ABŞ və Aİ bayraqları, arxiv şəkli

ABŞ, Rusiya Avropa Ukraynaya qarşı birləşdi

49
(Yenilənib 22:48 08.06.2021)
Energetika məsələləri üzrə icmalçı Sergey Savçuk Ukrayna dövləti ətrafında baş verən son prosesləri nəzərdən keçirib.

BAKI, 8 iyun — Sputnik. Dünən axşam Co Bayden axır ki, lütf eləyib ukraynalı həmkarı ilə telefonda danışdı. Son günlər Vladimir Zelenskinin Ağ Evin sahibi ilə onun Vladimir Putinlə görüşündən əvvəl şəxsən əlaqə yaratmaq üçün etmədiyi rüsvayçılıq qalmadı.

Düzdür, Amerika tərəfinin şərhinə əsasən, söhbət Ukraynanın suverenliyi və ərazi bütövlüyünü dəstəkləyən rəsmi ifadələrdən kənara çıxmayıb. Aydındır ki, Kiyev üçün ən vacib və ağrılı məsələdə də heç bir dəyişiklik baş verməyib.

"Şimal axını-2" qaz kəmərinin inşasının finişə yaxınlaşması barədə xəbər layihənin lap əvvəlindən onu istənilən yolla ləngitməyə çalışan Ukraynadan da yan keçmədi.

Kiyev sözügedən boru kəmərinin Ukrayna Qaz Nəqli Sisteminin (bundan sonra - UQNS) mövcudluğunu mənasız hala gətirəcəyini və ölkəni mavi yanacağın tranzitindən əldə etdiyi illik bir neçə milyard dollardan məhrum edəcəyini əsas gətirərək kollektiv Qərbi sonsuza qədər daha sərt sanksiyalar tətbiq etməyə çağırdı və indi də buna davam edir.

Bu məsələdə nəyin həqiqət, nəyin siyasi manipulyasiya olduğunu aydınlaşdırmağa ehtiyac var.

İşə UQNS-nin 2014-cü il dövlət çevrilişindən və ardınca baş vermiş bütün hadisələrdən sonra sistematik şəkildə öz əhəmiyyətini və dəyərini itirməsindən başlayaq. Üstəlik, yeni hökumət büdcənin zəmanətli valyuta mənbələrindən birinin qəsdən axırına çıxdı.

"Qazprom"-la "Naftoqaz"-ın 2019-cu ilin dekabrında bağladıqları sazişə əsasən, Rusiya keçən il bu kəmərlə 65 milyard, 2021-2024-cü illər arasında isə illik 40 milyard kubmetrə qədər mavi yanacaq ötürməli idi. Ukrayna həmin vaxt qələbəsini səs-küylə qeyd eləmişdi, çünki müqaviləyə "Ya ödə, ya da ötür" məcburi şərtini artırmağa nail olmuşdu. Bu şərt onu nəzərdə tuturdu ki, "Gazprom" hətta fiziki cəhətdən daha az mavi yanacaq nəql etsə belə, tranzit haqqını tam ödəməli idi.

2020-ci ildə Ukrayna ərazisindən cəmi 55,8 milyard kubmetr qaz ötürüldü. Bu son 30 ilin mütləq antirekordudur. Müqayisə üçün: 2009-cu ildə Ukraynadan keçməklə Avropa İttifaqına 120 milyard kubmetr mavi yanacaq ötürülmüşdü. Başqa sözlə, layihə gücü 140 milyard kubmetr olan UQNS hazırda boru kəməri və kompressor gücünün üçdə ikisi qədər geri qalır. Lakin bu mürəkkəblikdəki və uzunluqdakı texniki obyekt elə-belə dayandırıla bilməz, daimi qulluq, planlı profilaktik təmir və maddi vəsait tələb edir.

Və biz burada ikinci hissəyə keçid edirik. 2014-cü ildə "Naftoqaz"-ın rəhbəri Andrey Kobolyev UQNS-nin dəyərini 25-35 milyard dollar həcmində qiymətləndirdi. Həmin vaxt Kiyev var gücü ilə Avropa profil şirkətlərini səhm bloklarını satın alaraq pay əldə etməyə çağırdı.

Maraqlı tərəflər qismində Polşanın "PGNiG", İsveçrənin "AOT Energy", İtaliyanın "Snam S.p.A", Slovakiyanın "Eustream" və başqa şirkətlərin adları hallanırdı. Ancaq gözlənildiyi kimi Kiyev hakimiyyəti bu məsələdə də hamını aldatmağa cəhd göstərdi.

Avropalı oyunçular prinsipcə, UQNS-ni satın almağa və Rusiya qazının tranzitinin etibarlılığı məsələsinə birdəfəlik son qoymağa hazır idilər, lakin Kiyev təklif payını 49 faizlə məhdudlaşdıraraq nəzarət payını satmaqdan imtina etdi. Nəticədə, alıcıların tam şəkildə iştirak etməməsi səbəbindən bütün tenderlər uğursuzluğa düçar oldu.

Vaxt isə heç də UQNS-nin xeyrinə işləmirdi. 2018-ci ildə yenə həmin Kobolev milli qaz nəqliyyatı sisteminin dəyərini artıq 14 milyard dollar olaraq qiymətləndirdi. 2019-cu ildə tranzitin uzadılması məsələsi bıçaq kimi sümüyə dirənəndə isə ana şirkətin bölünməsi nəticəsində yaranan və yalnız tranzitdən məsul olan layihə operatoru "Ukrtransgaz"-ın dəyəri cəmi 1,45 milyard təşkil edirdi. Bu rəqəm təsadüfən ortaya çıxmadı. Kiyev Böyük Britaniyanın "Ernst & Young" konsaltinq şirkətini məxsusi olaraq audit və qiymətləndirmə aparmaq üçün dəvət etmişdi.

Köhnə qaydanın açıq şəkildə nümayişi: "Bir məhsulun qiyməti müştərinin onun üçün ödəməyə hazır olduğu qədərdir".

Kiyevin mövcud vəziyyəti və gələcək perspektivləri anlamadığını düşünmək lazım deyil. Vladimir Putinin qaz kəmərinin ilk qolunun döşənməsinin başa çatmaq üzrə olduğunu elan etməsindən bircə gün sonra Ukrayna prezidenti informasiya nəhəngi HBO-nun strukturuna daxil olan "Axios"-un jurnalistinə müsahibə verdi. Bu müsahibədə Vladimir Zelenski ABŞ-ın Moskvaya tətbiq etdiyi sanksiya təzyiqindən imtina etdiyindən, UQNS-yə pul yatırmadığından və ümumilikdə bunun Ukraynanın təhlükəsizliyi və mənafeyinə birbaşa təhdid olduğundan şikayətləndi.

Bundan başqa, cənab Zelenski sələfi ilə birlikdə Ukraynanı qəsdən sürüklədikləri girdabın dərinliyini anlayaraq praktiki olaraq NATO-dan Ukraynanı dərhal öz quruluşuna qəbul etməsini tələb etdi. Zelenskinin nitqinin təfsiri üçün onun diplomatik korpusu tərəfindən hazırlanan bütün bəlağətli ifadələrə baxmayaraq, faktiki olaraq bu, Rusiya ilə təməl qarşıdurmada tam fiyaskonun etirafı idi. Küçə dili ilə desək, Qərb tərəfdaşları Ukraynaya "atdılar".

Vladimir Zelenski mövcud vəziyyətin ilkin şərtləri və ən əsası, bundan sonra nə olacağı barədə susur. Onun sükutu başa düşüləndir: ikinci müddətə yenidən seçilmək istəyir.

Açıq danışa bilərik axı...

Moskva ilə Kiyev arasındakı münasibətlər ABŞ tərəfindən ilham verilən və maliyyələşdirilən axırıncı Maydan hadisələrindən sonra kəskin şəkildə pisləşdi.

ABŞ mediasının qiymətləndirməsinə görə, bundan sonra yaşanan xaos dövründə hakimiyyətdəki demokratlar ən azı 6 milyard dolları Ukrayna vasitəsilə "yudular". Elə həmin vaxt "Burisma" qaz şirkətinin həvalə olunduğu gələcək demokrat-prezidentin oğlu Hanter Bayden orada peyda oldu.

Baydenlə (oğul) yanaşı, Kiyevə məsləhətçilərin effektli hücum qüvvəsi də gəldi ki, onlar da Ukrayna hakimiyyətinin praktiki olaraq bütün səviyyələrinə nüfuz etməyə başladılar.

Amerikalı mütəxəssislər enerji sektoruna və Avropaya qaz tranziti məsələlərinə xüsusi diqqət yetirirlər.

Xatırladaq ki, Vladimir Zelenskinin andiçmə mərasimində ABŞ-ı o zamankı energetika naziri Pik Perri təmsil edirdi. Bu gün ABŞ-ın yeni demokrat-prezidenti var və Ukrayna üçün yeddi il bundan əvvəl yazılmış ssenari gözümüzün qarşısındaca reallaşdırılmağa davam edir. Bunu görmək üçün yalnız yaxşı yaddaşa malik olmaq və faktları yerinə qoymağı bacarmaq kifayətdir.

UQNS hələ də amerikalıların marağındadır. Yalnız bir sadə səbəbdən ki, "Şimal axını-2" tam gücü ilə işləməyə başlayanda Ukrayna tranzit kəməri öz əhəmiyyətini və aktuallığını itirməsin.

Hollandiya tərəfinin verdiyi rəsmi məlumata görə, artıq bu ilin yay aylarında Qroninhen hövzəsi daxilində təbii qaz istehsalı tamamilə dayandırılacaq, başqa sözlə, Avropa bir dəfə əlini yelləməklə Hollandiyanın şimalından tədarük olunan 25 milyard kubmetr qaz əldən çıxacaq.

Belə böyük qaz həcmini yalnız bir şərtlə əvəzləmək mümkündür - Ukrayna tranziti də daxil olmaqla, Rusiyadan qaz tədarükünü saxlamaq və artırmaqla. Vaşinqtondan təsirlənən Kiyev Avropa operatorlarının boru kəmərinə daxil olmasına icazə vermədi, eyni zamanda, Rusiya ilə bağlı bütün məsələlərdə danışıq aparmaq üçün yararsız olduğunu inandırıcı şəkildə sübut etdi.

2021-ci ilin iyun ayındayıq, anomal temperaturun müşahidə olunmadığı adi yay fəslidir. Bununla belə, Avropada təbii qazın qiyməti sabit şəkildə min kubmetr üçün 300 dollardan aşağı düşmür. Bu rekord olmasa da, kifayət qədər yüksək rəqəmdir. Oktyabrın 15-də Avropada növbəti istilik mövsümü başlayanda mavi yanacağın qiymətinin nə qədər olacağını proqnozlaşdırmağa heç kim cəsarət eləmir, ancaq mütəxəssislər bu fikirdədirlər ki, dünya iqtisadiyyatının pandemiyadan sonrakı bərpa ilində qiymətlər kifayət qədər yüksək olacaq.

İndi isə sadəcə hadisələri sıra ilə düzək: Kiyevdəki çevriliş, Ukrayna prezidentinin andiçmə mərasimində enerji nazirinin iştirakı, bütün səviyyələrdə amerikalı məsləhətçilər, avropalı oyunçuların Ukrayna tranzitinə buraxılmaması, UQNS-nin tədricən dəyərini itirməsi Co Baydenin Rusiyanın ildırım sürəti ilə inşasını başa çatdırmağa çalışdığı "Şimal axını-2"-yə qarşı yeni sanksiyalardan imtina etməsi...

İyunun 16-da Cenevrədə Rusiya və Amerika prezidentlərinin görüşü keçiriləcək. Heç şübhəsiz ki, görüşdə Ukrayna və Avropaya qaz tədarükü məsələlərinə də toxunulacaq. Gəlin, belə mülahizə yürüdək ki, Baydenin sanksiyalarla bağlı tərəddüdü çox güman, dialoqa dəvət xarakteri daşıyır.

Əgər ABŞ Ukrayna tranziti məsələsini sxemdən çıxarsa və qaz tədarükünə bilavasitə nəzarəti ələ alsa, onda Vaşinqton nəinki Avropa İttifaqının siyasətinə birbaşa nəzarət edə biləcək, həm də kifayət qədər gəlir əldə edəcək.

Əlbəttə ki, bu, yalnız bir fərziyyədir, lakin belə bir sxem hamıya tamamilə sərf edir. Rusiya üçün ona görə əlverişlidir ki, Avropa bazarına giriş üçün maneələr aradan qaldırılar. Avropa İttifaqı üçün ona görə sərfəlidir ki, "Qroninhen"-in bağlanması fonunda öz fabrik və qazanxanalarını yanacaqla təmin edə bilər. Və ABŞ-a ona görə əl verir ki, layihəni tamamilə batıra bilməsə də, diplomatik balanslaşdırma hərəkəti sayəsində yaxşı maliyyə və geosiyasi dividentlər qazanar.

Bu strategiyanın reallaşmasında Ukrayna yalnız itirən tərəf olacaq. Ancaq bu, onun şüurlu tarixi seçimidir.

49
 Pandemiya zamanı imtahan

Təhsil Tələbə Krediti Fondu tələbələr üçün əlçatan olacaqmı? - Araşdırma

1064
(Yenilənib 21:38 18.06.2021)
Prezidentin Fərmanı ilə Təhsil Nazirliyinin tabeliyində Təhsil Tələbə Krediti Fondu yaradılacaq. Bəs o, tələbələrin təhsilə əlçatanlığını təmin edəcəkmi?

BAKI, 19 iyun — Sputnik. Dünən əhalinin aztəminatlı təbəqələrindən olan şəxslərin təhsilə əlçatanlığını təmin etmək, təhsil almaqda bərabər imkanlar yaratmaq və təhsilin əhatə dairəsini genişləndirmək məqsədilə Prezident İlham Əliyev "Azərbaycan Respublikası Təhsil Nazirliyinin tabeliyində Təhsil Tələbə Krediti Fondunun yaradılması və fəaliyyətinin təmin edilməsi ilə bağlı bir sıra tədbirlər haqqında" Fərman imzalayıb.

Bəs görəsən, yeni yaradılacaq Təhsil Tələbə Krediti Fondu təhsil haqqını ödəməkdə çətinlik çəkən tələbələr üçün əlçatan olacaqmı? Bu Fondun ali təhsil alan tələbələrə nə vəd etdiyini Sputnik Azərbaycan-a təhsil ekspertləri şərh ediblər.

Yeni yaradılacaq Təhsil Tələbə Krediti Fondu nə vəd edir?

Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov Sputnik Azərbaycan-a açıqlamasında bildirib ki, Təhsil Tələbə Krediti Fondunun yaradılması olduqca mütərəqqi, gənclərin təhsilə əlçatanlığının təmin olunmasına xidmət edən dövlət sənədidir. Onun sözlərinə görə, bu, dövlətin qayğısının təcəssümüdür:

"Bu Fond təhsil almaq istəyən, bunun üçün maddi imkanları zəif olan gənclərin təhsilinə dəstək missiyasını həyata keçirəcək. Eyni zamanda Təhsil Tələbə Krediti Fondunun yaradılması ilə bağlı beynəlxalq təcrübə öyrənilib. Ona görə də, Fondun tələbələrin təhsilinə dəstəyi hiss olunacaq. Bu Fond insanların təhsil arzusunun gerçəkləşdirilməsi məqsədilə yaradılıb. Təhsil Tələbə Krediti Fondu sosial baxımdan həssas ailələrin övladlarının təhsilinə dəstək olacaq. Güzəştli şərtlərlə təhsil kreditlərinin verilməsi onların ali təhsil alaraq savadlı insan kimi yetişməsinə, gələcəkdə özünün və ailəsinin maddi durumunun yaxşılaşdırılmasına imkan yaradacaq. Təhsil Tələbə Krediti Fondunun insan resursunun, insan kapitalının yaradılması baxımından böyük missiyası var".

Donor dövlətdirsə...

İ.Orucov deyir ki, aztəminatlı ailələrdə təhsil haqqının ödənilməsində yaranmış çətinlik bəzən gənclərin ali təhsil almasına mane olur. Tələbələrin bu Fondun imkanından bəhrələnməsi sayəsində onlar əmək bazarında özlərinə layiqli iş tapa biləcəklər.

Birlik sədri yeni yaradılacaq Təhsil Tələbə Krediti Fondunun büdcəsinin əsas hissəsinin dövlət büdcəsi hesabına maliyyələşməsinin də mühüm amil olduğunu söyləyir. Onun sözlərinə görə, dövlətin təhsil sahəsində donor kimi çıxış etməsi alqışlanandır. Həmsöhbətimiz bildirir ki, bu Fondun yaradılması ilə dövlət birbaşa tərəfdaş kimi çıxış edir.

Bəs köhnə "Maarifçi" Tələbə Kredit Fondu?

Qeyd edək ki, hazırda da Azərbaycanda tələbələrə təhsil kreditlərinin verilməsi ilə məşğul olan "Maarifçi" Tələbə Kredit Fondu fəaliyyət göstərir. Amma onların fəaliyyəti geniş tələbə kütləsini əhatə etmir. Odur ki bu gün ali məktəblərdə ödənişli əsaslarla təhsil alan tələbələrin bir hissəsi təhsil haqqını ödəməkdə çətinlik çəkir. Onların arasında məhz bu səbəbdən universiteti yarımçıq qoyanlar da az deyil. Haqqında bəhs etdiyimiz Fond Azərbaycanda 14 ali təhsil müəssisəsi ilə əməkdaşlıq edir.

Bunlar Azərbaycan Dillər Universiteti, Azərbaycan Dövlət Aqrar Universiteti, Azərbaycan Dövlət İqtisad Universiteti, Azərbaycan Dövlət Pedaqoji Universiteti, Azərbaycan Dövlət Mədəniyyət və İncəsənət Universiteti, Azərbaycan Dövlət Neft və Sənaye Universiteti, Azərbaycan Texniki Universiteti, Azərbaycan Memarlıq və İnşaat Universiteti, Bakı Dövlət Universiteti, Bakı Slavyan Universiteti, Gəncə Dövlət Universiteti, Lənkəran Dövlət Universiteti, Sumqayıt Dövlət Universiteti, Xəzər Universitetləridir.

Qaydalara görə, tələbələrə təhsil kreditlərinin ayrılması üçün "Maarifçi" Tələbə Kredit Fondunun əməkdaşlıq etdiyi universitetlərdən razılıqla bağlı təsdiq gəlməlidir. Həmçinin hazırda fəaliyyət göstərən "Maarifçi" Tələbə Kredit Fondunun təqdim etdiyi kreditlər üzrə müraciət edən tələbələr müəyyən tələblərə cavab verməlidirlər.

Tələblər ondan ibarətdir ki, tələbə Azərbaycan vətəndaşı olmalı, hazırda Fondun təsisçisi və ya tərəfdaşı olan ali təhsil müəssisələrinin birində təhsil almalı, təhsilini davam etdirməsi üçün maliyyə yardımına həqiqi ehtiyacı olmalı, valideynlərinin və özünün daha əvvəl aldığı kreditlər üzrə defolt hadisəsi baş verməməlidir. Bu tələblərdən savayı, hər bir elan sessiyası üzrə ayrıca xüsusi tələblər müəyyən olunur. Buraya valideynlərinin illik gəlir həddi, tələbənin yaşı, təhsil dərəcəsi, təhsil növü, kursu, ixtisası, Ümumi Orta Müvəffəqiyyət Göstəricisi (ÜOMG), Akademik borcun mövcudluğu da daxildir.

Bu tələblər seçim meyarı rolunu oynayır və Fond tərəfindən təqdim olunan kredit növləri və elan sessiyaları üzrə fərqlənə bilər. Bütün hallarda tələbənin müraciət zamanı yuxarıda qeyd olunan meyarlara cavab verdiyini təsdiq edən müvafiq sənədi təqdim etməsi şərtdir. Güzəştli kreditlərdən ailə başçısını itirmiş, valideynlərini itirmiş və valideyn himayəsindən məhrum olmuş şəxslər, sağlamlıq imkanları məhdud şəxslər yararlana bilərlər.

Həmçinin tələbə müraciət zamanı yuxarıda qeyd olunan meyarlara cavab verdiyini təsdiq edən müvafiq sənədi təqdim etməlidir. Fonddan onu da bildirdilər ki, tələbənin ümumi orta müvəffəqiyyət göstəricisinin 71 və ya daha yuxarı olması da şərtdir. Akademik borcu olanlar isə təhsil krediti üçün Fonda müraciət edə bilməzlər. Bununla yanaşı, tələbənin yaşı maksimum 25 olmalıdır. Amma hazırda Fond təhsil kreditlərinin verilməsini dayandırıb.

Məlumat üçün bildirək ki, bu gün təhsil naziri Emin Əmrullayev də "Maarifçi" Kredit Fondunun pilot layihə olduğunu qeyd edib: "Burada da mahiyyət eyni idi, amma fondun mexanizmi belə idi ki, kredit ali təhsil müəssisələrinin hesabına verilirdi. Orada təhsil alan tələbələr də az idi və bir neçə yüz nəfəri əhatə edirdi. "Maarifçi" Kredit Fondu bir müddət fəaliyyət göstərəcək, çünki tələbələr verilən kreditləri qaytarmalıdırlar", - deyə nazir bildirib.

Təhsil eksperti Kamran Əsədov Sputnik Azərbaycan-a açıqlamasında bildirib ki, yeni Fondun yaradılması ilə bağlı verilmiş Fərmana qədər Azərbaycanda tələbələrə güzəştli kreditlərin verilməsi mövcud olmayıb. Onun sözlərinə görə, "Maarifçi" Kredit Fondu müəyyən tələbələrə kredit verib. Lakin o da özəl təşkilat olduğu üçün büdcəsi yoxdur.

7 ildə 5 min tələbə təhsil haqqını ödəyə bilmədiyinə görə universitetlərdən xaric edilib

Ekspert bildirir ki, hələ 2013-cü ildə "Təhsilin İnkişafı üzrə Dövlət Strategiyası"nda Təhsil Tələbə Krediti Fondu yaradılması nəzərdə tutulub. Onun sözlərinə görə, bu səbəbdən son 7 il ərzində 5 mindən artıq tələbə təhsil haqqını ödəyə bilmədiyinə görə universitetlərdən xaric edilib.

K.Əsədov deyir ki, tələbə kreditləri üçün ayrılmış 80 milyon manat kifayət qədər yüksək məbləğdir və bu vəsait ildə 38-42 min tələbənin təhsil haqqını ödəməyə imkan verəcək. Ekspert bildirir ki, kreditlər faizsiz verilməlidir ki, sonra tələbələr problemli kredit alana çevrilməsin. Onun sözlərinə görə, gələcəkdə təhsil krediti ilə oxuyub ali məktəbi başa vuran tələbələr işlə də təmin edilməlidir ki, krediti geri qaytara bilsinlər.

Ekspert onu da qeyd edir ki, Avropa ölkələri və ABŞ, postsovet məkanından isə Rusiya, Ukrayna, Belarus, Qazaxıstan və Özbəkistan təhsil kreditləşməsini tətbiq edir:

"Məsələn, ABŞ-da bununla Federal Agentlik məşğul olur. Agentliyin çox böyük dövriyyəsi var. Kreditlər 3 növdür: federal tələbə krediti, valideyn krediti və özəl kredit. Hər biri müxtəlif qruplara və şərtlərlə verilir, faizlər çox aşağıdır. Dövlət yaxşı oxuyan tələbələr üçün bir sıra başqa güzəştlər də tətbiq edir. Bəzi ştatlarda təhsildə, elmdə yüksək nəticə əldə edən tələbələrə o kreditlər bağışlanır. Analoji qurumlar Almaniyada, Fransada, Böyük Britaniyada, Şərqi Avropa ölkələrində də var. Kreditlərin mənbəyi kimi adətən dövlət resursları çıxış edir, amma dövlətin stimullaşdırdığı özəl fondlar, banklar da bu prosesdə iştirak edə bilir.

Həmçinin universitetlərin özləri də kredit ayırırlar. Əksər ölkələrdə faizlər çox aşağı, müddət uzun olduğu üçün qaytarılmasında çətinlik yaratmır. Adətən kreditin qaytarılmasına universiteti bitirdikdən 2 il sonra başlanılır, 5, 7, 10 ilə, bəzən isə 30 ilədək müddətdə qaytarılır. Bütün dünyada təhsilin inkişaf etdirilməsində bu kreditlər böyük rol oynayır. Müsəlman ölkələrindən İndoneziya və Türkiyədə məhdud da olsa təhsil kreditləşməsi tətbiq olunmağa başlayıb. Avstraliyada təhsil kreditləri faizsiz verilir. Bəzi ölkələrdə isə faizlər yalnız texniki xərcləri örtəcək həcmdə, yəni 1-2 faiz civarında olur".

Təhsil Tələbə Kredit Fondu hansı şərtlərlə kredit verəcək?

Qeyd edək ki, təhsil naziri yeni yaradılacaq Təhsil Tələbə Kredit Fondunun fəaliyyəti ilə bağlı bəzi məqamlara aydınlıq gətirib. O bildirib ki, növbəti tədris ilindən ali təhsil alan tələbələrin böyük hissəsinin Təhsil Tələbə Kredit Fondu tərəfindən maliyyələşməsini təmin etmək mümkün olacaq. Nazir həmçinin deyib ki, kreditlər veriləndə ilkin mərhələdə giriş balları nəzərə alınacaq: "Yüksək nəticə göstərilməsi ilk şərt olacaq. Güzəştlərin edilməsi də nəzərdə tutulacaq. Bu kredit kommersiya məqsədi daşımır. Gələcəkdə müxtəlif mənbələrdən Fondun maliyyəsi artırıla bilər. Hər hansı səbəbdən götürülən kredit geri qaytarıla bilmədikdə tələbəyə möhlət hüququ da veriləcək. Kredit məbləği birbaşa tələbəyə deyil, ali təhsil aldığı müəssisəyə veriləcək".

Nazir onu da bildirib ki, sosial həssas ailələrdən olan tələbələrə verilən kreditlərin faiz dərəcəsi çox aşağı simvolik faizlərlə, yəni 1-2 faiz olacaq. Onun sözlərinə görə, Fondun məqsədi odur ki, daha çox insan, o cümlədən sosial qrupa aid olan ailələrdən insanlar ali təhsil almaq imkanı əldə etsin. E.Əmrullayev qeyd edib ki, bu Fond ali təhsilə əlçatanlığı artıracaq.

Qeyd edək ki, hazırda Azərbaycanın 54 ali təhsil müəssisəsində 182 minə yaxın tələbə təhsil alır. Onların 60 faizi öz vəsaiti hesabına, yəni, ödənişli əsaslarla, 40 faizi isə dövlət büdcəsi vəsaiti hesabına təhsil alır. Bu isə hazırda Azərbaycan ali təhsil müəssisələrində 110 minə yaxın şəxsin ödənişli əsaslarla təhsil aldığından xəbər verir.

Məlumat üçün əlavə edək ki, ötən gün Prezident İlham Əliyevin fərmanı ilə Təhsil Nazirliyinin tabeliyində Təhsil Tələbə Krediti Fondu yaradılıb. Fondun nizamnamə kapitalının məbləği 80 milyon manat təşkil edir. Fərmana əsasən, Fond təhsil tələbə kreditlərinin verilməsini təşkil edən qeyri-kommersiya hüquqi şəxsdir. Təhsil tələbə kreditinin məbləğinin yuxarı həddi hər tədris ili üçün təsdiq edilən tələbə qəbulunda nəzərdə tutulmuş ayrı-ayrı ixtisaslar üzrə ödənişli əsaslarla təhsilalana düşən illik təhsil haqlarının məbləğindən çox olmamalıdır.

1064
Rusiya və ABŞ Prezidentləri Vladimir Putin və Co Bayden-in Cenevrədəki Villa La Grangedəki görüşü, 16 iyun 2021-ci il

Başlanğıc çox şey vəd edir: Putin-Bayden görüşündən sonra dünya siyasətində dəyişəcək

4148
(Yenilənib 23:27 17.06.2021)
Ekspertlərin fikrincə, Putin və Baydenin görüşündən sonra Avropa üçün Rusiya ilə dostluq etmək daha asan olacaq.

BAKI, 17 iyun — Sputnik. Sputnik, Nikita Çikunov. Dünən Rusiya və ABŞ prezidentlərinin Cenevrədə görüşü keçirilib. Hər iki lider görüşün nəticələrindən razı qalıblar. Bəs, danışıqlar ölkələr arasında yaxınlaşmaya və sanksiyaların yumşaldılmasına gətiribmi? İki liderin söhbəti Rusiyanın Avropa ilə münasibətlərinə necə təsir edəcək? Bu barədə Sputnik-in materialında.

Gələcəyə hesablanmış nəticələr

İyunun 16-da Cenevrədə Vladimir Putin və Co Bayden arasında keçirilmiş görüş iki ölkə arasındakı münasibətlərdə inqilabi dəyişikliklərə gətirmədi, lakin danışıqlar tam və dolğun dialoqun başlanğıcını qoya bilər. "Rissiya Seqodnya" BİA beynəlxalq multimedia mərkəzində sammitin nəticələrinə həsr olunmuş müzakirədə iştirak edən ekspertlər bu fikirdədilər.

Rusiya beynəlxalq məsələlər üzrə Şurasının (RBMŞ) baş direktoru Andrey Kortunovun fikrincə, prezidentlərin görüşünün vacib nəticəsi Rusiya və ABŞ-ın strateji silahlara nəzarətə sadiq olmaları barədə birgə bəyanatın olub.

"Strateji hücum silahları – 3" müqaviləsinin müddəti daha beş il uzadılmasına rəğmən, vaxt o qədər də çox deyil. Çox istərdik ki, tərəflər silahlara nəzarətə dair yeni model barədə razılığa gəlsinlər", — deyə o bildirib.

Ekspert onu da əlavə edib ki, ABŞ-ın qarşılıqlı məsləhətləşmələrin mövzuları sırasına kibertəhlükəsizlik problemini daxil etməsi də kifayət qədər əhəmiyyətli görünür. Əvvəllər bu cür fikirlərə Amerika tərəfi mənfi münasibət bəsləyirdi və Moskvanı heç bir sübut olmadan haker hücumlarında ittiham etməyə üstünlük verirdi.

Daha sonra Kortunov deyib ki, səfirlərin qarşılıqlı surətdə Moskva və Vaşinqtona qaytarılması da müəyyən nikbinlik doğurur. Lakin ekspert onu da qeyd edib ki, diplomatik münasibətlərin tam bərpası üçün bu kifayət deyil.

"Səfirlər bir növ "general"lardır. Amma istənilən generalların "ordusu" olmalıdır. Bu o deməkdir ki, hər halda səfirliklərin işini tam həcmdə bərpa etmək, diplomatları, konsulluq xidmətlərini qaytarmaq lazımdır", — deyə mütəxəssis bildirir.

Rusiya elmlər akademiyası ABŞ və Kanada İnstitutunun direktoru Valeri Qarbuzov hesab edir ki, Rusiya-ABŞ münasibətlərində çoxlu problem qalaqlanaraq qalıb və onlar elə ilk görüşdən sonra yoxa çıxmayacaq.

"Zirvə görüşü məsləhətləşmələrə, danışıqlara start verməlidir. Əgər işçi qruplar formalaşdırılsa, görüşlər başlasa və bütün bunları dövlət başçılarının telefon danışıqları və əyani görüşləri tamamlasa, o zaman dialoq bərpa olunacaq. Nəticələri artıq yaxın həftələr ərzində görəcəyik", — deyə ekspert proqoz verib.

Trampın getdiyi yolu təkrar etməmək

Qarbuzov hesab edir ki, Cenevrə sammiti qeyri-iradi olaraq Vladimir Putinlə Donald Tramp arasında 2018-ci ilin iyulunda – demək olar ki üç il əvvəl Helsinkidə keçirilən görüşlə müqayisə olunur.

"Trampla danışıqlardan da hamının çoxlu gözləntiləri vardı. Bəziləri bu görüşü hətta tarixi görüş hesab edirdilər. Söhbət xoş keçmişdi, hamının üzündə təbəssüm vardı. Nəticədə isə hər şey "qum dəryasında batdı". Cenevrədəki zirvə görüşü barədə də gələcəkdə eynilə bu cür danışmağı istəməzdim", — deyə ekspert fikirlərini bölüşüb.

Kortunov bildirir ki, bununla yanaşı, Putunlə görüşün kifayət qədər tez təşkil olunması Baydenin xeyrinədir. ABŞ-ın əvvəlki prezidenti Donald Trampa Rusiya lideri ilə ilk və son ayrıca görüşün keçirilməsi üçün il yarım vaxt lazım olmuşdu.

Qarbuzovun qənaətinə görə, daha bir fərq isə Bayden və Tramp administrasiyalarının Rusiya-ABŞ münasibətlərini müxtəlif cür qəbul etməsindədir.

"Ağ Evin hazırkı rəhbərliyi Rusiyaya qarşı "yeni" adlandırılan münasibətdən – seçmə əməkdaşlıqdan danışır. Bu ilişmək üçün çox yaxşı bir səbəbdir. Gələcək əməkdaşlığın əsas xətti silahlara nəzarət, strateji təhlükəsizlik problemləri ola bilər. Gələcəkdə gündəliyi genişləndirmək olar. Görüşün nəticələri əsasında tərəflərin imzaladığı bəyannamə çox şey vəd edən bir başlanğıcdır", — deyə ekspert bildirib.

Avropa, sanksiyalar və Ukrayna

Valeri Qarbuzovun fikrincə, ABŞ-Rusiya münasibətlərində hətta kiçik bir "istiləşmə" Vaşinqtonun avropalı müttəfiqlərinin anti-Rusiya ritorikasının zəifləməsini qaçılmaz edəcək. Odur ki, sammitin müsbət nəticələnməsi geosiyasi cəhətdən Moskva üçün sərfəlidir.

"Artıq Brüsseldə Rusiya ilə əməkdaşlıq tərəfdarları üçün bir qədər rahat olacaq. Çünki Aİ-nin nəzərləri istənilən halda Vaşinqtona yönəlir. Onlar ABŞ-ın Rusiyaya münasibətdə mövqeyini nəzərə alırlar. Hesab edirəm ki, Almaniya, İtaliya və Fransadakı həmkarlarımız üçün yeni təşəbbüslər irəli sürmək, Moskva ilə qarşılıqlı fəaliyyətə dair yeni formatlar təklif etmək Cenevrədəki görüşdən əvvəlkinə nisbətən daha asan olacaq", — deyə Kortunov həmsöhbəti ilə razılaşıb.

Ekspert həmçinin danışıqların işi 2014-cü ilin aprelində dayandırılmış Rusiya-NATO Şurasının işinin bərpa edilməsinə kömək edəcəyini də istisna etmir. Əlaqələrin bərpası Avropada təhlükəsizliyin möhkəmləndirilməsi üçün əlavə imkanlar yarada bilərdi.

RBMŞ-nin proqram direktoru İvan Timofeyev hesab edir ki, Rusiyaya qarşı Qərb sanksiyaları məsələsində heç bir dəyişiklik baş verməyəcək.

"ABŞ-ın heç bir sanksiyası yaxın vaxtlarda ləğv olunmayacaq. Bunun üçün zəmin yoxdur. Bir sıra sanksiyalar ABŞ qanunvericiliyində təsbit olunub. Bayden yalnız onların təsirini dayandıra bilər, necə ki, "Şimal axını-2" ilə bağlı oldu. Lakin ləğv edə bilməz. Düşünürəm ki, sanksiyalar yumşalmayacaq da. Amma yeni "əjdaha" tədbirlərin olacağını da gözləmək lazım deyil", — deyə o bildirib.

Kortunov isə bildirib ki, iki ölkənin liderləri yenə də bəzi vacib məsələlərə dair qarşılıqlı anlaşmaya nail ola bilmədilər. Ekspertin fikrincə, bu cür problemli mövzulardan biri Ukraynadır. Bu məsələdə tərəflərin baxışları ciddi şəkildə fərqlənir – hələ ki, tərəflərin mövqelərinin vəhdətinə ümid etmək mümkün deyil.

"Hər iki prezident bu mövzuya toxunub, lakin heç bir razılığa gəlmədilər. Ümumi bir anlaşma var ki, Minsk razılaşmalarına riayət olunmalıdır. Problem ondadır ki, həmin razılaşmalara riayət olunması Rusiya və ABŞ tərəfindən fərqli başa düşülür. Düstur təkrar olundu, lakin hər kəs öz fikrində qaldı. Ukrayna məsələsi qaldırılırdı, lakin bu istiqamətdə irəliləyiş əldə olunmadı", — deyə İvan Timofeyev fikrini tamamlayıb.

4148
 S7 Airlines aviaşirkətinin sərnişin təyyarəsi, arxiv şəkli

Mahaçqaladan Bakıya birbaşa aviareys olacaq

67
S7 Airlines aviaşirkəti Dağıstan Respublikasından Azərbaycana ilk uçuşunu iyulun 4-də həyata keçirəcək.

 

BAKI, 19 iyun — Sputnik. İyulun 4-dən etibarən Mahaçqala ilə Bakını birbaşa aviareys bağlayacaq. Mahaçqala hava limanının mətbuat xidmətindən bildirildiyinə görə, biletlər artıq satışdadır.

Mahaçqaladan Bakıya ilk uçuş iyulun 4-ü Bakı vaxtı ilə 02:05-ə S7 Airlines aviaşirkətinin təyyarəsi ilə həyata keçirilməlidir.

Boeing 737-800 176 sərnişin tutur. Azərbaycan paytaxtına reyslər hər həftə şənbədən bazara keçən gecə həyata keçiriləcək.

Azərbaycana gələn bütün 1 yaşdan 18 yaşadək olan sərnişinlərin uçuşdan əvvəl 72 saat ərzində verilmiş COVID-19-a dair PCR testinin neqativ nəticəsini təsdiq edən rəsmi sənəd təqdim etməlidirlər.

Yaşı 18-dən yuxarı olan sərnişinlərin tam vaksinasiya olunması və ya COVID-19 xəstəliyindən sağalması barədə müvafiq ölkənin verdiyi rəsmi sənədin (COVID Pasport) və uçuşdan əvvəl 72 saat ərzində verilmiş COVID-19-a dair PCR testinin neqativ nəticəsini təsdiq edən rəsmi sənəd təqdim etməlidirlər.

S7 aviaşirkəti iyunun 15-dən Samaradan Bakıya aviareyslər həyata keçirir.

Həmçinin aviaşirkət iyunun 23-dən Krasnoyarsk-Bakı-Krasnoyarsk marşrutu üzrə uçuşlar həyata keçirəcəklər.

Azərbaycanda fvqustun 1-dək xüsusi karantin rejimi qüvvədədir. Quru yolla beynəlxalq sərnişin daşımaları praktiki olaraq kəsilib, avianəqliyyat isə yalnız xüsusi uçuşlar həyata keçirir.

67