Körpə gidalanması, arxiv şəkli

Həkim-firma işbirliyi: Cinayətkar tandem gələcəyimizi məhv edir

463
(Yenilənib 11:58 31.08.2019)
Deyirlər ki, "sən uşağa bizim süni uşaq qidasından yaz, əvəzində sənə maddi dəstək verəcəyik”

Zülfiyyə Quluyeva, Sputnik Azərbaycan

BAKI, 31 avqust — Sputnik. Səhiyyə Nazirliyi göstəriş olmadan süni qida təyin edən həkimlərin aşkar edilməsi üçün müvafiq tədbirlər hazırlayır. Nazirliyin bununla bağlı ictimaiyyətə açıqladığı məlumatda qeyd edilib ki, bəzən anaları süni qidalara yönəldənlərə rast gəlinir. Məlumatda bildirilir ki, körpələrə doğulduğu ilk gündən süni qida verilməsi Səhiyyə Nazirliyini, o cümlədən neonatal komissiyanın ekspertlərini də narahat edir.

Qeyd edək ki, süni uşaq qidalarının təbliğatının doğum evlərindən başlanılması inkarolunmaz faktdır. Doğum evlərində çalışan pediatrlarla işbirliyi quran süni uşaq qidalarının distribütorları bu yolla hər il yüzlərlə uşağı ana südü ilə qidalanmaqdan məhrum edərək süni qidaya cəlb edir.

K.Y.Fərəcova adına Elmi-Tədqiqat Pediatriya İnstitutunun direktoru Nəsib Quliyev də Sputnik Azərbaycan-a açıqlamasında süni uşaq qidaları şirkətlərinin nümayəndələri ilə həkimlərin işbirliyi hallarının olduğunu təsdiqləyir. Səhiyyə Nazirliyinin baş pediatrı bildirir ki, bu cür halların qarşısını almaq məqsədilə iş aparılır. Həmsöhbətimiz bununla belə hesab edir ki, ananın övladını öz südü ilə qidalandırmaq fikri olarsa, onu kənar təsirlə fikrindən daşındırmaq olmaz: "Körpələrin ana südü ilə qidalanması elə bir təbiət qanunudur ki, ondan uzaqlaşmaq olmaz. Bu qanuna canlılar riayət etmədikdə, təbiət onlardan qisas alır. Biologiyanın qanunlarından birində göstərilir ki, tarixi təkamül prosesində canlılar o qədər spesifikləşib və adekvatlaşıb ki, hər bir canlının öz balası üçün hasil etdiyi qida maksimum spesifik və maksimum adekvatdır. Yəni, təbiətdə mövcud olan canlıların heç biri bir-birini təkrar etmir. Hər bir canlının öz balası üçün hasil etdiyi qida qədər ikinci qida növü təbiətdə mövcud deyil. Bir canlının öz balası üçün hasil etdiyi qidanın başqa canlının balasına verilməsi isə bioloji fəlakətdir. Şüurlu insanlar buna əməl etmirlərsə, sözsüz ki, doğulan uşaqların sağlamlığında müəyyən problemlərin yaranacağı qaçılmazdır. Bu, istənilən formada böyüməkdə olan uşaqların sağlamlığında, intellektində özünü biruzə verir. Dünyaya gələn uşağın yeganə qidalanması ana südü ilə baş verməlidir".

N.Quliyev deyir ki, Azərbaycanda əvvəlki illərlə müqayisədə ana südü ilə qidalanma faizi artıb: “Amma, istədiyimiz nəticəyə hələ də gəlib çata bilməmişik. 1992-ci ildə Azərbaycanda ana südü ilə qidalanan uşaqlar 25 faiz təşkil edirdi. Hal-hazırda isə bu rəqəm iki dəfə artaraq 48-52 faiz səviyyəsinə çatıb. Əsas hədəfimiz isə 95-98 faiz həddinə çatmaqdır".

Baş pediatr bildirir ki, ölkəmizdə ana südü çatışmazlığı subyektiv amillərlə bağlıdır: "Hamıda sual yaranır ki, ana südü ilə bağlı çatışmazlıq nədən yaranır? Araşdırmalar göstərir k, cəmi iki faiz halda ana südünün çatışmazlığına obyektiv səbəb ola bilər. Yəni, bu ananın istəyindən asılı olmayaraq, iki faiz halda müşahidə olunur. Yerdə qalan hallarda ana südünün çatışmazlığı subyektiv çatışmazlıqlarla bağlıdır. Düzgün qidalanmanın təmin olunmaması, anaların öz övladına süd vermək istəyinin olmaması birinci yerdə dayanır.

Bundan başqa, qida şirkətlərinin nümayəndələri bir qisim həkimləri də öz təsirlərinə salmağa cəhd edirlər. Deyirlər ki, "sən uşağa bizim süni uşaq qidasından yaz, əvəzində sənə maddi dəstək verəcəyik". Belə halların qarşısını almaq üçün Səhiyyə Nazirliyində ayrıca monitorinq qrupu yaradılıb. Onlar doğum evlərində yoxlama və nəzarət aparırlar və bu halların baş verməsinə imkan vermirlər".

N.Quliyev bildirir ki, ana südü ilə qidalanmadan kənar qalan uşaqlar çox böyük risk altına düşürlər: "Ana südü ilə qidalanmamanın fəsadlarını saymaqla qurtarmaz. Ümumiləşdirilmiş şəkildə demək olar ki, ana südü ilə qidalanan uşaqlarla süni qida qəbul edən uşaqları müqayisə etdikdə, xəstələnmə və ölüm halları təbii yolla qidalanan uşaqlara nisbətdə dörd dəfə çoxdur. Məsələn, diareya xəstəliyinə ana südü ilə qidalanmayan uşaqlarda 17 dəfə çox rast gəlinir".

Baş pediatrın sözlərinə görə, hazırda hamilə qadınlar və yeni ana olmuş qadınlar arasında uşağın ana südü ilə qidalandırılması ilə bağlı maarifləndirmə işləri aparılır.

Qeyd edək ki, statistik göstəricilərə görə, 2000-ci ildə 38.5 min körpə üç ayına qədər, 33.4 min körpə isə altı ayına qədər ana südü ilə qidalanıb. 2005-ci ildə üç ayına qədər ana südü ilə qidalanan körpələrin sayı 30.5 min, 2007-ci ildə 34.4 min, 2008-ci ildə 36.5 min, 2009-cu ildə 53.5 min, 2010-cu ildə 77.9 min, 2011-ci ildə 74.5 min, 2012-ci ildə 83.5 min, 2013-cü ildə 86.5 min, 2014-cü ildə 93.2 min, 2015-ci ildə 90.3 min, 2016-cı ildə 95.2 min, 2017-ci ildə isə 89.7 min nəfər olub. Altı ayına qədər ana südü ilə qidalanan körpələrin sayı isə həmin illərdə müvafiq olaraq 31.1, 36.6, 37.6, 39.3, 73.3, 71.1, 77.4, 78.8, 77.5, 73.7, 73.9 və 69.7 min olub. Maraqlıdır ki, 2000-ci ildən 2010-cu ilə qədər 1-2 yaş arasında olan körpələrin ana südü ilə qidalanması qeydə alınmayıb. Sonrakı illərdə isə bu yaş kateqoriyasında olan körpələrin ana südü içməsi halları kəskin çoxalıb. Belə ki, 2010-cu ildə 77 min, 2011-ci ildə 69.6 min, 2012-ci ildə 66.3 min, 2013-cü ildə 63.5 min, 2014-cü ildə 60.1 min, 2015-ci ildə 58 min, 2016-cı ildə 58.2 min, 2017-ci ildə isə 55.4 min körpə bir yaşına qədər ana südü içib. 2010 və 2011-ci illərdə isə 6.6 min körpə iki yaşına qədər ana südü ilə qidalanıb. 2012-ci ildə bu rəqəm 7.3 min, 2013-cü ildə 8.2 min, 2014-cü ildə 11.3 min, 2015-ci ildə 8.8 min, 2016-cı ildə 10 min, 2017-ci ildə 7.8 min olub.

Azad İstehlakçılar Birliyinin (AİB) sədri Eyyub Hüseynov isə iddia edir ki, ölkəmizdə ana südü ilə qidalanma hazırda 44 faizi keçmir. Sputnik Azərbaycan-a açıqlamasında AİB sədri bildirir ki, bu gün ana südü ilə qidalanma səviyyəsinin artmasına mane olan amillərin kökündə həkim-firma işbirliyi dayanır: "Bizim Birliyə informasiyalar daxil olur ki, süni uşaq qidası satan şirkətlər doğum evlərində pediatrlarla əlbir işləyirlər. Həkim yeni doğulan uşağa ana südü ilə yanaşı, süni uşaq qidası da təyin edir. Buna səbəb kimi isə ananın südünün az olması, yaxud da keyfiyyətinin aşağı olması kimi səbəbləri göstərir. Doğum evində süni qida verilən uşaqlara, pediatrlar ana və uşaq evə yazılarkən də süni qida verməyi məsləhət görürlər. Hətta firmaların nümayəndələri həkimin uşağa süni qida yazıb-yazmadığını dəqiqləşdirmək üçün evə çıxan analara zəng edirlər. Onlardan uşağa ana südü, yoxsa süni qida ilə qidalandırdıqları barədə məlumat əldə etməyə çalışırlar. Sual yaranır ki, bu qadınların yenicə ana olduğunu, mobil əlaqə nömrəsini süni qida şirkətləri hansı yolla əldə edirlər? Bəllidir ki, həkimlərlə süni uşaq qidaları satan firmaların iş birliyinin nəticəsində... Səhiyyə Nazirliyi ana südü ilə qidalanma faizini yüksəltmək üçün işə elə doğum evlərindən başlamalıdır. Zahı qadınlara uşağına ana südü əvəzinə süni uşaq qidası yazan pediatrlar cəzalandırılmalıdır. Doğum evlərinə süni uşaq qidalarının buraxılmasının qarşısı alınmalıdır".

463
Mərkəzi Neftçilər Xəstəxanasının əməkdaşı İlhamə Şirinova

Ön cəbhədə vuruşan həkim: “Sona qədər buradayam, mübarizə aparacağam” - MÜSAHİBƏ

367
(Yenilənib 21:59 02.07.2020)
İlhamə Şirinova deyir ki, həkim kimi yoluxub həyatını itirə bilər. Amma ən azı nə qədər insanı sevdiklərinə qovuşdurduğuna görə rahatdır.

Nigar İsgəndərova, Sputnik Azərbaycan

BAKI, 2 iyul — Sputnik. Onlara həmişə ehtiyacımız var. Hər gün müraciət etməsək də, vaxtaşırı onlara işimiz düşür. Bu gün – dünyada koronavirus pandemiyasının yayıldığı bir dövrdə isə onlara xüsusi ehtiyacımız yaranıb.

Özümüz olmasaq da, yaxınlarımızın bu gün həkimlərə daha çox ehtiyacının olduğunu duyuruq. Hələ də virusa inanmayanlar, yaşananların böyük bir oyunun tərkib hissəsi olduğunu hesab edənlər olsa da, onlar ağır vəziyyətdə xəstəxanalara gətiriləndə, burada reallığı aydın şəkildə dərk edirlər. Reallıq isə sağ qalmaq üçün həkimlərə daha çox ehtiyacımızın olduğunu deyir.

Son vaxtlar həkimlər barədə o qədər də xoş olmayan fikir formalaşsa da, bu işdə canla-başla çalışan, hətta lazım olarsa, peşəsinə görə hər şeyi qurban verməyə hazır olan həkimlərimiz də var. Döyüş meydanına atılan və hər an ölümü gözə alan belə həkimlərdən biri də bu gün Mərkəzi Neftçilər Xəstəxanasında xəstələrin sevimlisinə, əzizinə çevrilən İlhamə Şirinovadır. O, qadın, ana, iki övladı, ailəsi, yaşlı valideynləri olmasına baxmayaraq döyüş meydanına atılan bu günün qəhrəmanlarındandır.

© Photo : Courtesy of İlhama Shirinova
Mərkəzi Neftçilər Xəstəxanasının əməkdaşı İlhamə Şirinova

Sputnik Azərbaycan həkimlə portret müsahibəni təqdim edir:

-  Hər gün MNX-da COVID-19-dan müalicə alan xəstələrlə təmasdasınız. Demək olar ki, hər gün həyatınız riskdədir. Sizi tanımaq olarmı? 

- 1984-cü ildə Göyçə mahalında anadan olmuşam. Azərbaycan Tibb Universitetini bitirdikdən sonra artıq 7 ildir ki, infeksionist olaraq çalışıram. Ailəliyəm, 10 və 12 yaşlarında iki qız övladım var.

- Nə zamandan COVID-19 xəstələrinin müalicəsi prosesinə qoşulmusunuz?

- Bildiyiniz kimi, martın 24-dən etibarən çalışdığım Mərkəzi Neftçilər Xəstəxanası da COVID-19 xəstələrinin müalicəsi üçün ayrılıb. Martın 27-dən artıq bu komandada çalışmağa başladım. Bu xəstələrin müalicəsində ilk dəfə olaraq gecə növbəsində işə çıxdım. Xəstələrin ümumi durumunu, narahatlıqlarını gördüm, ağır idilər. Həmin gün MNX-nın digər infeksionisti Natiq Əliyevlə birgə gecə növbəsində idik. İlk günlər həkim çatışmazlığı var idi və mən də bu komandaya könüllü olaraq qoşuldum.

- Çətinlikləriniz yəqin ki, çox olar. Burada məsuliyyət yükü də var...

- Burada insanların taleləri bizdən asılıdır. Burada söhbət insan həyatından gedir. Çətinlik dedikdə, çalışırıq ki, xəstənin səhhəti ilə bağlı bütün şikayətləri dinləyək, tədbir görək və elə edək ki, xəstə həm yaxşı olsun, müalicəsi düzgün getsin, onu itirməyək, həm də bizdən məmnun qalsın. Çünki bir insanın müalicəsi, onun sağalması ətrafında nə qədər insanın sevinc xəbəri alması, üzlərinin gülməsi, qəlblərinin fərəhlənməsi deməkdir. Onlar bir canı, əzizlərini bizə etibar edirlər. Yəni ən böyük çətinlik budur.

- Sırf bu pandemiya dövründə əsas çətinlikləriniz nə oldu?

- Sırf pandemiya dövründə isə bir ana olaraq əsas çətinliklərim övladlarımla bağlı olur. Onlardan uzaq olmağım həm övladlarıma, həm də mənə çətindir. Dörd aydır onlardan uzaq düşmüşəm. İki ay ərzində övladlarımı demək olar ki, heç görməmişəm. İki aydan sonra isə övladlarımı ancaq uzaqdan görmüşəm. Övladlarımı qucaqlaya, onlarla təmas qura, onları doya-doya öpə bilmirəm. Onlar da mənim sevgimə həsrət qalıblar. Bilirsiniz, xüsusən də qız övladları anaya daha çox bağlı olur. Məni hər gün nə qədər öpüb-qucaqlayırdılar. Amma indi o hissləri yaşa bilməməyimiz məni çox üzür. Böyük qızım Məryəm vəziyyəti başa düşür. Deyir ki, ana eybi yoxdur, biz hər şeyə dözərik, səninlə fəxr edirik ki, bu cür xəstələri müalicə edirsən. Deyir ki, orada sənə ehtiyac var. Amma həqiqətən də vəziyyət çox çətindir. Həyat yoldaşım, övladlarım, anam-atamdan artıq aylardır ki, uzağam. Bir ana kimi övladlarım üçün darıxdığım kimi, mənim üçün də darıxan ana var. Anam-atam mənim üçün darıxır. Yəni, ailə, həsrət mənasında çox çətindir. Amma yenə də bu işdə, bu komandada olmaqdan məmnunam. Nə vaxta kimi burada olduğumuzu bilməsək də, COVID-19-la mübarizə sona çatanacan mən burada, xəstələrin yanında olacam. 7 illik fəaliyyətim dövründə ilk dəfədir ki, belə bir vəziyyətlə qarşılaşırıq. Arzu edirəm ki, xalqımızın bu əzablı günləri tezliklə geridə qalsın. Bu günlərin geridə qalması üçün hər kəsdən bu virusa inanmağı xahiş edirik. Pandemiyanın qısa zamanda bitməsini hər birimiz arzulayırıq. Çünki bu virus bizə hərtərəfli zərər vurdu. İtkilər, stresslər... COVID-19-a tutulan şəxslərin yanaşı xəsətlikləri də artdı. Bu itkilər sırasında tanınmış həkimlərimiz, ziyalılarımız da var.

© Photo : Courtesy of İlhama Shirinova
Mərkəzi Neftçilər Xəstəxanasının əməkdaşı İlhamə Şirinova

- Həqiqətən də çətindir. Və bu durumun hələ uzun müddət davam edəcəyi görünməkdədir. Nə zamansa bezə bilərsinizmi?

- Mövcud vəziyyət bir daha göstərdi ki, həkimlik sənəti peşələrin ən ağırı və ən şərəflisidir. Sənətim üçün həyatda demək olar ki, hər şeyi qurban verə bilərəm. Düşünürəm ki, mən heç vaxt bu sənətdən bezmərəm. Hətta COVID-19 virusu arzulamadığımız halda belə, illərlə davam etsə, mən yenə də bu xəstələrin müalicəsində indiki kimi yaxından iştirak edərəm. Düşünürəm ki, hər bir işdə əsas olan amil peşəyə olan sevgidir. Bu gün elə həkimlər var ki, yaşı, səhhəti ilə əlaqədar olaraq COVID-19 xəstələrinin müalicəsi prosedurundan kənarda qalıblar. Amma mənim üçün yaş, səhhət, heç bir önəm daşımır. Bu sənət üçün demək olar ki, hər şeyi qurban verərəm.

- Gündəlik iş saatınız nə qədərdir?

- Biz hər gün 12 saat fasiləsiz işləyirik. Hətta olur ki, işdən sonra da xəstələrə baxırıq.  İşdən sonra telefonla belə xəstələrlə danışırıq, onların şikayətlərini, narahatlıqlarını cavablayırıq.

- İstənilən peşə, sənət kişilərlə müqayisədə qadınlar üçün daha çətindir...

- Düzdür, bir qadın və bir ana üçün belə bir vəziyyət həqiqətən də çox çətindir. Belə bir vəziyyətdə təbii ki, hər bir qadının ailədə onu başa düşən həyat yoldaşı olmalıdır. Ailəmin mənə dəstəyi bu işdə çox köməyimə çatır. Amma deyim ki, həkimlik sənətində qadın-kişi olmağın fərqi yoxdur. Öncədən, bu sənəti seçərkən artıq məsuliyyətini dərk etmiş olursan. Hər hansı xəstənin sağalaraq evə getməsi bizim üçün qəhrəmanlıqdır. Saturasiyası 78-85 olan xəstələr balonla, aparat vasitəsi ilə nəfəs alır. Bu xəstələrin sağalması, saturasiyalarının yenidən 95+ olması özü böyük qəhrəmanlıqdır. Mən sənətimin vurğunuyam. Xəstələr sağalıb evə gedəndə içimizi böyük bir fərəh hissi bürüyür. Bizim gördüyümüz iş, yəni bir insanın həyatını xilas etmək, onu əzizlərinə yenidən qovuşdurmaq böyük bir qəhrəmanlıqdır. Mən bu komandaya qoşulanda hər şeyi, hətta həyatımı itirə biləcəyimi də gözə almışam. Mən də bir həkim kimi yoluxub həyatımı itirə bilərəm. Amma ən azı rahatam ki, nə qədər insanı sevdiklərinə qovuşdurmuşam. Sənətimin vurğunuyam, bu mənim üçün böyük fəxrdir. Bu gün biz sanki cəbhə bölgəsindəyik. Mən sonuna qədər burada döyüşəcəm. İnanın, müharibə olsa belə, ön cəbhədə vuruşaram. Biz həkimlər ölümdən qorxmuruq. Bəzən valideynlərim deyir ki, 4 aydır işləmisən, çıx bir ay dincəl. Deyirəm, belə bir vəziyyətdə bunu edə bilmərəm. Çünki pandemiya şəraitində bu gün sırf infeksionistə böyük tələbat var.

- Xəstələr yəqin ki, həm qorxu, həm də stress içindədirlər. Onların bəziləri psixoloji olaraq gərgin olduqlarını müxtəlif sosial şəbəkələrdən bəyan edirlər. Onlarla necə dil tapırsınız?

- Ümumiyyətlə, müxtəlif xəstəliklər zamanı xəstələrdə psixoloji durumu, sinir sistemi pozulur. Belə xəstələrlə gərək ki, dil tapaq. Bu isə təbii ki, təkcə biz həkimlərin işi deyil, ümumilikdə bütün tibb personalının işidir. Xadiməsindən həkiminədək, hər birimiz xəstə ilə dil tapmalıyıq. Bizim üçün xəstə hər zaman haqlıdır. Hətta haqsız olduğu halda belə, xəstə bizim üçün hər zaman haqlı sayılır. Biz xəstə ilə xəstənin dilində danışırıq. Ən azından özünü, doğmalarını xəstənin yerinə qoymalısan. Biz başa düşürük ki, xəstənin yerində öz əzizlərimiz də ola bilər. Ona görə hər bir xəstəmə əzizim kimi yanaşıram. Çalışıram ki, xəstəni başa düşüm.

© Photo : Courtesy of İlhama Shirinova
Mərkəzi Neftçilər Xəstəxanasının əməkdaşı İlhamə Şirinova

- Tezliklə öncəki həyatımıza qayıtmaq üçün tövsiyəniz nədir?

- Heç kəs "bu xəstəlik mənim yaxınımda, qohumumda, qonşumda yoxdur, inanmıram", deməsin. Bu gün bu pandemiya bütün dünyada tüğyan edir. Virusdan qorunmaq üçün hər kəs şəxsi gigiyena qaydalarına əməl etməlidir. Tək olmadığı hər bir yerdə maska taxmalıdır. Sosial məsafə də gözlənilməlidir. Maska taxmadığı üçün ətrafındakı insanları da qınamalıdırlar. Artıq vəziyyət elə bir həddədir, virus elə alovlanıb ki, daha onun varlığına inanmayan qalmaycaq. Özümüzü qorumasaq, virus daha da alovlanacaq. Baxın, hazırda mart-aprel ayları ilə müqayisədə həm virusun yayılma dərəcəsi, həm də ağırlıq dərəcəsi artıb. Virus artıq mayın sonlarından etibarən mutasiya olunmuş formadadır. Bir də hər kəsi səhhəti ilə bağlı hansısa şikayət olduqda dərhal həkimə məlumat verməyə səsləyirəm.

367
Teqlər:
müalicə, Koronavirus, COVID-19, həkim
Adil Qeybulla, həkim

Professor: “Karantin rejiminin gələcəyi insanların davranışından asılı olacaq”

88
(Yenilənib 10:38 02.07.2020)
Professor, həkim Adil Qeybulla deyir ki, əgər qaydalara riayət olunmasa, daha böyük sayda yoluxmalar qeydə alınacaq
Adil Qeybulla: “Hazırda tətbiq edilən karantin rejiminin sadəcə adı var”

“Azərbaycanda iyulun 5-dən sonra karantin rejiminin iki həftəlik uzadılması üçün təkliflər var. Fikir ondan ibarətdir ki, karantin rejimi uzadılsın”. Bunu Prezidentin köməkçisi Hikmət Hacıyev Operativ Qərargahın brifinqində deyib.

Professor, həkim Adil Qeybulla Sputnik Azərbaycan-a deyir ki, hazırda tətbiq edilən karantin rejiminin sadəcə adı var:

“Belə bir rejimi uzatmağın mənası yoxdur. Ya karantin rejiminə ciddi şəkildə əməl olunmalıdır, ya da bu məsələ artıq yekunlaşmalıdır. Karantinin uzanması insanların davranışlarından asılıdır. Təəssüflər olsun ki, bu qədər yoluxmanın qarşısında hələ də inanmayanlar, qaydalara riayət etməyənlər var. Bundan sonrakı vəziyyət insanların davranışından asılı olacaq. Əgər qaydalara riayət olunmasa, daha böyük sayda yoluxmalar qeydə alınacaq. Bunun nəticələrini də özünüz proqnozlaşdırın”.

Adil Qeybullanın geniş şərhinə auidofaylda qulaq asa bilərsiniz

88
Teqlər:
həkim, Azərbaycan, karantin
Əlaqədar
Əli Əsədov müşavirə keçirdi: rəhbərlər qarşısında yeni tələb qoydu
Polis sabahdan nəzarəti daha da gücləndirəcək: icazəni də kameralar "yoxlayacaq"
Bakıda COVID-19 testi müsbət çıxan kişini mağazada tutdular
"Masonların oyunu": Maskanı masqaraya qoyub, koronanı bihörmət edənlər...
Bakıdakı polis postları niyə yığışdırılır?
Günəş, arxiv şəkli

Yunanıstanda maraqlı təbiət hadisəsi baş verib

0
"Günəş iti" kimi bir fenomenal hadisəni demək olar ki, xüsusilə yaxşı havalarda dünyanın hər yerində görmək mümkündür.

BAKI, 2 iyul — Sputnik. Yunanıstanda "Günəş iti" adlanan nadir bir təbiət hadisəsi baş verib.

Sputnik Azərbaycan xəbər verir ki, hadisənin video görüntüsü "Youtube"-da paylaşılıb. Videoda Günəşin su üzərində dayandığı an təsvir olunur. Göy gövdəsi yarıya qədər buludla örtülüb. Nəticədə günəşin "ikiqat olması" xəyalı yaranır. "Günəş iti" kimi bir fenomenal hadisəni demək olar ki, xüsusilə yaxşı havalarda dünyanın hər yerində görmək mümkündür.

Xatırladaq ki, kameralar 2019-cu ilin dekabrında Amerikanın Missuri ştatındakı Sent-Luis şəhəri üzərində səmada Yer atmosferinə daxil olan meteoru çəkmişdi.

0
Teqlər:
Günəş, Yunanıstan