Uşaq qidası, arxiv şəkli

Körpəsi olan valideynlərə çağırış: "O qidaların ucuzuna aldanın, bahasına"

7028
(Yenilənib 19:55 18.04.2019)
"Qanuna görə, körpə qidaları çox reklam olunmamalıdır, satışı konkret yerlərdə olmalıdır, saxlanma rejimi 20 dərəcədən aşağı temperaturda olmalıdır"

Təranə Xudabaxşiyeva, Sputnik Azərbaycan

BAKI, 19 aprel — Sputnik. Azərbaycanda "Malyutka-2" əmtəə nişanlı uşaq qidasının içindən yad cisim aşkarlanması "ana südü, yoxsa süni uşaq qidası" mövzusunun bir müzakirəyə çıxmasına səbəb oldu. Bəzi vətəndaşların iddiasına görə, bahalı uşaq qidaları ucuz uşaq qidalarına nisbətən keyfiyyətlidir. Maraqlıdır, həqiqətən də bahalı qidalar ana südünü əvəz edəcək qədər keyfiyyətlidirmi?

Sputnik Azərbaycan-ın əməkdaşı bu sual mütəxəssislərdən cavab almağa çalışıb.

Pediatr Günay Rəsulova pasientlərə ana südündən istifadə etməyi məsləhət görür: "Ana südünü heç bir uşaq qidası əvəz edə bilmir. Bu haqda tez-tez maarifləndirmə xarakterli layihələr və tədbirlər də həyata keçiririk".

Mütəxəssis əlavə edib ki, bəzən hər hansı problemdən uşağa ana südü bəs eləmir: "Məsələn, uşaq düzgün əmə bilmir, anada süd az olur və sair. Bu səbəblərdən də körpə doymur, normal çəkisini ala bilmir. Buna görə də məcbur olaraq süni uşaq yeməklərindən istifadə etməli oluruq. Amma valideynlərə də dəfələrlə deyirik ki, uşaqları əsas ana südü ilə qidalandırmaq lazımdır".

Pediatr Xəyalə Quliyeva da bildirib ki, heç bir süni qida ana südünü əvəz edə bilməz: "Ümumiyyətlə, "yaxşı uşaq qidası" deyilən bir anlayış yoxdur. Bəzən valideynlər düşünürlər ki, bahalı uşaq qidaları daha keyfiyyətlidir. Elə deyil. İstər baha, istərsə də ucuz uşaq qidalarının tərkibi, demək olar ki, eynidir. 50 manatlıq uşaq qidaları ilə 20 manatlıq uşaq qidasının tərkibində elə də fərq yoxdur".

"Biz valideynlərə də daim məsləhət görürük ki, körpələrini 6 aya kimi ancaq ana südü ilə qidalandırsınlar. 6 aydan sonra isə əlavə qidalara yavaş-yavaş keçmək lazımdır. Pürelər, şorbalar, sıyıqlar hazırlayıb uşağı qidalandırmaq lazımdır" - deyə pediatr əlavə edib.

Azad İstehlakçılar Birliyinin sədri Eyyub Hüseynov açıqlamasında bildirib ki, rəhbərlik etdiyi qurum ana südü ilə qidalandırmağa dair beynəlxalq təşkilata üzvdür: "Bu il noyabr ayında Rio-de-Janeyroda keçiriləcək dünya konqresinə dəvət olunmuşam. Orada Azərbaycanda uşaqların ana südü ilə qidalanması və süni qidalar ilə bağlı problemlər haqqında danışacam".

E.Hüseynov vurğulayıb ki, körpə qidaları ilə bağlı Azərbaycanda problem çoxdur: "Ümumdünya Səhiyyə Təşkilatının uşaq qidaları ilə bağlı konvensiyası var. Qanuna görə, körpə qidaları çox reklam olunmamalıdır, satışı konkret yerlərdə olmalıdır, saxlanma rejimi 20 dərəcədən aşağı temperaturda olmalıdır. Azərbaycanda isə bu qanunlara əməl edilmir".

"Azərbaycanda uşaq qidalarının distributorları birbaşa pediatrlarla iş qurur. Bu da qanunsuzdur. Bizə analar şikayət edirlər ki, süni uşaq qidalarının distributorları onlara zəng edib satdıqları uşaq qidalarını təklif edirlər. Eyni zamanda, uşaq dünyaya gələn kimi uşaqlara xəstəxanalarda artıq süni qida verilir. Bu barədə çox sayda şikayətlər alırıq" - deyə o, əlavə edib.

Həmçinin, qeyd edib ki, körpə qidalarının satış nümayəndələri ilə pediatrların əlaqələrini kəsə bilmirlər. Bu da körpə qidalarının süni qiymət artımına təsir edir: "Bu gün Azərbaycanda körpə qidaları harada gəldi, necə gəldi, satılır. Şikayətdən biri də körpə qidalarının yuxarı temperaturda saxlanılması və satılması ilə bağlıdır. Hətta vaxtı keçmiş körpə qidalarının satılması barədə də şikayətlər daxil olub".

Eyyub Hüseynov onu da vurğulayıb ki, "Malyutka-2" əmtəə nişanlı uşaq qidasının içindən yad cisim aşkarlanandan sonra valideynlər təşvişə düşüblər: "Hər gün 10-a yaxın zəng gəlir. Valideynlər əvvəllər bu körpə qidasından uşaqlarına verdiklərini, övladlarının səhhəti üçün narahat olduqlarını bildirirlər. Təəssüflər olsun ki, həmin süni uşaq qidasını Azərbaycana gətirən şirkət isə heç bir açıqlama vermir".

7028
Teqlər:
süd, pediatr, qida, körpə, uşaq, ana
Əlaqədar
Məşhur uşaq qidası satışdan çıxarıldı – RƏSMİ
"Veysəloğlu" qalmaqallı uşaq qidası ilə bağlı açıqlama verdi - Yalandır
Qalmaqallı uşaq qidası ilə bağlı daha bir məlumat yayıldı
Rəsulova: “Uşaqlara ilk 6 ayda əlavə qidalar verilməməlidir”
Məktəbdə qız, arxiv şəkli

Valideynlərin nəzərinə: övladlarınızı COVID-19-dan belə qoruyun

3
(Yenilənib 11:25 16.04.2021)
"İmmunitetin gücləndirilməsində yuxunun böyük əhəmiyyəti var. Uşaqlar hər gün eyni vaxtda yatmalı, səhərlər yuxudan doymuş halda oyanmalıdırlar".

BAKI, 16 aprel — Sputnik. Mərkəzi Gömrük Hospitalının pediatr-neonatoloqu Aygün Sadıxova “Həkim məsləhəti” rubrikasında “Uşaqları COVID-19 xəstəliyindən necə qoruya bilərik?” sualını cavablandırıb. Spiutnik Azərbaycan-ın xəbərinə görə, həkim uşaqların yeni növ koronavirusun yayılmasında daha fəal rol oynadığını deyib: "COVID-19 pandemiyası yeni başlayan dövdə uşaqların virusa yoluxmaları nadir hal sayılırdı. Hazırda isə bütün dünyada minlərlə uşağın bu təhlükəli xəstəliyə yoluxması halları qeydə alınıb. Uşaqlar əvvəllər olduğu kimi yenə parklarda, meydançalarda bir-biri ilə oynayırlar. Onların bir-birindən yoluxub gizli daşıyıcı ola biləcəyini nəzərə alsaq, deyə bilərik ki, uşaqlar yeni növ koronavirus infeksiyasına yoluxmada fəal rol oynayırlar. Ona görə də bu gün uşaqlarımızın COVID-19 xəstəliyindən qorunması məsələsi çox aktualdır".

"Uşaq həkimi kimi məsləhət görərdim ki, bütün valideynlər uşaqlara gigiyenik qaydalara riayət etməyi, sosial məsafə saxlamağı öyrətsinlər. Əlbəttə ki, uşaqların öz nənə və babalarının, başqa qohumlarının yanına qonaq getməsi yaxşı haldır, amma pandemiya dövründə bu, yaşlı insanları yoluxma təhlükəsi ilə qarşı-qarşıya qoymaq deməkdir. Bu kontaktları minimuma endirmək məsləhətdir. Həmçinin, uşaqların bir-biri ilə tez-tez ünsiyyətdə olmasını da azaltmaq lazımdır. Böyük bayram tədbirlərindən, ad günlərindən isə hələlik uzaq olmaları yaxşıdır", - deyə o əlavə edib.

O bildirib ki, uşaqların virusa yoluxmaması üçün onların immunitetinin də möhkəmləndirilməsinə diqqət yetirmək lazımdır: "Burada ilk növbədə, onların sağlam qidalanması və düzgün tərtib edilmiş gündəlik rejim mühüm rol oynayır. Gündəlik qida rasionunda zülalların kifayət qədər yer tutması zəruridir. Uşaqlar hər gün ət, kəsmik, süd məhsulları, vitamin və minerallarla zəngin meyvə-tərəvəz qəbul etməlidirlər".

"İmmunitetin gücləndirilməsində yuxunun böyük əhəmiyyəti var. Uşaqlar hər gün eyni vaxtda yatmalı, səhərlər yuxudan doymuş halda oyanmalıdırlar. Gecə yuxusu 8 saatdan az olmamalıdır.  Məsləhətdir ki, uşaqlar saat 22:00-a qədər yatmağa getsinlər. Belə ki, bu vaxt yuxuya getmiş uşaqların orqanizmində immuniteti bərpa edən və tənzimləyən hormonlar, o cümlədən melatonin hazırlanır. Ümumiyyətlə, hər gün erkən yatan uşaqlar respirator virus infeksiyalarına az yoluxurlar. Uşaqlarda COVID-19 xəstəliyinin hər hansı əlamətlərini müşahidə etdikdə, özbaşına müalicə etməmək, mütləq pediatra müraciət etmək lazımdır", - deyə həkim əlavə edib.

3
Teqlər:
həkim, uşaqlar, Koronavirus, epidemiya, COVID-19
Mövzu:
Azərbaycanda koronavirus: son xəbərlər
AstraZeneca peyvəndi, arxiv şəkli

Angela Merkel "AstraZeneca" ilə vaksinasiya olunacaq

10
Kansler prosedurun vacibliyini vurğulayaq bildirib ki, bəşəriyyət yalnız bu yolla pandemiyanın qarşısını ala bilər.

BAKI, 16 aprel — Sputnik. Almaniya Kansleri Angela Merkel cümə günü, aprel ayının 16-da "AstraZeneca" peyvəndi ilə vaksinasiya olunacaq. Bu barədə "Welt" nəşri məlumat yayıb.

Qeyd edək ki, Merkel bir qədər bundan əvvəl koronavirus infeksiyasına qarşı "AstraZeneca" preparatı ilə vaksinasiyaya hazır olduğunu, ancaq növbəsini gözlədiyini bildirmişdi.

Kansler bu prosedurun vacibliyini də vurğulayaq bildirib ki, bəşəriyyət yalnız bu yolla pandemiyanın qarşısını ala bilər.

Xatırladaq ki, Avropa Dərman Agentliyi "AstraZeneca"-nın qanda laxtalanmaya səbəb olduğunu rəsmi şəkildə təsdiqləyib. Agentliyin səlahiyyətli nümayəndəsi Marko Kavaleri İtaliya mətbuatına bu barədə açıqlama verib. "Məncə, artıq bunu söyləyə bilərik: açıq-aşkar qan laxtalanması ilə peyvənd arasında əlaqə var", – deyə o bildirib.

Maraqlıdır ki, Avropa Dərman Agentliyinin direktoru Emer Kuk isə bu barədə açıqlama verərək bildirmişdi ki, "AstraZeneca" peyvəndi tamamilə təhlükəsizdir: "Bu, çox effektli və təhlükəsiz peyvənddir. Peyvəndin insanları koronavirusdan qoruması ilə bağlı faydaları ehtimal olunan risklərindən daha çoxdur".

Bir müddət bundan əvvəl bir sıra ölkələr, o cümlədən, Danimarka, İsveç, Almaniya, Fransa və İtaliya sözügedən preparatla vaksinasiya prosesinə ara verib. Daha sonra Danimarka "AstraZeneca"-nın peyvəndinin tətbiqini tamamilə dayandırıb.

10
Rusiya ilə sərhəd

Azərbaycan polisindən xəbərdarlıq: Rusiyada qanun dəyişib

0
(Yenilənib 11:30 16.04.2021)
Rusiya Federasiyasının (RF) "Beynəlxalq avtomobil daşımalarının həyata keçirilməsinə dövlət nəzarəti və həmin daşımaların icrası qaydalarının pozulmasına görə məsuliyyət haqqında" federal qanunvericiliyində dəyişiklik edilib.

BAKI, 16 aprel — Sputnik. Baş Dövlət Yol Polisi İdarəsi (BDYPİ) sürücülərə müraciət edib.

BDYPİ-dən Sputnik Azərbaycan-a daxil olan müraciətdə deyilir:

"Avtomobil nəqliyyatı ilə beynəlxalq sərnişin və yük daşımalarını həyata keçirən nəqliyyat vasitələri sahiblərinin və sürücülərin nəzərinə!

Tərəfdaş qurumlar tərəfindən verilmiş rəsmi məlumata istinad edərək bildiririk ki, Rusiya Federasiyasının (RF) "Beynəlxalq avtomobil daşımalarının həyata keçirilməsinə dövlət nəzarəti və həmin daşımaların icrası qaydalarının pozulmasına görə məsuliyyət haqqında" federal qanunvericiliyində dəyişiklik edilib.

Belə ki, hazırda qüvvədə olan dəyişikliyə əsasən, xarici daşıyıcıya məxsus nəqliyyat vasitəsi Rusiya Federasiyasının (RF) dövlət sərhəd buraxılış məntəqəsinə daxil olduğu zaman həmin nəqliyyat vasitəsilə əvvəllər RF ərazisində törədilən inzibati xətaya görə nəzərdə tutulan inzibati cərimənin ödənilməməsi halı aşkarlanarsa, qeyd olunan nəqliyyat vasitəsinin RF ərazisində hərəkətini davam etdirməsinə yalnız sözügedən inzibati cərimənin ödənilməsindən sonra icazə verilir.

Xarici daşıyıcı və ya onu təmsil edən nümayəndə nəqliyyat vasitəsi Rusiya Federasiyasının dövlət sərhəd buraxılış məntəqəsinə daxil olduqdan sonra 3 saat ərzində inzibati cərimə öhdəliyini yerinə yetirməlidir. Əks təqdirdə həmin nəqliyyat vasitəsinin Rusiya Federasiyasının ərazisindən xaric edilməsi üçün qanunla müəyyən olunmuş tədbirlər görüləcəkdir.

Bununla yanaşı, sözügedən qanunun müvafiq müddəalarının qüvvəyə minəcəyi 2021-ci il 7 iyul tarixindən etibarən eyni qaydaların Rusiya Federasiyasını tərk etmək istəyən xarici daşıyıcıya məxsus nəqliyyat vasitələrinə də şamil olunacağı nəzərdə tutulub. Yəni xarici daşıyıcıya məxsus nəqliyyat vasitəsilə Rusiya Federasiyasının ərazisində törədilmiş inzibati xətaya görə nəzərdə tutulan inzibati cərimə ödənilmədiyi təqdirdə həmin nəqliyyat vasitəsinin Rusiya Federasiyasının ərazisini tərk etməsinə məhdudiyyət tətbiq ediləcəkdir.

Eyni zamanda bildiririk ki, Rusiya Federasiyası Daxili İşlər Nazirliyinin Dövlət Yol Müfəttişliyinin rəsmi internet səhifəsində (гибдд.рф) xarici dövlət qeydiyyat nişanlı nəqliyyat vasitələrinin ödənilməmiş inzibati cərimələri haqqında məlumat əldə etmək imkanı yaradılıb".

0
Teqlər:
qanun, cərimə, dəyişiklik, Rusiya, müraciət, sürücülər, DYP