Xocavənd rayon Tuğ kəndinin məktəbi

Bir əsr təhsilimizin daş şahidi olmuş imarət yolumuzu gözləyir

768
Xocavənd rayonunun Tuğ kəndində bir məktəb binası var. Yaşı 135-dir. Bir əsrlik təhsilimizin tarixi keçmişinə 30 illik fasilədən sonra elə sizinlə birgə səyahət edəcəyik.

Emin Əlisahib, Sputnik Azərbaycan

BAKI, 27 mart — Sputnik. Tuğ vaxtilə respublikada ən tanınmış, ən abad kəndlərdən biri olub. Kəndə Bakıdan, Hadrutdan, Xankəndidən və Füzulidən gündəlik avtobus marşrutu işləyib. İndi o abadlıqdan nəinki əsər-əlamət qalmayıb, hətta ermənilər burdakı qədim binaları da darmadağın edib. Tuğ kəndindən olan yol yoldaşımız Ramiz Göyüşov deyir ki, o 1957-ci ildə Tuğ kəndində dünyaya göz açıb. Uşaqlığı, gəncliyi bu kənddə keçib. Bildirir ki, axırıncı dəfə 30 il əvvəl olub bu kənddə: “Bu gün 30 ildən sonra kəndimizə gəlmişik. Həm sevinirəm, həm də burada gördüklərimdən kədərlənirəm. İlk olaraq anadan olduğum evimizə getdim. Ev dağılıb, həyəti kol-kos basıb, ağaclar qırılıb. Sonra kənd qəbiristanlığını ziyarət etdim. Qəbirüstü abidələr məhv edilib. Qardaşımı, dayımı və nənəmi özüm dəfn etdiyim üçün qəbirlərinin yerini bilirdim. Məzarlarından heç bir işarə belə qalmayıb".

© Sputnik / Emin Alisahib
Ramiz Göyüşov

Tuğ kəndinin mərkəzində bir bina var ki, yaşı 135 olsa da, görənlərin diqqətini indi də özünə çəkir. Baxmayaraq ki, təkcə divarları qalıb. “Həmin təhsil ocağının məzunlarından biri də mənəm” deyir həmsöhbətimiz. Söhbətimiz bizi 30 illik ayrılığın lap əvvəlinə aparır: “Gördüyünüz bu dağıdılmış məktəbdə 10 il təhsil almışam. Bu bina inşa olunanada məktəb üçün nəzərdə tutulmayıb. Bura Tuğ kənd mülkədarları, bəyləri olan Mehti və Səlim bəylərin imarətidir. Sovet hakimiyyəti qurulandan sonra mülkədarların əlindən mülklər alınaraq, məktəb üçün ayrılıb. 1977-ci ilə kimi bura məktəb olub”.

Bələdçimiz sonralar kəndin aşağı tərəfində müasir tipli məktəb binası tikildiyinə görə bu binanın boş qaldığını da əlavə edir.  “1975-1978-ci illərdə Ulu Öndər Heydər Əliyevin təşəbbüsü ilə Tuğ kəndində müasir tipli yeni məktəb binası inşa edildi. Lakin bununla yanaşı 1991-ci ildə kənd ermənilər tərəfindən işğal ediləndə köhnə məktəb binası da salamat qalmışdı. Hətta 1990-cı ildə Bakıdan tələbə-inşaat dəstəsi gələrək məktəbin dam örtüyünü də dəyişmişdi. Ermənilər kəndi işğal edəndən sonra məktəbin binasını yandırıb yararsız vəziyyətə salıblar”.

© Sputnik / Emin Alisahib
Xocavənd rayon Tuğ kəndi

64 yaşlı müsahibimiz deyir ki, 1885-ci ildə Azərbaycanın görkəmli şairi Mir Mehdi Xəzani tərəfindən əsası qoyulmuş bu məktəbdə Qori Müəllimlər Seminariyasını bitirmiş Mustafa Cahangirov, Mirzə Qara Məhərrəmov, Abdulla bəy Məlik Aslanbəyov, Məmməd bəy Məlikyeqanov, Kazan Universitetini bitirmiş Əsgər bəy Eyvazov kimi ziyalılar müəllimlik ediblər. Fəaliyyət göstərdiyi illər ərzində Tuğ məktəbi ölkəyə yüzlərlə alim, dövlət məmuru, hərbçi, təhsil, mədəniyyət və incəsənət işçiləri bəxş edib: “Bu kəndə gələndə baxmayaraq ki, bu məktəb dağılmış vəziyyətdədir, qayıtdığımıza görə çox sevindim. Mənə çox xoş oldu. Xoş oldu ki, gəldim doğulduğum, böyüyüb, boya-başa çatdığım və təhsil aldığım məktəbi ziyarət edə bildim. Buranı belə dağıntılar altında görəndə mənə çox pis təsir elədi. Həddən artıq sarsılmışam. Axı burda mənim məktəb xatirələrim yatır...”

  • Xocavənd rayonun Tuğ kəndi
    © Sputnik / Emin Alisahib
  • Xocavənd rayonun Tuğ kəndi
    © Sputnik / Emin Alisahib
  • Xocavənd rayonun Tuğ kəndi
    © Sputnik / Emin Alisahib
  • Xocavənd rayonun Tuğ kəndi
    © Sputnik / Emin Alisahib
1 / 4
© Sputnik / Emin Alisahib
Xocavənd rayonun Tuğ kəndi

Çox maraqlıdır ki ermənilər viran qoyduğu bu yerdə işğal müddətində festivallar keçirməkdən də çəkinməyiblər: “Gördüyünüz bu yerdə ermənilər şərab festivalı keçirirdilər. Qondarma rejimin rəhbərliyi ilə birlikdə bu yerdə 2 dəfə şərab festivalı keçirilib. Biz onu internetdən izləyirdik və bizə çox pis təsir edirdi. Ancaq Ali Baş Komandanımızın rəhbərliyi ilə ordumuz torpaqlarımızı erməni işğalından tamamilə azad etdi  və bu gün nə xoş bizə ki, doğma ata – baba yurdumuzu gəlib ziyarət elədik və arzumuza çatdıq”.

© Sputnik / Emin Alisahib
Xocavənd rayon Tuğ kəndi

Artıq Azərbaycan işğaldan azad olunmuş ərazilərin bərpasına və bu torpaqlarda yeni layihələrə start verib. “Əminik ki, tezliklə Qarabağın bütün yaşayış məntəqələrində, o cümlədən qədim Tuğ kəndində həyat yenidən qayıdacaq və Tuğ məktəbi keçmiş şöhrətini bərpa edəcək”, deyir həmsöhbətimiz: “Dövlət başçımız ailə üzvləri ilə birgə Tuğ kəndini ziyarət etdi. Bu, Tuğ kənd camaatına çox xoş təsir bağışladı. Prezidentimiz hər bir kəndə, hər bir yaşayış məntəqəsinə belə xoş münasibət bəsləyir. İnşaallah Tuğ abadlaşar, camaatımız qayıdar, biz də qayıdıb, məskunlaşarıq kəndimizdə”.

O gün uzaqda deyil. Artıq Qarabağda bir sıra layihələrin inşaasına başlanılıb. 30 ilə yaxın işğalda qalan, dağıdılan, viran qoyulan yurd yerlərimiz tezliklə Azərbaycan Respubilkasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə tikinti-quruculuq, abadlıq meydanına çevriləcək. Respubilkanın müxtəlif bölgələrində məskunlaşan Qarabağın yerli sakinləri öz yurd-yuvalarına qayıdacaq.

768
Avropa İttifaqının bayrağı (Aİ), arxiv şəkli

Avropa İttifaqının canfəşanlığı: ikili standartlar keçmişdə qaldı?

987
(Yenilənib 17:33 16.04.2021)
Azərbaycan beynəlxalq səviyyədə tanınan sərhədlərinin Ermənistan tərəfindən də tanınmasını, bu ölkənin reallıqları qəbul edərək Azərbaycanla münasibətlərdə normal yanaşma sərgiləməsini gözləyir.

Elvin Səlimov, Sputnik Azərbaycan

BAKI, 16 aprel — Sputnik. Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Toivo Klaar "Twitter" hesabındakı paylaşımda Ermənistanla Azərbaycan arasında əməkdaşlıq üçün etimadın formalaşmalı olduğunu yazıb. Aİ-nin xüsusi nümayəndəsi tərəflər arasında inam və etimadın formalaşmasının vacib olduğunu qeyd edib.

Bəs Aİ Azərbaycan və Ermənistan arasında etimadın qurulması üçün hansı işləri görə bilər? Sputnik Azərbaycan Aİ-nin post-müharibə dövründəki rolu ilə bağlı Milli Məclisin deputatı Ramil Həsənin və politoloq Tofiq Abbasovun fikirlərini öyrənib.

Milli Məclisin deputatı Ramil Həsən bildirib ki, Azərbaycan və Aİ arasında milli maraqlarımıza və beynəlxalq hüquqa söykənən əməkdaşlıq platforması mövcuddur:

“Bizim münasibətlərimiz müxtəlif sahələrdə əməkdaşlıqların qurulması ilə davam etdirilir. Eyni zamanda ikitərəfli münasibətlərimizdə təzadlı yanaşmalar və ikili standartların ortaya çıxdığı məqamlar olub. Avropa İttifaqı Azərbaycan torpaqlarının işğalda olduğu dövrdə və 44 günlük Vətən müharibəsində konkret mövqe sərgiləməyib. Biz ölkəmizə yanaşmada ikili standartlar və qərəzli yanaşmalara şahid olmuşuq.

Azərbaycan beynəlxalq səviyyədə tanınan sərhədlərinin Ermənistan tərəfindən də tanınmasını, bu ölkənin reallıqları qəbul edərək Azərbaycanla münasibətlərdə normal yanaşma sərgiləməsini gözləyir. Azərbaycan Ermənistanla sülh müqaviləsi imzalamağa hazırdır. Amma gəlin baxaq görək Ermənistan buna hazırdırmı?! Azərbaycan bölgənin bütün ölkələri ilə sülh və əməkdaşlıq şəraitində mehriban qonşuluq siyasəti yürüdür. Azərbaycanın bu münasibəti qarşılığında Ermənistan tərəfindən sərsəm bəyanatlar verilməkdədir. Bu isə Ermənistan tərəfinin etimada söykənən əməkdaşlığa hazır olmadığını və problemlərin günahkarının bu ölkə olduğunu göstərməkdədir. Əgər normal münasibətlərin qurulmasını arzu edirlərsə, üzlərini Ermənistana tutsunlar və bunu onlardan tələb etsinlər”.

Politoloq Tofiq Abbasov isə deyib ki, münaqişənin davam etdiyi müddətdə və bu günə qədər Avropa İttifaqının oynadığı rol səmərəsizdir: “Bu qurum illərdir gəlişigözəl ifadələrlə Azərbaycanı yola gətirməyə çalışırdı. Uzun illərdir deyirdilər ki, sərhədlərin dəyişilməsi məqbuldur, siz onsuz da Avropa İttifaqının üzvü olacaqsınız. Belə yanaşma həm yanlış, həm də təhlükəli idi. Çünki Avropa İttifaqının rəsmiləri bununla Ermənistanın işğalçı siyasətini qidalandırırdılar. Buna görə də belə bir müstəvidə sağlam əməkdaşlıq qurula bilməzdi. Əgər Aİ sülhün və əməkdaşlığın qurulmasını istəyirsə, ilk növbədə Ermənistanla işləməli, lazım gələrsə, bu ölkəyə təzyiq mexanizmlərini işə salmalıdır. Biz post-müharibə dövrünü yaşayırıq və görürük ki, Ermənistan daxilindəki siyasi qüvvələr və qruplar Azərbaycana qarşı təxribatlarını qüvvədə saxlayırlar. Belə bir şəraitdə hansısa etimaddan danışmaq olmaz. Müharibə bitib, amma məğlub ölkə tərəfindən təxribatlar başa çatmır. Əminəm ki, Ermənistan tərəfindəki revanşist meyillər, təxribat planları Aİ-nin nümayəndələrinə də bəllidir. Amma onlar özlərini elə göstərirlər ki, sanki bütün bunlardan xəbərsizdirlər”.

“Əgər sülhə hazırlıqdan danışırıqsa, Aİ Ermənistana real situasiyanı anlatmalı və status-kvonun dəyişdiyini izah etməlidir. Ermənistan da anlamalıdır ki, hazırkı status-kvo bir daha onların xeyrinə dəyişilməyəcək. Heç bir havadar qüvvə bu vəziyyəti onların xeyrinə dəyişə bilməyəcək. Çünki Azərbaycan haqq işini başa çatdıraraq, torpaqların gerçək sahibinin özü olduğunu bütün dünyaya göstərdi.

Əgər bizim etimadımızı qazanmaq istəyirlərsə, mina xəritələrini Azərbaycana təqdim etsinlər. Bunu etsələr, əməli işlərə başlamaq üçün mühit yaranmış olacaq. Bu olmasa, hansısa sülhdən, ona hazırlıqdan söhbət gedə bilməz”, – deyə T.Abbasov bildirib.

987
Teqlər:
ikili standartlar, münasibətlər, münasibət, Ermənistan, Azərbaycan, Avropa İttifaqı
Səbuhi Hüseynlinin dəfni

Yeddi ay komada qalan şəhidimiz bu gün dəfn olunub - FOTO

276
(Yenilənib 16:14 16.04.2021)
Səbuhi Hüseynli oktyabrın 26-da Xocavənddə aldığı qəlpə yarasından baş beyninin zədələnməsi səbəbindən Silahlı Qüvvələrin Baş Kliniki Hospitalında və Neyrocərrahiyyə Xəstəxanasında müalicə olunurdu.

Leyla Abdullayeva, Sputnik Azərbaycan

BAKI, 16 aprel — Sputnik. Dünən Azərbaycan Ordusunun müddətdən artıq hərbi qulluqçusu, 24 yaşlı şəhid  Səbuhi Babək oğlu Hüseynli 7 ay komada qalıb və dünən şəhadətə yüksəlib. Sputnik Azərbaycan-ın verdiyi məlumata görə, bu gün şəhidimiz Xaçmazın Maqsudkənd kəndində torpağa tapşırılıb. S.Hüseynli Vətən müharibəsində gedən döyüşlərdə kəşfiyyat qrupunun üzvü kimi iştirak edib. O, oktyabrın 26-da Xocavənddə aldığı qəlpə yarasından baş beyninin zədələnməsi səbəbindən Silahlı Qüvvələrin Baş Kliniki Hospitalında və Neyrocərrahiyyə Xəstəxanasında müalicə olunurdu. Həkimlərin səyinə baxmayaraq onun həyatını xilas etmək mümkün olmayıb.

Şəhidimizin dəfnində Xaçmaz rayon ictimaiyyətinin nümayəndələri, yerli İcra Hakimiyyəti, hüquq-mühafizə orqanlarının, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəhbərləri, qulluq etdiyi MN-in Qusardakı hərbi hissəsinin əməkdaşları, kənd sakinləri iştirak ediblər. Xaçmaz İH başçısı Elnur Rzayev şəhidin doğmalarına dərin hüznlə başsağlığı verib, dərdlərinə şərik olub. O, şəhidin cənazəsinə bükülmüş üçrəngli bayrağımızı şəhidin iki yaşlı oğluna təqdim edib.

  • Səbuhi Hüseynlinin dəfni
    © Sputnik / Leyla Abdullayeva
  • Səbuhi Hüseynlinin dəfni
    © Sputnik / Leyla Abdullayeva
  • Səbuhi Hüseynlinin dəfni
    © Sputnik / Leyla Abdullayeva
1 / 3
© Sputnik / Leyla Abdullayeva
Səbuhi Hüseynlinin dəfni

Daha sonra rayon rəhbəri Səbuhinin döyüşlərdə göstərdiyi şücaətlərdən danışaraq onun Qarabağ uğrunda gedən müharibədə fəal iştirak etdiyini, qəhrəmancasına şəhidlik zirvəsinə yüksəldiyini bildirib.

Onu da qeyd edək ki, şəhidimiz Səbuhi Hüseynli 2020-ci ilin aprelindən Qusardakı hərbi hissədə MAXE işləyib. Vətən müharibəsi başlayanda şəxsi heyətlə birgə cəbhəyə gedib və qəhrəmanlıqla vuruşub.

Şəhidimiz ailəli olub və bir oğul övladı var.

Allah rəhmət eləsin!

276
Teqlər:
Xaçmaz, koma, dəfn, şəhid
İnsanın kölgəsi, arxiv şəkli

Bakıda kanalizasiya quyularının qapaqlarını oğurlayan şəxs saxlanılıb

0
(Yenilənib 19:02 17.04.2021)
Qeyd edilən faktlarla bağlı Nizami Rayon Polis İdarəsinin İstintaq şöbəsində Cinayət Məcəlləsinin müvafiq maddəsi ilə cinayət işi başlanılıb.

BAKI, 17 aprel — Sputnik. Paytaxtın Nizami rayonunda kanalizasiya quyularının qapaqlarını oğurlamaqda şübhəli bilinən şəxs saxlanılıb.

Bu barədə Daxili İşlər Nazirliyindən məlumat verilib.

Nizami Rayon Polis İdarəsinin 23-cü Polis Bölməsinin əməkdaşları tərəfindən həyata keçirilən əməliyyat nəticəsində oğurluq etməkdə şübhəli bilinən paytaxt sakini Lətifxan Musayev tutulub. Araşdırma zamanı onun Keşlə qəsəbəsi ərazisində 5 kanalizasiya quyusunun qapağını oğurladığı müəyyən edilib. Saxlanılan zaman L.Musayevin üzərindən 1 büküm psixotrop maddə olan metamfetamin də aşkar edilib.

Qeyd edilən faktlarla bağlı Nizami Rayon Polis İdarəsinin İstintaq şöbəsində Cinayət Məcəlləsinin müvafiq maddəsi ilə cinayət işi başlanılıb. İstintaq tədbirləri davam etdirilir. Saxlanılan şəxsin qanunsuz əməllərindən zərərçəkən başqa vətəndaşlar varsa, bu barədə ərazi polis orqanlarına, habelə DİN-in "102" Xidməti Zəng Mərkəzi Sistemi ilə əlaqə saxlayaraq məlumat verə bilərlər.

0