Körpə, arxiv şəkli

Ana da kiminsə balasıdır ya Kor-koranə nəvə istəyi gənc qadınları necə məhv edir

581
(Yenilənib 15:04 05.09.2019)
Azərbaycanda belə hadisələr də baş verir: Ürək xəstəliyi olan qadın 9 aylıq hamiləliyi boyunca bir dəfə də olsa həkimə getməyib və doğuşdan sonra keçinib

Nigar İsgəndərova, Sputnik Azərbaycan

BAKI, 5 sentyabr — Sputnik. Bakıda 26 yaşlı ana övladını dünyaya gətirdikdən bir neçə saat sonra dünyasını dəyişib. Sputnik Azərbaycan-ın xəbərinə görə, hadisə iki gün öncə, Bakı şəhəri Nizami rayonu ərazisində yerləşən 7 saylı Doğum Evində baş verib. Belə ki, Qusar rayonu, Yuxarı Kalunxur kəndində qeydiyyatda olmaqla Bakı şəhəri, Xətai rayonu, Zığ yolu 26, mənzil 85-də yaşayan Muradova Aygün Adil qızı 02.09.2019-cu ildə, saat 12:55-də 37 həftəlik hamiləlik, baş gəlişi, I dövr diaqnozu ilə Bakı şəhəri Nizami rayonu ərazisində yerləşən 7 saylı Doğum Evinə müraciət edib. Məlumata görə, həmin gün, saat 15:15-də qız övladını dünyaya gətirən ana 03.09.2019-cu ildə, gecə 3 radələrində vəfat edib. Xəstənin ürək çatışmazlığı diaqnozundan dünyasını dəyişdiyi bildirilir.

Meyit daxili müayinə edilməsi üçün morqa göndərilib, ona baxış keçirilərək məhkəmə-tibbi ekspertiza təyin edilib. Fakta görə Bakı şəhəri Nizami rayon Prokrorluğunda Azərbaycan Respublikası Cinayət Məcəlləsinin 314.2 maddəsi ilə cinayət işi başlanılıb.

Dünyasını dəyişən şəxslə bağlı sosial şəbəkələrdə, qrupların birində paylaşılan məlumatda da qadının ürək çatışmazlığından dünyasını dəyişdiyi bildirilib. Belə ki, ailənin yaxını olan şəxs qadının ölümündə onun ailəsinin təqsirli olduğunu bildirib: "Heç kim gəlini xəstəxanaya aparmırdı. Qadın özü həmişə deyirdi ki, ürəyim ağrıyır. Ona görə də qadının halı qəfildən pisləşib və uşaq yarımçıq doğulub. Özü isə səhərə yaxın saatlarda keçinib. Bu hadisədə qadının qaynanası və həyat yoldaşı günahkardır. Körpəsi yetim qaldı. Nəşini isə səhər doğulduğu rayona apardılar".

Doğulan körpənin durumunun isə yaxşı olmadığı, onun küvezdə saxlanıldığı bildirilib. Adıçəkilən xəsətəxana ilə əlaqə saxlayaraq körpənin vəziyyəti haqda məlumat almaq istəsək də, bizə bu haqda informasiya verməkdən imtina etdilər.

Bu və buna bənzər arzuolunmaz halların baş verməməsi üçün ana olmağa hazırlaşan qadınlar səhhətlərinə və doğulacaq körpələrinin həyatlarına görə çox diqqətli və məsuliyyətli olmalıdırlar. Elə həmsöhbətimiz, respublikanın baş ginekoloqu Sevinc Məmmədova da Sputnik Azərbaycan-a açıqlamasında bunu təsdiqlədi. O, dünyasını dəyişən qadına aid bir sıra məlumatlarla tanış olduğunu da bildirdi: "Qadının valideynləri, ailəsi, həyat yoldaşı dünyasını dəyişən şəxsdə göyərmələr, təngnəfəsliyin olduğunu deyirdilər. Bununla belə etiraf edirdilər ki, bir dəfə də olsa bu qadını həkimə aparmayıblar. Artıq həmin qadınla bağlı bütün rəsmi məlumatlar Səhiyyə Nazirliyinə təqdim olunub. Sənədlər təqdim olunduqdan sonra ana ölümünün səbəbi təhlil olunacaq və yol verilən səhvlər varsa, onlar aşakarlanacaq və buna müvafiq olaraq da cəzalar veriləcək.

 Cəzadan danışmışkən, bir məsələyə də diqqət çəkmək istəyirəm. Çox təəssüf ki, belə olan hallarda, yəni xəstəsi olan və onun durumundan xəbərdar ailənin üzvləri - qaynata, qaynana, yaxud da həyat yoldaşı vaxtında bu barədə məlumat vermədiyi üçün, onu həkimə aparmadığı üçün heç bir cəza almırlar. Xəstənin durumunu gizlədən, onu həkimə aparmayan ailəni də məsuliyyətə cəlb etsəydilər, bəlkə də, bu cür məsələlər müsbət istiqamətdə həllini tapardı".

Ümumi vəziyyətdən, alınan fikirlərdən ilkin olaraq belə qənaətə gəlmək olar ki, xəstənin dünyasını dəyişməsində ilk olaraq ailəsi günahkardır. Çünki onlar bu xəstəlikdən xəbərdar olsalar da, qadının səhhətində müəyyən problemlər müşahidə etsələr də, onu həkimə aparmayıblar. Bəs həkimin? Onun necə, bu məsələdə müəyyən təqsiri varmı?

S.Məmmədova bununla bağlı isə belə izahat verib: "Ümumiyyətlə, doğumun özü 12-16 saat davam edən bir prosesdir. Çox vaxtı sancı dövrü 12 saatdan artıq davam edirsə, güc vermə prosesi yarım saatadək davam edir. Çox zaman təkrar doğum edən qadınlar bunu bilir və güc vermə zamanı xəstəxanaya müraciət edirlər. Bu zaman isə həkim yalnız uşaq qəbul edə bilir və onun əlavə vaxtı olmur ki, xəstənin ürəyinin kardioqramını çıxarsın. Bu səbəbdən də gərək ki, doğum sancısı başlanıldıqda xəstə lazımi vaxtda stasionara çatdırılsın ki, müayinə də edilsin. Çünki xəstənin müayinəsi də azı 2-3 saat zaman alır. Digər nüans isə ürəyin hamiləliyin ilk günlərində yoxlanılmasının vacibliyi ilə bağlıdır. Bu haqda bizim milli protokolumuzda da yazılıb".

"Müəyyən ürək qüsurları var ki, biz bu zaman qadına hamilə qalmağı qadağan edirik. Xaricdə belədir ki, bir qadına övlad dünyaya gətirərsə, ölə biləcəyini dedikdə o buna etiraz etmir və körpələr evindən övladlığa uşaq götürür. Amma Azərbaycanda hansısa valideynə dedikdə ki, qızında ürək qüsuru var, hamilə qalsa, dünyasını dəyişəcək, ana olmağa hazırlaşan şəxsin valideyni bizi eşitmir. Nəticə isə bu cür olur", - deyə o əlavə edib.

S.Məmmədova ana olmağa hazırlaşan qadınları maarifləndirərək bildirir ki, çox vaxt insanlar xəstəlikləri ayaq üstdə, səthi keçirirlər: "Lakin vaxtında həkimə getdikdə, müayinə olunduqda xəstə öz səhhəti ilə bağlı məlumat almış olur. 18-20 il bundan öncə diaqnostika Azərbaycanda indiki səviyyədə inkişaf etməmişdi. Amma təəssüf ki, heç bir valideyn övladını vaxtında həkimə apararaq onun xəstəliklərini aşkarlamır. Yaxud da bu xəstəliyi aşkarlasa belə, evində xəstə uşağının olmasını etiraf etmir. Belə olan halda qadın hamilə qaldıqda onun səhhəti daha da yükə düşür və ağciyəri, ürəyi xəstə olan belə şəxslər xəstəliyə tab gətirə bilmirlər. Beləcə, 9 ay boyunca həmin qadının səhhəti get-gedə pisləşir və artıq doğuş zamanı vəziyyət daha da pik həddə çatır. Nəticədə xəstəni xilas etmək mümkün olmur".

İnanılmaz: Doğuşa qədər hamilə olduğunu bilməyib>>

Baş ginekoloq bu cür halların baş verməməsi üçün hamiləlikdən öncə ümumi müayinənin aparılmasının vacibliyini vurğulayır: "Hamiləliyin ilk günündən qadınların ümumi müayinədən keçmələri vacibdir. Qadın elə hamiləliyini öyrəndiyi ilk gündən həkim nəzarətində olmalıdır. Düzdür, başa düşürəm ki, bəzi qadınlar hamiləliklərini öz yaxınlarından gizlətmək istəyirlər. Amma həyati təhlükənin olmaması üçün ya anaları, ya da həyat yoldaşları ilə birgə mütləq həkimə gəlməli və ümumi müayinədən keçməlidirlər. 7-8 həftəlikdə ginekoloq xəstəni terapevtə, diş həkiminə göndərir, boğaz ətrafından xüsusi yaxmalar götürdür. Çünki bu yaxmalarla bir sıra infeksiyalar aşkarlana bilər. Həmin infeksiyalar isə hamiləlik dövründə həm anaya, həm də körpəyə mənfi təsir edə bilər. Lakin təəssüflər olsun ki, bəzi hallarda xəstələr bunlara məhəl qoymur, qadın xəstəxanalarına müraciət etmirlər".

"Azərbaycanda hamiləlik zamanı ambulator qulluq qadın məsləhətxanalarında, doğuş isə doğum evlərində aparılır.

Doğuşu qəbul edən həkim 9 ay müddətində hamiləyə baxıb onun durumunu öyrənə bilməz. Çünki o, doğum evində çalışır və səhər saatlarından etibarən doğuşa gələn xəstələri qəbul edir. Onun üçün vaxt tapılmır ki, xəstəni 9 ay müddətində çağırsın və müayinələrdən keçirtsin. Elə hallar olur ki, ambulator qulluğa nəzarət edən həkim də dövlət müəssisəsində doğuşu qəbul edə bilməz. Qanunla bu, yolverilməzdir.

Bu səbəbdən də xəstəni özəl klinikaya aparırlar. Özəl klinikalarda isə paket üçün xəstədən külli miqdarda pul istəyirlər. Bu pul olmayan halda, xəstə nə dövlət xəstəxanasına, nə də ki, özəl xəstəxanaya gedə bilir".

Bu və buna bənzər bir sıra hadisələrdən isə sadəcə bu qənaətə gəlmək olar ki, bəzi hallarda ana olmağa hazırlaşan qadınlar nə öz, nə də dünyaya gətirəcəkləri körpənin məsuliyyətini dərk etmirlər. 

Əksər hallarda qadın hüquqlarının kobudcasına pozulduğu ailələrdə bu cür hallar baş verir. İstənilən halda, xəstə övladının doğulmaması üçün ana olacaq şəxs və onun övladının sağlamlığı üçün yaxınları da mütəmadi olaraq onu həkimə aparmalı, lazım olan müayinələrdən keçirməlidirlər.

Övlad dünyaya gətirməyi qarşısına məqsəd qoyan və bunu kor-koranə, yaxud da planlı şəkildə istəyən qadın nə olur-olsun, dünyaya gələn körpənin əsas məsuliyyəti, yükü, elə həyatının sağlam olub-olmamasının da anadan asılı amil olduğunu dərk edərək ən sonda üsyan etməyi də bacarmalı, hüquqlarını bilməlidir. Çünki gecikmiş addım bir, yaxud da iki həyatın məhv olması və ya elə ona bərabər olacaq bir forma alması, yəni şikəst olması deməkdir.

581
Teqlər:
ginekoloq, ana ölümü, ölüm, övlad, ana, gənc qadın, qadın, doğuş
Əlaqədar
Altı ana və səkkiz körpə nədən ölüb: Baş ginekoloq səbəbləri açıqladı
Azərbaycan və dünyada ana ölümləri
Cəlilabadda 36 yaşlı qadın doğuş zamanı öldü
Mingəçevirdə kimsəsiz azyaşlı qız uşaq doğdu
Övladınızın çəkisi az, boyu da alçaqdırsa... - Pediatr xəbərdar etdi
 Ciyərin rentgeni, arxiv şəkli

Şar üfürmək olmaz pulmonoloq ciyərlərin bərpasından danışır

99
(Yenilənib 23:01 03.08.2020)
Иronxların “dezinfeksiyası” üçün yağlı inhalyasiyalar etməyə gərək yoxdur. Efir yağı respirator boruya düşdükdə alveolit başlaya bilər

BAKI, 3 avqust — Sputnik. Koronavirusdan sonra ciyərləri bərpa etməyin bir neçə yolu var, amma internetdə dərc olunmuş bəzi məsləhətlər təhlükəli ola bilər.

Sputnik Azərbaycan Rusiya KİV-ə istinadən bildirir ki, bunu Sankt-Peterburqun 2 saylı çoxprofilli xəstəxanasının pulmonoloqu İrina Kroşkina deyib.

Onun sözlərinə görə, xəstəlikdən sağalandan sonra şar üfürmək olmaz, çünki bu, ağciyərləri gücə salır. Ağciyər toxuması zəifləmiş olduğundan pnevmotoraks (havanın plevra boşluğunda yığılması, ağciyərin tam və ya qismən kollapsına səbəb olur) əmələ gələ bilər. Həmçinin bronxların “dezinfeksiyası” üçün yağlı inhalyasiyalar etməyə də gərək yoxdur. Efir yağı respirator boruya düşdükdə alveolit başlaya bilər (ağciyər alveollarının iltihablaşması ilə fibroz əmələ gəlməsinə meyllilik).

“Tibbi ədəbiyyatda “yağlı pnevmoniyalar” təsvir olunub, bunlar, yeri gəlmişkən, çox ağır keçirilir. Nəfəs yollarına havadan başqa heç nə keçməməlidir”, - pulmonoloq qeyd edib.

O, ağciyərlərin bərpasında müsbət nəticə verə biləcək metodları açıqlayıb. Həkimin sözlərinə görə, rahat templə piyada gəzmək çox xeyirdir. Bu zaman çubuqdan (əsadan) da istifadə etmək olar. Tədricən isə həm yerişin intensivliyini artırmaq, həm də marşrutu uzatmaq gərəkdir. Həmçinin saman çöpü ilə suyun üzərinə üfürmək olar: “Ləng surətdə hava alın, dördəcən sayıb nəfəsinizi saman çöpüylə verin – nəfəs verməyiniz almağınızdan 1,5 dəfə uzun olmalıdır, yəni nəfəs verərkən 6-dək saymaq lazımdır”. 

 

99
Mövzu:
Dünyanı cənginə almış bəla
Əlaqədar
Koronavirus öləcək: maskanı benzinə batırın...
COVID-19-dan sağalanlara iki vitamin məsləhət gördülər
Koronavirusu spreylə dayandıracaqlar
Əvvəl risk qrupundakılar, sonra isə hamı - kütləvi peyvəndin başlama tarixi uzaqda deyil
Ağciyəri təmizləməyin ən yaxşı 7 üsulu

COVID-lə mübarizədə həkimlərimizə italyanlar kömək edəcəklər - FOTO

148
(Yenilənib 21:18 03.08.2020)
Altı mütəxəssis təxminən iki həftə Azərbaycanda qalacaq və azərbaycanlı həmkarları ilə birlikdə COVID-19 ilə mübarizə və onun qarşısının alınması sahəsində məsləhət, kömək və təlim fəaliyyətlərini həyata keçirmək üçün yerli orqanlarla əməkdaşlıq edəcək

BAKI, 3 avqust — Sputnik. Bu gün İtaliya Mülki Müdafiə İdarəsinin nümayəndə heyəti Azərbaycanın COVID-19 epidemiyası ilə mübarizə səylərini dəstəkləmək məqsədi ilə Maliyyə Qvardiyası tərəfindən təşkil edilən xüsusi reys ilə Bakıya gəlib.

Sputnik Azərbaycan bildirir ki, bu barədə məlumatı İtaliyanın ölkəmizdəki səfirliyi yayıb.

Məlumata görə, komanda Pyemont, Toskana, Valle d'Aosta və iyun ayından etibarən Azərbaycan Respublikası Səhiyyə Nazirliyi ilə yüksək səviyyəli əməkdaşlıq proqramına başlamış və yoluxucu xəstəliklərin araşdırılmasında dünya səviyyəli bir mərkəz olan Roma "Lazzaro Spallanzani" Milli İnfeksiya Xəstəlikləri İnstitutundan gələn həkimlər və tibb bacıları daxil olmaqla altı nəfərdən ibarətdir.

"İtaliya pandemiyanın ən ağır həftələrində Azərbaycan kimi dost ölkələrin göstərdiyi yaxınlığı unutmur: beynəlxalq həmrəyliyin dəyəri tariximizin və xalqımızın qan yaddaşının ayrılmaz bir hissədir. İtaliya ölkələrimiz arasındakı dostluğu fəaliyyətlərlə qiymətləndirmək niyyətindədir", - İtaliyanın Azərbaycandakı səfiri Auqusto Massari qeyd edib.

Altı mütəxəssis təxminən iki həftə Azərbaycanda qalacaq və azərbaycanlı həmkarları ilə birlikdə COVID-19 ilə mübarizə və onun qarşısının alınması sahəsində məsləhət, kömək və təlim fəaliyyətlərini həyata keçirmək üçün yerli orqanlarla əməkdaşlıq edəcək.

148
Mövzu:
Azərbaycanda koronavirus: son xəbərlər
Əlaqədar
Azərbaycanda daha 647 nəfər COVID-19-dan sağalıb
COVID-19-la mübarizə qripə yoluxmanı da azaldıb - TƏBİB
Azərbaycanda karantin rejimi qismən yumşaldılır - DETALLAR
Azərbaycana Uhan şəhərindən ekspertlər gələcəklər

Salyanda zəncirvari qəza: yaralılardan biri baş həkimdir

0
Yaralılardan kəllə-beyin travması alan “Toyota Prado” markalı avtomobilin sürücüsü  Vidadi Əliyevin vəziyyəti ağır olduğundan Bakı şəhərinə - Mərkəzi Klinik Xəstəxanasına yola salınıb

BAKI, 4 avqust — Sputnik. Salyanda baş verən zəncirvari qəzada 3 nəfər xəsarət alıb.

Sputnik Azərbaycan APA-ya istinadən bildirir ki, hadisə bu gün günorta saatlarında Salyan rayonunun Kərimbəyli kəndində qeydə alınıb. “Daewoo”, “Toyota Prado” və  “VAZ 2107” markalı avtomobillərinin toqquşması nəticəsində 3 nəfər - Bakı sakini, 1960-cı il təvəllüdlü Əliyev Vidadi Qamət oğlu, 1990-cı il təvəllüdlü Həsənova Lalə İslam qızı və 1982-ci il təvəllüdlü Talıbov Zöhür Nadir oğlu müxtəlif dərəcəli bədən xəsarətləri ilə Şirvan Şəhər Xəstəxanasına yerləşdiriliblər.

Yaralılardan kəllə-beyin travması alan “Toyota Prado” markalı avtomobilin sürücüsü  Vidadi Əliyevin vəziyyəti ağır olduğundan Bakı şəhərinə - Mərkəzi Klinik Xəstəxanasına yola salınıb.

Qeyd edək ki, Vidadi Əliyev Respublika Cüzam xəstəxanasının baş həkimidir.

Faktla bağlı araşdırma aparılır.

0