeydir. Burada iki muzey yerləşir – həm Milli Azərbaycan Tarixi Muzeyi və Hacı Zeynalabdin Tağıyevin xatirə muzeyi. Bura Tağıyevin yaşayış yeri olub. Gələn ziyarətçi iki muzeyi ziyarət edir. İstər yerli, istərsə də xarici ziyarətçilər hər zaman maraqla gəliblər. Pandemiya dövründə bir müddət bağlandı, amma hazırda açıqdır və ziyarətçilərimiz muzeyimizə baş çəkirlər. Hazırda Tarix muzeyi təmir-bərpa işləri ilə əlaqədar müvəqqəti bağlıdır. Amma Tağıyevin 10 otaqdan ibarət xatirə muzeyi açıqdır. Xaricilər üçün 5 manat, yerli ziyarətçilər üçün 2 manatdır, amma məktəbli və tələbələr üçün 1 manatdır. Xaricilər muzeyimizi çox maraqla izləyirlər".

Milli Xalça Muzeyinin Mətbuat xidmətinin rəhbəri Ülvina Fərzəliyeva da mövzuya münasibətini bildirib:

"Giriş 7 manatdır. 6 yaşına qədər uşaqlar üçün pulsuzdur. 6 manatdan yuxarılara 3 manat, məktəb və tələbələrə də 3 manat. Azərbaycan Xalça muzeyi ölkənin ilk İnklüziv muzeydir. Fiziki məhdudiyyətli insanlar da rahat şəkildə muzeyimizi ziyarət edə bilirlər. Onların əlil arabasında girişi, liftlərdən istifadəsi, ekspozisiyalarla tanışlıq üçün bütün şərait yaradılıb. Bundan əlavə, bizdə görmə əngəlli insanlar üçün xovsuz və xovlu texnikanın birgə tətbiqi ilə xalçalarımız üzərində ornamentlər toxunub. Bunu ənənəvi texnologiya şöbəsinin toxucuları ona görə ediblər ki, görmə əngəlli insanlarımız da xalçalara toxunub hiss edə bilsinlər. Bundan əlavə, həmin ornamentlərlə bağlı brayl əlifbası ilə məlumat verilib".

Fərzəliyeva sosial şəbəkələrdə muzeyə girişin baha olmasına narazılıq edənləri də unutmayıb:

"Deyirlər, 7 manat çox bahadır. Halbuki o şikayət edənlər gedib bahalı restoranlarda yemək yeyib, şəkillərini sosial şəbəkələrdə paylaşırlar. Amma muzey üçün 7 manatı qıymırlar. Halbuki o 7 manat bir kofenin, bir çayın puludur. Gələn insanlar deyirlər ki, "sanki bir anlıq nağıllar aləminə düşdük". Bizim muzeyimizi ziyarət edənlər uzun müddət o ab-havadan çıxmırlar". 

492
Bıçaq əlində qadın, arxiv şəkil

Bacılar arasında bıçaqlaşma baş verib - Lənkəranda

73
(Yenilənib 17:34 18.04.2021)
1990-cı il təvəllüdlü Vahidə Qəribəli qızı Şərifova sol bazunun yuxarı hissəsinin deşilmiş yarası diaqnozu ilə Lənkəran Rayon Mərkəzi Xəstəxanasına müraciət edib.

BAKI, 18 aprel - Sputnik. Lənkəranda bıçaqlanma hadisəsi baş verib.

Sputnik Azərbaycan Report-a istinadla xəbər verir ki, hadisə şəhərin Füzuli küçəsi 43 ünvanında baş verib. Belə ki, 1990-cı il təvəllüdlü Vahidə Qəribəli qızı Şərifova sol bazunun yuxarı hissəsinin deşilmiş yarası diaqnozu ilə Lənkəran Rayon Mərkəzi Xəstəxanasına müraciət edib. Ona zəruri tibbi yardım göstərilib.

Hadisənin ailə münaqişəsi zəminində bacılar arasında baş verdiyi bildirilir. Faktla bağlı araşdırma aparılır.

73
Rusiya XİN-nin binası, arxiv şəkli

Çexiyanın Rusiyadakı səfirliyinin 20 əməkdaşı “persona non qrata” elan edildi

0
Rusiya Xarici İşlər Nazirliyinin “persona non qrata” elan etdiyi şəxslər Moskvanı 19 aprelə qədər tərk etməlidirlər.

BAKI, 18 aprel - Sputnik. Rəsmi Moskva Rusiya diplomatlarının Çexiyadan çıxarılmasına anoloji qərarla cavab verib.

Sputnik Azərbaycan RİA Novosti-yə istinadla xəbər verir ki, Rusiya Xarici İşlər Nazirliyi Çexiya Respublikasının Moskvadakı səfirliyinin 20 əməkdaşını “persona non qrata” elan edib.

Həmin şəxslər Rusiyanı 19 aprelə qədər tərk etməlidirlər.

Bundan əvvəl Çexiya respublikasının fövqəladə və səlahiyyətli səfiri Vitezslav Pivonka rəsmi Praqanın rus diplomatları ölkədən çıxaracağı ilə bağlı bəyanatından sonra Rusiya Xarici İşlər Nazirliyinə çağırılıb.

Bundan əvvəl RF diplomatiya idarəsində Çexiya hökumətinə sərt etiraz bildirilmiş və cavab tədbirlərinin görüləcəyinin anonsu verilmişdi.

Rusiya Xarici İşlər Nazirliyi qeyd edib ki, Praqanın hərəkətlərində "Amerikanın izlərini görməmək olmaz".

Nazirlik diplomatların qovulması qərarının 2014-cü ildə Vrbetitsadaki hərbi anbarlarda baş verən partlayışda Rusiya xüsusi xidmət orqanlarının iştirakı ilə bağlı "əsassız və həqiqətdən uzaq bəhanələr"lə əlaqədar verildiyini qeyd edib. 

 

0