BAKI, 13 dek — Sputnik. Masallı rayonunda gənc qadını qətlə yetirməkdə təqsirli bilinən kişi saxlanılıb. Bu barədə Sputnik-ə Masallı rayon Polis İdarəsindən məlumat verilib.
Dekabrın 12-si axşam saatlarında Masallıda ürəyinə bıçaq zərbəsi endirilərək qətlə yetirilmiş, 22 yaşlı Hüseynova Roza Novruz qızının cəsədi aşkarlanıb. İstintaq-əməliyyat qrupunun apardığı araşdırma nəticəsində qətlin izinə düşmək mümkün olub. Qətldə şübhəli bilinən şəxs 1975-ci il təvəllüdlü, Salyan rayon sakini Muradov İbrahim Paşa oğlu olub.
Dindirilmə zamanı saxlanılmış şəxs qətli törətdiyini etiraf edib və bildirib ki, Hüseynovanın ikinci əridir. Gənc yaşlarda olmasına baxmayaraq, Hüseynova 2 dəfə ərə getməyə və məhkəmə qaydasında boşanmağa macal tapıb. Qadın iki azyaşlı uşaq böyüdürmüş.
Məlum olub ki, Hüseynova əvvəllər Salyan rayonunda yaşayıb. Lakin "nümunəvi ər və ailə adamı" olan Muradovla boşandıqdan sonra, mebel dükanında satıcı işlədiyi Masallı rayonuna köçüb.
Muradovun sözlərinə görə, sabiq həyat yoldaşı kişilərlə görüşməyə başlayıb və o da bunu dəhşətli dərəcədə qısqanıb. Muradov Hüseynovanın işlədiyi mebel mağazasını güdüb və qurbanı işdən çıxan vaxt ona yaxınlaşıb və qadını qətlə yetirib.
Hazırda faktla bağlı Masallı rayon prokurorluğunda cinayət işi açılıb, istintaq gedir.
