Co Bayden, arxiv şəkli

Bayden Putinin "kuryerinə" çevrilir

97
(Yenilənib 18:55 09.06.2021)
Buleq bir tərəfdən yazır ki, Rusiya tamamilə tükənib, digər tərəfdən də ABŞ-ın xarici siyasətində Çinin deyil, məhz Rusiyanın prioritet olaraq qalmasının vacibliyini vurğulayır. "Tükənmiş" vəziyyətdə olan rəqibə görə narahat olmağa dəyərmi?

Qərbin "qırğı"ları çox həyəcanlıdırlar. Məsələ burasındadır ki, son illər ABŞ və Rusiya prezidentləri arasında keçirilən istənilən görüş onu pozmaq cəhdi və təxribatlarla müşayiət olunur. 2018-ci ildə Donald Trampla Vladimir Putinin Helsinki sammitinə bir neçə saat qalmış ABŞ-da Rusiya vətəndaşı Mariya Butinanın həbs olunuduğu barədə xəbərin yayılmasını yada salmaq kifayətdir. Yaxud Ukraynanın Buenos-Ayresdə G20 sammiti çərçivəsində keçirilməsi nəzərdə tutulan prezidentlərin görüşünü ləğv etmək üçün bəhanə kimi istifadə edilən Kerç boğazında törətdiyi təxribatı xatırlamaq olar.

RİA Novosti-nin analitiki Vladimir Kornilovun yazdığına görə, şübhə yoxdur ki, indi Putinlə Baydenin Cenevrə görüşü ərəfəsində bu görüşü pozmaq üçün olmasa belə, ən azından çətinləşdirmək, dözülməz fon yaratmaq üçün cəhdlər və təxribatlar olacaq.

Aydın məsələdir ki, hamıdan çox demokratların özlərinə və dörd illik prezidentlik dövründə Rusiya-pərəst olmaqda günahlandırdıqları Trampa edilən hücumlara görə daha çox amerikalı respublikaçılar canfəşanlıq edirlər. Bir vaxtlar bütün demokratik mətbuatın "Putinin marionetkası" adlandırdıqları senator Ted Kruz indi bundan zövq aldığını gizlətmədən hər yerdə Baydenin necə "Putinin, Rusiyanın və Amerikanın düşmənlərinin yatağına süründüyündən" dəm vurur.

Ancaq bir qisim insan da var ki, qarşıdakı sammitlə bağlı narahatlıq keçirərək əllərindən gələn hər şeyi edirlər ki, onun işini pozsunlar. Bu kateqoriyaya çoxsaylı "Rusiya üzrə ekspertlər və ya belə demək mümkündürsə, kremlenoloqlar aiddir.

Onlar hər belə görüşü özlərinə qarşı ekzistensial təhdid kimi qiymətləndirərək münasibətlərin yenidən qurulması fikrindən dəhşətə qapılırlar. Halbuki heç kim ABŞ və Rusiya arasındakı münasibətlərin yenidən qurulacağına inanmır (Sergey Lavrov demişkən, "o qədər problem yığılıb ki, onları həll edib başa çıxmaq asan olmayacq"), Qərb kremlenoloqları hətta münasibətlərdə hər hansı bir istiləşmə barədə eyhamdan belə qorxuya düşürlər.

Onlar gözlənilən görüş ətrafında dözülməz informasiya atmosferi yaratmaq cəhdində bir qədər də uzağa gedərək Trampın öz xarici siyasətini Baydenin indiki siyasətindən daha ağıllı şəkildə qurduğunu söyləməkdən belə çəkinmirlər.

Bu mənada "The Times"-da Britaniyanın əsas kremlenoloqu Edvard Lukasın ən son köşə yazısı daha çox diqqəti çəkir. Edvard Lukas uzun illər Qərb mətbuatında Rusiyaya qarşı "xaç yürüşü"nə liderlik edib.

O indi bəyan edir ki, Rusiyaya münasibətdə "Baydenin komandası Obama administrasiyasının səhvlərini təkrarlayır". Daha sonra Lukas son vaxtlara qədər Qərbin liberal mətbuatı üçün ağlasığmaz görünən açıqlamalar verir:

"Əksinə, belə təəssürat yaranır ki, Donald Tramp tutarlı xarici siyasətə sahib insan kimi öz dəyərini almayıb. O, Çinlə bağlı söylədiklərində haqlı idi. Almaniyanı müdafiəyə lazımı qədər vəsait ayırmamaqda, səriştəsizlikdə və bu işə təkəbbürlə yanaşmaqda qınayanda da ədalətli davranırdı. O, həmçinin ABŞ-ın Avropada hərbi mövcudluğunu da artırdı".

Və bütün bunları yazan bir müddət əvvəl Trampın Rusiyanın Qərbə qarşı mübarizəsində Putinin müttəfiqi olduğunu iddia edən şəxsdir.

Əgər Rusiyanı müntəzəm şəkildə tənqid edən şəxs Trampın dünya tarixindəki rolunu düşünməyə başlayıbsa, onun Cenevrə görüşündən əvvəl nə qədər qorxuya düşdüyünü anlamaq olar.

Kreml əleyhinə daha bir əbədi mübariz – ABŞ-ın Rusiyadakı keçmiş səfiri Maykl Makfol da həmkarının münasibətlərin yenidən qurulacağı ilə bağlı fərziyyəsindən duyduğu əndişəni bölüşür. Əlbəttə, amerikalı demokrat britaniyalı həmkarından fərqli olaraq Trampın ünvanına komplimentlər yağdırmır. Ancaq bu yaxınlarda "The Washington Post" üçün yazdığı köşə yazısında o, açıq-aşkar konfrontasiyaya çağırır:

"Baydenin məqsədi Rusiya ilə münasibətləri qaydaya salmaq deyil. Bayden və onun komandası bunun yerinə təhlükəsizlik, iqtisadiyyat və əldə etmək istədikləri dəyərlər üçün xüsusi hədəflərini müəyyənləşdirməli, daha sonra məyusluqlara hazırlıqlı olmalıdırlar".

Makfon MSNBC-yə müsahibəsində daha açıq danışır: Ümid edirəm ki, prezident Bayden Putinlə sabit və əvvəlcədən proqnozlaşdırıla bilən münasibətlərdən danışmayacaq. Ümid edirəm ki, belə bir şey baş verməz".

İstefada olan diplomat müntəzəm şəkildə Baydenin Cenevrədə Moskva ilə heç vəchlə yaxınlaşmayacağına, yalnız "sərt mesajlarla kifayətlənəcəyinə" ümid etdiyini bildirir.

Əgər özlərini "Rusiya üzrə ekspert" adlandıran şəxslərin açıqlamalarına nəzər salsaq, onların fikirlərinin üst-üstə düşdüyünü görərik. Fransız kremlenoloqu Britaniyanın "Çatem-xaus" mərkəzinin bu yaxınlarda açıqladığı qalmaqallı hesabatın müəlliflərindən biri, Rusiya ilə əbədi izolyasiyaya çağıran Metyi Buleq Cenevrə sammitinin mümkün yekunlarını proqnozlaşdıraraq açıq-aşkar yazır: "Əslində, hazırda Moskva ilə münasibətlərin normallaşmaması daha yaxşıdır".

O da münasibətlərin yenidən qurulmasına nifrətlə yanaşaraq belə hesab edir ki, Qərb siyasətçilərinin Moskva ilə yenidən danışıqlara başlamaq cəhdi onların yaddaşının zəifliyinə, eləcə də "keçmiş təcrübədən dərc çıxara bilməmək qabiliyyətinə dəlalət edir.

Buleq "Çatem-haus" hesabat xəttini davam etdirərək ruslarla açıq-aşkar əbədi konfrontasiya siyasətinə çağırış edir. O eyni məqalədə öz-özünü təkzib etdiyinin belə fərqində deyil. Bir tərəfdən yazır ki, Rusiya tamamilə tükənib, digər tərəfdən də ABŞ-ın xarici siyasətində Çinin deyil, məhz Rusiyanın prioritet olaraq qalmasının vacibliyini vurğulayır. "Tükənmiş" vəziyyətdə olan rəqibə görə narahat olmağa dəyərmi?".

Buleq bütün bu mülahizələrini Avropa Siyasətinin Təhlili Mərkəzinin (Center for European Policy Analysis– CEPA) saytında dərc edib. Bu mərkəz son vaxtlar Rusiya əleyhinə analitik materialların əsas istehsalçılarından birinə çevrilib.

Mərkəzin mütəxəssisləri son zamanlar açıq şəkildə "Rusiyanın nəzarət altında parçalanmasına" çağırış edirlər. Yuxarıda adı çəkilən Edvard Lukas da özünü həmin quruma aid hesab edir.

ABŞ-ın Ukrayna üzrə xüsusi nümayəndəsi, Donbas münaqişəsini qızışdırmaq üçün əlindən gələni əsirgəməyən Kurt Volker də həmin saytda aktiv şəkildə çıxış edir.

Cenevrə görüşünün mümkün yekunlarını analiz edən amerikalı da Baydenin komandasını münasibətlərin stabilləşdirilməsi və proqnozlaşdırıla bilən hal almasından çəkinərək, əksinə görüş ərəfəsində Rusiyaya qarşı yeni sərt sanksiyalar tətbiq etməyə çağırır.

Onun fikrincə, bu, "danışıqların güc mövqeyindən aparılması" mənasına gələr. Anlamaq olmur ki, yeni sanksiyalar tətbiq ediləcəksə, görüşün keçirilməsinə nə ehtiyac var? Sanki ABŞ indiyə kimi sammitlərsiz-filansız sanksiya tətbiq etməyib.

Öz vəzifəsinin münaqişələrdən çıxış yolu göstərmək deyil, onları qızışdırmaq olduğunu düşünən peşəkar kremlenoloqların məntiqi budur. Onlardan bir çoxunun (yaşca daha böyük olanlarının) yaddaşında 90-cı illərin "dəhşətləri" hələ də qalır. SSRİ-nin dağılmasından sonra, aralarında, həqiqətən, öz işinin peşəkarı olan insanların da yer aldığı Qərb sovetoloqlarının xeyli hissəsi işsiz qalmışdı. "Rus məsələsi" üzrə ixtisaslaşmış analitik mərkəzlərin fəaliyyəti məhdudlaşdırıldı və Sovet İttifaqı əleyhinə təbliğat azaldıldı. Beləliklə, onlardan çoxuna ehtiyac qalmadı və yaddan çıxdılar.

2014-cü ilin hadisələri mətbuatda və ekspert dairələrində Rusiya əleyhinə əhval-ruhiyyəni qızışdırmaq üzrə ixtisaslaşmış bu insanlara tələbatı yenidən artırdı. Beləliklə, kremlenoloqların intibah dövrü başladı ki, sızan xəbərlərə görə, onlar Böyük Britaniyanın Integrity Initiative institutunun layihələri kimi işlərdən heç də pis pul qazanmırlar.

Əlbəttə ki, bu cür layihələrdə iştirak edənlər hər hansı bir rahatlaşmanın qarşısını almaq üçün əllərindən gələni edəcəklər.

Düzdür, "Rusiya üzrə mütəxəssislərə" artan tələb nə Rusiya, nə də postsovet məkanı ilə heç bir əlaqəsi olmayan insanların da bu cərgəyə qoşulmasına gətirib çıxardı. Odessanın Krımda olduğuna inanan və ya Ukraynanı Krım körpüsünə raket zərbəsi endirməyə çağıran kremlinoloqlar belə peyda oldular.

Hətta onlardan biri (amerikalı köşə yazarı Tom Roqan) bir az da uzağa gedərək Baydenin "Rusiya prezidentinin kuryerinə çevrildiyindən" dəm vurmağa başlayıb. Daha bir amerikalı jurnalist Qlenn Qrinvald liberal mətbuatın Tramp barədə oxuduğu köhnə mahnını təkrarlamağa başlayıb: "Putinin əlində prezident Baydenə qarşı hansı kozırlar var: maddi, siyasi, yoxsa şəxsi? Sualın cavabını bilmirəm, amma burada qəribə nəsə baş verir". Yeni Qərb "analitikasının" səviyyəsi bax budur.

Yaxın günlərdə belə materiallardan hələ çox görəcəyik. Əlbəttə, mətbuatın Baydenə təzyiqinin səviyyəsi hələ "Raşaqeyt" məsələsi ətrafındakı Trampa qarşı isterika ilə müqayisə olunacaq həddə deyil. Ancaq münasibətlərimizdə eskalasiya səviyyəsinin azalmasına dair hər hansı bir eyham olarsa, onun get-gedə artacağına şübhə yoxdur.

Kremlinologiyanın getdikcə daha qrotesk formalar qazanmasına baxmayaraq, bu, özlərini mütəxəssis və jurnalist elan edənlərin böyük bir kateqoriyası üçün çox qazanclı işə çevrilib. Odur ki, belə bir perspektiv olsa belə, onlar heç vaxt münasibətlərdə gərginliyin azalmasını istəməyəcəklər.

97
 Pandemiya zamanı imtahan

Təhsil Tələbə Krediti Fondu tələbələr üçün əlçatan olacaqmı? - Araşdırma

804
(Yenilənib 21:38 18.06.2021)
Prezidentin Fərmanı ilə Təhsil Nazirliyinin tabeliyində Təhsil Tələbə Krediti Fondu yaradılacaq. Bəs o, tələbələrin təhsilə əlçatanlığını təmin edəcəkmi?

BAKI, 19 iyun — Sputnik. Dünən əhalinin aztəminatlı təbəqələrindən olan şəxslərin təhsilə əlçatanlığını təmin etmək, təhsil almaqda bərabər imkanlar yaratmaq və təhsilin əhatə dairəsini genişləndirmək məqsədilə Prezident İlham Əliyev "Azərbaycan Respublikası Təhsil Nazirliyinin tabeliyində Təhsil Tələbə Krediti Fondunun yaradılması və fəaliyyətinin təmin edilməsi ilə bağlı bir sıra tədbirlər haqqında" Fərman imzalayıb.

Bəs görəsən, yeni yaradılacaq Təhsil Tələbə Krediti Fondu təhsil haqqını ödəməkdə çətinlik çəkən tələbələr üçün əlçatan olacaqmı? Bu Fondun ali təhsil alan tələbələrə nə vəd etdiyini Sputnik Azərbaycan-a təhsil ekspertləri şərh ediblər.

Yeni yaradılacaq Təhsil Tələbə Krediti Fondu nə vəd edir?

Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov Sputnik Azərbaycan-a açıqlamasında bildirib ki, Təhsil Tələbə Krediti Fondunun yaradılması olduqca mütərəqqi, gənclərin təhsilə əlçatanlığının təmin olunmasına xidmət edən dövlət sənədidir. Onun sözlərinə görə, bu, dövlətin qayğısının təcəssümüdür:

"Bu Fond təhsil almaq istəyən, bunun üçün maddi imkanları zəif olan gənclərin təhsilinə dəstək missiyasını həyata keçirəcək. Eyni zamanda Təhsil Tələbə Krediti Fondunun yaradılması ilə bağlı beynəlxalq təcrübə öyrənilib. Ona görə də, Fondun tələbələrin təhsilinə dəstəyi hiss olunacaq. Bu Fond insanların təhsil arzusunun gerçəkləşdirilməsi məqsədilə yaradılıb. Təhsil Tələbə Krediti Fondu sosial baxımdan həssas ailələrin övladlarının təhsilinə dəstək olacaq. Güzəştli şərtlərlə təhsil kreditlərinin verilməsi onların ali təhsil alaraq savadlı insan kimi yetişməsinə, gələcəkdə özünün və ailəsinin maddi durumunun yaxşılaşdırılmasına imkan yaradacaq. Təhsil Tələbə Krediti Fondunun insan resursunun, insan kapitalının yaradılması baxımından böyük missiyası var".

Donor dövlətdirsə...

İ.Orucov deyir ki, aztəminatlı ailələrdə təhsil haqqının ödənilməsində yaranmış çətinlik bəzən gənclərin ali təhsil almasına mane olur. Tələbələrin bu Fondun imkanından bəhrələnməsi sayəsində onlar əmək bazarında özlərinə layiqli iş tapa biləcəklər.

Birlik sədri yeni yaradılacaq Təhsil Tələbə Krediti Fondunun büdcəsinin əsas hissəsinin dövlət büdcəsi hesabına maliyyələşməsinin də mühüm amil olduğunu söyləyir. Onun sözlərinə görə, dövlətin təhsil sahəsində donor kimi çıxış etməsi alqışlanandır. Həmsöhbətimiz bildirir ki, bu Fondun yaradılması ilə dövlət birbaşa tərəfdaş kimi çıxış edir.

Bəs köhnə "Maarifçi" Tələbə Kredit Fondu?

Qeyd edək ki, hazırda da Azərbaycanda tələbələrə təhsil kreditlərinin verilməsi ilə məşğul olan "Maarifçi" Tələbə Kredit Fondu fəaliyyət göstərir. Amma onların fəaliyyəti geniş tələbə kütləsini əhatə etmir. Odur ki bu gün ali məktəblərdə ödənişli əsaslarla təhsil alan tələbələrin bir hissəsi təhsil haqqını ödəməkdə çətinlik çəkir. Onların arasında məhz bu səbəbdən universiteti yarımçıq qoyanlar da az deyil. Haqqında bəhs etdiyimiz Fond Azərbaycanda 14 ali təhsil müəssisəsi ilə əməkdaşlıq edir.

Bunlar Azərbaycan Dillər Universiteti, Azərbaycan Dövlət Aqrar Universiteti, Azərbaycan Dövlət İqtisad Universiteti, Azərbaycan Dövlət Pedaqoji Universiteti, Azərbaycan Dövlət Mədəniyyət və İncəsənət Universiteti, Azərbaycan Dövlət Neft və Sənaye Universiteti, Azərbaycan Texniki Universiteti, Azərbaycan Memarlıq və İnşaat Universiteti, Bakı Dövlət Universiteti, Bakı Slavyan Universiteti, Gəncə Dövlət Universiteti, Lənkəran Dövlət Universiteti, Sumqayıt Dövlət Universiteti, Xəzər Universitetləridir.

Qaydalara görə, tələbələrə təhsil kreditlərinin ayrılması üçün "Maarifçi" Tələbə Kredit Fondunun əməkdaşlıq etdiyi universitetlərdən razılıqla bağlı təsdiq gəlməlidir. Həmçinin hazırda fəaliyyət göstərən "Maarifçi" Tələbə Kredit Fondunun təqdim etdiyi kreditlər üzrə müraciət edən tələbələr müəyyən tələblərə cavab verməlidirlər.

Tələblər ondan ibarətdir ki, tələbə Azərbaycan vətəndaşı olmalı, hazırda Fondun təsisçisi və ya tərəfdaşı olan ali təhsil müəssisələrinin birində təhsil almalı, təhsilini davam etdirməsi üçün maliyyə yardımına həqiqi ehtiyacı olmalı, valideynlərinin və özünün daha əvvəl aldığı kreditlər üzrə defolt hadisəsi baş verməməlidir. Bu tələblərdən savayı, hər bir elan sessiyası üzrə ayrıca xüsusi tələblər müəyyən olunur. Buraya valideynlərinin illik gəlir həddi, tələbənin yaşı, təhsil dərəcəsi, təhsil növü, kursu, ixtisası, Ümumi Orta Müvəffəqiyyət Göstəricisi (ÜOMG), Akademik borcun mövcudluğu da daxildir.

Bu tələblər seçim meyarı rolunu oynayır və Fond tərəfindən təqdim olunan kredit növləri və elan sessiyaları üzrə fərqlənə bilər. Bütün hallarda tələbənin müraciət zamanı yuxarıda qeyd olunan meyarlara cavab verdiyini təsdiq edən müvafiq sənədi təqdim etməsi şərtdir. Güzəştli kreditlərdən ailə başçısını itirmiş, valideynlərini itirmiş və valideyn himayəsindən məhrum olmuş şəxslər, sağlamlıq imkanları məhdud şəxslər yararlana bilərlər.

Həmçinin tələbə müraciət zamanı yuxarıda qeyd olunan meyarlara cavab verdiyini təsdiq edən müvafiq sənədi təqdim etməlidir. Fonddan onu da bildirdilər ki, tələbənin ümumi orta müvəffəqiyyət göstəricisinin 71 və ya daha yuxarı olması da şərtdir. Akademik borcu olanlar isə təhsil krediti üçün Fonda müraciət edə bilməzlər. Bununla yanaşı, tələbənin yaşı maksimum 25 olmalıdır. Amma hazırda Fond təhsil kreditlərinin verilməsini dayandırıb.

Məlumat üçün bildirək ki, bu gün təhsil naziri Emin Əmrullayev də "Maarifçi" Kredit Fondunun pilot layihə olduğunu qeyd edib: "Burada da mahiyyət eyni idi, amma fondun mexanizmi belə idi ki, kredit ali təhsil müəssisələrinin hesabına verilirdi. Orada təhsil alan tələbələr də az idi və bir neçə yüz nəfəri əhatə edirdi. "Maarifçi" Kredit Fondu bir müddət fəaliyyət göstərəcək, çünki tələbələr verilən kreditləri qaytarmalıdırlar", - deyə nazir bildirib.

Təhsil eksperti Kamran Əsədov Sputnik Azərbaycan-a açıqlamasında bildirib ki, yeni Fondun yaradılması ilə bağlı verilmiş Fərmana qədər Azərbaycanda tələbələrə güzəştli kreditlərin verilməsi mövcud olmayıb. Onun sözlərinə görə, "Maarifçi" Kredit Fondu müəyyən tələbələrə kredit verib. Lakin o da özəl təşkilat olduğu üçün büdcəsi yoxdur.

7 ildə 5 min tələbə təhsil haqqını ödəyə bilmədiyinə görə universitetlərdən xaric edilib

Ekspert bildirir ki, hələ 2013-cü ildə "Təhsilin İnkişafı üzrə Dövlət Strategiyası"nda Təhsil Tələbə Krediti Fondu yaradılması nəzərdə tutulub. Onun sözlərinə görə, bu səbəbdən son 7 il ərzində 5 mindən artıq tələbə təhsil haqqını ödəyə bilmədiyinə görə universitetlərdən xaric edilib.

K.Əsədov deyir ki, tələbə kreditləri üçün ayrılmış 80 milyon manat kifayət qədər yüksək məbləğdir və bu vəsait ildə 38-42 min tələbənin təhsil haqqını ödəməyə imkan verəcək. Ekspert bildirir ki, kreditlər faizsiz verilməlidir ki, sonra tələbələr problemli kredit alana çevrilməsin. Onun sözlərinə görə, gələcəkdə təhsil krediti ilə oxuyub ali məktəbi başa vuran tələbələr işlə də təmin edilməlidir ki, krediti geri qaytara bilsinlər.

Ekspert onu da qeyd edir ki, Avropa ölkələri və ABŞ, postsovet məkanından isə Rusiya, Ukrayna, Belarus, Qazaxıstan və Özbəkistan təhsil kreditləşməsini tətbiq edir:

"Məsələn, ABŞ-da bununla Federal Agentlik məşğul olur. Agentliyin çox böyük dövriyyəsi var. Kreditlər 3 növdür: federal tələbə krediti, valideyn krediti və özəl kredit. Hər biri müxtəlif qruplara və şərtlərlə verilir, faizlər çox aşağıdır. Dövlət yaxşı oxuyan tələbələr üçün bir sıra başqa güzəştlər də tətbiq edir. Bəzi ştatlarda təhsildə, elmdə yüksək nəticə əldə edən tələbələrə o kreditlər bağışlanır. Analoji qurumlar Almaniyada, Fransada, Böyük Britaniyada, Şərqi Avropa ölkələrində də var. Kreditlərin mənbəyi kimi adətən dövlət resursları çıxış edir, amma dövlətin stimullaşdırdığı özəl fondlar, banklar da bu prosesdə iştirak edə bilir.

Həmçinin universitetlərin özləri də kredit ayırırlar. Əksər ölkələrdə faizlər çox aşağı, müddət uzun olduğu üçün qaytarılmasında çətinlik yaratmır. Adətən kreditin qaytarılmasına universiteti bitirdikdən 2 il sonra başlanılır, 5, 7, 10 ilə, bəzən isə 30 ilədək müddətdə qaytarılır. Bütün dünyada təhsilin inkişaf etdirilməsində bu kreditlər böyük rol oynayır. Müsəlman ölkələrindən İndoneziya və Türkiyədə məhdud da olsa təhsil kreditləşməsi tətbiq olunmağa başlayıb. Avstraliyada təhsil kreditləri faizsiz verilir. Bəzi ölkələrdə isə faizlər yalnız texniki xərcləri örtəcək həcmdə, yəni 1-2 faiz civarında olur".

Təhsil Tələbə Kredit Fondu hansı şərtlərlə kredit verəcək?

Qeyd edək ki, təhsil naziri yeni yaradılacaq Təhsil Tələbə Kredit Fondunun fəaliyyəti ilə bağlı bəzi məqamlara aydınlıq gətirib. O bildirib ki, növbəti tədris ilindən ali təhsil alan tələbələrin böyük hissəsinin Təhsil Tələbə Kredit Fondu tərəfindən maliyyələşməsini təmin etmək mümkün olacaq. Nazir həmçinin deyib ki, kreditlər veriləndə ilkin mərhələdə giriş balları nəzərə alınacaq: "Yüksək nəticə göstərilməsi ilk şərt olacaq. Güzəştlərin edilməsi də nəzərdə tutulacaq. Bu kredit kommersiya məqsədi daşımır. Gələcəkdə müxtəlif mənbələrdən Fondun maliyyəsi artırıla bilər. Hər hansı səbəbdən götürülən kredit geri qaytarıla bilmədikdə tələbəyə möhlət hüququ da veriləcək. Kredit məbləği birbaşa tələbəyə deyil, ali təhsil aldığı müəssisəyə veriləcək".

Nazir onu da bildirib ki, sosial həssas ailələrdən olan tələbələrə verilən kreditlərin faiz dərəcəsi çox aşağı simvolik faizlərlə, yəni 1-2 faiz olacaq. Onun sözlərinə görə, Fondun məqsədi odur ki, daha çox insan, o cümlədən sosial qrupa aid olan ailələrdən insanlar ali təhsil almaq imkanı əldə etsin. E.Əmrullayev qeyd edib ki, bu Fond ali təhsilə əlçatanlığı artıracaq.

Qeyd edək ki, hazırda Azərbaycanın 54 ali təhsil müəssisəsində 182 minə yaxın tələbə təhsil alır. Onların 60 faizi öz vəsaiti hesabına, yəni, ödənişli əsaslarla, 40 faizi isə dövlət büdcəsi vəsaiti hesabına təhsil alır. Bu isə hazırda Azərbaycan ali təhsil müəssisələrində 110 minə yaxın şəxsin ödənişli əsaslarla təhsil aldığından xəbər verir.

Məlumat üçün əlavə edək ki, ötən gün Prezident İlham Əliyevin fərmanı ilə Təhsil Nazirliyinin tabeliyində Təhsil Tələbə Krediti Fondu yaradılıb. Fondun nizamnamə kapitalının məbləği 80 milyon manat təşkil edir. Fərmana əsasən, Fond təhsil tələbə kreditlərinin verilməsini təşkil edən qeyri-kommersiya hüquqi şəxsdir. Təhsil tələbə kreditinin məbləğinin yuxarı həddi hər tədris ili üçün təsdiq edilən tələbə qəbulunda nəzərdə tutulmuş ayrı-ayrı ixtisaslar üzrə ödənişli əsaslarla təhsilalana düşən illik təhsil haqlarının məbləğindən çox olmamalıdır.

804
Rusiya və ABŞ Prezidentləri Vladimir Putin və Co Bayden-in Cenevrədəki Villa La Grangedəki görüşü, 16 iyun 2021-ci il

Başlanğıc çox şey vəd edir: Putin-Bayden görüşündən sonra dünya siyasətində dəyişəcək

4148
(Yenilənib 23:27 17.06.2021)
Ekspertlərin fikrincə, Putin və Baydenin görüşündən sonra Avropa üçün Rusiya ilə dostluq etmək daha asan olacaq.

BAKI, 17 iyun — Sputnik. Sputnik, Nikita Çikunov. Dünən Rusiya və ABŞ prezidentlərinin Cenevrədə görüşü keçirilib. Hər iki lider görüşün nəticələrindən razı qalıblar. Bəs, danışıqlar ölkələr arasında yaxınlaşmaya və sanksiyaların yumşaldılmasına gətiribmi? İki liderin söhbəti Rusiyanın Avropa ilə münasibətlərinə necə təsir edəcək? Bu barədə Sputnik-in materialında.

Gələcəyə hesablanmış nəticələr

İyunun 16-da Cenevrədə Vladimir Putin və Co Bayden arasında keçirilmiş görüş iki ölkə arasındakı münasibətlərdə inqilabi dəyişikliklərə gətirmədi, lakin danışıqlar tam və dolğun dialoqun başlanğıcını qoya bilər. "Rissiya Seqodnya" BİA beynəlxalq multimedia mərkəzində sammitin nəticələrinə həsr olunmuş müzakirədə iştirak edən ekspertlər bu fikirdədilər.

Rusiya beynəlxalq məsələlər üzrə Şurasının (RBMŞ) baş direktoru Andrey Kortunovun fikrincə, prezidentlərin görüşünün vacib nəticəsi Rusiya və ABŞ-ın strateji silahlara nəzarətə sadiq olmaları barədə birgə bəyanatın olub.

"Strateji hücum silahları – 3" müqaviləsinin müddəti daha beş il uzadılmasına rəğmən, vaxt o qədər də çox deyil. Çox istərdik ki, tərəflər silahlara nəzarətə dair yeni model barədə razılığa gəlsinlər", — deyə o bildirib.

Ekspert onu da əlavə edib ki, ABŞ-ın qarşılıqlı məsləhətləşmələrin mövzuları sırasına kibertəhlükəsizlik problemini daxil etməsi də kifayət qədər əhəmiyyətli görünür. Əvvəllər bu cür fikirlərə Amerika tərəfi mənfi münasibət bəsləyirdi və Moskvanı heç bir sübut olmadan haker hücumlarında ittiham etməyə üstünlük verirdi.

Daha sonra Kortunov deyib ki, səfirlərin qarşılıqlı surətdə Moskva və Vaşinqtona qaytarılması da müəyyən nikbinlik doğurur. Lakin ekspert onu da qeyd edib ki, diplomatik münasibətlərin tam bərpası üçün bu kifayət deyil.

"Səfirlər bir növ "general"lardır. Amma istənilən generalların "ordusu" olmalıdır. Bu o deməkdir ki, hər halda səfirliklərin işini tam həcmdə bərpa etmək, diplomatları, konsulluq xidmətlərini qaytarmaq lazımdır", — deyə mütəxəssis bildirir.

Rusiya elmlər akademiyası ABŞ və Kanada İnstitutunun direktoru Valeri Qarbuzov hesab edir ki, Rusiya-ABŞ münasibətlərində çoxlu problem qalaqlanaraq qalıb və onlar elə ilk görüşdən sonra yoxa çıxmayacaq.

"Zirvə görüşü məsləhətləşmələrə, danışıqlara start verməlidir. Əgər işçi qruplar formalaşdırılsa, görüşlər başlasa və bütün bunları dövlət başçılarının telefon danışıqları və əyani görüşləri tamamlasa, o zaman dialoq bərpa olunacaq. Nəticələri artıq yaxın həftələr ərzində görəcəyik", — deyə ekspert proqoz verib.

Trampın getdiyi yolu təkrar etməmək

Qarbuzov hesab edir ki, Cenevrə sammiti qeyri-iradi olaraq Vladimir Putinlə Donald Tramp arasında 2018-ci ilin iyulunda – demək olar ki üç il əvvəl Helsinkidə keçirilən görüşlə müqayisə olunur.

"Trampla danışıqlardan da hamının çoxlu gözləntiləri vardı. Bəziləri bu görüşü hətta tarixi görüş hesab edirdilər. Söhbət xoş keçmişdi, hamının üzündə təbəssüm vardı. Nəticədə isə hər şey "qum dəryasında batdı". Cenevrədəki zirvə görüşü barədə də gələcəkdə eynilə bu cür danışmağı istəməzdim", — deyə ekspert fikirlərini bölüşüb.

Kortunov bildirir ki, bununla yanaşı, Putunlə görüşün kifayət qədər tez təşkil olunması Baydenin xeyrinədir. ABŞ-ın əvvəlki prezidenti Donald Trampa Rusiya lideri ilə ilk və son ayrıca görüşün keçirilməsi üçün il yarım vaxt lazım olmuşdu.

Qarbuzovun qənaətinə görə, daha bir fərq isə Bayden və Tramp administrasiyalarının Rusiya-ABŞ münasibətlərini müxtəlif cür qəbul etməsindədir.

"Ağ Evin hazırkı rəhbərliyi Rusiyaya qarşı "yeni" adlandırılan münasibətdən – seçmə əməkdaşlıqdan danışır. Bu ilişmək üçün çox yaxşı bir səbəbdir. Gələcək əməkdaşlığın əsas xətti silahlara nəzarət, strateji təhlükəsizlik problemləri ola bilər. Gələcəkdə gündəliyi genişləndirmək olar. Görüşün nəticələri əsasında tərəflərin imzaladığı bəyannamə çox şey vəd edən bir başlanğıcdır", — deyə ekspert bildirib.

Avropa, sanksiyalar və Ukrayna

Valeri Qarbuzovun fikrincə, ABŞ-Rusiya münasibətlərində hətta kiçik bir "istiləşmə" Vaşinqtonun avropalı müttəfiqlərinin anti-Rusiya ritorikasının zəifləməsini qaçılmaz edəcək. Odur ki, sammitin müsbət nəticələnməsi geosiyasi cəhətdən Moskva üçün sərfəlidir.

"Artıq Brüsseldə Rusiya ilə əməkdaşlıq tərəfdarları üçün bir qədər rahat olacaq. Çünki Aİ-nin nəzərləri istənilən halda Vaşinqtona yönəlir. Onlar ABŞ-ın Rusiyaya münasibətdə mövqeyini nəzərə alırlar. Hesab edirəm ki, Almaniya, İtaliya və Fransadakı həmkarlarımız üçün yeni təşəbbüslər irəli sürmək, Moskva ilə qarşılıqlı fəaliyyətə dair yeni formatlar təklif etmək Cenevrədəki görüşdən əvvəlkinə nisbətən daha asan olacaq", — deyə Kortunov həmsöhbəti ilə razılaşıb.

Ekspert həmçinin danışıqların işi 2014-cü ilin aprelində dayandırılmış Rusiya-NATO Şurasının işinin bərpa edilməsinə kömək edəcəyini də istisna etmir. Əlaqələrin bərpası Avropada təhlükəsizliyin möhkəmləndirilməsi üçün əlavə imkanlar yarada bilərdi.

RBMŞ-nin proqram direktoru İvan Timofeyev hesab edir ki, Rusiyaya qarşı Qərb sanksiyaları məsələsində heç bir dəyişiklik baş verməyəcək.

"ABŞ-ın heç bir sanksiyası yaxın vaxtlarda ləğv olunmayacaq. Bunun üçün zəmin yoxdur. Bir sıra sanksiyalar ABŞ qanunvericiliyində təsbit olunub. Bayden yalnız onların təsirini dayandıra bilər, necə ki, "Şimal axını-2" ilə bağlı oldu. Lakin ləğv edə bilməz. Düşünürəm ki, sanksiyalar yumşalmayacaq da. Amma yeni "əjdaha" tədbirlərin olacağını da gözləmək lazım deyil", — deyə o bildirib.

Kortunov isə bildirib ki, iki ölkənin liderləri yenə də bəzi vacib məsələlərə dair qarşılıqlı anlaşmaya nail ola bilmədilər. Ekspertin fikrincə, bu cür problemli mövzulardan biri Ukraynadır. Bu məsələdə tərəflərin baxışları ciddi şəkildə fərqlənir – hələ ki, tərəflərin mövqelərinin vəhdətinə ümid etmək mümkün deyil.

"Hər iki prezident bu mövzuya toxunub, lakin heç bir razılığa gəlmədilər. Ümumi bir anlaşma var ki, Minsk razılaşmalarına riayət olunmalıdır. Problem ondadır ki, həmin razılaşmalara riayət olunması Rusiya və ABŞ tərəfindən fərqli başa düşülür. Düstur təkrar olundu, lakin hər kəs öz fikrində qaldı. Ukrayna məsələsi qaldırılırdı, lakin bu istiqamətdə irəliləyiş əldə olunmadı", — deyə İvan Timofeyev fikrini tamamlayıb.

4148
Toyuq əti

Azərbaycana gətirilən 1,2 ton hind quşu dərisi yararsız çıxdı

0
Məhsulda patogen mikroorqanizm olan salmonella aşkar edilib. Aşkar olunmuş faktla bağlı qanunvericiliyin tələbləri çərçivəsində müvafiq qərar qəbul edilib və istehlak üçün yararsız 1.2 ton hind quşu dərisi məhsulunun satış şəbəkəsinə daxil olunmasının qarşısı alınıb.

BAKI, 19 iyun — Sputnik. Azərbaycan Qida Təhlükəsizliyi Agentliyinin (AQTA) həyata keçirdiyi nəzarət tədbirləri zamanı Türkiyədə fəaliyyət göstərən "Briterra Gida İç Ve Dış Ticaret Anonim Şirketi" tərəfindən istehsal olunan və "Ladess Group" MMC tərəfindən ölkəmizə idxal edilən hind quşu dərisi məhsuluna Agentliyin müfəttişləri tərəfindən baxış keçirib.

AQTA-dan Sputnik Azərbaycan-a verilən məlumata görə, baxış zamanı idxal olunan məhsullardan nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub.

Müayinələr nəticəsində məhsul partiyasında patogen mikroorqanizm olan salmonella aşkar edilib. Aşkar olunmuş faktla bağlı qanunvericiliyin tələbləri çərçivəsində müvafiq qərar qəbul edilib və istehlak üçün yararsız 1,2 ton hind quşu dərisi məhsulunun satış şəbəkəsinə daxil olunmasının qarşısı alınıb.

AQTA əhalinin sağlamlığının qorunması və təhlükəsiz qida məhsulları ilə təmin edilməsi istiqamətində ardıcıl tədbirlərini davam etdirir və istehlakçı hüquqlarının pozulmasına yönəlmiş qanunsuz halların qarşısının alınması istiqamətində müvafiq tədbirlər görüləcək.

0