Dərman, arxiv şəkli

Sosial şəbəkələrdə dərman reklamı - Gözümüzü deşən təhlükə

2008
Musa Quliyev: "Ona görə də, düşünürəm ki, həkim resepti əsasında yazılan dərmanların reklamı sosial şəbəkələrdə də tənzimlənməlidir"

Zülfiyyə Quluyeva, Sputnik Azərbaycan

BAKI, 9 oktyabr — Sputnik. Azərbaycanda həkim resepti ilə yazılan dərman preparatlarının reklamı qadağan olunsa da, sosial şəbəkələrdə buna məhəl qoyan yoxdur. Bu gün Azərbaycanda "Facebook" və "Instagram" kimi populyar olan sosial şəbəkələrdə dərmanların açıq-aşkar reklamı aparılır.

Ən təhlükəlisi isə bu dərman preparatları arasında uşaqlar üçün boy artıran dərmanların reklam edilməsidir.

Qeyd edək ki, reseptlə yazılan dərman preparatlarının həkim məsləhəti olmadan istifadə edilməsi çox ciddi fəsadlara yol açır. Hətta bu cür dərmanların kortəbii istifadəsi ölümə belə yol açır. Amma sosial şəbəkələrdə dərman preparatlarının reklamının şərh bölümündə valideynlərin aktivlik nümayiş etdirməsi, bu dərmanlardan kortəbii istifadə hallarının olduğunu təsdiqləyir. Hətta bəzi valideynlər uşaqlarda boy artımına kömək edən dərman preparatlarının hansı yaş həddində, hansı dozada verilməsi barədə məsləhətləşmələr də aparırlar.

Milli Məclisin Səhiyyə Komitəsinin sədr müavini Musa Quliyev bunun çox ciddi problem olduğunu söyləyir. O bildirib ki, dərman vasitələrinin reklamı ilə bağlı məsələ "Reklam haqqında" qanunda qeyd edilib. Amma həmin qanunda sosial şəbəkələr öz əksini tapmayıb: "İndi dövr elə gətirib ki, insanlar sosial şəbəkədən geniş istifadə edirlər. Ona görə də, düşünürəm ki, həkim resepti əsasında yazılan dərmanların reklamı sosial şəbəkələrdə də tənzimlənməlidir".

M.Quliyev bildirir ki, hazırda "Reklam haqqında" qanunda həkim resepti əsasında yazılan dərman preparatlarının reklamı qadağandır: "Həmçinin qanunvericilik qida əlavələrinin də dərman kimi reklam edilməsini qadağan edir. Ona görə də, əgər sosial şəbəkələrdə dərman preparatları geninə-boluna reklam edilirsə, deməli burada da dərman preparatlarının reklamının tənzimlənməsinin vaxtı çatıb. Buna mütləq mənada qadağa olmalıdır".

Deputat bildirir ki, vəziyyət təhlükə yaradacaq həddə çatmamış bir tədbir görmək lazımdır.

Səhiyyə Nazirliyinin baş pediatrı, K.Fərəcova adına Elmi-Tədqiqat Pediatriya İnstitutunun direktoru Nəsib Quliyev də sosial şəbəkələrdə dərman preparatlarının reklamınının yolverilməz olduğunu söyləyir. Həmsöhbətimiz deyir ki, dərmanların kütləvi informasiya vasitələrində (KİV) reklamı qadağandır: "Bəzi hallarda ilkin tibbi yardımla bağlı hansısa hərarət salıcı dərman barədə təbliğat və maarifləndirmə tədbiri aparıla bilər. Amma spesifik dərman preparatlarının sosial şəbəkələrdə nəzarətsiz reklamı xoşagəlməz haldır. Hər kəs bilməlidir ki, dərmanın xeyiri olduğu kimi, zərəri də var. Güclü təsirə malik dərman preparatlarının reklamı qəti yolverilməzdir. Bu gün boy uzatmaq üçün dərman vasitələrinin də həkim təyinatı olmadan istifadəsi daha təhlükəlidir. Valideyn nəzərə almalıdır ki, uşaqda boy genetik amillə bağlı olur. Boy artımı ilə bağlı dərmanlar bəzən elə nəticələr verir ki, insanlar həyatı boyu ondan xilas ola bilmirlər. Bu preparatları tibbi göstəriş olmadan yersiz istifadə etdikdə insan bədənində proporsionallıq pozulur. Tutaq ki, bədənin bir əzası qalır yerində, digəri, məsələn qulağı böyüyür. Yaxud da başın, əlin böyüməsi kimi hallar müşahidə olunur. Hər kəs bilməlidir ki, bu cür məsuliyyətsiz reklamlardan uzaq durmalıdır. Bu işləri biz qəti şəkildə pisləyirik. Dövlətin qanunları ilə dərmanların sosial şəbəkələrdə də tənzimlənməsi gecikməməlidir. Dərman yerində tətbiq olunanda xeyri var, amma yerində tətbiq olunmadıqda zəhərdir".

Azərbaycan Tibb Universitetinin II Uşaq xəstəlikləri kafedrasının assistenti, tibb elmləri namizədi, pediatr-endokrinoloq Gündüz Əhmədov da tərkibində samatatropin hormonu olan dərman preparatlarının kortəbii istifadəsinin boy artımı üçün yolverilməz olduğunu deyir. Həmsöhbətimiz deyir ki, bəzən müxtəlif qida əlavələrini boy artımı dərmanı adı altında reklam edirlər. Amma valideynlər bilməlidirlər ki, həb şəklində yaxud da şərbət halında heç bir dərmanda hormon yoxdur. Bu ancaq inyeksiya yolu ilə təyin edilən dərman preparatlarındadır. Ona görə də, valideynlərin bu cür reklamlara inanıb övladına qida əlavəsi və yaxud hansısa dərmanı verməsi düzgün deyil: "Bu valideynin seçimidir. Amma biz həkim olaraq bunu məsləhət görmürük. Uşaqda boyun inkişafdan qalmasının səbəbi araşdırılmalıdır. Mütləq həkim tərəfindən müayinə olunduqdan sonra hansısa dərman preparatı təyin edilə bilər. Valideynlər nəzərə alsınlar ki, boy artımına xəstə ilə söhbət, ailədə pozitiv əhval-ruhiyə də təsir edir".

2008
Koronavirus testi, arxiv şəkli

Ön cəbhəyə yollanan hərbçilər COVID-19 testindən keçirilir?

40
(Yenilənib 00:19 23.10.2020)
Səfərbərlik Xidmətinə yola salınan hər bir əsgər COVID-19 testindən keçirilir. Cavablar mənfi olduqdan sonra onlara ordu sıralarına qatılmağa icazə verilir".

BAKI, 22 oktyabr — Sputnik. "Bu gün Səfərbərlik Xidmətinə yola salınan hər bir əsgər COVID-19 testindən keçirilir. Cavablar mənfi olduqdan sonra onlara ordu sıralarına qatılmağa icazə verilir".

Sputnik Azərbaycan-ın məlumatına görə, bunu AzTV-nin efirində yayımlanan "Gün başladı" verilişində qonaq olarkən Səhiyyə Nazirliyinin mətbuat xidmətinin rəhbəri Pərviz Abubəkirov deyib. O bildirib ki, cəbhəyə yollanan şəxslər arasında COVID-19-un yayılmasının qarşısının alınması istiqamətində qabaqlayıcı tədbirlər görülüb:

"Çağırışçılar, ön cəbhəyə gedən hər bir kəs sağlam olmalıdır. Çünki bu, çox ciddi məsələdir. Odur ki, bu istiqamətdə Nazirlik tərəfindən yoxlamalar gücləndirilib".

P.Abubəkirov onu da qeyd edib ki, hər ana öz övladını yola salarkən bağrına basmaq, qucaqlamaq istəyir, lakin mümkün qədər bu normalara riayət etmək lazımdır.

40
E-Təbib tətbiqi

TƏBİB-dən xəstələrə antibiotiklərlə bağlı xəbərdarlıq

36
(Yenilənib 22:59 22.10.2020)
"Xəstəliyin ilk simptomları üzə çıxan zaman bəzi insanlar özbaşına antibiotiklərdən istifadə edirlər" - TƏBİB.

BAKI, 22 oktyabr — Sputnik. Bəzən koronavirusa yoluxan gənc insanlarda da ağırlaşmalar ola bilər.

Sputnik Azərbaycan-ın məlumatına görə, bunu Səhiyyə Nazirliyinin İctimai səhiyyə və sanitariya və epidemioloji nəzarət şöbəsinin müdiri Nəzifə Mürsəlova deyib. Onun sözlərinə görə, sağlamlıq vəziyyəti normal olan 82 yaşlı insanların da koronavirusdan sağalması mümkün olub:

"Amma hər hansı gəncin xroniki xəstəliyi varsa və başqa ağırlaşmalar qeydə alınarsa, onun səhhətində daha ciddi ağırlaşmalar baş verə bilər".

N.Mürsəlova qeyd edib ki, gənc insanlar arasında ağırlaşmalar müraciətin gec edilməsi səbəbindən baş verir.

İnsanları özünümüalicədən də uzaqlaşmağı məsləhət görən N.Mürsəlova deyib ki, xəstəliyin ilk simptomları üzə çıxan zaman bəzi insanlar özbaşına antibiotiklərdən istifadə edirlər: "Bu zaman isə xəstənin vəziyyətində yaxşılaşma deyil, əksinə pisləşmə baş verir. Bu halda da xəstəxanaya düşən xəstəyə reanimasion yardım lazım olur".

36

Paytaxt yenə dizenfeksiya olunacaq

0
Maddələrin qəbul olunmuş müəyyən toksikliyini nəzərə alaraq sakinlərdən ciddi zərurət yaranmadığı təqdirdə qeyd olunan tarixlərdə küçəyə çıxmamaq xahiş olunur

BAKI, 23 oktyabr — Sputnik. Son günlərdə COVID-19-a yoluxanlarının sayının artması nəzərə alınaraq oktyabr ayının 24 və 25-də kommunal xidmətlərin xüsusi texnikası və əməkdaşları tərəfindən Bakı şəhəri üzrə əsas küçə, prospekt və yollarda xüsusi kimyəvi maddələrlə növbəti dəfə əlavə gücləndirilmiş dezinfeksiya işləri aparılacaq.

Bu barədə Sputnik Azərbaycan-a Bakı Şəhər İcra Hakimiyyətindən məlumat verilib.

Bildirilib ki, bununla əlaqədar maddələrin qəbul olunmuş müəyyən toksikliyini nəzərə alaraq sakinlərdən ciddi zərurət yaranmadığı təqdirdə qeyd olunan tarixlərdə küçəyə çıxmamaq xahiş olunur.

0
Teqlər:
Bakı, dezinfeksiya, Koronavirus, epidemiya, COVID-19
Mövzu:
Azərbaycanda koronavirus: son xəbərlər