BAKI, 26 dekabr — Sputnik. Daxili İşlər Nazirliyinin (DİN) mətbuat xidməti Su Nəqliyyatında Polis İdarəsinin Ələt portunda, rəis, polis pokovniki Fərhad Məmmədxanovun həbsi ilə bağlı açıqlama yayıb. Sputnik Azərbaycan xəbər verir ki, açıqlamada adıçəkilən şəxsin hazırda daxili işlər orqanlarının əməkdaşı olmadığı bildirilir.
"Həmin xəbərdə "polis polkovniki" kimi təqdim edilən Fərhad Məmmədxanovun daxili işlər orqanlarında xidmət etdiyi müddətdə son rütbəsi polis polkovnik-leytenantı olub. Həmin şəxs təxminən 6 ay əvvəl — bu il iyunun 16-da barəsində aparılmış xidməti yoxlamanın nəticəsinə əsasən, cənab nazirin əmri ilə daxili işlər orqanlarında xidmətdən xaric olunub" — məlumatda əlavə olunur.
Qeyd edək ki, F.Məmmədxanov Baş Prokuror yanında Korrupsiyaya Qarşı Mübarizə İdarəsinin əməkdaşları tərəfindən tutulub. Onun barəsində həbs-qətimkan tədbiri seçilib və 1 saylı istintaq Təcridxanasına göndərilib.
O, işə düzəltmək adı ilə 800 min manat məbləğində mənimsəmədə, bundan başqa mağazadan "Vertu" markalı telefonu kreditə götürərək ödəniş etməkdən yayınmaqda ittiham olunur. Onun barəsində Cinayət Məcəlləsinin dələduzluq (178-ci) maddəsi ilə cinayət işi başlanıb.
