Dağıdılmış Ağdam şəhərinə mənzərə

Əlimi vurdum torpağa, çəkdim sifətimə - 28 il sonra Ağdama qədəm basan sakin

22
Martın 13-də Ağdama səfər edənlərin arasında Qarabağ Azadlıq Təşkilatının sədri Akif Nağı da vardı.Martın 13-də Ağdama səfər edənlərin arasında Qarabağ Azadlıq Təşkilatının sədri Akif Nağı da vardı.

Emin Əlisahib, Sputnik Azərbaycan

BAKI, 15 mart — Sputnik. Martın 13-də Ağdama səfər edənlərin arasında Qarabağ Azadlıq Təşkilatının sədri Akif Nağı da vardı. 13 avqust 1957-ci ildə Ağdam rayonunun Papravənd kəndində anadan olan, 28 il sonra Ağdama ayaq basan Akif Nağı Sputnik Azərbaycan-a tamamilə fərqli hisslər yaşadığını bildirib:  “Ağrı ilə, həyəcanla gəldim ki, görən, necə olacaq? İçimdə 28 ilin həsrəti vardı. Yolboyu düşündüm ki, görəsən, o yerləri görəndə özümü saxlaya biləcəm, yoxsa yox... Kövrəlib, ağladım. Amma əsas hissim qürur hissi idi. Qürur hissi idi ki, torpağıma qayıtmışam. Ayağım, əlim öz torpağıma dəydi. Əlimi vurdum torpağa, çəkdim sifətimə. Üzümə vurdum o müqəddəs torpaqdan. Bir az da götürmüşəm. Novruz bayramında, həm də qara bayram deyirlər, bizdə, dünyasını dəyişən yaxınlarımızın qəbirlərini ziyarət edəcəyik. Onların qəbrinin üstünə tökəcəm ki, onların da ruhu şad olsun. Bu qələbəni bizə yaşadan hər kəsə minnətdaram.  Azərbaycanın dövlət rəhbərliyinə təşəkkür edirəm. Əsgərlərimizə təşəkkür edirəm. Fəxr edirik ordumuzla. İndi qürur hissi ilə yaşayıram ki, torpağıma qayıtmışam”.

© Sputnik / Emin Alisahib
Akif Nağı

“Ağdam xarabalığa çevrilib. Dünya bunu görməlidir, - Akif Nağı deyir.  - Ağdamın hər küçəsini dağıdıblar ermənilər. Erməni vəhşiliyidir bu. Dünyada heç bir hadisə ilə əvəz olunmayacaq qədər ağır bir vəhşilikdir. Burada qəbirlər də dağıdılıb. Sanki goreşəndirlər. Özləri özlərini ifşa edirlər dünyanın gözündə. Dünyada belə hal birinci dəfədir ki, yaşanır. Dünyada fatehlər də olub, müharibələr də olub, torpaqlar da işğal olunub. Bu qədər dağıntıya heç bir yerdə rast gəlinməyib.  Evi burada olanlar var, ağdamlılar var gələn nümayəndələrin içində, ancaq evlərin tapa bilmirlər. Bu vəhşiliyi biz həm də dünyaya göstərməliyik ki, biz necə bir düşmənlə üz-üzəyik”.

Akif  Nağı əlavə edib ki, Ağdama səfər edən nümayəndələrin şahidi olduğu hər kadr erməni vəhşiliyinin sübutu və dünya birliyinin hələ də məsələyə ədalətsiz yanaşmasının bariz nümunəsidir. 

22
Avropa İttifaqının bayrağı (Aİ), arxiv şəkli

Avropa İttifaqının canfəşanlığı: ikili standartlar keçmişdə qaldı?

982
(Yenilənib 17:33 16.04.2021)
Azərbaycan beynəlxalq səviyyədə tanınan sərhədlərinin Ermənistan tərəfindən də tanınmasını, bu ölkənin reallıqları qəbul edərək Azərbaycanla münasibətlərdə normal yanaşma sərgiləməsini gözləyir.

Elvin Səlimov, Sputnik Azərbaycan

BAKI, 16 aprel — Sputnik. Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Toivo Klaar "Twitter" hesabındakı paylaşımda Ermənistanla Azərbaycan arasında əməkdaşlıq üçün etimadın formalaşmalı olduğunu yazıb. Aİ-nin xüsusi nümayəndəsi tərəflər arasında inam və etimadın formalaşmasının vacib olduğunu qeyd edib.

Bəs Aİ Azərbaycan və Ermənistan arasında etimadın qurulması üçün hansı işləri görə bilər? Sputnik Azərbaycan Aİ-nin post-müharibə dövründəki rolu ilə bağlı Milli Məclisin deputatı Ramil Həsənin və politoloq Tofiq Abbasovun fikirlərini öyrənib.

Milli Məclisin deputatı Ramil Həsən bildirib ki, Azərbaycan və Aİ arasında milli maraqlarımıza və beynəlxalq hüquqa söykənən əməkdaşlıq platforması mövcuddur:

“Bizim münasibətlərimiz müxtəlif sahələrdə əməkdaşlıqların qurulması ilə davam etdirilir. Eyni zamanda ikitərəfli münasibətlərimizdə təzadlı yanaşmalar və ikili standartların ortaya çıxdığı məqamlar olub. Avropa İttifaqı Azərbaycan torpaqlarının işğalda olduğu dövrdə və 44 günlük Vətən müharibəsində konkret mövqe sərgiləməyib. Biz ölkəmizə yanaşmada ikili standartlar və qərəzli yanaşmalara şahid olmuşuq.

Azərbaycan beynəlxalq səviyyədə tanınan sərhədlərinin Ermənistan tərəfindən də tanınmasını, bu ölkənin reallıqları qəbul edərək Azərbaycanla münasibətlərdə normal yanaşma sərgiləməsini gözləyir. Azərbaycan Ermənistanla sülh müqaviləsi imzalamağa hazırdır. Amma gəlin baxaq görək Ermənistan buna hazırdırmı?! Azərbaycan bölgənin bütün ölkələri ilə sülh və əməkdaşlıq şəraitində mehriban qonşuluq siyasəti yürüdür. Azərbaycanın bu münasibəti qarşılığında Ermənistan tərəfindən sərsəm bəyanatlar verilməkdədir. Bu isə Ermənistan tərəfinin etimada söykənən əməkdaşlığa hazır olmadığını və problemlərin günahkarının bu ölkə olduğunu göstərməkdədir. Əgər normal münasibətlərin qurulmasını arzu edirlərsə, üzlərini Ermənistana tutsunlar və bunu onlardan tələb etsinlər”.

Politoloq Tofiq Abbasov isə deyib ki, münaqişənin davam etdiyi müddətdə və bu günə qədər Avropa İttifaqının oynadığı rol səmərəsizdir: “Bu qurum illərdir gəlişigözəl ifadələrlə Azərbaycanı yola gətirməyə çalışırdı. Uzun illərdir deyirdilər ki, sərhədlərin dəyişilməsi məqbuldur, siz onsuz da Avropa İttifaqının üzvü olacaqsınız. Belə yanaşma həm yanlış, həm də təhlükəli idi. Çünki Avropa İttifaqının rəsmiləri bununla Ermənistanın işğalçı siyasətini qidalandırırdılar. Buna görə də belə bir müstəvidə sağlam əməkdaşlıq qurula bilməzdi. Əgər Aİ sülhün və əməkdaşlığın qurulmasını istəyirsə, ilk növbədə Ermənistanla işləməli, lazım gələrsə, bu ölkəyə təzyiq mexanizmlərini işə salmalıdır. Biz post-müharibə dövrünü yaşayırıq və görürük ki, Ermənistan daxilindəki siyasi qüvvələr və qruplar Azərbaycana qarşı təxribatlarını qüvvədə saxlayırlar. Belə bir şəraitdə hansısa etimaddan danışmaq olmaz. Müharibə bitib, amma məğlub ölkə tərəfindən təxribatlar başa çatmır. Əminəm ki, Ermənistan tərəfindəki revanşist meyillər, təxribat planları Aİ-nin nümayəndələrinə də bəllidir. Amma onlar özlərini elə göstərirlər ki, sanki bütün bunlardan xəbərsizdirlər”.

“Əgər sülhə hazırlıqdan danışırıqsa, Aİ Ermənistana real situasiyanı anlatmalı və status-kvonun dəyişdiyini izah etməlidir. Ermənistan da anlamalıdır ki, hazırkı status-kvo bir daha onların xeyrinə dəyişilməyəcək. Heç bir havadar qüvvə bu vəziyyəti onların xeyrinə dəyişə bilməyəcək. Çünki Azərbaycan haqq işini başa çatdıraraq, torpaqların gerçək sahibinin özü olduğunu bütün dünyaya göstərdi.

Əgər bizim etimadımızı qazanmaq istəyirlərsə, mina xəritələrini Azərbaycana təqdim etsinlər. Bunu etsələr, əməli işlərə başlamaq üçün mühit yaranmış olacaq. Bu olmasa, hansısa sülhdən, ona hazırlıqdan söhbət gedə bilməz”, – deyə T.Abbasov bildirib.

982
Teqlər:
ikili standartlar, münasibətlər, münasibət, Ermənistan, Azərbaycan, Avropa İttifaqı
Səbuhi Hüseynlinin dəfni

Yeddi ay komada qalan şəhidimiz bu gün dəfn olunub - FOTO

273
(Yenilənib 16:14 16.04.2021)
Səbuhi Hüseynli oktyabrın 26-da Xocavənddə aldığı qəlpə yarasından baş beyninin zədələnməsi səbəbindən Silahlı Qüvvələrin Baş Kliniki Hospitalında və Neyrocərrahiyyə Xəstəxanasında müalicə olunurdu.

Leyla Abdullayeva, Sputnik Azərbaycan

BAKI, 16 aprel — Sputnik. Dünən Azərbaycan Ordusunun müddətdən artıq hərbi qulluqçusu, 24 yaşlı şəhid  Səbuhi Babək oğlu Hüseynli 7 ay komada qalıb və dünən şəhadətə yüksəlib. Sputnik Azərbaycan-ın verdiyi məlumata görə, bu gün şəhidimiz Xaçmazın Maqsudkənd kəndində torpağa tapşırılıb. S.Hüseynli Vətən müharibəsində gedən döyüşlərdə kəşfiyyat qrupunun üzvü kimi iştirak edib. O, oktyabrın 26-da Xocavənddə aldığı qəlpə yarasından baş beyninin zədələnməsi səbəbindən Silahlı Qüvvələrin Baş Kliniki Hospitalında və Neyrocərrahiyyə Xəstəxanasında müalicə olunurdu. Həkimlərin səyinə baxmayaraq onun həyatını xilas etmək mümkün olmayıb.

Şəhidimizin dəfnində Xaçmaz rayon ictimaiyyətinin nümayəndələri, yerli İcra Hakimiyyəti, hüquq-mühafizə orqanlarının, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəhbərləri, qulluq etdiyi MN-in Qusardakı hərbi hissəsinin əməkdaşları, kənd sakinləri iştirak ediblər. Xaçmaz İH başçısı Elnur Rzayev şəhidin doğmalarına dərin hüznlə başsağlığı verib, dərdlərinə şərik olub. O, şəhidin cənazəsinə bükülmüş üçrəngli bayrağımızı şəhidin iki yaşlı oğluna təqdim edib.

  • Səbuhi Hüseynlinin dəfni
    © Sputnik / Leyla Abdullayeva
  • Səbuhi Hüseynlinin dəfni
    © Sputnik / Leyla Abdullayeva
  • Səbuhi Hüseynlinin dəfni
    © Sputnik / Leyla Abdullayeva
1 / 3
© Sputnik / Leyla Abdullayeva
Səbuhi Hüseynlinin dəfni

Daha sonra rayon rəhbəri Səbuhinin döyüşlərdə göstərdiyi şücaətlərdən danışaraq onun Qarabağ uğrunda gedən müharibədə fəal iştirak etdiyini, qəhrəmancasına şəhidlik zirvəsinə yüksəldiyini bildirib.

Onu da qeyd edək ki, şəhidimiz Səbuhi Hüseynli 2020-ci ilin aprelindən Qusardakı hərbi hissədə MAXE işləyib. Vətən müharibəsi başlayanda şəxsi heyətlə birgə cəbhəyə gedib və qəhrəmanlıqla vuruşub.

Şəhidimiz ailəli olub və bir oğul övladı var.

Allah rəhmət eləsin!

273
Teqlər:
Xaçmaz, koma, dəfn, şəhid
Azərbaycanda Formula 1

Azərbaycanda Formula 1-ə görə viza prosedurları sadələşdirildi - SƏRƏNCAM

0
(Yenilənib 17:19 17.04.2021)
Dövlət Miqrasiya Xidməti Azərbaycana uçuşlar həyata keçirən aviasiya şirkətlərinə 2021 Formula 1 Azərbaycan Qran Pri yarışı ilə bağlı Azərbaycana gələn əcnəbilər və vətəndaşlığı olmayan şəxslər üçün viza prosedurlarının sadələşdirilməsi barədə məlumat verməlidir.

BAKI, 17 aprel — Sputnik. Prezident İlham Əliyev "2021 Formula 1 Azərbaycan Qran Pri yarışının təşkili və keçirilməsi ilə bağlı Azərbaycan Respublikasına gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında" sərəncam imzalayıb.

Sərəncamla müəyyən edilib ki, 2021 Formula 1 Azərbaycan Qran Prisinin təşkili və keçirilməsi ilə əlaqədar Azərbaycan Respublikasına gələn və bu Sərəncamın 2-ci hissəsində göstərilən sənədlərdən hər hansı birini təqdim edən əcnəbilər və vətəndaşlığı olmayan şəxslər 2021-ci il mayın 1-dən iyunun 15-dək Azərbaycan Respublikasının beynəlxalq hava limanlarında viza ala bilərlər.

Aşağıdakı sənədlərdən biri viza verilməsi üçün əsas hesab edilir:

Formula 1 yarışlarının beynəlxalq təşkilatçıları olan "Formula One Management Limited" Şirkətinin və Beynəlxalq Avtomobil Federasiyasının müvafiq qaydalarına uyğun olaraq akkreditasiyadan keçməni təsdiq edən akkreditasiya kartı;

Bakı Şəhər Halqası Əməliyyat Şirkətində akkreditasiyadan keçməni təsdiq edən akkreditasiya kartı.

Azərbaycan Respublikasının Xarici İşlər Nazirliyinə 2021 Formula 1 Azərbaycan Qran Pri yarışı ilə əlaqədar Azərbaycan Respublikasına gələn əcnəbilər və vətəndaşlığı olmayan şəxslər üçün viza prosedurlarının sadələşdirilməsi barədə "Formula One Management Limited" Şirkətinə, Beynəlxalq Avtomobil Federasiyasına və xarici ölkələrin müvafiq orqanlarına məlumat versin və bu məlumatın Nazirliyin, eləcə də Azərbaycan Respublikasının xarici ölkələrdəki səfirliklərinin və konsulluqlarının internet informasiya ehtiyatlarında yerləşdirilməsini təmin etmək tapşırılıb.

Azərbaycan Respublikasının Dövlət Miqrasiya Xidməti Azərbaycan Respublikasına uçuşlar həyata keçirən aviasiya şirkətlərinə 2021 Formula 1 Azərbaycan Qran Pri yarışı ilə əlaqədar Azərbaycan Respublikasına gələn əcnəbilər və vətəndaşlığı olmayan şəxslər üçün viza prosedurlarının sadələşdirilməsi barədə məlumat verməlidir.

0