Rəqəmsal texnologiyalar

Camaatın "paket"ini necə kəsirlər?

2271
(Yenilənib 20:33 15.01.2016)
Kabel televiziyalarının göstərdiyi xidmətlərin qiymətləri qalxdıqca, keyfiyyəti aşağı düşür. Üstəlik müştərilərin operatorlara etimadı aradan qalxır.

BAKI, 15 yan-Sputnik. Azərbaycanda kabel televiziya və internet yayımı ilə məşğul olan operatorların müştəriləri narazı salan addımlarına son günlər daha çox rast gəlinir. Bunlardan biri, əlbəttə ki, manatın devalvasiyası ilə bağlı qiymətlərdə baş verən artımdır. Məsələn, KATV-1 şirkəti 1-ci devalvasiya dalğasından sonra televiziya+internet paket xidməti üçün ən aşağı hədd olaraq 22 manat nəzərdə tuturdu. Sonra bu 23 manata qaldırıldı. Bu ilin yanvarın əvvəlindən isə, KATV-1 sözügedən paketin qiymətini 28 manata qaldırdığını bəyan edib.

KATV-1-dən Sputnik-ə xidmət haqqının bahalaşmasını belə izah ediblər: "Əslində bunu bahalaşma, qiymət artımı adlandırmaq düzgün deyil. Əvvəllər şirkət internet+televiziya kanallarından birlikdə istifadə edən abonentlərə endirim edirdisə, indi bu endirim aradan qaldırılıb. Yeni tariflərə görə, kanallar üçün 10 manat, internet xidməti üçün 18 manat tələb olunur".

Şirkətin əməkdaşları endirimin aradan qaldırılmasının nə ilə bağlı olduğuna dəqiq aydınlıq gətirməyiblər. "Bizə rəhbərlikdən bu barədə hər hansı izahat verilməyib. Sadəcə xəbərdar edilib ki, ödənişlər bu tariflərlə qəbul edilsin. Ola bilsin ki, bu, manatın devalvasiyası ilə bağlı ölkə üzrə bütün xidmətlərin qaldırılması ilə əlaqədar olsun" — deyə operator bildirib.

Operatorlar müştərilərini aldadırlar

KATV-1 istifadəçiləri istər müvafiq müqavilə bağlanarkən, istərsə də ondan sonra şirkətin abonentlərə endirim barədə heç bir məlumat vermədiyini bildiriblər. "Əvvəllər sadəcə xidmətin qiymətini bildirmişdilər. Sonra şirkət qiymətləri qaldıranda, birdən-birə elan etdi ki, guya qiymətləri qaldırmır, sadəcə endirimi ləğv edir. Bu bəhanə ilə şirkət faktiki olaraq xidmət haqqını təxminən 20 faiz qaldırıb" — deyə KATV-1-in istifadəçisi İlkin Həsənov bildirib.

Sputnik-in araşdırması zamanı məlum olub ki, ümumilikdə kabel yayımı xidməti göstərən bütün operatorlar müştərilərini aldadırlar. Əvvəla onlar müqavilə öhdəliklərindən qarşı tərəfi xəbərdar etmədən imtina edirlər.

"Hər fürsətdə əsassız olaraq qiyməti qaldırırlar. Müqavilədən əvvəl təqdim etdikləri paketdə göstərilən telekanalları, sonradan öz istədikləri kimi dəyişirlər. Əvvəl müştəriyə yaxşı kanallardan ibarət paketi təqdim edirlər. Bir müddət keçəndən sonra həmin kanalların yayımı dayandırılır. Əvəzində müştəriyə lazım olmayan kanallar yayıma əlavə edilir. Kanalların say tərkibi də tez-tez dəyişdirilir. Bundan əlavə, internet sürətləri müqavilədə göstəriləndən xeyli aşağı olur. Müqavilədə pulsuz texniki xidmətdən söhbət getsə də, televiziya yayımında keyfiyyət problemi olanda, yaxud internet kəsiləndə, pis işləyəndə, müştərinin kabel operatorun çağrı mərkəzinə zəng edib düşməsi mümkün olmur", —deyə kabel istifadəçisi Ramiz Əliyev Sputnik-ə bildirib.

Onun sözlərinə görə, dəfələrlə olub ki, gecə vaxtı qəfil internet kəsilib, yaxud hansısa kanalın yayımında problem meydana çıxıb: "Zəng edib operatora düşə bilməmişik, yaxud da heç kəs cavab verməyib. Beləcə, texniki dəstəkdən məhrum olmuşuq, internetlə bağlı işlərimiz yarımçıq qalıb. Xidmət haqqlarını gecikmədən tələb edən operatorlar əslində keyfiyyətli xidmətə də diqqət yetirməli, istehlakçıları aldatmamalıdırlar".

Yenə monopoliya problemi

Bu sahədə şikayətlərdən biri də, kabel yayımı sahəsindəki monopoliyalarla bağlıdır. "Sanki kabel televiziyaları, internet provayderlər öz aralarında bölüşdürüblər ki, kim şəhərin harasında yayım məsələsinə baxacaq. Bizim istifadəçi kimi seçim imkanımız olmalıdır. Bir operatorun göstərdiyi xidmət xoşumuza gəlməyəndə başqasına müraciət etmək seçimimiz olmalıdır. Təəssüf ki, bizim ölkədə bütün sahələrdə olduğu kimi, bu sahə də inhisarların nəzarətindədir" — deyə Nəsimi rayonu ərazisində yaşayan kabel istifadəçisi Adil Əliyev bildirib.

"Qiymətləri qaldırmaları üçün heç bir əsas yoxdur"

Kabel operatorları ilə bağlı yaranmış vəziyyəti Sputnik-ə "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz şərh edib: "Bəzi provayderlər, kabel operatorları həm qiymətlərlə, həm paketlərlə bağlı əvvəllər təklif etdiklərini müqavilə bağlandıqdan sonra qeyd-şərtsiz olaraq dəyişdirirlər. Və sonda bununla bağlı anonslar verirlər. Bu, kifayət qədər yolverilməzdir".

"Həm qanunvericiliyə görə, həm istehlakçıların hüquqlarının müdafiəsi ilə bağlı bütün mövcud formalar tələb edir ki, operatorlar ən azı qabaqcadan müqavilə bağladıqları müştərilərə yeni tətbiq edəcəkləri qiymətlər və kanallardakı dəyişikliklərlə bağlı bildirməlidirlər. Ona görə də, bu paketlərin, qiymətlərin vaxtı çatmadan, istifadəçiyə bildirmədən dayandırılması və ona əlavə şərtlər irəli sürməsi yolverilməzdir", — ekspert deyib.

Osman Gündüz deyib ki, hal-hazırda operatorlar və provayderlər üçün qiymət artımına da hər hansı əsas yoxdur: "Onların əsas internet aldığı şirkət Delta Telecomdur. Delta Telecom da bəyan edib ki, "biz qiymətləri artırmırıq". Yəni interneti topdan satan şirkət budur. Bu deyir ki, "qiymətləri artırmıram və artırmaq fikrim də yoxdur". Onda ayrı-ayrı operatorların qiymət artırması əsassızdır. Bu məsələ aidiyyatı qurumlar tərəfindən araşdırılmalıdır. Əgər hansısa əlavə xidmət etsələr, imkanları genişləndirsələr, qiymət artımı ola bilər. Amma mövcud infrastruktur qalır, topdan satış qiyməti də artırmayıb. Bəs onda qiymət artımı zərurəti hardan yaranıb?".

Osman Gündüz, Azərbaycan İnternet Forumunun prezidenti
© Photo : OXU
Osman Gündüz, Azərbaycan İnternet Forumunun prezidenti

Bakı rayonlarının və ayrı-ayrı regionların kabel operatorları arasında bölüşdürüldüyünü və bununla da sözügedən sahəldə inhisarçılığın yarandığını vurğulayan Gündüz deyib: "Düşünürəm ki, bizdə bu sahədəki azad rəqabət yetərli deyil. Burada sanki razılaşdırılmış bir fəaliyyət, razılaşdırılmış bir rəqabət var. Bu isə düzgün deyil. Hazırda Rabitə və Yüksək Texnologiyalar Nazirliyinə (RYTN) yeni rəhbərlik gəlib, islahatlara başlayıb. Eyni zamanda kabel operatorlarının lisenziyalaşdırılmasına Milli Teleradio Şurası (MTRŞ) nəzarət edir. Bu iki qurum hazırkı situasiyada rəqabət üçün münbit şərait yaratmalıdır. Onlar hesabat verməlidirlər ki, nə qədər mobil operatora lisenziya veriblər, amma onlardan sadəcə 3-4-ü fəaliyyət göstərir, bəs qalanları haradadırlar? Əgər fəaliyyət göstərmirlərsə, onların lisenziyası geri alınmalıdır. Yaxud RYTN və MTRŞ monitorinq aparmalıdır ki, nə üçün onlar müəyyən yerlərdə fəaliyyət göstərmirlər?. Onda məlum olacaq ki, burada başqa birisi var və yeni operatorun bazara girməsinə mane olur. RYTN və MTRŞ-nın bu sahədə fəaliyyət göstərən vətəndaş cəmiyyətlərinin iştirakı ilə birgə monitorinqlər keçirməsi effektiv olardı. Həm keyfiyyətlə bağlı, həm qiymət artımı ilə bağlı, həm də yayım əraziləri ilə bağlı".

"Çağrı mərkəzlərinə zəng edib düşmək olmur"

Gündüzün sözlərinə görə, internet kəsildiyi vaxt, sürət problemi yarananda, yaxud TV yayımında problemlər olanda müştəri istəyir ki, əlaqə yaradıb texniki dəstək alsın. Amma onların müştəri xidmətlərinə, çağrı mərkəzlərinə zəng edib düşmək olmur. Yaxud da on-line müraciətlərinə operativ reaksiya verilmir: "Bu əlbəttə ki, xidmətin keyfiyyəti ilə bağlıdır. O xidmət keyfiyyətli sayılır ki, onun 24 saat ərzində işlək qaynar xətti və texniki dəstəyi olsun. Əgər bu xidmət keyfiyyətsizdirsə, onda müştəri nə edə bilər? İstehlakçıların hüquqları ilə bağlı qanun var.

"Qanunda yazılıb ki, istehlakçıya müqavilədə göstərilən xidmət keyfiyyətli şəkildə göstərilməlidir. Əgər bu göstərilmirsə, istehlakçı birinci aidiyyatı qurumlara müraciət edə bilər. İlk olaraq, RYTN-nə və MTRŞ-yə. Eyni zamanda məhkəməyə müraciət edə bilər", —deyə ekspert bildirib.

Onun sözlərinə görə, İqtisadiyyat və Sənaye Nazirliyinin nəzdində İstehlakçıların hüquqlarının müdafiəsi ilə bağlı fəaliyyətsiz bir qurumu var: "Mən bir dəfə görməmişəm ki, bu qurum rəqəmsal sektorda, internet, telekommunikasiya sektorunda hansısa istehlakçının hüququnu nüdafiə eləsin. Düzdür, o qurumun bir az marketlərlə bağlı fəaliyyəti görünür. Amma operatorlarla, provayderlərlə bağlı fəaliyyəti görünmür. Bu qurumun sözügedən sahədə fəaliyyətinin canlandırılması, tədqiqat aparması, sənədləri qaldırıb baxması, tədbirlər görməsi yaxşı olardı".

"Kimin hüququ pozulursa, bizə müraciət estin"

İqtisadiyyat Nazirliyinin (əvvəlki adıyla İqtisadiyyat və Sənaye Nazirliyi) mətbuat xidmətinin rəhbəri Abbas Əliyev Sputnik-ə açıqlamasında deyib ki, kabel operatorların, provayderlərin müştərilərə təklif etdikləri xidmətləri xəbərdarlıqsız, yaxud da müqavilədən kənar şəkildə dəyişdirilməsi ilə bağlı müraciətləri Nazirliyin nəzdində Antiinhisar Siyasəti və İstehlakçıların Hüquqlarının Müdafiəsi Dövlət Xidməti (ASİHMDX) araşdırır: "İstehlakçılar, o cümlədən də kabel operatorların və internet provayderlərin xidmətindən istafadə zamanı hüquqları pozulan hər bir vətəndaş, ASİHMDX-nın çağrı mərkəzinə müraciət edə bilər. Bu çağrı mərkəzi istehlakçıların şikayətlərini rəsmən qeydə alır və 30 iş günü müddətində bu müraciətləri araşdırır".

Abbas Əliyev, İqtisadiyyat Nazirliyinin mətbuat xidmətinin rəhbəri
© Flickr
Abbas Əliyev, İqtisadiyyat Nazirliyinin mətbuat xidmətinin rəhbəri

"Əgər isteklakçı hüququnun pozulması faktı təsdiqini tapırsa, bu hüququ pozan hüquqi və ya fiziki şəxsə xəbərdarlıq edilir, pozuntunun qarşısı alınır. Əgər hər hansı hüquq pozuntu qeydə alınmırsa, yaxud da xidmət müəssisəsi bu problemi həll etməkdən imtina edirsə, onda ASİHMDX müvafiq tədbirləri görür. Əgər burada məhkəmə araşdırması tələb olunursa, onda da hüququ pozulan şəxs məhkəməyə müraciət edə bilər. Münaqişə məhkəmə qaydasında, qanunvericiliyin tələbinə uyğun şəkildə həllini tapa bilər", A.Əliyev bildirib.

A.Əliyev həmçinin deyib ki, ASİHMDX-nin çağrı mərkəzindən başqa Nazirliyin "Facebook" səhifəsi də var: "Ora edilən müraciətlər operativ şəkildə araşdırılır. Nazirliyin videomüraciət imkanları da var".

Mətbuat xidmətinin rəhbərinin sözlərinə görə, kabel televiziyaları, internet xidmətləri ilə bağlı müştəri hüquqlarının pozulmasına görə ASİHMDX-ya dəfələrlə müraciətlər edilib və bu, araşdırılıb: "Vətəndaşların məhkəmələrə, bu sahə ilə əlaqədar olan dövlət qurumlarına müraciət etmək hüququ da var və bundan istifadə edilməlidir".

"Heç bir inhisarçılıq yoxdur"

Milli Tеlеviziyа və Rаdiо Şurаsı Aparatının rəhbəri Toğrul Məmmədov isə məsələ ilə bağlı Sputnik-ə açıqlamasında deyib ki, kabel operatorları televiziya yayımının qiymətlərini qaldırmayıblar. Qiymətlərlə bağlı dəyişiklik kabel yayımı ilə məşğul olan operatorların internet xidmətlərinə aiddir. Onlar da bu sahədə qiymətin dəyişməsini xidmətin genişləndirilməsi ilə əlaqələndirirlər. 

Kabel televiziyalarının müştərilərə təklif etdikləri paketə daxil olan kanalları sonradan dəyişmələrini şərh edən T.Məmmədov deyib ki, bu məsələlərin tənzimlənməsi üçün MTRŞ-nin və bu sahə ilə əlaqədar müvafiq qurumların birgə təşəbbüsü ilə hazınlanmış "Kabel şəbəkəsi yayımı haqqında" qanun layihəsində müvafiq maddələr nəzərdə tutulub. Lakin o qanun qəbul olunana qədər müştərilər operatorlarla müqavilə bağlayarkən, oradakı şərtlərə diqqət yetirməlidirlər.

Milli Televiziya və Radio Şurası
© Photo : APA
Milli Televiziya və Radio Şurası

T.Məmmədovun sözlərinə görə, Azərbaycan Kabel Operatorları Assosiasiyasına daxil olan kabel televiziyaları televiziya yayımı üçün aylıq ödənişi 10 manat olaraq müəyyənləşdiriblər. Və bu qiymət dəyişmədən qalıb.

"Hazırda Azərbaycanda kabel istifadəçiləri üçün geniş seçim imkanları var. Onlar kabel operatorların təqdim etdiyi paketlərlə tanış olandan sonra onların istəyinə uyğun kanallardan ibarət paketləri təqdim edən operatoru seçə bilərlər. Onlar müqaviləyə bu barədə şərtlərini əlavə edə bilərlər ki, operator sonradan kanalları istədiyi kimi dəyişdirməsin", deyən T.Məmmədov bu problemlərin müvafiq qanunun qəbulundan sonra qanunla da tənzimlənəcəyini deyib.

Aparat rəhbəri kabel yayımı sahəsində inhisarların olduğu barədə iddialarla razılaşmadığını bildirib. Əlavə edib ki, hazırda bu sahədə xeyli operator fəaliyyət göstərir və heç kəs başqasının fəaliyyətinə müdaxilə etmir. T.Məmmədov kabel istifadəçilərinə məsləhət görüb ki, hansısa müqavilə pozuntuları olduqda, yayımın keyfiyyətində problem olduqda o operatorlardan imtina edə, onlarla bağlı məhkəməyə müraciət edə bilərlər.

"Hazırda Azərbaycanda xeyli kabel operatoru fəaliyyət göstərir və seçim imkanı genişdir. Onların arasında rəqabət mövcuddur. Əgər müştərilərini itirmək istəmirlərsə, rəqabətə davam gətirməkdə maraqlıdırlarsa, həm qiymətlərə, həm də keyfiyyətli xidmətə diqqət etməlidirlər", — deyə MTRŞ rəsmisi əlavə edib.

2271
Teqlər:
Toğrul Məmmədov, Abbas Əliyev, Osman Gündüz, Kabel, kanal, televiziya, internet, rəqəmsal
Əlaqədar
Azərbaycanda internet televiziya bazarı tam leqallaşdırılıb
Televiziya verlişlərinin "qara siyahısı" hazırlanır
Kabel televiziya operatorlarının qanunsuz fəaliyyəti müzakirə edilib
Sputnik Azərbaycan Milli Net Milli İnternet Mükafatını qazandı
MTN rəhbərliyi internet kəsintisinə münasibət bildirib
Ölkə daxilində internetin paylanmasında problemlər var
Şəhidin dəfni

Qırx gün itkin sayılan şəhid dəfn olundu

8
(Yenilənib 11:36 03.12.2020)
Dünən Şabran rayonunun Rəhimli kəndinə İkinci Qarabağ müharibəsində həyatını itirmiş 3-cü şəhid gəlib.

Leyla Abdullayeva,  Sputnik Azərbaycan

BAKI, 3 dekabr — Sputnik. Dünən Şabran rayonunun Rəhimli kəndinə Vətən müharibəsində həlak olmuş 3-cü şəhid gəlib. 2001-ci il təvəllüdlü Həmzəyev Musa Xalid oğlu Vətən müharibəsində 40 gün idi ki, itkin sayılırdı. Lakin dünən onun şəhid olduğu məlum olub.

  • Həmzəyev Musa
    © Sputnik / Leyla Abdullayeva
  • Şəhidin dəfni
    © Sputnik / Leyla Abdullayeva
  • Şəhidin dəfni
    © Sputnik / Leyla Abdullayeva
1 / 3
© Sputnik / Leyla Abdullayeva
Həmzəyev Musa

Şəhid doğulduğu Şabran rayonunun Rəhimli kəndində torpağa tapşırılıb.

Şəhid Musa Həmzəyev Axıska türküdür.

Allah rəhmət eləsin!

8
Teqlər:
itkin, şəhid, Şabran rayonu
Mövzu:
Azərbaycan və Ermənistan arasında müharibə
Yaşadığı ünvanı tərk edən koronavirus xəstəsi

Evi tərk edən COVID-19 xəstələrindən ikisi həyatını itirib

5
Ötən gün tərəfimizdən 27 nəfər müəyyən olunub. Onlardan 25 nəfəri evə qaytarılıb, 20 nəfər barəsində cinayət işi başlayıb. 2 nəfər ağır xəstə isə həyatını itirib.

 

BAKI, 3 dekabr — Sputnik. Dekabrın 2-də ölkə üzrə yaşayış yerini tərk edən 27 nəfər saxlanılıb. Daxili İşlər Nazirliyinin mətbuat xidmətindən Sputnik Azərbaycan-a verilən məlumata görə, koronavirusa yoluxan şəxslər məsuliyyətli davranmalı və ətrafdakı insanları nəzərə almalı, digər şəxslərin həyat və sağlamlığına həssas yanaşmalıdır.

"Ötən gün tərəfimizdən 27 nəfər müəyyən olunub. Onlardan 25 nəfəri evə qaytarılıb, 20 nəfər barəsində cinayət işi başlayıb. 2 nəfər ağır xəstə isə həyatını itirib. Pandemiya dövründə aktiv koronavirus xəstələri sosial təcrid, özünü təcrid tədbirlərinə ciddi əməl etməlidir", - məlumatda bildirilib.

5
Вышка командно-диспетчерского пункта аэродрома аэропорта в населённом пункте Ходжалы, фото из архива

Xankəndi limanı: Sülhməramlıdan mülki təyinatadək

0
Üçtərəfli razılaşma imzalandıqdan və Rusiyanın sülhməramlı əməliyyatı başladıqdan sonra bölgədəki vəziyyət kökündən dəyişib.

 

BAKI, 3 dekabr — Sputnik, Aleksandr Xrolenko, hərbi şərhçi. Rusiyanın Dağlıq Qarabağdakı sülhməramlı əməliyyatı mürəkkəb logistikası ilə fərqlənir. Xankəndindəki aerodromun bərpası və modernləşdirilməsi Rusiya HKQ-nin hərbi-nəqliyyat təyyarələrini qəbul etməyə imkan verəcək, yeni əməliyyat imkanları yaradacaq, qoşun birləşməsinin təchizatının bir çox problemlərini həll edəcək.

Qarabağı Ermənistan ilə yalnız eni 5 kilometr olan Laçın dəhlizi birləşdirir. Yola Ruisya sülhməramlıları nəzarət edirlər, amma yenə də bu yol bölgədə mümkün gərginləşmə halında ciddi təhlükə altında olacaq. Perspektivdə yeni yolun (dəhlizin) tikintisi və Laçın şəhərinin Azərbaycana təhvil verilməsi var. Lakin insanların və yüklərin operativ daşınmasına artıq bu gün ehtiyac var.

Xankəndindən Yerevana (Erebuni aviabazası, Zvartnos hava limanı) avtomobil yolu 320 km-dir. Əməliyyatın ilk günlərində sülhməramlılar Xankəndinə bu marşrutla gedirdilər. Sonra (noyabrın 28-dən) yeni marşrut ortaya çıxdı: Rusiyadan gələn yük və texnika dolu vaqonlar Azərbaycanın Bərdə dəmiryolu stansiyasına gəlir və buradan avtomobillərlə təxminən 100 km-lik Bərdə-Ağdam-Xankəndi marşrutunu qət edir. Bu marşrutla da məsafə uzaqdır.

Dağlıq Qarabağın şəraitində bölmələrin, yüklərin və texnikanın operativ şəkildə yüz kilometrlərlə məsafəyə çatdırılması mürəkkəb qoşun əməliyyatına çevrilir. İldə iki dəfə sülhməramlı qruplaşmanın şəxsi heyəti rotasiya edilməlidir. Bölgədə vəziyyətin gərginləşməsi əlavə qüvvə və vəsait tələb edə bilər. Xankəndi şəhərinin 9 kilometrliyində hava limanı var və o nəzəri olaraq ağır hərbi-nəqliyyat aviasiyasını qəbul edə bilər. Burada uçuşlar 1990-cı illərin əvvəllərində hərbi əməliyyatlara görə dayandırılıb. Hava limanının infrastrukturu 2020-ci ilin sentyabr və oktyabrında Azərbaycanın raket zərbələri nəticəsində zərər görüb, lakin uçuş-enmə zolağının (UEZ) uzunluğu 2200 metrdir. Yerli relyef lazım gələrsə, zolağın uzunluğunu 1 000 metr artırmağa və yanında ikincisini tikməyə imkan verir. Xankəndi yaxınlığındakı hava limanının bərpası və modernləşdirilməsinin qiyməti yaxından baxdıqda uzun illik uzaq məsafəyə uçuşlardan, nəhəng vaxt və qüvvə xərclərindən baha olmaya bilər. Hava limanı həmçinin mülki yüklərin daşınması üçün logistik mərkəz və perspektivdə Dağlıq Qarabağın iqtisadi inkişafının vacib tərkib hissəsi ola bilər.

Uzaq və təhlükəli yol

Rusiyalı sülhməramlılar 23 müşahidə postunda 24 saat Dağlıq Qarabağdakı atəşkəs rejiminə nəzarət edirlər, Laçın dəhlizi ilə əhalinin və avtonəqliyyatın hərəkətinin təhlükəsizliyini təmin edirlər. Noyabrın 14-dən 30 minədək qaçqın öz evinə qayıdıb. Bölgədə fəal şəkildə rusiyalı istehkamçılar, hərbi həkimlər, FHN əməkdaşları işləyirlər.

Sülhməramlı qüvvələrin həll olunması daimi mobillik tələb edir. Qarabağ müharibəsinin dayandırılması barədə üçtərəfli Rusiya-Azərbaycan-Ermənistan razılaşmasının əsasında Moskvayla Bakı arasında imzalanmış xüsusi protokol Azərbaycanla Ermənistan arasında nəqliyyat kommunikasiyaların açılmasını nəzərdə tutur. Aydındır ki, bu sənəd nəinki yerdəki, həm də səmadakı qadağaları da götürür. Söhbət Xankəndi hava limanına uçuşlardan gedir. Rusiyadan birbaşa reys bir çox logistika və təchizat problemlərini aradan qaldırardı, 15-ci sülhməramlı briqadanın qoşun birləşməsi üçün yeni əməliyyat imkanları yaradardı.

Daha əvvəl Gürcüstan Azərbaycan və Ermənistanın xahişi ilə öz hava məkanını Yerevana uçuş həyata keçirən Rusiya hərbi-nəqliyyat aviasiyası üçün açmışdı. Oradan yüklər quru uzaq yolla Xankəndinə daşınırdı. İndi bölgənin səmasını tam açmağın əsl vaxtıdır. Bu, Azərbaycandan Naxçıvan Muxtar Respublikasına yol çəkilməsi layihəsinə də fayda verə bilər.

Bağlı səma

Xankəndi hava limanı 2012-ci ildə artıq təmir olunmuşdu və təyyarələri qəbul etməyə hazır idi. Lakin bu, Bakının əks-reaksiyasına görə baş vermədi. Lakin üçtərəfli razılaşma imzalandıqdan və Rusiyanın sülhməramlı əməliyyatı başladıqdan sonra bölgədəki vəziyyət kökündən dəyişib. Uçuşların təhlükəsizliyinə yenidən baxmaq və qadağaları götürmək vaxtıdır. Həm də Ermənistanla Azərbaycan bu məsələdə bir-birilərinə borclu qalmırlar: Bakıdan Naxçıvana reyslər Ermənistan üzərindəki beynəlxalq dəhlizlərdən keçir və erməni aviaşirkətləri də Azərbaycan səmasındakı beynəlxalq səviyyədə qorunan hava koridorlarından istifadə edirlər.

Azərbaycan Prezidenti İlham Əliyev son çıxışında deyib: "Bu gün Dağlıq Qarabağda yaşayan ermənilər və mütləq oraya qayıdacaq azərbaycanlılar gün gələcək yenə yaxşı qonşuluq şəraitində yaşayacaqlar. Burada logistik məsələlər var, nəqliyyat məsələləri var, enerji təhlükəsizliyi var. Biz bütün bu məsələləri nəzərdən keçirəcəyik".

Bu sözlər ümid verir. Əgər bu yüksək dağlıq ərazidəki hava limanı tezliklə işə başlasa, bu regional sülhə və təhlükəsizliyə fayda verəcək.

0
Teqlər:
Rusiya, sülhməramlılar, Dağlıq Qarabağ, hava limanı, Xankəndi