Şəhid Pəncəlinin ev muzeyi

Düşmən onu tutmaq üçün 21 gün axtarıb

5771
(Yenilənib 14:39 05.04.2019)
"O, bir qəhrəman kimi özünə öz toy günündə şəhidlik arzu etdi və arzusuna da çatdı"

Rahim Zakiroğlu, Sputnik Azərbaycan

BAKI, 5 aprel — Sputnik. Reportajımızın qəhrəmanı ömrünün 35-ci baharında şəhidlik zirvəsinə ucalan, Xüsusi Təyinatlı Qüvvələrin əfsanəvi giziri Pəncəli Nurməmməd oğlu Teymurovdur.

Şəhid Pəncəlinin xatirə şəkilləri
© Sputnik / Rahim Zakiroghlu
Şəhid Pəncəlinin xatirə şəkilləri

Sputnik Azərbaycan-ın bölgə müxbirinə Pəncəli Teymurovun şücaəti haqqında böyük qardaşı Elbrus Teymurov danışıb: "Pəncəlinin nailiyyətləri çox olub. Şəhid olandan sonra döyüş yoldaşlarının "Pəncəli sağ ikən öz qisasını almışdı" sözləri bizə təsəlli oldu. O, Xocalı faciəsinin və şəhidlərimizin qisasını almışdı. Pəncəli Teymurov "Milli Qəhrəman" fəxri adına layiq igid olub. Dörd nəfər erməni hərbçisini və Kəlbəcərdə 20 nəfərə yaxın düşmən əsgərini daşıyan "Ural" markalı yük avtomobilini mina ilə partladaraq məhv edən qəhrəman olub Pəncəli. Bir dəfə erməni əsgərləri onu tutmaq üçün pusquya salıblar, o isə 21 gündən sora pusqudan çıxıb”.

“Bir dəfə də Pəncəlinin şalvarının bud nahiyəsində güllənin açdığı yanmış deşik izini gördüm. O isə məni aldadaraq şalvarının siqaretdən yandığını bildirdi. Bir dəfə də Murovda meşədə bir neçə gün gizlənib. Siqaret çəkərkən düşmənin gəldiyini görüb və siqareti əlində elə sıxıb ki, əlcəkləri yanıb. Həmin yanmış əlcəkləri indi onun ev muzeyində müqəddəs atribut kimi saxlayırıq” – deyə şəhidin qardaşı qeyd edib.

Şəhid Pəncəli Teymurovun ev muzeyi
© Sputnik / Rahim Zakiroghlu
Şəhid Pəncəli Teymurovun ev muzeyi

Həmsöhbətimizin dediyinə görə, ermənilər Pəncəlinin başına külli miqdarda pul qoyubmuş: “Pəncəli şəhid olandan sonra Rusiyanın Kalininqrad şəhərində yaşayan soydaşlarımızdan biri bizə dedi ki, Rusiyada bir erməni ilə rastlaşıb. Həmin erməni Aprel döyüşləri vaxtı xaricə qaçanlardan olub. Həmyerlimizin mobil telefonunda qardaşımın şəklini görən erməni Ermənistanda Pəncəli Teymurovun ölüsü və dirisini ələ keçirənə külli miqdarda pul mükafatı vəd edildiyini deyib". 

Pəncəli Teymurov 2015-ci ildə Prezident, Ali Baş Komandan İlham Əliyevin imzası ilə "İgidliyə görə" medalı ilə təltif olunub. Şəhidimizin 3 mərasimində iştirak edən Xüsusi Təyinatlı Qüvvələrin general-mayoru Hikmət Mirzəyev bildirib ki, Pəncəli Teymurov Azərbaycan Xüsusi Təyinatlılarının onurğa sütunu olub və o, bu yaxınlarda Astaranın 2-ci Milli Qəhrəmanı olacaq. Şəhidin ailəsi isə təəssüflə bildirib ki, indiyə qədər hələ də Pəncəli deyilən fəxri ada layiq görülməyib: “Bu haqda bir neçə dəfə yazılı şəkildə Ali Baş Komandana müraciət də etmişik. Anamız istəyir ki, Prezidentlə görüşsün və öz istəyini çatdırsın”.

Şəhid Pəncəli Teymurovun vəsiqələri
© Sputnik / Rahim Zakiroghlu
Şəhid Pəncəli Teymurovun vəsiqələri

Əfsanəvi gizir Pəncəli Teymurovun xatirəsini əbədiləşdirmək üçün şəhidin şəxsi əşyaları qorunan ev muzeyi yaradılıb: “Oğlu şəhid olandan sonra anamızın bizdən ən böyük istəyi o oldu ki,  Pəncəli üçün bir ev muzeyi tikək, gələcək nəsillərə bir məktəb olsun. Biz də anamızın sözündən çıxmayıb bu ev muzeyini inşa etdik. Muzeyin tikintisində bizimlə bərabər anam özü də iştirak edib. Elə vaxt olurdu ki, anam mişar daşlarını belə, özü daşıyardı”.

Pəncəli Teymurov Türkiyə Respublikasında hərbi təlim keçmiş döyüşçülərdən olub: “Pəncəli Türkiyədə "Bordo Bereliler" xüsusi təyinatlıların kursunu keçmişdi.  Komandan şəxsən onu "Qızıl bayraq" medalı və bir neçə Fəxri fərmanla təltif etmişdi. Qardaşım şəhid olandan sonra türkiyəli qardaşlarımız evimizə gələrək bizə baş çəkiblər. Onun 40 mərasimində iştirak edən türkiyəli qardaşların özündən eşitdik ki, Pəncəli Teymurovu Türkiyədə qəhrəman kimi tanıyırlar".

Şəhid Pəncəli Teymurovun təltifnamələri
© Sputnik / Rahim Zakiroghlu
Pəncəli Teymurov Türkiyə Respublikasında hərbi təlim keçmiş döyüşçülərdən olub

Elbrus Teymurov Pəncəli ilə sonuncu dəfə onun ad günündə telefonla danışıb: “Qardaşım sonuncu dəfə 2016-cı ilin 15 yanvarında axşam saatlarında evə gəldi. Ondan sonra isə ara-sıra telefonla əlaqə saxlayırdıq. Martın 24-də onun ad günü idi,  zəng vurduq, amma cavab vermədi. Heç vaxt olmamışdı ki, bizə cavab verməsin. Gecə saatlarında özü zəng eləyib bizimlə danışdı. Aprel döyüşləri başlayanda da ona zəng elədik, lakin zəng çatmadı. Yenə də özünün zəng edəcəyinə inanırdıq, ancaq gözümüz zəngin yolunda qaldı. Aprelin 6-sı yeznəm Murad o vaxt yaradılmış qaynar xəttə zəng vurdu. Bizə Pəncəlinin şəhid olduğunu bildirdilər. Ancaq mən özüm zəng edəndə başqa ad dedilər. Aprelin 10-da axşam saat 17:00 radələrində isə bizə zəng edərək "Oğlunuz şəhid olub" xəbərini verdilər. Sonra öyrəndik ki, aprelin 3-dən 4-nə keçən gecə səhərə yaxın şəhid olub. Cəsədi ermənilər tərəfdə qalıb deyə, bizə bildirməyiblər”.

Şəhid Pəncəli Teymurovun anası Vahimə Ağayeva da oğlu ilə bağlı xatirələrini bizimlə bölüşdü: “7 övlad böyütmüşəm, 5 oğul və 2 qız. Oğullarımın 5-i də hərbi xidməti fərqlənmə ilə başa vurub.  Pəncəli 2-ci oğlum idi, uşaqlıqdan fərqliydi, cəsurluğu ilə qardaşlarından seçilirdi, igid kimi böyüyürdü. Kəndimizdə, oxuduğu məktəbdə də hamı onu cəsur kimi tanıyırdı. Müəllimlərin hörmətini saxlayan, böyük-kiçik bilən idi. Hərbi xidmətə də sevinə-sevinə getmişdi. Xocalı faciəsində baş verənləri eşidəndən, soyuqdan donmuş, qətlə yetirilmiş uşaqların cəsədlərini görəndən, uşaqları dəmir borunun içərisinə salaraq öldürüldüyünü eşidəndən sonra Pəncəlidə o balaların qisasını almaq istəyi yaranmışdı. Hərbi xidmətdən məzuniyyətə gələndə də vətənə xidmət etmək, ana-bacılarını qorumaq üçün hərbi xidməti davam etdirəcəyini bildirmişdi”. 

  • Şəhid Pəncəli Teymurov ölümündən sonra Vətən uğrunda medalı ilə təltif olunub
    Şəhid Pəncəli Teymurov ölümündən sonra "Vətən uğrunda" medalı ilə təltif olunub
    © Sputnik / Rahim Zakiroghlu
  • Şəhid Pəncəli Teymurovun avtomobili
    Şəhid Pəncəli Teymurovun avtomobili
    © Sputnik / Rahim Zakiroghlu
  • Şəhid Pəncəlinin xatirə şəkilləri
    Şəhid Pəncəlinin xatirə şəkilləri
    © Sputnik / Rahim Zakiroghlu
  • Şəhid Pəncəlinin medalları
    Şəhid Pəncəlinin medalları
    © Sputnik / Rahim Zakiroghlu
  • Şəhid Pəncəlinin ev muzeyi
    Şəhid Pəncəlinin ev muzeyi
    © Sputnik / Rahim Zakiroghlu
1 / 5
© Sputnik / Rahim Zakiroghlu
Şəhid Pəncəli Teymurov ölümündən sonra "Vətən uğrunda" medalı ilə təltif olunub

“Qayıtdıqdan sonra gizirlik məktəbini oxudu, vətənə, dövlətə xidmət etməyə başladı. Evə də gec-gec, 1-2 günlüyə və ya 1-2 saatlığa gələrdi. Onun evə gəlişini toy-bayram kimi qeyd edərdik. Pəncəli öz toy günündə özünə şəhidlik arzu etdi və arzusuna da çatdı. Onun bu arzusunu eşidəndə mağarda olan hər kəs ağlamışdı. Heç vaxt ağlıma gəlməzdi ki, oğlum şəhid olar” – deyə ana göz yaşıyla danışdı. 

Vahimə xanım sonda bütün şəhid analarına səbir dilədi: “Övladlarımız qeyrətlə, namusla torpaq, vətən, ana-bacıların yolunda şəhid olublar. Onları görməsək də, bizimlə bərabər xalqın ürəyində daim yaşayacaqlar. Allah bütün hərbçilərimizi qorusun, qollarına qüvvət versin ki, şəhidlərimizin qanını yerdə qoymasınlar, torpaqlarımızı geri alsınlar. Biz şəhid anaları da Qarabağda,  şəhidlərimizin qanı tökülən yerdə bayram edək”.

5771
Əlaqədar
İraqın şimalında atışma – İki türk hərbçisi şəhid oldu
Bayramadək daha 1200 şəhid vərəsəsinə birdəfəlik ödəmə veriləcək
“Oğlumu yenə orda qoyub gəldim” – Şəhid anaları cəbhədə əsgərlərlə görüşdü
Şəhid ailələrinin bank krediti ilə bağlı mühüm qərar verildi