Şəhid Aqşin İbadovun şəkli

Azərbaycanlının şərəfinə Afrikada bulaq tikildi: Polad Həşimovu özünə kumir seçmişdi...

164
(Yenilənib 18:38 11.12.2020)
"Şəhadətə könül rahatlığı ilə addımlamağa hazıram. Çünki övladımı imanlı, vətənpərvər ruhda böyüdəcək həyat yoldaşım var. Məshəti, Allaha əmanət ol!"

Rahim Muradov, Sputnik Azərbaycan

BAKI, 11 dekabr — Sputnik. İkinci Qarabağ müharibəsində minlərlə Azərbaycan oğlu böyük qəhrəmanlıqlar göstərdi. Şəhadətə ucalanlar arasında Lənkəran rayonu Boladi kənd sakini, xüsusi təyinatlıların mayoru Aqşin İbadov da var. Şəhidin atası Nazim İbadov Sputnik Azərbaycan-ın bölgə müxbirinə oğlunun ürək nahiyəsindən aldığı qəlpə yarasından şəhid olduğunu və oğlu ilə qürur duyduğunu vurğulayıb.

“Dörd oğlum var, böyük oğlum Emil İbadov Birinci Qarabağ savaşında iştirak edib. İkinci oğlum Cəmil İbadov hazırda orduda xidmət edir, gizirdir, üçüncü oğlum Məmmədhüseyn İbadov ordunun polkovnik-leytenantıdır və sonuncu oğlum Aqşin İbadov da xüsusi təyinatlı mayor idi. Mənim dörd oğlumdan dördü də ölkəmizin ərazi bütovlüyü və suverenliyi uğrunda döyüşüb", - ata deyir.

© Sputnik / Rahim Murad
Aqşin İbadovun ailə üzvləri

Aqşin 1984-cü ildə doğulub. "On bir yaşına kimi tez-tez xəstələnərdi, biz onu zülmlə böyütmüşdük. Tarixi romanlara həvəsi böyük idi və intellektual səviyyəsi çox yüksək idi. Oğlanlarımın dördü də orta məktəbi əla oxuyublar, amma Aqşin xüsusilə fərqlənirdi. Orta məktəbi əla qiymətlərlə başa vurduqdan sonra yüksək balla Ali Hərbi Məktəbə daxil oldu. Ali Hərbi Məktəbi də əla qiymətlərlə bitirib zabit fəaliyyətinə başladı. Hər bir zabitin arzu etdiyi medallarla təltif olunub. Aqşin şəhid general mayor Polad Həşimovu özünə kumir seçmişdi. O, şəhid generalımız haqda “Belə gözəl insan az-az dünyaya gəlir”, - deyərdi. Aqşin yüksək balla Türkiyədə hərbi magistr pilləsində təhsil alıb. Aqşin burada olanda nə vaxt zəng vururdumsa, harada olduğunu soruşanda həmişə Axundov adına kitabxanada hərbçilər zalında olduğunu deyərdi. “Komandir gərək əsgərin həm atası, həm anası, həm qardaşı, həm də bacısı olsun. Əsgərə qayğı göstərsin və həm də tələb eləsin!” - deyə həmişə vurğulayardı".

© Sputnik / Rahim Murad
Aqşin İbadov

Ata danışır ki, Aqşinin bir zabit yoldaşı var, Lənkəran şəhərindən, o hər zaman Aqşini hər kəsə nümunə olaraq göstərib. Aqşin sentyabrın sonlarında döyüşə yollanıb. Əvvəlcə onu üç gün Komanda İdarəetmə Mərkəzində saxlayırlar. Ona təkidlə döyüşə getməməyi deyirlər, çünki Aqşin Hərbi Topoqrafiyanı mükəmməl bilirdi. Öz təkidi ilə 50 nəfərdən ibarət kəşfiyyat qrupunun başında Füzuli istiqamətində döyüşlərə gedir və döyüşür. Ardınca isə Hadrut istiqamətində gedən döyüşlərdə iştirak edir və orada qəhrəmancasına şəhadətə ucalır.

"Onun yaralı olan döyüş yoldaşları bizə zəng edib Aqşinin şəklini onlara göndərməyimizi istədilər. “Biz onun igidliyi sayəsində sağ qalmışıq. Ömrümüzü ona borcluyuq, onun şəklini verin, böyüdüb evimizdə asaq" dedilər".
  • Şəhid Aqşin İbadovun ailə üzvləri
    © Sputnik / Rahim Murad
  • Şəhid Aqşin İbadovun diplomu
    © Sputnik / Rahim Murad
  • Şəhid Aqşin İbadovun ailə üzvləri
    © Sputnik / Rahim Murad
  • Şəhid Aqşin İbadovun şəkli
    © Sputnik / Rahim Murad
1 / 4
© Sputnik / Rahim Murad
Şəhid Aqşin İbadovun ailə üzvləri

Şəhidin böyük qardaşı Emil İbadov Aqşinin hərbiyə olan həvəsindən danışıb: "Mən 1994-1997-ci illərdə xidmətdə olduğum zaman atəşkəs olan vaxtlarda məzuniyyətə gələrdim. Aqşinin 10-11 yaşları olardı və o, həmişə döyüşlərin necə getdiyi ilə maraqlanardı. Mən də həmin illərdə xüsusi təyinatlılarda xidmət eləmişəm. Bəlkə də mənim xüsusi təyinatlı olmağım Aqşində hərbçi olmağa həvəs yaradıb. Bizim ailəmiz ziyalı ailəsidir, evimizdə “Koroğlu dastanı”nın bir neçə nəşri olub. Aqşin 8 dəfə həmin dastanı oxuyub. Atam hər dəfə kitabı əlindən alıb dərs oxumasını tələb edərdi, amma Aqşin “Koroğlu dastanı”nın başqa bir nəşrini tapıb oxuyardı. Yəni bu insanda vətənpərvərlik hissini ifadə etmək üçün sözlər yetməz. Aqşin bizim sonbeşik qardaşımız olub, onun itkisi bizim üçün çox ağırdır. Amma döyüş yoldaşları onun haqda çox yüksək fikirdə olduqlarını deyirlər və mən bununla fəxr edirəm”.

© Sputnik / Rahim Murad
Aqşin İbadovun vəsiqə və medalları

Aqşin İbadovun həyat yoldaşı Məshəti İbadova onu yola salanda kövrəldiyini dedi: 

“Aqşin sentyabrın 30-da cəbhəyə yola düşdü. Amma evdən çıxmazdan əvvəl hazırlıqlar görəndə qızı ilə görüşdü. Mən onların yanına gəldim ki, ata-bala nə danışırlar? Qızı ilə tək danışmaq istədiyi üçün məni otaqdan çıxardı. Həmin vaxt qızımız 14 günlük idi. Qapıda mənimlə sağollaşanda mən kövrəldim, pis oldum. Çünki həmin vaxtadək heç kimi cəbhəyə yola salmamışdım. Orada mənə “ağlama, ya qayıdaram, ya da şəhid olaram” dedi. Hər gün səhər 06:00-da zəng vurub əlaqə saxlayırdı. Zəng vura bilməyəndə də mesaj yazıb yaxşı olduğunu və evdəkilərə də narahat olmamalarını deməyimi tapşırardı. Son 3 gündə danışa bilmədik. Oktyabrın 19-da sübh vaxtı zəng edib danışdıq. “Axşam bir daha zəng vuraram”, - dedi. Oktyabrın 19-u saat 16 radələrində şəhid oldu”.

Şəhidin xanımı deyir ki, mayor Aqşin İbadovun Belçikada yaşayan türkiyəli yaxın dostu var. O, bir neçə gün öncə çox gözəl bir təşəbbüsə imza atıb: “O, Afrikada Aqşinin adına su olmayan yerdə bulaq və dəstəmazxana inşa etdirib. Açılış vaxtı oranın girişində hər kəsə Qurani-Kərim bağışlanılıb. Amma həmin dostu adının çəkilməsini istəmir. Mən Aqşinlə həmişə fəxr etmişəm, bu təşəbbüsü eşidəndə də qürur duydum. O, hər şeyi həmişə telefonuna qeyd edirdi, şəhid olandan sonra telefonu tapılanda qeydlər bölməsinə baxdım. Qeydlərin sonunda “Şəhadətə könül rahatlığı ilə addımlamağa hazıram. Çünki övladımı imanlı, vətənpərvər ruhda böyüdəcək həyat yoldaşım var. Məshəti, Allaha əmanət ol!” sözləri yazılmışdı”.

164
Teqlər:
dost, bulaq, Afrika, xatirə, Lənkəran, şəhid

Kəlbəcər rayonunun Çopurlu kəndindən videogörüntülər

1
Üçtərəfli bəyanatın şərtlərinə əsasən Kəlbəcər rayonu 2020-ci il noyabrın 25-də Azərbaycana qaytarılıb.

Müdafiə Nazirliyi Kəlbəcər rayonunun Çopurlu kəndindən videogörüntülər paylaşıb. Sputnik Azərbaycan həmin görüntüləri təqdim edir.

1
Dağıdılmış Füzuli şəhərinə mənzərə

Türk Şurası da azad olunmuş ərazilərin bərpasında iştirak etmək niyyətindədir

4
Milli Məclisin Sədri Türkdilli Dövlətlərin Əməkdaşlıq Şurasının (Türk Şurası) Baş katibi Bağdad Amreyev ilə görüşüb

BAKI, 19 yanvar — Sputnik. Yanvarın 19-da Milli Məclisin Sədri Sahibə Qafarova Türkdilli Dövlətlərin Əməkdaşlıq Şurasının (Türk Şurası) Baş katibi Bağdad Amreyev, Beynəlxalq Türk Mədəniyyəti Təşkilatının (TÜRKSOY) Baş katibi Düsen Kaseinov və Beynəlxalq Türk Mədəniyyəti və İrsi Fondunun Prezidenti Günay Əfəndiyevanın təmsil olunduqları nümayəndə heyəti ilə görüşüb.

Milli Məclisin Mətbuat və ictimaiyyətlə əlaqələr şöbəsindən Sputnik Azərbaycan-a verilən məlumata görə, sədr qeyd edib ki, bu təşkilatlar xalqlarımız arasında əlaqələrin daha da dərinləşməsinə layiqli töhfələr verir.

Türkdilli dövlətlər arasında əməkdaşlığı təşviq etmək məqsədi ilə yaradılmış Türk Şurası qarşıya qoyulan hədəflərə çatmaq istiqamətində məqsədyönlü və uğurlu addımlar atır.

Bildirilib ki, bu gün ölkələrimizin liderləri arasında nümunəvi dostluq münasibətləri formalaşıb. Dövlət başçılarımızın siyasi iradəsi, ortaq köklərimizə sərgilədikləri hörmət və qayğı yüksək təqdirəlayiq olmaqla yanaşı, hər kəs üçün örnək təşkil edir.

Nümayəndə heyəti üzvlərinin Azərbaycanın işğaldan azad olunmuş bölgələrinə səfərlərini yüksək qiymətləndirən Spiker müzəffər ordumuzun Ali Baş Komandan İlham Əliyevin rəhbərliyi ilə 44 gün ərzində əldə etdiyi uğuru böyük tarixi hadisə kimi dəyərləndirib. Milli Məclisin Sədri vurğulayıb ki, Azərbaycan Ordusu öz Zəfəri ilə münaqişənin həllinə dair bir çox beynəlxalq təşkilatlar tərəfindən qəbul olunan hüquqi sənədlərin, o cümlədən, BMT-nin müvafiq qətnamələrinin icrasını həyata keçirdi, ölkəmizin ərazi bütövlüyünü təmin etdi. Sahibə Qafarova Vətən müharibəsində Azərbaycana verdiyi dəstəyə görə Türk Şurasının Baş katibinə təşəkkür edib.

Bildirilib ki, bu qurum təkcə türk dövlətlərini bir araya gətirməklə kifayətlənmir, həmçinin digər dövlətlər və regionlar arasında da körpü rolunu oynamağı hədəfləyir. Milli Məclis qanunverici orqan olaraq, bundan sonra da Şura çərçivəsində inteqrasiya proseslərinin daha da dərinləşməsinə dəstək verəcək. Çünki bu təşkilat öz fəaliyyətində ortaq tarix, dil, kimlik və mədəniyyət kimi dəyərlərə əsaslanır.

Spiker ötən ilin aprelində Prezident İlham Əliyevin təşəbbüsü ilə keçirilmiş Şuranın fövqəladə iclasını xatırlayaraq, qurumun koronavirusa qarşı mübarizə işinə də töhfə verdiyini söyləyib.

Sədr milli-mənəvi dəyərlərimizin gələcək nəsillərə ötürülməsində Türk Şurası ilə birlikdə TÜRKPA, TÜRKSOY, Türk Mədəniyyəti və İrsi Fondu kimi qurumların fəaliyyətindən danışaraq, bildirib ki, bu təşkilatlar ölkələrimiz arasında iqtisadi, elm, təhsil, mədəniyyət və digər sahələrdə mövcud olan əməkdaşlığın dərinləşməsində yaxından iştirak edir.

Görüşdə səmimi qəbul üçün nümayəndə heyəti adından minnətdarlığını bildirən Türkdilli Dövlətlərin Əməkdaşlıq Şurasının Baş katibi Bağdad Amreyev Azərbaycanın Vətən müharibəsində əldə etdiyi qələbə münasibəti ilə Milli Məclisin Sədrini və xalqımızı təbrik edib. Bu uğuru bütün Türk dünyasını birləşdirən Zəfər kimi dəyərləndirib.

Qonaq ölkəmizə səfər çərçivəsində nümayəndə heyəti üzvlərinin Ağdam və Fizuli bölgələrində erməni işğalçıları tərəfindən törədilmiş vandalizmin şahidi olduqlarını söyləyib. O, işğaldan azad olunmuş ərazilərin bərpasında Türk Şurasının da iştirak etmək niyyətində olduğunu bildirib.

Qonaq təmsil etdiyi təşkilatın bundan sonra da türkdilli xalqlar naminə beynəlxalq müstəvidə fəaliyyətini daha da genişləndirəcəyini deyib. Vurğulanıb ki, bu gün 10-dan çox dövlət Türk Şurası ilə daha yaxından əməkdaşlıq etmək niyyətindədir.

Görüşdə TÜRKSOY-un Baş katibi Düsen Kaseinov, Beynəlxalq Türk Mədəniyyəti və İrsi Fondunun Prezidenti Günay Əfəndiyeva çıxış edərək təmsil etdikləri təşkilatlarda görülən işlər və fəaliyyət istiqamətləri barədə ətraflı məlumat verərək, ölkəmizlə əməkdaşlığın daha genişləndirilməsi istiqamətində gələcək planları barədə fikirlərini bölüşüblər.

Görüşdə həmçinin Türk dünyasını təmsil edən təşkilatlarla əməkdaşlığın perspektivləri və tərəfləri maraqlandıran digər məsələlər barədə danışılıb.

4
Təlim hərbi hissələrində gənc əsgərlərin qəbulu

MN: Təlim hərbi hissələrində gənc əsgərlərin qəbulu davam edir

0
(Yenilənib 19:44 19.01.2021)
Hərbi qulluqçular şəxsi heyətin qəbul məntəqələrində qeydiyyatdan keçdikdən sonra müvafiq bölgü aparılır.

BAKI, 19 yanvar — Sputnik. "Azərbaycan Respublikası vətəndaşlarının 2021-ci il yanvarın 1-dən 30-dək müddətli həqiqi hərbi xidmətə çağırılması haqqında" ölkə Prezidenti İlham Əliyevin müvafiq sərəncamının icrası ilə bağlı Azərbaycan Ordusunun təlim hərbi hissələrində gənc əsgərlərin qəbulu keçirilir.

Bu barədə Sputnik Azərbaycan-a Müdafiə Nazirliyindən məlumat verilib.

Müdafiə nazirinin əmri ilə gənc əsgərlərin sağlamlığının qorunub saxlanılması məqsədilə yoluxucu xəstəliklərə qarşı profilaktik və əks-epidemik tədbirlər görülür. Eyni zamanda, müxtəlif mövsümi xəstəliklərdən qorunmaqla bağlı şəxsi heyətlə müvafiq maarifləndirmə işləri aparılır və onların sağlamlığına nəzarət məqsədi ilə gündəlik termometriyası keçirilir.

Hərbi qulluqçular şəxsi heyətin qəbul məntəqələrində qeydiyyatdan keçdikdən sonra müvafiq bölgü aparılır.

  • Təlim hərbi hissələrində gənc əsgərlərin qəbulu
    © AR Ministry of Defence
  • Təlim hərbi hissələrində gənc əsgərlərin qəbulu
    © AR Ministry of Defence
  • Təlim hərbi hissələrində gənc əsgərlərin qəbulu
    © AR Ministry of Defence
1 / 3
© AR Ministry of Defence
Təlim hərbi hissələrində gənc əsgərlərin qəbulu

Tibb məntəqələrində hərbi həkim komissiyası tərəfindən müayinə olunduqdan sonra hərbi qulluqçuların hər birinə tibbi kitabça açılır və gənc əsgərlərə müvafiq qaydada məişət xidmətləri göstərilir.

Hərbi qulluqçular bütün təminat növlərinə qoyulurlar və normalara uyğun olaraq qış hərbi geyim forması ilə təmin edilirlər.

Gənc əsgərlərin hazırlığı proqramına uyğun olaraq şəxsi heyətə sıra hazırlığı məşğələləri keçirilir və onlara hərbi intizamın möhkəmləndirilməsi üzrə mühazirələr oxunur.

0