İlham Əhmədov, Sputnik Azərbaycan
BAKI, 17 iyul — Sputnik. Şamaxının Dağ Göylər kəndində quduzlaşmış sahibsiz itlər, sakinlərdən birinin şəxsi təsərrüfatındakı qoyunları parçalayıb. Bu, rayonda ilk belə hadisə olmadığı, dəfələrlə təkrarlandığı üçün, sakinlərdə ciddi narahatlıq başlayıb.
Sonuncu dəfə bu günlərdə Dağ Göylər kənd sakini, 33 yaşlı Toğrul Salahova məxsus qoyunlar sahibsiz itlərin hücumuna məruz qalıb. Salahovun Sputnik Azərbaycan-ın bölgə müxbirinə verdiyi məlumata görə, qardaşı qoyunları tövləyə salmaq istəyəndə it sürüsünün basqınına məruz qalıblar.
"İtləri ərazidən uzaqlaşdırdıqdan sonra, üç qoyunun parçalandığını görüb. Kənd baytarlıq idarəsinin səlahiyyətli nümayəndəsi hadisə yerinə gələrək ərazini dezinfeksiya etdi. Tələf olmuş heyvanları isə kəndin ərazisindən uzaqlaşdıraraq məhv etdik" — sakin deyib.
Onun sözlərinə görə, bu ay ərzində artıq üçüncü dəfədir ki, itlər həyətlərə hücum edib və nəticədə 15-dən çox qoyunu parçalayıb. Bununla bağlı dəfələrlə yerli orqanlara müraciət etsələr də, hələlik heç bir tədbir görülməyib. Kənd sakinləri sahibsiz itlərin əhaliyə də hücum edəcəyindən narahatdırlar.
Rayon Baytarlıq İdarəsindən Sputnik Azərbaycan-ın bölgə müxbirinə bildirildi ki, sahibsiz itlərin tələf olunması qanunla qadağan olunduğu üçün, itlərin məhv edilməsi mümkün deyil.
Beləliklə, görülən budur ki, məsul şəxslər hadisənin daha da böyüyənə və sahibsiz itlər insanlara xəsarət yetirənədək heç bir tədbir görməyəcəklər.
