Cərrahiyə əməliyyatı

Saxta həkimləri iki ilədək həbs cəzası gözləyir

1160
(Yenilənib 18:08 27.02.2017)
Ekspert: "Xaricdə 3 aylıq kurs keçib Azərbaycanda "uzman" olurlar"

BAKI, 27 fev — Sputnik. Azərbaycanda xeyli sayda xəstələrin müayinə, müalicə və digər tibbi ehtiyaclar üçün xaricə üz tutduqları kimsəyə sirr deyil. Və bu problem müxtəlif səbəblərlə əlaqələndirilir.

Həkim Adil Qeybulla
MeydanTV
Səhiyyə eksperti Adil Qeybulla

Məsələni Sputnik Azərbaycan-a şərh edən tibb elmləri doktoru, professor Adil Qeybullanın sözlərinə görə, xəstələrin xarici ölkələrə üz tutmaları ilə bağlı proses təkcə Azərbaycanda müşahidə olunmur: "Dünyanın hər yerində müalicə məqsədilə kənar ölkərə axın var. Hətta Almaniyadan ABŞ-a, Türkiyədən Avropaya, ABŞ-a gedənlər mövcuddur. Bu, müəyyən bir həddədir. Çox imkanlı adamlar öz imkanlarına görə, daha tanınmış klinikalarda müalicə almağa üstünlük verirlər. Bu, müəyyən bir kateqoriya təşkil edir".

"Azərbaycanda xəstələrin xarici ölkələrə kütləvi axın etməsi bir neçə amillə bağlıdır. Səhiyyənin keçid dövründə olması, əhalinin səhiyyə xərclərini qarşılaya bilməməsi, bəzən lazımi ünvana düşməyib, həkim müalicəsindən məyus olması və s. səbəblərə görə, Azərbaycandakı insanlar müalicə üçün daha çox xarici ölkərələ müraciət edirlər" — professor deyir.

Müsahibimiz bildirir ki, hazırda müalicə üçün daha çox axın İranadır: "İranda müalicə Azərbaycanla müqayisədə daha ucuz başa gəldiyi üçün xəstələr bu ölkəyə gedirlər. Xəstələr çox zaman İranın əyalətlərinə üz tutur, Tehrana gedən çox azdır. Açıq etiraf etmək lazımdır ki, İranda müalicə ucuz olsa da, bu ölkənin əyalətlərinin xəstəxanalarının maddi-texniki bazası Azərbaycandan xeyli zəifdir. Onların avadanlıqları bizim avadanlıqlardan köhnədir. Amma bütün bunlara baxmayaraq, mütəxəssisləri peşəkardır".

A. Qeybulla son zamanlar Azərbaycanda da xarici ölkələrdə təhsil almış mütəxəssislərin sayının artdığını qeyd edib: "İndiyə kimi ancaq xaricdə həyata keçirilən bir çox əməliyyatların ölkəmizdə də həyata keçirilməsinə başlanılıb. Amma bu proses hələ yeni başlayıb, tam formalaşmayıb. Bəli, Azərbaycanda bir qrup var ki, onlar ölkə səhiyyəsinə inanmırlar. Bunlar məmurlar, yüksək gəlirli şəxslərdir. Onlar Azərbaycan səhiyyəsinə güvənmədikləri üçün xaricdə müalicə alırlar".

"Geniş əhali kütlələri arasında İrana gedənlərin sayı əvvəllər daha çox idi, indi xeyli azalıb. Çünki İranda da müalicə xərcləri bahalaşıb. Əvvəllər dollar ucuz idi, əhalinin gəlirləri çox idi. Rusiyadan gələn pul kütləsi var idi. Amma indi gəlirlər azalıb, dollar və müalicə bahalaşıb. Buna görə də İrana axın xeyli azalıb" — həkim vurğulayıb.

Müsahibimiz bildirir ki, əhalinin Azərbaycan səhiyyəsinə etibarının olmamasının bəzi səbəbləri var: "Azərbaycanda 20 ildən artıq qurulan səhiyyəyə, ona birbaşa cavabdeh olan məmurların inamı yoxdursa, əhalinin niyə olmalıdır? Biz bir millət olaraq, kənardakına üstünlük verənik. Bu, milli çatışmazlıqdır. Biz xarici mütəxəsislərə, xarici həkimlərə daha çox dəyər verir, özümüzünküləri dəyərləndirmirik. Bu, milli şüurun formalaşmamasından irəli gəlir. Düşünürəm ki, bu da zamanla aradan qalxacaq".

"Xeyli adamlar var ki, təhsilindən və harda təhsil almasından asılı olmayaraq, özlərini mütəxəssis elan edirlər. Bu gün reklam imkanları da geniş olduğu üçün hamı bundan istədiyi kimi istifadə edir. Bu gün ölkədə biliyi olmayan çox adam var ki, reklam sayəsində xeyli məşhurlaşıb. Biz mütəxəsislərə üstünlük verməliyik. Peşəkarlıqdan narazılıq məsələləri də var. Hazırda reklam imkanları geniş olduğu üçün xaricdə 3 aylıq kurs keçən mütəxəssis də özünü "uzman" adlandırır" — A. Qeybulla vurğulayıb.

Hüquqşünas Elnur Aslanovun sözlərinə görə, tibb işçiləri cinayət qanunvericiliyinin xüsusi subyekti qismində çıxış edirlər: "Yəni, onların peşə fəaliyyətindən irəli gələn cinayətləri törətməsi üçün müəyyən yaş həddinə çatması və anlaqlı olması kifayət etmir. Eyni zamanda, həmin şəxslərin spesifik təhsilə — tibb təhsilinə malik olmaları da mühüm amillərdəndir. Bu isə tibb sahəsinin hər bir istiqaməti üzrə spesifik bilik, vərdiş və müvafiq təhsili təsdiq edən sənədə malik olmasını şərtləndirir".

Hüquqşünas Elnur Aslanov
© Photo : Facebook / Elnur Aslanov
Hüquqşünas Elnur Aslanov

"Bu sahədə çalışan saxta diplomlu şəxslər isə Cinayət Məcəlləsinin 19-cu maddəsinə uyğun olaraq məsuliyyət daşıyırlar. Yəni, onların yetkinlik yaşına çatmaları və anlaqlı olmaları kifayət edir. Tibb sahəsində saxta diplomla çalışan şəxslərin və onlara belə diplomlar vermiş şəxslərin sonrakı taleyi Azərbaycan Respublikasının qanunvericiliyində aydın şəkildə göstərilib. Belə ki, saxta diplom verən şəxs Cinayət Məcəlləsinin 320.1-ci maddəsinə əsasən, hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və qanunsuz hazırlama, yaxud ya bu cür sənədi satma min manatdan üç min manatadək miqdarda cərimə və ya iki ilədək müddətə islah işləri və ya iki ilədək müddətə azadlıqdan məhrum etmə ilə cəzalandırılır" — ekspert bildirib.

Hüquqşünas deyir ki, bilə-bilə saxta diplomdan istifadə edərək çalışan şəxs 320.2-ci maddəyə əsasən iki yüz manatdan beş yüz manatadək miqdarda cərimə və ya iki yüz qırx saatdan üç yüz saatadək müddətə ictimai işlərlə və ya bir ilədək müddətə islah işləri və ya eyni müddətə azadlıqdan məhrum etmə ilə cəzalandırılır: "Digər tərəfdən, saxta diplomla fəaliyyət göstərən həkim həm də "peşə fəaliyyəti" ilə bağlı törətdiyi konkret cinayət əməlinə görə ayrıca məsuliyyət daşıyır".

E. Aslanovun dediyinə görə, söhbət təkcə saxta diplomun verilməsi və həmin diplomla çalışmaqdan getmir: "Həmçinin, işəgötürən müəssisənin vəzifəli şəxslərinin məsuliyyəti də nəzərdən qaçmamalıdır. Bu isə Səhiyyə Nazirliyinin daxili araşdırması çərçivəsində həyata keçirilir ki, əsas məsul struktur vahidi qismində Hüquq və Daxili Nəzarət sektoru çıxış edir".

"Korrupsiya və digər buna oxşar hallar meydana çıxdığı təqdirdə, sonrakı araşdırmanın aparılması üçün zəruri materiallar Baş Prokuror yanında Korrupsiyaya Qarşı Mübarizə Baş İdarəsinə təqdim olunmalıdır. Burada isə söhbət CM-nin 33-cü fəslində təsbit olunan cinayətlərin (məsələn, rüşvət alma, rüşvət vermə, vəzifə səlahiyyətlərini aşma, vəzifə səlahiyyətlərindən sui-istifadə etmə, vəzifə saxtakarlığı, səhlənkarlıq), habelə bununla əlaqədar olan digər ictimai-təhlükəli əməllərin araşdırılmasından gedir" — o bildirir.

1160
Teqlər:
Elnur Aslanov, tibb, Adil Qeybulla, xəstə, səhiyyə, həkim, Azərbaycan
Əlaqədar
Baş həkim: “Azərbaycan səhiyyəsi Almaniya səhiyyəsindən daha çox inkişaf edib”
Səhiyyədə yeni qayda: kim qazanacaq, kim itirəcək?
Səhiyyənin inkişafı müalicə üçün İrana gedənlərin sayına təsir edib
Səhiyyə naziri Şirvan Mərkəzi Rayon Xəstəxanasındadır
Bu gün səhiyyə işçilərinin peşə bayramıdır
Səhiyyə nazirliyi: İyun ayınadək hamilə qalmayın
Bakı metrosunda maska rejimi

Vəziyyət pisləşsə, tədbirlər sərtləşdiriləcək - Baş infeksionist

11
(Yenilənib 15:04 31.10.2020)
"Operativ Qərərgah tərəfindən epidemioloji situasiya nəzarətə götürülərək təhlil olunur və yoluxma dinamikasının daha da pisləşməsi baş verərsə, bu və ya digər adekvat qərarların qəbul olunması istisna olunmur"

Zülfiyyə Quluyeva, Sputnik Azərbaycan

BAKI, 31 oktyabr — Sputnik.  "Hazırda fəaliyyətinə icazə verilmiş qeyri-ərzaq təyinatlı ticarət mərkəzlərinin bağlanması məsələsi də karantin dövründə sərtləşdirmə tədbirlərindən biridir".

Bu sözləri Sputnik Azərbaycan-a açıqlamasında Səhiyyə Nazirliyinin Baş infeksionisti Təyyar Eyvazov bildirib. O qeyd edib ki, onlayn satışın həcminin artması koronavirus pandemiyası dövründə təqdirəlayiq hal hesab olunmalıdır:

"Bu tip ticarət həmin müəssisələrdə əhali sıxlığının və təmasların azalmasına, dolayısı yolla yoluxmaların dinamikasına təsir göstərir. Hazırkı epidemioloji durumda Nazirlər Kabineti yanında Operativ Qərərgah tərəfindən dövlət müəssisələrində ofislərdə çalışan işçilərin sayına məhdudiyyət qoyulub, bu özəl müəssisələr üçün də tövsiyə olunub, distant şəkildə işləməyə üstünlük verilir. Hazırda fəaliyyətinə icazə verilmiş qeyri-ərzaq təyinatlı ticarət mərkəzlərinin bağlanması məsələsi də karantin dövründə sərtləşdirmə tədbirlərindən biridir".

Baş infeksionist onu da əlavə edib ki, Operativ Qərərgah tərəfindən epidemioloji situasiya nəzarətə götürülərək təhlil olunur və yoluxma dinamikasının daha da pisləşməsi baş verərsə, bu və ya digər adekvat qərarların qəbul olunması istisna olunmur.

11
Teqlər:
Koronavirus, epidemiya, COVID-19
Əlaqədar
On rayon və şəhər sərt karantin rejimi zonasından çıxarılır
Qubada koronavirus xəstəsi yerlilərini təşvişə saldı
Vasif Əliyev: “Yenidən sərt karantin rejiminə keçilə bilər”
Koronavirus sağalır, fəsadları qalır
Azərbaycanda koronavirus xəstəsi yaşayış yerini icazəsiz tərk etdi
Körpə, arxiv şəkli

TƏBİB cəbhəyanı ərazilərdə yeni layihəyə başlayır

15
(Yenilənib 02:07 31.10.2020)
Dünyanı bürüyən pandemiya və müharibə şəraitində yeni doğulan körpələrin və anaların sağlamlığı bizim üçün prioritetdir

BAKI, 31 oktyabr - Sputnik. Tibbi Ərazi Bölmələrini İdarəetmə Birliyi (TƏBİB) cəbhəyanı bölgələrdə yeni layihəyə start verib.

Sputnik Azərbaycan-ın məlumatına görə, qurum cəbhə boyu bölgələrdə yerləşən riskli hamiləlik ilə qeydə alınan şəxslər üçün "Sağlam doğuş" layihəsini həyata keçirəcək.

"Bu gün TƏBİB-in tabeliyində olan tibb müəssisələri COVID-19 pandemiyası ilə mübarizə aparmaqla bərabər, ərazi bütövlüyümüzün bərpa olunmasında qəhrəmancasına döyüşərək yaralanmış əsgərlərimizə də yüksək keyfiyyətli tibbi xidmət göstərir. Mövcud vəziyyətdə diqqət ayıracağımız ən mühüm sahələrdən biri də antenatal xidmətdir. Dünyanı bürüyən pandemiya və müharibə şəraitində yeni doğulan körpələrin və anaların sağlamlığı bizim üçün prioritetdir", - deyə TƏBİB-in məlumatında bildirilir.
Layihə çərçivəsində cəbhəboyu ərazilərdə yaşayan, hamiləliyinin 38-ci həftəsində olan və riskli hamiləlik keçirən qadınlara müvafiq tibb müəssisələrində xidmətlərin göstərilməsi (riskli hamilələrin tibb müəssisəsində doğuşa qədər və 2 həftə doğuşdan sonra nəzarət altında saxlanılması), hamilələr üçün təlimlərin təşkili, ana südü ilə qidalandırmanın mühafizəsi, təşviqi və dəstəklənməsi, yenidoğulmuşa qulluq, analara psixoloji dəstəyin göstərilməsi nəzərdə tutulur.
“Sağlam doğuş” layihəsində iştirak etmək üçün cəbhəyanı rayonlarda yaşayan, riskli hamiləliyi olan şəxslərin TƏBİB-ə müraciət etməsi xahiş olunur. Qaynar xətt nömrəsi 1542-dir.

15
Əlaqədar
Biz şiddətli soyuqları görməmiş xəstəlik bizi "görə" bilər - yenidən qapanma mümkündür
TƏBİB-dən xəstələrə antibiotiklərlə bağlı xəbərdarlıq
Azərbaycanda koronavirusa yoluxma niyə artır?
Bölgə xəstəxanalarında tibb işçiləri arasında yoluxmalar artır
TƏBİB gənclərə xəbərdarlıq etdi
Gürcüstanda parlament seçkisi

Gürcüstanda parlament seçkiləri: Giorgi Qaxaria "ölkənin demokratik inkişafına" səs verib

0
Baş nazir: "Seçki kampaniyası demokratiyanın bütün tələblərinə cavab verib, bu səbəbdən demokratik dəyərlərə, ədalətə və iqtisadi cəhətdən güclü Qərb yönümlü dövlətə səs verdim".

BAKI, 31 oktyabr — Sputnik. Bu gün Gürcüstanda parlament seçkisi keçirilir. Sputnik Azərbaycan-ın RİA Novosti-yə istinadən yaydığı xəbər görə, səhər saatlarında səsvermədə iştirak edən qonşu ölkənin Baş naziri Giorgi Qaxaria ölkənin demokratik inkişafına səs verdiyini bildirib.

"Seçki kampaniyası demokratiyanın bütün tələblərinə cavab verib, bu səbəbdən demokratik dəyərlərə, ədalətə, iqtisadi cəhətdən güclü Qərb yönümlü dövlətə səs verdim", - deyə o bildirib.

"Bugün dünəndən qat-qat üstün olan Gürcüstana səs verdim və sabah bugünküdən daha yaxşı olacaq. Əlbəttə ki, heç kim keçmişə qayıtmağı xəyal edə bilməz, səsimi ölkənin gələcəyi üçün verdim", - deyə Baş nazir vurğulayıb.

Qeyd edək ki, Gürcüstanda budəfəki parlament seçkisi qarışıq seçki sistemi əsasında keçirilir: 150 yerdən 120-si partiyaların təqdim etdikləri siyahı əsasında, 30-u isə majoritar dairələr tərəfindən seçiləcək. Partiyalar üçün keçid həddi 1%-dir, majoritar namizədlərin səslərin 50%-dən çoxunu qazanması tələb olunur.

Səslərin 40%-dən çoxunu alacaq bir partiya müstəqil olaraq hökuməti qura biləcək.

Xatırladaq ki, Gürcüstanda 48 partiya və iki siyasi blok parlament yerləri uğrunda mübarizə aparır. Əsas rəqiblər hakim "Gürcü Arzusu" partiyası və başında keçmiş Prezident Mixail Saakaşvilinin durduğu birləşmiş müxalifəti təmsil edən Vahid Milli Hərəkatdır.

Azərbaycandan qonşu ölkədə seçkiləri müşahidə edən Milli Məclisin Azərbaycan-Gürcüstan parlamentlərarası işçi qrupunun rəhbəri Arzu Nağıyev jurnalistlərə açıqlamasında bildirib ki, onların olduğu dairələrdə hər hansı insident baş verməyib:

“Pandemiya şəraitinə baxmayaraq, seçici fəallığı müşahidə olunur. Seçki məntəqələrində koronavirus infeksiyasının yayılmaması üçün xüsusi qaydalara ciddi şəkildə əməl olunur”.

A.Nağıyev qeyd edib ki, deputatlığa namizədlər arasında Gürcüstan azərbaycanlılarının da yer alması mühüm əhəmiyyət kəsb edir.

Qrup rəhbəri Milli Məclis və Gürcüstanın yeni seçiləcək parlamenti arasında əməkdaşlığın davam etdiriləcəyini söyləyib: “Azərbaycan-Gürcüstan münasibətləri strateji tərəfdaşlıq xarakteri daşıyır. Parlamentlərarası əlaqələrin gələcəkdə də davam etdirilməsi və gücləndirilməsi nəzərdə tutulub”.

Qeyd edək ki, qonşu ölkədə keçirilən parlament seçkilərini Milli Məclisin 3 üzvü müşahidə edir.

0