Depresiya

Payız depressiyasını dəf etmək üçün ideal rejim

17
(Yenilənib 00:25 07.09.2020)
Axşam təmrinləri orqanizmdəki bütün izafi adrenalinin sərf olunmasına şərait yaradaraq rahat yuxunu təmin edir

BAKI, 6 sentyabr — Sputnik. Britaniyanın Daily Mirror tabloidi müxtəlif sahələrdən olan mütəxəssislərin fikrini öyrənərək payız depressiyasından yaxa qurtarmaq istəyənlər üçün ideal rejim düzənləyib.

Gümrah olmaq üçün mütəxəssislər bioloji saatlara riayət etməyi məsləhət bilirlər. Qeyd olunur ki, bu, gün ərzində enerjini maksimum həddə çatdıraraq rahat gecə yuxusunu təmin edir. Yəni günün eyni vaxtında, yaxşı olar ki, təxminən səhər 7 radələrində oyanmağınız məsləhətdir. Əgər gecə gec yatmısınızsa, yenə də eyni saatda oyanmaq vacibdir. 

Oyanan kimi səhər metabolizmini işə salmaq lazımdır – bunun üçün yüngül  isinmə hərəkətləri, gimnastika və ya gəzinti kifayət edər. “Günortaya qədər gəzintiyə çıxmaq sağlam yuxu üçün çox vacibdir”, - məşqçi Aaron Braun tabloidə bildirib. Onun sözlərinə görə, burada əsas amil işığın orqanizmə təsir gücüdür.  Növbə ilə işləyib, qaranlıqda oyananlara isə laytboks (işığı bərabər qaydada yayan geniş səthli işıqlandırıcı – red.) alaraq hər səhər onu 30-90 dəqiqə ərzində qoşmaq tövsiyə olunur.

Saat 8-də səhər yeməyi yemək olar. Bu zaman yaxşı olar ki, enerjinin tədricən tükədilməsinə yardım edən ərzaqlardan istifadə olunsun. Biohaker Tim Qrey deyir ki, səhər yeməyində şirniyyat, yaxud şirin lopa yemək yaxşı deyil. Buna alternativ olaraq kəpəkli undan bişmiş tostun üzərinə şəkərsiz araxis yağı çəkərək üzərinə banan dilimləri düzüb yemək olar.

Saat 9 üçün orqanizm çətin vəzifələri yerinə yetirməyə hazırdır. Bu zamanı yeni bacarıqların öyrənilməsinə sərf etmək olar. Proses zamanı içilən qəhvə təkcə diqqəti artırmır, o həm də antioksidantla zəngindir. Qəhvəni 12-dək içmək daha məsləhətdir, çünki kofeinin orta səviyyədə parçalanması təxminən 5 saat vaxt alır. Günortadan sonra içilən qəhvə yuxunun dərinliyinə təsir etməyə qadirdir.

Nahar doyurucu və balanslaşdırılmış olmalı, orqanizmi bütün gün üçün enerji ilə təmin etməlidir. Qrey məsləhət görür ki, arada, hətta gün batanadək qəlyanalı etmək pis olmaz. 14:00-da mütəxəssislər bir qədər mürgüləməyi tövsiyə edirlər.

“10-30 dəqiqəlik yuxu diqqəti artırır, qan təzyiqini isə azaldır”, - Co Uebber deyib.

Orqanizmin fiziki pik həddi 18:00-a təsadüf edir. Ona görə həmin vaxt idmanla məşğul olmaq üçün ən əlverişli sayılır. Axşam təmrinləri orqanizmdəki bütün izafi adrenalinin sərf olunmasına şərait yaradaraq rahat yuxunu təmin edir.

Şam yeməyini gün batanadək yemək daha yaxşıdır, belə halda orqanizm daha çox insulin ifraz edir. Yuxudan 1 saat öncə mütəxəssislər mavi işıq verən bütün işıq mənbələrini söndürməyi məsləhət bilirlər. Mavi işıq melatoninin yaranmasını əngəlləyir. Gecə yuxusu 7-9 saat sürməlidir.

Payız-qış depressiyasından ən çox əziyyət çəkənlərə gəldikdə isə buraya adətən, hündür, çox arıq, bir qədər  bədbin, eləcə də kök və nevrozlara meylli adamları aid edirlər. Orta məktəb şagirdləri və yeniyetmələr də risk altındadırlar.

17
Əlaqədar
Pandemiyanın son məqsədi barədə deyilənlər reallaşmağa başlayır - Bu da ilk qaranquş
"Bilmədiyimiz bir şeydən qorxmağın mənası yoxdur" - Psixiatr
Mövsümə deyil, təzyiqə baxmaq lazımdır: ürək-damar xəstəlikləri haqda mifi yox etdilər
Mif dağıdıldı, yeyin-için, kef edin...
Rəngli və qara röyalar - Niyə yuxu görürük?
Vitaminlər, arxiv şəkli

B2 vitamini hansı problemlərə səbəb olur?

16
Həzm sistemi də B2 vitamini çatışmazlığından da əziyyət çəkə bilər. Bu zaman maddələr mübadiləsi pozulur.

BAKI, 29 noyabr — Sputnik. Perdana Universitetinin mütəxəssisləri B2 vitamini çatışmazlığını təhlükəsi barədə danışıb.

Sputnik Azərbaycan xarici mətbuata istinadla xəbər verir ki, alimlər, vitamin B2 və ya riboflavinin antioksidan xüsusiyyətlərə sahib olduğunu, sərbəst radikalları təsirsiz hala gətirə bilmə qabiliyyətinə malik olduğunu və bəzi xəstəliklərin yaratdığı oksidləşmə zərərini azalda bildiyini qeyd edib. 

Yüksək səviyyədə sərbəst radikallar hüceyrələrə və toxumalara zərər verə bilər. Bu isə sonradan xərçəng, ürək-damar xəstəlikləri, diabet və Alzheimer xəstəliyi riskini artırır.

Eyni zamanda riboflavinin çatışmazlığı artan oksidləşdirici stres ilə əlaqədardır. Bu da hematopoetik sistemin funksiyaların pisləşməsinə, anemiya və eritroid hipoplaziyasına səbəb ola bilər.

Həzm sistemi də B2 vitamini çatışmazlığından da əziyyət çəkə bilər. Bu zaman maddələr mübadiləsi pozulur.

Bununla yanaşı mütəxəssislər bu maddənin orqanizm üçün lazımlı miqdarda olmamasının miqrenə, saç tökülməsinə, katarakta səbəb olduğunu qeyd edib.

16
Poz verən qadınlar, arxiv şəkli

Əvvəldən idi hüsnü-camalı... ya ucuz iynə ilə burun itirənlər

64
(Yenilənib 21:53 29.11.2020)
"Qan burun damarında dövr edə bilmədiyindən, qarşısı tıxandığından həmin yerdə tədricən göyərmə, nekrozlaşma, el arasında dediyimiz çürümə baş verir".

Zülfiyyə Quluyeva, Sputnik Azərbaycan

BAKI, 29 noyabr — Sputnik. Son vaxtlar sosial şəbəkələrdə burunun formasının əməliyyatsız dəyişdirilməsi ilə bağlı kosmetoloji xidmətlər təklif olunur. Burun korreksiyası adlanan bu xidmətə tələbat, demək olar ki, xeyli yüksəkdir. Rinoplastika əməliyyatı etdirməyə maddi imkanları olmayan və buna risk etməyən şəxslər kosmetoloqlara üz tutaraq burunlarını korreksiya etdirirlər. Bu kosmetoloji xidmətə günü-gündən artan maraq fəsadları ilə bağlı şikayətləri də artırıb. Sosial şəbəkələrdə burun korreksiyasından sonra burun nayihəsi nekrozlasan qadınların çoxsaylı şəkilləri yayılır. Onlar kosmetoloqlar tərəfindən burun korreksiyası etdirdikdən sonra burunlarının çürüdüyündən şikayətlənirlər. Sputnik Azərbaycan mövzunun aktuallığını nəzərə alaraq bu sahədə tanınmış kosmetoloq, Ay VİP Studionun direktoru Aytac Əsədova ilə söhbətləşib.

- Aytac xanım, son vaxtlar burun korreksiyası bir növ dəbə düşüb. Bu kosmetoloji xidmətdən yararlananlar arasında burnunun çürüməsindən şikayətlənənlər də az deyil. Bu kosmetoloji xidmət və onun fəsadları haqqında oxucularımıza məlumat verərdiniz...

- Bu aktual mövzuya toxunduğunuz üçün təşəkkür edirəm. Öncə qeyd edim ki, burun korreksiyası adlandırdığımız kosmetoloji xidmətə tələbat, doğrudan da çoxdur. Gün ərzində biz bəzən 20 belə şəxs qəbul edirik. Onlar arasında təkcə burnunun görünüşündə dəyişiklik etmək istəyənlər yox, rinoplastik əməliyyata müraciət edənlər də var. Bəzən rinoplastik əməliyyat etdirəndən sonra burnun ucunda sallanma olur. Ona görə də, xüsusilə xanımlar kosmetoloqlara müraciət edib burunlarında yaranmış bu qüsurları aradan qaldırmaq üçün burun korreksiyası etdirirlər. Amma qeyd etdiyiniz kimi, bu heç də hər kəsdə uğurlu alınmır. Hətta deyərdim ki, bəzən çox böyük fəsadlara, burnun nekrozlaşmasına gətirib çıxardır.

- Burun korreksiyası zamanı nekrozlaşmaya səbəb olan amil nədir?

- Qeyd etdiyim kimi, burnun formasında dəyişiklik üçün müxtəlif nayihələrə gel vurulur. Bəzən insanlar buna adi kosmetoloji xidmət kimi yanaşırlar. Amma əslində bu çox böyük peşəkarlıq tələb edən kosmetik xidmətdir. Mən öz tələbələrimə də deyirəm ki, burun korreksiyası və işıq dolğusu sizin ən sonda edəcəyiniz iş olmalıdır. Çox təəssüf ki, üz anatomiyasından xəbərdar olmayan, iynə vurmağı bacarmayan şəxslər bu gün kosmetoloq həkim kimi fəaliyyət göstərirlər. Əzələyə iynə vurmağı bacarmayan insanın çox sayda damarın keçdiyi burun nayihəsinə iynə vurması çox təhlükəlidir. Onlar iynəni buruna vurarkən müəyyən tibbi prosedurlara əməl etməlidirlər. İynə buruna yeridildikdən sonra geri çəkilməlidir. Biz şprisin burunda damara düşmədiyinə əmin olmalıyıq. Naşı kosmetoloqlar bunu bilmirlər. Onlar şprisin içindəki geli buruna yeridirlər. Bu zaman həmin gel damara daxil olur. Beləcə damarda qanın dövr etməsinin qarşısını alır. Qan həmin nayihədə damarda dövr edə bilmədiyindən, qarşısı tıxandığından həmin yerdə tədricən göyərmə, nekrozlaşma, el arasında dediyimiz çürümə baş verir.

- Dediklərinizdən belə bəlli olur ki, bu əslində çox riskli bir kosmetik xidmətdir. Bəs bunun müalicəsi mümkündürmü?

- Əlbəttə ki, mümkündür. Amma vaxtında müraciət etmədikdə çox böyük fəsadlar verə bilər. Biz öncə müalicə edərək burun damarına vurulmuş o geli əridib damardan kənarlaşdırmalıyıq. Əks halda çürümənin qarşısını almaq çətin olar.

- Bu xidmətdən yararlanan qadınlara bir peşəkar kimi nə tövsiyə edərdiniz?

- İlk tövsiyəm odur ki, burun korreksiyası ilə bağlı müraciət etdikdə kosmetoloqun peşəkarlığına əmin olsunlar. Bu gün müxtəlif kosmetoloqlar öz Instagram səhifələrində qüsursuz burunları fotoşopla düzəldərək öz əl işləri kimi səhifələrdə yayırlar. Bu şəkilləri görən qadınlar hesab edirlər ki, bu qüsursuz burun onların əl işləridir. Beləcə, aldanaraq burun korreksiyası etdirirlər. Bu zaman fəsadlar ortaya çıxır.

- Burun korreksiyası üçün kosmetoloq hansı biliklərə malik olmaldır?

- İlk növbədə kosmetoloqun mütləq şəkildə tibbi təhsili olmalıdır. Dünən dırnaq qaynaq edənlər, lazer edənlər burun korreksiyası xidməti təklif edirlər. Əlbəttə ki, bu yolverilməzdir. Kosmetoloq hansısa sertifikatı alıbsa, bu onun peşəkarlığına dəlalət etmir. Kosmetoloq həkim kimi fəaliyyət göstərənlərin mütləq şəkildə tibbi biliyi olmalıdır. Bu bilikləri olmasa, onlar, əlbəttə ki, iynəni üzün hansı nahiyəsindən vurmağın fəsadlara səbəb olacağını bilməyəcəklər. Çox təəssüf ki, bu gün adi evdar qadınlar da işsizlik problemlərini həll etmək üçün kosmetoloq kimi fəaliyyət göstərirlər. Bu da qeyd etdiyiniz fəsadların yaranmasına gətirib çıxarır.

- Müasir dövrümüzdə xanımlara göstərilən kosmetik xidmətlərin çeşidi günü-gündən artır. Gözəlləşmək üçün bu yenilikləri sınaqdan keçirənlər arasında arzusuna çatanlar da olur, əks effekt görənlər də. Bu gün ən çox fəsadlar hansı kosmetik xidmətlər zamanı baş verir?

- Dolğulardan istifadəyə günümüzdə tələbat yüksəkdir. Amma çalışmalıyıq ki, istifadə edilən kosmetik məhsullar keyfiyyətli olsun. Biz Səhiyyə Nazirliyinin yoxlamasından keçən kosmetik vasitələrdən yararlanırıq. Bəzən bizim mərkəzin qapısını döyüb aşağı qiymətə müxtəlif kosmetoloji məhsullar təklif edənlər olur. Amma biz onları qəbul etmirik. Bu məsələ həm də kosmetoloqun insafına bağlı məsələdir. Çox arzu edərdim ki, bu məsələyə aidiyyatı qurumlar tərəfindən nəzarət artırılsın. Tibbi təhsili olmayanların kosmetoloq kimi fəaliyyətinə icazə verilməməlidir. Bu zaman biz kosmetik xidmətlərlə bağlı fəsadlara, şikayətlərə də az rast gələrik.

64
Teqlər:
dəb, rinoplastika, çürümə, gözəllik salonu, Bakı, kosmetoloq, iynə, gel, burun
Dieqo Armando Maradona

Maradonanın həkimi ittihamlara cavab verdi

0
(Yenilənib 23:55 29.11.2020)
Bu gün məlumat yayılıb ki, Lukenin evində və klinikasında axtarış aparılıb. Bundan başqa həkimi Maradonaya kömək göstərməməkdə və bilməyərəkdən onun ölümünə səbəb olmaqda ittiham edirlər

BAKI, 29 noyabr - Sputnik. Argentina millisinin sabiq oyunçusu Dieqo Armando Maradonanın həkimi Leopold Luke futbolçunun ölümü barədə ittihamlara reaksiya verib.

Sputnik Azərbaycan xarici mətbuata istinadən bildirir ki, həkim baş verənlərdə heç kimi, o cümlədən də özünü günahkar bilmir. O həmçinin istintaqla əməkdaşlıq etməyə hazır olduğunu da deyib. Luke vurğulayıb ki, Maradonanın evindəki tibbi heyət futbolçunun alkoqol asılılığından müalicəsi ilə məşğul idi və ürəktutmasının qarşısını ala bilmədi.

Bu gün məlumat yayılıb ki, Lukenin evində və klinikasında axtarış aparılıb. Bundan başqa həkimi Maradonaya kömək göstərməməkdə və bilməyərəkdən onun ölümünə səbəb olmaqda ittiham edirlər.

​Maradona noyabrın 25-də 60 yaşında dünyasını dəyişib. Ölümə səbəb üərk çatışmazlığı səbəbindən ağciyərdə kəskin şişkinlik yaranması olub.

Dieqo Maradona "Barselona", "Napoli", "Nyuells Old Boyz"  klublarında oynayıb. Argentina millisi ilə 1986-cı ildə dünya çempionu olub. Futbol tarixində ən parlaq oyunçulardan hesab olunur.

0
Teqlər:
axtarış, ittiham, həkim, ölüm, Dieqo Armando Maradona