Aptek

Siyahı ilə gəzməyən xəstələr üçün vicdansız apteklər: Tarif Şurasına da məhəl qoymurlar

91
(Yenilənib 18:50 26.12.2020)
Heç kəs qiyməti dövlət tərəfindən tənzimlənən dərmanların siyahısını çıxardıb öz üzərində gəzdirmir. Bundan əlavə, istehlakçıların çoxu hansı dərmanın qiymətinin dövlət, hansının sərbəst müəyyənləşdirildiyindən də xəbərsizdir

Zülfiyyə Quluyeva, Sputnik Azərbaycan

BAKI, 26 dekabr — Sputnik. Azərbaycanda həyati əhəmiyyətli dərmanların qiyməti dövlət tərəfindən tənzimlənsə də, son vaxtlar onların da qiyməti qanunsuz olaraq Tarif Şurasının müəyyənləşdirdiyi qiymətdən baha satılır. Bununla bağlı sosial şəbəkələrdə də çoxsaylı şikayət motivli rəylər yazılır. Antiinhisar və İstehlak Bazarına Nəzarət Dövlət Xidmətinin nümayəndəsi Günel Bəhramqızı şikayətlərlə bağlı bildirib ki, dərman vasitələrinin qiyməti onların ticarət adı, təsiredici maddənin adı və dozası, farmasevtik forması, qablaşdırılması, miqdarı, habelə istehsalçı şirkət və ölkələr üzrə müəyyən edilir: "Bununla yanaşı, dərman vasitələrinin üzərində onların təsdiq edilmiş qiymətləri göstərilir. Dərman vasitələrinin topdan və pərakəndə satışını həyata keçirən bütün təsərrüfat subyektləri bu tələblərə əməl etməlidirlər. Qanunvericiliyə əsasən, dövlət qeydiyyatından keçən dərman vasitələrinin təsdiq edilmiş qiymətdən fərqli qiymətə satışı qadağandır və bu hallara görə məsuliyyət tədbirləri nəzərdə tutulur".

© Sputnik / Zulfiyya Guluyeva
Aptek

O bildirib ki, istehlakçılar dövlət qeydiyyatından keçən dərman vasitələrinin təsdiq edilmiş qiymətləri barədə məlumatları Tarif (qiymət) Şurasının, İqtisadiyyat Nazirliyinin və Antiinhisar və İstehlak Bazarına Nəzarət Dövlət Xidmətinin rəsmi internet səhifəsində əldə edə bilərlər:

"Antiinhisar və İstehlak Bazarına Nəzarət Dövlət Xidməti istehlakçılara dərman vasitələri alan zaman qiymətlərin müəyyən edilmiş qiymətlərlə uyğunluğuna xüsusi diqqət yetirmələrinin vacibliyini bildirir. Qiymətlərin düzgün tətbiq olunmaması halları ilə rastlaşdıqda xidmətin "qaynar xətti"nə (498-15-01, 498-15-04) müraciət edə bilərlər".

Amma sözsüz ki, aptekə dərman almağa gedən istehlakçıların çoxu dərmanın qiymətini hansısa qurumun veb saytında axtarmır. Yaxud da heç kəs qiyməti dövlət tərəfindən tənzimlənən dərmanların siyahısını çıxardıb öz üzərində gəzdirmir. Bundan əlavə, istehlakçıların çoxu hansı dərmanın qiymətinin dövlət, hansının sərbəst müəyyənləşdirildiyindən də xəbərsizdir. Belə halda ümid qalır aptek sahiblərinin və apteklərdə qiyməti tənzimlənən dərmanların satışına nəzarət edənlərin insafına. Sputnik Azərbaycan qiyməti dövlət tərəfindən tənzimlənən dərmanların satış qiymətini araşdırıb.

© Sputnik / Zulfiyya Guluyeva
Aptek

Hüseyn Cavid prospektində yerləşən "Zeytun" aptekdən Sputnik Azərbaycan-a bildiriblər ki, hansı dərmanın qiyməti dövlət tərəfindən tənzimlənirsə, həmin dərman o qiymətə də satılır: "Biz dərmanı Tarif Şurasının müəyyən etdiyi qiymətdən baha satmırıq. Buna görə çox ciddi cərimələr var. Depolardan qaimə-fakturada hansı dərmanın qiyməti neçə göstərilibsə, o qiymətə də satırıq. Söhbət dövlətin qiymətini tənzimlədiyi dərmanlardan gedir. Biz ancaq depolardan o dərmanların satışına görə faiz alırıq".

Əczaçı bildirir ki, qiyməti dövlət tərəfindən tənzimlənən dərmanlar çox vaxt mərkəzdən kənarda yerləşən apteklərdə baha satılır. Amma Şərifzadə küçəsində yeləşən "Glukoza" aptekindən Sputnik Azərbaycan-a bildirilib ki, Sloveniyanın istehsalı olan "BRONXO-MUNAL" dərman preparatının qiyməti 14 manat 50 qəpikdir. Halbuki bu dərman preparatının dövlət qiyməti 13.16 təşkil edir. Apteklər qiymət artımını qəti təkzib etsələr də, istehlakçılar bunun əksini söyləyirlər.

İstehlakçı Telman Quliyev Sputnik Azərbaycan-a bildirib ki, yaşlı insan olduğundan dərmanların qiymətini internetdə axtara bilmir. İstehlakçı deyir ki, o, Almaniya istehsalı olan "Kardiomaqnil" dərman preparatını 3 manat 48 qəpiyə alır. Halbuki "KARDİOMAQNİL TAKEDA GMBH, Almaniya" dərman preparatının Tarif Şurası tərəfindən təsdiqlədiyi satış qiyməti 2 manat 90 qəpikdir. Alıcı bildirir ki, Avstriya istehsalı olan İSMN adlı dərman preparatını 4 manata alır. Amma "İSMN GENERİKON, GENERİKON FARMA GESELLSHAFT MBH, Avstriya" dərman preparatının Tarif Şurasının müəyyən etdiyi qiymət cədvəlində qiyməti 2.94 manat təşkil edir.

© Sputnik / Zulfiyya Guluyeva
Dərman

Dövlət tərəfindən qiymətləri tənzimlənən dərmanlarla bağlı problem təkcə qiymətin baha olmasında deyil.

Məsələn, Almaniya istehsalı olan "Konkor" adlı dərman preparatı apteklərin çoxunda tapılmır. Bu siyahını uzatmaq da olar.

İqtisadçı Samir Əliyev Sputnik Azərbaycan-a açıqlamasında bildirib ki, dərmanların qiymətinin dövlət tərəfindən tənzimlənməsi düzgün deyil. Ekspert bildirib ki, dərman bazarında monopoliya aradan qaldırılarsa, dərman preparatları satışında qiymətlər kəskin artmaz:

"Dövlət dərmanların qiymətini tənzimləyib. Amma apteklərdə qiyməti tənzimlənən dərmanların çoxunu tapmaq olmur. Dərman firmaları eyni tərkibdə, başqa adda dərman gətirirlər. Nəticədə istehlakçılar dərman problemi ilə üzləşirlər".

O ki qaldı dərmanların qiymət artımına nəzarət məsələsinə, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətindən Sputnik Azərbaycan-ın sorğusuna verilən cavabda bildirilir ki, qanunvericiliyə əsasən, dövlət qeydiyyatından keçən dərman vasitələrinin təsdiq edilmiş qiymətdən fərqli qiymətə satışı qadağandır və bu hallara görə məsuliyyət tədbirləri nəzərdə tutulur. Bu sahədə ictimai nəzarətin xüsusi əhəmiyyətini nəzərə alaraq, dövlət qeydiyyatından keçən dərman vasitələrinin təsdiq edilmiş qiymətləri barədə istehlakçıların maarifləndirilməsi istiqamətində müvafiq işlər görülür. Eyni zamanda daxil olmuş müraciətlərin araşdırılması və müvafiq monitorinqlər formasında qeyd olunan sahədə dövlət nəzarəti həyata keçirilir. Qiymətləri təsdiq edilmiş dərman vasitələri barədə məlumat mütəmadi olaraq istehlakçılara çatdırılır və həmin qiymətlər barədə istehlakçıların məlumatlandırılması üçün KİV-də informasiyalar yayımlanır. Eyni zamanda istehlakçılar dövlət qeydiyyatından keçən dərman vasitələrinin təsdiq edilmiş qiymətləri barədə məlumatları Tarif Şurasının, İqtisadiyyat Nazirliyinin və İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəsmi internet səhifəsində əldə edə bilərlər. Bununla yanaşı, dərman vasitələrinin üzərində onların təsdiq edilmiş qiymətləri göstərilir.

© Sputnik / Zulfiyya Guluyeva
Dərman

Məlumat üçün bildirək ki, qanunvericiliyə əsasən, hər bir dərman vasitəsinin ƏDV daxil olmaqla təsdiq edilmiş pərakəndə satış qiyməti qablaşdırmanın üzərində göstərilməlidir. Dərman vasitələri haqqında qanunvericiliyin pozulması inzibati məsuliyyət yaradır və bununla bağlı İnzibati Xətalar Məcəlləsində məsuliyyət tədbirləri nəzərdə tutulub. Belə ki, dövlət qeydiyyatından keçmiş dərman vasitələrinin tənzimlənən qiymətlərdən fərqli qiymətlərlə satışına görə vəzifəli şəxslər 1000 manatdan 1500 manatadək məbləğdə, hüquqi şəxslər 3000 manatdan 5000 manatadək məbləğdə cərimə edilirlər. Bu inzibati xətaların təkrar törədilməsinə görə isə vəzifəli şəxslər 2500 manatdan 3500 manatadək məbləğdə, hüquqi şəxslər 7000 manatdan 9000 manatadək məbləğdə cərimə edilirlər. Qiymət intizamına nəzarət İqtisadiyyat Nazirliyinin və İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin tərəfindən həyata keçirilir.

Qeyd edək ki, indiyədək Tarif (qiymət) Şurası tərəfindən 12 min 114 dərman vasitəsinin qiyməti təsdiq edilib. Digər dərmanların isə qiymətlərinin müəyyənləşdirilməsində apteklər sərbəstdir. Ümumiyyətlə, ölkəmizdə dərman preparatlarının qiymətində mütəmadi olaraq artım müşahidə olunur. Dünyanın bir sıra ölkələrində dərman preparatlarının qiyməti xəstələr üçün əlçatan olsa da, bizdə əks vəziyyət müşahidə olunur. Hətta bu səbəbdən dərmanı qonşu ölkələrdən - Türkiyə, Gürcüstan, Rusiyadan alıb gətirənlər də var.

© Sputnik / Zulfiyya Guluyeva
Dərman

Yeri gəlmişkən, xatırladaq ki, bu yaxınlarda ABŞ Prezidenti Donald Tramp dərman qiymətlərinin aşağı salınması barədə sərəncam imzalayıb. O, bu barədə "Twitter" səhifəsində məlumat verib: "Dərmanların qiymətinin azaldılmasına dair sərənmcam imzaladım. Qiymətləri aşağı salmaqla vasitəçilər üçün bütün güzəştlərə də son qoydum", - Tramp yazıb. Prezident qeyd edib ki, indi amerikalılar dərman preparatlarını farmasevtika şirkətlərinin onları xaricə satdıqları qiymətə ala biləcəklər.

91
Teqlər:
Tarif Şurası, qiymət, Bakı, aptek, dərman
Koronavirusa qarşı peyvənd, arxiv şəkli

Bizə niyə Çin vaksini vuracaqlar? İşçi qrupunun üzvü xüsusiyyətləri sadalayır

10
(Yenilənib 15:56 19.01.2021)
"Ölkəmizdə illər boyu mövcud olan infrastruktur imkan verir ki, bu vaksinləri ölkənin ən ucqar nöqtəsinə çatdırıb, tətbiq edək" - Günay Quluzadə

BAKI, 19 yanvar — Sputnik. Azərbaycanda tətbiq edilən peyvəndin saxlanma qaydaları açıqlanıb.

Sputnik Azərbaycan-ın məlumatına görə, Səhiyyə Nazirliyinin nəzdində fəaliyyət göstərən koronavirusla (COVID-19) mübarizə işçi qrupunun üzvü Günay Quluzadə bildirib ki, peyvəndlər temperatur və zərbə kimi ola biləcək kənar təsirlər hesablanaraq, paketlənir. Bu səbəbdən peyvənd ampulları istiliyə davamlı şüşələrdən seçilir.

"Peyvəndləri təhlükəsiz və soyuq şəraitdə saxlamaq lazımdır. Hər bir peyvəndin özünün saxlanma şərtləri var. Bəzi COVID-19 peyvəndləri -20, bəziləri -70 dərəcə saxlanma şərtləri tələb edir. Azərbaycanda tətbiq olunan "Sinovac" şirkətinin hazırladığı "CoronaVac" vaksinidir. Bu vaksinin saxlama temperaturu sadədir, 2-8 dərəcədə üç ilə qədər saxlamaq mümkündür. Vaksinin Türkiyədəki kliniki sınaq nəticələrinə əsasən, onun virusla mübarizədə 91,25 faiz effektiv olduğu müəyyən edilib. İnaktiv üsula görə hazırlanan bu peyvənddə yoluxucu xüsusiyyətini itirmiş virus bədənə verilir və bədənin xəstəlikdən immunitet qazanması hədəflənir. "CoronaVac" vaksini ənənəvi, etibarlı və sınanmış inaktiv platformada hazırlanır. Yüksək qoruyuculuq və uğurlu sınaq nəticələri var. Saxlanma şəraiti, çatdırılma və tətbiq şərtləri, "soyuq zəncir" sistemi tələbi əlverişlidir. Ölkəmizdə illər boyu mövcud olan infrastruktur imkan verir ki, bu vaksinləri ölkənin ən ucqar nöqtəsinə çatdırıb, tətbiq edək", - deyə Günay Quluzadə bildirib.

10
Teqlər:
Sinovac Biotech, vaksin, Koronavirus, epidemiya, COVID-19
Mövzu:
Azərbaycanda COVID-19 əleyhinə vaksinasiya
 Azərbaycanda koronavirus infeksiyasına qarşı vaksinasiya

Azərbaycanda universitetdə peyvəndləmə başladı

18
(Yenilənib 15:59 19.01.2021)
Vaksinasiya prosesində ilk növbədə risk qrupuna aid olan şəxslər, yəni yaşı 65-dən yuxarı olan həkimlər və universitet əməkdaşları iştirak edəcəklər

BAKI, 19 yanvar — Sputnik. Yanvarın 18-dən etibarən Azərbaycanda COVİD-19 infeksiyasına qarşı vaksinasiya prosesinə səhiyyə işçilərinin peyvəndlənməsi ilə start verilib. Artıq Azərbaycan Tibb Universitetinin (ATU) klinikalarında da vaksinasiya prosesinə başlanılıb. ATU-dan Sputnik Azərbaycan-a verilən məlumata görə, klinikalarda hər cür tələblərə cavab verən vaksinasiya məntəqələri fəaliyyət göstərir.

Əvvəlcə ATU-nun rektoru, professor Gəray Gəraybəyli və universitet rəhbərliyində təmsil olunan şəxslər peyvənd olunublar.

ATU-nun Tədris Cərrahiyyə Klinikasının direktoru, professor Surxay Hadıyev bildirib ki, vaksinasiya prosesində ilk növbədə risk qrupuna aid olan şəxslər, yəni yaşı 65-dən yuxarı olan həkimlər və universitet əməkdaşları iştirak edəcəklər. Sonra isə mərhələli şəkildə universitetin digər əməkdaşları da peyvənd olunacaqlar. S. Hadıyev vaksinasiyanın könüllü olduğunu diqqətə çatdırıb. Lakin qeyd edib ki, COVİD-19 pandemiyasına yoluxmamaq üçün peyvənd olunmaq çox vacibdir.

ATU-nun Tədris Stomotoloji Klinikasının direktoru, tibb üzrə fəlsəfə doktoru Mahir Səfərov qeyd edib ki, Səhiyyə Nazirliyi və Azərbaycan Tibb Universitetinin rəhbərliyinin göstərişinə əsasən, klinikada ayrıca vaksinasiya otağı ayrılıb:

"Orada 4 tibb bacısı fəaliyyət göstərir. Vaksinasiya üçün klinkamızda, demək olar ki, hər cür şərait yaradılıb. Tədris Cərrahiyyə Klinikasının reanimasiya blokundan bir tibb bacısı da bizə təhkim olunub".

ATU-nun Onkoloji Klinikasının müalicə işləri üzrə direktor müavini, dosent Nigar Mehdiyeva koronavirusa qarşı aparılan vaksinasiyanın əhalinin sağlamlığının qorunması üçün çox mühüm tədbirlər qrupuna aid olduğunu qeyd edib. Digər klinikalarda olduğu kimi Onkoloji Klinikada da sanitar və tibbi normalara uyğun olaraq vaksinasiya məntəqəsinin təşkil olunduğunu bildirib. Qeyd edək ki, adıçəkilən klinikalarda ATU-nun əməkdaşları vaksinasiya olunacaqlar.

18

"Lotu Quli"nin məzarı üstündə atışma olub, 1 nəfər ölüb

0
Silahlı insident nəticəsində bir azərbaycanlı başından güllələnib. O, aldığı güllə yarasından hadisə yerində ölüb.

BAKI, 19 yanvar - Sputnik. İstanbulun Esenyurt rayonunda "Lotu Quli" ləqəbli kriminal avtoritet Nadir Səlifovun məzarı üstündə silahlı insident olub.

APA-nın verdiyi xəbərə görə, silahlı insident nəticəsində bir azərbaycanlı başından güllələnib. Güllələnən şəxsin Əli Həşimov olduğu bildirilir. O, aldığı güllə yarasından hadisə yerində ölüb.

Onu vuran digər azərbaycanlı Kənan adlı şəxs isə xəstəxanaya çatdırılıb.

Məlumata görə, hadisə borc üstündə baş verib.

Hadisədə şübhəli bilinən 3 nəfər saxlanılıb.

0