Rza Rzayev

Bakıdakı şok qalmaqalın şahidləri danışdılar: "Deyir ki, səni öldürüb, nəslini kəsəcəm"

16904
(Yenilənib 16:13 21.11.2018)
Faktla bağlı Nizami Rayon Polis İdarəsinin 25-ci polis şöbəsində təhqiqat araşdırması aparılıb

Nigar Məhərrəm, Sputnik Azərbaycan

BAKI, 21 noyabr — Sputnik. Xəbər verdiyimiz kimi, ötən gün Nizami Rayon Məhkəməsinin qarşısında əlbəyaxa dava olub. 175 nömrəli orta məktəbin direktoru Tural Mirzəliyev, uzun müddətdir aralarında münaqişə yaşanan aktyor Rza Rzayev tərəfindən döyülüb.

Hadisə şahidləri, həmçinin Təhsil Nazirliyi də bu məlumatı təsdiqləyib. Nazirliyin İctimaiyyətlə əlaqələr şöbəsinin müdiri Cəsarət Valehov davada döyülən direktorun vəziyyətinin ağır olduğunu bildirib.

Bakı Şəhəri üzə Təhsil İdarəsinin İctimaiyyətlə Əlaqələr Şöbəsinin rəhbəri Bəşarət Məmmədov Sputnik Azərbaycan-a açıqlamasında bu hadisənin böyük qınaqla qarşılandığını deyib: "Bakı Şəhəri üzrə Təhsil İdarəsi paytaxtdakı 175 nömrəli tam orta məktəbin direktoru Tural Mirzəliyevə qarşı baş vermiş fiziki zorakılıq halını pisləyir və şiddətlə qınayır. Bir təhsil müəssisəsinin rəhbərinə qarşı şəxsi toxunulmazlıq və digər hüquqi prinsiplərin kobud şəkildə pozulması ilə müşahidə olunan fiziki zor tətbiq edilməsi və bədən xəsarətləri yetirilməsi ölkəmizin təhsil ictimaiyyəti tərəfindən hiddətlə qarşılanır".

"Noyabrın 20-də aldığı ağır xəsarətlər səbəbindən 3 saylı Şəhər Klinik Xəstəxanasına yerləşdirilmiş 175 nömrəli tam orta məktəbin direktoru Tural Mirzəliyevə baş çəkilib, səhhəti ilə maraqlanılıb. Bu məsələ Təhsil Nazirliyinin rəhbərliyinin bilavasitə diqqət mərkəzindədir. Hazırda hüquq-mühafizə orqanları tərəfindən araşdırması aparılan məsələnin ədalətli hüquqi qiymət alacağına inanırıq" - deyə B.Məmmədov bildirib.

Hadisə şahidi Ülvi Quliyev isə Sputnik Azərbaycan-a açıqlamasında Tural Mirzəliyevin Rza Rzayev tərəfindən hər zaman hədələndiyini söyləyib: "Artıq neçənci məhkəmə prosesidir ki, Rza Rzayev Tural Mirzəliyevi ailəsi ilə təhdid edir. Deyir ki, "səni öldürüb, nəslinin-kökünün axırına çıxacağam". Onu kəsib-doğramaqla hədələyir. Rza Rzayev Tural Mirzəliyevin ailəsinin də təhlükədə olduğunu söyləyir. Tural Mirzəliyevin ünvanına təhqiramiz və nalayiq sözlər səsləndirir".

"Ötən gün də dayandığı yerdə Tural Mirzəliyevi vurdu. Buna baxmayaraq, direktor ona bir barmaq belə, toxundurmadı. Təəssüflər olsun ki, mediaya çıxışı olduğu üçün Rza Rzayev bir sıra media orqanlarında hadisə ilə əlaqədar yalan informasiya yaydırır. Deyir ki, guya qolu sınıb. Halbuki heç kəs onu vurmayıb" – Ü.Quliyev əlavə edib.

Şahidin sözlərinə görə, hadisə baş verərkən polis ərazidə olmayıb. Polisə bu haqda sonradan məlumat verilib.

Ü.Quliyevin qeyd edib ki, ötən gün baş verən hadisədən sonra Rza Rzayevlə bir neçə dəfə qarşılaşıblar: "Dünən baş verən hadisə zamanı Rza Rzayevi ayırmaq üçün müdaxilə etdim. Bu zaman mənə də zərbə endirdi, üzümdən zədə aldım. Dünən isə onunla bir neçə dəfə polis bölməsi və xəstəxanada rastlaşmışıq. O da 2 saylı Respublika Klinik Xəstəxanaya müayinəyə gəlmişdi. Bizi gördükdə yenə də təhdidlərini yağdırdı".

Hazırda xəstəxanada olan direktorun yaxını Vüqar Hüseynov isə son vəziyyət haqda məlumat verdi: "Direktorun vəziyyəti ağırdır. Ötən gün baş verən hadisə ilə əlaqədar olaraq kəllə-beyin travması alıb, huşsuz vəziyyətdə xəstəxanaya gətirilib. Aldığı zədə səbəbindən ürəkbulanması var. Bu gün də bir neçə dəfə qusub. Heç nə danışmır, halı yoxdur. Artıq polislər də burdadır. Hazırda Nizami Rayon Polis İdarəsinin əməkdaşları bura gəldiyi üçün bizi də ərazidən uzaqlaşdırırlar".

Hadisə ilə bağlı hüquqşünas Elvin Səlimovun mövqeyini də öyrəndik. O bildirdi ki, baş vermiş hadisə ilə əlaqədar olaraq Azərbaycan Respublikasının Cinayət Məcəlləsinin 221-ci maddəsi ilə, yəni xuliqanlığa görə, cinayət işi açıla bilər: "Xuliqanlıq maddəsi ictimai qaydanın kobud sürətdə pozulmasıdır. İctimai qaydanın pozulması halı baş verməyibsə, sadəcə tərəflər arasında qarşılıqlı münasibətlər zəminində yaranmış mübahisədən doğan fiziki zor tətbiqetmə olubsa, bu zaman həmin şəxs digər maddələrlə məsuliyyətə cəlb oluna bilər".

"Bu halda şəxs Cinayət Məcəlləsinin 126,127 və 128-ci maddələri ilə ittiham oluna bilər. Zərərçəkmişin sağlamlığına yüngül zərərvurma müşahidə edilibsə, bu zaman Cinayət Məcəlləsinin 128-ci maddəsi ilə cinayət işi açılacaq. Zərərçəkmişə az ağır xəsarət yetirilibsə, Cinayət Məcəlləsinin 127-ci maddəsi ilə, ağır xəsarət yetirildiyi təsdiqlənərsə, 126-cı maddəsi ilə şəxsin barəsində cinayət işi başlanılacaq" – deyə hüquqşünas əlavə etdi.

Ötən gün baş vermiş sözügedən hadisə ilə bağlı qarşı tərəfin fikirlərini öyrənmək cəhdimiz də uğursuz alındı. Aktyor Rza Rzayev telefon zəngimizə cavab versə də, hazırda dəfn mərasimində olduğunu, yaxın 1-2 saat ərzində danışa bilməyəcəyini bildirdi.

Daxili İşlər Nazirliyinin (DİN) mətbuat xidmətinin rəis müavini, polis polkovniki Orxan Mansurzadə "Report"a açıqlamasında bildirib ki, faktla bağlı Nizami Rayon Polis İdarəsinin 25-ci polis şöbəsində təhqiqat araşdırması aparılıb, hər iki şəxsin ərizələri və izahatları alınıb.

"Həmçinin onların tibbi ekspertizadan keçirilmələri təmin olunub. Təhqiqat zamanı faktla əlaqədar toplanmış materiallar sonrakı araşdırmaların aparılması və hadisəyə hüquqi qiymət verilməsi üçün istintaq orqanına göndərilib" - deyə O.Mansurzadə bildirib.

Qeyd edək ki, Tural Mirzəliyev aktyor Rza Rzayevlə ilk dəfə münaqişə yaşayanadək Bakıdakı 220 saylı məktəb-leseyin direktoru olub. Həmin münaqişədən qısa müddət sonra oradan çıxarılaraq, 175 nömrəli tam orta məktəbə direktor təyin edilib.

16904
Əlaqədar
Aktyorun döydüyü direktorla bağlı açıqlama gəldi - RƏSMİ
Bakıda məşhur restoranın sahibi haqq-hüquq davasına başlayıb
Qandal, arxiv şəkli

Arvadını öldürməyə cəhd edən şəxs saxlanıb

9
(Yenilənib 14:07 26.09.2020)
Hazırda cinayəti törətməkdə şübhəli bilinən Rasim Məsimovun tutularaq istintaqa cəlb edilməsi, habelə hadisənin təfərrüatlarının tam, hərtərəfli və obyektiv araşdırılması istiqamətində intensiv istintaq və əməliyyat-axtarış tədbirləri davam etdirilir.

BAKI, 26 sentyabr — Sputnik. Sentyabrın 25-də Gədəbəy rayonu ərazisində Qurudərə kənd sakini Zülfiyyə Məsimovaya çoxsaylı bıçaq xəsarətlərinin yetirilməsi barədə rayon prokurorluğuna məlumat daxil olub.

Sputnik Azərbaycan Gədəbəy rayon Prokurorluğunun mlumatına istinadla xəbər verir ki, dərhal prokurorluq əməkdaşları tərəfindən hadisə yerinə baxış keçirilib və digər zəruri prosessual hərəkətlər yerinə yetirilib.

Aparılan araşdırmalarla zərərçəkmişin keçmiş əri Rasim Məsimovun şəxsi münasibətlər zəminində aralarında yaranmış münaqişə zamanı bıçaqla çoxsaylı xəsarətlər yetirməklə Zülfiyyə Məsimovanı qəsdən öldürməyə cəhd edərək hadisə yerindən qaçmasına əsaslı şübhələr müəyyən edilib.

Faktla bağlı Gədəbəy rayon prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb.

Hazırda cinayəti törətməkdə şübhəli bilinən Rasim Məsimovun tutularaq istintaqa cəlb edilməsi, habelə hadisənin təfərrüatlarının tam, hərtərəfli və obyektiv araşdırılması istiqamətində intensiv istintaq və əməliyyat-axtarış tədbirləri davam etdirilir.

9
Ukraynada An-26 təyyarəsinin qəzaya uğraması

Zelenski An-26 təyyarələrinin uçuşlarına qadağa qoydu

192
(Yenilənib 14:04 26.09.2020)
Qərar Xarkov yaxınlığında An-26 təyyarəsinin qəzaya uğramasının səbəbinin aydınlaşdırılmasına qədər qüvvədə olacaq.

BAKI, 26 sentyabr — Sputnik. Ukrayna Prezidenti Vladimir Zelenski An-26 təyyarəsinə analoji olan bütün təyyarələrin uçuşlarının dayandırılmasını tapşırıb.

Sputnik Azərbaycan xarici mediaya istinadən xəbər verir ki, bu qərar Xarkov yaxınlığında An-26 təyyarəsinin qəzaya uğramasının səbəbinin aydınlaşdırılmasına qədər qüvvədə olacaq.

An-26 təyyarəsi sentyabrın 25-də Xarkov vilayətində hərbi hava limanından iki kilometr aralıda təlim uçuşları zamanı qəzaya uğrayıb. Qəzanın mümkün səbəbi mühərrikin nasazlığıdır.

Təyyarədə qəza zamanı hərbi təyyarəçilər və kursantlar olub. Göyərtədə olan 27 nəfərdən 20-si kursant və 7-si ekipaj üzvü olub. Son məlumatlara görə, onlardan 26-sı həlak olub.

192
Toyuq əti, arxiv şəkli

Quş əti sağlamlıq üçün çox yararlıdır - Mütəxəssis rəyi

0
(Yenilənib 14:48 26.09.2020)
Quş əti insan orqanizmi üçün vitamin kompleksi mənbəyidir. Tərkibi A, D, E və B qrupu vitaminləri (B1,  B2,  B3, B4, B5, B6,  B9), həmçinin biotinlə (vitamin H) zəngindir.

BAKI, 26 sentyabr — Sputnik. Azərbaycan Qida Təhlükəsizliyi İnstitutunun  Elmi-tədqiqat və risklərin qiymətləndirilməsi departamentinin Heyvan sağlamlığı şöbəsinin mütəxəssisləri Q. Cəlladov, R. Səfərova, K. Əliyeva, R. Kəngərli, F. Əlizadə tərəfindən quş ətinin faydaları haqda məqalə hazırlanıb. Sputnik Azərbaycan mütəxəssislər tərəfindən hazırlanan məqaləni təqdim edir:

Zülalların (proteinlər) miqdarı qaz ətində 15 %, ördək ətində 17 %, toyuq ətində  20-22 %, hinduşka ətində 24 %, ov quşlarının ətində 22-25 % olduqda tam dəyərli sayılır. Belə ki, sadə proteinlərin (miogen, mioalbumin, mioqlobin və b.) tərkibində əksər aminturşularına, o cümlədən orqanizm üçün əvəzolunmaz aminturşularına (92 %-ə qədər) rast gəlinir. Tərkibində triptofanın çox olması səbəbindən quş ətinin istehlakı zamanı orqanizmdə serotonin hormonunun (“sevinc hormonu”) miqdarı artır. Beyin hüceyrələrində sintez olunan serotonin əhval-ruhiyyəni yüksəldir, stressi aradan qaldırır və orqanizmdə rahatlıq hissi yaradır. Qlutamin turşusunun çox olması isə quş ətinə spesifik dad və qoxu verir. Həmçinin quş ətinin bioloji dəyərliliyi triptofan/oksiprolin və zülal/yağ nisbəti ilə qiymətləndirilir ki, keyfiyyətli quş əti üçün bu rəqəmlər müvafiq olaraq 5-7 və 2-3 arasında dəyişir. Mal ətinə nisbətən quş ətində lizinin miqdarı 3 dəfəyə qədər üstünlük təşkil edir. Quş ətinin tərkibində azdəyərli hesab olunan birləşdirici toxuma zülallarının (elastin, kollagen və s.) miqdarı 1,5 %-ə çatır.

Yağların (lipidlərin) miqdarı broyler toyuğunun ətində 12 %, qaz ətində 38 %, ördək ətində 39 %-ə qədər təşkil edir. Onların da çox hissəsi dəri və dərialtı toxumada, həmçinin daxili orqanların ətrafında toplanır. Ov quşlarının ətində isə yağların miqdarı az (1-3 %) olur. Əzələ toxumasında yağların əzələ lifləri arasında bərabər şəkildə paylanması quş ətinin yumşaq konsistensiyalı, dadlı və aromatlı olmasını təmin edir. Bu səbəbdən də mal ətindən fərqli olaraq quş əti “mərmər” görünüşə malik deyil. Quş ətində olan yağlar 41 %-ə qədər triqliserollar (neytral yağlar) və 38 %-ə qədər lipoidlərdən (fosfolipidlər, sterollar və s.) ibarətdir. Tərkibində 69-73 %-ə qədər doymamış ali yağ turşuları vardır. 18-22 növ ali yağ turşusuna malik quş ətinin yağları əvəzolunmaz polidoymamış turşularla (olein, linol, linolen, araxidon və b.) zəngin olduğundan aşağı temperaturda (23-35o  C ) əriyir. Odur ki, həmin yağların 80-98 %-i insan orqanizmi tərəfindən mənimsənilir. Bu yağların tərkibində doymuş turşulardan palmitin və stearin turşuları isə üstünlük təşkil edir.

Quş ətində mineral maddələrin miqdarı 0,5-1,2 % təşkil edir. Tərkibi Na, K, Ca, Mg, P, Fe, Cu, Zn, Se, J, S, Mn, o cümlədən digər makro və  mikroelementlərdən ibarətdir.

Azotlu və azotsuz ekstraktiv maddələrin (karnitin, karnozin, kreatin, kreatinin, qlikogen, süd turşusu, sərbəst aminturşuları, adenozinfosfatlar və b.) miqdarına görə quş əti mal ətini üstələyir. Onların da çox hissəsi döş ətində toplanır. Bildiyimiz kimi, bu maddələr fermentlərin təsiri ilə ətin “yetişməsi” prosesini (avtoliz) tənzimləyir. Quş ətində digər heyvan ətlərindən fərqli olaraq purin əsaslarının miqdarı az olur. Tərkibindəki qida maddələrinin, xüsusilə yağ və zülalların miqdarından asılı olaraq quş ətinin enerji dəyəri dəyişkən olur (100 qr-da 120-350 kkal).

Quş əti insan orqanizmi üçün vitamin kompleksi mənbəyidir. Tərkibi A, D, E və B qrupu vitaminləri (B1,  B2,  B3, B4, B5, B6,  B9), həmçinin biotinlə (vitamin H) zəngindir.

Broyler toyuqlarının  inkişafının 8-10 həftəlik dövründə əzələ toxumasında zülalların, daha sonra isə digər maddələrin, xüsusilə də yağların toplanması prosesi gedir. Odur ki, quşçuluq təsərrüfatlarında broyler toyuqlarının optimal yetişdirilmə dövrü 35-45 gün ərzində başa çatdırılmaqla, istehsal olunan quş əti məhsulu biokimyəvi xüsusiyyətlərinə görə keyfiyyətli və diyetik hesab olunur. Quş ətinin tərkibində karbohidratlar əsasən “əzələ şəkəri” adlanan qlikogen şəklində təmsil olunur ki, bu da onun diabet xəstələri tərəfindən təhlükəsiz istehlakı üçün zəmin yaradır.

Quş ətinin rəngi tərkibindəki zülal-yağ nisbətindən asılı olaraq ağ-çəhrayı, sarımtıl və ya tünd qırmızı çalarlı ola bilər. Müxtəlif nahiyələrdə ətin rəngi fərqli olur. Məsələn, toyuq və hinduşkalarda döş əti ağ-çəhrayı rəngdə, qanad və bud əti isə nisbətən tünd çəhrayı və ya tünd qırmızı çalarlı olur. Quş ətinin açıq rəngdə olması onun tərkibində zülal və ekstraktiv maddələrin çox, yağların isə az olmasının göstəricisidir.

Ov quşlarının əti qırmızı-qəhvəyi çalarlı, həmçinin balıq və ya qətran qoxulu olur. Yağların miqdarı ov quşlarının ətində az olsa da, zülalların miqdarı çoxluq təşkil edir (22-25 %).

Quş ətinin tərkibindəki birləşdirici toxuma zərif əzələ liflərindən təşkil olunduğuna görə insan orqanizmi tərəfindən asan (80 % -ə qədər) həzm olunur. Qeyd edək ki, yaşlı quşların əzələ toxuması cavanlara, ov quşlarının əzələ toxuması isə ev quşlarına nisbətən sərt olur.

Quş əti qida maddələri ilə zəngin olduğundan mikroorqanizmlərin inkişafı üçün əlverişli mühit hesab edilir. Xüsusilə də sanitar-gigiyenik tələblərə uyğun olmayan şəraitdə saxlandıqda patogen mikroorqanizmlər, o cümlədən bakteriya və viruslar intensiv inkişaf edir. Bu da insan sağlamlığı üçün təhlükəli infeksiya və toksikozların baş verməsinə səbəb olur. Qeyd edək ki, təzə kəsilmiş quş cəmdəyinin dərisinin rəngi ağ-sarımtıl, səthi quru, konsistensiyası elastiki, qoxusu növündən asılı olaraq spesifik olur. Təzə kəsilmiş quş cəmdəyi soyuducuda 0-4o C temperaturda 72 saat, -18o C temperaturda isə 8-10 ay müddətində saxlanıla bilər.

Quş ətinin orqanizm üçün faydası kifayət qədərdir:

•       diyetikdir (ördək və qaz əti istisna olmaqla);

•       tərkibi asan mənimsənilən qida maddələri və bioloji aktiv maddələrlə (əvəzolunmaz aminturşuları, essensial yağ turşuları və s.) zəngindir;

•       tərkibində triptofan çox olduğundan istehlakı zamanı orqanizmə rahatlıq verir;

•       doymamış yağ turşuları ilə (olein, linol, araxidon və s.) zəngin olduğundan orqanizmdən zərərli xolesterolu kənarlaşdırmaqla, atereskleroz və hipertoniyanın qarşısını alır;

•       mədə-bağırsaq xəstəliklərinin müalicəsində dərman vasitələri qədər faydalıdır;

•       tərkibində asan mənimsənilən dəmirin çox olması qanazlığı və qan dövranı pozğunluqlarının bərpası proseslərini sürətləndirir;

•       diabet xəstələrində maddələr mübadiləsinə tənzimləyici təsir göstərir;

•       immun sistemini möhkəmləndirir;

•       soyuqdəymə və respirator xəstəliklərin müalicəsində istifadə olunur.

0