Şəhid baş çavuş Fizuli Salahov

Şəhid anasından ürəkləri dağlayan ağı: Ətrindən doymadığım balam…

991
(Yenilənib 10:21 18.12.2017)
Əvvəl həyat yoldaşını, sonra da qardaşını itirən şəhid bacısı: “Gəl, gör, bu dərdə necə dözmək olar?!”

Leyla Abdullayeva, Sputnik Azərbaycan

BAKI, 17 dekabr – Sputnik. “Şəhidlər ölməz, vətən bölünməz deyirlər”. Azərbaycan xalqı bu şüarla daha bir igidini vətənə qurban verdi.

Ermənistanın təxribatı nəticəsində şəhid olan müddətdən artıq həqiqi hərbi xidmət keçən hərbi qulluqçu, baş çavuş Salahov Fizuli Süleyman oğlunun bu gün üç mərasimidir.

Salahov 2017-ci il dekabr ayının 13-də öz adını Azərbaycan şəhidlərinin sırasına yazdırıb. 

O, düşmənin snayper tipli silahdan acdığı güllə nəticəsində baş-beyin nahiyəsindən vurularaq elə yerindəcə dünyasını dəyişib.

Fizuli 1978-ci ildə Şabran rayonunun Gəndov kəndində anadan olub. Orta məktəbi də bu kənddə bitirib. Hərbi xidməti başa vurduqdan sonra öz istəyi ilə hərbi sahəyə qayıdıb. O, xidmət etdiyi bu 15 il ərzində çoxlu medallarla təltif olunub. Hətta prezident, Ali Baş Komandan  İlham Əliyev özü onu medalla təltif edib. 

Ali Baş Komandan İlham Əliyev Fizuli Salahovun xidmət etdiyi hərbi hissədə
© Salahovlar ailəsinin arxivi
Ali Baş Komandan İlham Əliyev Fizuli Salahovun xidmət etdiyi hərbi hissədə

Fizuli kimi oğlu itirmək hamımıza təsir etsə də, daha çox ailəsini, doğmalarını yandırıb yaxır. Elə bu ağrı-acının, bu sonsuz kədərin yolunu tutub Şabrana, Fizulinin doğulub boya-başa çatdığı evə yollanırıq.

Evlərinə çatanda bizi ilk qarşılayan şəhidin atası və iki qardaşı oldu. Biz öncə onu dünyaya gətirən, min bir çətinliklə boya-başa çatdıran ananın yanına getdik. Ağlamaqdan danışmağa heyi belə qalmayan Sevda ana başsağlığımızı qəbul edib hönkürtü ilə ağlamağa başladı. Evlərinin qarşısında Təcili Tibbi Yardım maşını dayanmışdı. Məlum oldu ki, Fizulinin şəhid olması xəbərindən böyük sarsıntı keçirən anası həkimlərin nəzarətindədir.

Fizulinin bacısı Vüsalə xanım
© Sputnik / Leyla Abdullayeva
Fizulinin bacısı Vüsalə xanım

Ana çətinliklə də olsa, Fizuli haqqında Sputnik Azərbaycan-ın oxucularına danışır: "Fizulim mənim ortancıl balam idi, həm də övladlarımın gözü idi. O, təkcə ailəsinin yox, eləcə də qohumlarının fəxri idi. Orta məktəbdə, şagird və müəllimlərə kimi hamı Fizulini çox istəyirdi. Çünki o, uşaqla uşaq, böyüklə böyük kimi rəftar edirdi. İndiyə qədər heç kimdən Fizuli haqqında narazılıq eşitmədik. Onunla söhbətləşəndə hər zaman deyirdi ki, “ay ana, mən də qəhrəman olmaq, torpaqlarımızın murdar ermənilərdən alınmasında iştirak etmək istəyirəm". O, istəyinə çatdı, qəhrəman oldu. Qaldı düşməndən torpaqlarımızın azad edilməsi…”.

Şəhid anasının dediyinə görə, Fizuli əvvəl Qusarda işləyirmiş. Amma sonra öz istəyi ilə cəbhə bölgəsinə yollanıb.

Fizuli Salahovu toy günü
© Salahovlar ailəsinin arxivi
Fizuli Salahovu toy günü

“Mənim şəhid balam heç nədən qorxmadan cəbhə bölgəsinə yollandı. Deyirdi ki, "ana, işdi, birdən şəhid olsam, mənimlə fəxr eləyərsən". Sonuncu dəfə gələndə maşından 3 dəfə qayıdıb düşərək məni bərk-bərk qucaqladı, öpdü, doluxsundu. Dedi ki, "ana mən səni çox istəyirəm, bunu heç vaxt unutma” – deyə Sevda ana bildirir. 

Onun sözlərinə görə, Fizuli şəhid olmazdan bir saat əvvəl zəng edib, anası ilə telefonla danışıb.

“Axşam saatları idi. Həmişə Fizuli kiçik oğluma zəng edib dərhal deyirdi ki, “telefonu anama ver”. Həmin gün də zəng eləmişdi. Mənə dedi ki, “ana sənə telefon alacam ki, rahat-rahat danışa bilək. Canım anam, mən sənin səsini hər gün eşitmək istəyirəm”. Mənim ətrindən doymadığım balam” – Sevda ana ürəkləri dağlayan ağı deyir. 

Füzuli Salahovun özündən sonra yadigar qalan iki gözəl balasının — Nihat və Nicatın da üzündə o kədəri görməmək mümkün deyildi. Nə qədər ailə onlara “atanız gələcək” desə də, uşaqlar atalarının artıq bir daha gəlməyəcəyini başa düşürlər. 

Salahovlar ailəsi
© Salahovlar ailəsinin arxivi
Salahovlar ailəsi. Dekabr, 2012-ci il

Nicat atası haqqında deyir ki, “mənim atam igiddir, heç nədən qorxmur. O, erməniləri öldürməyə gedib”.

Fizulinin bacısı Vüsalə isə deyir ki, qardaşı ona tez-tez deyirmiş ki, “əgər şəhid olsam, “şəhid bacısıyam” deyib fəxr eləyərsən”. Amma qardaşının nə vaxtsa şəhid olacağını ağlına belə gətirməyib.

”Qardaşımla telefonla danışanda deyirdim ki, özünü qoru, özündən muğayat ol. O da deyirdi ki, “qismətimdə varsa, şəhid olacam, onda da sən bütün şəhidlər üçün ağlayarsan”. Axırıncı dəfə telefonla danışıb  sağollaşanda dedi ki, yenə zəng edəcəm. O gün işdən evə qayıdanda dedilər ki, qardaşım şəhid olub. Mən yoldaşımı təzə itirmişdim. İndi də qardaşımı itirdim. Gəl, gör, bu dərdə necə dözmək olar?!” – deyə şəhid bacısı hönkürür. 

Fizuli Salahovun xanımı və övladları
© Sputnik / Leyla Abdullayeva
Fizuli Salahovun xanımı və övladları

Şəhidin həyat yoldaşının susqunluğu isə ürəyində hansı fırtınaların qopduğundan xəbər verirdi.

Fizuli ilə bir yerdə xidmət edən gizir Cahangirov Fərid də xatirələrini bizimlə bölüşdü:

”Fizuli haqqında nə qədər danışsam, azdır. O, bizim üçün böyük qardaş idi. Bizə hər zaman dəyərli məsləhətlərini verirdi. Heç vaxt insanı darda qoymazdı. Harada olsa, gəlib çatardı. Tez-tez sərhəddən o taya baxıb deyirdi ki, “Fərid, bir gün torpaqlarımızı o murdarlardan azad eləyib xalqımızın üzünü güldürəsiyik”. Amma ona bunu görmək qismət olmadı. Fizuli bir çoxlarına nümunə oldu. Ümid edirəm ki, biz onun və bütün şəhidlərimizin qanını yerdə qoymarıq”.

Şəhidin atası Süleyman dayının isə dərdini heç nə ovuda bilmir. Qəhər içində sadəcə bunları deməklə kifayətlənir: "Fəxr edirəm ki, belə bir oğulun atasıyam. Bundan sonra Allah bizə şəhid xəbərini eşitməyi qismət eləməsin. Allah bütün əsgərlərimizi qorusun!".

991
Əlaqədar
Azərbaycan Ordusu şəhid verib
Şəhid ailələrinə ayrılan vəsaitin artırılması təklif edilir
Cəbhədə təxribat nəticəsində hərbi qulluqçumuz şəhid olub
Şuşa, arxiv şəkli

Şuşada möhtəşəm layihələrə start verildi

14
(Yenilənib 13:49 20.01.2021)
Nazir: "Biz də öz növbəmizdə bu quruculuq işlərinə töhfə verərək dünya ictimaiyyətinə mədəniyyətimizin beşiyi olan Şuşa və Qarabağ ərazisini tanıtmalı, təbliğ etməliyik".

BAKI, 20 yanvar — Sputnik. Mədəniyyət Nazirliyi Prezident İlham Əliyevin Şuşada bu il "Xarı bülbül" festivalı və Vaqif poeziya günlərinin keçirilməsi tapşırığı ilə bağlı işlərə başlayıb.

Sputnik Azərbaycan xəbər verir ki, bu barədə mədəniyyət naziri Anar Kərimov Beynəlxalq Türk Mədəniyyəti Təşkilatı (TÜRKSOY), Türkdilli Dövlətlərin Əməkdaşlıq Şurası (TDƏŞ) və Türk Mədəniyyət və İrsi Fondunun nümayəndə heyəti ilə görüşündə deyib.

A.Kərimov nümayəndə heyətlərinin Ağdam və Füzuli rayonlarının işğaldan azad olunan ərazilərinə səfərlərini yüksək dəyərləndirdiyini deyib.

Bildirib ki, Azərbaycanı dəstəkləyən, ona dost olan insanların bu ərazilərə səfəri, xoş niyyəti bizim üçün böyük əhəmiyyət kəsb edir:

"44 günlük Vətən müharibəsi Azərbaycanın Zəfəri ilə başa çatdı və 30 ildən sonra torpaqlarımıza qovuşduq. Müharibə zamanı mən türkdilli dövlətlərin Azərbaycana dəstəyini xüsusi vurğulamaq istəyirəm. Həm cəmiyyət tərəfindən, həm də siyasi aləmdə biz bu böyük dəstəyi hiss etdik. Yəqin məlumatlısınız ki, ICESCO-nun nümayəndə heyəti də bir neçə gün əvvəl Azərbaycana səfərində işğaldan azad olunan ərazilərimizə baş çəkmişdi. Bu ərazilərdə biz yeni layihələr reallaşdırmağı düşünürük və bu proseslərdə türkdilli dövlətlərlə də birgə əməkdaşlıq məsələləri daha sıx şəkildə təşkil olunmalıdır. Bilirsiniz ki, Azərbaycan Prezidenti cənab İlham Əliyev bu il Şuşada "Xarı bülbül" festivalı və Vaqif poeziya günlərinin keçirilməsi ilə bağlı tapşırıq verib və biz artıq bununla bağlı işlərə başlamışıq. Elə ərazilər var ki, minalardan təmizlənməlidir, artıq Füzulidən Şuşaya yol çəkilir, yeni infrastruktur hazırlanır. Biz də öz növbəmizdə bu quruculuq işlərinə töhfə verərək dünya ictimaiyyətinə mədəniyyətimizin beşiyi olan Şuşa və Qarabağ ərazisini tanıtmalı, təbliğ etməliyik".

Nazir daha sonra "Nizami İli" ilə bağlı keçiriləcək tədbirlər haqqında fikirlərini bölüşüb. Bildirib ki, dahi Nizami Gəncəvinin yubileyi Azərbaycanla yanaşı, bir sıra xarici ölkələrdə də qeyd ediləcək: "İnanıram ki, türkdilli dövlətlərin nümayəndələri "Nizami İli" ilə əlaqədar təşkil edilən tədbir və festivallarda yaxından iştirak edərək öz töhfələrini verəcəklər".

Qeyd edək ki, görüşdə TDƏŞ-in Baş katibi Bağdad Amreyev, TÜRKSOY-un Baş katibi Düsen Kaseinov, Türk Mədəniyyəti və İrsi Fondunun prezidenti Günay Əfəndiyeva, TDƏŞ Baş katibinin müavini Qismət Gözəlov, təşkilatın layihə direktorları Fərrux Cumayev, Bobur Taqayev, Azərbaycan Mədəniyyət Nazirliyinin TÜRKSOY-dakı nümayəndəsi Elçin Qafarlı iştirak edib.

14
Şuşada məscid, arxiv şəkli

Şuşada tarixi abidələrlə bağlı monitorinq keçirilib

9
(Yenilənib 13:14 20.01.2021)
Molla Pənah Vaqifin muzey-məqbərə kompleksinin binası və burada sərgilənən onlarla eksponat məhv edilib.

BAKI, 20 yanvar — Sputnik. Şuşa şəhərinin işğal edilməsi nəticəsində erməni vandalizminə məruz qalan Molla Pənah Vaqifin muzey-məqbərə kompleksinin binası və burada sərgilənən onlarla eksponat məhv edilib. Bu barədə Sputnik Azərbaycan-a "Azərbərpa Elmi-Tədqiqat Layihə İnstitutu"ndan bildirilib.

Xəbərə görə, institutun direktoru Telman Kərimli, institutun mütəxəssisləri və digər aidiyyəti qurumlar tərəfindən şəhərdə yerləşən tarix və mədəniyyət abidələrinin vəziyyətinin öyrənilməsi məqsədilə monitorinq keçirilib. Məlum olub ki, Şuşa şəhərində yerləşən bir çox tarix-mədəniyyət abidələri, o cümlədən Vaqifin məqbərəsi öz ilkin görkəmini itirib.

Qeyd olunub ki, Prezident İlham Əliyevin göstərişi ilə Şuşa şəhərində bütün tarixi abidələr əsl simasına qaytarılacaq, "Vaqif Poeziya Günləri" bərpa ediləcək.

9
Teqlər:
tarixi abidələr, tarixi abidələr, tarixi abidə, abidələr, Şuşa şəhəri, Şuşa
Qar adamı, arxiv şəkli

Azərbaycanda hər kəsin arzusunda olduğu qar - möhtəşəm görüntülər

0
(Yenilənib 14:39 20.01.2021)
Hazırda həmin bölgədə qarın hündürlüyü 45 sm olub. Ötən gündən davam edən qar yağışı hələ də davam edir.

BAKI, 20 yanvar — Sputnik. Qax rayonunun öz əsrarəngiz təbiəti ilə seçilən tarixi Sarıbaş kəndinə qar yağıb.

Sputnik Azərbaycan-ın bölgə müxbirinin məlumatına görə, yağan qar onsuz da yolu olmayan dağ kəndinə gediş-gəlişi mümkünsüz edib.

Xatırladaq ki, Milli Hidrometeorologiya Xidmətinin yanvarın 20-si saat 10:00-a olan məlumatına əsasən, ölkə ərazisində hava şəraiti yağıntılı olub, bəzi yerlərdə qar yağıb.

Qar örtüyünün hündürlüyü ən çox Qax rayonunun Sarıbaş kəndində qeydə alınıb. Hazırda həmin bölgədə qarın hündürlüyü 45 sm-i ötüb. Ötən gündən başlayan qar yağışı hələ də davam edir.

0
Teqlər:
Sarıbaş, Sarıbaş kəndi, qar, Qaxda qar