BAKI, 20 may — Sputnik. Bu gün Bakı-Qazax yolunda ağır avtomobil qəzası baş verib. "Report"un məlumatına görə, hadisə saat 15:00 radələrində Bakı-Qazax magistral yolunun Hacıqabul rayonu ərazisindən keçən hissəsində, Nəvai postunun yaxınlığında baş verib.
Avtomobilin idarəetmədən çıxaraq yol kənarına aşması nəticəsində 5 nəfər həlak olub. Bunlar — 1998-ci il təvəllüdlü Əmiraslanlı Əmiraslan Müşfiq oğlu, 1998-ci il təvəllüdlü Hüseynov Elvin Vahid oğlu, 1999-cu il təvəllüdlü Azadlı Əlizamin Fikrət oğlu, Əhmədov Elçin Cahangir oğlu və 2000-ci il təvəllüdlü Süleymanlı Murad Rəfael oğludur.
Ölənlərin Maliyyə-İqtisad Kollecinin tələbələri olduğu bildirilir. Faktla bağlı Baş Dövlət Yol Polisi İdarəsinin əməkdaşları tərəfindən araşdırma aparılır.
